EXODUS

1 Aga yigo madina govana vaIsraeli wovagara ndi vana vaJakopo ava va wizire moEgipite nomapata gawo: 2 Rubena, Simiyoni, Revhi ntani Juda; 3 Isasikali, Seburoni ntani Mbenyameni; 4 Dana ntani Nafitali; Gada ntani Aseli. 5 Epata lyaJakopo nalinye kwa sikire povantu 70, nye posiruwo oso Josefa age mweli nare moEgipite. 6 Konyima, Josefa novakuru vendi namumbyendi ntani novantu navenye vepupi lyawo, tava fu. 7 Nye Vaisraeli* tava ligwederere. Awo kwa twikilire kuligwederera nokukara nononkondo dononene makura tava ya vhuka mosirongo.

8 Konyima moEgipite kwa ya kere mo hompa gomupe ogu ga dilire kudiva Josefa. 9 Age kwa tanterere vantu vendi asi: “Vaisraeli vanzi unene ntani awo va tu pita mononkondo. 10 Tu ruganeni ko yuma, ndi ngano ngava ligwederera ntani nsene ngaku kara yita, awo ngava hama kononkore detu yipo va tu rwise makura ngava tunde mo mosirongo.”

11 Awo tava horowora vakurona wovapika,* yipo va hepeke Vaisraeli pokuvapa yirugana youdigu makura awo tava tungire Farawo yitata yaPitomu naRamusesi omu nga pungwire Farawo nondya dendi nayimwe ngoso. 12 Nye apa ngava va hepeke unene, awo kwa ligwedererere nokulihanena mosirongo, ano eyi kwa tjilisire unene Vaegipite. 13 Eyi kwa ninkisire Vaegipite va ture Vaisraeli moupika nokuvasininika va rugane yirugana youdigu. 14 Awo kwa digopekere eparu lyawo pokuvapangera va rugane erova ntani nonondopi nokurugana hena unene momapya. Vaegipite kwa tekwire Vaisraeli nonyanya ntani kwa va sininikire va rugane yirugana youdigu youpika.

15 Konyima, hompa gwaEgipite ta uyungisa vakadi wokuhampurukisa woVahebeli,* oSifira naPuva. 16 Age kwa va tanterere asi: “Nsene tomu hampurukisa mukadi goMuhebeli, mwa hepa kunomena munona ogu ana kuhampuruka. Nsene asi gomumati mwa hepa kumudipaga, ano nsene asi gomukadona tomu mu sigi.” 17 Nye vakadi owo kwa tjilire Karunga gousili, makura awo kapi va rugene eyi ga va tanterere hompa gwaEgipite. Awo kapi va dipagere vanona wovamati. 18 Konyima, hompa gwaEgipite ta zigida vakadi owo, ta va pura asi: “Morwasinke mwa dilira kudipaga vanona wovamati?” 19 Awo makura tava limburura Farawo asi: “Vakadi woVahebeli kapi va fana ngwendi vakadi woVaegipite. Awo nonkondo ntani komeho va ya sike vakadi wokuhampurukisa, awo nare vana hampuruka.”

20 Karunga kwa tungikire vakadi owo wokuhampurukisa. Vantu kwa twikilire kuligwederera ntani awo kwa ya kere nononkondo dononene. 21 Mokumona asi vakadi owo kwa tjilire Karunga gousili, konyima Karunga ta va pe vana. 22 Farawo makura ta pangere vantu vendi navenye asi: “Mwa hepa kuzugumina nkenye mukeke goMuhebeli gomumati moMukuro gwaNili, nye vakeke wovakadona tomu va sigi.”

2 Posiruwo oso pwa kere mugara gemezimo lyaRevhi ogu ga kwere munaRevhi gomukadi. 2 Mukadi ogo ta kara nomarutu gavali makura ta hampuruka munona gomumati. Apa ga mwene asi munona ogo muwa, ta mu horeke makwedi gatatu. 3 Apa ga dilire kuvhura kuhoreka munona ogo, ta gusa simbamba* ta si hoto nomanganganga nerova, ta tura mo munona ogo, makura ta si tura pokatji konombu konontere doMukuro gwaNili. 4 Nye mukurwendi gomukadi ta sikama koure a tare eyi nayi mu horokera.

5 Apa ga gurumukire munaFarawo gomukadi koMukuro gwaNili a ka zogane, vakareli vendi wovakadi kwa gendere konontere doMukuro gwaNili. Makura age ta mono simbamba pokatji konombu, ta tumu mukareli gwendi gomukadi a ka si simbe. 6 Apa ga kudumwine ko, ta mono munona gomumati ana kulira. Age ta mu fire nkenda, makura ta tanta asi: “Ogu mukeke goVahebeli.” 7 Makura mpanzendi ta pura munaFarawo asi: “Kuvhura ni ka ku zigidire mukadi goMuhebeli ogu ana kuzamweka, a ya ku zamwekere munona ogu ndi?” 8 MunaFarawo ta mu tantere asi: “Zende!” Mukadona makura ta zi, ta ka zigida ozina womukeke ogo. 9 MunaFarawo ta mu tantere asi: “Gusa munona ogu o ka mu zamwekere nge, ame ngani kufuta.” Makura mukadi ogo ta gusa munona, ta ka mu zamweka. 10 Apa ga kulire munona ogo, ta mu twara kwa munaFarawo, ano age ta mu gusa a kare munendi. Age ta mu ruku Mosesa,* ta tanta asi: “Yeeyi ame kwa mu zaura momema.”

11 Apa ga kulire* Mosesa, age kwa zire koVahebeli vakwawo a ka tare omu vana kuvasininika kurugana yirugana youdigu, makura ta mono Muegipite ana kutoona Muhebeli. 12 Mosesa makura ta tara noku-noku, apa ga mwene asi kwato muntu, ta dipaga Muegipite makura ta mu vhumbike.

13 Nye ezuva lyokukwama ko ta tengwire ko, ta ka gwana vagara vavali woVahebeli kuna kurwana. Makura ta pura ogu ga kere mepuko asi: “Morwasinke ono kutoonena mukweni?” 14 Age ta mu limburura asi: “Yilye ogu ga kutura o kare mupangeli ntani nomupanguli gwetu? Ove kuna hara o dipage nge ngwendi moomu ko dipagere Muegipite ndi?” Mosesa ta tukuka makura ta tanta asi: “Ngesi yininke yina divikwa nye!”

15 Apa ga yi zuvhire Farawo ta hetekere ko kudipaga Mosesa, nye age ta duka makura ta zi aka tunge mosirongo saMidiyani. Apa ga ka sikire, ta ka hingira ketope. 16 Mupristeli gumwe gomoMidiyani kwa kere novana wovakadi ntambali. Awo kwa zire va ka vhete mema, va ga ture momatemba yipo yi nwe yimuna yaguhyawo. 17 Nye vasita tava wiza, tava va tjida po ngwendi moomu ngava yi rugana. Makura Mosesa ta katuka a vatere* vakadi owo nokupa yimuna yawo mema. 18 Apa va ya sikire kembo, guhyawo Reweli* ta va pura asi: “Yisinke muna livindukire kuwiza neina?” 19 Awo tava limburura asi: “Muegipite gumwe ana tu popere kovasita ntani age kuna tu vhetere mema noyimuna yetu.” 20 Guhyawo ta va pura asi: “Kupi ana kara? Morwasinke muna mu sigire? Ka mu zigideni a ya lye kumwe nose.” 21 Konyima Mosesa ta pura a kare naReweli. Makura Reweli ta gava munendi Sipora kwaMosesa a mu kware. 22 Konyima Sipora ta hampuruka munona gomumati, makura ta mu ruku Geresomu,* yeeyi Mosesa kwa tente asi: “Ame kwa tunga ngomunayirongo mosirongo esi.”

23 Konyima zonomvhura dononzi,* hompa gwaEgipite ta dogoroka, nye Vaisraeli kwa twikilire kusivana morwa yirugana yawo youpika. Yipo nye, awo ngava sivana nkenye ezuva nokuhundira Karunga gousili ava vatere. 24 Karunga ta zuvhu masivano gawo makura ta diworoka egwanekero* eli ga tulire po naAbirahamu naIsaka ntani naJakopo, 25 makura ta diworoka Vaisraeli, ta mono ruhepo rwawo.

3 Mosesa ta ya kara musita. Age nga lisa yimuna ya tamweyi zendi Jeturo ogu ga kere mupristeli gomoMidiyani. Apa ga lisire Mosesa yimuna koUtokero womburundu, ta ka sika kondundu zaKarunga gousili koHoreba. 2 Makura muengeli gwaJehova ta mu monekere mosihwa somega momundiro. Apa ga tere ko, ta mono sihwa somega kuna kutwera nye aso kapi sa pire. 3 Mosesa yipo ga tente asi: “Eyi kutetukisa sili! Morwasinke sina kudilira kupya sihwa somega? Tani zi ni ka si tare.” 4 Apa ga mwene Jehova asi Mosesa ana hedere ko a ka tare, age ta mu zigida kutundilira mosihwa somega asi: “Mosesa! Mosesa!” Age ta limburura asi: “Nyame ogu.” 5 Karunga ta mu tantere asi: “Wa ha hedera ko. Hutura yicamakaku konompadi doge, morwa ove kuna sikama pevega lyokupongoka.”

6 Karunga ta mu tantere hena asi: “Ame Karunga goguho naKarunga gwaAbirahamu naKarunga gwaIsaka ntani naKarunga gwaJakopo.” Mosesa makura ta kudumike sipara sendi morwa age kwa tjilire kutara Karunga gousili. 7 Jehova ta tanta hena asi: “Ame na mona omu vana kuhepa vantu vange moEgipite ntani na zuvha omu vana kusivana, morwa Vaegipite kuvasininika va rugane yirugana youpika. Ame na diva ruhepo rwawo. 8 Ame tani zi ni ka va popere koVaegipite noku ka va gusa mo mosirongo oso ni va tware kosirongo sosiwa sosinene omu mwa zura masini nousi. Aso sirongo soVakanani noVaheti noVaamoli noVaperesi noVahevhi ntani noVajebusi. 9 Tara, ame na zuvha omu ava sivana Vaisraeli ntani na mona omu ava va hepeke Vaegipite. 10 Ngesi ame tani ku tumu kwaFarawo yipo ngo ka guse Vaisraeli moEgipite.”

11 Nye Mosesa ta limburura Karunga asi: “Ame kapi nina wapere kuza kwaFarawo ni ka guse Vaisraeli moEgipite.” 12 Karunga ta tanta asi: “Ame ngani kara nove ntani esi yiso sidiviso ngasi likida asi nyame na kutuma: Konyima zapa ngo ka gusa vantu moEgipite, one ngomu karera nge ame Karunga gousili pondundu ezi.”

13 Nye Mosesa ta tantere Karunga gousili asi: “Nsene nani za koVaisraeli ni ka va tantere asi: ‘Karunga gozinyakurweni ana tumu nge,’ makura awo va ka pure nge asi: ‘Yilye edina lyendi?’ Yisinke nani ka va tantera?” 14 Karunga ta tantere Mosesa asi: “Ame ngani kara nkenye eyi nina hara kukara.”* Ta tanta hena asi: “Ka tantere Vaisraeli asi: ‘Ame ngani kara, yige ana tumu nge.’” 15 Karunga ta tantere hena Mosesa asi:

“Ka tantere Vaisraeli asi: ‘Jehova Karunga gozinyakurweni, Karunga gwaAbirahamu naKarunga gwaIsaka ntani naKarunga gwaJakopo yige ana tumu nge kweni.’ Eli yilyo edina lyange lyanarunye ntani maruvharo nagenye ngaga diworokera nge kedina eli. 16 Ngesi zende o ka pongaike masimbi goVaisraeli noku ka va tantera asi: ‘Jehova Karunga gozinyakurweni naKarunga gwaAbirahamu naIsaka naJakopo, ana monekere nge nokutanta asi: “Ame nina mu diworoka ntani nina mono eyi vana kumurugana moEgipite. 17 Ame ngani mu gusa mo moudigu ou mwa kara morwa Vaegipite, yipo ni mu tware mosirongo omu mwa zura masini nousi. Aso sirongo soVakanani noVaheti noVaamoli noVaperesi noVahevhi ntani noVajebusi.”’

18 “Awo ngava ku purakena, makura nove nomasimbi goVaisraeli ngo mu ze kwahompa gwaEgipite mu ka mu tantere asi: ‘Jehova Karunga goVahebeli kuna uyunga nose. Yipo nye, tuna kanderere tu pulisira tu ze morugendo romazuva gatatu momburundu, yipo ngatu ka zambere Karunga gwetu Jehova.’ 19 Nye ame nayi diva asi hompa gwaEgipite kapi nga mu pulisira mu ze ntudi dogoro ngayi mu tumangede yuma. 20 Ame ngani ruganesa nonkondo dange yipo ni tengeke Egipite pokurugana yitetu yoyinene ntani nye nga mu siga mu ze. 21 Ame ngani ninka Vaegipite va mu hafere, yipo ngomu dire kuza mawoko-woko apa ngomu tunda mo. 22 Nkenye mukadi ga hepa kuhundira kwamusinda zendi ntani komukadi ogu ga tunga membo lyendi yipako yosisiliveli neyi yongorodo ntani noyikoverero. Makura ngomu yi dwareke vana veni wovagara nava wovakadi; ngesi yimo ngomu hakana emona lyoVaegipite.”

4 Nye Mosesa ta limburura asi: “Yisinke nani ka rugana nsene kapi nava ka yi pura ndi va dire kukapurakena nge? Yeeyi awo kuvhura va ka tante asi: ‘Jehova kapi ga ku monekera.’” 2 Makura Jehova ta mu pura asi: “Yisinke oyo yina kara mokuwoko koge?” Age ta limburura asi: “Mpango.” 3 Karunga ta mu tantere asi: “Zi zugumina pevhu.” Age ta zi zugumine pevhu, mpango ta zi lisintunuka ezoka, Mosesa makura ta duka. 4 Jehova ta tantere Mosesa asi: “Li kwata komusira gwalyo.” Age ta li kwata, makura alyo ta li lisintunuka mpango mokuwoko kwendi. 5 Karunga ta tanta asi: “Ka yi rugane eyi yipo ngava yi pure asi Jehova Karunga gozinyakurwawo, Karunga gwaAbirahamu naKarunga gwaIsaka ntani naKarunga gwaJakopo yige ga ku monekera.”

6 Jehova ta mu tantere hena asi: “Tura ewoko lyoge mosikoverero soge.” Age ta tura ewoko lyendi mosikoverero sendi. Apa ga ligusire mo alyo kwa kere noyingondwe ntani kwa zerere ngwendi yiterengenze. 7 Karunga ta tanta asi: “Tengwidira ewoko lyoge mosikoverero soge.” Age ta li tengwidire mosikoverero sendi. Apa ga li gusire mo, alyo kwa kere lyewaawa ngwendi rutu rwendi mudima. 8 Karunga ta tanta asi: “Nsene kapi nava kupura nokudira kupakera mbili sitetu soge sokuhova, awo nava ka pura sitetu soge sauvali. 9 Nye nsene kapi nava ka pura yitetu eyi yivali nokunyoka kukupurakena, ka guse mema moMukuro gwaNili oka ga tjisire pevhu lyekukutu, ano mema ogo naga ka lisintunuka honde apa no ka ga tjisira pevhu.”

10 Mosesa ta tantere Jehova asi: “Gusira nge po Jehova. Ame kapi na diva kuuyunga nawa kutunda kwanare ndi kutunda apa ono uyungisa mukareli goge, yeeyi ame kuuyunga kuliwora ntani siraka.” 11 Jehova ta mu tantere asi: “Yilye ga ninka muntu a vhure kuuyunga* ntani yilye ga kara nononkondo dokuninka muntu a dire kuvhura kuuyunga ndi a kare sipurupuru ndi a mone nawa ndi a kare mutwiku? Nani kapisi nyame Jehova? 12 Yipo nye, katuka o ze. Ame ngani ku vatera apa ngo uyunga ntani ngani kuronga eyi ngo uyunga.” 13 Nye Mosesa ta tanta asi: “Gusira nge po Jehova. Tuma ko gwapeke ogu ono hara.” 14 Jehova ta handukire Mosesa nokutanta asi: “Mukuroge Arona goMurevhi ga diva kuuyunga nawa, age monzira ana kara kuna kuwiza a ya ku gwane. Apa na ya kumona age na ya hafa. 15 Wa hepa kuuyunga nage noku mu tantera eyi nina ku tantere. Ame ngani mu vatera apa ngomu ka uyunga ntani ngani mu ronga eyi ngomu rugana. 16 Age yige nga ku uyungira po kovantu ntani ove ngo tantera Arona eyi ngani kutantera.* 17 Ano ngo guse mpango ezi zina kara mokuwoko koge, ngo ka ruganese ko yitetu.”

18 Mosesa ta tengura kwatamweyi zendi Jeturo, ta ka mu tantera asi: “Na kanderere. Nina hara kutengura kekoro lyange koEgipite yipo ni ka va tare nsene simpe vazuni.” Jeturo makura ta tantere Mosesa asi: “Zende nombili.” 19 Apa ga kere Mosesa moMidiyani, Jehova ta mu tantere asi: “Tengura koEgipite, yeeyi vagara navenye ava va here kukudipaga va fa.”

20 Mosesa ta gusa mukadendi novana vendi wovagara, tava rondeke posindongi makura ta tengura kosirongo saEgipite. Mosesa ta gusa hena mpango zaKarunga gousili ezi ga mu tanterere a simbe. 21 Jehova makura ta tantere Mosesa asi: “Apa no tengura koEgipite ka rugane yitetu nayinye komeho zaFarawo, morwa ame nina ku pe nonkondo dokurugana yitetu. Nye ame ngani kukutika mutjima gwaFarawo yipo a dire kusiga vantu va ze. 22 Ka tantere Farawo asi: ‘Jehova kuna uyunga asi: “Israeli yige munange gomugara gombeli. 23 Tani ku tantere asi siga munange a ze yipo a ka karere nge. Nye nsene kapi no mu siga, ame ngani dipaga munoge gombeli gomugara.”’”

24 Monzira zokuza kevango oku va rere, Jehova* ta mu monekere ntani age kwa here kumudipaga. 25 Makura Sipora ta gusa emanya lyoutwe, ta rugana munendi yovamba. Ano sipapa ta si gwire konompadi dendi,* ta tanta asi: “Ove ngesi ono kara mugara gwange kupitira mohonde ezi.” 26 Makura Karunga ta sigi Sipora apa ga uyungire asi: “Ove ngesi ono kara mugara gwange kupitira mohonde,” morwa yeeyi ga rugene munendi yovamba.

27 Makura Jehova ta tantere Arona asi: “Zende momburundu o ka gwanekere naMosesa.” Arona yipo ga zire, ta ka mu gwana kondundu zaKarunga gousili makura ta mu morora pokumuncumita. 28 Mosesa makura ta tantere Arona nayinye eyi ga mu tanterere Jehova noyitetu nayinye eyi ga mu pangerere a rugane. 29 Kutunda opo, Mosesa naArona tava zi, tava ka pongaika masimbi nagenye goVaisraeli. 30 Arona tava tantere nayinye eyi ga tanterere Jehova Mosesa. Makura Mosesa ta rugana yitetu komeho zovantu. 31 Makura vantu tava yi pura. Apa va zuvhire asi Jehova ana diworoka Vaisraeli ntani ga mona ruhepo rwawo, awo tava linyongamene.

5 Konyima, Mosesa naArona tava zi kwaFarawo, tava ka mu tantera asi: “Jehova Karunga gwaIsraeli kuna tanta asi: ‘Siga vantu vange va ze yipo va ka danene nge sipito momburundu.’” 2 Nye Farawo ta tanta asi: “Yilye nye Jehova ni mu limburukwe nokusiga Israeli a ze? Ame kapi na diva Jehova ntani hena kapi nani siga Israeli a ze.” 3 Nye awo tava tanta asi: “Karunga goVahebeli kuna uyunga nose. Tuna hara kuza morugendo romazuva gatatu momburundu yipo tu ka zambere Karunga gwetu Jehova. Nsene kapi tuna kuyirugana, age nga tu tengeka nehamba ndi norufuro.” 4 Hompa gwaEgipite ta va limburura asi: “Ove Mosesa naArona, morwasinke muna kuhagekesera vantu yirugana yawo? Tengureni koyirugana yeni!” 5 Farawo ta twikire ko asi: “Tareni si varugani kounzi, one ngoso kuna hara kuvahagekesa yirugana yawo ndi?”

6 Ezuva olyo, Farawo kwa pangerere vagavi yirugana novatareli woyirugana asi: 7 “Hagekeni kuvapa yihatji yorukokotwa va foromese ko nondopi. Va sigeni va ka yi pongaike vene. 8 Nye va hepa kuforoma sivaro sonondopi dokusika pwedi ngava rugana nare. Mwa ha sesupika sivaro, morwa awo udwa. Eyi yiyo vana kusivanena asi: ‘Tuna hara ku za tu ka zambere Karunga gwetu!’ 9 Va peni yirugana yoyinzi yipo va rugane unene, va dire kupurakena koyimpempa.”

10 Makura vagavi yirugana novatareli woyirugana tava zi, tava ka tantera vantu asi: “Farawo kuna tanta asi kapi na mu pa hena yihatji yorukokotwa. 11 Zendeni mu ka yi papare nyamweni nkenye oku nomu ka yi gwanena, nye mwa hepa kurugana sivaro sonondopi ngwendi nare.” 12 Makura vantu tava lihanene mosirongo nasinye saEgipite yipo va ka pongaike yihatji yorukokotwa. 13 Vagavi yirugana kwa va tanterere asi: “Namuvenye mwa hepa kumana yirugana yeni nkenye ezuva, ngwendi moomu ngomu yi rugana apa ngava mu pe yihatji yorukokotwa.” 14 Vatareli woyirugana woVaisraeli, ava va horowere vagavi yirugana vaFarawo, kwa va toonene noku va pura asi: “Morwasinke muna dilire kurugana sivaro sonondopi dokusika pwanare? Kapi komu yi sikisire mo nkera nanaina.”

15 Makura vatareli woyirugana woVaisraeli tava zi kwaFarawo, tava ka mu sivanena asi: “Morwasinke ono kutekwira vakareli woge monkedi ezi? 16 Ose kapi ava tu pe yihatji yorukokotwa, nye awo kutupura tu forome nondopi. Ose kututoona, nye vantu woge yiwo vana kara mepuko.” 17 Nye Farawo ta tanta asi: “One udwa! One udwa! Eyi yiyo muna kuuyungira asi: ‘Tuna hara kuza tu ka zambere Jehova.’ 18 Tengureni mu ka rugane! Kwato ogu na mu pa yihatji yorukokotwa, nye simpe mwa hepa kurugana sivaro sonondopi dokusika pwanare.”

19 Makura vatareli woyirugana woVaisraeli tava dimburura asi moudigu vana kara morwa mpangera ezi va gwene zokudira kusesupika sivaro sonondopi. 20 Konyima apa va tundire kwaFarawo, tava ligwana naMosesa naArona ava vava ndindilire. 21 Vatareli woyirugana tava tantere Mosesa naArona asi: “Jehova ngano a tare eyi mwa rugana nokumupangura morwa muna ninkisa Farawo novakareli vendi va tu nyenge ntani muna tura rufuro mokuwoko kwawo yipo va tu dipage.” 22 Makura Mosesa ta likwambere kwaJehova nokutanta asi: “Jehova, morwasinke ono kuhepekera vantu ava? Morwasinke wa tumina nge? 23 Kutunda tupu apa wa tuma nge ni ka uyunge naFarawo, age kwa hepeka unene vantu ava ntani ove kapi ono kuvazowora.”

6 Jehova ta tantere Mosesa asi: “Ove ngo mona eyi ngani rugana Farawo. Ame ngani mu sininika nononkondo dange, yipo nga mu sige mu ze. Apa nga mona nonkondo dange, age nga mu tantera mu tunde mo mosirongo sendi.”

2 Makura Karunga ta tantere Mosesa asi: “Ame nyame Jehova. 3 Ame kwa likidire Abirahamu naIsaka naJakopo asi ame Karunga Munankondo nadinye, nye ame kapi na va divisire edina lyange Jehova. 4 Ame kwa tulire po hena egwanekero* kumwe nawo yipo ngani va pe sirongo saKanani omu va tungire ngovanayirongo. 5 Ngesi ame na zuvha omu ava sivana Vaisraeli ava va kara vapika moEgipite ntani ame nina diworoka egwanekero eli na tulire po kumwe nozinyakurweni.

6 “Yipo nye, ka tantere Vaisraeli asi: ‘Ame nyame Jehova ntani ame ngani mu gusa yirugana youdigu eyi va mu pa Vaegipite. Ame ngani ruganesa nonkondo dange mokumuzowora moupika nokutengeka Vaegipite. 7 Ame ngani mu gusa yipo mu kare vantu vange makura ame ngani kare Karunga gweni. One ngomu diva asi ame nyame Karunga gweni Jehova nina kumugusa moyirugana youdigu eyi va mu pa Vaegipite. 8 Ame ngani mu twara kosirongo esi na tumbwidilire Abirahamu naIsaka ntani naJakopo, ngani si mu pa si kare seni. Ame nyame Jehova.’”

9 Konyima Mosesa ta ka yi tantera Vaisraeli, nye awo kapi va mu purakenene morwa awo kwa dompere ntani awo kwa hepere morwa upika.

10 Makura Jehova ta uyunga naMosesa, ta mu tantere asi: 11 “Zende kwaFarawo hompa gwaEgipite o ka mu tantere a sige Vaisraeli va tunde mo mosirongo sendi.” 12 Nye Mosesa ta limburura Jehova asi: “Ngapi nye na ka purakena nge Farawo nsene asi Vaisraeli kapi vana purakene nge ntani ame kapi na diva kuuyunga nawa?” 13 Nye Jehova ta tantere hena Mosesa naArona eyi na va ka tantera Vaisraeli naFarawo hompa gwaEgipite, yipo va ka guse Vaisraeli mosirongo saEgipite.

14 Aga kuna kara masimbi gomapata goVaisraeli: Vana vaRubena kwa kere, Hanoka, Paru, Hesironi ntani Karumi. Ava kuna kara vana vaRubena wovagara, mbeli zaIsraeli.

15 Vana vaSimiyoni wovagara kwa kere: Jemueli, Jamini, Ohadi, Jakini, Sohara ntani Sauru ogu ga reterere pomukadi goMukanani. Ava kuna kara vana vaSimiyoni.

16 Vana vaRevhi wovagara kuliza noruvharo rwawo kwa kere: Geresoni, Kohati ntani Merali. Revhi kwa parukire nomvhura 137.

17 Vana vaGeresoni wovagara kuliza nomapata gawo kwa kere: Libuni ntani Simeyi.

18 Vana vaKohati wovagara kwa kere: Amuramu, Isihara, Heburoni ntani Usiyeli. Kohati kwa parukire nomvhura 133.

19 Vana vaMerali wovagara kwa kere: Mahili naMusi.

Ava kuna kara vana vaRevhi kuliza noruvharo rwawo.

20 Amuramu kwa kwere Jokebedi ekoro* lyoguhwe. Awo kwa retere Arona naMosesa. Amuramu kwa parukire nomvhura 137.

21 Vana vaIsihara wovagara kwa kere: Kora, Nefegi ntani Sikili.

22 Vana vaUsiyeli wovagara kwa kere: Misayeli, Elisafani ntani Sitili.

23 Arona kwa kwere munaAminadabu gedina Eliseba mumbyaNasoni. Age kwa retere Nadabu, Abihu, Eliyasara ntani Itamara.

24 Vana vaKora wovagara kwa kere: Asire, Elikana ntani Abiyasafa. Ava kuna kara vana vaKora.

25 Eliyasara munaArona gomugara kwa kwere munaPutiyeli, makura ta reta Pinehasa.

Aga yigo madina gomasimbi goVarevhi kuliza nomapata gawo.

26 Arona naMosesa kwa tundilire morudi oru. Jehova kwa va tanterere asi: “Ngomu guse Vaisraeli mosirongo saEgipite motumbunga.” 27 Awo yiwo va uyungisire Farawo hompa gwaEgipite a sige Vaisraeli va tunde moEgipite.

28 Jehova apa ga uyungisire Mosesa mosirongo saEgipite, 29 Jehova kwa tanterere Mosesa asi: “Ame nyame Jehova. Ka tantere Farawo hompa gwaEgipite nayinye eyi nina kukutantera.” 30 Makura Mosesa ta tantere Jehova asi: “Ngapi nye omu na ka purakena nge Farawo mokumona asi ame kapi na diva kuuyunga nawa?”

7 Jehova ta tantere Mosesa asi: “Ame kwa kuninka o kare ngwendi Karunga* kwaFarawo ntani mukuroge Arona nga kara muporofete goge. 2 Ka uyunge nayinye eyi nina kukutantera ano mukuroge Arona yige nga ka uyungisa Farawo, makura Farawo nga siga Vaisraeli va tunde mosirongo sendi. 3 Ame ngani kukutika mutjima gwaFarawo ntani ngani rugana yidiviso noyitetu yoyinzi mosirongo saEgipite. 4 Nye Farawo kapi nga ku purakena ntani ame ngani likida Vaegipite nonkondo dange* noku va tengeka unene ntani ngani gusa vantu vange Vaisraeli mosirongo saEgipite. 5 Vaegipite ngava diva asi ame nyame Jehova apa ngani va likida nonkondo dange nokugusa mo Vaisraeli mokatji kawo.” 6 Mosesa naArona kwa rugene moomu ga va tanterere Jehova. 7 Mosesa kwa kere nonomvhura 80 ano Arona kwa kere nonomvhura 83 apa va uyungire naFarawo.

8 Jehova ta tantere Mosesa naArona asi: 9 “Nsene Farawo na ka mu pura mu ka rugane sitetu, ka tantere Arona a ka guse mpango zendi, a zi zugumine pevhu komeho zaFarawo. Azo nazi ka lisintunuka ezoka lyenene.” 10 Mosesa naArona tava zi kwaFarawo, tava ka rugana moomu ga va tanterere Jehova. Arona ta zuguma mpango zendi komeho zaFarawo novakareli vendi. Azo makura tazi lisintunuka ezoka lyenene. 11 Nye Farawo ta zigida vanandunge nonompure, ano nompure odo domoEgipite nado tadi rugana yokulifana noumpure wawo. 12 Nawo kwa zugumine nompango dawo makura tadi lisintunuka mazoka gomanene, nye ezoka* lyaArona tali mini mazoka gawo. 13 Nye Farawo simpe kwa kukutikire mutjima gwendi ntani kapi ga va purakenene ngwendi moomu ga tente Jehova.

14 Jehova ta tantere Mosesa asi: “Farawo simpe kapi ana hara. Age ana nyoka kusiga vantu va ze. 15 Ngo ze kwaFarawo ngurangura. Apa nga za koMukuro gwaNili, ngo ze o ka mu gwane komukuro ntani ngo piture mpango mokuwoko koge ezi zina lisintunuka ezoka. 16 Ngo ka mu tantere asi: ‘Jehova Karunga goVahebeli yige ana tumu nge koge ntani age kuna tanta asi: “Siga vantu vange va ze yipo va ka karere nge momburundu,” nye ove kapi ono yi rugana dogoro ngesi. 17 Jehova kuna tanta asi: “Apa yipo no divira asi ame nyame Jehova. Ame tani toona mema gomoMukuro gwaNili nompango ezi zina kara mokuwoko kwange, ano ago taga lisintunuka honde. 18 Nomfi domoMukuro gwaNili tadi fu ntani mema gamo naga nuka, ano Vaegipite kapi nava vhura kunwa mema gamo.”’”

19 Jehova makura ta tantere Mosesa asi: “Tantera Arona a guse mpango zendi a zi like komema nagenye gaEgipite, gomomukuro, gomonomukanko,* gomoyidiva naga va pungura, yipo ga lisintunuke honde. Mema nagenye gomosirongo saEgipite ngaga kara honde nampili aga ga kara moyipako yomamanya neyi yokuhonga.” 20 Mosesa naArona makura tava rugana moomu ga va tanterere Jehova. Arona ta zerura mpango, ta zi toona moMukuro gwaNili komeho zaFarawo novakareli vendi, makura mema gomomukuro taga lisintunuka honde. 21 Ano nomfi nadinye domomukuro tadi fu, makura mema taga tameke kunuka. Vaegipite kapi va vhulire kunwa mema gomoMukuro gwaNili ntani mema nagenye gomosirongo saEgipite kwa kere honde.

22 Nye nompure domoEgipite nado kwa rugene yokulifana nononkondo dawo domokahorehore, makura Farawo kwa kukutikire mutjima gwendi ntani kapi ga va purakenene ngwendi moomu ga tente Jehova. 23 Farawo kapi ga yi pakerere mbili makura ta tengura kembo lyendi. 24 Vaegipite navenye tava simi konontere doMukuro gwaNili yipo va gwane mema gokunwa, morwa kapi va vhulire kunwa mema gomoMukuro gwaNili. 25 Makura tapa piti mazuva ntambali kutunda apa ga tjindjire Jehova mema gomoMukuro gwaNili ga kare honde.

8 Makura Jehova ta tantere Mosesa asi: “Zende kwaFarawo o ka tante asi: ‘Jehova kuna tanta asi: “Siga vantu vange va ze yipo va ka karere nge. 2 Nsene no twikira kunyoka kuvasiga va ze, ame ngani ninka sirongo soge nasinye ngasi zure mankowowo. 3 MoMukuro gwaNili ngamu kara mankowowo gomanzi, ago ngaga wiza membo lyoge nomonzugo zoge zokurara nopombete zoge ntani mononzugo dovakareli woge nokovantu woge nomomasuga goge nopomaruyaha gokuduvira mboroto. 4 Mankowowo ngaga wiza koge nokovantu woge ntani kovakareli woge navenye.”’”

5 Konyima, Jehova ta tantere Mosesa asi: “Tantera Arona a like mpango zendi konomukuro, konomukanko daNili ntani koyidiva nokuninka mankowowo ga wize mosirongo saEgipite.” 6 Arona makura ta like mpango zendi komema nagenye gomoEgipite makura mankowowo taga wiza mosirongo saEgipite. 7 Nye nompure nado kwa rugene yokulifana nononkondo dawo domokahorehore, nawo kwa ninkire mankowowo ga wize mosirongo saEgipite. 8 Makura Farawo ta zigida Mosesa naArona, ta va tantere asi: “Likwambereni kwaJehova a tu guse mankowowo name novakareli vange, morwa nina hara kusiga vantu va ze va ka zambere Jehova.” 9 Mosesa ta tantere Farawo asi: “Nyove no tantera nge siruwo esi nani likwambera kwaKarunga, yipo a mu guse mankowowo nove novakareli woge novantu woge ntani nomomambo geni, kugusa ko aga gana kara moMukuro gwaNili.” 10 Farawo ta tanta asi: “Mungura.” Makura Mosesa ta tanta asi: “Yi kare moomu ono tanta yipo ngo dive asi kwato ogu ga fana ngwendi Karunga gwetu Jehova. 11 Mankowowo naga tunda momambo geni, kovakareli woge ntani kovantu woge, nye ago naga kara tupu moMukuro gwaNili.”

12 Mosesa naArona tava tundu po pwaFarawo, makura Mosesa ta likwambere kwaJehova kuhamena mankowowo aga ga reterere Farawo. 13 Jehova ta rugana eyi ga mu hundilire Mosesa, makura mankowowo aga ga kere mononzugo nomomaharango ntani nomomapya taga fu. 14 Awo kwa ga pongaikire monondambo dononzi makura mosirongo ta mu tameke kunuka. 15 Apa ga mwene Farawo asi mankowowo gana fu, ta kukutike mutjima gwendi nokunyoka kupurakena kwaArona naMosesa ngwendi moomu ga yi tente Jehova.

16 Jehova ta tantere Mosesa asi: “Tantera Arona a toone mpango zendi pevhu, makura mbundu zevhu nazi lisintunuka zi kare nomwe* mosirongo nasinye saEgipite.” 17 Awo makura tava yi rugana. Arona ta gonona kuwoko kwendi, ta toona mpango zendi pevhu, makura nomwe tadi hepeke vantu noyikorama. Mbundu nazinye zomoEgipite kwa lisintunukire nomwe. 18 Nompure nado kwa hetekerere ko kurugana yokulifana nononkondo dawo domokahorehore, nye kapi va yi vhulire. Makura nomwe tadi tameke kuhepeka vantu noyikorama. 19 Nompure tadi tantere Farawo asi: “Edi nonkondo daKarunga!”* Nye Farawo kwa kukutikire mutjima gwendi ntani kapi ga va purakenene ngwendi moomu ga tente Jehova.

20 Jehova ta tantere Mosesa asi: “Ngo pinduke ngurangura zonene yipo ngo ka gwane Farawo. Apa nga za komukuro, ngo ka mu tantere asi: ‘Jehova kuna tanta asi: “Siga vantu vange va ze yipo va ka karere nge. 21 Nye nsene kapi no siga vantu vange va ze, ame ngani mu tumina nondi dokuhuma* nove novakareli woge novantu woge ntani momambo geni. Ano momambo goVaegipite ngamu zura nondi dokuhuma ntani ado ngadi kara nakunye oku ngava* lyatera. 22 Mezuva olyo, ame ngani popera mukunda gwaGoseni omu va tunga vantu vange ntani amo kapi ngamu kara nondi dokuhuma. Apa yipo ngo divira asi ame nyame Jehova nina kara mosirongo esi. 23 Ame ngani likida elisigo pokatji kovantu vange novantu woge ntani ame ngani likida sidiviso oso mungura.”’”

24 Jehova ta yi rugana, makura madugi gonondi dokuhuma tadi hwilire membo lyaFarawo nomomambo govakareli vendi ntani mosirongo nasinye saEgipite. Ado kwa hepekere unene Vaegipite. 25 Konyima, Farawo ta zigida Mosesa naArona, ta va tantere asi: “Ka zambereni Karunga gweni moomu moEgipite.” 26 Nye Mosesa ta tanta asi: “Ose kapi natu vhura kuyirugana, morwa Vaegipite kuvhura va handuke pokumona eyi tuna kuzambera Karunga gwetu Jehova. Ano nsene tu handukisa Vaegipite nononzambo detu, awo kuvhura va tu toone nomamanya. 27 Ose tatu zi morugendo romazuva gatatu momburundu, ano oko yiko ngatu ka zambera Karunga gwetu Jehova, ngwendi moomu ga tu tantera.”

28 Farawo ta va tantere asi: “Ame tani mu sigi mu ze yipo mu ka zambere Jehova Karunga gweni momburundu, nye mwa ha za ure ntani ka likwamberereni nge po kwaKarunga gweni.” 29 Makura Mosesa ta tanta asi: “Ame ngesi tani tundu po poge ni ka likwambere kwaJehova, makura nondi dokuhuma ngadi ku sige mungura novakareli woge ntani novantu woge. Nye Farawo ga ha tu kumbagera hena pokunyoka kusiga vantu va ze va ka zambere Jehova.” 30 Mosesa makura ta tundu po pwaFarawo, tazi a ka likwambere kwaJehova. 31 Jehova ta rugana eyi ga mu hundilire Mosesa, makura nondi dokuhuma tadi tundu ko kwaFarawo nokovakareli vendi ntani nokovantu vendi, kwato nampili zimwe ezi za hupire mo mosirongo. 32 Nye Farawo ta kukutike hena mutjima gwendi ntani kapi ga sigire Vaisraeli va ze.

9 Jehova makura ta tantere Mosesa asi: “Zende kwaFarawo o ka mu tantere asi: ‘Jehova Karunga goVahebeli kuna tanta asi: “Siga vantu vange va ze, yipo va ka karere nge. 2 Nye nsene no nyoka kuvasiga va ze nokutwikira kuvakondera, 3 ame Jehova ngani ruganesa nonkondo dange yipo ni dipage yimuna yoge. Nonkambe doge noyindongi yoge nonongameru doge nonongombe doge ntani nononzwi doge ngayi fa kehamba. 4 Jehova nga likida elisigo pokatji koyimuna yoVaisraeli neyi yoVaegipite ntani yimuna yoVaisraeli kapi ngayi fa.”’” 5 Jehova kwa tulire po siruwo apa ngayi horoka. Age kwa tente asi: “Mungura ame Jehova ngani yi rugana eyi mosirongo saEgipite.”

6 Ezuva lyokukwama ko, Jehova makura ta yi rugana. Yimuna yoyinzi yoVaegipite ta yi tameke kufa nye yimuna yoVaisraeli kapi ya fire. 7 Apa ga tumine Farawo vakareli vendi va ka tare eyi ya horokere, ta ya zuvhu asi yimuna yoVaisraeli kapi ya fire. Nye Farawo simpe kwa kukutikire mutjima gwendi ntani kapi ga sigire vantu va ze.

8 Jehova ta tantere Mosesa naArona asi: “Guseni enoto mesuga lyenene* nomawoko geni, makura Mosesa a li mwagere mompepo komeho zaFarawo. 9 Alyo ngali kara mbundu mosirongo nasinye saEgipite ano vantu noyikorama ngayi kara nomasina mosirongo nasinye saEgipite.”

10 Awo tava gusa enoto mesuga lyenene, makura tava ka sikama komeho zaFarawo. Mosesa ta li mwagere mompepo, makura vantu noyikorama tayi kara nomasina. 11 Nompure kapi da vhulire kukasikama komeho zaMosesa morwa masina gava kere noVaegipite navenye. 12 Nye Jehova kwa kukutikire hena mutjima gwaFarawo ntani age kapi ga va purakenene ngwendi moomu Jehova ga yi tanterere Mosesa.

13 Makura Jehova ta tantere Mosesa asi: “Ngo pinduke ngurangura zonene o ka moneke kwaFarawo, ngo ka mu tantere asi: ‘Jehova Karunga goVahebeli kuna tanta asi: “Siga vantu vange va ze yipo va ka karere nge. 14 Ngesi ame tani ku tumine mahepeko nove novakareli woge ntani novantu woge, yipo ngo mu dive asi kwato ogu ga fana nge mouzuni naunye. 15 Ame ngano nare na mu zonagura po pevhu nehamba, nove novantu woge nokuwoko kwange kononkondo. 16 Nye ame kwa ku siga o paruke, yipo ni ku likide nonkondo dange ntani yipo ngava divise edina lyange uzuni mudima. 17 Nye ove simpe kuna kulinenepeka pokudira kusiga vantu vange va ze. 18 Mungura posiruwo esi, ngani rokesa mvhura zonene zakamanya, ezi za dira kuroka rumwe moEgipite. 19 Yipo nye, tuma vakareli woge va ka rete yimuna yoge nanayinye eyi wa weka va ya yi popere. Vantu noyikorama eyi ngayi kara ponze va hana kuyihwilida membo, ngayi fa apa ngazi roka mvhura zakamanya.”’”

20 Vakareli vamwe vaFarawo ava va tjilire Jehova kwa hwilidire usimbu vakareli vawo noyimuna yawo momambo gawo, 21 nye ava va dilire kupurakena kwaJehova, kwa sigire vakareli vawo noyimuna yawo ponze.

22 Jehova ta tantere Mosesa asi: “Gonona kuwoko koge keguru yipo mvhura zakamanya zi roke mosirongo nasinye saEgipite. Zi rokere povantu, yikorama ntani noyimeno nayinye yomoEgipite.” 23 Mosesa ta like mpango zendi keguru. Jehova makura ta tumu maruvadi nomvhura zakamanya ntani nomundiro* pevhu. Jehova kwa twikilire kurokesa mvhura zakamanya mosirongo saEgipite. 24 Kamanya kwa rokere ntani maruvadi kwa vemene mokamanya. Kamanya kwa rokere unene ntani kapi ga roka rumwe unene kutunda apa va kara Vaegipite muhoko. 25 Kamanya kwa dipagere nayinye eyi ya kere ponze mosirongo saEgipite, kutundilira komuntu dogoro kosikorama ntani kwa zonagwire yimeno nayinye noyitji nayinye. 26 Momukunda gwaGoseni omu va kere Vaisraeli, yimo mwelike mwa dilire kamanya.

27 Farawo ta tumine Mosesa naArona, makura ta ya va tantere asi: “Ngesi nina yi tambura asi nyame nina zono. Jehova kurugana youhunga, ntani name novantu vange nyose tuna kara mepuko. 28 Likwambereni kwaJehova yipo a hagekese maruvadi nakamanya, makura ame ni mu sige mu ze ntani kapi nomu kara mo hena omu.” 29 Mosesa ta mu tantere asi: “Tupu nani tunda mo mositata esi nani kanderera kwaJehova,* makura maruvadi nakamanya nayi haga, yipo o dive asi uzuni waJehova. 30 Nye ame na yi diva nare asi nove novakareli woge kapi ngomu tjira simpe Jehova Karunga.”

31 Yimeno* nonombuto kwa kere pepi nokuyizangura, nye ayo kwa zonaukire unene. 32 Nye rukokotwa rwelike rwa dilire kuzonauka morwa aro ngaru hulilire kupya. 33 Makura Mosesa ta tundu mo mositata kwaFarawo, ta ka kanderera kwaJehova. Makura maruvadi nakamanya ntani nomvhura tayi hageke kuroka. 34 Apa ga mwene Farawo asi mvhura ntani kamanya nomaruvadi yina haga, ta zono hena ano nage novakareli vendi tava kukutike nomutjima dawo. 35 Farawo kwa twikilire kukukutika mutjima gwendi ntani kapi ga sigire Vaisraeli va ze, ngwendi moomu ga tente Jehova kupitira mwaMosesa.

10 Makura Jehova ta tantere Mosesa asi: “Zende kwaFarawo, yeeyi ame na kukutike mutjima gwendi ntani nonomutjima dovakareli vendi, yipo ni rugane yitetu yange komeho zendi, 2 ntani yipo ngomu tantere vana veni wovagara novatekuru veni wovagara omu na tengeka Vaegipite ntani noyitetu eyi na rugana mokatji kawo, yipo ngomu dive asi ame nyame Jehova.”

3 Mosesa naArona tava zi kwaFarawo, tava ka mu tantera asi: “Jehova Karunga goVahebeli kuna tanta asi: ‘Siruwo sokuhura kupi ngo nyoka kulimburukwa nge? Siga vantu vange va ze yipo va ka karere nge. 4 Nsene no twikira kunyoka kusiga vantu vange va ze, mungura ngani reta simbonde mosirongo soge. 5 Age nga kudumika evhu nalinye ntani kapi ngomu vhura kumona evhu. Age nga lya eyi za dira kuzonagura mvhura zakamanya ntani nga lya yitji nayinye eyi yina kukura mosirongo. 6 Simbonde nga zura membo lyoge nomomambo govakareli woge ntani momambo goVaegipite navenye, ano ozinyakurweni kapi va yi mona rumwe kutunda apa va tameka kukara mosirongo esi dogoro naina.’” Makura Mosesa naArona tava tundu ko komeho zaFarawo.

7 Vakareli vaFarawo tava mu tantere asi: “Siruwo sokuhura kupi nga twikira kututura mugara ogu moudigu? Siga vantu va ze yipo va ka karere Karunga gwawo Jehova. Simpe kapi ono yi dimburura asi Egipite zina zonauka po ndi?” 8 Farawo makura ta zigida Mosesa naArona, ta va tantere asi: “Zendeni mu ka karere Karunga gweni Jehova. Nye wolye vana kuza?” 9 Mosesa ta tanta asi: “Ose tatu zi novadinkantu vetu novakurupe novana vetu wovagara nava wovakadi nononzwi detu ntani nonongombe detu, yeeyi ose kuna kuza tu ka danene sipito Jehova.” 10 Age ta va tantere asi: “Ayo kuna kumoneka asi one kuna hara kurugana yininke yoyidona. Ngoso one kuna kugazara asi Jehova none ga kara yipo ni mu sige mu ze kumwe novana veni ndi? 11 Hawe! Vagara yiwo velike nava za va ka karere Jehova, morwa yiyo mwa here.” Makura tava va gusa po pwaFarawo.

12 Jehova ta tantere Mosesa asi: “Gonwena kuwoko koge mosirongo saEgipite yipo a wize simbonde mosirongo saEgipite a ya lye yimeno nayinye yomosirongo ntani nanayinye eyi za dira kuzonagura mvhura zakamanya.” 13 Mosesa ta like mpango zendi mosirongo saEgipite, makura Jehova ta ninki mpepo zokoUpumezuva zi pepere mosirongo ezuva nalinye ntani masiku nagenye. Ngurangura mpepo zokoUpumezuva tazi reta simbonde. 14 Makura simbonde ta wiza mosirongo nasinye saEgipite, ta kara mosirongo nasinye. Age kwa kere gomunzi unene, mosirongo kapi mwa kara rumwe simbonde gomunzi ntani kapi nga mu kara hena simbonde gomunzi ngoso. 15 Age kwa kudumikire sirongo nasinye ntani sirongo kwa sovaganene. Simbonde kwa lire yimeno nayinye yomosirongo nenyango lyokoyitji eyi ya hupire ko komvhura zakamanya. Ano kwato nampili sihako simwe sa hupire ko koyitji ndi koyimeno yomosirongo nasinye saEgipite.

16 Farawo makura ta zigida usimbu oMosesa naArona, ta va tantere asi: “Ame kwa zona kweni ntani kwaJehova Karunga gweni. 17 Nina kanderere gusireni nge po nzo zange ntani likwambereni kwaJehova Karunga gweni yipo a guse nge udigu ou.” 18 Makura age* ta tundu po pwaFarawo, ta ka likwambera kwaJehova. 19 Makura Jehova ta ninki mpepo zi kare zononkondo zi vyuke koUtokero, makura ta zi rerura simbonde noku mu twara mEfuta lyEgeha. Kwato simbonde nampili gumwe ga hupire mo mosirongo saEgipite. 20 Nye Jehova kwa kukutikire mutjima gwaFarawo, makura kapi ga sigire Vaisraeli va ze.

21 Jehova ta tantere Mosesa asi: “Gonwena kuwoko koge meguru yipo mundema gu kare mosirongo saEgipite, mundema gomunene unene.” 22 Mosesa makura ta gonwene kuwoko kwendi meguru makura mosirongo nasinye saEgipite ta mu kara mundema gomunene mazuva gatatu. 23 Kwato ogu ga vhulire kumona mukwawo ntani kwato ogu ga vhulire kuza nkenye oku mazuva gatatu, nye oku va tungire Vaisraeli, uzera wa kere ko. 24 Farawo ta zigida Mosesa, ta mu tantere asi: “Zendeni mu ka karere Jehova novana veni, nye nonzwi nonongombe deni yiyo yelike nomu siga.” 25 Nye Mosesa ta tanta asi: “Hawe, wa hepa kutupa yimuna yipo tu ka yi zambe kwaJehova Karunga gwetu. 26 Ose tatu zi noyimuna yetu. Kwato simuna esi natu siga, morwa yimwe tatu ka yi ruganesa mokukarera Jehova Karunga gwetu ntani kapi tuna diva eyi ngatu ka zamba pokukarera Jehova dogoro ngatu ka sike.” 27 Jehova kwa kukutikire mutjima gwaFarawo, makura kapi ga pulisilire Vaisraeli va ze. 28 Farawo ta mu tantere asi: “Tunda po apa! Kapisi ngo ya moneke hena komeho zange, yeeyi ezuva eli ngo moneka komeho zange, yilyo ezuva lyoolyo ngo fa.” 29 Makura Mosesa ta uyunga asi: “Ame kapi ngani ya moneka komeho zoge ngwendi moomu ono uyunga.”

11 Makura Jehova ta tantere Mosesa asi: “Ehepeko limwe lina hupu ko eli ngani retera Farawo naEgipite. Konyima, age nga mu siga mu ze. Apa nga mu siga mu ze, age nga mu tjida. 2 Tantera Vaisraeli asi vagara novakadi navenye va hundire kovamusinda vawo yipako yosiliveli neyi yongorodo.” 3 Jehova kwa ninkire Vaegipite va hafere Vaisraeli. Ano vakareli vaFarawo ntani novantu womoEgipite kwa fumadekere unene Mosesa.

4 Mosesa ta tanta asi: “Jehova kuna tanta asi: ‘Pokatji komasiku ame tani zi moEgipite nazinye, 5 nombeli nadinye domoEgipite tadi fu, kutundilira kombeli zaFarawo, ogu ana hingire posipundi souhompa dogoro kombeli zomupika ogu ana kugoga mbuto nonombeli nadinye doyimuna. 6 Mosirongo nasinye saEgipite ngamu kara ruguwo rorunene oru rwa dira kukara ko rumwe ntani aro kapi nga ru kara ko hena. 7 Nye kwato yoyidona eyi ngayi horokera Vaisraeli noyimuna yawo. Nampili mbwa zeezi kapi ngazi va huda zi va tjilise, yipo mu dive asi Jehova kuvhura kulikida elisigo pokatji koVaegipite noVaisraeli.’ 8 Vakareli woge navenye ngava wiza kwange va ya nyongamene nge nokutanta asi: ‘Zende kumwe novantu ava ava ku kwama.’ Ano konyima ntani ngani za.” Makura ta tundu po pwaFarawo age ana handuka unene.

9 Jehova makura ta tantere Mosesa asi: “Farawo kapi na ku purakena yipo ngani rugane yitetu yoyinzi mosirongo saEgipite.” 10 Mosesa naArona kwa rugene yitetu yoyinzi komeho zaFarawo, nye Jehova kwa kukutikire mutjima gwaFarawo. Yipo nye, age kapi ga sigire Vaisraeli va tunde mo mosirongo sendi.

12 Jehova ta tantere Mosesa naArona mosirongo saEgipite asi: 2 “Kwedi oku yiko nga ku kara kwedi kweni kokuhova momvhura. 3 Tantera mbunga nazinye zoVaisraeli asi: ‘Mezuva lyomurongo lyokwedi oku, nkenye epata lya hepa kugusa nzwi zimwe;* nzwi zimwe mwankenye epata. 4 Nye nsene vantu ava va kara mepata vasesu, ntani kapi nava vhura kumana kulya nzwi ozo, va hepa kupa ko vamusinda vawo ntani va varure sivaro sovantu neyi na vhura kulya nkenye muntu. 5 Nzwi ozo za hepa kukara zongara zokukanguka ntani zomvhura zimwe. Awo kuvhura va horowore nzwigona ndi sikombogona. 6 Va hepa kuzipakera mbili dogoro mezuva 14 lyokwedi oku. Ano komeho li ka toke ezuva, nkenye epata lyoVaisraeli lya hepa kudipaga nzwi ozo. 7 Va hepa kugusa honde zimwe nokuzikwita keguru ntani monompatji devero* lyankenye embo omu vana kuzilira.

8 “‘Va hepa kulya nyama ozo masiku ogo ntani va hepa kuzidosa pomundiro nokuzilya nomboroto zokudira yihaheso noyikwahidi youruru. 9 Awo kapisi va zi lye uvihu ndi va zi tereke nomema, nye va hepa kuzidosa pomundiro kumwe nomutwe gwazo nomakondo gazo ntani neyi yemezimo. 10 Nye kapisi va tulike ko zimwe dogoro ngurangura. Nsene va siga ko zimwe dogoro ngurangura, va hepa kuzihwika. 11 Va hepa kuzilya awo vana liwapaikire kutunda mo* oku vana dwara yicamakaku konompadi dawo ntani awo vana kwaterere nompango dawo momawoko gawo ntani va hepa kuzilya usimbu-usimbu. Azo Paska zaJehova. 12 Yeeyi masiku ogo, ame ngani pita mosirongo saEgipite ni dipage nombeli nadinye domoEgipite kutundilira komuntu dogoro kosikorama. Ame ngani pangura yikarunga nayinye yomoEgipite. Ame nyame Jehova. 13 Honde ngazi kara sidiviso komambo aga mwa tunga. Ano apa ngani mona honde, ame ngani mu pitakana ntani kapi ngani mu rugana yoyidona apa ngani tengeka Vaegipite.

14 “‘One mwa hepa kudiworoka ezuva eli ntani ngomu danene Jehova sipito nkenye mvhura noruvharo rweni rokomeho. Ano ezi kuna kara veta zokukarerera. 15 Mwa hepa kulya mboroto zokudira yihaheso mazuva ntambali. Mezuva lyokuhova, mwa hepa kugusa mo yininke yokuhaha eyi va duva momambo geni, yeeyi nkenye ogu nga lya yokuhaha mezuva lyokuhova dogoro lyauntambali, muntu ogo va hepa kumugusa mo* moVaisraeli. 16 Mezuva lyokuhova neli lyauntambali, mwa hepa kuponga mu karere Karunga. Kwato ogu nga rugana momazuva aga, one ngomu wapaika tupu eyi ngomu vhura kulya.

17 “‘Ngomu diworoke sipito sonomboroto dokudira yihaheso, morwa mezuva olyo yimo ngani mu gusa namuvenye mosirongo saEgipite. Ngomu diworoke kumwe noruvharo rweni ezuva eli, ano ezi kuna kara veta zokukarerera. 18 Mezuva 14 mokwedi kokuhova kongurova, ngomu lye mboroto zokudira yihaheso dogoro mezuva 21 lyokwedi oko kongurova. 19 Momambo geni kapisi ngamu kare yininke yokuhaha eyi va duva mazuva ntambali, morwa nkenye ogu nga lya yokuhaha yi kare asi munayirongo ndi yimo va mu hampurukira mosirongo, muntu ogo va hepa kumugusa mo* mombunga zoVaisraeli. 20 Kapisi ngomu lye nkenye eyi yokuhaha. Mwa hepa kulya mboroto zokudira yihaheso momambo geni.’”

21 Mosesa ta zigida masimbi nagenye goVaisraeli, ta ga tantere asi: “Zendeni mu ka gusire mapata geni yimunagona,* ngomu yi dipage poPaska. 22 Makura ngomu tupike yitji yohisopo mohonde ezi ngazi kara porupasa nokuzikwita keguru nomonompatji devero ntani kapisi ngomu pwage momambo geni dogoro ngurangura. 23 Apa nga pita Jehova mosirongo a tengeke Vaegipite makura a mone honde keguru ntani monompatji domavero geni, Jehova nga pitakana evero olyo. Age kapi nga dipaga nkenye ogu nga kara momambo geni.

24 “None noruvharo rweni ngomu diworoke sihorokwa esi narunye. 25 Apa ngomu za mosirongo esi ga mu tumbwidira Jehova, mwa hepa kutwikira kudiworoka sihorokwa esi. 26 Ntani apa ngava mu pura vana veni asi: ‘Morwasinke omu diworokere sipito esi?’ 27 Ngomu va tantere asi: ‘Azo kuna kara nzambo ezi twa geve kwaJehova poPaska, ogu ga pitakanene mambo goVaisraeli moEgipite. Age kwa tengekere Vaegipite, nye mambo getu kwa ga sigire.’”

Makura vantu* tava linyongamene. 28 Vaisraeli makura tava zi, tava ka rugana eyi ga tanterere Jehova oMosesa naArona. Awo kwa rugene moomu ga yi va tanterere.

29 Makura pokatji komasiku, Jehova ta dipaga nombeli nadinye domosirongo saEgipite, kutundilira kombeli zaFarawo, ogu ga hingilire posipundi souhompa dogoro kombeli zomuntu ogu ga kere modorongo ntani nonombeli nadinye doyikorama. 30 Farawo ta pinduka masiku kumwe novakareli vendi navenye noVaegipite navenye ntani Vaegipite kwa lilire unene, morwa mwankenye embo kwa fire mo muntu. 31 Makura ta zigida Mosesa naArona masiku googo, ta va tantere asi: “Tundeni mo mokatji kovantu vange none noVaisraeli. Zendeni mu ka karere Jehova ngwendi moomu mwa tanta. 32 Simbeni yimuna yeni mu ze ngwendi moomu mwa tanta, nye mwa hepa kutungika nge name.”

33 Vaegipite tava tantere Vaisraeli va tunde mo usimbu mosirongo, morwa awo kwa tente asi: “Nsene kapi nomu za, natuvenye tatu fu.” 34 Makura vantu tava simbi yiduva yawo yokudira kuhaha pomarupasa gawo gokuduvira aga va dingilire pomakehe, tava ga likambeke pomapepe gawo. 35 Vaisraeli kwa rugene eyi ga va tanterere Mosesa. Awo kwa hundilire Vaegipite yipako yosisiliveli neyi yongorodo ntani noyikoverero. 36 Jehova kwa ninkire Vaegipite va hafere Vaisraeli, makura tava va pe eyi vava hundilire. Yimo ngoso vava hakanene Vaegipite emona lyawo.

37 Makura Vaisraeli tava tundu moRamusesi va ze koSukoto. Awo kwa gendere porupadi ntani sivaro sawo kwa hulire koyiha vagara 600 000, kugusa ko vanona. 38 Mbunga zovanayirongo* kwa zire kumwe noVaisraeli ntani noyimuna yoyinzi. 39 Awo tava kanga yiduva eyi va pitwire moEgipite. Yiduva oyo kwa yi kenge nomuhwi domboroto dokuliudinga dokudira yihaheso. Ayo kapi ya hehe, morwa awo kwa va tjidire mo usimbu Vaegipite, makura kapi va vhulire kusimba nondya dokulya monzira.

40 Vaisraeli kwa tungire moEgipite nomvhura dokusika 430. 41 Apa da pwire nomvhura 430, mezuva olyo vantu* vaJehova navenye tava tundu mo mosirongo saEgipite. 42 Awo ngava dana sipito masiku mokuhamberera Jehova kweyi gava gusa mosirongo saEgipite. Masiku ogo, Vaisraeli noruvharo rwawo rokomeho ngava dana sipito mokufumadeka Jehova.

43 Makura Jehova ta tantere Mosesa naArona asi: “Ezi yizo veta zokuhamena Paska: Kwato munayirongo gokuvhura kulya ko. 44 Nye nsene muntu ga kara nomupika gomugara ogu ga randa noyimaliwa, ga hepa kumurugana yovamba ntani nye na lya ko mupika ogo. 45 Munayirongo ogu ga tunga mokatji keni ntani nomurugani gomunayirongo nawo nokulya ko si konyama zoPaska. 46 Nyama ozo va hepa kuzilira membo, kwato kuzipwagesa ponze zembo ntani kwato kuteza yisupa yazo. 47 Mbunga nazinye zaIsraeli za hepa kudana Paska. 48 Nsene munayirongo ogu ga tunga none ana hara kudana none sipito saJehova soPaska, vagara navenye vemembo lyendi va hepa kuvarugana yovamba. Makura age kuvhura a dane Paska ntani age nga kara ngwendi kwa mu hampurukira mosirongo. Nye kwato mugara ogu va dira kurugana yovamba nga lya koPaska. 49 Veta ezi va hepa kuzilimburukwa ava va hampurukira mosirongo ntani novanayirongo ava va tunga mokatji keni.”

50 Makura Vaisraeli navenye tava rugana eyi ga tanterere Jehova oMosesa naArona. Awo kwa rugene moomu va va tanterere. 51 Mezuva olyo, Jehova ta gusa mo Vaisraeli navenye mosirongo saEgipite.

13 Jehova ta tantere hena Mosesa asi: 2 “Nombeli nadinye donongara doVaisraeli di litulira nge.* Nkenye muna gombeli gomugara goMuisraeli nonombeli doyikorama kwa hamena kwange.”

3 Makura Mosesa ta tantere vantu asi: “Diworokeni ezuva eli mwa tundire moEgipite omu mwa kere vapika. Jehova kwa ruganesere nonkondo dendi dononene a mu guse mosirongo oso. Yipo nye, kwato kulya nkenye eyi yokuhaha. 4 One kwa tundire mo moEgipite mezuva eli, mokwedi kwaAbibu.* 5 Apa nga mu twara Jehova mosirongo soVakanani noVaheti noVaamoli noVahevhi ntani noVajebusi, esi ga tumbwidilire ozinyakurweni, omu mwa zura masini nousi, mwa hepa kulimburukwa veta ezi mokwedi oku. 6 Mwa hepa kulya mboroto zokudira yihaheso mazuva ntambali. Ano mezuva lyauntambali mwa hepa kudanena Jehova sipito. 7 Mwa hepa kulya mboroto zokudira yihaheso mazuva ntambali ntani mosirongo seni mwa ha kara yininke yokuhaha ndi yininke yokuduva yokuhaha. 8 Mwa hepa kutantera vana veni mezuva olyo asi one kuna kuyirugana eyi, morwa yeeyi ga mu ruganena Jehova apa mwa tundire moEgipite. 9 Sipito esi ngasi mu diworokesa sihorokwa oso ngwendi sesi asi kwa si tjanga pomawoko geni nopoyipara yeni.* Aso ngasi mu diworokesa mu uyunge kuhamena veta zaJehova ntani ngasi mu diworokesa asi Jehova kwa ruganesa nonkondo dendi dononene yipo a mu zowore mosirongo saEgipite. 10 Mwa hepa kulimburukwa veta ezi apa ngasi sika mo siruwo nkenye mvhura.

11 “Apa nga mu twara Jehova mosirongo soVakanani esi ga mu tumbwidira kumwe nozinyakurweni, 12 mwa hepa kugava kwaJehova nombeli nadinye donongara ntani nankenye mbeli zosimuna esi ngomu gwana. Nombeli nadinye donongara kwa hamena kwaJehova. 13 Nombeli doyindongi mwa hepa kudiranda nonzwi, ano nsene kapi muna kudiranda, mwa hepa kuteza nonsingo dado. Nombeli deni nadinye donongara, nado mwa hepa kudiranda.

14 “Nsene ngava mu pura vana veni asi: ‘Yisinke yina kutanta eyi?’ Ngomu va tantere asi: ‘Jehova kwa ruganesere nonkondo dendi dononene a tu guse moEgipite omu twa kere vapika. 15 Apa ga nyokere Farawo kutusiga tu ze, Jehova kwa dipagere nombeli nadinye domoEgipite kutundilira kombeli zomuntu dogoro zosikorama. Eyi yiyo tuna kuzambera kwaJehova nombeli nadinye donongara ntani nokuranda nombeli detu donongara.’ 16 Sipito esi ngasi mu diworokesa sihorokwa oso ngwendi sesi asi kwa si tjanga pomawoko geni nopoyipara yeni,* morwa Jehova kwa ruganesa nonkondo dendi dononene a tu guse mo moEgipite.”

17 Apa ga sigire Farawo vantu va ze, Karunga kapi ga va ninkire va pite nzira zopepi zosirongo soVafilisiti. Yeeyi Karunga kwa tente asi: “Vantu kuvhura va tjindje magano gawo nokuhara kutengura koEgipite apa nava ligwanekera noyita.” 18 Yipo nye, Karunga kwa ninkire vantu va pite monzira zomburundu ezi za kara pepi nEfuta lyEgeha. Nampili ngoso, Vaisraeli kwa gendere nawa ngwendi nombunga dovakwayita. 19 Mosesa kwa pitwire yisupa yaJosefa, morwa Josefa kwa ninkire vana vaIsraeli va gane asi: “Apa nga mu vatera Karunga noku mu gusa mo mosirongo esi, ngomu pitura yisupa yange.” 20 Makura tava tundu mo moSukoto, tava ka dika notende dawo moEtamu konontere domburundu.

21 Jehova kwa pitire komeho zawo mutenya mongundi zeremo ezi za va pitisilire monzira zawo. Ano masiku, age kwa va pitisilire nongundi zomundiro ezi za va pere uzera, yipo va vhure kugenda mutenya nomasiku. 22 Ngundi zeremo kapi ngazi tundu ko komeho zovantu mutenya ntani ngundi zomundiro kapi ngazi tundu komeho zawo masiku.

14 Jehova makura ta tantere Mosesa asi: 2 “Tantera Vaisraeli va tengure, va dike notende dawo pepi naPihahiroti, pevango eli lya kara pokatji kaMigidoli nefuta, komeho zaBara-sefoni. Notende dawo da hepa kupirukira koBara-sefoni pepi nefuta. 3 Makura Farawo nga uyunga kuhamena Vaisraeli asi: ‘Awo vana zumbana, kapi vana kuvhura kutunda mo momburundu.’ 4 Ame ngani kukutika mutjima gwaFarawo yipo ngava kwame. Ame ngani likida vantu asi ame nonkondo unene apa ngani funda Farawo novakwayita vendi navenye ntani Vaegipite ngava diva asi ame nyame Jehova.” Makura Vaisraeli tava rugana eyi va va tanterere.

5 Konyima, hompa gwaEgipite tava mu tantere asi Vaisraeli vana duka. Makura Farawo novakareli vendi tava rundurura magano gawo, tava tanta asi: “Morwasinke tuna mangwilire Vaisraeli moupika tu va sige va ze?” 6 Makura age ta wapaike matemba gendi goyita, ta pitura vakwayita vendi. 7 Age kwa gusire matemba 600 gomawa po ntani nomatemba gamwe gomoEgipite. Momatemba nagenye ogo kwa rondere mo vakwayita. 8 Jehova kwa kukutikire mutjima gwaFarawo hompa gwaEgipite. Makura age ta sikura Vaisraeli, nye Vaisraeli kapi va kere nowoma apa va tundire mosirongo. 9 Vaegipite kwa sikwire Vaisraeli kumwe nomatemba nononkambe daFarawo ntani novakwayita vendi navenye. Awo kwa kere pepi nokugwana Vaisraeli ava va dikire notende dawo koyiha yefuta, pepi naPihahiroti nokupirukira koBara-sefoni.

10 Apa ga kere Farawo pepi nawo, Vaisraeli tava kankuka, tava mono Vaegipite kuna kuvakwama. Makura awo tava tukuka nokutameka kulikwambera kwaJehova. 11 Awo tava tantere Mosesa asi: “Ove kuna tu reta tu ya fire momburundu morwa mayendo ga dira moEgipite ndi? Yisinke ono tu ruganene yininke yokufana ngesi? Yisinke ono tu gusire mo moEgipite? 12 Nani kapi twa ku tanterere moEgipite asi: ‘Tu siga, tu ruganene Vaegipite?’ Hansa tu ruganene Vaegipite mevango lyokufira momburundu.” 13 Makura Mosesa ta tantere Vaisraeli asi: “Mwa ha tjira. Sikameni nokulikorerera mu tare omu na mu zowora Jehova naina. Yeeyi Vaegipite ava muna kumona naina kapi ngomu va mona hena. 14 Jehova mwene na mu rwira po, nye one tomu mwena mu ndindire.”

15 Jehova makura ta tantere Mosesa asi: “Morwasinke vana kulikwamberera nge Vaisraeli? Va tantera va katuke va ze. 16 Nye ove ko, gusa mpango zoge ozi like kefuta li ligaunuke, yipo Vaisraeli va pite pokatji kefuta pevhu lyekukutu. 17 Nye ame tani kukutike nomutjima doVaegipite va mu sikure, yipo ngani likide vantu asi ame nonkondo unene apa ngani funda Farawo novakwayita vendi navenye ntani nomatemba gendi goyita. 18 Apa ngani funda Farawo nomatemba gendi goyita ntani novakwayita vendi, Vaegipite ngava diva asi ame nyame Jehova.”

19 Makura muengeli gwaKarunga gousili ogu ga pitisilire Vaisraeli ta zi konyima zawo. Ano ngundi zeremo ezi za kere komeho zawo, nazo tazi ka sikama konyima zawo. 20 Azo kwa sikeme pokatji koVaegipite noVaisraeli. Ngundi ozo zeremo kwa geve mundema koruha roVaegipite, nye azo kwa minikilire koruha roVaisraeli. Yipo nye, Vaegipite kapi va vhulire kuza koruha roVaisraeli masiku mudima.

21 Mosesa ta like ewoko lyendi kefuta, makura Jehova ta ninki mpepo zokoUpumezuva zi pepe masiku mudima nokuninkisa efuta li ligaunuke dogoro evhu lyokonhi zefuta ta li kukuta. 22 Vaisraeli makura tava gendi pokatji kefuta pevhu lyekukutu. Ano mema gemefuta kwa sikeme ngwendi ekuma korulyo rwawo ntani korumoho rwawo. 23 Makura Vaegipite kumwe nononkambe daFarawo nomatemba gendi goyita ntani novakwayita vendi tava sikura Vaisraeli mefuta. 24 Ngurangura zonene,* Jehova ta tara Vaegipite kupitira mongundi zomundiro neremo, makura ta piyaganeke Vaegipite. 25 Age kwa gusire ko makoso komatemba gawo, makura Vaegipite tayi va digopere kugaruganesa. Makura tava tanta asi: “Tu dukeni Vaisraeli, morwa Jehova kuna kuvarwira po mokuturwanesa.”

26 Makura Jehova ta tantere Mosesa asi: “Gonwena kuwoko koge kefuta yipo mema ga tengure, ga kudumike Vaegipite nomatemba gawo goyita novakwayita vawo.” 27 Mosesa makura ta gonwene ewoko lyendi kefuta, ano apa lya sire, efuta ta li tengura li kare moomu lya kere nare. Apa va dukire Vaegipite, Jehova ta va zugumine pokatji kefuta. 28 Mema aga ga tengwire kwa kudumikire matemba goyita novakwayita navenye vaFarawo ava va kweme Vaisraeli mefuta. Kwato nampili gumwe ogu ga parukire mokatji kawo.

29 Nye Vaisraeli kwa gendere pokatji kefuta pevhu lyekukutu. Ano mema gemefuta kwa sikeme ngwendi ekuma korulyo ntani korumoho rwawo. 30 Yipo nye, Jehova kwa poperere Vaisraeli koVaegipite ntani awo kwa mwene Vaegipite konontere defuta, awo vana fu. 31 Vaisraeli kwa mwene nonkondo* daJehova dononene apa ga fundire Vaegipite. Vantu makura tava tameke kutjira Jehova nokupura mwaJehova ntani momukareli gwendi Mosesa.

15 Makura Mosesa noVaisraeli tava dimbire Jehova rusumo oru asi:

“Tani dimbire Jehova, yeeyi age ana fundu.

Age ana zugumine nkambe nomurondi gwazo mefuta.

 2 Jehova* yige nonkondo dange, yeeyi yige ana kuzowora nge.

Age Karunga gwange ntani Karunga gozinyakurwetu. Ame ngani mu hamberera nokumufumadeka.

 3 Jehova mukwayita gononkondo ntani Jehova yilyo edina lyendi.

 5 Mankupi kwa va kudumikire nokuvadivida konhi ngwendi emanya.

 9 Nonkore detu kwa tente asi: ‘Ose tatu va sikura dogoro tu ka va gwane!

Ose ngatu gavera emona lyawo nokugusa eyi tuna hara!

Ose ngatu va zonagura po nonomfuro detu!’

12 Ove kwa gonwene ewoko lyoge lyokorulyo, makura evhu tali va mini.

Vantu navenye ava va tunga moKanani ngava dompa mutjima.

16 Awo ngava tukuka nokukankama.

18 Jehova nga pangera ngahompa narunye nanarunye.

20 Makura Miliyama mpanzaArona ogu ga kere muporofete, ta gusa kangomagona, makura vakadi navenye tava mu kwama notungomagona twawo oku tava dana. 21 Miliyama ta tambura vagara pokudimba asi:

“Dimbireni Jehova, yeeyi age ana fundu.

Age ana zugumine nkambe nomurondi gwazo mefuta.”

22 Konyima, Mosesa ta pitisire Vaisraeli va tunde kEfuta lyEgeha va ze momburundu zaSuru. Awo kwa gendere mazuva gatatu momburundu, nye kapi va gwene mema. 23 Apa va ya sikire poMara,* kapi va vhulire kunwa mema gamo morwa ago kwa kere ururu. Eyi yiyo ga rukilire evango olyo asi Mara. 24 Makura Vaisraeli tava tameke kusivanena Mosesa asi: “Yisinke natu nwa?” 25 Mosesa makura ta likwambere kwaJehova, makura Jehova ta mu likida sitji. Apa ga si zugumine momema, mema taga tovara.

Makura Karunga tava tulire po veta nokuvalikida eyi nava rugana yipo a tare nsene nava mu limburukwa. 26 Karunga ta tanta asi: “Nsene nomu purakena kezwi lyaKarunga gweni Jehova nokurugana eyi ya hungama kosipara sendi ntani nokulimburukwa nompangera dendi nadinye, ame kapi ngani mu retera mahamba aga na reterere Vaegipite, yeeyi ame nyame Jehova ogu ana kumuverura.”

27 Konyima, awo tava ya siki moElimi omu mwa kere marunone gomema 12 ntani noyitji yonongone 70. Makura tava dike notende dawo pepi nomema.

16 Apa za tundire mbunga zoVaisraeli moElimi, tazi ya siki momburundu zaSini ezi za kara pokatji kaElimi naSinayi mezuva 15 mokwedi kwauvali kutunda apa za tundire moEgipite.

2 Makura mbunga zoVaisraeli tazi tameke kusivanena Mosesa naArona momburundu. 3 Vaisraeli kwa twikilire kutantera Mosesa naArona asi: “One ngoso kwa tu reta momburundu yipo vantu navenye va ya fe konzara ndi? Hansa ngano Jehova ga tu dipagere apa twa kere mosirongo saEgipite. Mosirongo oso, yikayiga yetu kwa zulire nyama ntani ose ngatu li mboroto dogoro tatu kuta.”

4 Jehova makura ta tantere Mosesa asi: “Ame tani va tumine mboroto zokutunda keguru ngwendi mvhura ntani nkenye ogu ga hepa kupongaika eyi ana hepa nkenye ezuva, yipo ni va heteke nokutara nsene ngava kwama veta zange. 5 Nye mezuva lyauntazimwe, va hepa kupongaika nondya domazuva gavali nokudiwapaika komeho zosiruwo.”

6 Makura Mosesa naArona tava tantere Vaisraeli navenye asi: “Masiku one nomu diva asi Jehova yige ga mu gusa mo mosirongo saEgipite. 7 Ngurangura one ngomu mona uyerere waJehova, morwa Jehova ana zuvhu eyi muna kumusivanena. Ose nayimwe si, mwa ha tu sivanena.” 8 Mosesa ta tanta hena asi: “Apa na mu pa Jehova nyama masiku nomboroto ngurangura mu lye dogoro tomu kuta, one ngomu mona asi Jehova ana zuvhu eyi mwa mu sivanena. Ose nayimwe si, one kusivanena Jehova kapisi nyose.”

9 Makura Mosesa ta tantere Arona asi: “Tantera mbunga nazinye zoVaisraeli zi wize komeho zaJehova, morwa age ana zuvhu masivano gawo.” 10 Konyima zapa ga uyungisire Arona mbunga zoVaisraeli, awo tava piruka va tare komburundu makura tava mono uyerere waJehova ou wa monekere meremo.

11 Jehova ta tantere hena Mosesa asi: 12 “Ame nina zuvhu masivano goVaisraeli. Va tantera asi ngurova awo nava lya nyama, ano ngurangura awo ngava kuta mboroto ntani awo ngava diva asi ame nyame Karunga gwawo Jehova.”

13 Makura ngurova ozo, yidira* ta yi wiza, ta yi ya kara pepi nokamba ntani kongurangura eme kwa kundurukidire kamba zawo. 14 Apa lya tundire ko eme, pevhu tapa kara nombuto dokufana ngwendi yiterengenze. 15 Apa va yi mwene Vaisraeli, tava lipura asi: “Yisinke nye eyi?” Yeeyi awo kapi va yi divire asi yininke musinke oyo. Mosesa makura ta va tantere asi: “Ezi mboroto ana mu pe Jehova zi kare nondya deni. 16 Jehova kuna tanta asi: ‘Nkenye gumwe gweni ga hepa kupongaika kuliza neyi na vhura kulya. Mwa hepa kugusa eyi nayi gwaneka mosipako sonolita mbali* kuliza novantu ava va tunga monotende deni.’” 17 Vaisraeli makura tava yi rugana. Vamwe kwa pongaikire yoyinzi ano vamwe yoyisesu. 18 Apa va yi tulire mosipako sonolita mbali,* ogu ga pongaikire yoyinzi kwato eyi ya mu hupilire po, ano ogu ga pongaikire yoyisesu, age kwa kere neyi yokugwanena po. Navenye kwa pongaikire kuliza neyi va vhulire kulya.

19 Makura Mosesa ta va tantere asi: “Mwa ha hupisa ko yuma dogoro ngurangura.” 20 Nye awo kapi va purakenene kwaMosesa. Vantu vamwe apa va hupisire po yimwe dogoro ngurangura, tayi kara nomaginyo ntani kwa nukire, makura Mosesa ta va handukire. 21 Nkenye ngurangura, awo ngava pongaike kuliza neyi va vhulire kulya, nye apa ngali genye ezuva, ayo ngayi hemuka.

22 Mezuva lyauntazimwe, awo kwa pongaikire nomboroto domazuva gavali. Nkenye ogu kwa pongaikire yokugwaneka mosipako sonolita ne.* Makura masimbi nagenye taga ka yi tantera Mosesa. 23 Mosesa makura ta va limburura asi: “Yimo ngorooro ga tanta Jehova. Mungura ngali kara ezuva lyokupwizumuka,* esabata lyaJehova lyokupongoka. Kangeni nokutereka eyi muna hepa ano yokuhupa ko yi tulikeni dogoro ngurangura.” 24 Awo makura tava yi tulike dogoro ngurangura ngwendi moomu ga va tanterere Mosesa, nye ayo kapi ya nukire ndi yi kare maginyo. 25 Mosesa makura ta tanta asi: “Yi lyeni naina morwa naina esabata lyaJehova. Naina kapi nomu ka yi gwana po pevhu. 26 One ngomu yi tora mazuva ntazimwe nye mezuva lyauntambali lyEsabata, kapi ngayi kara ko.” 27 Nye vantu vamwe kwa zire mezuva lyauntambali va ka yi tore, nye awo kapi va ka gwene yuma.

28 Makura Jehova ta tantere Mosesa asi: “Siruwo sokuhura kupi ngomu nyoka kulimburukwa noveta nonompangera dange? 29 Diworokeni asi Jehova kwa mu pa Esabata yipo mu pwizumuke, eyi yiyo ana kumupera mboroto zomazuva gavali mezuva lyauntazimwe. Namuvenye mwa hepa kukara pomavango geni, kwato ogu nga tunda po pevango lyendi mezuva lyauntambali.” 30 Vaisraeli kapi va rugene yuma mezuva lyEsabata.

31 Vaisraeli makura tava ruku mboroto ozo asi “mana.”* Azo kwa kere zonzera ngwendi nontanga dononunu dononzera ntani azo ngazi tovara ngwendi mboroto va rugana nousi. 32 Makura Mosesa ta tanta asi: “Jehova kuna tanta asi: ‘Tureni mboroto mosipako sonolita mbali* nokuzitulika, yipo ruvharo oru ngaru kwama ko ngaru mone mboroto ezi na mu pere mu lye momburundu apa na mu gusire mosirongo saEgipite.’” 33 Makura Mosesa ta tantere Arona asi: “Gusa kavaza nokutura mo nolita mbali* domana nokuzipungura komeho zaJehova dogoro nokoruvharo rweni rokomeho.” 34 Arona makura ta tura kavaza mosikesa somadiworokeso yipo va ka pungure, ngwendi moomu Jehova ga tanterere Mosesa. 35 Vaisraeli kwa lire mana nomvhura 40 dogoro apa va ya sikire mosirongo esi va tunga nare vantu. Awo kwa lire mana dogoro paapa va ya sikire komururani gosirongo saKanani. 36 Yipako murongo yonolita mbali* kuza mosipako sonolita 20.*

17 Mbunga zaIsraeli tazi tundu momburundu zaSini, awo kwa gendere tunda evango zende evango kuliza nomu ga va pangerere Jehova, makura tava ya dike notende dawo moRefidimu, nye kapi va ya gwene mo mema gokunwa.

2 Makura Vaisraeli ta va tangwisa Mosesa asi: “Tu pa mema tu nwe.” Nye Mosesa ta va pura asi: “Morwasinke muna kutangwisira nge ntani morwasinke muna kuhetekera Jehova?” 3 Nye Vaisraeli kwa va kwete enota, makura tava twikire kusivanena Mosesa asi: “Ove kwa tu gusa moEgipite, yipo o ya tu dipagese kenota kumwe novana vetu noyimuna yetu ndi?” 4 Konyima, Mosesa ta likwambere kwaJehova asi: “Ngapi nani rugana vantu ava? Awo ntaantani tupu va dipage nge nomamanya!”

5 Makura Jehova ta tantere Mosesa asi: “Zende komeho zovantu ntani pitura ko masimbi gamwe goVaisraeli kumwe nompango ezi wa toonesere poMukuro gwaNili. Zi simba mokuwoko koge makura o ze. 6 Ame nani ka sikama komeho zoge kemanya lyomoHoreba. Apa no ka toona pemanya, mema naga tunda mo makura vantu va ka nwe.” Mosesa ta yi rugana ago masimbi goVaisraeli kuna kutara. 7 Makura Mosesa ta ruku evango olyo asi Masa* ntani Meliba,* morwa yeeyi va tangwinine Vaisraeli nokuheteka Jehova pokutanta asi: “Enye sili Jehova mweli mokatji ketu ndi?”

8 Makura Vaamareki tava wiza va ya rwise Vaisraeli moRefidimu. 9 Mosesa ta tantere Josuwa asi: “Horowora vagara yipo mu ze mu ka rwe noVaamareki. Mungura ame ngani ka sikama keguru lyondundu nompango zaKarunga gousili mokuwoko kwange.” 10 Josuwa ta rugana eyi ga mu tanterere Mosesa, makura Josuwa ta ka rwisa Vaamareki. Ano Mosesa naArona ntani naHuru tava zi keguru lyondundu.

11 Apa ga twikilire Mosesa kuzerura mawoko gendi, Vaisraeli tava fundu, nye tupu ga gende mawoko gendi, Vaamareki tava fundu. 12 Apa ga rorokere mawoko gaMosesa, Arona naHuru tava mu retere emanya a hingire po. Makura awo tava zerura mawoko gendi, gumwe korulyo ano gumwe korumoho rwendi. Ano Mosesa kwa zerwire mawoko gendi dogoro tali ka toka ezuva. 13 Yimo nye ngoso Josuwa ga fundire Vaamareki.

14 Jehova ta tantere Mosesa a tjange nonkango edi asi: “Ame ngani zonagura po Vaamareki navenye pevhu ntani kwato hena ogu ngava diworoka,” age kwa mu tanterere hena adi tantere Josuwa. 15 Makura Mosesa ta tungu sizambero ta si ruku asi Jehova sidiviso sange,* 16 ta tanta asi: “Yeeyi kuwoko koVaamareki kuna kurwanesa upangeli waJehova.* Ano Jehova nga va rwanesa dogoro nokoruvharo rwawo rokomeho.”

18 Jeturo tamweyi zaMosesa ogu ga kere mupristeli gomoMidiyani, kwa zuvhire nayinye eyi ga ruganenene Karunga Mosesa novantu vendi Vaisraeli ntani nomu Jehova ga gusire Vaisraeli moEgipite. 2 Jeturo tamweyi zaMosesa kwa pakerere mbili Sipora mukadaMosesa apa va mu tumine kwendi, 3 kumwe novana vendi wovagara vavali. Munendi gumwe kwa mu rukire Geresomu,* yeeyi Mosesa kwa tente asi: “Ame kwa ya tunga ngomunayirongo mosirongo sovantu.” 4 Ano gumwe kwa mu rukire Eliyesere,* morwa age kwa tente asi: “Karunga gotate kuvatera nge, age kwa popera nge korufuro rwaFarawo.”

5 Jeturo tamweyi zaMosesa novana vaMosesa wovagara ntani namukadendi, kwa wizire kwaMosesa momburundu. Mosesa kwa dikire tende zendi kondundu zaKarunga gousili. 6 Makura age ta tumine Mosesa mbudi asi: “Ame tamweyi zoge Jeturo kuna kuwiza kumwe namukadoge ntani novana woge vavali wovagara.” 7 Mosesa makura ta zi a ka gwane tamweyi zendi. Age ta mu nyongamene nokumuncumita. Konyima zokulikunda, tava hwilire motende.

8 Mosesa ta tantere tamweyi zendi nayinye eyi ga rugene Jehova kwaFarawo noVaegipite a popere Vaisraeli ntani nomaudigu nagenye aga va ligwanekerere nago monzira nomu ga va poperere Jehova. 9 Jeturo kwa haferere yininke nayinye yoyiwa eyi ga rugene Jehova apa ga poperere Vaisraeli koVaegipite.* 10 Makura Jeturo ta tanta asi: “Jehova va mu hamberere morwa age ga mu popera koVaegipite ntani kwaFarawo. Age kwa popera vantu koupangeli woVaegipite. 11 Ngesi nina yi diva asi Jehova ga pitakana yikarunga nayinye, morwa age kwa tengekere vantu ava va tekwire vantu vendi momudona.” 12 Makura Jeturo ta reta nzambo zeswakerero ntani nononzambo dimwe kwaKarunga. Ano Arona nomasimbi goVaisraeli tava wiza va ya lye kumwe natamweyi zaMosesa komeho zaKarunga gousili.

13 Ezuva eli lya kweme ko, Mosesa ta hingire ngwendi moomu nga yi rugana a pangure vantu. Vantu kwa sikeme pwaMosesa kutundilira ngurangura dogoro ngurova. 14 Tamweyi zendi apa ga mwene eyi ga ruganenene Mosesa vantu, ta tanta asi: “Yisinke ono kuyiruganena ngoso? Morwasinke ono hingilire nyovelike o sige vantu va sikame kutunda ngurangura dogoro ngurova?” 15 Mosesa ta tantere tamweyi zendi asi: “Vantu kuna kuwiza kwange morwa vana hara kudiva eyi ana hara Karunga. 16 Nsene una horoka udigu pokatji kovantu, awo kuureta kwange ni ya u pangure, makura ame kuvadivisa eyi ana tokora Karunga gousili ntani nonoveta dendi.”

17 Tamweyi zendi ta mu tantere asi: “Eyi ono kurugana kapisi yiwa. 18 Ayo ngayi kurorora kumwe novantu ava ava wiza koge, morwa sirugana esi udigu unene kapi to vhuru kusirugana nyovelike. 19 Ngesi purakena nge. Ame tani ku pe ko magano ntani Karunga na kara kumwe nove. Ove ngo uyungira po vantu kwaKarunga gousili nokutwara maudigu govantu kwaKarunga gousili. 20 Wa hepa kuvaronga nompangera nonoveta daKarunga noku va divisa omu nava paruka ntani neyi nava rugana. 21 Nye wa hepa kuhorowora vagara wokuhuguvara ava va tjira Karunga ava ava dili kupapara mfuto.* Tura vamwe va pitisire vantu eyovi, vamwe vantu efere, ano vamwe vantu nomurongo ntano ntani vamwe vantu murongo. 22 Awo va hepa kupangura vantu nsene udigu una horoka ntani awo ngava reta maudigu gomanene koge, nye maudigu gomanunu ngava ga pangura vene. Nsene o va pulisira va ku vatere, ayo ngayi rerupika yirugana yoge. 23 Nsene no yi rugana ntani nsene Karunga nage ana yi kwatesa ko, ove kapi ngo roroka ntani vantu navenye ngava tengura komambo gawo nombili.”

24 Mosesa ta purakene kwatamweyi zendi nokurugana nayinye eyi ga mu tanterere. 25 Mosesa makura ta horowora vagara wokuhuguvara moVaisraeli, ta tura vamwe va pitisire vantu eyovi, vamwe vantu efere, ano vamwe vantu nomurongo ntano ntani vamwe vantu murongo. 26 Awo ngava pangura vantu nsene maudigu gana horoka. Maudigu gomanene ngava ga twara kwaMosesa nye gomanunu ngava ga pangura vene. 27 Konyima, Mosesa ta rekere tamweyi zendi makura tava tengura kosirongo sawo.

19 Mokwedi kwautatu kutunda apa va tundire Vaisraeli mosirongo saEgipite, awo kwa ya sikire momburundu zaSinayi mezuva olyo. 2 Apa va tundire moRefidimu tava ya siki momburundu zaSinayi makura tava dike kamba zawo. Awo kwa dikire kamba zawo pepi noNdundu zaSinayi.

3 Makura Mosesa ta rondo kondundu a ka moneke kwaKarunga gousili. Jehova ta mu uyungisa kondundu asi: “Tantera ruvharo rwaJakopo ndi Vaisraeli asi: 4 ‘One mwa mwene eyi na rugene Vaegipite ntani nomu na mu reta kwange ngwendi moomu ekangakodi a li simbire vana valyo pomavava galyo. 5 Nsene ngomu limburukwa eyi ngani mu tantera nokusikisa mo egwanekero* lyange, one ngomu kara ngwendi emona lyange lyokulikarera mokatji kovantu navenye, yeeyi uzuni naunye wange. 6 One ngomu kara muhoko gokupongoka ntani novapristeli ava ngava pangera ngovahompa.’ Eyi yiyo no ka tantera Vaisraeli.”

7 Makura Mosesa ta zi, ta ka zigida masimbi goVaisraeli makura ta va tantere nayinye eyi ga mu tanterere Jehova. 8 Konyima, vantu navenye tava limburura kumwe asi: “Nayinye eyi ana uyunga Jehova ngatu yi rugana.” Makura Mosesa ta twara elimbururo lyovantu kwaJehova. 9 Jehova ta tantere Mosesa asi: “Ame ngani wiza koge kupitira meremo lyesovagani yipo vantu ngava zuvhe nge apa ngani uyunga nove ntani yipo nove ngava ku huguvare nkenye apa.” Makura Mosesa ta tantere Jehova eyi va uyungire vantu.

10 Jehova makura ta tantere Mosesa asi: “Zende kovantu o ka va tantere va lizerese* naina ntani nomungura, va liwapaikire kuyagwanekera kumwe name ntani awo va hepa kukuhwa yikoverero yawo. 11 Awo va hepa kuliwapaikira ezuva lyautatu, morwa mezuva lyautatu Jehova nga wiza koNdundu zaSinayi a ya moneke komeho zovantu navenye. 12 Wa hepa kutura ko yidiviso kondundu nokutantera vantu va dire kuza ko ndi va kwate ko. Nkenye ogu nga kwata ko ngava mu dipaga. 13 Kwato ogu nga kwata muntu ogo, nye va hepa kumudipaga nomamanya ndi kumuponya nouta wonkanza.* Yi kare asi muntu ndi sikorama, va hepa kusidipaga. Nye apa ngomu zuvha muhagaro goruvinga ronzwi mwa hepa kuza kondundu.”

14 Makura Mosesa ta humburuka kondundu a ze kovantu, ta va tantere va lizerese,* makura awo tava kuhu yikoverero yawo. 15 Age ta tantere vantu asi: “Liwapaikireni ezuva lyautatu. Mwa ha ligwanekera panyama novakadi veni.”*

16 Ngurangura mezuva lyautatu, keguru kwa kere ko sindundumo nomaruvadi ano kondundu kwa kere ko eremo lyesovagani ntani nomuhagaro goruvinga, makura vantu tava tameke kukankama mokamba. 17 Makura Mosesa ta ka simba vantu mokamba yipo va ya gwanekere naKarunga gousili, tava sikama pedi lyondundu. 18 KoNdundu zaSinayi kwa kere ko musi gomunzi, morwa Jehova kwa hegumukilire kondundu ozo momundiro. Musi ogo kwa kere gomunzi ngwendi gogu agu tundu mesuga lyenene* ntani ndundu nazinye kwa kankamene unene. 19 Apa gwa twikilire kuhagara unene muhagaro goruvinga, Mosesa ta uyunga, ano Karunga* gousili ta mu limburura.

20 Jehova makura ta hegumukire keguru lyoNdundu zaSinayi. Jehova makura ta zigida Mosesa a ze keguru lyondundu, ano Mosesa ta zi. 21 Jehova makura ta tantere Mosesa asi: “Humburuka o ka rondore vantu va dire kuhedera pepi naJehova yipo va mu tare, nsene nava yi rugana ngano vanzi nava fa. 22 Ntani tantera vapristeli ava ava wiza nkenye apa pepi naJehova va lizerese,* yipo a dire kuvadipaga Jehova.” 23 Makura Mosesa ta tantere Jehova asi: “Vantu kapi nava wiza koNdundu zaSinayi, morwa ove wa tu rondora nare asi tu ture yidiviso kondundu nokudivisa vantu asi azo za pongoka.” 24 Nye Jehova ta mu tantere asi: “Zende o ka wize kumwe naArona, nye wa ha tarerera vapristeli novantu va lisininike kuhedera pepi naJehova. Nsene nava yi rugana ame ngano nani va dipaga.” 25 Mosesa makura ta humburuka, ta ka yi tantera vantu.

20 Karunga makura ta tanta asi:

2 “Ame nyame Karunga gweni Jehova ogu ga mu gusa mosirongo saEgipite omu mwa kere vapika. 3 Mwa hepa kukarera nge nyamelike. Mwa ha karera yikarunga yapeke.

4 “Mwa ha liruganena mafano gokuhonga ndi efano lyankenye eyi, yi kare asi yemeguru ndi yepevhu ndi yomomema. 5 Mwa ha yi nyongamena ndi mu yi karere, yeeyi ame Karunga gweni Jehova kwa hara kukarera nge nyamelike. Ame ngani tengeka vana novatekuru morwa mapuko govaguhyavawo ava va nyenga nge. 6 Nye ava va hara nge nokulimburukwa koyipango yange, ame ngani twikira kulikida eharo lyanarunye koruvharo rwawo nomvhura dononzi.

7 “Mwa ha ruganesa edina lyaKarunga gweni Jehova momudona, yeeyi Jehova nga tengeka nkenye ogu nga ruganesa edina lyendi momudona.

8 “Diworokeni asi ezuva lyEsabata lya pongoka. 9 Mwa hepa kurugana yirugana yeni nayinye momazuva ntazimwe, 10 nye mwa ha rugana yuma mezuva lyauntambali, yi kare asi vana veni wovagara ndi wovakadi ndi mupika gomugara ndi gomukadi ndi yimuna yeni ndi vanayirongo ava va tunga none, yeeyi alyo kuna kara ezuva lyaJehova lyesabata. 11 Yeeyi momazuva ntazimwe, Jehova kwa sitire eguru nevhu nefuta ntani nanayinye eyi ya kara mo. Ano age kwa tamekere kupwizumuka mezuva lyauntambali. Eyi yiyo ga tungikilire Jehova ezuva lyEsabata nokulipongora.

12 “O fumadeke oguho nonyoko yipo ngo paruke siruwo sosire mosirongo esi nga mu pa Karunga gweni Jehova.

13 “Walye o dipaga.

14 “Walye o hondere.

15 “Walye o vaka.

16 “Walye o gava umbangi woyimpempa kuhamena mukweni nsene vana kuzigida o ka gave umbangi.

17 “Walye o dovaukire embo lyamukweni. Walye o dovaukire mukadamukweni ndi mupika gwendi gomugara ndi gomukadi ndi ntwedu zendi ndi sindongi sendi ndi nkenye eyi ga weka.”

18 Vantu navenye tava zuvhu sindundumo nomuhagaro goruvinga ntani awo kwa mwene maruvadi nondundu zina kututumuka musi. Apa va yi mwene, tava kankama nokusikamena koure. 19 Makura tava tantere Mosesa asi: “Ose tuna kara nowoma asi nsene Karunga yige na uyunga nose, tatu fu. Yipo nye uyunga nose, ose natu ku purakena.” 20 Mosesa ta tantere vantu asi: “Mwa ha tjira, yeeyi Karunga gousili kuna wiza a ya mu heteke yipo mu twikire kumutjira, ngomu dire kuzona.” 21 Vantu kwa sikeme ngorooro koure, nye Mosesa ta hedere pepi neremo lyesovagani oku ga kere Karunga gousili.

22 Makura Jehova ta tantere Mosesa asi: “Ka tantere Vaisraeli asi: ‘Muna yi limonene nyamweni asi nyame nina uyunga none kutundilira meguru. 23 Mwa ha liruganena yikarunga yosisiliveli ndi yongorodo, yipo mu yi karere kumwe name. 24 Tungireni nge sizambero pevhu nokugusa yimuna yeni yimwe yipo mu yi gave ngononzambo deswakerero nononzambo dombili. Nkenye evango eli ngani horowora va diworokere po edina lyange, ame ngani mu wizira ni ya mu tungike. 25 Nsene nomu tungira nge sizambero, mwa ha si tunga nomamanya aga va teta noyiruganeso. Yeeyi nsene nomu ruganesa yiruganeso oyo, aso ngasi nyata. 26 Mwa ha tura ko sirondero kosizambero sange, ngano maruha geni gonomuga nga ga moneka apa ngomu ronda ko.’*

21 “Edi yido noveta no ka va tantera:

2 “Nsene o randa mupika goMuhebeli, age nga ku ruganena ngomupika nomvhura ntazimwe, nye momvhura zauntambali, wa hepa kumumangurura ga hana kufuta yuma. 3 Nsene asi age kwa kere mudike apa ga kere mupika goge, wa hepa kumumangurura gelike. Nye nsene age ga kwara, wa hepa kumumangurura kumwe namukadendi. 4 Nsene asi hekurwendi a mu pa mukadi makura a rete vana wovagara ndi wovakadi, mukadendi novana vendi tava kara vapika vahekurwendi ntani age ngava mu mangurura gelike. 5 Nye nsene mupika a nyoka nokutanta asi: ‘Ame na hara hekurwange namukadange novana vange, kapi na hara kumangurura nge moupika,’ 6 hekurwendi ga hepa kumureta komeho zaKarunga gousili, makura ta mu twara kevero ndi konompatji devero nokumutomona kutwi kwendi nontungo, makura age nga kara mupika gwendi eparu lyendi mudima.

7 “Nsene muntu ta randesa munendi gomukadi koupika, muna ogo kapi ngava mu mangurura ngwendi moomu ava mangurura vapika wovagara. 8 Nsene hekurwendi kapi ana mu hara ntani kapi ana kumuninka a kare gumwe govakadi vendi, nye a mu randese kwagumwe, age kapi nga mu randesa kovanayirongo morwa kapi ana mu tekura nawa. 9 Nsene ta mu gusa a kware munendi gomugara, mupika ogo ga hepa kumutekura ngwendi munendi gomukadi. 10 Nsene munendi* a tokora kukwara ko mukadi gwapeke, ga hepa kumupa nondya noyidwara ntani neyi ya mu tumbukira* ngamukadendi gokuhova. 11 Nsene kapi ana kumupa yininke oyo yitatu, mukadi ogo ga hepa kuza ga hana kufuta yimaliwa.

12 “Nkenye ogu a toona mukwawo makura a fe, va hepa kumudipaga. 13 Nye nsene kuna dipaga mukwawo momponyo ntani Karunga gousili ana yi pulisire yi horoke, ame ngani mu wapaikira evango oku nga dukira. 14 Nsene muntu ana handukire unene mukwawo makura a mu dipage mowina, muntu ogo va hepa kumudipaga nampili a dukire kosizambero sange a ka papare epopero. 15 Nkenye ogu a toona oguhwe ndi ozina, va hepa kumudipaga.

16 “Nkenye ogu a vaka muntu nokumurandesa ndi va mu mu kwatere, va hepa kumudipaga.

17 “Nkenye ogu a fingi oguhwe ndi ozina, va hepa kumudipaga.

18 “Nsene mugara a litangwisa namukwawo makura gumwe a toone po mukwawo nemanya ndi nonyongo,* makura a dire kufa nye a remane nokukara mombete, eyi yiyo ngayi horoka: 19 Nsene muntu ogo kuvhura a pinduke nokugendera kompango, mugara ogu ga mu toonene kapisi va mu tengeke. Nye ga hepa kufuta mugara ogo ga remeka siruwo esi ana kudira kuza koyirugana dogoro apa nga verukilira.

20 “Nsene mugara a toona mupika gwendi gomugara ndi gomukadi nositji makura a dogoroke, mugara ogo va hepa kumutengeka. 21 Nsene a dira kufa, nye a paruke ezuva limwe ndi gavali, mugara ogo kapisi va mu tengeke morwa hekurwendi mwene ga mu randa noyimaliwa yendi.

22 “Nsene vagara va lindundanesa makura va remeke mukadi gomarutu gavali, makura a hampuruke ga hana kusika mo mazuva gendi, nye a dire kudogoroka, ogu ana mu remeke ga hepa kufuta eyi na tokora mugara gwagoogo mukadi ntani ga hepa kuyifuta kupitira movapanguli. 23 Nye nsene mukadi ndi munona a dogoroka, ogu ana mu dipaga nage va hepa kumudipaga.* 24 Nsene gumwe a twiza eho lyamukwawo ndi a kure ezego lyamukwawo ndi a teze ewoko ndi eguru lyamukwawo, nage va hepa kumurugana yokulifana. 25 Ntani nsene gumwe a hwika mukwawo nomundiro ndi a mu remeke ndi a mu toone, nage va hepa kumurugana yokulifana.

26 “Nsene mugara a toona eho lyomupika gwendi gomugara ndi gomukadi makura a li zonagure, ga hepa kumumangurura a ze mawoko-woko, morwa eho lyendi eli ana zonagura. 27 Ano nsene a kura ezego lyomupika gwendi gomugara ndi gomukadi, ga hepa kumumangurura a ze morwa ezego lyendi eli ana mu kura.

28 “Nsene ntwedu zi remeka mugara ndi mukadi makura a dogoroke, ntwedu ozo va hepa kuzidipaga nomamanya ntani nyama zazo nokuzilya si, ano mwenyazo kapisi va mu tengeke. 29 Nye nsene ntwedu ozo nkenye apa kuremeka vantu ntani mwenyazo va yi mu tantera nye age kapi a zi takamesa, makura azo zi dipage mugara ndi mukadi, ntwedu ozo va hepa kuzidipaga nomamanya ntani mwenyazo nage va hepa kumudipaga. 30 Nsene mwenyantwedu ozo vana mu pura a fute* yipo va dire kumudipaga, ga hepa kufuta eyi vana mu tomene. 31 Yi kare asi ntwedu ozo kuna dipaga mumati ndi mukadona, mwenyantwedu va hepa kumurugana kuliza noveta ezi. 32 Nsene ntwedu zi dipaga mupika gomugara ndi gomukadi, mwenyantwedu ga hepa kufuta yisiliveli* 30 kwa hekurwendi ntani ntwedu ozo va hepa kuzidipaga nomamanya.

33 “Nsene mugara a kudumuna kekero ndi a sima ekero makura a dire kukudumika ko ano ntwedu ndi sindongi si gwire mo, 34 ogo ga sima ekero olyo va hepa kumufutisa. Age ga hepa kufuta mwenyasimuna oso ntani simuna oso sokufa, tasi kara sendi. 35 Nsene ntwedu zagumwe zi remeka ntwedu zamukwawo nokuzidipaga, va hepa kurandesa ntwedu ezi zina dipaga nkwawo nokuligawinina yimaliwa ntani nonyama zontwedu ezi zina fu. 36 Nye nsene ntwedu ozo kwa zi diva asi azo nkenye apa kuremeka nonkwawo ntani mwenyazo kapi a zi takamesa, age ga hepa kufuta mukwawo ntwedu zapeke, ano ezi vana dipaga tazi kara zendi.

22 “Nsene muntu a vaka ntwedu ndi nzwi makura a zi dipage ndi a zi randese, ga hepa kufuta nontwedu ntano montwedu zimwe ezi ga vaka ntani ga hepa kufuta nonzwi ne monzwi zimwe ezi ga vaka.

2 (“Nsene muwidi vana mu gwana age kuna kuvaka makura va mu toone a fe, muntu ogu ana mu dipaga kwato nzo. 3 Nye nsene yi horoka alyo ezuva lina si, ogu ana mu dipaga ta kara nounzoni.)

“Ogu ana vaka ga hepa kufuta. Ano nsene kwato yokufuta, va hepa kumurandesa yipo a fute yininke eyi ga vaka. 4 Nsene kuna mu kwatere ntwedu ndi sindongi ndi nzwi azo simpe nzuni, ga hepa kufuta yimuna yivali mosimuna simwe.

5 “Nsene muntu ta pwagesa yimuna yendi makura yi ka lye mepya lyamukwawo ndi mosikunino samukwawo soyindjembere, ga hepa kufuta mukwawo yininke yoyiwa po eyi nga zangura mepya lyendi ndi mosikunino sendi soyindjembere.

6 “Nsene muntu a hwameka mundiro makura gu ka kwate koyihwa yomega ndi kombuto ezi vana teza ndi kombuto ezi vana dili kuteza ndi mepya omu muna kara mbuto, age ga hepa kufuta eyi guna hwike mundiro.

7 “Nsene muntu a gava kwamukwawo yimaliwa ndi yipako a yi mu tulikire makura va yi vake membo lyendi, nsene vana mu gwana ogu ana yi vaka ga hepa kuyifuta ruvali. 8 Nsene kapi vana mu gwana muwidi, mwenyembo va hepa kumutwara komeho zovapanguli yipo Karunga gousili a ka yi horore nsene asi yige ga vaka yininke yamukwawo. 9 Nsene gumwe a rundira mukwawo asi ga vaka ntwedu zendi ndi sindongi sendi ndi nzwi zendi ndi sikoverero sendi ndi nkenye esi sa zumbana, va hepa kuza kwaKarunga yipo a ka horore mwenyasininke. Karunga nga divisa asi yilye ana kara mepuko ntani muntu ogo ga hepa kufuta mukwawo ruvali.

10 “Nsene muntu a gava kwamukwawo sindongi ndi ntwedu ndi nzwi ndi nkenye simuna yipo a si mu takamesere, makura si fe ndi si remane ndi va si vake ga hana kusimona muntu, 11 muntu ogo ga hepa kugana kwaJehova asi kapisi yige ga gusa simuna samukwawo ntani mwenyasimuna ga hepa kuyitambura. Ano mukwawo kapi ga hepa kufuta. 12 Nye nsene simuna kuna si mu vaka, ga hepa kufuta mwenyasimuna oso. 13 Nsene simuna oso kwa si dipaga sikasama, ga hepa kusireta ngoumbangi. Age kapi ta futu nsene simuna oso kwa si dipaga sikasama.

14 “Nye nsene gumwe a hundira mukwawo simuna makura si fe ndi si remane, age mwenyasimuna oso pwato, muntu ogo ga hepa kufuta. 15 Nye nsene mwenyasimuna oso pweli, age kapi ga hepa kufuta. Ano nsene kwa si heheda, yimaliwa eyi va si hehedesa yiyo yelike nga futa.

16 “Nsene mugara a heha mukadona* ogu va dira kuvandekera makura a ligwanekere nage panyama, mugara ogo ga hepa kufuta yigondwa yipo a kare mukadendi. 17 Nsene oguhwe va nyoka kumugava kwendi, simpe ga hepa kufuta yigondwa ngwendi eyi ava futire mukadona ogu ga dira kuligwanekera rumwe panyama nomugara.

18 “Mwa ha sigilira mpure gomukadi a paruke.

19 “Nkenye ogu ana kuligwanekera panyama nosikorama, va hepa kumudipaga.

20 “Nkenye ogu a zambere nonzambo koyikarunga yapeke ga hana kudizambera Jehova gelike, va hepa kumudipaga.

21 “Mwa ha tekura vanayirongo momudona ndi mu va hepeke, yeeyi none kwa kere vanayirongo mosirongo saEgipite.

22 “Mwa ha tekura momudona vafisavayavawo ndi nonsigwe. 23 Nsene mu va tekura momudona, va likwambere kwange, ame ngani va zuvha, 24 nokuhanduka unene ntani ame ngani mu dipaga norufuro ntani vakadi veni ngava kara vafisavayavawo, ano vana veni ngava kara nonsigwe.

25 “Nsene to korotesa gumwe govantu vange woruhepo, wa ha mu pura nsonso.

26 “Nsene to gusa erwakani lyamukweni nokulipungura dogoro nga fute makongo gendi, wa hepa kulimutengwidira komeho li ka toke ezuva. 27 Yeeyi yilyo lyelike ga kara nalyo. Yisinke nye na likudumika apa na rara? Apa nga likwambera kwange, ame ngani mu purakena, yeeyi ame kwa kara nonkenda zonene.

28 “Wa ha finga Karunga ndi esimbi* lyovantu veni.

29 “Mwa ha likatakata kuzambera nge nonzambo doyininke eyi mwa zangura novhinyu zeni zonzi ntani nomagadi geni. Nombeli deni donongara mwa hepa kudigava kwange. 30 Mwa hepa kurugana yokulifana nsene tomu pe nge mbeli zontwedu ndi zonzwi. Azo za hepa kukara nazinyazo mazuva ntambali, ano mezuva lyauntantatu mwa hepa kuzipa nge.

31 “Mwa hepa kulikida nge asi one mwa pongoka ntani nsene mu gwana mowiza nyama zosikorama esi sina dipaga sikasama, mwa ha zi lya nye mwa hepa kuzizugumina nombwa.

23 “Walye omu hanesa nombudi doyimpempa. Mwa ha vatera muntu gomudona pokukara mbangi zendi yipo a korese mukwawo. 2 Walye omu rugana yininke yoyidona morwa yeeyi vana kuyirugana vantu wovanzi. Nsene tomu gava umbangi, mwa ha uyunga yimpempa yipo mu hafese mbunga. Nsene mu yi rugana kapi ngava pangura pauhunga. 3 Nsene tomu pangura muhepwe, mwa ha hama kwendi morwa yeeyi ga kara muhepwe.

4 “Nsene o gwana ntwedu ndi sindongi sonkore zoge esi sina zumbana, wa hepa kusimutengwidira. 5 Nsene ono mono sindongi somuntu ogu ga kunyenga sina bwakama nonomurongero daso, wa ha si pitakana. Wa hepa kumuvatera yipo a guse po nomurongero.

6 “Nsene tomu pangura muhepwe, mwa ha mu fukira.

7 “Mwa ha kwatesa ko umbangi woyimpempa ntani mwa ha dipaga vantu wokudira unzoni novahungami, yeeyi ame kapi ngani sigilira vantu wovadona.

8 “Nsene tomu pangura, mwa ha tambura uhwi* wankenye ogu, yeeyi uhwi kuvhura kupukisa muntu ogu a pangura nawa ntani awo kuvhura kuninkisa muntu gomuhungami a tjindje etokoro lyendi.

9 “Mwa ha hepeka vanayirongo, yeeyi none mwa diva omu ava lizuvhu vanayirongo,* morwa none kwa kere vanayirongo mosirongo saEgipite.

10 “Mwa hepa kukuna nombuto mosirongo seni nokuzangura nomvhura ntazimwe. 11 Nye momvhura zauntambali kapisi ngomu kune momapya geni, mwa hepa kugasiga ngorooro. Ano eyi ngayi mena mo, ngomu yi sigire vahepwe ava va tunga mokatji keni va pupure ntani yikorama yiyo ngayi lya eyi ngava siga mo. Mwa hepa kurugana yokulifana moyikunino yeni yomandjembere neyi yomauzwe.

12 “Mwa hepa kurugana yirugana yeni mazuva ntazimwe, nye mezuva lyauntambali kwato ogu nga rugana, yipo nontwedu deni noyindongi yeni novanayirongo ntani novapika veni va pwizumuke.

13 “Mwa hepa kurugana nayinye eyi na mu tantera ntani mwa ha tumbura madina govakarunga vapeke.

14 “Ngomu danene nge yipito yitatu momvhura. 15 Mwa hepa kudana sipito sonomboroto dokudira yihaheso. One ngomu lya mboroto zokudira yihaheso mazuva ntambali ngamoomu na mu pangera posiruwo esi na tura po mokwedi kwaAbibu,* yeeyi one kwa tundire mosirongo saEgipite posiruwo oso. Kwato ogu nga wiza komeho zange mawoko-woko. 16 Mwa hepa hena kudana sipito sonomuzangu* dokuhova edi mwa zangwire momapya ntani nosipito sokupongaika nombuto* kehagero lyomvhura apa ngomu pongaika eyi mwa zangura. 17 Vagara navenye va hepa kukamoneka komeho zaHompa Jehova rutatu momvhura.

18 “Nsene tomu gava nonzambo, mwa ha zamba honde zazo kumwe noyininke eyi va tura yihaheso ntani magadi gononzambo edi ngomu gava poyipito nokugatulika si dogoro ngurangura.

19 “Muzangu gweni gokuhova gomuwa po ogu mwa zangura momapya geni, mwa hepa kugureta konzugo zaKarunga gweni Jehova.

“Nokutereka si nyama zosikombogona momasini gazinyaso.

20 “Ame tani tumu muengeli komeho zeni, yipo a mu takamese monzira nokumureta kevango eli na mu wapaikira. 21 Purakeneni kwendi nokulimburukwa kezwi lyendi. Mwa ha mu rwanesa, ngano kapi nga mu gusira po nonzo deni, yeeyi age kwa karera po edina lyange. 22 Nye nsene mu limburukwa kezwi lyendi nokurugana nayinye eyi nina kumutantera, nonkore deni nga di kara nonkore dange ntani ame ngani rwanesa nkenye ogu nga mu rwanesa. 23 Yeeyi muengeli gwange nga pita komeho zeni a mu tware koVaamoli, koVaheti, koVaperesi, koVakanani, koVahevhi ntani koVajebusi ano ame ngani va zonagura po. 24 Mwa ha nyongamena yikarunga yawo ndi va mu ninkise mu yi karere ntani mwa ha honena eyi ava rugana. Nye mwa hepa kuzonagura yikarunga yawo nomamanya gawo gokupongoka. 25 Mwa hepa kukarera Karunga gweni Jehova ntani age nga mu tungika nomema ntani nomboroto. Ame ngani gusa mo mauvera mokatji keni. 26 Vakadi womosirongo seni, mazimo gawo kapi nga ga tunda po ndi va kare nonganze ntani ame ngani mu ninka mu paruke siruwo sosire.

27 “Ame ngani ninka vantu va tjire nge komeho mu ka sike, ntani ame ngani piyaganeka vantu ava ngomu ligwanekera nawo nokuninkisa nonkore deni di duke apa ngomu di funda. 28 Komeho mu ka sike, ame ngani ninka nonkore deni di kare noutjirwe wounene ntani ame ngani tjida mo Vahevhi noVakanani ntani noVaheti komeho zeni. 29 Ame kapi ngani va tjida mo momvhura zimwe tupu, morwa ngano sirongo ngasi kara muporongwa makura yikasama ngayi ligwederere. 30 Ame ngani va tjida mo kanunu-kanunu dogoro ngomu ligwederere nokugusa sirongo.

31 “Ame ngani ninka mururani gweni gu tundilire kEfuta lyEgeha dogoro kefuta lyoVafilisiti ntani kutundilira momburundu dogoro koMukuro.* Ame ngani gava vantu ava va tunga mosirongo esi momawoko geni makura one ngomu va tjida mo. 32 Mwa ha tura po egwanekero* kumwe nawo ndi noyikarunga yawo. 33 Va ha tunga mosirongo seni yipo ngava dire kumuninkisa mu zone kwange. Nsene ngomu karera yikarunga yawo one ngomu ligwanekera nomaudigu.”

24 Makura Jehova ta tantere Mosesa asi: “Ronda kondundu naArona naNadabu naAbihu ntani nomasimbi 70 goVaisraeli ntani mwa hepa ku ka nyongamena nge koure nokukarera nge. 2 Nyovelike no hedera Jehova, nye vagara owo va ha hedera ko. Ano vantu wokuhupa ko va ha ronda kondundu.”

3 Makura Mosesa ta wiza, ta tantere vantu nayinye eyi ga mu tanterere Jehova nonoveta nadinye, makura vantu navenye tava limburura kumwe asi: “Nayinye eyi ana uyunga Jehova ngatu yi rugana.” 4 Makura Mosesa ta tjanga nayinye eyi ga mu tanterere Jehova. Apa ga pindukire ngurangura zonene, ta tungu sizambero pedi lyondundu nonongundi 12 kuliza nomazimo 12 goVaisraeli. 5 Konyima, Mosesa ta tumu vagara woVaisraeli, makura awo tava ka zamba nonzambo deswakerero ntani tava ka zamba nontwedu ngononzambo dombili kwaJehova. 6 Mosesa ta gusa harufa zohonde, ta zi tjire pomarupasa, ano ezi zokuhupa ko ta zi nagere kosizambero. 7 Makura ta gusa buke, ta resere vantu kuziguruka veta ezi va tjanga mo. Ano awo tava limburura asi: “Nayinye eyi ana uyunga Jehova, ngatu yi rugana ntani ngatu limburukwa.” 8 Makura Mosesa ta gusa honde noku zi nagera vantu, ta tanta asi: “Ezi honde zegwanekero eli ga tura po Jehova kumwe none kuliza nonoveta edi muna zuvhu.”

9 Mosesa ta rondo kondundu kumwe naArona naNadabu naAbihu ntani nomasimbi 70 goVaisraeli, 10 makura tava mono Karunga goVaisraeli. Konhi zonompadi dendi kwa kere ko yuma yokufana ngwendi emanya lyosafire, alyo kwa paimine ngwendi eguru. 11 Karunga kapi ga tengekere vagara owo woVaisraeli. Awo kwa mwene emoneko lyaKarunga gousili apa va lire nokunwa.

12 Makura Jehova ta tantere Mosesa asi: “Ronda kondundu o wize kwange yipo o ya kare kooku. Ame ngani kupa mamanya ntani ngani tjanga po noveta nonompango edi nava kwama vantu.” 13 Mosesa ta katuka kumwe nomukareli gwendi Josuwa va ronde kondundu. Makura Mosesa ta twikire kuronda kondundu zaKarunga gousili. 14 Nye age ta tantere masimbi asi: “One ndindireni paapa dogoro apa natu ka tengura. Arona naHuru tava kara none. Nkenye ogu ana kara noudigu a ze kwawo.” 15 Makura Mosesa ta rondo kondundu alyo eremo lina kudumike ndundu.

16 Uyerere waJehova kwa kere koNdundu zaSinayi, ano eremo kwa kudumikire ndundu ozo mazuva ntazimwe. Mezuva lyauntambali Karunga yipo ga zigidire Mosesa kutundilira meremo. 17 Uyerere waJehova kwa monekere koVaisraeli ngwendi mundiro gomunene ogu guna kutwera keguru lyondundu. 18 Mosesa makura ta zi meremo, ta rondo kondundu, makura ta ka kara kooko mazuva 40 nomasiku 40.

25 Makura Jehova ta tantere Mosesa asi: 2 “Tantera Vaisraeli va pongaike yigava nokuyipa nge; mwa hepa kutambura yigava kwankenye ogu ana hara kugava kutundilira komutjima. 3 Eyi yiyo yigava nomu tambura kovantu: ngorodo, sisiliveli, ngoporo, 4 nongodi dosineguru, wanda wopurupuli, ekehe lyegeha, ekehe lyewa, nohuki doyikombo, 5 yipapa yononzwi* eyi va kwita ruvara rorugeha, yipapa yoyikorama,* yitji yomusu, 6 magadi gomonoramba, magadi gokugwavekesa gobalisemu ntani noyitutumikidiso yedumba lyewa, 7 mamanya goonikisi nomamanya gamwe gokutura posikoverero sopomapepe ntani naga gokutura posininke soponturo. 8 Awo va hepa kutungira nge evango lyokupongoka yipo ngani tunge mokatji kawo. 9 Wa hepa kudika nkongoronzugo noyininke yamo kuliza nefano eli nina kukulikida.

10 “Va hepa kurugana sikesa noyitji yomusu, monaure sa hepa kukara nometa 1,1* monompatji nosentimeta 66,7* ano musika gwaso nosentimeta 66,7.* 11 Makura ngo si kwite ngorodo zene-zene monda nokontunda ntani ngo rugane rugodi rongorodo nokurudingira keguru lyosikesa oso. 12 Ngo rugane nolinga ne dongorodo nokuditura keguru lyomaguru gane gosikesa. Wa hepa kutura nolinga mbali komaruha gaso gavali. 13 Wa hepa kuhonga yitji yomusu nokuyikwita ngorodo. 14 Makura ngo zweke yitji oyo monolinga edi da kara konontere dosikesa, yipo vantu ngava kwatere ko pokusidamuna. 15 Yitji oyo ya hepa kukara monolinga dokosikesa. Ayo nokuyigusa mo si. 16 Mosikesa ngo ture mo madiworokeso aga ngani ku pa.

17 “Ngo ruganene ko sikudumikiso songorodo zene-zene, monaure sa hepa kukara nometa 1,1* ntani monompatji nosentimeta 66,7.* 18 Wa hepa kuhambura vakerubi vavali nongorodo nokuvatura kouhura wosikudumikiso sosikesa. 19 Komaruha nagenye gavali gosikesa, tomu tura ko mukerubi gumwe. 20 Vakerubi va hepa kuzerura mavava gawo gavali meguru, yipo va kudumike sikesa nomavava gawo ntani yipara yawo ya hepa kulipirukira nokunyongamena posikudumikiso. 21 Makura ngo ture sikudumikiso kosikesa ntani mosikesa wa hepa kutura mo madiworokeso aga ngani ku pa. 22 Ame ngani kumonekera nokuuyunga nove kutundilira peguru lyosikudumikiso sosikesa. Ame ngani kudivisa nayinye eyi ngo tantera Vaisraeli kutundilira pokatji kovakerubi vavali ava va kara posikesa somadiworokeso.

23 “Wa hepa kurugana sitafura nositji somusu, monaure sa hepa kukara nosentimeta 89* ntani monompatji nosentimeta 44,5* ano musika gwaso nosentimeta 66,7.* 24 Wa hepa kusikwita ngorodo zene-zene nokusidingira norugodi rongorodo. 25 Wa hepa kutura sipirangi sokusika pounene wewoko* keguru lyositafura komaruha gaso gane. Ano kosipirangi wa hepa kudingira ko rugodi rongorodo. 26 Wa hepa kusiruganena nolinga ne dongorodo nokuditura komakovhu gaso gane, apa ga tamekera maguru gaso. 27 Nolinga odo wa hepa kuditura pepi nosipirangi, yipo ngava zweke mo yitji yokusidamwisa. 28 Wa hepa kuhonga yitji yomusu nokuyikwita ngorodo, makura ngayi kare yokudamwisa sitafura.

29 “Ngo ruganene positafura marupasa, nonkinda, nonkinda dononene ntani marupasa yononzambo doyikunwa. Ngo yi rugane nongorodo zene-zene. 30 Wa hepa kutura nkenye apa nomboroto delikido komeho zange positafura.

31 “Wa hepa kurugana uzweko woramba nongorodo zene-zene. Awo wa hepa kuuhambura. Edi lyako nomutayi gwako gopokatji nonomutayi dako nononkinda dako nonombya dako dokudumata nedi dokutemuna, va hepa kuyirugana kosininke simwe. 32 Awo wa hepa kukara nonomutayi ntazimwe monontere douzweko woramba; korumoho nomutayi ntatu, ano korulyo nomutayi ntatu. 33 Konomutayi dokorulyo ku kare nonkinda ntatu dokufana ngwendi nombya ntani nombya dokudumata nedi dokutemuna. Ano nomutayi dokorumoho nado yimo nadi fana ngorooro. Yimo ngesi nadi fana nomutayi ntazimwe edi nadi tunda pomutayi gopokatji. 34 Mutayi gopokatji gouzweko woramba gwa hepa kukara nononkinda ne dokufana ngwendi nombya ntani nombya dokudumata nedi dokutemuna. 35 Konhi zonomutayi mbali dokuhova edi nadi tunda pomutayi gopokatji, kwa hepa kukara mbya zokudumata, konhi zonomutayi mbali dokukwama ko nako kwa hepa kukara mbya zokudumata, ano konhi zonomutayi hena mbali dokukwama ko nado ngosikwawo. Ngesi yimo nadi fana nomutayi nadinye ntazimwe edi nadi tunda komutayi gopokatji. 36 Nombya dokudumata nonomutayi ntani nouzweko naunye woramba va hepa kuyirugana kosininke simwe songorodo ezi va hambura. 37 Wa hepa kuruganena ko noramba ntambali, ano pokuditemesa ado ngadi temena evango eli ngali kara komeho. 38 Yininke yako yokudimisisa mundiro ntani noyipana yomundiro, va hepa kuyirugana nongorodo zene-zene. 39 Wa hepa kurugana uzweko woramba kumwe noyiruganeso eyi kongorodo zene-zene zonokilograma 34.* 40 Yi rugana kuliza nefano eli va ku likidire kondundu.

26 “Wa hepa kurugana nkongoronzugo nomakehe murongo gomawa aga va honza nonongodi dosineguru nowanda wopurupuli nekehe lyegeha. Wa hepa kuhonzera po mafano govakerubi. 2 Makehe nagenye monaure ga hepa kukara nometa 12,4* ntani monompatji koyiha yonometa 1,7.* Makehe nagenye ga hepa kuhetakana. 3 Makehe gatano va hepa kugahonza kumwe ga kare ekehe limwe ntani aga gatano nago va hepa kugahonza kumwe; yipo ga kare makehe gavali gomanene. 4 Kouhura wankenye ekehe va hepa kuhonzera ko makero gonongodi dosineguru, yipo makehe ogo gomanene gavali va ga gwanekedese kumwe. 5 Ngo honze makero 50 kouhura wekehe limwe ntani nomakero 50 kekehe ekwawo, yipo ga livyuke apa ga ligwanekera. 6 Wa hepa kurugana tuhake tongorodo 50 o gwanekedese ko makehe, yipo ga kare ekehe limwe tupu lyonkongoronzugo.

7 “Ngo rugane makehe gonohuki doyikombo gokutura peguru lyonkongoronzugo. Ago ga hepa kukara makehe 11. 8 Makehe nagenye monaure ga hepa kukara nometa 13,3* ntani monompatji koyiha yonometa 1,7.* Makehe nagenye ogo 11 ga hepa kuhetakana. 9 Wa hepa kuhonza makehe gatano kumwe, ntani aga makehe ntazimwe nago va hepa kugahonza kumwe. Ano ekehe lyauntazimwe eli ngali kudumika komeho zonkongoronzugo, wa hepa kulipeteka. 10 Wa hepa kuhonzera makero 50 kouhura wekehe lyokuhulilira ntani makero 50 kouhura wekehe limwe apa ga ligwanekera. 11 Wa hepa kurugana tuhake tongoporo 50 nokututura momakero yipo o gwanekedese makehe kumwe, li kare ekehe limwe tupu lyonkongoronzugo. 12 Ekehe lyokuhupa ko ngali zenzerera, ano harufa zalyo ngali zenzerera konyima zonkongoronzugo. 13 Ekehe lyokuhupa ko ngali zenzerera nosentimeta 44,5 komaruha nagenye yipo li kudumike nkongoronzugo.

14 “Ngo rugane sikudumikiso sokutura konkongoronzugo soyipapa yononzwi* eyi va kwita ruvara rorugeha, ano pontunda zosikudumikiso oso ngo ture po sikudumikiso soyipapa yoyikorama.*

15 “Wa hepa kuruganena konkongoronzugo yipirangi yokuvyukilira yoyitji yomusu. 16 Nkenye sipirangi sokuvyukilira, momusika sa hepa kukara nometa 4,4* ano monompatji nosentimeta 66,7.* 17 Kwankenye sipirangi va hepa kuruganena ko tuninke tokudunda tuvali otu twa livyuka. Ngesi yimo no rugana yipirangi nayinye yokuvyukilira yokonkongoronzugo. 18 KoMbindakano zonkongoronzugo wa hepa kuruganena ko yipirangi 20 yokuvyukilira.

19 “Koyipirangi 20 yokuvyukilira wa hepa kuruganena ko tuvera tomakero 40 tosisiliveli: konhi zankenye sipirangi sokuvyukilira kwa hepa kukara ko tuninke tuvali tokudunda notuvera tuvali tomakero. 20 KoMuzogo gonkongoronzugo va hepa kuruganena ko yipirangi 20 yokuvyukilira, 21 ntani notuvera tomakero 40 tosisiliveli, ano kwankenye sipirangi sokuvyukilira kwa hepa kukara tuvera tuvali tomakero tosisiliveli. 22 Ano konyima zonkongoronzugo koyiha yoUtokero, wa hepa kuruganena ko yipirangi ntazimwe yokuvyukilira. 23 Wa hepa kuruganena konyima zonkongoronzugo yipirangi yivali yokuvyukilira yipo ngayi kare komakovhu gazo. 24 Yipirangi oyo va hepa kuyitura yivali kutundilira pevhu dogoro keguru kolinga zokuhova. Ano yipirangi yikwawo yekekovhu ekwawo nayo va hepa kuyirugana ngorooro, yipo ngava yi ture komakovhu gavali gonkongoronzugo. 25 Ngaku kare yipirangi ntantatu yokuvyukilira notuvera twako 16 tomakero tosisiliveli. Ano konhi zankenye sipirangi sokuvyukilira, kwa hepa kukara ko tuvera tuvali tomakero tosisiliveli.

26 “Wa hepa kurugana nompigetji domusu dokutura koyipirangi yokuvyukilira: ntano dokoMbindakano zonkongoronzugo, 27 ntani ntano dokutura koMuzogo gonkongoronzugo, ano edi ntano koUtokero wonkongoronzugo. 28 Mpigetji zopokatji ezi za kara pokatji koyipirangi za hepa kutunda ketamekero dogoro kouhura wonkongoronzugo.

29 “Wa hepa kukwita ngorodo koyipirangi yokuvyukilira ntani wa hepa kuruganena ko nolinga dongorodo mokuzwekera nompigetji. Ano nompigetji nado wa hepa kudikwita ngorodo. 30 Wa hepa kudika nkongoronzugo kuliza nefano eli va ku likidire kondundu.

31 “Wa hepa kuhonza ekehe nonongodi dosineguru nowanda wopurupuli nekehe lyegeha neli lyewa. Wa hepa kuhonzera po vakerubi. 32 Wa hepa kukulika ekehe olyo konongundi ne doyitji yomusu edi va kwita ngorodo. Ano yinkongo yako ya hepa kukara yongorodo. Nongundi odo ne va hepa kutura ko tuvera tune tomakero tosisiliveli. 33 Ngo kulike ekehe motuhake nokutura sikesa somadiworokeso konyima zekehe. Ekehe olyo ngali gaununa evango lyokupongoka kevango lyokupongokerera. 34 Wa hepa kutura sikudumikiso kosikesa somadiworokeso nokusitura mevango lyokupongokerera.

35 “Ngo ture sitafura mevango lyokupongoka* koMuzogo gonkongoronzugo. Ano komeho zositafura ngo ture ko uzweko woramba. Awo ngau karera koMbindakano zonkongoronzugo. 36 Ngo rugane ekehe lyepevero lyonkongoronzugo, ngo li honze nonongodi dosineguru nowanda wopurupuli nekehe lyegeha neli lyewa. 37 Wa hepa kurugana nongundi ntano doyitji yomusu dokutura ekehe lyepevero lyonkongoronzugo nokudikwita ngorodo. Tuhake twako twa hepa kukara tongorodo ntani wa hepa kuruganena ko tuvera tomakero tutano tongoporo.

27 “Wa hepa kurugana sizambero noyitji yomusu, monaure sa hepa kukara nometa 2,2* ano monompatji nometa 2,2.* Sizambero sa hepa kuhetakana komaruha nagenye ntani musika gwaso gwa hepa kukara nometa 1,3.* 2 Komakovhu gane gosizambero wa hepa kuruganena ko nombinga. Ado ngadi kara ruha rosizambero. Sizambero wa hepa kusikwita ngoporo. 3 Wa hepa kurugana tuyiga tokukombera enoto* kumwe noyihupuro nomarupasa nonoforoko noyipana yokusimbira mundiro. Yiruganeso yako nayinye va hepa kuyirugana kongoporo. 4 Posizambero ngo ruganene po sininke sokukangera songoporo, ano komakovhu gane gosizambero, ngo ture ko nolinga ne dongoporo. 5 Sininke sokukangera wa hepa kusitura konhi zosipirangi sokosizambero dogoro si ka sike pokatji kosizambero. 6 Kosizambero wa hepa kuhongera ko yitji yomusu nokuyikwita ngoporo. 7 Yitji oyo ngava yi tura monolinga, yipo ngayi kare konontere dosizambero apa ngava si damuna. 8 Wa hepa kurugana sizambero noyipirangi. Ano monda mwa ha kara yuma. Ngo si rugane kuliza nefano eli na ku likidire kondundu.

9 “Wa hepa kurugana eharango lyonkongoronzugo. Ano koMbindakano zeharango olyo ngaku kare makehe gomawa. Monaure ga hepa kusika ponometa 44,5.* 10 Ngaku kare nongundi 20 notuvera 20 tomakero tongoporo. Yinkongo yokonongundi ntani nonolinga dako ngayi kare yosisiliveli. 11 Makehe gokoMuzogo ngaga kare nometa 44,5* monaure nonongundi dako 20 ntani notuvera tomakero tongoporo 20. Yinkongo yako nonolinga dako ngayi kare yosisiliveli. 12 Makehe gokoUtokero weharango monaure ga hepa kukara nometa 22,2* ntani va hepa kurugana nongundi murongo ntani notuvera tomakero murongo. 13 Eharango lyokoUpumezuva wonkongoronzugo, monompatji lya hepa kukara nometa 22,2.* 14 Koruha rokorulyo rwevero ngo ture ko ekehe lyonometa 6,6* nonongundi ntatu ntani notuvera tutatu tomakero. 15 Ano koruha rokorumoho rwevero nako ngo ture ko ekehe lyonometa 6,6* nonongundi ntatu notuvera tutatu tomakero.

16 “Kevero lyekeharango ngaku kare ekehe, monaure nometa 8,9* eli va honza nonongodi dosineguru nowanda wopurupuli nekehe lyegeha neli lyewa ntani nonongundi ne kumwe notuvera twako tune tomakero. 17 Nongundi nadinye edi ngadi kundurukida eharango ngadi kare noyininke yako yokumangesa yosisiliveli noyinkongo yosisiliveli, nye tuvera twako tomakero ngatu kara tongoporo. 18 Eharango monaure lya hepa kukara nometa 44,5* monompatji nometa 22* ano musika gwalyo nometa 2,2.* Eharango lya hepa kulirugana nomakehe gomawa ntani va hepa kutura ko tuvera tomakero tongoporo. 19 Yiruganeso nayinye eyi ngava ruganesa monkongoronzugo kumwe nonombohwa dako demevhu nedi dekeharango ya hepa kukara yongoporo.

20 “Wa hepa kutantera Vaisraeli va rete magadi gomawa gononzwe gokutura monoramba, yipo di teme nkenye apa. 21 Arona novana vendi wovagara ngava hwameke noramba monkongoronzugo* ponze zekehe eli lya kara pepi nomadiworokeso, kutunda ngurova dogoro ngurangura komeho zaJehova. Ezi kuna kara veta zokukarerera ezi ngava limburukwa Vaisraeli noruvharo rwawo narunye.

28 “Ngo zigide mukuroge Arona novana vendi wovagara oNadabu naAbihu naEliyasara naItamara mokatji koVaisraeli, yipo ngava ruganene nge ngovapristeli. 2 Ngo ruganene mukuroge Arona yidwara yokupongoka yoyiwa yipo nga fumanene po. 3 Wa hepa kuuyunga novantu ava va kara noudivi ava na zwida mpepo zounongo. Awo ngava honza yidwara yaArona, ano ayo ngayi likida asi Arona ga pongoka kosipara sange yipo nga ruganene nge ngomupristeli.

4 “Eyi yiyo yidwara ngava rugana: sininke soponturo, sikoverero sopomapepe, hema zomawoko gomasupi, erwakani, embare ntani ekehe lyomombunda. Awo ngava ruganena Arona novana vendi yidwara eyi yokupongoka, yipo ngava ruganene nge ngovapristeli. 5 Varugani ava va kara noudivi ngava ruganese ngorodo nonongodi dosineguru nowanda wopurupuli nekehe lyegeha ntani nekehe lyewa.

6 “Awo ngava honze sikoverero sopomapepe nongorodo nonongodi dosineguru nowanda wopurupuli nekehe lyegeha ntani nekehe lyewa. 7 Ngava honzere pomapepe gaso yininke yivali yokugwanekedesa ruha rokonyima noru rokomeho rosikoverero. 8 Liva oru ngava honzera posikoverero sopomapepe rokulimangesa, ngava ru honze noyininke yokulifana: ngorodo, nongodi dosineguru, wanda wopurupuli, ekehe lyegeha ntani nekehe lyewa.

9 “Ngo guse mamanya gavali goonikisi nokutjanga po* madina govana vaIsraeli. 10 Pemanya limwe ngo tjange po madina ntazimwe, ano pemanya ekwawo ngo tjange po madina gokuhupa ko ntazimwe kuliza nomu va likwamena. 11 Muntu ogu a tjanga pomamanya, yige nga tjanga madina govana vaIsraeli pomamanya ogo gavali, ngwendi moomu a tjanga posinongweneso. Age ga hepa kugazweka moyininke yongorodo. 12 Ngo ture mamanya ogo gavali pomapepe goposikoverero sopomapepe, yipo ngaga diworokese vana vaIsraeli ntani Arona nga simba madina gawo komeho zaJehova yipo ngaga kare sidiworokeso. 13 Ngo rugane yininke yongorodo yokutura mamanya, 14 notuuketanga tongorodo zene-zene otu va poha ngwendi rugodi nokututura koyininke yongorodo yokutura mamanya.

15 “Ngo ninke muntu ogu a honzo a rugane sininke soponturo sompanguro. Aso va hepa kusirugana ngwendi sikoverero sopomapepe nongorodo nonongodi dosineguru nowanda wopurupuli nekehe lyegeha ntani nekehe lyewa. 16 Aso sa hepa kuhetakana komaruha nagenye nsene vana sipeteke ntani monaure sa hepa kusika koyiha yonosentimeta 22* ntani monompatji koyiha yonosentimeta 22.* 17 Ngo ture ko nomukweyo ne domamanya. Momukweyo gokuhova, ngo ture mo emanya lyorubini lyotopasi ntani lyoemeralidi. 18 Ano momukweyo gwauvali: emanya lyosinamahako neli lyosafire ntani lyojasipesi. 19 Momukweyo gwautatu: emanya lyolesh′em,* lyoakate ntani lyoametisi. 20 Momukweyo gwaune: emanya lyokilisolite, lyoonikisi ntani lyojade. Ago ngava ga zweke moyininke yongorodo. 21 Mamanya ogo ngaga karera po madina govana vaIsraeli 12 wovagara. Nkenye emanya ngava li tjange edina limwe lyomazimo goVaisraeli 12. Ago va hepa kugatjanga ngwendi moomu ava tjanga posinongweneso.

22 “Kosininke soponturo, ngo ruganene ko tuuketanga tokupoha ngwendi rugodi rongorodo zene-zene. 23 Ngo ruganene ko nolinga mbali dongorodo nokutura nolinga odo komakovhu gaso gekeguru. 24 Ngo ture tuuketanga monolinga mbali dokomakovhu gekeguru gosininke soponturo. 25 Ano tuuketanga oto ngo tu ture poyininke yongorodo eyi ngayi kara pomapepe gosikoverero sopomapepe. 26 Ngo rugane nolinga mbali dongorodo nokuditura monda zosininke soponturo komakovhu gaso gepevhu, yipo nga di pirukire sikoverero sopomapepe. 27 Komeho zosikoverero sopomapepe, ngo ruganene ko hena nolinga mbali dongorodo nokuditura peguru lyoliva oru ngava honzera ko, yipo nga di livyuke nomapepe gaso. 28 Sininke soponturo, ngava si mange norugodi rosineguru monolinga doposikoverero sopomapepe yipo ngasi kare pevega limwe peguru lyoliva.

29 “Arona nga dware sininke soponturo sompanguro apa ngapa kara madina govana vaIsraeli nkenye apa nga hwilira mevango lyokupongoka, yipo ngasi kare sidiworokeso komeho zaJehova. 30 Ngo ture Ulimu naTumimu* posininke soponturo sompanguro ntani ayo ya hepa kukara ponturo zaArona nkenye apa nga wiza komeho zaJehova ntani ga hepa kuyidwara nkenye apa komeho zaJehova, yipo nga yi ruganese mokupangura Vaisraeli.

31 “Ngo rugane hema zomawoko gomasupi zokudwara konhi zosikoverero sopomapepe nongodi zosineguru. 32 Keguru lyohema ozo zomawoko gomasupi, ngava ture ko nsingo ntani konontere donsingo ngava honze ko ngwendi moomu va honza konsingo zoyikoverero yovakwayita yipo zi dire kutauka usimbu. 33 Ngo ruganene kouhura wohema yininke yokufana ngwendi pomegaranate. Ayo wa hepa kuyirugana nonongodi dosineguru nowanda wopurupuli ntani nekehe lyegeha, o yi dingilike kohema ozo kumwe notungenzo pokatji kayo. 34 Ngo honzere kohema zomawoko gomasupi ngenzo zongorodo nopomegaranate yi likwame ngorooro. 35 Arona yige nga dwara hema ozo yipo a ruganene nge ngomupristeli ntani muhagaro gotungenzo va hepa kuguzuvha apa nga hwilira mevango lyokupongoka komeho zaJehova napa nga pwaga mo, yipo nga dire kufa.

36 “Ngo rugane sivera songorodo zene-zene nokutjanga po ngwendi moomu ava tjanga posinongweneso. Ngo tjange po asi: ‘Jehova kwa pongoka.’ 37 Ngo si mangerere kembare nongodi zosineguru ntani aso nga si kare komeho zembare nkenye apa. 38 Aso ngasi kara posipara saArona ntani age yige nga kara nositumbukira nsene gumwe a ruganesa yininke yokupongoka mepuko eyi ava gava Vaisraeli ngouhwi wokupongoka kwaKarunga. Aso sa hepa kukara nkenye apa posipara sendi yipo a va hafere Jehova.

39 “Ngo honze erwakani nembare ntani nekehe lyomombunda kekehe lyewa.

40 “Ngo ruganene hena vana vaArona wovagara marwakani gomawa nomakehe gomombunda ntani neyi yokudwara komutwe yipo va fumanene po. 41 Ngo dwareke mukuroge Arona kumwe novana vendi wovagara. Wa hepa kuvagwaveka nokuvatura va kare vapristeli ntani nokuvaninka va pongoke. Awo ngava rugana yirugana youpristeli. 42 Ngo va ruganene nokotje,* yipo va kudumike muherehere gwawo. Ado da hepa kusika komatungi. 43 Arona novana vendi wovagara va hepa kudidwara nsene kuna kuza monkongoronzugo* ndi nsene kuna kuhedera kosizambero va ka rugane mevango lyokupongoka, yipo ngava dire kukara nounzoni vava dipage. Arona noruvharo* rwendi va hepa kukwama veta ezi dogoro narunye.

29 “Eyi yiyo wa hepa kurugana apa ngo va pongora yipo va ruganene nge ngovapristeli: Wa hepa kugusa ntwedugona nononzwi donongara mbali donongwa, 2 nomboroto zokudira yihaheso nonomuhwi domboroto dokuliudinga* dokudira yihaheso edi va vhonga nomagadi ntani noyikuki yokudira yihaheso va kwita nomagadi. Wa hepa kuyirugana nousura wouwa worukokotwa, 3 makura ngo yi ture mosikumba nokuyireta kwange mosikumba kumwe nontwedu ntani nononzwi mbali donongara.

4 “Wa hepa kureta Arona novana vendi wovagara pevero lyonkongoronzugo* noku va tantera va likuhwe. 5 Makura ngo dwareke Arona erwakani, hema zomawoko gomasupi,* sikoverero sopomapepe, sininke soponturo ntani wa hepa kumumanga liva mombunda zendi oru va honzera posikoverero sopomapepe. 6 Wa hepa kumudwareka embare nokutura po sidiviso sokupongoka esi va pongwera Karunga, 7 ntani ngo guse magadi gokugwavekesa noku ga mu tjira pomutwe yipo o mu gwaveke.

8 “Makura ngo rete hena vana vendi yipo ngo va dwareke marwakani, 9 ntani ngo mange Arona novana vendi makehe gomombunda nokuvadwareka yininke yokomutwe. Vagara ava kumwe noruvharo rwawo ngava kara vapristeli. Ezi kuna kara veta zokukarerera. Yimo nye ngesi ngo horowora Arona novana vendi va ruganene nge ngovapristeli.

10 “Makura ngo tware ntwedu komeho zonkongoronzugo, ano Arona novana vendi va hepa kukambeka mawoko gawo pomutwe gontwedu. 11 Ngo dipagere ntwedu ozo komeho zaJehova pevero lyonkongoronzugo. 12 Ngo dove nyara zoge mohonde zontwedu nokuzikwita konombinga dosizambero. Ano honde zokuhupa ko ngo zi tjisire pedi lyosizambero. 13 Ngo guse magadi nagenye aga ga kara koyininke yomonda; magadi gekehuli ntani nonongera mbali nomagadi gako nokuyihwika, yipo musi gwako nga gu tutumukire posizambero. 14 Nye nyama zontwedu nosipapa sazo noyininke yazo yomonda,* ngo yi hwikire ponze zokamba. Azo ngazi kara nzambo zononzo.

15 “Makura ngo guse nzwi zimwe zongara yipo Arona novana vendi ngava kambeke mawoko gawo pomutwe gwazo. 16 Ngo dipage nzwi ozo zongara nokugusa honde zazo o zi nagere komaruha nagenye gosizambero. 17 Ngo tetagure nzwi zongara nokukuhwa yininke yazo yomonda kumwe nomaguru gazo noku yi tura nawa kumwe nomutwe gwazo posizambero. 18 Ngo hwike nzwi nazinye yipo musi gwazo nga gu tutumukire posizambero. Azo kuna kara nzambo zeswakerero kwaJehova, ano edumba lyazo kumuhafesa. Ezi kuna kara nzambo zokuhwika ezi ngava gava kwaJehova.

19 “Ngo guse hena nzwi nkwawo, yipo Arona novana vendi ngava kambeke po mawoko gawo pomutwe gwazo. 20 Ngo dipage nzwi ozo nokugusa honde zimwe o zi kwite kokutwi kwaArona kokorulyo ntani komatwi gokorulyo govana vendi wovagara nokomapumbwara gokomawoko gawo gokorulyo ntani naga gokonompadi dawo dokorulyo, ntani ngo nagere honde komaruha nagenye gosizambero. 21 Makura ngo guse hena honde zimwe ezi zina kara kosizambero ntani nomagadi gokugwavekesa o ga nagere Arona novana vendi ntani nokoyidwara yawo, yipo Arona novana vendi ntani noyidwara yawo nga yi pongoke.

22 “Ngo guse magadi gonzwi nomusira gomagadi nomagadi goyininke yomonda nomagadi gekehuli ntani nonongera mbali nomagadi gako ntani neguru lyazo lyokorulyo, yeeyi azo nzwi ezi ngava zamba apa ngava horowora vapristeli. 23 Ngo guse hena nomuhwi mbali domboroto dokuliudinga,* zimwe zokukwita nomagadi ntani sikuki esi sina kara posikumba sonomboroto dokudira yihaheso esi sa kara komeho zaJehova. 24 Nayinye wa hepa kuyitura momawoko gaArona nomomawoko govana vendi ntani wa hepa kuyizeragura ngonzambo zelikido kwaJehova. 25 Makura to yi gusa momawoko gawo nokuyihwika posizambero peguru lyonzambo zeswakerero. Azo ngazi gava edumba lyewa lyokuhafesa Jehova. Ezi kuna kara nzambo zokuhwika ezi ngava gava kwaJehova.

26 “Ngo guse nturo zonzwi ezi ngava zamba apa ngava horowora Arona a kare mupristeli nokuzizeragura komeho zaJehova ngonzambo zelikido. Azo ngazi kara ruha roge. 27 Ngo pongore nturo nokuguru konzwi ezi ngo gava ngonzambo zelikido apa ngava horowora Arona novana vendi va kare vapristeli. 28 Aro kuna kara ruha rokupongoka ntani aro ngava ru gave kwaArona novana vendi. Vaisraeli ngava limburukwe veta ozo dogoro narunye ntani ngava gave ruha oro rokupongoka kwaJehova pononzambo dawo dombili.

29 “Apa nga dogoroka Arona, yidwara yendi yokupongoka ngava yi ruganesa vana vendi wovagara apa ngava va gwaveka noku va horowora va kare vapristeli. 30 Gumwe govana vendi wovagara yige nga mu kwama moupristeli ntani yige nga yi dwara mazuva ntambali apa nga za monkongoronzugo a ka rugane mevango lyokupongoka.

31 “Ngo guse nzwi zongara ezi ngava ruganesa apa ngava horowora Arona a kare mupristeli nokuterekera nyama zazo mevango lyokupongoka. 32 Arona novana vendi ngava lya nyama ozo zonzwi nomboroto ezi nga zi kara mosikumba pevero lyonkongoronzugo. 33 Yininke eyi kwa yi geve yipo va va gusire po nonzo dawo apa vava horowere va kare vapristeli noku va pongora. Awo va hepa kulya yininke eyi. Nye muntu* ogu ga dira kukara mupristeli ga ha lya ko, yeeyi ayo yininke yokupongoka. 34 Nsene zina hupu po nyama ozo nomboroto dogoro ngurangura, va hepa kuyihwika nomundiro. Ayo kapisi va yi lye, morwa ayo yininke yokupongoka.

35 “Ngesi yimo ngo rugana Arona novana vendi kuliza nanayinye eyi nina ku tantere. Ove ngo gusa mazuva ntambali mokuvaninka va kare vapristeli. 36 Ngo gave ntwedu ngonzambo zononzo nkenye ezuva zi kare zokugusira po nonzo. Monkedi ezi yimo ngo kuhura sizambero kononzo ntani wa hepa kupongora sizambero pokusitjisira magadi. 37 Ove ngo kuhura sizambero kononzo mazuva ntambali nokusipongora yipo si pongokerere. Nkenye ogu nga kwata kosizambero ga hepa kupongoka.

38 “Eyi yiyo ngo zamba posizambero: nonzwi donongara mbali domvhura zimwe nkenye ezuva. 39 Ngo zambe nzwigona zimwe kongurangura, ano zimwe ngo zi zambe komeho li ka toke ezuva. 40 Kilograma zimwe* zousura wouwa ou va vhonga nomagadi gokusika koyiha yolita zimwe* ntani nonzambo zoyikunwa yovhinyu zokusika koyiha yolita zimwe,* va hepa kuyizamba kumwe nonzwi zokuhova zongara. 41 Ngo zambe nzwigona zauvali komeho li ka toke ezuva kumwe nousura ntani nonzambo zoyikunwa ngwendi eyi ono gava kongurangura. Ove ngo zi hwika yipo zi gave edumba lyewa lyokuhafesa Jehova. 42 Ezi kuna kara nzambo zeswakerero ezi ngava gava nkenye ezuva womoruvharo roge pevero lyonkongoronzugo komeho zaJehova, oku ngani mu monekera ni mu uyungise.

43 “Oko yiko ngani monekera Vaisraeli, ano uyerere wange ngau pongora evango olyo. 44 Ame ngani pongora nkongoronzugo nosizambero ntani naArona kumwe novana vendi, yipo ngava ruganene nge ngovapristeli. 45 Ame ngani tunga mokatji koVaisraeli nokukara Karunga gwawo. 46 Awo ngava diva asi ame nyame Jehova Karunga gwawo ogu ga va gusa mosirongo saEgipite yipo ni tunge mokatji kawo. Ame nyame Jehova Karunga gwawo.

30 “Wa hepa kurugana sizambero noyitji yomusu sokuhwikira yitutumikidiso yedumba lyewa. 2 Aso si hetakane komaruha nagenye gane, monaure nosentimeta 44,5* monompatji nosentimeta 44,5* ano musika gwaso nosentimeta 89.* Ano nombinga dako ngava di rugane kosininke simwe nosizambero. 3 Wa hepa kusikwita ngorodo zene-zene keguru lyaso, komaruha gaso nagenye ntani konombinga daso. Wa hepa kuruganena ko rugodi rongorodo nokurudingira keguru lyosizambero. 4 Konhi zorugodi rongorodo wa hepa kutura ko nolinga mbali komaruha gavali, amo yimo ngava tura yitji eyi ngava ruganesa pokusidamuna. 5 Honga yitji yomusu nokuyikwita ngorodo. 6 Wa hepa kutura sizambero komeho zekehe eli lya kara pepi nosikesa somadiworokeso. Ame ngani kumonekera kosikudumikiso sokosikesa.

7 “Arona nga hwikira po yitutumikidiso yedumba lyewa yipo musi nga gu tutumukire posizambero apa nga wapaika noramba nkenye ngurangura. 8 Apa nga temesa Arona noramba komeho li ka toke ezuva, age nga hwika yitutumikidiso yedumba lyewa. Azo kuna kara nzambo zoyitutumikidiso yedumba lyewa ezi ngava gava komeho zaJehova dogoro narunye. 9 Va ha zambera po nzambo zoyitutumikidiso yedumba lyewa ezi va dira kupulisira ndi nzambo zeswakerero ndi nzambo zombuto ntani va ha tjisira po nzambo zoyikunwa. 10 Arona ga hepa kukwita konombinga dosizambero honde zimwe zosikorama ngonzambo zononzo, yipo a si kuhure kononzo. Age ga hepa kuyirugana rumwe momvhura yipo a si pongore, yeeyi aso kwa pongoka unene kwaJehova.”

11 Makura Jehova ta tantere Mosesa asi: 12 “Nkenye apa ngo varura vana vaIsraeli wovagara, nkenye ogu ga hepa kufutira eparu* lyendi kwaJehova apa ngo va varura, yipo ngayi dire kuvagwana yininke yoyidona apa ngava litjangesa. 13 Eyi yiyo ngava gava navenye ava ngava litjangesa: nograma ntazimwe dosisiliveli* kuliza noyisiliveli yekevango lyokupongoka. Nograma ntazimwe* dosisiliveli yido ngava gava kwaJehova. 14 Nkenye ogu ga litjangesa gonomvhura 20 yi kandwise, age nga gava yigava kwaJehova. 15 Nkenye ogu ga hepa kugava nograma ntazimwe dosisiliveli* kwaJehova mokufutira eparu* lyendi. Nongawo kapisi ngadi gave yoyinzi ntani nohepwe nado kapisi ngadi gave yosisesu. 16 Ngo guse yimaliwa yosisiliveli koVaisraeli eyi ngava futa, ayo ngava yi ruganesa koyirugana yokonkongoronzugo.* Ayo ngayi diworokesa Jehova asi awo va futira eparu lyawo.”

17 Jehova ta tantere hena Mosesa asi: 18 “Rugana siyaha songoporo nosininke sokusitentekera, makura ngo si ture pokatji konkongoronzugo nosizambero ntani ngo ture po mema. 19 Arona novana vendi wovagara yipo ngava kuhwira mawoko gawo nonompadi dawo. 20 Apa ngava hwilira monkongoronzugo ndi apa ngava hedera kosizambero va ka rugane ntani noku ka gava nonzambo dokuhwika kwaJehova, va hepa kulikuhwa nomema yipo va dire kufa. 21 Awo va hepa kukuhwa mawoko gawo nonompadi dawo, yipo ngava dire kufa ntani ezi kuna kara veta zokukarerera ezi ngava kwama kumwe noruvharo rwawo dogoro narunye.”

22 Jehova ta tantere hena Mosesa asi: 23 “Gusa yitoveseso yedumba lyewa eyi: nokilograma ntazimwe domira zokulikwata, nokilograma ntatu dosinamoni, nokilograma ntatu docalamus, 24 nokilograma ntazimwe dokasiya kuliza noyisiliveli yekevango lyokupongoka kumwe nomagadi gononzwe gonolita 3,67.* 25 Wa hepa kuyivhonga nawa kumwe, yipo o rugane magadi gokupongoka gokugwavekesa. Ago ngaga kara magadi gokupongoka gokugwavekesa.

26 “Wa hepa kuruganesa magadi ogo mokugwaveka nkongoronzugo nosikesa somadiworokeso, 27 kumwe nositafura noyiruganeso yako nayinye nouzweko woramba noyiruganeso yako nosizambero soyitutumikidiso yedumba lyewa, 28 nosizambero sokuhwikira nonzambo deswakerero kumwe noyiruganeso yako nayinye ntani nosiyaha nosininke sako sokusitentekera. 29 Wa hepa kuyipongora yipo yi pongokerere. Nkenye ogu gokuyikwata ga hepa kupongoka. 30 Ntani wa hepa kugwaveka Arona novana vendi wovagara nokuvapongora yipo va ruganene nge ngovapristeli.

31 “Wa hepa kutantera Vaisraeli asi: ‘Aga kuna kara magadi gange gokupongoka. Mwa hepa kugaruganesa koyininke eyi dogoro nokoruvharo rweni rokomeho. 32 Ago noku ga likwita si nkenye ogu ntani noku ga temwinina si, morwa ago kwa pongoka. Mwa hepa kutwikira kugatara asi ago kwa pongoka. 33 Nkenye ogu nga rugana magadi ngwendi googo ntani ogu ngaga kwita muntu ogu va dira kupulisira,* va hepa kumugusa mo* mokatji kovantu vendi.’”

34 Makura Jehova ta tantere Mosesa asi: “Gusa yininke eyi nayinye ntani yi hetakane: sitakite, onika, kalibanumu nomanganganga gene-gene gokututumikidisa. 35 Wa hepa kuyirugana yi kare yitutumikidiso yedumba lyewa, ano yitoveseso va hepa kuyivhonga nawa kumwe nomungwa, kapisi va ture mo nkenye eyi ntani hena ya hepa kupongoka. 36 Wa hepa kutwa ko yimwe yi kare usura-sura nokuyitura komeho zomadiworokeso monkongoronzugo oku ngani mu monekera. Ayo ya hepa kukara yininke yokupongoka unene kweni. 37 Kapisi ngomu liruganene nyamweni yitutumikidiso yedumba lyewa kumwe noyininke yokulifana. Mwa hepa kuyitara asi ayo yininke yokupongoka kwaJehova. 38 Nkenye ogu nga rugana yitutumikidiso yokulifana yipo a hafere edumba lyayo, va hepa kumugusa mo* mokatji kovantu vendi.”

31 Jehova ta tantere hena Mosesa asi: 2 “Ame nina horowora* Besareli munaUli, Uli munaHuru gomorudi rwaJuda. 3 Ame ngani mu zwida mpepo zange ezi nga zi mu pa unongo nonondunge ntani noudivi wankenye sirugana 4 sokufaneka yininke yoyiwa ntani sokuruganesa ngorodo, sisiliveli nongoporo, 5 sirugana sokuteta mamanya neyi yokutura mamanya ogo ntani nokuhonga yitji a rugane yininke yokulisiga-siga. 6 Ame nina horowora hena Oholiyaba munaAhisamaki gomorudi rwaDana ogu nga mu vatera. Ame ngani pa unongo navenye ava va kara noudivi yipo ngava rugane nayinye eyi na ku tantera: 7 nkongoronzugo,* sikesa somadiworokeso, sikudumikiso sako, yiruganeso nayinye yonkongoronzugo, 8 sitafura noyiruganeso yako, uzweko woramba wongorodo zene-zene noyiruganeso yako nayinye, sizambero soyitutumikidiso yedumba lyewa, 9 sizambero sononzambo deswakerero noyiruganeso yako nayinye nosiyaha ntani nosininke sokusitentekera, 10 yikoverero eyi va honza nawa, yikoverero yaArona youpristeli noyikoverero yovana vendi wovagara eyi ngava dwara ngovapristeli, 11 magadi gokugwavekesa noyitutumikidiso yedumba lyewa yomonkongoronzugo. Awo ngava rugana nayinye eyi na ku pangera.”

12 Jehova ta tantere hena Mosesa asi: 13 “Tantera Vaisraeli asi: ‘Mwa hepa kusikisa mo esabata lyange, yeeyi alyo kuna kara sidiviso pokatji kange none ntani noruvharo rweni, yipo mu dive asi nyame Jehova nina mu horowora yipo mu kare vantu vange. 14 Mwa hepa kusikisa mo Esabata, yeeyi alyo kwa pongoka kweni. Ogu nga dira kuyisikisa mo va hepa kumudipaga. Nkenye muntu ogu nga rugana mezuva olyo, va hepa kumugusa mo* mokatji kovantu vendi. 15 Yirugana va hepa kuyirugana mazuva ntazimwe, nye ezuva lyauntambali kuna kara ezuva lyesabata lyokupwizumuka. Alyo kwa pongoka kwaJehova. Nkenye ogu nga rugana mezuva lyEsabata va hepa kumudipaga. 16 Vaisraeli noruvharo rwawo narunye va hepa kusikisa mo Esabata. Alyo kuna kara egwanekero* lyanarunye. 17 Alyo kuna kara sidiviso sokukarerera pokatji kange noVaisraeli, yeeyi Jehova kwa sitire eguru nevhu momazuva ntazimwe, ano mezuva lyauntambali ta pwizumuka nokuhafera eyi ga rugene.’”

18 Apa ga mene kuuyunga nage poNdundu zaSinayi, age ta pe Mosesa mamanya gavali apa va tjanga madiworokeso. Ago kwa ga tjenge Karunga nonyara zendi.

32 Posiruwo oso, vantu kwa rorokere kundindira Mosesa a humburuke kondundu makura yipo va zire kwaArona, tava ka mu tantera asi: “Tu ruganena karunga ogu na tu pitisira, yeeyi kapi tuna diva eyi yina ka horokera Mosesa, mugara ogu ga tu gusa mosirongo saEgipite.” 2 Makura Arona ta va tantere asi: “Guseni yimbilingwa yongorodo eyi vana dwara komatwi vakadi veni novana veni wovagara nava wovakadi, mu yi retere nge.” 3 Makura vantu navenye tava gusa yimbilingwa yongorodo komatwi gawo, tava yi retere Arona. 4 Arona ta gusa ngorodo ozo nokuzirugana ntana zongorodo, makura vantu tava tanta asi: “Israeli, ogu yige Karunga goge ogu ga ku gusa mosirongo saEgipite.”

5 Arona apa ga yi mwene, ta tungu sizambero komeho zontana makura ta zigire asi: “Mungura ngatu danena Jehova sipito!” 6 Ezuva lyokukwama ko, tava pinduka ngurangura zonene makura tava gava nonzambo deswakerero ntani nononzambo dombili. Konyima, vantu tava hingire va lye nokunwa, makura tava katuka va hafere.

7 Makura Jehova ta tantere Mosesa asi: “Humburuka kondundu, yeeyi vantu woge ava wa gusa mosirongo saEgipite vana rugana yininke yokuvaretera ezonauko. 8 Awo vana genderere kuhageka kulimburukwa nompangera dange, vana liruganene vene ntana zongorodo nokuzinyongamena oku tava zi zambere nokutanta asi: ‘Israeli, ogu yige Karunga goge ogu ga ku gusa mosirongo saEgipite.’” 9 Jehova ta tantere hena Mosesa asi: “Nina mono asi vantu ava kapi ava zuvhu. 10 Yipo nye, wa ha kondera nge. Ame ngani va zonagura po nehandu lyange ntani ove ngani kuninka o kare muhoko gomunene.”

11 Makura Mosesa ta likwambere kwaKarunga gwendi Jehova asi: “Jehova, morwasinke ono kupulisilira ehandu lyoge li ku ninkise o rugane yininke eyi kovantu woge konyima zokuvagusa mosirongo saEgipite nononkondo doge dononene? 12 Nsene no yi rugana, Vaegipite ngava tanta asi: ‘Age kwa kere nositambo sosidona apa ga va gusire moEgipite. Age kwa here kuvadipagera monondundu nokuvagusa po pontunda zevhu.’ Rundurura etokoro lyoge lyokuzonagura po vantu woge. 13 Diworoka vakareli woge oAbirahamu naIsaka ntani Israeli ava wa tumbwidilire asi: ‘Ame ngani vhukisa ruvharo* roge ngwendi nombungururu dekeguru ntani ngani gava sirongo esi nasinye koruvharo roge yipo ngasi kare sawo dogoro narunye.’”

14 Makura Jehova ta rundurura* etokoro lyendi lyokuzonagura po vantu vendi.

15 Mosesa makura ta piruka nokuhumburuka kondundu age ana kwaterere mamanya gavali mokuwoko kwendi aga va tjanga madiworokeso. Mamanya ogo kwa ga tjenge komeho nokonyima. 16 Karunga mwene yige ga rugene mamanya ogo nokutjanga po* nonkango dendi. 17 Apa ga zuvhire Josuwa ezogerero lyovantu ava va zigilire, ta tantere Mosesa asi: “Kwa kuzuvhika ngwendi vantu kuna kurwa yita mokamba.” 18 Nye Mosesa ta tanta asi:

19 Tupu ga sikire Mosesa pepi nokamba, ta mono ntana zongorodo ntani nomu va dene vantu, ta handuka unene makura ta zuguma mamanya aga ga kere momawoko gendi, ago taga ka gwira kedi lyondundu makura taga bomauka. 20 Age ta gusa ntana zongorodo ezi va rugene tazi hwike momundiro nokuzikonka dogoro tazi kara usura-sura, ta gusa usura owo nokuutura momema makura ta ninki Vaisraeli va ga nwe. 21 Mosesa makura ta tantere Arona asi: “Yisinke vana kurugana vantu ava, eyi yina kuninkisa o va retere nzo zonene ngesi?” 22 Arona ta limburura asi: “Wa ha handuka hompa gwange, nove wa yi diva asi vantu ava kwa hara kurugana yininke yoyidona. 23 Awo kuna tantere nge asi: ‘Tu ruganena karunga ogu na tu pitisira, yeeyi kapi tuna diva eyi yina ka horokera Mosesa, mugara ogu ga tu gusa mosirongo saEgipite.’ 24 Yipo nina va tantere asi: ‘Nkenye ogu ana kara nongorodo ga hepa kuziligusa a zi retere nge.’ Yiyo nina zi zugumine momundiro, makura yiyo muna tundu ntana ezi.”

25 Mosesa kwa mwene asi vantu vana kara noumanguruki morwa Arona kapi ga va konderere. Yipo nye, awo kwa rugene yonomuga komeho zononkore dawo. 26 Makura Mosesa ta zi aka sikame pevero lyokamba nokutanta asi: “Nkenye ogu ana hamene koruha rwaJehova a wize kwange!” Makura Varevhi navenye tava ka ponga kwendi. 27 Makura age ta va tantere asi: “Jehova Karunga goVaisraeli kuna tanta asi: ‘Nkenye ogu ga hepa kugusa rufuro rwendi a gendagure mokamba nazinye a dipage mumbyendi ndi mukurwendi ndi musinda zendi ndi mukwawo zendi gomunene.’” 28 Varevhi kwa rugene eyi ga va tanterere Mosesa. Mezuva olyo vagara wokusika 3 000 kwa va dipagere. 29 Makura Mosesa ta tanta asi: “Ligaveni nyamweni kosirugana saJehova naina, yeeyi namuvenye kuna rwisa vana veni wovagara ntani vakuru veni novamumbya veni, neina age ta mu tungike.”

30 Ezuva lyokukwama ko, Mosesa ta tantere vantu asi: “One komu tulire nzo zonene, ngesi ame tani zi kondundu kwaJehova nampo kuvhura ni ka rugane ko yuma, yipo a mu gusire po nonzo deni.” 31 Mosesa makura ta tengura kwaJehova, ta ka mu tantera asi: “Vantu ka va tulire nzo zonene. Awo ka va liruganene vene sikarunga songorodo. 32 Ano ngesi nsene ono hara, va gusira po nonzo dawo. Nye nsene kapi ono hara, dongonona edina lyange mobuke zoge ezi wa li tjanga.” 33 Nye Jehova ta tantere Mosesa asi: “Nkenye ogu ga zona kwange ngani dongonona mo edina lyendi mobuke zange. 34 Ngesi zende o ka pitisire vantu va ze kevango eli na ku tantera. Tara, muengeli gwange nga pita komeho zeni ntani mezuva eli ngani va pangura, ame ngani va tengeka morwa nonzo dawo.” 35 Makura Jehova ta tengeke vantu nehamba lyomukagu morwa ntana zongorodo ezi va rugene kupitira mwaArona.

33 Jehova ta tantere hena Mosesa asi: “Katuka kumwe novantu ava wa gusa mosirongo saEgipite mu ze kosirongo esi na tumbwidilire Abirahamu naIsaka naJakopo asi ngani si gava koruvharo* rwawo. 2 Ame ngani tuma muengeli komeho zeni ntani ngani tjida mo Vakanani, Vaamoli, Vaheti, Vaperesi, Vahevhi ntani noVajebusi. 3 Zendeni kosirongo oku kwa zura masini nousi, nye ame kapi nani za none yeeyi one kapi omu zuvhu, kuvhura ngani mu zonagure po monzira.”

4 Vantu kwa guvire unene apa va zuvhire nonkango edi dokuguvisa ntani kwato ogu ga dwere yininke yoyiwa.* 5 Jehova ta tantere Mosesa asi: “Ka tantere Vaisraeli asi: ‘One kapi omu zuvhu. Sikando simwe tupu kuvhura ni wize kweni ni ya mu zonagure po. Yipo nye, mwa ha dwara yininke yoyiwa siruwo esi nina kugazara eyi nani mu rugana.’” 6 Yipo nye, kutundilira poNdundu zaHoreba, Vaisraeli kapi va dwere* yininke yoyiwa.

7 Makura Mosesa ta gusa tende zendi, ta ka zi dikira ponze zokamba sinano songandi, makura ta zi ruku asi tende zokupongera. Nkenye ogu ga here kupapara mavyukiso gaJehova nga zi kotende ozo. Azo kwa kere ponze zokamba. 8 Apa nga zi Mosesa kotende ozo, vantu ngava sikama pomavero gonotende dawo nokutarera Mosesa dogoro ta ka hwilira motende. 9 Apa nga hwilire Mosesa motende ozo, ngundi zeremo ngazi hegumuka noku ya sikama pevero lyotende siruwo esi nga uyunga Karunga naMosesa. 10 Apa vantu navenye va mwene ngundi zeremo zina sikama pevero lyotende, navenye tava linyongamene pomavero gonotende dawo. 11 Jehova kwa uyungire naMosesa awo kuna kulitara ngwendi moomu a uyunga muntu namukwawo. Apa ga tengwire Mosesa kokamba, mukareli gwendi Josuwa zaNunu kapi nga tundu motende ozo.

12 Makura Mosesa ta tantere Jehova asi: “Tara, ove kuna kutantera nge asi: ‘Pitisira vantu ava,’ nye ove kapi ono tantere nge asi nalye no tuma nge ntani hena ove kwa tanta asi ove wa diva nge* nawa ntani ame kukuhafesa. 13 Yipo nye, nsene asi ame kukuhafesa, ninka nge ni dive nonzira doge yipo ni ku dive ntani yipo ni twikire kukuhafesa. Diworoka hena asi vantu ava muhoko goge.” 14 Makura Karunga* ta tanta asi: “Ame* ngani za kumwe nove ntani ngani kupwizumukisa.” 15 Makura Mosesa ta mu tantere asi: “Nsene kapi ono kuza nose, wa ha tu ninka tu tunde po apa. 16 Ngapi omu ngava yi diva asi name novantu woge kukuhafesa? Nani kapisi pokuza kumwe nose, yipo vantu ngava yi dimburure asi ose twa lisiga nonomuhoko dapeke edi da kara pevhu ndi?”

17 Jehova ta tantere Mosesa asi: “Ame nani rugana yininke eyi ono pura nge, yeeyi ove kuhafesa nge ntani na kudiva nawa.”* 18 Makura Mosesa ta tantere Karunga asi: “Likida nge uyerere woge.” 19 Nye Karunga ta mu tantere asi: “Ame ngani kuninka o mone uwa wange naunye ntani ngani kudivisa edina lyange Jehova. Ame ngani hafera nokulikida nkenda nkenye ogu ngani horowora.” 20 Nye ta tanta hena asi: “Kapi to vhuru kumona sipara sange, yeeyi kwato muntu ogu a mono nge a twikire kuparuka.”

21 Jehova ta tanta hena asi: “Zende pevango lyopopepi name o ka sikame pemanya. 22 Apa na u pita uyerere wange, ame nani kutura mekero lyememanya ntani nani kukudumika newoko lyange dogoro ni pite. 23 Konyima, nani gusa ko ewoko lyange ntani no mona mugongo gwange, nye sipara sange kapi no si mona.”

34 Makura Jehova ta tantere Mosesa asi: “Liruganena ko mamanya gavali ngwendi gopomuhowo yipo ni tjange po nonkango edi da monekere pomamanya gopomuhowo aga wa bamagwire. 2 Liwapaikira mungura ngurangura ngo ze koNdundu zaSinayi yipo o ka sikame komeho zange keguru lyondundu. 3 Nye wa hepa kuza nyovelike ntani kwato ogu ngani mona kondundu, nampili yimuna nayo kapisi ngayi lire komeho zondundu.”

4 Makura Mosesa ta rugana mamanya gavali ngwendi gokuhova, ano ezuva lyokukwama ko, ta pinduka ngurangura zonene a ze koNdundu zaSinayi ngamoomu ga mu pangerere Jehova. Age kwa simbire mamanya gavali momawoko gendi. 5 Makura Jehova ta hegumuka meremo, ta sikama pepi naMosesa makura Jehova ta divisa edina lyendi. 6 Jehova kwa pitire komeho zendi nokudivisa asi: “Jehova, Jehova, age Karunga gonkenda, mutjima gwendi muwa, age kapi a handuka usimbu ano eharo lyendi lyanarunye ntani age nkenye apa kusikisa mo nonkango dendi, 7 age kulikida eharo lyendi lyanarunye dogoro koruvharo romayovi nokudongonona po mapuko nononzo, nye age kapi nga sigilira vananzo va dire kuvatengeka. Age nga tondora nonzo dovaguhya koruvharo rwawo ntani koruvharo rwawo rwautatu noru rwaune.”

8 Makura Mosesa ta tongamene usimbu noku linyongamena pevhu, 9 ta tanta asi: “Jehova, nsene ono hafere nge, na kanderere Jehova, zende kumwe nose nampili ngomu atu dili kuzuvha. Tu gusira po mapuko getu nononzo detu ntani tu tambura ngovantu woge.” 10 Ano Karunga ta mu limburura asi: “Ame tani tura po egwanekero:* Ame ngani rugana yininke yoyiwa komeho zoVaisraeli eyi va dira kurugana* rumwe mouzuni mudima ndi mokatji konomuhoko, ano nomuhoko edi da mu kundurukida ngadi mona yirugana yaJehova, yeeyi ame kuna kumuruganena yininke yokutetukisa.

11 “Diworokeni eyi nina kumupangera naina. Ame kuna kutjida mo Vaamoli, Vakanani, Vaheti, Vaperesi, Vahevhi ntani noVajebusi. 12 Takameseni asi kapisi ngomu ture po egwanekero novantu ava va tunga mosirongo esi muna kuza. Nsene mu yi rugana, one ngomu ligwanekera nomaudigu.* 13 Nye mwa hepa kukazonagura po yizambero yawo nokuzungurura mamanya gawo gokupongoka nokuteta nongundi* dawo dokupongoka. 14 Mwa ha karera yikarunga nayopeke, yeeyi Jehova kwa divikwa* asi age kwa hara kumukarera gelike.* Age Karunga ogu ga hara kumukarera gelike. 15 Takameseni mokudira kutulisa po egwanekero novantu ava va tunga mosirongo, morwa apa nava hondera* noyikarunga yawo nokuzambera yikarunga yawo, kuvhura gumwe a mu zigide mu ka lye konzambo zendi. 16 Ntani awo ngava gava vana vawo wovakadi kovana veni wovagara, ano vana vawo wovakadi ngava hondera* noyikarunga yawo nokuninkisa vana veni wovagara nawo va hondere noyikarunga yawo.

17 “Mwa ha liruganena yikarunga yoyivera.

18 “Mwa hepa kudana sipito sonomboroto dokudira yihaheso. One ngomu lya mboroto zokudira yihaheso mazuva ntambali posiruwo esi na tura po mokwedi kwaAbibu* ngamoomu na mu pangera. Yeeyi mokwedi kwaAbibu yipo mwa tundire moEgipite.

19 “Nombeli nadinye donongara dange, kukwatera mo yimuna nayinye, yi kare asi mbeli zontwedu ndi zonzwi. 20 Nombeli doyindongi mwa hepa kudiranda nonzwi, nye nsene kapi muna kudizowora mwa hepa kuteza nonsingo dado. Mwa hepa kuzowora nombeli deni nadinye donongara. Kwato gokuwiza komeho zange mawoko-woko.

21 “Mwa hepa kurugana mazuva ntazimwe, nye mezuva lyauntambali mwa hepa kupwizumuka.* Nampili posiruwo sokupurura nokuzangura mwa hepa kupwizumuka.

22 “Mwa hepa kudana sipito soyivike* nomuzangu gokuhova gorukokotwa ntani sipito sokupongaika nombuto* kehagero lyomvhura.

23 “Vagara navenye va hepa kukamoneka komeho zaHompa Jehova, Karunga goVaisraeli rutatu momvhura. 24 Yeeyi ame ngani tjida mo nomuhoko komeho zeni, ame hena ngani nenepeka sirongo seni ntani kwato ogu nga hara kumugusa sirongo seni, siruwo esi muna kuza mu ka moneke kosipara saKarunga gweni Jehova yikando yitatu momvhura.

25 “Nsene tomu gava nonzambo, mwa ha zamba honde zazo kumwe noyininke eyi va tura yihaheso ntani nonzambo dosipito soPaska nokudisiga si di rare dogoro ngurangura.

26 “Muzangu gweni gokuhova gomuwa po ogu mwa zangura momapya geni, mwa hepa kugureta konzugo zaKarunga gweni Jehova.

“Nokutereka si nyama zosikombogona momasini gazinyaso.”

27 Jehova ta tantere Mosesa asi: “Tjanga nonkango edi, yeeyi kupitira mononkango edi ame kuna kutulisa po egwanekero kumwe nove noVaisraeli.” 28 Mosesa kwa kere kooko naJehova mazuva 40 nomasiku 40. Age kapi ga lire mboroto ndi a nwe mema. Age* kwa tjenge pomamanya nonkango degwanekero ndi yipango murongo.*

29 Mosesa makura ta humburuka koNdundu zaSinayi age ana kwaterere mamanya gavali gomadiworokeso. Apa ga humburukire kondundu, age kapi ga divire asi sipara sendi kuna kupaima morwa age kwa uyungire naKarunga. 30 Arona noVaisraeli navenye apa va mwene Mosesa, tava dimburura asi sipara sendi kuna kupaima, makura tava tjira kumuhedera.

31 Nye Mosesa ta va zigida, ano Arona nomasimbi goVaisraeli tava wiza kwendi, makura Mosesa ta va uyungisa. 32 Konyima, Vaisraeli navenye tava mu hedere makura age tava pe yipango nayinye eyi ga mu pere Jehova koNdundu zaSinayi. 33 Kutunda opo, nkenye apa nga mana Mosesa kuuyunga kumwe nawo age nga likudumike ekehe kosipara. 34 Nye apa nga zi Mosesa komeho zaJehova a ka uyunge nage, age nga likudumuna ekehe olyo. Makura ta zi koVaisraeli a ka va tantere yipango eyi ga mu tanterere Karunga. 35 Vaisraeli tava mono asi sipara saMosesa kuna kupaima, makura Mosesa ta likudumike ekehe kosipara dogoro paapa nga zi a ka uyunge naKarunga.*

35 Konyima, Mosesa ta pongaike Vaisraeli navenye, ta va tantere asi: “Eyi yiyo ana tanta Jehova nomu rugana: 2 Mwa hepa kurugana yirugana yeni momazuva ntazimwe nye ezuva lyauntambali ngali kara ezuva lyokupongoka kweni, yeeyi alyo ezuva lyesabata lyokupwizumuka eli lya pongoka kwaJehova. Nkenye ogu nga rugana mezuva olyo va hepa kumudipaga. 3 Mwa ha hwameka mundiro momambo geni mezuva lyEsabata.”

4 Mosesa makura ta tantere Vaisraeli navenye asi: “Jehova kuna tanta asi: 5 ‘Pongaikeni yigava mokatji keni mu yi gave kwaJehova. Nkenye ogu ana kara neharo lyokugava momutjima gwendi a gave kwaJehova yigava eyi: ngorodo, sisiliveli, ngoporo, 6 nongodi dosineguru, wanda wopurupuli, ekehe lyegeha, ekehe lyewa, nohuki doyikombo, 7 yipapa yononzwi* eyi va kwita ruvara rorugeha, yipapa yoyikorama,* yitji yomusu, 8 magadi gomonoramba, magadi gokugwavekesa gobalisemu, yitutumikidiso yedumba lyewa, 9 mamanya goonikisi ntani nomamanya gamwe gokutura posikoverero sopomapepe ntani naga gokutura posininke soponturo.

10 “‘Navenye ava va kara noudivi mokatji keni va wize va ya rugane yininke nayinye eyi ana tu pangere Jehova. 11 Ayo kuna kara: nkongoronzugo notende zako ntani nosikudumikiso sako notuhake twako noyipirangi yako yokuvyukilira nonompigetji dako nonongundi dako notuvera twako tomakero; 12 sikesa noyitji yako nosikudumikiso sako ntani nekehe lyako lyepevero; 13 sitafura noyitji yako ntani noyiruganeso yako nayinye ntani nonomboroto dapo delikido; 14 uzweko woramba noyiruganeso yako ntani nonoramba dako nomagadi gomonoramba; 15 sizambero soyitutumikidiso yedumba lyewa noyitji yako, magadi gokugwavekesa noyitutumikidiso yedumba lyewa ntani nekehe lyepevero lyonkongoronzugo; 16 sizambero sononzambo deswakerero nosininke sako sokukangera songoporo noyitji yako ntani noyiruganeso yako, siyaha ntani nesi sokusitentekera; 17 makehe gemeharango nonongundi dako ntani notuvera twako tomakero; ekehe lyepevero lyeharango; 18 nombohwa demevhu dokonkongoronzugo ntani nonombohwa demevhu demeharango nomarugodi gako; 19 yidwara eyi va honza nawa yokuruganesa monkongoronzugo, yidwara yaArona youpristeli ntani neyi ngava dwara vana vendi ngovapristeli.’”

20 Makura Vaisraeli navenye tava tundu po pwaMosesa. 21 Ano nkenye ogu ga here kugava yigava yendi kutundilira komutjima, ta gava yigava yendi kwaJehova va yi ruganese konkongoronzugo* noyirugana yamo ntani va yi ruganese yikoverero youpristeli. 22 Vagara novakadi kwa wizire. Navenye kwa geve kutundilira komutjima yininke yoyiwa yokutura koyikoverero, yimbilingwa, nolinga ntani nayimwe. Awo kwa geve hena yininke yongorodo yokulisiga-siga. Navenye kwa geve nonzambo* dawo dongorodo kwaJehova. 23 Ntani navenye ava va kere nonongodi dosineguru nowanda wopurupuli nekehe lyegeha nekehe lyewa nonohuki doyikombo noyipapa yononzwi* eyi va kwita ruvara rorugeha ntani noyipapa yoyikorama,* tava yi reta. 24 Navenye ava va here kugava sisiliveli nongoporo, tava yi gava kwaJehova. Ano ava va kere noyitji yomusu yokuruganesa nkenye sirugana somonkongoronzugo, tava yi reta.

25 Vakadi navenye ava va divire kurugana nongodi, tava reta eyi va rugene. Ayo kuna kara: nongodi dosineguru, wanda wopurupuli, makehe gomageha ntani makehe gomawa. 26 Ntani vakadi navenye woudivi ava va kere neharo kwa rugene nongodi donohuki doyikombo.

27 Masimbi kwa retere mamanya goonikisi nomamanya gamwe gokutura posikoverero sopomapepe ntani naga gokutura posininke soponturo, 28 nobalisemu nomagadi gomonoramba nomagadi gokugwavekesa ntani noyitutumikidiso yedumba lyewa. 29 Vagara novakadi navenye woVaisraeli ava va here kugava, kwa geve mauhwi gawo kwaJehova yipo va kwatese ko sirugana esi gava pere Jehova kupitira mwaMosesa.

30 Makura Mosesa ta tantere Vaisraeli asi: “Jehova ana horowora Besareli munaUli, Uli munaHuru gomorudi rwaJuda. 31 Karunga ana mu zwida mpepo zendi ezi zina mu pe unongo nonondunge noudivi wankenye sirugana 32 sokufaneka yininke yoyiwa ntani sokuruganesa ngorodo, sisiliveli nongoporo, 33 sokuteta mamanya neyi yokutura mamanya ogo ntani nokuhonga yininke yoyiwa yokulisiga-siga. 34 Ntani Karunga ana pe Besareli naOholiyaba udivi wokuronga vakwawo. Oholiyaba munaAhisamaki gomorudi rwaDana. 35 Karunga ana va pe udivi wokuhonga nokufaneka pomakehe nokuhonza pokuruganesa nongodi dosineguru, wanda wopurupuli, ekehe lyegeha ntani nekehe lyewa. Vagara ava ngava rugana nkenye sirugana ntani nokufaneka nkenye eyi.

36 “Besareli nga rugana kumwe naOholiyaba ntani novagara ava ga pa Jehova unongo nonondunge, yipo va vhure kurugana yininke nayinye yomonkongoronzugo ngamoomu ga yi tanta Jehova.”

2 Mosesa makura ta zigida Besareli naOholiyaba ntani novagara navenye ava ga pere Jehova unongo ntani navenye ava va kere neharo lyokuvatera noyirugana. 3 Makura awo tava gusa eyi va geve Vaisraeli kwaMosesa yokudikisa nkongoronzugo, nye vantu kwa twikilire kugava yigava yokutundilira komutjima nkenye ngurangura.

4 Ano apa va tamekere nosirugana sokupongoka, vagara navenye ava va kere noudivi kwa twikilire kuwiza, 5 ntani awo kwa tanterere Mosesa asi: “Vantu kuna kureta yininke yoyinzi kupitakana eyi tuna hepa mokurugana eyi ga tu pangera Jehova.” 6 Mosesa yipo ga geve mpangera va divise mokamba asi: “Hagekeni kureta yigava yokudikisa nkongoronzugo.” Kutunda opo, vantu kwa va hagekesere kureta yigava. 7 Yigava oyo kwa kere yoyinzi kupitakana eyi va hepere mokusikisa mo yirugana.

8 Yipo nye, varugani navenye ava va kere noudivi kwa rugene nkongoronzugo nomakehe murongo gomawa aga va honza nonongodi dosineguru nowanda wopurupuli nekehe lyegeha. Pomakehe ogo kwa honzerere po vakerubi. 9 Makehe nagenye monaure kwa kere nometa 12,4* ano monompatji koyiha yonometa 1,7.* Makehe ogo nagenye kwa hetakanene. 10 Makura Besareli ta honzo kumwe makehe gatano ntani ta rugana hena yokulifana komakehe makwawo gatano. 11 Makura ta honzere ko makero gonongodi dosineguru kouhura wekehe limwe apa nali ligwanekera nekwawo. Age kwa rugene hena yokulifana kouhura wekehe ekwawo apa naga ligwanekera. 12 Age kwa honzerere ko makero 50 kouhura womakehe ogo gavali apa ngaga ligwanekera, yipo makero ogo ga livyuke. 13 Age kwa rugene hena tuhake 50 tongorodo nokugwanekedesa makehe ogo notuhake yipo li kare ekehe limwe tupu lyonkongoronzugo.

14 Age kwa rugene hena makehe gonohuki doyikombo gokutura peguru lyonkongoronzugo. Age kwa rugene makehe 11. 15 Makehe nagenye monaure kwa sikire ponometa 13,3* ntani monompatji koyiha yonometa 1,7.* Makehe nagenye 11 kwa hetakanene. 16 Makura ta honzo makehe gatano kumwe ntani makehe gokukwama ko ntazimwe nago kwa ga honzere kumwe. 17 Makura ta honzere makero 50 kouhura wekehe limwe ntani makero 50 kouhura wekehe ekwawo pevango apa naga ligwanekerera. 18 Ntani ta rugana tuhake 50 tongoporo toku gwanekedesa makehe ogo, yipo li kare ekehe limwe lyonkongoronzugo.

19 Age kwa rugene sikudumikiso sokonkongoronzugo soyipapa yononzwi* eyi va kwita ruvara rorugeha ntani sikudumikiso soyipapa yoyikorama* sokutura kontunda zonkongoronzugo.

20 Ntani age kwa ruganene konkongoronzugo yipirangi yokuvyukilira yoyitji yomusu. 21 Nkenye sipirangi sokuvyukilira, momusika kwa sikire ponometa 4,4* ano monompatji nosentimeta 66,7.* 22 Kwankenye sipirangi sokuvyukilira kwa kere ko tuninke tuvali tokudunda otu twa livyukire. Ngesi yimo va rugene yipirangi nayinye yokuvyukilira yokonkongoronzugo. 23 Yipo nye, koMbindakano zonkongoronzugo, age kwa ruganene ko yipirangi 20 yokuvyukilira. 24 Age hena kwa rugene tuvera tomakero 40 tosisiliveli tokutura konhi zoyipirangi 20 yokuvyukilira. Konhi zankenye sipirangi sokuvyukilira kwa tulire ko tuninke tuvali tokudunda otu ngatu hwilire motuvera tuvali tomakero. 25 Ntani koMuzogo gonkongoronzugo, age kwa ruganenene ko yipirangi 20 yokuvyukilira 26 ntani tuvera twako tomakero 40 tosisiliveli. Konhi zankenye sipirangi sokuvyukilira, kwa tulire ko tuvera tomakero tuvali tosisiliveli.

27 Ano konyima zonkongoronzugo koyiha yoUtokero, kwa ruganene ko yipirangi ntazimwe yokuvyukilira. 28 Ta rugana hena yipirangi yivali yokuvyukilira yipo yi kare komakovhu gokonyima zonkongoronzugo. 29 Age kwa tulire yipirangi oyo yivali kumwe kutundilira pevhu dogoro keguru kolinga zokuhova. Ngesi yimo ga yi rugene yipirangi oyo yivali yokomakovhu. 30 Moruhura, age kwa rugene yipirangi ntantatu yokuvyukilira notuvera twako 16 tomakero tosisiliveli. Konhi zankenye sipirangi sokuvyukilira, kwa kere ko tuvera tuvali tomakero tosisiliveli.

31 Age kwa rugene nompigetji ntano domusu dokutura koyipirangi yokuvyukilira eyi ya kere koruha rumwe ronkongoronzugo 32 ntani nompigetji ntano dokutura koyipirangi yokuvyukilira eyi ya kere koruha rumwe ronkongoronzugo ntani nompigetji ntano dokutura koyipirangi yokuvyukilira eyi ya kere konyima zonkongoronzugo koUtokero wazo. 33 Mpigetji ezi za kere pokatji koyipirangi yokuvyukilira kwa repere kutundilira koruha rumwe dogoro koruha rukwawo. 34 Age kwa kwitire yipirangi yokuvyukilira nongorodo ntani nokuruganena ko nolinga dongorodo mokuzweka nompigetji ntani nompigetji odo kwa di kwitire ngorodo.

35 Makura ta honzo ekehe nonongodi dosineguru nowanda wopurupuli nekehe lyegeha ntani nekehe lyewa. Age kwa honzerere po vakerubi. 36 Ntani age kwa ruganenene ko nongundi ne doyitji yomusu edi va kwitire nongorodo noyinkongo yako yongorodo nokutura ko tuvera tune tomakero tosisiliveli. 37 Makura ta rugana ekehe lyepevero lyonkongoronzugo eli va honzere nonongodi dosineguru nowanda wopurupuli nekehe lyegeha nekehe lyewa, 38 ntani nonongundi dako ntano noyinkongo yako. Age kwa kwitire ko ngorodo keguru lyado ntani nokonolinga dado. Nye tuvera twako tutano tomakero kwa kere tongoporo.

37 Besareli makura ta rugana sikesa noyitji yomusu, monaure aso kwa kere nometa 1,1* monompatji nosentimeta 66,7* ano momusika gwaso nosentimeta 66,7.* 2 Age kwa si kwitire nongorodo zene-zene monda nokontunda ntani kwa ruganene ko rugodi rongorodo rokudingira keguru lyosikesa. 3 Konyima, age kwa rugene nolinga ne dongorodo dokutura komaguru gane gosikesa. Age kwa tulire ko nolinga mbali komaruha gaso gavali. 4 Age kwa hongere hena yitji yomusu nokuyikwita ngorodo. 5 Makura ta zweke yitji oyo monolinga edi da kara konontere dosikesa yipo vantu ngava kwatere ko pokusidamuna.

6 Age kwa ruganene ko sikudumikiso songorodo zene-zene, monaure kwa kere nometa 1,1* ano monompatji nosentimeta 66,7.* 7 Makura ta hambura vakerubi vavali wongorodo, ta va tura kouhura wosikudumikiso sosikesa. 8 Mukerubi gumwe kwa kere koruha rumwe, ano mukerubi mukwawo kwa kere koruha rukwawo. Age kwa tulire vakerubi kouhura wosikudumikiso sosikesa. 9 Vakerubi owo vavali kwa zerwire mavava gawo meguru yipo va kudumike sikesa nomavava gawo ntani yipara yawo kwa lipirukilire noku nyongamena posikudumikiso.

10 Age kwa hongere sitafura sositji somusu, monaure kwa kere nosentimeta 89,* monompatji nosentimeta 44,5* ntani momusika nosentimeta 66,7.* 11 Aso kwa si kwitire nongorodo zene-zene ntani kwa ruganene ko rugodi rongorodo rokudingira ko. 12 Kutunda opo, ta ruganene ko sipirangi sokusika pounene wewoko* sokutura keguru lyositafura komaruha gaso gane, ano kosipirangi ta ruganene ko rugodi rongorodo rokudingira ko. 13 Age ta ruganene kositafura nolinga ne dongorodo nokutura nolinga odo komakovhu gaso gane apa ga tamekera maguru gaso. 14 Nolinga odo kwa di tulire pepi nosipirangi yipo va zweke mo yitji yokudamwisa sitafura. 15 Makura ta hongo yitji yomusu nokuyikwita ngorodo yipo ngayi kare yokudamwisa sitafura. 16 Age ta rugana yiruganeso yongorodo zene-zene eyi ngava tura positafura. Ayo kuna kara: marupasa nononkinda ntani nonkinda dononene yononzambo doyikunwa.

17 Makura ta rugana uzweko woramba nongorodo zene-zene. Age kwa u hambwire, edi lyako nomutayi gwako gopokatji nononkinda dako nonombya dako dokudumata nedi dokutemuna kwa yi rugene kosininke simwe. 18 Konontere domutayi gopokatji kwa kere ko nomutayi ntazimwe, korumoho nomutayi ntatu ano korulyo nomutayi ntatu. 19 Konomutayi dokorulyo kwa kere ko nonkinda ntatu dokufana ngwendi nombya ntani nonombya dokudumata nedi dokutemuna. Ano nomutayi dokorumoho nado yimo da fene ngorooro. Yimo ngesi ga rugene nomutayi ntazimwe edi da tundire pomutayi gopokatji. 20 Mutayi gopokatji gouzweko woramba kwa kere ko nonkinda ne dokufana ngwendi nombya ntani nombya dokudumata nedi dokutemuna. 21 Konhi zonomutayi mbali dokuhova edi da tundire pomutayi gopokatji kwa kere ko mbya zokudumata, ano konhi zonomutayi mbali dokukwama ko nako ngosikwawo ntani konhi zonomutayi dokukwama ko nako ngosikwawo. Ngesi yimo ga rugene nomutayi edi da tundire pomutayi gopokatji gouzweko woramba. 22 Nombya dokudumata nonomutayi ntani nouzweko naunye woramba kwa u rugene kosininke simwe tupu songorodo ezi va hambwire. 23 Age kwa rugene hena noramba dako ntambali, yininke yako yokudimisisa mundiro ntani noyipana yomundiro. Age kwa yi rugene kongorodo zene-zene. 24 Age kwa rugene uzweko woramba noyiruganeso yako nongorodo zene-zene zonokilograma 34.*

25 Age kwa rugene sizambero noyitji yomusu sokuhwikira yitutumikidiso yedumba lyewa. Aso kwa hetakanene komaruha nagenye gane, monaure nosentimeta 44,5* monompatji nosentimeta 44,5* ano momusika nosentimeta 89* ntani nombinga dako kwa di rugene kosininke simwe nosizambero. 26 Age kwa si kwitire ngorodo zene-zene keguru lyaso nokomaruha gaso nagenye nokonombinga daso ntani age kwa rugene rugodi rongorodo nokurudingira keguru lyosizambero. 27 Age kwa rugene nolinga mbali dongorodo edi ga tulire komaruha gavali gosizambero konhi zorugodi rongorodo, yipo va zweke mo yitji eyi va ruganesere pokusidamuna. 28 Konyima, age kwa hongere yitji yomusu nokuyikwita ngorodo. 29 Age kwa rugene magadi gokupongoka gokugwavekesa noyitutumikidiso yedumba lyewa eyi va vhonga nawa.

38 Age kwa rugene sizambero sononzambo deswakerero noyitji yomusu. Aso kwa hetakanene komaruha nagenye, monaure nometa 2,2* monompatji nometa 2,2* ano momusika nometa 1,3.* 2 Age kwa tulire ko nombinga komakovhu gaso gane. Ado kwa di rugene kosininke simwe tupu nosizambero ntani age kwa si kwitire nongoporo. 3 Konyima, age kwa rugene yiruganeso yokosizambero: tuyiga, yihupuro, marupasa nonoforoko ntani yipana yokusimbira mundiro. Yiruganeso nayinye oyo kwa yi rugene nongoporo. 4 Age kwa ruganene ko sininke sokukangera nokusitura konhi zosipirangi sokosizambero dogoro tasi ka sika pokatji kosizambero. 5 Age kwa tulire nolinga ne komakovhu gane gosizambero pepi nosininke sokukangera songoporo, yipo va zweke mo yitji. 6 Konyima, ta hongere ko yitji yomusu nokuyikwita ngoporo. 7 Makura ta yi zweke monolinga edi da kere monontere dosizambero yipo ngava yi ruganese pokusidamuna. Age kwa rugene sizambero noyipirangi ano monda kapi mwa kere yuma.

8 Ntani age kwa rugene siyaha songoporo nosininke songoporo sokusitentekera. Age kwa ruganesere nontarero dovakadi ava ngava rugana pevero lyonkongoronzugo.*

9 Age kwa rugene eharango, ano koMbindakano zeharango kwa ruganenene ko makehe gomawa gokusika ponometa 44,5.* 10 Ako kwa kere ko nongundi 20 notuvera 20 tomakero tongoporo ntani noyinkongo yokonongundi nonolinga dako dosisiliveli. 11 KoMuzogo kwa kere ko makehe gokusika ponometa 44,5* nonongundi dako 20 notuvera twako 20 tomakero tongoporo. Yinkongo yako nonolinga dako kwa kere yosisiliveli. 12 Ano koUtokero kwa kere ko makehe gokusika ponometa 22,2* ntani kwa kere ko nongundi murongo notuvera tomakero murongo. Yinkongo yako nonolinga dako kwa kere yosisiliveli. 13 Eharango lyokoUpumezuva wonkongoronzugo, monompatji kwa kere nometa 22,2.* 14 Koruha rumwe rwevero kwa kere ko makehe gonometa 6,6* nonongundi ntatu ntani notuvera tutatu tomakero. 15 Ano koyiha yimwe yevero lyekeharango nako kwa tulire ko makehe gonometa 6,6* nonongundi ntatu ntani notuvera tutatu tomakero. 16 Makehe nagenye aga ga kundurukidire eharango kwa kere makehe gomawa. 17 Tuvera tomakero otu va tulire konongundi kwa kere tongoporo, ano yinkongo yokonongundi nonolinga dako kwa kere dosisiliveli. Keguru lyonongundi kwa kwitire ko sisiliveli ntani kwa tulire ko yininke yokumangesa yosisiliveli konongundi nadinye demeharango.

18 Ekehe lyepevero lyeharango kwa li honzere nonongodi dosineguru nowanda wopurupuli nekehe lyegeha ntani nekehe lyewa. Monaure kwa kere nometa 8,9* momusika nometa 2,2.* Musika gwalyo kwa hulire pomakehe aga ga kundurukidire eharango. 19 Nongundi dako ne notuvera twako tune tomakero kwa kere tongoporo. Yinkongo yako ntani nonolinga dako kwa kere dosisiliveli ano keguru lyonongundi kwa kwitire ko sisiliveli. 20 Nombohwa nadinye demevhu dokonkongoronzugo ntani nedi dekeharango kwa kere dongoporo.

21 Mosesa kwa geve mpangera va varure yininke eyi va tungisire nkongoronzugo omu mwa kara madiworokeso; Varevhi yiwo va rugene sirugana esi mepitisiro lyaItamara munaArona gomupristeli. 22 Besareli munaUli, Uli munaHuru gomorudi rwaJuda kwa rugene nayinye eyi ga pangerere Jehova Mosesa. 23 Age kwa mu vaterere Oholiyaba munaAhisamaki gomorudi rwaDana, ogu ga divire kuhonga nokuhonza nongodi dosineguru, wanda wopurupuli nekehe lyegeha ntani nekehe lyewa.

24 Ngorodo nazinye ezi va ruganesere kosirugana sokupongoka kwa hulire pongorodo zonokilograma 1 000* zonzambo zelikido kuliza noyisiliveli yekevango lyokupongoka. 25 Sisiliveli esi va geve Vaisraeli ava va litjangesere kwa hulire ponokilograma 3 440* kuliza noyisiliveli yekevango lyokupongoka. 26 Nkenye Muisraeli ogu ga litjangesere gonomvhura 20 yi kandwise kwa retere nograma ntazimwe* dosisiliveli, kuliza noyisiliveli yekevango lyokupongoka ntani sivaro sawo kwa sikire 603 550.

27 Tuvera tomakero tokonkongoronzugo ntani notuvera tomakero tokomakehe kwa hulire ponokilograma 3 420.* Nkenye kavera komakero kwa hulire ponokilograma 34,2* yipo nye, tuvera tomakero 100 kwa hulire ponokilograma 3 420. 28 Monokilograma 20 dosisiliveli,* age kwa rugene yinkongo yokonongundi nokukwita keguru lyado ntani ta di tura kumwe.

29 Ngoporo ezi va geve kwa hulire ponokilograma 2 420.* 30 Age kwa ruganesere ngoporo ozo a rugane tuvera tomakero twepevero lyonkongoronzugo nosizambero songoporo nosininke sako sokukangera songoporo noyiruganeso nayinye yokosizambero, 31 tuvera tomakero twemeharango, tuvera tomakero twepevero lyeharango, nombohwa nadinye demevhu dokonkongoronzugo nedi demeharango.

39 Awo kwa ruganesere nongodi dosineguru nowanda wopurupuli nekehe lyegeha mokuhonza yidwara yokuruganesa mevango lyokupongoka. Awo kwa rugene yidwara yaArona yokupongoka ngwendi moomu Jehova ga yi pangerere Mosesa.

2 Besareli kwa rugene sikoverero sopomapepe kongorodo nonongodi dosineguru nowanda wopurupuli nekehe lyegeha ntani nekehe lyewa. 3 Varugani kwa hambwire ngorodo nokuziteta zi kare ngwendi marugodi, yipo va zi ture kumwe nonongodi dosineguru nowanda wopurupuli nekehe lyegeha ntani nekehe lyewa. Sikoverero sopomapepe kwa si honzere. 4 Awo kwa honzerere po yininke yivali yopomapepe yokugwanekedesa ruha rokonyima ntani noru rokomeho rosikoverero sopomapepe. 5 Ano liva oru va honzera kosikoverero sopomapepe rokulimangesa kwa ru rugene noyininke yokulifana: ngorodo nongodi dosineguru nowanda wopurupuli nekehe lyegeha ntani nekehe lyewa ngwendi moomu Jehova ga yi pangerere Mosesa.

6 Makura ta tura mamanya goonikisi moyininke yongorodo nokutjanga po* madina govana vaIsraeli ngwendi moomu ava tjanga posinongweneso. 7 Makura ta yi tura pomapepe goposikoverero sopomapepe, yipo yi kare sidiworokeso kovana vaIsraeli ngwendi moomu Jehova ga yi pangerere Mosesa. 8 Makura ta rugana sininke soponturo. Aso kwa sihonzere ngwendi sikoverero sopomapepe pokuruganesa ngorodo, nongodi dosineguru, wanda wopurupuli, ekehe lyegeha ntani nekehe lyewa. 9 Nsene vana si peteke, aso kwa hetakanene komaruha nagenye ntani kwa hulire koyiha yonosentimeta 22* monaure nomonompatji. 10 Varugani kwa tulire po nomukweyo ne domamanya. Mukweyo gokuhova kwa kere mo: emanya lyorubini, lyotopasi ntani lyoemeralidi. 11 Mukweyo gwauvali kwa kere mo: emanya lyosinamahako neli lyosafire ntani lyojasipesi. 12 Mukweyo gwautatu kwa kere mo emanya lyolesh′em,* lyoakate ntani lyoametisi. 13 Momukweyo gwaune kwa kere mo emanya lyokilisolite, lyoonikisi ntani lyojade. Ago kwa ga zwekere moyininke yongorodo. 14 Mamanya ogo kwa karerere po madina govana vaIsraeli 12. Nkenye emanya kwa tjenge po edina limwe lyomazimo goVaisraeli 12. Ago kwa ga tjenge ngwendi moomu ava tjanga posinongweneso.

15 Makura tava rugana tuuketanga tokupoha ngwendi marugodi gongorodo zene-zene, tava tu tura kosininke soponturo. 16 Awo tava rugana hena yininke yivali yongorodo yokutura mamanya nonolinga mbali dongorodo nokutura nolinga odo komakovhu gekeguru gosininke soponturo. 17 Konyima, tava tura tuuketanga tuvali monolinga mbali dokomakovhu gekeguru gosininke soponturo. 18 Makura tuuketanga oto tava tu tura hena poyininke yongorodo eyi ya kara pomapepe gosikoverero sopomapepe. 19 Awo tava rugana hena nolinga mbali dongorodo nokuditura monda zosininke soponturo komakovhu gaso gepevhu, yipo nolinga di pirukire sikoverero sopomapepe. 20 Komeho zosikoverero sopomapepe tava ruganene ko hena nolinga mbali dongorodo nokuditura peguru lyoliva oru va honzera ko, yipo di livyuke nomapepe gaso. 21 Konyima, tava manga sininke soponturo monolinga daso nongodi zosineguru monolinga doposikoverero sopomapepe, yipo sininke soponturo si kare pevega limwe peguru lyoliva ngwendi moomu Jehova ga yi pangerere Mosesa.

22 Makura ta rugana hena hema zomawoko gomasupi zokudwara konhi zosikoverero sopomapepe ezi va honzere nonongodi dosineguru. 23 Keguru lyohema ozo zomawoko gomasupi kwa tulire ko nsingo ntani konontere donsingo kwa honzere ko ngwendi moomu va honza yikoverero yovakwayita, yipo zi dire kutauka usimbu. 24 Ano kouhura wohema zomawoko gomasupi kwa tulire ko yininke yokufana ngwendi pomegaranate. Varugani kwa yi rugene nonongodi dosineguru nowanda wopurupuli ntani nekehe lyegeha eyi va honza kumwe. 25 Awo kwa ruganenene ko hena tungenzo tongorodo zene-zene nokututura pokatji konopomegaranate tu likwame ngorooro kouhura wohema zomawoko gomasupi. 26 Awo kwa honzere kohema zomawoko gomasupi ngenzo nopomegaranate nokuyikwamesa ngorooro. Hema ozo ngava zi ruganesa vapristeli ngwendi moomu Jehova ga yi pangerere Mosesa.

27 Awo hena kwa honzere erwakani lyaArona nekehe lyewa ntani naga govana vendi wovagara, 28 nembare eli va honza nekehe lyewa neyi yokudwara komutwe eyi va honza nekehe lyewa ntani nokotje* edi va honza kekehe lyewa, 29 ntani ekehe lyomombunda eli va honza kekehe lyewa nonongodi dosineguru nowanda wopurupuli nekehe lyegeha, ngwendi moomu Jehova ga yi pangerere Mosesa.

30 Awo kwa rugene sivera sokupongoka* songorodo zene-zene nokutjanga po ngwendi moomu ava tjanga posinongweneso. Awo kwa tjenge po asi: “Jehova kwa pongoka.” 31 Awo kwa tulire ko ngodi zosineguru yipo va si ture komeho zembare ngwendi moomu Jehova ga yi pangerere Mosesa.

32 Yipo nye, awo kwa mene yirugana nayinye yonkongoronzugo* ndi tende zokupongera. Vaisraeli kwa rugene nayinye eyi ga pangerere Jehova Mosesa. Awo kwa rugene moomu va va tanterere.

33 Makura tava twara yininke yonkongoronzugo noyiruganeso yako kwaMosesa: tuhake twako noyipirangi yako yokuvyukilira nonompigetji dako nonongundi dako ntani notuvera twako tomakero; 34 sikudumikiso sako soyipapa yononzwi* eyi va kwita ruvara rorugeha, sikudumikiso sako soyipapa yoyikorama,* ekehe lyepevero; 35 sikesa somadiworokeso noyitji yako ntani nosikudumikiso sako; 36 sitafura noyiruganeso yapo nayinye ntani nomboroto zelikido; 37 uzweko woramba wongorodo zene-zene nonoramba dako nonoramba edi va tura momukweyo noyiruganeso yako nayinye ntani nomagadi gomonoramba; 38 sizambero songorodo, magadi gokugwavekesa, yitutumikidiso yedumba lyewa, ekehe lyepevero lyonkongoronzugo; 39 sizambero songoporo, sininke sako sokukangera songoporo noyitji yako noyiruganeso yako nayinye nosiyaha ntani nosininke sokusitentekera; 40 makehe gemeharango nongundi dako notuvera twako tomakero nekehe lyepevero lyeharango nomarugodi gako ntani nonomboha dako demevhu noyiruganeso nayinye yomonkongoronzugo ndi tende zokupongera; 41 yidwara eyi va honza nawa yokuruganesa monkongoronzugo, yidwara yaArona youpristeli ntani neyi ngava dwara vana vendi ngovapristeli.

42 Vaisraeli kwa rugene yirugana nayinye kuliza nomu Jehova ga yi pangerere Mosesa. 43 Apa Mosesa ga konakonene eyi va rugene, age kwa dimbwilire asi awo kwa rugene moomu ga yi pangerere Jehova, makura Mosesa ta va tungike.

40 Makura Jehova ta tantere Mosesa asi: 2 “Mezuva lyokuhova lyokwedi kokuhova, wa hepa kudika nkongoronzugo ndi tende zokupongera. 3 Wa hepa kutura mo sikesa somadiworokeso makura o vive ko nekehe. 4 Wa hepa kuhwilida mo sitafura nokutura nawa yiruganeso yapo ntani ngo hwilide uzweko woramba nokutemesa noramba dako. 5 Makura ngo ture mo sizambero songorodo soyitutumikidiso yedumba lyewa komeho zosikesa somadiworokeso ntani nokutura ko ekehe lyepevero lyonkongoronzugo.

6 “Ngo ture sizambero sononzambo deswakerero komeho zevero lyonkongoronzugo ndi tende zokupongera, 7 ntani ngo ture siyaha pokatji konkongoronzugo nosizambero nokutura po mema. 8 Ngo ture ko makehe keharango ntani nokutura pevero lyekeharango ekehe. 9 Ngo guse magadi gokugwavekesa o gwaveke nkongoronzugo nanayinye eyi ya kara mo ntani nokuzipongora noyiruganeso yamo nayinye, yipo zi pongoke. 10 Ngo gwaveke sizambero sononzambo deswakerero noyiruganeso yapo ntani nokupongora sizambero, yipo ngasi kare sizambero sokupongokerera. 11 Ntani ngo gwaveke siyaha nosininke sako sokusitentekera ntani nokusipongora.

12 “Konyima, ngo rete Arona novana vendi wovagara pepi nevero lyonkongoronzugo, yipo ngo va kuhwe nomema. 13 Makura ngo dwareke Arona yidwara yokupongoka ntani ngo mu gwaveke nokumupongora, yipo a ruganene nge ngomupristeli. 14 Konyima, ngo rete vana vendi pepi nokuvadwareka marwakani. 15 Ngo va gwaveke ngwendi moomu ngo gwaveka guhyawo yipo ngava ruganene nge ngovapristeli. Awo ngava twikira kukara vapristeli noruvharo rwawo rokomeho, morwa wa va gwaveka.”

16 Mosesa ta rugana nayinye eyi ga mu pangerere Jehova kuliza nomu ga yi mu pangerere.

17 Nkongoronzugo kwa zi dikire momvhura zauvali mokwedi kokuhova mezuva lyokuhova. 18 Apa ga dikire Mosesa nkongoronzugo, age kwa tulire tuvera tomakero pevhu, ta dike yipirangi yokuvyukilira nokuzweka nompigetji monolinga ntani ta dike nongundi. 19 Age kwa tulire makehe keguru lyonkongoronzugo nokutura ko yikudumikiso ngwendi moomu ga yi mu pangerere Jehova.

20 Konyima, ta gusa mamanya aga va tjanga madiworokeso, taga tura mosikesa makura ta tura ko sikudumikiso kosikesa. 21 Ta hwilida sikesa monkongoronzugo makura ta tura ko ekehe lyokuviva sikesa somadiworokeso ngwendi moomu Jehova ga yi pangerere Mosesa.

22 Makura ta hwilida sitafura monkongoronzugo koruha rokoMuzogo pepi nekehe,* 23 ta tura nawa nomboroto positafura komeho zaJehova ngwendi moomu Jehova ga yi pangerere Mosesa.

24 Makura ta hwilida uzweko woramba monkongoronzugo nokuutura komeho zositafura koMbindakano zonkongoronzugo. 25 Age ta temesa noramba komeho zaJehova ngwendi moomu Jehova ga yi pangerere Mosesa.

26 Ntani ta tura hena sizambero songorodo monkongoronzugo komeho zekehe,* 27 yipo va hwikire po yitutumikidiso yedumba lyewa ngwendi moomu Jehova ga yi pangerere Mosesa.

28 Makura age ta tura ko ekehe lyepevero lyonkongoronzugo.

29 Makura ta tura sizambero sononzambo deswakerero komeho zevero lyonkongoronzugo ndi tende zokupongera, yipo a zambere po nonzambo deswakerero nedi dombuto ngwendi moomu Jehova ga yi pangerere Mosesa.

30 Makura ta tura siyaha pokatji konkongoronzugo nosizambero nokutura po mema gokulikuhwisa. 31 Mosesa naArona novana vendi wovagara yipo ngava likuhwire mawoko nonompadi dawo posiyaha oso. 32 Nkenye apa ngava hwilire monkongoronzugo ndi tava hedere pepi nosizambero, awo ngava likuhu ngwendi moomu Jehova ga yi pangerere Mosesa.

33 Ntani ta tura ko makehe keharango lyonkongoronzugo nosizambero nokutura ko ekehe lyepevero lyekeharango.

Makura Mosesa ta mana kurugana nayinye. 34 Makura eremo tali kudumike nkongoronzugo, ano uyerere waJehova tau zwida nkongoronzugo. 35 Mosesa kapi ga vhulire kuza monkongoronzugo, morwa eremo kwa twikilire kukara kooko ntani uyerere waJehova kwa zwidire nkongoronzugo.

36 Apa ngali tundu eremo keguru lyonkongoronzugo, Vaisraeli ngava dirura kamba zawo morugendo rwawo. 37 Nye apa eremo ngali dili kutunda ko keguru lyonkongoronzugo, awo kapi ngava dirura kamba zawo dogoro ezuva eli ngali tundu ko eremo. 38 Eremo lyaJehova kwa kere konkongoronzugo mutenya, ano masiku kwa lisintunukire mundiro. Vaisraeli kwa mwene eremo eli morugendo rwawo narunye.