Buke zokuhova zoVahompa
3 Saromo ta tulisa po ukwawo naFarawo, hompa gwaEgipite pokukwara* munendi. Makura ta mu reta moSitata saNdafita dogoro apa ga mene kudika mbara zendi nonzugo zaJehova ntani nekuma eli lya kundurukida Jerusarema. 2 Nye vantu simpe ngava zambere nonzambo konondundu, morwa posiruwo oso nzugo zokufumadekera edina lyaKarunga Jehova kapi vana zi tungu. 3 Saromo kwa twikilire kuhara Jehova pokulimburukwa nompangera edi va mu tanterere oguhwe. Nye nampili ngoso, age nga gava nonzambo deswakerero konondundu.
4 Hompa Saromo kwa zire koNgibiyoni a ka gave nzambo, yeeyi ndundu ozo kwa divikwire. Age kwa geve nonzambo deswakerero 1 000 posizambero esi sa kere kondundu ozo. 5 Apa ga kere Saromo moNgibiyoni, Jehova ta mu monekere monzodi masiku, ta mu tantere asi: “Hundira nge nkenye eyi ono hara ni ku pe.” 6 Makura Saromo ta tanta asi: “Ove kwa likida otate Ndafita eharo lyanarunye. Awo ngava ku karere noulimburukwi ntani nomutjima gokukuhuka. Ove kwa twikira kuvalikida eharo lyanarunye dogoro ngesi pokuvapa muna ogu ga hingira posipundi sawo souhompa. 7 Jehova Karunga gwange, ove kwa ninka nge ame mukareli goge ni pinge uhompa wotate Ndafita, nampili ngomu na kara munona simpe ntani kapi na kara noudivi. 8 Ame mukareli goge kuna kupangera vantu woge wovanzi ava wa horowora, wokudira kuvhura kuvarura. 9 Yipo nye, vatera nge ame mukareli goge ni ku limburukwe kutundilira komutjima yipo ni pangure vantu woge ntani ni dive kutokora asi yipi yoyiwa neyi yoyidona, yeeyi yilye gokuvhura kupangura vantu woge ava wovanzi ngesi?”
10 Jehova kwa haferere yininke eyi ga mu hundilire Saromo. 11 Makura Karunga ta mu tantere asi: “Mokumona asi ove kapi ono hundire nge ni ku pe mwenyo gomure* ndi ungawo ndi ni dipage nonkore doge, nye ove kuna hundire nge ni ku pe unongo yipo o pangure vantu, 12 ame tani ku pe unongo nonondunge eyi ono hundire nge. Yipo nye, ove ngo kara nounongo kupitakana vantu navenye ava va kere ko komeho va ku hampuruke ntani nava ngava kwama ko konyima zapa ngo fa. 13 Ame tani ku pe hena ungawo nefumano nampili ngomu ono dili kuyihundira nge, yipo nga ku dire kukara hompa ngwendi nyove siruwo esi ono kuparuka.* 14 Ano nsene o twikira kulimburukwa nompangera nonoveta dange ngwendi moomu va yi rugene oguho Ndafita, ame ngani ku pa mwenyo gomure.”
15 Apa ga pindukire Saromo, ta dimburura asi ayo kwa horokere monzodi. Makura ta zi koJerusarema ta ka sikama komeho zosikesa saJehova segwanekero, ta gava nonzambo deswakerero nedi dombili ntani ta ruganene vakareli vendi navenye sipito.
16 Posiruwo oso, nohondedi mbali tadi wiza kwahompa, tadi sikama komeho zendi. 17 Mukadi gokuhova ta tanta asi: “Hompa gwange, name nogu mukadi membo limwe twa tunga, napa na hampurukire nage yimo ga kere. 18 Ame nyame na hovere kuhampuruka, ano konyima zomazuva gatatu nage ta hampuruka. Nyoselike twa kere membo, kwato hena gumwe ogu ga kere mo. 19 Apa ka rere masiku, yipo ka dekere munendi makura yiyo ka fire. 20 Makura yipo ka pindukire pokatji komasiku ame nina rara, yiyo ka gusire munange a mu rangeke koruha rwendi.* Ano munendi gokufa yiyo ka mu rangekere koruha rwange. 21 Apa nina pinduka ngurangura asi ni zamweke munange, yiyo nina mono asi ana fu, makura yipo na mu tarurura yiyo nina dimburura asi age kapisi munange ogu na hampuruka.” 22 Nye mukadi gwauvali ta tanta asi: “Munange muzuni, goge yige ana fu.” Nye mukadi gokuhova ta tanta asi: “Hawe, munoge yige ana fu, gwange muzuni.” Awo kwa twikilire kulipatana komeho zahompa.
23 Makura hompa ta tanta asi: “Ogu kuna kutanta asi ‘munange muzuni, goge yige ana fu,’ ano gumwe asi ‘hawe, munoge yige ana fu, gwange muzuni.’” 24 Hompa ta tanta asi: “Retereni nge rufuro.” Makura tava mu retere rufuro. 25 Hompa ta tanta asi: “Teteni munona ogu pokatji mu va pe nkenye ogu ruha rumwe.” 26 Ozina womukeke ogo tava likwambere kwahompa, yeeyi awo kwa fililire munawo nkenda, tava tanta asi: “Na kanderere hompa gwange, gava tupu munona ogo kwamukwetu, nye va ha mu dipaga.” Nye mukadi mukwawo ta tanta asi: “Mu siga va mu tete pokatji, yipo tu litundire po natuvenye!” 27 Makura hompa ta tanta asi: “Mwa ha mu dipaga. Gaveni munona ogo komukadi gokuhova, yeeyi yiwo ozina.”
28 Apa va yi zuvhire Vaisraeli navenye omu ga pangwire hompa vakadi owo, tava tetuka,* yeeyi awo kwa mwene asi Karunga kwa mu pa unongo wokupangura pauhunga.