Yirugana yovapositoli
6 Momazuva gena, apa va vhukire varongwa, Vajuda ava ngava uyunga Rugereka tava tameke kusivana kuhamena Vajuda ava ngava uyunga Ruhebeli, morwa vafisavaya vawo ngava va ninkilire mo pokugavera nondya. 2 Vapositoli murongo navavali makura tava zigida varongwa navenye, tava va tantere asi: “Nokuwapasi asi tu hageke kuronga nonkango daKarunga yipo tu gavere nondya. 3 Vakwetu, horoworeni mokatji keni vagara ntambali wonkareso zongwa,* ava va kara nompepo zaKarunga nounongo, va rugane sirugana esi, 4 nye ose tatu litura mo unene mokukanderera kwaKarunga nokuronga nonkango dendi.” 5 Eyi va uyungire kwa hafesere navenye ava va kere po, makura tava horowora Sitefanesa, mugara ogu ga zulire mpepo zokupongoka ntani gepuro lyokupama, naFilipusa naPorokorusi naNikanora naTimoni naParumenasi ntani Nikorausi gokoAntiyokiya, ogu ga ya kere Mujuda. 6 Tava va twara kovapositoli, ano konyima zokukanderera, tava va kambeke mawoko.
7 Nonkango daKarunga makura tadi lihana, ano sivaro sovarongwa kwa ligwederere unene moJerusarema ntani mbunga zonene zovapristeli kwa ya kere vapuli.
8 Sitefanesa, ogu Karunga ga here noku mu pa nonkondo, kwa rugene yitetu yoyinene noyidiviso mokatji kovantu. 9 Nye vagara vamwe ava va hamenene mosinagoge* ezi ngava tumbura asi zovagara wokumanguruka, kwa wizire kumwe noVakirene noVaarekisandiliya ntani navamwe wokoKilikiya naAsiya va ya patanese Sitefanesa. 10 Nye kapi va mu vhulire morwa age kwa uyungire nounongo wounene ntani mpepo zokupongoka kwa mu vaterere. 11 Makura tava zedagwire mokahore-hore vagara vamwe va tante asi: “Tuna mu zuvhu kuna kuswaura Mosesa naKarunga.” 12 Makura tava tumangeda vantu nomasimbi ntani novalirongi womatjangwa, makura tava mu zire usimbu va ka mu kwate nokumutwara kosigongi somasimbi. 13 Makura tava reta nombangi doyimpempa edi da uyungire asi: “Mugara ogu kuswaura ntembeli zaKarunga ntani Veta. 14 Ose kuna mu zuvhu kuna kuuyunga asi Jesus Munasareta nga zungurura ezi ntembeli nokurundurura nompo edi ga sigira Mosesa vantu.”
15 Ano apa navenye ava va kere posigongi somasimbi va mu tarwilire, tava mono asi sipara sendi kuna fana ngwendi somuengeli.