Numeri
16 Kora kwa zire kumwe naDatani naAbiramu vana vaEliyaba ntani naOno munaPereti gomoruvharo rwaRubena. Kora kwa kere munaIsihara, Isihara kwa kere munaKohati ano Kohati kwa kere munaRevhi. 2 Vagara owo ntani nomasimbi 250 kwa rwanesere Mosesa. Masimbi ogo kwa ga horowere ga pitisire ntani ago kwa divikwire. 3 Awo kwa pongere va rwanese Mosesa naArona ntani kwa tente asi: “Tuna mu roroka one! Vaisraeli navenye va pongoka ntani Jehova kwa kara mokatji kawo. Morwasinke nye muna kulinenepekera mu pitakane mbunga zaJehova?”
4 Apa ga yi zuvhire Mosesa eyi, ta tu nongoro a linyongamene. 5 Makura ta tantere Kora ntani nava va mu kwatesere ko asi: “Jehova nga divisa ngurangura ogu ga hama kwendi nogu ga pongoka ntani ogu na vhura kumuhedera, ano ogu nga horowora yige nga mu hedera. 6 Kora kumwe nava ava kukwatesa ko, ngomu rugane eyi: ngomu guse yipana yomundiro, 7 mu ture po mundiro ntani yitutumikidiso makura ngomu yi ture komeho zaJehova mungura, ano mugara ogu nga horowora Jehova yige ga pongoka. Hagekeni eyi muna kurugana one vana vaRevhi!”
8 Makura Mosesa ta tantere Kora asi: “Na kanderere purakeneni nge one vana vaRevhi. 9 One ngoso kapi ya mu gwanena po kweyi ga mu horowora Karunga mokatji koVaisraeli ntani kweyi ga mu pulisira mu mu hedere, yipo mu rugane konkongoronzugo zaJehova mu vatere Vaisraeli ndi? 10 Ntani kweyi ga mu hedesera kwendi, nove noVarevhi vakweni ndi? Ngoso one hena kuna hara kugusa noupristeli ndi? 11 Eyi yiyo ono kurwanesera Jehova kumwe nava vana kukukwatesa ko. Age Arona yisinke ga mu rugana eyi muna kumusivanena?”
12 Konyima, Mosesa ta tumu vantu va ka zigide Datani naAbiramu, vana vaEliyaba, nye awo tava ka tanta asi: “Kapi tuna kuwiza ko ose! 13 Nani kapi ya kugwanena po kweyi wa tu gusa mosirongo esi sa zura masini nousi, o ya tu dipagere momburundu ndi? Ngesi ono hara hena o tu pangere ndi? 14 Kupi sina kara sirongo esi sa zura masini nousi oku wa tente asi ngo tu twara, nomapya noyikunino yomandjembere eyi wa tente asi ngo tu pa? Ono hara vagara ava va ku kwame ngwendi vatwiku ndi? Ose kapi tuna kuwiza ko!”
15 Mosesa makura ta handuka unene, ta tantere Jehova asi: “Wa ha tambura nzambo zawo zombuto. Ame kapi na gusa nampili sindongi sawo simwe ndi ni va rugane yoyidona.”
16 Mosesa ta tantere Kora asi: “Mungura ngo ze komeho zaJehova novakweni ava ava kukwatesa ko ntani naArona. 17 Nkenye ogu nga guse sipana sendi somundiro a ture po yitutumikidiso makura nga yi tware komeho zaJehova. Vagara ava ava kukwatesa ko ngava simbe yipana yawo yomundiro 250, makura ngava wize kumwe nove naArona noyipana yeni yomundiro.” 18 Makura navenye tava gusa yipana yawo yomundiro, tava tura po mundiro noyitutumikidiso, tava ka sikama pevero lyonkongoronzugo* kumwe naMosesa ntani naArona. 19 Apa ga ka sikire Kora novantu ava va mu kwatesere ko pevero lyonkongoronzugo, uyerere waJehova makura ta u monekere mbunga nazinye.
20 Jehova makura ta tantere Mosesa naArona asi: 21 “Tundeni mo mokatji koVaisraeli, yipo ni va zonagure po usimbu-simbu.” 22 Makura tava tu nongoro nokulinyongamena, tava tanta asi: “Ove Karunga ogu ga pa vantu eparu, nzo zomuntu gumwe yizo nazi kuninkisa o handukire mbunga nazinye ndi?”
23 Jehova makura ta tantere Mosesa asi: 24 “Tantera Vaisraeli asi: ‘Tundeni ko kotende zaKora naDatani ntani naAbiramu!’”
25 Makura Mosesa ta zi kwaDatani naAbiramu, ntani age kwa zire nomasimbi goVaisraeli. 26 Age ta tantere Vaisraeli asi: “Na kanderere tundeni ko konotende dovagara ava wovadona ntani mwa ha kwata yininke yawo, yipo va dire kumuzonagura morwa nonzo dawo.” 27 Awo tava tundu ko usimbu kotende zaKora naDatani ntani naAbiramu, makura Datani naAbiramu tava pwaga, va sikame pevero lyonotende dawo kumwe novakadi vawo novana vawo wovakondi nava wovanona.
28 Mosesa ta tanta asi: “Apa yipo nomu yi divira asi Jehova yige ga tuma nge ni rugane yininke nayinye eyi, nye kapisi nyame na yi panga: 29 Vagara ava nsene nava fa ngwendi moomu ava fu vantu navenye ntani nsene nava va tengeka ngwendi moomu ava tengeke vantu navenye, ngoso Jehova kapi ga tuma nge. 30 Nye Jehova nsene na rugana sitetu pokuninka evhu* li va mine kumwe noyininke yawo va va vhumbike awo simpe vazuni, one ngomu diva asi vagara ava kapi va fumadeka Jehova.”
31 Tupu ga mene kuuyunga, evhu ta li gaguka. 32 Makura ta li va mini kumwe nomapata gawo ntani nanavenye ava va kwatesere ko Kora noyiweka yawo nayinye. 33 Makura Kora nanavenye ava va mu kwatesere ko, ta li va mini evhu,* ta li va vhumbike awo simpe vazuni. Awo kwa dongonokere mo mokatji koVaisraeli. 34 Vaisraeli navenye kwa kere nowoma makura tava ka duka oku tava zigire asi: “Evhu kuvhura li tumine nose!” 35 Makura mundiro ta gu tundu kwaJehova, ta gu hwike vagara 250 ava va zembe yitutumikidiso.
36 Jehova ta tantere Mosesa asi: 37 “Tantera Eliyasara muna mupristeli Arona a guse yipana yomundiro eyi yina kupya, yeeyi ayo kwa pongoka. Mu tantera hena a ka zugumine makara gomundiro koure. 38 Yipana yomundiro yovagara ava vana fu morwa nzo zawo, va hepa kuyihambura yikare tuvera totununu va tu ture kosizambero, yeeyi ayo kuna gavere po nzambo kwaJehova makura yina pongoka. Ayo nga yi kare sidiviso serondoro koVaisraeli.” 39 Makura mupristeli Eliyasara ta gusa yipana yomundiro yongoporo yovagara ava va hwikire, ta yi hambura a yi ture kosizambero 40 ngwendi moomu ga mu tanterere Jehova kupitira mwaMosesa. Ayo kwa diworokesere Vaisraeli asi kwato muntu ogu va dira kupulisira,* nga zamba yitutumikidiso komeho zaJehova, ntani yipo ngava dire kuhonena Kora novantu ava va mu kwatesere ko.
41 Nye ezuva eli lya kweme ko, Vaisraeli tava tameke kusivanena Mosesa naArona pokutanta asi: “Nyone mwa ninkisa vantu vaJehova va va dipage.” 42 Apa va pongere Vaisraeli va rwanese Mosesa naArona, awo kwa pirukilire konkongoronzugo, makura tava mono eremo lina kudumike ko, ano uyerere waJehova ta u moneka.
43 Mosesa naArona tava zi komeho zonkongoronzugo, 44 makura Jehova ta tantere Mosesa asi: 45 “One vagara, tundeni mo mokatji kombunga ezi, yipo ni va zonagure po usimbu-simbu.” Awo makura tava tu nongoro nokulinyongamena. 46 Makura Mosesa ta tantere Arona asi: “Gusa sipana somundiro o ture po mundiro goposizambero ntani noyitutumikidiso o ze usimbu kombunga o ka gave nzambo, yipo va va gusire po morwa Jehova ana handuka unene. Vantu vana tameke kufa morwa ehamba!” 47 Arona ta gusa usimbu sipana somundiro ngwendi moomu ga mu tanterere Mosesa, ta dukire mokatji kombunga, nye ehamba kwa tamekere kudipaga vantu. Makura ta tura yitutumikidiso posipana somundiro a gave nzambo, yipo vantu va va dongwenene po nonzo dawo. 48 Age kwa sikamene ngorooro pokatji kovantu wokufa ntani nava va dilire kufa, makura ehamba ta li haga. 49 Sivaro sava va fire kehamba kwa kere 14 700, kugusa ko ava va fire morwa kukwatesa ko Kora. 50 Apa ga ka tengwire Arona kwaMosesa pevero lyonkongoronzugo, ehamba nalyo lina haga.