Mbilive zokuhova kwaTimoteusa
4 Mpepo zaKarunga kwa yi zeresa nawa-nawa asi ngasi wiza siruwo apa vamwe ngava zumba epuro lyawo mwaKarunga nokupurakena konombudi doyimpempa edi adi moneka ngwendi dokutunda kwaKarunga ntani ngava purakena komarongo gokutunda konompepo donondona. 2 Awo ngava purakena kouyilipaki wovagara ava ava uyunga yimpempa, ava lya fa ezwi lyawo lyokomutjima ngwendi sipapa esi va sitamba nosivera soupyu. 3 Awo kunyokesa nonkwara nokupangera vantu va dire kulya nondya edi ga tura po Karunga asi ava va kara nepuro ntani ava va diva nawa usili, va di lye nokupandura Karunga. 4 Yeeyi nkenye esi ga sita Karunga siwa ntani kwato esi sa fira kusinyoka nsene kuna kusilya nokupandura Karunga, 5 yeeyi nondya kudipongora kupitira mekanderero ntani mononkango daKarunga.
6 Nsene o pukurura vapuli vakweni, ngo kara mukareli gomuwa gwaJesus Kristusa ogu ga kura nokupama kupitira mononkango depuro nerongo lyewa eli o kwama. 7 Walye o purakene komasanseko goyimpempa aga aga swaukisa Karunga ngwendi aga ava simwitire vakurukadi. Nye ove kara nositambo sokuliyomberesa kufumadeka Karunga. 8 Eliyombereso* eli a rugana muntu mokupameka rutu rwendi, kwa kara nomauwa gopokaruwogona. Nye kufumadeka Karunga, kuvatera muntu mwanayinye morwa age kugwana mauwa ngesi ntani nokomeho. 9 Nonkango edi usili ntani kuvhura tu di huguvare unene. 10 Eyi yiyo atu ruganene unene nokulitura mo morwa twa huguvara mwaKarunga, age Muzowoli govantu navenye, unene po valimburukwi.
11 Twikira kuvapa marondoro aga nokuvaronga. 12 Wa ha pulisira nkenye ogu a ku sense morwa unona woge. Nye kara sihonena kovapuli mombuuyungiso, monkareso, meharo, mepuro ntani moukuhuki. 13 Twikira kulitura mo mokuresera wopeke nokurondora* ntani nokuronga dogoro paapa ngani wiza. 14 Wa ha siga uhwi ou wa gwana kupitira mouporofete apa mbunga zovakuronambunga za ku kambekere mawoko gazo. 15 Teda ko* koyininke eyi nokukara mwayo yipo vantu navenye va mone nawa-nawa kukura koge. 16 Kondjera kukara gosihonena sosiwa ntani murongi gomuwa. Twikira kusikisa mo yininke eyi, yeeyi nsene o yi rugana, ngo paruka kumwe nava vana kukupurakena.