Vakolinte wokuhova
14 Twikireni kulikida eharo oku tomu kondjere mauhwi gopampepo, nye unene po yokuuyunga mbudi zaKarunga. 2 Yeeyi ogu a uyunga momaraka kapisi vantu a uyungisa nye Karunga, yeeyi kwato ogu a kwata egano eyi a uyunga morwa age kuuyunga yihoramo yaKarunga kupitira mompepo zokupongoka. 3 Nye nkenye ogu a uyunga mbudi zaKarunga kunkondopeka nokukorangeda nokuhengagwida vantu nononkango dendi. 4 Ogu a uyunga momaraka kulinkondopeka mwene nye ogu a uyunga mbudi zaKarunga kunkondopeka mbungakriste. 5 Ame kuna hara namuvenye mu uyunge momaraka nye unene po ame kuna mu harere mu uyunge mbudi zaKarunga. Ogu a uyunga mbudi zaKarunga ga pitakana ogu a uyunga momaraka ntudi va yi toroke* yipo yi nkondopeke mbungakriste. 6 Vakwetu, nsene ni wiza kweni ni uyunge momaraka, ngapi omu ngayi mu vatera eyi? Mokumuvatera, ntudi na hepa kumutantera mbudi ezi na gwana kwaKarunga ndi ediwo ndi ni udise mbudi zaKarunga ndi erongo.
7 Ayo ya lifana noyininke ya hana mwenyo eyi ayi hagara, ngwendi kapyororo ndi siumba. Ngapi nye omu no diva muhagaro gokapyororo nogu gosiumba nsene asi ayo kuna kuyisika monkedi zokulifana? 8 Nsene asi ogu ana kufuda rumbendo royita a dira kurufuda nawa, yilye ogu na liwapaikira yita? 9 Ayo ya lifana, nsene o ruganesa nonkango doudigu kukwata egano, ngapi omu nava diva eyi ono kuuyunga? Ayo tayi kara ngwendi ove kuna kuuyunga mompepo. 10 Mouzuni kwa kara mo maraka gomanzi nye simpe nagenye kutanta yuma. 11 Yeeyi nsene ni dira kukwata egano nonkango dogu ana kuuyungisa nge meraka lyapeke, tani kara ngwendi munayirongo kwendi, ano nage ta kara munayirongo kwange. 12 Mokumona asi none muna hara va mu pe mauhwi gompepo, kondjereni kugwana mauhwi gomanzi aga ngaga nkondopeka mbungakriste.
13 Yipo nye, ogu a uyunga momaraka, a toroke* eyi ana kuuyunga. 14 Nsene ni kanderera meraka limwe, ame kukanderera morwa uhwi ou va pa nge wompepo zokupongoka nye kapi ani yi kwata egano. 15 Yisinke nye ngani rugana? Ngani kanderera kupitira mouhwi ou va pa nge wompepo zokupongoka meraka eli ani kwata egano. Ngani hamberera Karunga mononsumo kupitira mouhwi wompepo zokupongoka nye ngani dimba hena meraka eli ani kwata egano. 16 Nsene o hamberera Karunga kupitira mouhwi wompepo zokupongoka, ngapi nye omu muntu gwapeke na tanta asi “Amen” komakanderero goge age ga hana kudiva eyi ono kuuyunga? 17 Yimo, ove kuna kukanderera monkedi zongwa nye kapi yina kunkondopeka mukweni. 18 Tani pandura Karunga kweyi ani uyunga momaraka gomanzi kupitakana namuvenye. 19 Hansa kwange kuuyunga mombungakriste nonkango ntano edi ava vhuru kukwata egano mevango lyokuuyunga nonkango mayovi murongo edi ava dili kukwata egano vantu.
20 Vakwetu, mwa ha kara sinona monondunge nye kareni sinona moudona, ano monondunge kareni sikurona. 21 MoVeta kwa tjanga mo asi: “‘Ngani ruganesa vantu ava ava uyunga maraka gapeke novanayirongo ni uyungise vantu ava nye napo si kapi ngava purakena nge,’ yimo ana kutanta Jehova.” 22 Yipo nye asi maraka kapisi sidiviso sava va pura nye sava va dira kupura ano kuuyunga mbudi zaKarunga kapisi yava va dira kupura nye yava va pura. 23 Nsene mbungakriste nazinye zi ponga kumwe pevango limwe, zi uyunge momaraka makura pa wize vantu vapeke ndi ava va dira kupura, kapi nava uyunga nani asi muna zaruka? 24 Nye nsene mu uyunga mbudi zaKarunga makura pa wize ogu ga dira kupura ndi muntu gwapeke, nonkango deni tadi mu tumangeda yipo a likonakone mwene a rugane ko yuma. 25 Ta diva eyi ya horama momutjima gwendi noku mu tumangeda a karere Karunga pokutanta asi: “Karunga sili mokatji keni ga kara.”
26 Vakwetu, momapongo geni vamwe veni kudimba, ava vamwe kuronga, vamwe kuuyunga mbudi ezi va gwana kwaKarunga, ava vamwe kuuyunga momaraka ntani vamwe kutoroka maraka ogo. Nye ngapi omu ya fira kuyirugana nayinye oyo? Omu yi rugane mokulinkondopeka. 27 Nsene asi gumwe ta uyunga momaraka, pa kare tupu vantu vavali ndi vatatu ano va li pe marufo ntani pa kare gumwe ogu na toroka. 28 Nye nsene kwato gokutoroka mombungakriste, a mwene nokuuyungisa Karunga momutjima gwendi. 29 Va uyunge tupu vaporofete vavali ndi vatatu ano wokuhupa ko va purakene yipo va dive asi yisinke vana tamba. 30 Ano nsene gumwe a gwana mbudi zaKarunga age haga hingilira, ogu ana kuuyunga a mwene. 31 Yeeyi namuvenye kuvhura mu li pe marufo gokuuyunga yipo navenye va lironge ntani yi va korangede. 32 Vaporofete va hepa kuruganesa nawa uhwi wompepo. 33 Yeeyi Karunga kapi ga hara epiyagano nye age kwa hara mbili.
Moomu tupu ya kara monombungakriste dovapongoki, 34 vakadi ava mwene monombungakriste, yeeyi kapi va va pulisira kuuyunga. Nye ava limburukwe ngamoomu za tanta Veta. 35 Nsene vana hara kulironga yuma, ava pure vagara vawo komambo yeeyi ayo eswau komukadi nsene a uyunga mombungakriste.
36 Nani nonkango daKarunga kweni da tundilira, ndi nyonelike tupu va di pa?
37 Nkenye ogu a gazara asi muporofete ndi asi kwa gwana uhwi wompepo zokupongoka, ga hepa kuyitambura asi yininke eyi nina kumutjangera kuna kara mpangera zaHompa. 38 Nye nkenye ogu ana kuyinyoka, nage ngava mu nyoka.* 39 Yipo nye asi vakwetu, twikireni kuuyunga mbudi zaKarunga nye mwa ha silika kuuyunga momaraka. 40 Nye nayinye omu yi rugane monkedi zongwa zokuliza.