Vahompa vauvali
18 Momvhura zautatu zepangero lyaHoseya munaEra hompa gwaIsraeli, Hisikiya munaAhasi hompa gorudi rwaJuda ta kara hompa. 2 Age kwa kere nonomvhura 25 apa ga kere hompa ntani kwa pangerere moJerusarema nomvhura 29. Edina lyozina kwa kere Abi* munaSakaliya. 3 Age kwa twikilire kurugana yininke youhunga kosipara saJehova ngwendi moomu va yi rugene ozinakuru Ndafita. 4 Age kwa zonagwire po mavango gokukarera yikarunga yoyimpempa konondundu nomamanya gokupongoka nonongundi dokupongoka.* Age hena kwa zonagwire po ezoka lyongoporo eli ga rugene Mosesa, yeeyi Vaisraeli ngava li gavere nonzambo* ntani ngava li tumbura asi sikarunga sezoka lyongoporo.* 5 Age kwa huguvarere mwaJehova Karunga goVaisraeli; kwato hompa gomorudi rwaJuda ogu ga kere ngwendi yige, yi kare asi komeho zendi ndi konyima zendi. 6 Hisikiya kwa kwatererere kwaJehova. Age kapi ga hagekere kumukarera ntani kwa twikilire kulimburukwa nompangera edi ga geve Jehova kwaMosesa. 7 Jehova kwa kere kumwe nage ntani age nga tura po matokoro gomawa mwankenye eyi nga rugana. Age kwa rwanesere hompa gwaAsiliya ntani kwa nyokere kumuvatera. 8 Age hena kwa fundire Vafilisiti dogoro kositata saGasa nonomukunda daso ntani kutundilira koruhungu dogoro kositata esi va kundurukida nekuma.*
9 Momvhura zaune, zepangero lyahompa Hisikiya ntani momvhura zauntambali zepangero lyaHoseya munaEra hompa gwaIsraeli, Saramanesere hompa gwaAsiliya ta rwisa sitata saSamaliya ntani ta si kundurukida. 10 Makura tava si kwata kehagero lyomvhura zautatu; momvhura zauntazimwe zepangero lyaHisikiya ntani momvhura zauntane zepangero lyaHoseya hompa gwaIsraeli. 11 Makura hompa gwaAsiliya ta twara Vaisraeli kounkwate koAsiliya, ta va ninki va tunge moHala ntani moHaboro pepi nomukuro gwaGosani nomoyitata yoVamede. 12 Eyi kwa va horokerere morwa awo kapi va purakenene kwaKarunga gwawo Jehova ntani kapi va sikisire mo egwanekero lyendi nanayinye eyi ga pangerere Mosesa mukareli gwaJehova. Awo kapi va purakenene ndi va limburukwe.
13 Momvhura 14 zepangero lyahompa Hisikiya, Senakelibu hompa gwaAsiliya ta rwisa yitata yorudi rwaJuda eyi va kundurukida nomakuma, makura ta yi kwata. 14 Makura Hisikiya hompa gorudi rwaJuda ta tumu mbudi kwahompa gwaAsiliya koRakisi asi: “Nyame nina kara mepuko. Hageka kurwanesa nge. Ame nani ku pa nkenye eyi no panga.” Makura hompa gwaAsiliya ta tantere Hisikiya hompa gorudi rwaJuda a mu pe yisiliveli yonokilograma 10 000* ntani nongorodo zonokilograma 1 000.* 15 Makura Hisikiya ta gava siliveli nazinye ezi za kere monzugo zaJehova ntani mononzugopungwiro domombara zahompa. 16 Posiruwo oso, Hisikiya ta gusa* mavero gokontembeli zaJehova ntani noyikuravero eyi ga kwitire ngorodo, makura ta yi gava kwahompa gwaAsiliya.
17 Makura hompa gwaAsiliya ta tumu Tarutana,* naRabusari* ntani naRabusake,* kumwe novakwayita wovanzi wokoRakisi va ze koJerusarema kwahompa Hisikiya. Apa va ka sikire koJerusarema, tava ka sikama pepi nomukanko gomema gokondama zekeguru. Mukanko ogo kwa kara pepi nevango eli ngava kuhwire vantu yikoverero. 18 Apa va zigilire hompa a wize, Eliyakimu munaHilikiya ogu nga gendesa mbara nahamutjanga Sebuna ntani naJowa munaAsafa ogu nga tjanga ehistoli, tava wiza va ya va gwane.
19 Makura Rabusake ta va tantere asi: “Ka tantereni Hisikiya asi: ‘Hompa gononkondo unene gwaAsiliya kuna kutanta asi: “Yilye ogu ono huguvara? 20 Ove kuna kutanta asi: ‘Ame na kara negano nononkondo dokurwa yita.’ Nye nonkango odo domawoko-woko. Yilye ogu ono huguvara ogu ana kukuninkisa o rwanese nge ame? 21 Ove kuna huguvara mwaEgipite ogu ga fana ngwendi ruu rokuteka. Ano nsene muntu a ru kwata yipo a korere ko, ta ru teka ru mu twe mokuwoko. Eyi yiyo nga yi horokera vantu navenye ava va huguvara Farawo hompa gwaEgipite. 22 Nsene nomu tantera nge asi: ‘Ose kwa huguvara Karunga gwetu Jehova,’ age kapi nga mu vatera. Hisikiya kwa mu tanterere mu zonagure po yizambero yaKarunga gweni nomavango aga ngomu karere. Age kwa tanterere vantu ava va tunga moJerusarema ntani moyitata yapeke yomoJuda, va karere tupu Karunga kosizambero somoJerusarema.”’ 23 Limbetjeni nahompa gwaAsiliya: Ame ngani ku pa nonkambe 2 000 nsene ngo gwana varondi wononkambe wokugwanena po. 24 Nsene no huguvara mwahompa gwaEgipite a ku pe matemba nononkambe, ove kapi ngo vhura kutjida nampili nguuru gokudira kufumana gwahompa gwange. 25 Ove kuna kugazara asi ame kuna wiza ni ya zonagure po evango eli na hana epulisiro lyaJehova ndi? Jehova kuna tantere nge asi: ‘Zende o ka rwise sirongo oso, o ka si zonagure po.’”
26 Makura Eliyakimu munaHilikiya naSebuna ntani naJowa, tava tantere Rabusake asi: “Uyungisa vakareli woge meraka lyoRuarameya,* yeeyi ose kuzuvha eraka olyo. Wa ha tu uyungisa meraka lyoVajuda, ngano tava yi zuvhu vantu ava vana kara kekuma.” 27 Nye Rabusake ta va tantere asi: “Nani hompa gwange kuna tumu nge ni ya uyunge nonkango edi kweni ntani kwahompa gweni tupu ndi? Nani kapisi ni ya di tantere hena vagara ava vana hingire kekuma, ava ngava lya nze zavene nokunwa masitamo gavene kumwe none ndi?”
28 Makura Rabusake ta sikama, ta zigire meraka lyoVajuda asi: “Purakeneni eyi ana uyunga hompa gononkondo unene gwaAsiliya. 29 Age kuna tanta asi: ‘Mwa ha pulisira Hisikiya a mu kumbagere, yeeyi age kapi na vhura kumupopera mokuwoko kwange. 30 Ntani mwa ha pulisira Hisikiya a mu ninkise mu huguvare mwaJehova pokumutantera asi: “Jehova natu popera ntani sitata esi kapi nava si gava momawoko gahompa gwaAsiliya.” 31 Mwa ha purakena Hisikiya, yeeyi hompa gwaAsiliya kuna kutanta asi: “Tuliseni po mbili kumwe name ntani ligaveni, makura nkenye ogu nga lye kositji sendi somandjembere nesi soukuzu ntani nga nwe mema gemetope* lyendi, 32 dogoro ngani wize ni ya mu tware kosirongo sokufana ngwendi seni. Mosirongo oso kwa kara mo mbuto novhinyu zompe nomboroto noyikunino yomandjembere noyitji yomauzwe ntani nousi. Makura ngomu paruke ngomu dire kufa. Mwa ha purakena kwaHisikiya, yeeyi age kuna kumupukisa pokumutantera asi: ‘Jehova natu popera.’ 33 Yikarunga yonomuhoko dapeke ya popera sirongo sawo mokuwoko kwahompa gwaAsiliya ndi? 34 Kupi yina kara yikarunga yoVahamati, yoVaarupadi, yoVasefaravayimu, yoVahena ntani neyi yoVaivha? Ayo ya popera sitata saSamaliya mokuwoko kwange ndi? 35 Mokumona asi yikarunga oyo kapi ya poperere sirongo sawo mokuwoko kwange, Jehova yige nye na popera Jerusarema mokuwoko kwange ndi?”’”
36 Nye vantu kwa mwenene ntani kapi va mu limbwilire, yeeyi hompa kwa va pangerere asi kapisi va mu limburure. 37 Nye Eliyakimu munaHilikiya ogu nga gendesa mbara nahamutjanga Sebuna naJowa munaAsafa ogu nga tjanga ehistoli, tava zi kwaHisikiya awo vana taura yikoverero yawo, tava mu tantere eyi ga va tanterere Rabusake.