Buke zaMateusa
11 Apa Jesus ga mene kugava mavyukiso kovarongwa vendi 12, ta tundu po a ka ronge nokukaudisa moyitata yapeke.
2 Nye apa Johanesa ga kere modorongo, ta zuvhu kuhamena yirugana yaKristusa, makura ta tumu ko varongwa vendi 3 va ka mu pure asi: “Nyove ogu va tanta asi ngo wiza ndi tu ndindire ko gwapeke?” 4 Jesus ta va limburura asi: “Zendeni mu ka tantere Johanesa eyi muna kuzuvha neyi muna kumona: 5 Vatwiku kuna kumona, yirema kuna kugenda, vanayingondwe kuna kuvaverura, yipuru-puru kuna kuzuvha, ano vafe kuna kuvapindura, vahepwe kuna kuvazuvhisira mbudi zongwa. 6 Muntu goruhafo googu a dili kupunduka morwa nyame.”
7 Vena apa va tengwire, Jesus ta pura mbunga zovantu kuhamena Johanesa asi: “Yisinke eyi mwa zililire mu ka tare momburundu, ruu rokulinyunganga kompepo ndi? 8 Yisinke nye eyi mwa zililire mu ka tare, mugara ogu a dwara yikoverero yondiro?* Ava ava dwara yikoverero yondiro, monombara dovahompa va tunga. 9 Yisinke nye eyi mwa zililire mu ka tare, muporofete ndi? Nhi, ame tani mu tantere asi age kwa pitakana muporofete. 10 Ogu yige ya hamena eyi va tjanga asi: ‘Tara, ame tani tumu ntumi zange komeho zoge, ogu nga ku wapekera nzira zoge.’ 11 Yosili nina kumutantera asi kutupu ogu va hampuruka ga pita Johanesa Mukuhwi, nye ogu ga nunupa po moUhompa wemeguru, yige ga mu pita. 12 Kutunda komazuva gaJohanesa Mukuhwi dogoro naina, vantu kukondjera Uhompa wemeguru. Ano ava ava twikire kukondja, yiwo ava u gwana. 13 Veta ntani matjango goVaporofete nagenye kwa porofetere yokomeho dogoro posiruwo saJohanesa. 14 Age yige Eliya ogu va tanta asi nga wiza, nsene muna hara kuyitambura, yi tambureni. 15 Ogu ga kara nomatwi, a zuvhe.
16 “Kosinke nani fanekesa muhoko ogu, yilye gwa fana? Ago kwa lifana novanona ava ava hingire pomarandesero, va zigide vakwawo 17 asi: ‘Ose katu mu sivire po nsiva, nye one kapi muna dana! Tuna mu dimbire po nonsumo domalirankali, nye kapi muna likida ruguwo rweni.’ 18 Mokulifana, Johanesa kapi nga li ndi a nwe, nye vantu ngava mu ninki asi ‘mpepo zondona za mu kara.’ 19 Ano MunwaMuntu eyi ga wiza, age kulya nokunwa, nye vantu yiyo ava mu ninki asi: ‘Tareni si, mugara gomakurulya nomakurunwa, age kwa likwata ukwawo novafutisi womutero novananzo.’ Nye yininke youhunga eyi a rugana muntu kulikida asi age munongo.”
20 Makura ta handukire yitata omu nga ruganene yitetu yoyinzi, morwa vantu vamo kapi va litezwilire, ta tanta asi: 21 “Ee udigu musi ngau kugwana ove Korasini nove Betesaida! Yeeyi ngano asi yitetu eyi kwa horokerere moTirusi nomoSidoni, ngano va litezurura nare va dware yikoverero yononsako nokulikwita enoto. 22 Yosili nina kumutantera asi mEzuva lyoMpanguro, sitata saTirusi naSidoni ngayi kara hansa kupitakana one. 23 Ano ove Kaperenaumu, nye ngava ku zerure tupu dogoro keguru ndi? Ndangove, moMayendo* ngava ku zugumina! Yeeyi yitetu eyi ya horokerere moge, ngano asi moSodoma ya horokerere, azo ngano simpe pozili nanaina. 24 Nye ame tani mu tantere asi mEzuva lyoMpanguro, yosirongo saSodoma ngayi kara hansa kupitakana one.”
25 Moruveze rwina Jesus kwa uyungire asi: “Tani kuhamberere, Tate, Hompa geguru nevhu, yeeyi wa horekera yininke eyi vakonentu novanandunge, yiyo wa yi horwera ava va linunupika ngwendi vanona. 26 Nhi, Tate, ngesi yimo wa yi harera. 27 Nayinye kwa yi pa nge Otate, nye nagumwe si ga diva nawa-nawa Muna ntudi Guhya, ntani nagumwe si ga diva nawa-nawa Guhya ntudi Muna ntani googu tupu ga hara kuyihorwera Muna. 28 Wizeni kwange, namuvenye one ava ga rorora maudigu, ni ya mu pwizumukise. 29 Likambekeni ndjoko zange, mu lirongere ko kwange, yeeyi ame kwa gomoka, yiyo na linunupika momutjima, ngomu gwane epwizumuko. 30 Yeeyi ndjoko zange ureru, ano mudigo gwange nago kwa rerupa.”