Buke zaMarukusa

16 Apa lya pwire Esabata, Mariya Mangadarena naMariya zinyaJakopo naSarome kwa ka rende yikwedumba,* yipo va ya kwite simpu sendi. 2 Ngurangura zonene, mezuva lyokuhova lyomosivike,* tupu lya pumine, tava ka sika kontoko.* 3 Tava lipuragere vene navene asi: “Yilye na ka tu gusira ko emumanya kevero lyontoko?” 4 Nye apa va tere kevero lyontoko, tava dimburura asi emumanya vana li sindumuna ko, nampili ngomu lya kere lyemunene. 5 Apa va hwililire montoko, tava mono mumati gomudinkantu ana hingire korulyo, ana dwara sikoverero sosire sosizera, makura tava tukuka. 6 Age ta va tantere asi: “Ya ha mu tukukisa, one kuna kupapara Jesus ogu ka va pamparere kositji. Ka va mu pindwire koufe. Age mwato omu. Tareni, apa yipo ka va mu rangekere. 7 Nye zendeni mu ka tantere varongwa vendi naPeturusa asi: ‘Age ta mu hovere kuza koGalireya, kwina yiko ngomu ka mu mona, moomu ga mu tanterere.’” 8 Apa va pwege mo montoko, awo vana kara nowoma oku tava kankama. Kwato ogu va tanterere ko, morwa awo kwa kere nowoma.*