Buke zokuhova zoVahompa
21 Konyima zeyi, eyi yiyo ya horokere: Nabota gomoJesireli kwa kere nosikunino somandjembere esi sa kere moJesireli pepi nombara zaAhaba hompa gomoSamaliya. 2 Ahaba ta tantere Nabota asi: “Pe nge sikunino soge somandjembere ni tapeke mo yikwahidi yange, yeeyi aso kwa kara pepi nombara zange. Ame ngani ku pa sikunino sapeke somandjembere sosiwa ndi nsene ono hara kuvhura ngani si rande po noyimaliwa.” 3 Nye Nabota ta tantere Ahaba asi: “Ayo kapi nayi wapa ni ku pe upingwa wozinyakurwetu, yeeyi Jehova ga yi silika.” 4 Makura Ahaba ta zi monzugo zendi age ana guwu unene morwa Nabota gomoJesireli kwa mu limbwilire asi: “Ame kapi tani vhuru kukupa upingwa wozinyakurwetu.” Ahaba ta zi a ka rare, ta pirukire kekuma ntani ta nyoka kulya.
5 Mukadendi Jesebeli ta hwilire monzugo ta mu pura asi: “Morwasinke ono guvire neyi ono kudilira kulya?” 6 Ahaba ta mu limburura asi: “Ame kuna tantere Nabota gomoJesireli asi: ‘Ninka ni rande sikunino soge somandjembere noyimaliwa ndi nsene ono hara, ninka ni ku pe sikunino somandjembere sapeke.’ Nye age yiyo ana tanta asi: ‘Ame kapi nani ku pa sikunino sange somandjembere.’” 7 Mukadendi Jesebeli ta mu tantere asi: “Nani ove kapisi nyove hompa goVaisraeli? Pinduka o lye ntani kapisi o kare nosinka hena. Ame nani ku pa sikunino somandjembere saNabota gomoJesireli.” 8 Makura Jesebeli ta tjanga nombilive medina lyaAhaba, ta tura po sinongweneso saAhaba. Ta tumu nombilive odo komasimbi ntani kovanekuto ava va tungire mositata omu ga tungire Nabota. 9 Monombilive odo, age kwa tjenge mo asi: “Tantereni vantu va dilire ntani tantereni Nabota nga hingire komeho zovantu. 10 Konyima ngomu tantere vagara wokudira mulyo va hingire komeho zendi ntani va mu rundire asi: ‘Ove kwa swaura Karunga ntani hompa!’ Makura ngomu mu tware ponze mu ka mu dipage nomamanya.”
11 Makura masimbi novanekuto ava va tungire mositata esi ga tungire Nabota, tava rugana eyi ga va tjangerere Jesebeli monombilive edi ga va tuminine. 12 Awo tava tantere vantu va dilire ntani tava tantere Nabota a hingire komeho zovantu. 13 Makura vagara vavali wokudira mulyo tava wiza va hingire komeho zaNabota, tava mu rundire komeho zovantu asi: “Nabota kwa swaura Karunga ntani hompa!” Konyima tava mu pwagesa ponze zositata, tava ka mu dipaga nomamanya. 14 Makura tava tumu mbudi kwaJesebeli asi: “Nabota vana mu dipaga nomamanya.”
15 Apa ga zuvhire Jesebeli asi Nabota vana mu dipaga nomamanya, ta tantere Ahaba asi: “Zende o ka guse sikunino somandjembere saNabota gomoJesireli esi ga nyokere kukurandesa noyimaliwa, yeeyi Nabota ana fu.” 16 Apa ga yi zuvhire Ahaba asi Nabota ana fu, ta katuka a ze kosikunino somandjembere saNabota gomoJesireli a ka si guse.
17 Nye Jehova ta tantere Eliya gomoTisibe asi: 18 “Zende kwaAhaba hompa gwaIsraeli ogu ana kara moSamaliya. Age kuna kara mosikunino somandjembere saNabota ntani age kuna zi a ka si guse. 19 Ka mu tantere asi: ‘Jehova kuna kutanta asi: “Ove kwa dipaga muntu ntani kwa gusa sikunino sendi.”’ Ka mu tantere hena asi: ‘Jehova kuna kutanta asi: “Pevega eli dina rasere nombwa honde zaNabota, yipo ngadi rasera nombwa honde zoge.”’”
20 Ahaba ta tantere Eliya asi: “Ove nkore zange nani wa zuvha eyi na rugana?” Eliya ta limburura asi: “Nhi, na yi zuvha. Karunga kuna kutanta asi: ‘Mokumona asi ove kwa tokomena kurugana yininke yoyidona kosipara sange ame Jehova, 21 ame ngani kuretera udigu ntani ngani kuzonagura po kumwe novagara navenye* vemepata lyoge, kukwatera mo ava va dira epopero ntani nononkondo moIsraeli. 22 Ntani ame ngani ninka epata lyoge li fane ngwendi epata lyaJerobiyamu munaNebata ntani ngwendi epata lyaBasa munaAhiya, yeeyi ove kwa handukisa nge ntani kwa ninkisa Vaisraeli va rugane yininke yoyidona.’ 23 Ntani Jehova kuna tanta asi: ‘Jesebeli ngadi mu lya nombwa mepya lyomoJesireli. 24 Nkenye ogu gemepata lyaAhaba ogu nga fira mositata, ngadi mu lya nombwa. Ano nkenye ogu nga fira ponze zositata, ngayi mu lya yidira. 25 Kwato muntu ogu ga fana ngwendi Ahaba, ogu ga tokomena kurugana yininke yoyidona kosipara saJehova. Ano mukadendi Jesebeli yige a mu tumangeda a yi rugane. 26 Age kwa rugana yininke yoyidona unene pokukarera yikarunga yokunyata ngwendi moomu ngava yi rugana Vaamoli ava ga tjidire Jehova komeho zoVaisraeli.’”
27 Apa ga zuvhire Ahaba nonkango edi, ta taura yikoverero yendi ntani ta dwara nsako. Age kwa dililire ntani kwa rere age ana dwara nsako nokugendagura age ana guwu. 28 Makura Jehova ta tantere Eliya gomoTisibe asi: 29 “Ono mono omu ana linunupike Ahaba morwa eyi nina mu tantere? Mokumona asi age kuna linunupike komeho zange, ame kapi ngani reta udigu posiruwo sendi, nye ame ngani retera epata lyendi udigu apa nga pangera munendi.”