Buke zokuhova zoVahompa
22 Vasiliya noVaisraeli kapi va lirwanesere ure wonomvhura ntatu. 2 Momvhura zautatu, Jehosafata hompa gorudi rwaJuda ta zi kwa hompa gwaIsraeli. 3 Makura hompa gwaIsraeli ta tantere vakareli vendi asi: “Mwa yi diva asi sitata saRamoto-giliyata setu ndi? Nye ose kuna kuliranga kusigusa kwahompa gwaSiliya.” 4 Makura hompa gwaIsraeli ta pura Jehosafata asi: “Kuvhura o ze kumwe name tu ka rwe yita koRamoto-giliyata ndi?” Jehosafata ta limburura hompa gwaIsraeli asi: “Ose vantu vamwe tupu. Ame ngani za kumwe novantu vange ntani nononkambe dange.”
5 Nye Jehosafata ta tantere hompa gwaIsraeli asi: “Na kanderere, pomuhowo pura ko Jehova.” 6 Makura hompa gwaIsraeli ta pongaike vaporofete wokusika koyiha 400, ta va pura asi: “Ni ka rwise sitata saRamoto-giliyata ndi?” Awo tava mu limburura asi: “Zende, Jehova na ka gava sitata oso momawoko goge.”
7 Makura Jehosafata ta pura asi: “Mwato muporofete gwaJehova mositata esi, yipo nage a tu pulire ko ndi?” 8 Hompa gwaIsraeli ta tantere Jehosafata asi: “Pweli mugara gumwe ogu natu pulira ko kwaJehova nye ame kwa mu nyenga, yeeyi age nkenye apa kapi a porofeta yininke yoyiwa kuhamena nge. Edina lyendi Mikaya munaImura.” Nye Jehosafata ta tanta asi: “Nokuwapa si hompa a uyunge yininke yokufana ngoso.”
9 Makura hompa gwaIsraeli ta zigida erenga limwe, ta li tantere asi: “Ka zigide usimbu Mikaya munaImura.” 10 Hompa gwaIsraeli naJehosafata hompa gorudi rwaJuda, navenye kwa dwere yikoverero yawo youhompa ntani kwa hingilire poyipundi yawo youhompa porupare oru rwa kere pevero lyositata saSamaliya, ano vaporofete navenye kwa porofetere komeho zawo. 11 Makura Sedekiya munaKenana ta rugana nombinga dosivera, ta tanta asi: “Jehova kuna kutanta asi: ‘Ove ngo twa* Vasiliya nonombinga edi dogoro ngo va dipage navenye.’” 12 Vaporofete navenye nawo kwa pumbire yininke yokulifana. Awo kwa mu tanterere asi: “Zende kositata saRamoto-giliyata, ove ngo ka funda. Ano Jehova nga si gava momawoko goge.”
13 Muntu ogu va tumine a ka zigide Mikaya kwa ka mu tanterere asi: “Vaporofete navenye kuna porofeta yininke yokulifana ntani yoyiwa kuhamena hompa. Na kanderere, ninka nove o ka uyunge yininke yoyiwa ngwendi yeeyi vana uyunga.” 14 Nye Mikaya ta tanta asi: “Ame tani gana kwaJehova Karunga goMunamwenyo asi ame tani ka uyunga eyi na tantera nge Jehova.” 15 Makura Mikaya ta zi kwahompa, ano hompa ta mu pura asi: “Mikaya, tu ze tu ka rwise sitata saRamoto-giliyata ndi?” Age ta limburura asi: “Zendeni ntani one ngomu ka funda, ano Jehova nga si gava momawoko geni.” 16 Makura hompa ta mu pura asi: “Yikando yingapi ngani kupura o tantere nge usili medina lyaJehova?” 17 Mikaya ta tanta asi: “Ame kuna kumona Vaisraeli vana lihanene konondundu ngwendi nonzwi da hana musita. Jehova kuna kutanta asi: ‘Vantu ava kwato mupitisili ntani nkenye ogu a tengure kembo lyendi mombili.’”
18 Hompa gwaIsraeli ta tantere Jehosafata asi: “Ame nina ku tantere asi age kapi a porofeta yininke yoyiwa kuhamena nge.”
19 Mikaya ta tanta asi: “Purakena kononkango daJehova: Ame kuna mono Jehova ana hingire posipundi sendi souhompa ntani vakwayita vendi vemeguru kuna sikama pepi nendi korulyo nokorumoho. 20 Makura Jehova yiyo ana tanta asi: ‘Yilye ogu na za a ka kumbagere Ahaba yipo a ze va ka mu dipage koRamoto-giliyata?’ Vaengeli yiyo vana mu tantere yininke yokulisiga-siga. 21 Makura muengeli gumwe yiyo ana wiza a ya sikame komeho zaJehova, yiyo ana tanta asi: ‘Nani za ni ka mu kumbagere.’ Ano Jehova yiyo ana mu pura asi: ‘Ngapi omu no ka yi rugana?’ 22 Age yiyo ana limburura asi: ‘Ame tani zi ni ka ninkise vaporofete vendi navenye va ka uyunge yimpempa.’ Makura age yiyo ana tanta asi: ‘Ove no ka mu kumbagera ntani nayi ka kutompoka. Zende o ka yi rugane.’ 23 Yipo nye, Jehova kuna tumu muengeli a ya ninkise vaporofete woge navenye va uyunge yimpempa, nye Jehova kuna tanta asi ta ku retere udigu.”
24 Sedekiya munaKenana ta kapura Mikaya ketama, ta mu pura asi: “Ove kuna hara kutanta asi muengeli gwaJehova kuna sigi nge ame, a ka uyunge nove? Nzira zipi ana piti?” 25 Mikaya ta mu limburura asi: “Ove ngo mona nzira ezi ana piti, ezuva eli ngo za monzugo zomonda o ka vande.” 26 Makura hompa gwaIsraeli ta tanta asi: “Guseni Mikaya mu mu tware kwaAmoni mukurona gositata ntani kwaJowasi munahompa. 27 Ka va tantereni asi: ‘Hompa kuna kutanta asi: “Tureni Mikaya modorongo ntani mu pe ni mboroto nomema gomasesu dogoro apa ngani ka tengura mombili.”’” 28 Nye Mikaya ta tanta asi: “Nsene no ka tengura mombili, Jehova kapi ana uyunga name.” Ta tanta hena asi: “Purakeneni one vantu navenye.”
29 Makura hompa gwaIsraeli naJehosafata hompa gorudi rwaJuda tava zi koRamoto-giliyata. 30 Hompa gwaIsraeli ta tantere Jehosafata asi: “Ame nani dwara yikoverero yapeke apa nani za koyita yipo va dire kudimburura nge, nye ove dwara yikoverero yoge youhompa.” Hompa gwaIsraeli ta dwara yikoverero yapeke yipo va dire kumudimburura, makura ta zi moyita. 31 Hompa gwaSiliya kwa pangerere vapitisili 32 womatemba asi: “Ka rwiseni hompa gwaIsraeli, nye mwa ha ka rwisa vakwayita ndi vapitisili.” 32 Vapitisili womatemba apa va mwene Jehosafata, tava litantere asi: “Ogu yige hompa gwaIsraeli.” Makura tava piruka va mu rwise, ano Jehosafata ta zigire va mu vatere. 33 Apa va yi dimbwilire vapitisili womatemba asi age kapisi hompa gwaIsraeli, tava hageke kumurwisa.
34 Nye mugara gumwe ta ponyo sikutji mompepo, tasi ka kwata hompa gwaIsraeli apa va gwanekedesere sikoverero sendi soukwayita. Makura hompa ta tantere muntu ogu ga singire etemba lyendi asi: “Piruka o guse nge po apa vana kurwira yita,* yeeyi nina remana unene.” 35 Awo kwa rwire yita ezuva nalinye, ano hompa kwa kere metemba lyendi ntani age kwa mu kwatererere yipo a mone nawa Vasiliya. Honde zendi kwa zozerere metemba olyo lyoyita, makura ngurova ta dogoroka. 36 Apa lya tokere ezuva, tava zigire mokamba asi: “Nkenye ogu a tengure kositata sendi! Nkenye ogu a tengure kosirongo sendi!” 37 Apa ga fire hompa, tava mu twara koSamaliya tava ka mu horeka moSamaliya. 38 Apa va kuhwire etemba lyendi pepi nediva lyomoSamaliya, nombwa kwa rasere honde zendi ntani nohondedi kwa zoganene pevango olyo* ngwendi moomu ga yi uyungire Jehova.
39 Ano yininke yimwe eyi ga rugene Ahaba nombara* ezi ga dikire nonombinga dovanzovhu ntani noyitata eyi ga dikire, kwa yi tjanga mobuke zehistoli lyovahompa woVaisraeli. 40 Ahaba kwa fire ngwendi ozinakuru, ano munendi Ahasiya ta mu kwama mouhompa.
41 Jehosafata munaAsa kwa tamekere kupangera vantu womorudi rwaJuda momvhura zaune zepangero lyaAhaba hompa gwaIsraeli. 42 Jehosafata kwa kere nonomvhura 35 apa ga kere hompa ntani kwa pangerere moJerusarema nomvhura 25. Edina lyozina kwa kere Asuba munaSilihi. 43 Age kwa twikilire kukwama sihonena soguhwe Asa ntani kwa rugene yininke yoyiwa kosipara saJehova. Nampili ngoso, mavango gokukarera yikarunga yoyimpempa gokonondundu kapi va ga zonagwire po ntani vantu kwa twikilire kugava nonzambo komavango ogo. 44 Jehosafata kwa twikilire kukara nombili nahompa gwaIsraeli. 45 Ano yininke yimwe eyi ga rugene Jehosafata nononkondo edi ga kere nado nomu nga ru yita, kwa yi tjanga mobuke zehistoli lyovahompa worudi rwaJuda. 46 Age kwa gusire hena mosirongo nohondedi dokontembeli edi va hupisire mo oguhwe Asa.
47 Mosirongo saEdomu kapi mwa kere hompa, amo kwa kere mo tupu nguuru ogu nga pangere ngwendi hompa.
48 Jehosafata kwa ninkire hena yikepa yaTaresisi* yi ze koOfire yi ka simbe ngorodo, nye ayo kapi ya zire morwa kwa zonaukire unene moEsiyoni-gebere. 49 Komeho yi zonauke yikepa, Ahasiya munaAhaba ta tantere Jehosafata asi: “Pulisira vakareli vange va ze kumwe novakareli woge moyikepa,” nye Jehosafata kapi ga yi tambwire.
50 Makura Jehosafata ta fu ngwendi ozinakuru, tava ka mu horeka oku va horeka ozinakuru, moSitata sozinakuru Ndafita, ano munendi Jehoramu ta mu kwama mouhompa.
51 Ahasiya munaAhaba ta kara hompa goVaisraeli moSamaliya momvhura 17 zepangero lyaJehosafata hompa gorudi rwaJuda. Age kwa pangerere Vaisraeli nomvhura mbali. 52 Age kwa twikilire kurugana yininke yoyidona kosipara saJehova nokukwama sihonena soguhwe nozina ntani sihonena saJerobiyamu munaNebata, ogu ga ninkisire Vaisraeli va zone. 53 Age kwa twikilire kukarera Bara noku mu tongamena ntani age kwa twikilire kuhandukisa Jehova Karunga goVaisraeli ngwendi moomu ngava yi rugana oguhwe.