Mbilive zauvali zaJohanesa

1 Ame mukuronambunga* kuna kutjangera mbilive ezi komukadi* ogu va horowora ntani kovana vendi ava na hara unene, kapisi nyamelike tupu nava hara, nye nanavenye ava va ya diva usili, 2 morwa usili ou wa kara monomutjima detu ntani awo ngau karerera mo narunye. 3 Karunga Guhya naMunendi Jesus Kristusa, ngava tu likida nkenda zonene nokutupa mbili, awo ngava tu ronga usili nokutulikida eharo.

4 Ame nina hafa unene, morwa na diva asi vana woge vamwe kuna kukwama usili, ngamoomu ga tu pangera Guhyetu. 5 Yipo nye, ame kuna kukuhundira ove mukadi asi, tu lihara-hare, (esi kapisi sipango sosipe nina kukutjangera, nye seesi twa zuvha kutunda kwanare.) 6 Nsene tu limburukwa koyipango yendi, ayo nga yi likida asi ose twa kara neharo, ngwendi moomu tupu mwa yi zuvha kutunda ketameko, sipango sendi sesi asi mwa hepa kutwikira kulihara-hara. 7 Yeeyi vapukisi vanzi ava vana kara mouzuni, ava ava tanta asi Jesus Kristusa kapi ga wizire pevhu ngomuntu. Vantu ava ava uyunga ngesi, vapukisi ntani awo nonkore daKristusa.

8 Litakameseni, yipo mu dire kudivara eyi twa rugana mokatji keni, ngomu gwane mauwa aga ga mu wapaikira Karunga. 9 Ogu a dili kukwaterera kerongo lyaKristusa nokuronga yimpempa kapi ga kara naKarunga. Nye ogu a kwaterere kerongo eli kwa kara naGuhya ntani noMuna. 10 Nsene gumwe a mu retera erongo eli lya dira kutunda kwaKristusa, mwa ha mu tambura momambo geni ndi mu mu kunde. 11 Yeeyi nkenye ogu ana kukunda muntu gwangoso, kuna kukwatesa ko yirugana yendi yoyidona.

12 Nampili ngomu nina kara noyininke yoyinzi yokumutantera, kapi nina hara kuyimutjangera, nye ame kuna hara kuwiza kweni tu ya uyunge kumwe, yipo ngomu ya hafe unene.

13 Vana vamukuroge gomukadi ogu va horowora, vana ku kundisire po.