Buke zaMateusa

6 “Omu takamese asi kapisi mu rugane yirugana yoyiwa nositambo sokulimonekesa kovantu, neisi ngomu dira kugwana mfeto kwaGuhyeni gemeguru. 2 Nsene kuna kugava yigava yonkenda,* mwa ha yi zigauka ngwendi moomu ava yi rugana vayilipaki monosinagoge nomononzira asi va gwanene po efumano. Yosili nina kumutantera asi mfeto zawo nare va zi gwana. 3 Nye nsene to gava yigava, kuwoko koge korumoho kwa ha diva eyi kuna kurugana kuwoko koge korulyo, 4 yipo yigava yoge yi kare yomokahore-hore. Ano oGuho ava ava monene mehoramo, ngava ku rugwida kuwoko.

5 “Ntani hena, nsene tomu kanderere, mwa ha kara ngwendi vayilipaki ava va hara kukanderera awo vana sikama monosinagoge napa da ligaunukira nonzira asi va va mone vantu. Yosili nina kumutantera, awo nare va gwana mfeto zawo. 6 Nye nsene to kanderere, lizedilira monzugo makura o kanderere koGuho, ano oGuho ava ava monene mehoramo, ngava ku rugwida kuwoko. 7 Nsene tomu kanderere, kapisi mu rugurure nonkango dokulifana ngwendi vantu wokonomuhoko dapeke, yeeyi awo kugazara asi Karunga nga va zuvha morwa unzi wononkango dawo. 8 Mwa ha va honena, yeeyi Guhyeni ga diva eyi mwa hepa komeho mu yi mu hundire.

9 “Nsene tomu kanderere, omu kanderere ngesi asi:

“‘Guhyetu gemeguru, edina lyoge ava li pongore.* 10 Uhompa woge u wize. Mpango zoge zi sike mo pevhu ngwendi meguru. 11 Tu pa naina nondya* detu danaina 12 ntani tu dongwenena po nonzo detu, moomu atu dongwenene po ava ava tu zonene. 13 Tu vatera ga dire kutufunda maheteko ntani tu popera* koMudona.’

14 “Yeeyi nsene mu dongwenena po vantu maunzoni gawo, Guhyeni gemeguru ngano nage nga mu dongwenena po geni. 15 Ano nsene mu dira kudongwenena po vantu maunzoni gawo, Guhyeni gemeguru nage ngano kapi nga mu dongwenena po maunzoni geni.

16 “Nsene tomu dilire nondya, walye omu kara ngwendi vayilipaki, mu guve, yeeyi awo kapi ava likuhu koyipara yawo* yipo vantu va va mone asi kuna kudilira. Yosili nina kumutantera, awo nare va gwana mfeto zawo. 17 Nye ove nsene to dilire, likuhwa kosipara nokulikwita magadi momutwe, 18 yipo vantu va dire kukumona asi ove kuna kudilira, nye o moneke koGuho, ava ava monene mehoramo. Ano oGuho ava ava monene mehoramo, ngava ku rugwida kuwoko.

19 “Hagekeni kulipongaikira emona pevhu, eli ali zonauka koyimbumburu nokonkerewe nokovawidi ava ava teza nonzugo va li vake. 20 Nye omu lipongaikire emona meguru, omu mwa dira yimbumburu nonkerewe zokulizonagura, nomu mwa dira vawidi wokuteza nonzugo, va li vake. 21 Yeeyi oku kwa kara emona lyoge, mutjima goge nago yiko gwa kara.

22 “Meho ramba zorutu roge. Nsene meho goge ga demenena kosininke simwe,* rutu roge narunye taru tema.* 23 Nye nsene asi meho goge ga demenena koyininke yoyinzi,* rutu roge narunye taru kara momundema. Ano uzera ou wa kara moge nsene u sovagana, papi nye apa ngau hura unene womundema!

24 “Kwato mukareli ogu a vhuru kukarera vahekuru vavali, morwa na nyenga po gumwe, ta hara po mukwawo, ndi na hamena kwagumwe, ta sense po mukwawo. None nokuvhura si kukarera Karunga ntani emona.

25 “Yipo nye nina kumutantera asi hagekeni kukara nosinka kuhamena eparu* lyeni asi yisinke nomu lya neyi nomu nwa, ndi marutu geni asi yisinke nomu dwara. Ee, nani eparu* kapi lya pitakana nondya, ndi ru kare rutu kapi rwa pitakana yidwara? 26 Tareni si yidira, ayo kapi ayi kunu, kapi ayi zangura, kapi hena ayi pongaikire moyihete, nye Guhyeni gemeguru kuyirera. One nani kapi mwa yi pitakana momulyo? 27 Yilye ogu a vhuru kugwederera ko keparu lyendi nampili nakauke morwasinka sendi? 28 Ano yisinke nye omu lipakerere sinka soyidwara? Lirongereni ko konombya, ado kukura da hana kurugana ko yuma yipo di moneke nawa, 29 nye ame tani mu tantere asi nampili Saromo ogu ga kere ngawo zonene, age kapi nga dwara a pitakane po nampili mbya zimwe. 30 Nsene asi Karunga yimo a dwareke ngesi yimeno eyi ayi kara po naina, nye mungura tava yi hwike, ngapi nye omu na dira kumudwareka mu pitakane yimeno eyi, one vepurogona? 31 Yipo nye, mwa ha lipakera sinka asi ‘yisinke eyi natu lya?’ ndi asi ‘yisinke eyi natu nwa?’ ndi asi ‘yisinke eyi natu dwara?’ 32 Yeeyi vantu wokonomuhoko yiwo ava lipakere sinka yininke eyi. Guhyeni gemeguru ga diva asi nayinye eyi mwa yi hepa.

33 “Hoveni tanko kutura Uhompa waKarunga nonompango dendi douhungami muhowo meparu lyeni, makura age nga mu pe yininke eyi yokuhupa ko. 34 Mwa ha kara nosinka seyi yomungura, yeeyi lyomungura noyinka yalyo. Nkenye ezuva kwa kara noyinka yalyo.