Mbilive zautatu zaJohanesa

1 Ame mukuronambunga* kuna kutjangera mbilive Gaiyusi, ogu na hara unene.

2 Mukwetu gokuhara, ame kuna kukanderera asi, ngano o kare noukanguki wouwa ntani yininke yi ku gende po nawa, ngwendi moomu yina kukugenda po. 3 Ame na hefe unene apa vakwetu va wizire va ya tantere nge asi, ove kuna kukwaterera kousili ngwendi moomu ono kutwikira kuyirugana. 4 Ame kuhafa* unene apa ani zuvhu asi vana vange kuna kutwikira kukwaterera kousili.

5 Mukwetu gokuhara, ove kulikida ulimburukwi woge monkedi omu o tekura vapuli vakweni, kukwatera mo nava wa dira kudiva. 6 Awo kwa ya tantera mbungakriste kuhamena eharo eli wa kara nalyo, va rekera* nokuvavatera monkedi ezi azi hafesa Karunga. 7 Awo kwa za komavango gokulisiga-siga morwa edina lyaKarunga, va hana kundindira ko yuma kovantu wokonomuhoko. 8 Twa hepa kutambura vantu vangoso, yipo tu ruganene kumwe mousili.

9 Ame na mu tjangerere yuma, nye Diwoterefesi ogu ga hara kupitisira mokatji keni, kapi a fumadeke nkenye eyi atu uyunga. 10 Yipo nye, nsene ngani wiza, ngani ya mu divisa kuhamena yimpempa eyi a uyunga kutuhamena. Ntani hena age kapi a fumadeke ndi a tambure vapuli vakwetu, age hena kukondera nokutjida mombungakriste ava va hara kuvatambura.

11 Mukwetu gokuhara, kwama sihonena sava ava rugana yininke yoyiwa, nye kapisi o kwame sihonena sava ava rugana yininke yoyidona. Ogu a rugana yoyiwa, kwa hamena kwaKarunga, ano ogu a rugana yoyidona, kapi ga mona Karunga.* 12 Demetereusi kumutangauka vapuli vakwetu, ano eyi kuyimonenena morwa age kuparuka kuliza nousili, nose kuna kumutangauka ntani wa yi diva asi eyi atu uyunga usili.

13 Nina kara neyi yoyinzi yokukutantera, nye kapi nina hara kuyikutjangera. 14 Nye ame nina hara kuwiza koge usimbu tu ya uyunge kumwe.

Mbili ngano zi kare nove.

Vapuli vakwetu vana ku kundisire po. Kundisira po vapuli vakwetu, pokuvatumbura komadina.