Ehistoli lyauvali
25 Amasiya kwa kere nonomvhura 25 apa ga kere hompa ntani kwa pangerere moJerusarema nomvhura 29. Edina lyozina kwa kere Jehoyadani gomoJerusarema. 2 Age kwa twikilire kurugana yininke youhunga kosipara saJehova, nye kapi ga yi rugene nomutjima nagunye. 3 Apa ga ya kere nononkondo dononene, ta dipaga vakareli vendi ava va dipagere oguhwe, ava va kere hompa. 4 Nye age kapi ga dipagere vana vawo, yeeyi age kwa kweme eyi va tjenge moVeta zaMosesa. MoVeta ozo, Jehova kwa tente asi: “Vaguhya kapisi ngava va dipage morwa yirugana yovana vawo, ano vanona kapisi ngava va dipage morwa yirugana yovaguhya vawo. Nye nkenye muntu va hepa kumudipaga morwa nzo zamwene.”
5 Amasiya kwa pongaikire hena vantu womorudi rwaJuda, makura tava ninki va sikame kuliza nomazimo gawo. Ano awo kwa va pitisilire vagara ava ngava pitisire vantu mayovi ntani novagara ava ngava pitisire vantu mafere. Age kwa yi rugene eyi kovantu navenye womorudi rwaJuda noru rwaMbenyameni. Age kwa tjenge wonomvhura 20 yikandwise, ano sivaro sawo kwa kere vakwayita 300 000 ava va deura.* Awo kwa divire kuruganesa magonga ntani noyilikandwiso yoyinene. 6 Age hena kwa futire vakwayita wononkondo woVaisraeli 100 000 yisiliveli yonokilograma 3 420* yipo va ze nage koyita. 7 Nye mukareli gwaKarunga gousili ta zi kwendi, ta ka mu tantera asi: “Hompa, wa ha pulisira vakwayita woVaisraeli va ze nove koyita, yeeyi Jehova kapi ana kara noVaisraeli ndi novantu womorudi rwaEfurayimi. 8 Nye zende nyovelike koyita ntani kara nouradi. Nsene no dira kuyirugana, Karunga gousili nga kuninka o gwe komeho zononkore doge, yeeyi Karunga ga kara nononkondo dokuvatera muntu ntani dokumuninka a gwe.” 9 Makura Amasiya ta pura mukareli gwaKarunga gousili asi: “Ngapi nani rugana yisiliveli* eyi na gava kovakwayita woVaisraeli?” Mukareli gwaKarunga gousili ta mu limburura asi: “Jehova ga kara nononkondo dokukupa yininke yoyinzi kupitakana opo.” 10 Makura Amasiya ta tantere vakwayita ava va tundire koEfurayimi va tengure komambo gawo. Nye awo tava handukire unene vantu womorudi rwaJuda, tava tengura komambo gawo awo vana handuka unene.
11 Konyima, Amasiya ta kara nouradi, ta zi kumwe novakwayita vendi koMuramba goMungwa, makura ta ka dipaga vagara womoSeire 10 000. 12 Ano vagara womorudi rwaJuda kwa ka kwete vantu 10 000, makura tava va twara keguru lyemumanya, tava va zugumine pevhu makura navenye tava fu. 13 Nye vakwayita womorudi rwaEfurayimi ava ga tanterere Amasiya va tengure komambo gawo, tava zi tava ka homona yitata yorudi rwaJuda kutundilira koSamaliya dogoro koBete-horoni. Awo kwa ka dipagere vantu 3 000 ntani kwa ka gusire emona lyenzi.
14 Apa ga mene Amasiya kudipaga Vaedomu, ta gusa yikarunga yovagara womoSeire, ta tameke kuyikarera. Age kwa yi nyongamenene nokuyizambera nonzambo.* 15 Makura Jehova ta handukire unene Amasiya, ta tumu muporofete ogu ga ka mu pulire asi: “Morwasinke ono kukarerera yikarunga eyi ya dilire kupopera vantu ava wa funda?” 16 Apa ga uyungire muporofete, hompa ta mu pura asi: “Yilye ga kutura o kare mugavindunge gwange? Hagera poopo! Nsene no twikira kuuyunga ngano tava kudipaga.” Makura muporofete ta tanta asi: “Ame na yi diva asi Karunga ana tokora kukudipaga, yeeyi ove kwa rugana yininke eyi ntani kapi ono purakene eyi nina ku tantere.” Makura muporofete ogo ta mwena.
17 Kutunda opo, Amasiya hompa gorudi rwaJuda ta pura magano kovagavindunge vendi, makura ta tumu vantu kwaJehoyasi munaJehoyahasi zaJehu hompa gwaIsraeli va ka mu tantere asi: “Wiza tu ya rwe.”* 18 Jehoyasi hompa gwaIsraeli ta tumu mbudi ezi kwaAmasiya hompa gorudi rwaJuda asi: “Sihwa somega somoLibanoni kuna tumu mbudi kositji sosedeli somoLibanoni asi: ‘Ninka munoge gomukadi a kware munange gomugara.’ Nye sikasama somoLibanoni yiyo sina piti kosihwa somega makura yiyo sina si lyatanga. 19 Ove kwa tanta asi: ‘Ame* kwa funda Vaedomu,’ makura yiyo ono kulinenepeka nokuhara vantu va ku pandadeke. Nye kara mombara zoge. Morwasinke ono kulipaparera udigu nokuninkisa vantu womorudi rwaJuda va va funde kumwe nove?”
20 Nye Amasiya kapi ga yi purakenene, yeeyi Karunga gousili yige ga yi gendesere yipo a gave vantu womorudi rwaJuda momawoko gononkore dawo, morwa awo kwa karerere yikarunga yoVaedomu. 21 Makura Jehoyasi hompa gwaIsraeli ta zi a ka rwise Amasiya hompa gorudi rwaJuda moBete-semesi, sitata sorudi rwaJuda. 22 Vaisraeli tava fundu vantu womorudi rwaJuda, makura nkenye ogu ta dukire kembo lyendi.* 23 Jehoyasi hompa gwaIsraeli ta kwata Amasiya munaJehoyasi zaJehoyahasi* moBete-semesi. Amasiya kwa kere hompa gorudi rwaJuda. Makura ta twara Amasiya moJerusarema, ta ka bomona ekuma lyaJerusarema, kutundilira kErungavero lyaEfurayimi dogoro kErungavero lyemEkovhu. Kutunda kErungavero lyaEfurayimi dogoro kErungavero lyemEkovhu kwa kere sinano sokusika ponometa 178.* 24 Jehoyasi kwa gusire ngorodo nazinye nosisiliveli ntani noyipako nayinye eyi ga gwene monzugo zaKarunga gousili, eyi nga pakere mbili Obedi-edomu ntani neyi ya kere mononzugopungwiro domombara zahompa. Age kwa gusire hena nonkwate makura ta tengura koSamaliya.
25 Kutunda apa ga fire Jehoyasi munaJehoyahasi hompa goVaisraeli, Amasiya munaJehoyasi hompa gorudi rwaJuda kwa parukire nomvhura 15. 26 Ano yininke yimwe eyi ga rugene Amasiya kutunda ketamekero dogoro kehagero, kwa yi tjanga mobuke zovahompa worudi rwaJuda novahompa woVaisraeli. 27 Kutunda apa Amasiya ga hagekere kukarera Jehova, vantu vamwe womoJerusarema tava mu rwanesa makura age ta dukire koRakisi, nye awo tava tumu ko vagara vamwe koRakisi, tava ka mu dipagera kooko. 28 Makura tava tura simpu sendi metemba eli da kokere nonkambe, tava ka mu horeka oku va horeka ozinakuru, mositata sorudi rwaJuda.