Mbilive zokuhova kwaTimoteusa
6 Vapika ava fumadeke vahekuru vawo nomutjima nagunye, yipo vantu va dire kuuyunga momudona edina lyaKarunga nerongo lyendi. 2 Ava va kara novahekuru wovapuli va ha va dina morwa yeeyi asi awo vapuli. Nye ava va ruganene unene, yeeyi vapuli vakwawo kugwanena mo uwa.
Twikira kuvarondora noku va ronga yininke eyi. 3 Nsene muntu a ronga erongo lyapeke eli lya dira kuliza nerongo lyousili eli lya tunda kwaHompa gwetu Jesus Kristusa ndi erongo eli lya dira kuliza nomu natu karera Karunga, 4 gwangoso ga linenepeka ntani kapi ga kwata egano yuma. Age kwa hara unene nomutangu nomalitatano kuhamena nonkango. Eyi kuninkisa vantu va kare nomfudu, va hare nomutangu, va swaure vakwawo* ntani va dire kulihuguvara-huguvara. 5 Eyi kuninkisa hena vantu ava va kara nomagazaro gepuko, awo hena va zumba usili va lipatane kuhamena yininke ya hana mulyo. Awo kugazara asi awo kuvhura kugwanena yuma mokukarera Karunga. 6 Ayo usili asi ogu ga litura mo mokukarera Karunga ntani ya mu gwanena po eyi ga kara nayo, nga gwana mauwa gomanzi. 7 Yeeyi mouzuni kapi twa reta mo yuma, ose hena kapi ngatu pitura mo yuma. 8 Yipo nye asi nsene tuna kara nonondya noyidwara,* ngano yi tu gwanene makura.
9 Nye ava va tokomena kungawopa, kugwira momaheteko nomoyiraha ntani momadowo gougova gomadona aga aga va twaredesa momaudigu nemezonauko. 10 Yeeyi edowo lyoyimaliwa yilyo ntundiliro zomaudona nagenye, edowo olyo yilyo lya ninkisa vamwe va zumbe epuro noku va retera kukora kokunene.
11 Nye ove ko, ove muntu gwaKarunga, likara ure noyininke oyo, o kondjere uhungami netjirokarunga nepuro neharo nedidimiko ntani ugomoki. 12 Twikira kurwa yita yoyiwa yipo o popere marongo gaKarunga. Kwaterera komwenyo gwanarunye ogu va kuzigidira, ago yigo wa udisa nawa kovantu wovanzi.
13 Tani kupangere komeho zaKarunga ogu a gava mwenyo koyininke nayinye ntani kwaJesus Kristusa ogu ga geve umbangi komeho zaPontiusi Piratusa, 14 o limburukwe konompangera ove wa hana kavadi* ndi eswau dogoro paapa nga horoka Hompa gwetu Jesus Kristusa. 15 Age Hompa goruhafo, age hena Munankondo ntani nga lihorora mwene apa ngasi sika mo siruwo. Age Mupangeli govapangeli ntani Hompa govahompa, 16 ogu a dili kufa ntani kwa kara mouzera ou ava dili kuvhura kuhedera vantu, nagumwe si ga mu mona ntani nagumwe si gokuvhura kumumona. Va mu fumadeke ntani a kare ngorooro nononkondo dogoro narunye. Amen.
17 Pukurura* nongawo domouzuni* ou asi da ha litumba* ndi asi di huguvare memona lyopokaruwogona, nye adi huguvare mwaKarunga ogu a tu pe nayinye yipo tu hafe. 18 Va tantera va rugane yoyiwa yipo va ngawope moyirugana yoyiwa ntani yipo va kare ugavi, va pe ko vakwawo, 19 pokuyirugana eyi tava lipongaikire emona lyokutunda kwaKarunga. Eyi kutanta asi tava litungire etateko lyewa lyokomeho yipo ngava gwanene po mwenyo gousili.
20 Timoteusa, kwaterera kousili ou wa lironga, nyokera po kupurakena kononkango domawoko-woko edi adi swaukisa Karunga nokomagano govantu ava ava gazara asi va kara nediwo, nye ediwo lyawo kulirwanesa nousili. 21 Vamwe kwa hageka kukara nepuro morwa kupura mediwo olyo.
Nkenda zaKarunga zonene ngano zi kare none.