Buke zaMateusa
22 Jesus makura ta va tantere hena moyifanekeso asi: 2 “Uhompa wemeguru kuvhura kuufanekesa nahompa ogu ga ruganenene munendi gomugara sipito sononkwara. 3 Makura ta tumu vakareli vendi va ka zigide vantu ava ga zigidire kosipito, nye awo kapi va here kuwiza. 4 Ta tumu ko hena vakareli vamwe asi: ‘Ka tantereni ava na zigida asi: “Tareni, ame nina mana kuwapaika nondya dosipito, nontwedu noyimuna yokuneta yina pu kudipaga, yininke nayinye nina mana. Wizeni kosipito sononkwara.”’ 5 Nye awo nombili si, tava ka rugana yawo, ogu gumwe kepya lyendi, mukwawo kongesefa zendi, 6 ano ava wokuhupa ko tava kwata vakareli vahompa, tava va hepeke ntani vana kuvadipaga.
7 “Hompa ta handuka, ta tumu vakwayita vendi va ka dipage vadipagi owo nokuhwika sitata sawo. 8 Makura ta tantere vakareli vendi asi: ‘Sipito sononkwara sina pu kuwapaika, nye ava na zigida kapi vana wapere kukara po. 9 Yipo nye, zendeni mononzira edi da vyuka kositata, mu ka zigide nkenye ogu, a ka wize kosipito sononkwara.’ 10 Vakareli owo tava ka za kononzira odo va ka zigide navenye ava va ka gwene ko, wovawa nava wovadona, makura evango tali zura vagenda wosipito.*
11 “Hompa apa ga hwililire a ka tare vagenda, ta mono po gumwe ogu ga dilire kudwara sikoverero sosipito sononkwara. 12 Age ta mu ninki asi: ‘Ove hewee, ee, ngapi omu ono gendi, o wize omu, ove wa hana sikoverero sosipito sononkwara?’ Gwina teete zendi. 13 Hompa makura ta tantere vakareli asi: ‘Mu mangeni komawoko nokomaguru, mu mu zugumine ponze momundema. Mwina yimo na ka lilira oku ta likwetja komazego.’
14 “Yeeyi vanzi ava zigida, nye wovasesu tupu ava horowora po.”
15 Vafalisayi makura tava zi va ka liyonge omu nava vhura kumukwata mononkango.* 16 Makura tava mu tumine varongwa vawo kumwe nava ava kwatesa ko Herodesa, va ka mu tantere asi: “Murongi, twa diva asi ove kwa hungama, yiyo o rongo usili kuhamena Karunga. Ove kapi o kondjere kuhafesa vantu ndi o tare emoneko lyomuntu lyopontunda. 17 Tu tantera, ngapi ono kugazara? Va yi pulisira* kufutira hompa gwaRoma* mutero ndi hawe?” 18 Nye Jesus nare ana diva udona wawo, ta va limburura asi: “Vayilipaki one, kuhetekera nge yisinke? 19 Likideni nge si simaliwa somutero!” Makura awo tava mu retere edenali.* 20 Jesus ta va pura asi: “Efano eli nedina eli va tjanga po lyalye?” 21 Awo tava limburura asi: “Lyahompa gwaRoma.” Makura age ta va tantere asi: “Omu futire hompa gwaRoma eyi ya mu hamena, ano Karunga nage yeeyi ya mu hamena.” 22 Apa va yi zuvhire eyi, tava tetuka, tava mu sigi, tava ka za.
23 Mezuva olyo, Vasadukayi ava va dilire kupura mevhumbuko, tava wiza, tava ya mu pura asi: 24 “Murongi, Mosesa kwa tente asi: ‘Mugara nsene a fa, age kwato vana, mumbyendi gomugara* ga hepa kukwara swara zendi, a retere po mukurwendi vana.’ 25 Pwa kere vagara ntambali. Mbeli kwa kwere, makura ta fu, age ga hana kuretera po vana. Ano mumbyendi ta kwara ogo mukadi. 26 Gwauvali nage ngosikwawo nogu gwautatu, dogoro nogu gwauntambali. 27 Moruhura, mukadi nage ta ya fu. 28 Povagara owo ntambali, mukada yilye nga ka kara pevhumbuko? Yeeyi navenye kwa mu kwere.”
29 Jesus makura ta va limburura asi: “One kwa puka, morwa kapi mwa diva Matjangwa ndi nonkondo daKarunga, 30 yeeyi pevhumbuko, vantu kapi ngava kwara. Nye ngava kara ngwendi vaengeli meguru. 31 Kapi mwa resa eyi ga uyungire Karunga kuhamena evhumbuko asi: 32 ‘Ame Karunga gwaAbirahamu naKarunga gwaIsaka naKarunga gwaJakopo’? Age Karunga govanamwenyo, nye kapisi govafe.” 33 Apa mbunga za yi zuvhire eyi, ta zi tetuka eyi ga va rongere.
34 Vafalisayi apa va zuvhire asi Vasadukayi yina va vhuru kumulimburura, makura tava lipakerere va mu wizire. 35 Makura gumwe po ogu ga divire unene Veta, ta mu heteke pokumupura asi: 36 “Murongi, sipango musinke sa pitakana po yikwawo moVeta?” 37 Age ta mu limburura asi: “‘Hara Jehova Karunga goge nomutjima goge nagunye nomwenyo* goge nagunye nonondunge doge nadinye.’ 38 Esi yiso sipango sokuhova ntani sosinene po. 39 Ano sauvali sesi asi: ‘Hara mukweni moomu wa lihara nyamoge.’ 40 Moyipango eyi yivali, yimo za korera Veta nazinye nomatjangwa govaporofete.”
41 Apa Vafalisayi va pongere kumwe, Jesus ta va pura asi: 42 “Ngapi omu gazara Kristusa, asi muna yilye?” Awo tava mu limburura asi: “MunwaNdafita.” 43 Age ta va pura asi: “Morwasinke nye mpepo zokupongoka za gendeserere Ndafita a tumbure Kristusa asi Hompa, pokutanta asi: 44 ‘Jehova kwa tanterere Hompa gwange asi: “Hingira korulyo rwange dogoro ngani ture nonkore doge konhi zonompadi doge”’? 45 Nsene asi Ndafita kwa tumbwire Kristusa asi Hompa, ngapi hena na kara munendi?” 46 Hawe, kwato ogu ga vhulire kumulimburura nampili nkango zimwe. Kutunda ezuva olyo, kwato ogu ga hetekerere ko hena kumupura.