Buke zEhororo

4 Konyima zeyi, tani mono evero lina zeguruka meguru, makura tani zuvhu ezwi eli lya hagarere ngwendi rumbendo, alyo kwa tanterere nge asi: “Wiza ni ya kulikide yininke eyi ngayi horoka.” 2 Konyima zeyi, mpepo zaKarunga tazi hegumukire nge, makura tani mono sipundi souhompa sina kara meguru ntani apo kwa hingilire po muntu. 3 Ano ogu ga hingilire po kwa fene ngwendi emanya lyoJasipesi* ntani nemanya lyegeha lyondiro, ano sipundi sendi souhompa kwasi kundurukidire maruvara gokulisiga-siga ngwendi ekongoro.

4 Sipundi souhompa kwa si kundurukidire yipundi youhompa 24 ntani apo kwa hingilire po vapangeli* 24 ava va dwere yikoverero yoyizera nononkata dongorodo konomutwe dawo. 5 Kosipundi souhompa kwa tundire ko maruvadi nomazwi ntani nosindundumo ano komeho zosipundi souhompa kwa kere ko noramba ntambali domundiro edi dina kutwera, eyi kwa fanekesa nompepo ntambali daKarunga. 6 Ntani komeho zosipundi souhompa kwa kere ko yuma yokufana ngwendi mema gomanzi, eyi ya fana ngwendi ekende, ntani ngwendi emanya lyokilisitara.*

Ntani aso kwa si kundurukidire yinamwenyo yine eyi ya zulire meho, komeho nokonyima. 7 Sinamwenyo sokuhova kwa fene ngwendi nyime ntani sinamwenyo sauvali kwa fene ngwendi ntwedugona ntani sautatu kwa kere nosipara sokufana ngwendi somuntu ano saune kwa fene ngwendi ekangakodi lina kutuka. 8 Nkenye sinamwenyo kwa kere nomavava ntazimwe ntani komavava gayo kwa zulire ko meho. Ayo kutwikira kuzigira masiku nomutenya asi: “Ga pongoka, ga pongoka, ga pongoka Jehova Karunga, Munankondo nadinye, ogu ana kara po, ogu ga kere po, ogu nga wiza.”

9 Nkenye apa yinamwenyo oyo ayi gava efumano nouyerere nokupandura ogu ga hingira kosipundi souhompa, ogu a paruka narunye nanarunye, 10 vapangeli* 24 kuligandera komeho zogu ga hingira kosipundi souhompa nokukarera ogu a paruka narunye nanarunye ntani awo kutura nonkata dawo komeho zosipundi souhompa nokutanta asi: 11 “Karunga gwetu gononkondo Jehova, ove wa wapera kukufumadeka nokukuyererepeka, morwa nyove wa sita yininke nayinye ntani yininke nayinye kwa karera po morwa mpango zoge.”