Mbilive koVahebeli
2 Eyi yiyo ya karera nomulyo asi tu demenene unene koyininke eyi twa zuvha, yipo ngatu dire kuzapuka monzira. 2 Nsene asi nonkango edi ga uyungire Karunga kupitira movaengeli kwa sikire mo, ano ava va tezere po Veta kwava tengekere kuliza noyirugana yawo, 3 ngapi ngatu henduka nsene asi ose kwa ncenuna ezoworo lyenene? Yeeyi Hompa gwetu yige ga hovere kuuyunga kuhamena ezoworo eli, ano ava va mu zuvhire yiwo va yi tu tantera, 4 naKarunga nage kwa yi likidire asi eyi va uyungire usili* pokugava yidiviso noyitetu yokulisiga-siga ntani pokugava mpepo zendi zokupongoka moomu ga yi harerere.
5 Yeeyi Karunga kapi ga ninka vaengeli ngava ka pangere uzuni wokomeho ou tuna kuudisa. 6 Mbangi zimwe kwa tjenge asi: “Muntu yisinke nye omu gazadare, ndi a kare munwamuntu omu pakere mbili? 7 Ove kwa ninkire vaengeli va mu pitakane, yiyo wa mu dwareka nkata zouyerere nefumano ntani yiyo wa gava nayinye mepangero lyendi. 8 Ove kwa tura yininke nayinye konhi zonompadi dendi.” Pokugava yininke nayinye kwendi, Karunga kwato eyi ga hupisa ko yi dire kukara mepangero lyendi, nampili ngomu atu dili kumona yininke nayinye eyi ya kara mepangero lyendi. 9 Nye ose kumona Jesus ogu va nunupikire va mu pitakane vaengeli, age kwa mu dwareka nkata zouyerere nefumano, yeeyi age kwa mu hepekere dogoro konomfa yipo a fire vantu navenye morwa nkenda zaKarunga zonene.
10 Yininke nayinye kwa karera po mokuyererepeka Karunga ntani ayo kwa wiza po kupitira mwendi. Mokuninka asi va yererepeke vana vaKarunga wovanzi, ayo ya wepe asi Karunga a pulisire mugavi geparu a hepe. Karunga kuvazowora kupitira mwendi. 11 Jesus kumwe nava a pongora, navenye guhyawo gumwe tupu, eyi yiyo a dilire kulifa nomuga kuvatumbura asi vamumbya vendi, 12 ngomu ga tanta asi: “Ngani kudivisa kovamumbya vange ntani ngani kuhamberera nononsumo mombungakriste.” 13 Ntani asi: “Ame ngani mu huguvara.” Ntani hena asi: “Tareni! Name novanona ava ga pange Jehova.”
14 Mokumona asi “vanona” kwa kere vantu,* nage kwa ya kere muntu, yipo asi kupitira monomfa dendi a zonagure po Muzonaguli ogu ga kara nononkondo dokuretesa po nomfa, 15 ntani yipo a mangurure navenye ava va kara moupika wokutjira nomfa. 16 Yeeyi kapisi vaengeli ana kuvatera, nye age kuna kuvatera ruvharo* rwaAbirahamu. 17 Age ga hepere kukara ngwendi vamumbya vendi mwanayinye, a kare mupristeli gomunene gonkenda ntani gomulimburukwi koyininke eyi ya hamena kwaKarunga yipo a gave nzambo* morwa nonzo dovantu. 18 Mokumona asi nage kwa hepere apa va mu hetekere, age kuvhura kuvatera ava vana kupita momaheteko.