Numeri
11 Vantu kwa tamekere kusivanena Jehova. Apa ga yi zuvhire Jehova, ta handuka unene, makura Jehova ta tumu mundiro gu hwike vantu vamwe ava va kere ponze zokamba. 2 Vantu tava tameke kulikwambera kwaMosesa, makura age ta kanderere kwaJehova, ano mundiro tagu dimi. 3 Makura tava ruku evango olyo asi Tabera,* morwa mundiro ogu gwa tundire kwaJehova gu va hwike.
4 Vantu vamwe* ava va kere mokatji koVaisraeli tava tameke kurongora nondya dapeke, ano Vaisraeli nawo tava tameke kulira, tava tanta asi: “Yilye ogu natu pa nyama tu lye? 5 Ose kuna kurongora nomfi domawoko-woko edi ngatu li moEgipite ntani vakatjama, nonyanga noyikwahidi yimwe. 6 Ngesi ose kuna kuzumbanesa nonkondo detu. Mana zelike tupu tuna kulya.”
7 Mana kwa fene ngwendi mbuto zonzera ntani kwa fene ngwendi manganganga gokunuka nawa. 8 Vantu ngava zi va ka zi tore makura tava zi gogo nemanya ndi tava zi tu mosini sosinunu, makura awo ngava zi tereke ndi ngava zi kanga nomboroto dokuliudinga. Utovara wazo ngwendi sikuki sokukwita magadi. 9 Mana ngazi gu apa ngali gwire eme mokamba masiku.
10 Mosesa kwa zuvhire vantu vana kulira momapata nagenye, navenye kwa sikeme pomavero gonotende dawo. Jehova kwa handukire unene ano Mosesa nage kwa guvire unene. 11 Makura Mosesa ta pura Jehova asi: “Morwasinke ono kuhepekera mukareli goge? Morwasinke ono kudilira kuhafera nge? Yisinke na rugana eyi wa pera nge sirugana soudigu sokupakera mbili vantu ava? 12 Nyame nye na reta vantu navenye ava ndi? Kapisi nyame na va reta o tantere nge ni va simbire ponturo zange ngwendi moomu mukareli a simbi mukeke ogu a zamwa, ni va tware kosirongo esi wa tumbwidilire ozinyakurwawo. 13 Kupi nye nani gwana nyama ezi nani pa vantu navenye ava? Awo kuna kusivanena nge asi: ‘Tu pa nyama tu lye!’ 14 Ame kapi nina kuvhura kupakera mbili vantu ava nyamelike. 15 Nsene asi yimo ngesi no tekura nge, na kanderere dipaga nge tupu. Nsene asi ame kukuhafesa, wa ha pulisira nge ni ligwanekere hena noudigu.”
16 Jehova ta limburura Mosesa asi: “Horowera nge vagara 70 momasimbi goVaisraeli, ava wa diva asi va wapera kukara masimbi ntani vapitisili, o va tware konkongoronzugo va ka kare kooko kumwe nove. 17 Ame ngani wiza ni ya uyunge nove kooko ntani ngani gusa mpepo zimwe ezi wa kara nazo ni zi gave kwawo. Ano awo ngava kuvatera mokupakera mbili vantu, yipo sirugana soge ngasi rerupe. 18 Wa hepa kutantera vantu asi: ‘Lizereseni neina, yeeyi mungura, one ngomu lya nyama morwa Jehova ga zuvha masivano geni ntani one kwa tente asi: “Yilye ngatu pa nyama tu lye? MoEgipite ose kwa parukire nawa.” Jehova nga mu pa nyama mu lye. 19 One kapi ngo mu zi lya ezuva limwe ndi gavali ndi gatano ndi 10 ndi 20. 20 Nye one ngo mu zi lya kwedi nakunye dogoro ngazi ya pwagere momazuru ntani ngazi mu seta, yeeyi one kwa nyoka Jehova ogu ga kara mokatji keni ntani one kwa sivanene kwendi apa mwa tente asi: “Morwasinke twa tundira moEgipite?”’”
21 Makura Mosesa ta tanta asi: “Ame kuna kara novakwayita 600 000 nye ove kuna kutanta asi: ‘Ame ngani va pa nyama zonzi va zi lye kwedi nakunye’! 22 Nsene va dipaga yimuna nayinye ndi va kwate nomfi nadinye demefuta, kuvhura va yi gwaneke ndi?”
23 Jehova makura ta tantere Mosesa asi: “Jehova kapi ta vhuru kuyirugana eyi ndi? Ngesi no yi mona nsene eyi nina uyunga nayi horoka ndi hawe.”
24 Mosesa ta zi a ka tantere vantu eyi ga mu tanterere Jehova ntani ta horowora vagara 70 mokatji komasimbi govantu. Age ta va tantere va sikame, va kundurukide nkongoronzugo. 25 Makura Jehova ta hegumuka meremo ta uyunga naMosesa nokugusa mpepo zimwe ezi ga kere nazo, ta zi gava komasimbi 70. Apa va zi gwene, awo kwa tamekere kuporofeta, nye kutunda opo awo kapi va yi rugene hena.
26 Pwa kere vagara vavali ava va kere mokamba, madina gawo Elidadi naMedadi. Mpepo kwa kere pwawo morwa nawo kwa kere mokatji komasimbi aga va tjenge, nye awo kapi va zire konkongoronzugo. Awo kwa tamekere kuporofeta mokamba. 27 Makura mumati gumwe ta duka a ka tantere Mosesa asi: “Elidadi naMedadi kuna kuporofeta mokamba!” 28 Josuwa munaNunu ogu nga rugana naMosesa kutunda udinkantu wendi, ta tanta asi: “Hompa gwange Mosesa, va kava!” 29 Nye Mosesa ta mu tantere asi: “Ove kuna kufililira nge po mfudu ndi? Ame kuna hara ngano vantu navenye vaJehova va kare vaporofete ntani ngano Jehova ava pe mpepo zendi!” 30 Konyima, Mosesa ta tengura kokamba kumwe nomasimbi goVaisraeli.
31 Makura Jehova ta ninki mpepo zi rete yidira yekefuta* yi ya gwire komaruha nagenye gokamba. Muntu ga hepere kugenda ezuva nalinye yipo a ka sike oku ya gwililire yidira. Ano ndambo zoyidira oyo kwa sikire ponosentimeta 89.* 32 Ezuva olyo, vantu kwa pongaikire yidira mutenya nomasiku ntani nezuva eli lya kweme ko. Nkenye ogu kwa zwidire yipako yoyinene murongo* ntani awo kwa yi zanekere ponze zokamba. 33 Awo va hana kumana kulya nyama ozo, Jehova ta va handukire unene makura Jehova ta tameke kudipaga vantu wovanzi.
34 Makura tava ruku evango olyo asi Kiboroto-hatava,* morwa pevango olyo yipo va vhumbikire vantu womakurulya. 35 Apa va tundire moKiboroto-hatava, tava vyuka koHaseroto ntani awo tava ka kara moomo.