Mbilive zauvali zaPeturusa
3 Vakwetu wokuhara, ezi kuna kara mbilive zange zauvali nina kumutjangera, pokumukorangeda moomu na mu tjangerere mombilive zange zokuhova mu ruganese nondunge deni, mu diworoke eyi mwa diva nare, 2 diworokeni eyi ngava uyunga* vaporofete wokupongoka ntani nomarongo gaHompa Muzowoli gwetu, aga mwa zuvha kovapositoli. 3 Pomuhowo diveni eyi asi, pomazuva gopouhura vantu ngava swaura yininke yoyiwa ntani ngava rugana yininke yoyidona moomu vana harere 4 nokutanta asi: “Oku sina kara siruwo sekaropo* lyendi esi ga tumbwidira kupi? Kwato eyi ya runduruka kutunda pomazuva gozinyakurwetu, yininke simpe ha ya karera moomu ya kere kutunda pesito lyouzuni.”
5 Awo kudivarera mowina asi eguru nare va li sita ntani asi konkango zaKarunga evhu kwa li hangwire komema nokulikundurukida mema; 6 ntani uzuni kwa u zonagwire po kupitira moyininke oyo, apa rwa wizire ruhanzo pevhu. 7 Nye kupitira monkango zaKarunga, eguru eli lyantani nevhu eli lyantani, nayo kuna kundindira nga ka yi zonagure po komundiro mezuva eli ngava pangura vantu wovadona nokuvazonagura po.
8 Vakwetu wokuhara, mwa ha divara asi, ezuva limwe kwaJehova ngwendi nomvhura eyovi, ano nomvhura eyovi ngwendi ezuva limwe. 9 Jehova kapi a liranga kusikisa mo matumbwidiro gendi ngwendi moomu ava yi gazara vamwe, nye age kuna kumulididimikira morwa kapi ga hara asi ngapa ka zonauke nampili gumwe, nye age kwa hara asi navenye va litezurure. 10 Nye ezuva lyaJehova ngali wiza ngwendi muwidi, ano eguru ngali dongonoka po nosindundumo sosinene, yininke yemeguru neyi yepevhu ngayi hemuka koupyu wounene, evhu ntani neyi ya kara po ngayi pya.
11 Mokumona asi yininke nayinye eyi ngava yi zonagura po monkedi zangesi, likonakoneni omu mwa hepa kukara. Mwa hepa kupongoka ntani yi likideni moyirugana yeni asi mwa ligava kwaKarunga, 12 ngomu muna kundindira nokudiworoka ezuva lyaJehova eli lina kuwiza, apa eguru ngava li zonagura po momundiro ntani apa yininke yemeguru neyi yepevhu ngayi hemuka koupyu wounene. 13 Nye ose kuna kundindira eguru lyepe nevhu lyepe eli ga tu tumbwidira, omu ngamu kara uhungami.
14 Yipo nye, vakwetu wokuhara, mokumona asi one kuna kundindira yininke eyi, kondjeni nga ya mu gwane mombili one mwa hana sipo ndi kavadi. 15 Ntani hena, tareni edidimiko lyaHompa gwetu ngompito zokumuzowora, ngwendi moomu ga mu tjangerere Paurusa mukwetu gokuhara kuliza nounongo ou ga mu pa Karunga, 16 age kwa tjanga kuhamena yininke eyi monombilive dendi nadinye. Nye yininke yimwe eyi ya kara mo udigu kuyikwata egano ntani vantu ava va dira kukara nepuro lyokupama ava ava dili kukwata egano yininke eyi, kuna kuyipirura ngwendi moomu ava rugana matjangwa nagenye. Eyi ngayi va ninkisa va ka va zonagure po.
17 Yipo nye, vakwetu wokuhara, mokumona asi mwa kara nediwo eli, litakameseni yipo va dire kumupukisa vantu ava ava dili kulimburukwa nomagano gawo goyimpempa, yipo mu dire kukara nepuro lyokupama. 18 Nye parukeni monkedi ezi nazi mu ninkisa mu gwane nkenda zaKarunga zonene nediwo lyaHompa Jesus Kristusa Muzowoli gwetu. Ngano va mu fumadeke ngesi dogoro narunye. Amen.