Esira

10 Esira kwa lilire ntani kwa linyongamenene komeho zonzugo zaKarunga gousili apa ga kanderere a tantere Karunga nonzo doVaisraeli. Ano mbunga zovagara novakadi ntani novanona woVaisraeli kwa mu kundurukidire ntani nawo kwa lilire unene. 2 Makura Sekaniya munaJehiyeli gomoruvharo rwaEramu, ta tantere Esira asi: “Ose kwa zona kwaKarunga gwetu pokukwara* vakadi wovanayirongo. Nye nampili ngoso, ose twa kara nehuguvaro asi Karunga nga likida Vaisraeli nkenda. 3 Yipo nye, tu tuliseni po egwanekero* kumwe naKarunga gwetu, tu tjide vakadi vetu wovanayirongo novana vawo kuliza nomavyukiso gaJehova ntani neyi vana kututantera vantu ava va fumadeka nompango daKarunga gwetu. Tu sikiseni mo eyi azi tanta Veta. 4 Yipo nye Esira, katuka, yeeyi aso situmbukira soge. Ose natu kukwatesa ko. Kora ntani rugana ko yuma.”

5 Makura Esira ta katuka, ta ninki vakurona wovapristeli, Varevhi ntani noVaisraeli navenye va gane asi ngava rugana eyi vana tanta. Makura awo tava yi rugana. 6 Makura Esira ta katuka, ta tundu ko konzugo zaKarunga gousili, ta zi konzugo zokulira zaJehohanani munaEliyasibu. Nampili ngomu ga zire konzugo ozo, age kapi ga ka lire ndi a nwe mema, yeeyi age kwa guvire morwa unzoni wovantu ava va ka tundire kounkwate.

7 Makura tava divisa moJerusarema nomoyitata yapeke yomoJuda asi vantu navenye ava va ka tunda kounkwate va ponge moJerusarema. 8 Ano marenga nomasimbi kwa pere vantu mazuva gatatu yipo va wize koJerusarema. Nkenye ogu ga dilire kuyirugana, awo kwa tokwere asi ngava gusa yiweka yendi nayinye ntani ngava mu tjida mo mokatji koVaisraeli ava va ka tunda kounkwate. 9 Makura vagara navenye womorudi rwaJuda noru rwaMbenyameni tava pongo kumwe moJerusarema komeho ga pite mazuva gatatu. Awo kwa pongere mezuva 20 mokwedi kwauntane. Vantu navenye kwa hingilire meharango lyokonzugo zaKarunga gousili. Awo kwa kankamene morwa moukaro ou va kere ntani morwa mvhura zonene kwa rokere.

10 Makura mupristeli Esira ta katuka, ta va tantere asi: “One kwa zona pokukwara vakadi wovanayirongo ntani one kwa ninkisa Vaisraeli va zone unene. 11 Yipo nye, tantereni Jehova Karunga gozinyakurweni eyi mwa rugana ntani sikiseni mo mpango zendi. Likareni ure novantu womosirongo esi ntani tjideni vakadi veni wovanayirongo.” 12 Makura mbunga nazinye tazi limburura kuziguruka asi: “Ose natu rugana eyi ono tanta. 13 Nampili ngoso, ose tuvanzi unene ntani aso sinema somvhura, kapi tatu vhuru kusikama ngorooro ponze ntani udigu ou kapi tatu vhuru kuukohonona po ezuva limwe ndi gavali, yeeyi ose kwa zona unene. 14 Ninka marenga getu ga sikamene po mbunga nazinye ntani ninka vagara womoyitata yetu ava va kwara vakadi wovanayirongo, va wize posiruwo esi ngava tura po kumwe nomasimbi ntani novapanguli womoyitata va ya kohonone po udigu ou, yipo ehandu lyaKarunga gwetu ngali liture.”

15 Nye Jonatana munaAsaheli naJahaseya munaTikivha kapi va yi kwatesere ko, ano Mesuramu naSabetayi ava va kere Varevhi kwa kwatesere ko vagara owo. 16 Nye vantu ava va ka tundire kounkwate kwa kwatesere ko egano olyo ntani kwa li kweme, makura mupristeli Esira nomasimbi gomomazimo aga va horowere komadina, tava pongo velike mezuva lyokuhova mokwedi komurongo, va konakone udigu owo. 17 Ano mezuva lyokuhova mokwedi kokuhova, tava mana kukonakona udigu wovagara ava va kwere vakadi wovanayirongo. 18 Awo kwa dimbwilire asi vana vamwe wovapristeli kwa kwara vakadi wovanayirongo. Awo kwa kere: vana vamwe vaJesuwa munaJehosadaka ntani nekoro lyendi. Madina gawo kuna kara Maseya, Eliyesere, Jalibu naGedaliya. 19 Nye awo kwa tumbwidilire asi ngava tjida vakadi vawo ntani mokumona asi awo va kere nousima, nkenye ogu nga gava nzwi zongara ngonzambo zokugusa po nonzo dawo.

20 Vapristeli vamwe ava va zonene kuna kara: Hanani naSebadiya womoruvharo rwaImere; 21 Maseya, Eliya, Semaya, Jehiyeli naUsiya womoruvharo rwaHalimu; 22 Eliyoyenayi, Maseya, Isimayeli, Netaneli, Josabadi naEliyasa womoruvharo rwaPasihuru. 23 Varevhi vamwe ava va zonene kuna kara: Josabadi, Simeyi, Keraya (ndi Kelita), Petahiya, Juda naEliyesere; 24 Eliyasibu ogu nga dimbi, Sarumu, Teremu naUli ava va kere vanomeni wopomavero.

25 Vaisraeli ava va zonene kuna kara: Ramiya, Isiya, Malikiya, Miyamini, Eliyasara, Malikiya naBenaya. Awo kwa kere womoruvharo rwaParosi; 26 Mataniya, Sakaliya, Jehiyeli, Abudi, Jeremoto naEliya womoruvharo rwaEramu; 27 Eliyoyenayi, Eliyasibu, Mataniya, Jeremoto, Sabadi naAsisa womoruvharo rwaSatu; 28 Jehohanani, Hananiya, Sabayi naAtirayi womoruvharo rwaBebayi; 29 Mesuramu, Maruki, Adaya, Jasubu, Seyali naJeremoto womoruvharo rwaBani; 30 Adina, Kerali, Benaya, Maseya, Mataniya, Besareli, Binuyi naManase womoruvharo rwaPahati-mowaba; 31 Eliyesere, Isiya, Malikiya, Semaya naSimiyoni womoruvharo rwaHalimu, 32 Mbenyameni, Maruki naSemaliya ava nawo va kere womoruvharo rwaHalimu; 33 Matenayi, Matata, Sabadi, Elifereti, Jeremayi, Manase naSimeyi womoruvharo rwaHasumu; 34 womoruvharo rwaBani kwa kere: Madayi, Amuramu Uyeli, 35 Benaya, Bedeya, Keruhi, 36 Vhaniya, Meremoto, Eliyasibu, 37 Mataniya, Matenayi naJasu; 38 womoruvharo rwaBinuyi kwa kere: Simeyi, 39 Seremiya, Natana, Adaya, 40 Makinadebayi, Sasayi, Sarayi, 41 Asareli, Seremiya, Semaliya, 42 Sarumu, Amaliya naJosefa; 43 Jeyiyeli, Matitiya, Sabadi, Sebina, Jadayi, Jowera naBenaya womoruvharo rwaNebo.* 44 Vagara navenye ava kwa kwere vakadi wovanayirongo ntani awo kwa tjidire vakadi vawo wovanayirongo kumwe novana vawo.