Buke zaMateusa

26 Apa Jesus ga mene kuuyunga nonkango nadinye odo, ta tantere varongwa vendi asi: 2 “Muna yi diva asi mazuva gavali tupu gana hupu ko, nga si kare sipito soPaska. Ano MunwaMuntu ngava mu gava, yipo va ka mu pampare kositji.”

3 Makura masimbi novapristeli wovanene, tava pongo meharango lyomupristeli gomunene gedina Kayifasa, 4 tava lizuvhu asi va kwate Jesus va mu dipage.* 5 Nye awo kwa uyungire asi: “Twa ha yi rugana posipito, kuvhura yi rete epiyagano movantu.”

6 Apa Jesus ga kere moBetani membo lyaSimoni ogu nga vere nare yingondwe, 7 mukadi ogu ga simbire sipako semanya somagadi gondiro gedumba lyewa, ta mu wizire noku ga mu tjira komutwe age kuna hingire kositafura a lye. 8 Apa varongwa va yi mwene eyi, tava handuka, tava tanta asi: “Eyi vana kuhepekera aga magadi yinke? 9 Ngano kwa ga randesa kondiro, yimaliwa va yi pe vahepwe.” 10 Nye apa Jesus ga yi dimbwilire, ta va tantere asi: “Morwasinke muna kumutekwira ngoso? Age kuna ruganene nge yoyiwa. 11 Vahepwe nawo ngomu kara nkenye apa nye ame kapi ngomu kara name nkenye apa. 12 Magadi aga ana tjire korutu rwange, kuna yi ruganene mokuwapaikira nge evhumbiko. 13 Yosili nina kumutantera asi nkenye oku ngava udisira mbudi zongwa mouzuni mudima, eyi ana rugana ogu mukadi nayo ngava yi divisa yipo ngava mu diworokere po.”

14 Kutunda opo, gumwe govarongwa vendi ronambali gedina Judasa Isikalyoto, ta zi kovapristeli wovanene, 15 ta ka va pura asi: “Yisinke ngomu pa nge, nsene ni mu vatera mu ka mu kwate?” Awo tava mu tantere asi ngava mu futa yimaliwa 30 yosisiliveli. 16 Kutunda opo, age nga papara mpito zongwa zokumuhorora va mu kwate.

17 Mezuva lyokuhova lyosipito soNomboroto da hana yihaheso, varongwa tava wiza kwaJesus, tava mu pura asi: “Kupi ono hara natu ka kuwapaikira Paska?” 18 Age ta limburura asi: “Zendeni mositata komugara gumwe, mu ka mu tantere asi: ‘Murongi kuna tanta asi: “Siruwo sange pepi sina kara. Pembo lyoge yipo nani ya lira Paska kumwe novarongwa vange.”’” 19 Varongwa makura tava rugana moomu ga va tanterere Jesus, tava liwapaikire Paska.

20 Kongurova, age kwa hingilire kositafura kumwe novarongwa vendi 12. 21 Awo simpe kuna kulya, ta uyunga asi: “Yosili nina kumutantera asi gumwe gweni na horora nge.” 22 Awo makura tava guwu unene, navenye tava mu pura asi: “Nayi panga kapisi nyame, Hompa?” 23 Age ta va limburura asi: “Googu nani verera kumwe nendi posiyaha, yige googo na horora nge. 24 MunwaMuntu ngayi mu gwana moomu va yi mu tjangera. Nye ehudi lyomuntu ogu ana kuhorora MunwaMuntu mutupu omu. Muntu ogo ngano kapi va mu hampuruka, ngano hansa.” 25 Ano Judasa, muhoroli gwendi, makura ta pura asi: “Nani panga kapisi nyame, Murongi?”* Jesus ta limburura asi: “Nyove.”

26 Awo simpe kuna kulya, Jesus ta gusa mboroto, konyima zokukanderera, ta zi bamagura, makura ta zi pe varongwa vendi, ta tanta asi: “Guseni mu lye, mboroto ezi kwa fanekesa rutu rwange.” 27 Makura ta gusa nkinda, ta pandura oGuhwe, ta zi va pe, ta tanta asi: “Nwaa-nweni mo namuvenye, 28 yeeyi vhinyu ezi kwa fanekesa ‘honde zange zegwanekero’ ezi ngazi tjikanga mokudongonona po nonzo dovantu wovanzi. 29 Nye ame tani mu tantere asi kapi hena ngani nwa yoyiyimwa eyi yosindjembere, dogoro nekezuva eli ngani ka nwa yoyipe kumwe neni moUhompa waTate.” 30 Apa va mene kudimba mokuhamberera Karunga, tava pwaga, va ze koNdundu zoMauzwe.

31 Jesus makura ta va tantere asi: “Masiku ganaina, namuvenye tomu ka siga nge, yeeyi kwa tjanga asi: ‘Ngani dipaga musita, makura siunda sononzwi ngasi lihane.’ 32 Konyima zapa ngava pindura nge koufe, nyame ngani mu hovera kuza koGalireya.” 33 Nye Peturusa ta mu limburura asi: “Nampili navenye va ku sige, ame kapi ngani kusiga.” 34 Jesus ta mu tantere asi: “Yosili nina kukutantera asi masiku ganaina, sikondomboro aso sa hana kuziga, ove no ka patana nge rutatu.” 35 Peturusa ta mu tantere asi: “Ame nampili ngano kufa, kufa tupu nove, ame nokukupatana si.” Varongwa navenye nawo kwa uyungire yokulifana.

36 Kutunda opo, Jesus ta zi kumwe nawo pevega ava tumbura asi Gesemani. Makura ta tantere varongwa asi: “Hingireni apa siruwo esi nina kuza kwina ni ka kanderere.” 37 Ta pitura Peturusa novana vaSebede vavali, makura ta vareke kuguva unene. 38 Age ta va tantere asi: “Ame* nina guwu unene, ngwendi ni fe. Kareni paapa, mu vangarese nge ko.” 39 Ta linapuka nawo kanunu, makura ta tongamene nokunyongeka mutwe gwendi, ta kanderere asi: “Tate, nsenesi kuvhura, ngano na ha nwa monkinda* ezi. Nye kapisi moomu nina panga, hawe, moomu tupu ono panga ove.”

40 Makura ta tengura kovarongwa, ta ka va gwana awo vana rara. Ta tantere Peturusa asi: “Nani kapi muna vhuru kuvangaresa nge ko nampili vili zimwe? 41 Vangarareni oku tomu kanderere, yipo ga dire kumufunda maheteko. Mutjima kupura* usimbu, nye rutu kapi rwa paka nonkondo.” 42 Ta linapuka hena nawo rwauvali, ta ka kanderera asi: “Tate, nsenesi udigu ou yiwo tupu kugwana nge, yi horokere nge tupu moomu ono panga.” 43 Apa ga ka tengwire hena, kuyavagwana vana rara morwa nompofu kwa va kwete unene. 44 Ta va sigi poopo, ta zi hena a ka kanderere rwautatu nononkango doodina domuhowo. 45 Kutunda opo, ta tengura kovarongwa, ta ya va tantere asi: “Posiruwo soudigu ngesi, one kuna rara nokupwizumuka? Tareni, siruwo sina siki mo, MunwaMuntu tava mu gava momawoko govananzo. 46 Katukeni, tu ze. Ogu ana kuhorora nge gogo ana kuwiza.” 47 Haga za mokuuyunga, tava mono Judasa, gumwe gowo murongo navavali kuna kuwiza kumwe nombunga zonene nonomfuro nonomuramu dawo. Awo kwa va tumine vapristeli wovanene nomasimbi.

48 Muhoroli gwendi kwa va pere sidiviso asi: “Ogu nani ka ncumita, yige googo, ka mu kwateni.” 49 Age kwa vyukilire kwaJesus, ta tanta asi: “Moro Murongi!”* Makura ta mu ncumita. 50 Nye Jesus ta mu pura asi: “Yisinke ono hara kurugana?” Makura vena tava hedere Jesus, tava mu kwata. 51 Va tara ko, gumwe ogu ga kere naJesus ta pweza mo rufuro rwendi, ta tete* ko kutwi komukareli gomupristeli gomunene, taku ndembuka ko. 52 Jesus ta mu tantere asi: “Zweka mo rufuro roge mosiraro saro, yeeyi nkenye ogu a kwata rufuro, yiro ngaru mu lya rooro. 53 Nsene ni hundira Tate, ove asi a dire kutumina nge mamumbunga gokupita 12 govaengeli ndi? 54 Nsene ngoso, ngapi nye ngano omu ngaga sika mo Matjangwa aga ga tanta asi ngesi yimo ngayi horoka?” 55 Kutunda opo, Jesus ta tantere mbunga asi: “One kuna wiza mu ya kwate nge nonomfuro nonomuramu ngwendi moomu ava wizire munamahaka ndi? Amesi nkenye ezuva kumwe ngatu hingireni apa ngani rongo montembeli, nye one kapi mwa kwete nge. 56 Nye nayinye eyi kuna kuhorokera asi matjango* govaporofete ga sike mo.” Makura varongwa vendi tava mu zumbu, tava ka duka.

57 Ava va kwete Jesus, kwa mu twere kwaKayifasa, mupristeli gomunene, oku va pongere valirongi womatjangwa nomasimbi. 58 Nye Peturusa kwa mu kwamenenene koure dogoro nemeharango lyomupristeli gomunene. Ta hwilire, ta ka hingira kumwe novakareli, a tare oku nayi ka hagera.

59 Vapristeli wovanene nosigongi mudima somasimbi kwa paparerere Jesus umbangi woyimpempa ou nau ninkisa va mu dipage. 60 Nye kapi va mu gwene usima nampili ngomu pa kere nombangi dononzi doyimpempa. Konyima tapa wiza hena nombangi mbali, 61 tadi tanta asi: “Mugara ogu kwa tente asi: ‘Ame kuvhura kuzungurura ntembeli zaKarunga noku zi tungurura momazuva gatatu.’” 62 Mupristeli gomunene makura ta katuka, ta mu pura asi: “Ove kwato eyi ono kulimburura ko? Kapi ono kuyizuvha eyi vana kukuuyunga ava vagara ndi?” 63 Nye Jesus teete zendi. Makura mupristeli gomunene ta mu tantere asi: “Ame tani kuganesa kwaKarunga gomunamwenyo, tu tantera nsene asi nyove Kristusa, MunwaKarunga!” 64 Jesus ta mu limburura asi: “Yimo, moomu ono tanta. Nye ame tani mu tantere asi kutunda apa ngomu ka mona MunwaMuntu ana hingire korulyo rwaKarunga Munankondo nadinye, age kuna kuwiza pomaremo.” 65 Mupristeli gomunene makura ta taura yikoverero yendi oku ta tanta asi: “Ana swaura Karunga. Nombangi musinke hena natu hepa? Muna lizuvhire ko omu ana swaura Karunga. 66 Ngapi omu muna kugazara ko?” Awo tava mu limburura asi: “Ana fire kufa.” 67 Makura tava mu fizagere mazeze mosipara, oku tava mu toona nonyongo. Ava vamwe tava mu kapura nonkusi, 68 oku tava tanta asi: “Kristusa, nsene asi ove muporofete, tu tantera asi yilye ogu ana kutoona?”

69 Peturusa kwa hingilire meharango lyoponze. Mukareli gomukadona makura ta mu hedere, ta mu tantere asi: “Nove kumwe naJesus goMugalireya wa kere.” 70 Nye age ta patana moyitarameho yanavenye asi: “Kapi na diva eyi ono kuuyunga.” 71 Haga za mokupwaga, mukareli gumwe gomukadi ta tantere ava va sikamene po asi: “Mugara ogu nage kumwe naJesus goMunasareta ga kere.” 72 Age ta patana hena pokugana asi: “Mugara ogo kapi na mu diva.” 73 Konyima zokaruwogona, ava va sikamene po tava hedere Peturusa nokumutantera asi: “Yosili, nove gumwe gwawo, yeeyi mbuuyungiso zoge yizo zina kukudimbwilisa.” 74 Makura ta fingilire nokugana asi: “Mugara ogo kapi na mu diva.” Tupu ga mana kuuyunga, sikondomboro tasi zigi. 75 Peturusa makura ta diworoka eyi ga mu tanterere Jesus asi: “Sikondomboro aso sa hana kuziga, ove no ka patana nge rutatu.” Makura ta pwaga ponze, ta ka lira unene.