LEVITIKUS

1 Jehova kwa zigidire Mosesa, makura ta uyunga nage konkongoronzugo* asi: 2 “Tantera Vaisraeli* asi: ‘Nsene gumwe ta gava simuna kwaJehova ngonzambo, ga hepa kugava ngombe ndi nzwi ndi sikombo.

3 “‘Nsene ta gava ngombe ngonzambo zeswakerero, ga hepa kugava ntwedu zokukanguka. Age ga hepa kuzigava kwaJehova kutundilira komutjima pevero lyonkongoronzugo. 4 Age a kambeke kuwoko kwendi pomutwe gonzambo zeswakerero, makura Karunga nga tambura nzambo ozo nokumugusira po.

5 “‘Makura ngava zi dipagere komeho zaJehova, ano vana vaArona wovagara wovapristeli ngava gave honde ozo nokuzinagera komaruha nagenye gosizambero esi sa kara pevero lyonkongoronzugo. 6 Simuna esi ngava gava ngonzambo zeswakerero, va hepa kusihuva nokusitetagura. 7 Vana vaArona wovagara wovapristeli, va hepa kureta makara gomundiro posizambero nokutura nawa yitare pomundiro. 8 Awo va hepa kutura nawa nyama ezi vana tetagura kumwe nomutwe ntani nomagadi poyitare eyi yina kara posizambero. 9 Yininke yazo yomonda nomaguru gazo, va hepa kuyikuhwa nomema, ano mupristeli ga hepa kuyihwika nayinye yipo musi gwayo gu tutumukire posizambero ngonzambo zeswakerero ezi ngazi gava edumba lyewa lyokuhafesa Jehova.

10 “‘Nsene ta gava nzwi ndi sikombo ngonzambo zeswakerero, aso sa hepa kukara sosigara sokukanguka. 11 Aso va hepa kusidipagera komeho zaJehova koMuzogo gosizambero, ano vana vaArona wovagara wovapristeli ngava nagera honde zaso komaruha nagenye gosizambero. 12 Va hepa kusitetagura nokusitura kumwe nomutwe gwaso nomagadi gaso, ano mupristeli nga yi tura nawa poyitare eyi yina kara posizambero. 13 Yininke yomonda ntani maguru va hepa kuyikuhwa nomema, ano mupristeli ga hepa kuyihwika nayinye, yipo musi gwayo gu tutumukire posizambero. Azo nzambo zeswakerero zokuhwika ezi ngazi gava edumba lyewa lyokuhafesa Jehova.

14 “‘Nye nsene ta gava yidira ngonzambo zeswakerero kwaJehova, ga hepa kugava nonkutji ndi nomputukuwagona. 15 Mupristeli ga hepa kutura sidira posizambero, makura a si keke nakauke ponsingo zaso nokusihwika yipo musi gwaso gu tutumukire posizambero, nye honde zaso va hepa kuzininka zi zozere koruha rumwe rosizambero. 16 Age ga hepa kusigusa siliro nonohunga daso, makura va yi zugumine koruha rumwe rosizambero koyiha yoUpumezuva oku ava tura enoto.* 17 Age ga hepa kusitaura pomavava gaso va hana kusihangura pavali. Makura mupristeli ta si tura poyitare eyi yina kara posizambero nokusihwika, yipo musi gwaso gu tutumukire posizambero. Azo nzambo zeswakerero zokuhwika ezi ngazi gava edumba lyewa lyokuhafesa Jehova.

2 “‘Nsene gumwe ta gava nzambo zombuto kwaJehova, ga hepa kugava usura wouwa ntani ga hepa kutjira po magadi nokutura po manganganga gokututumikidisa. 2 Makura ta u reta kovana vaArona wovagara wovapristeli, ano mupristeli ta gusa po ewoko limwe pousura ou va vhonga nomagadi ntani nomanganganga nagenye gokututumikidisa. Age makura ta u hwike posizambero ngosidiworokeso sonzambo nazinye. Azo nzambo zokuhwika ezi ngazi gava edumba lyewa lyokuhafesa Jehova. 3 Nkenye eyi ngayi hupa ko konzambo zombuto, ngayi kara yaArona novana vendi wovagara, morwa ayo yininke yokupongoka unene eyi va gusa pononzambo dokuhwika edi ava gava kwaJehova.

4 “‘Nsene tomu gava nzambo zombuto ezi va kanga mesuga, za hepa kukara zousura wouwa, nomboroto dokuliudinga* dokudira yihaheso edi va vhonga nomagadi ndi yikuki yokudira yihaheso eyi va kwita nomagadi.

5 “‘Ano nsene nzambo zombuto kwa zi kanga posipana, azo za hepa kukara zousura wouwa wokudira yihaheso ou va vhonga nomagadi. 6 Va hepa kuzibomagura nokutjira po magadi. Azo nzambo zombuto.

7 “‘Nsene nzambo zombuto kwa zi kanga posipana, va hepa kuzirugana nousura wouwa ou va vhonga nomagadi. 8 Mwa hepa kureta kwaJehova nzambo zombuto ezi va ruganesa koyininke oyo noku zi gava komupristeli ogu nga zi twara pepi nosizambero. 9 Mupristeli makura nga gusa po ponzambo zombuto zi kare sidiworokeso sonzambo nazinye nokuzihwika yipo musi gu tutumukire posizambero. Azo nzambo zokuhwika ezi ngazi gava edumba lyewa lyokuhafesa Jehova. 10 Eyi ngayi hupa ko konzambo zombuto, ngayi kara yaArona novana vendi wovagara, morwa ayo yininke yokupongoka unene eyi va gusa pononzambo dokuhwika edi ava gava kwaJehova.

11 “‘Kapisi ngomu gave kwaJehova nzambo zombuto ezi za kara noyihaheso ntani kapisi ngomu gave yininke yokuhaha eyi va duva ndi usi ngonzambo zokuhwika kwaJehova.

12 “‘Kuvhura mu gave yininke oyo kwaJehova ngonzambo zonombuto edi mwa hova kuzangura, nye kapisi ngomu yi hwike posizambero yipo yi gave edumba lyewa lyokuhafesa.

13 “‘Nkenye nzambo zombuto ezi ngomu gava, mwa hepa kutura po mungwa ntani kapisi ngomu divare kugutura mo, yeeyi ago ngagu mu diworokesa egwanekero* lyaKarunga. Nonzambo deni nadinye edi ngomu gava, ngomu ture po mungwa.

14 “‘Nsene tomu gava kwaJehova nzambo zombuto zokuhova, mwa hepa kugava nombuto donompe dokukanga edi va twa usura-sura, ngonzambo zonombuto deni dokuhova. 15 Mwa hepa kutura po magadi nomanganganga gokututumikidisa. Azo nzambo zombuto. 16 Mupristeli nga gusa po usura umwe nomagadi ntani nomanganganga nagenye gokututumikidisa ayi hwike ngosidiworokeso sonzambo nazinye. Azo nzambo zokuhwika ezi ngava gava kwaJehova.

3 “‘Nsene gumwe ta gava ngombe ngonzambo zombili komeho zaJehova, zi kare asi zongara ndi zonkadi, ga hepa kugava zokukanguka. 2 Age ga hepa kukambeka kuwoko kwendi pomutwe gonzambo zendi, makura ngava zi dipagere pevero lyonkongoronzugo,* ano vana vaArona wovagara wovapristeli ngava nagere honde komaruha nagenye gosizambero. 3 Aga yigo maruha gonzambo zombili aga ngava gava kwaJehova ngonzambo zokuhwika: magadi aga ga kudumika yininke yomonda nomagadi nagenye aga ga kundurukida maura, 4 ntani nonongera mbali nomagadi gado. Age nga gusa ko hena magadi gekehuli kumwe nonongera. 5 Vana vaArona wovagara ngava yi hwika yipo musi gu tutumukire posizambero, peguru lyonzambo zeswakerero ezi zina kara poyitare. Azo nzambo zokuhwika ezi ngazi gava edumba lyewa lyokuhafesa Jehova.

6 “‘Nsene kuna kugava nzwi ndi sikombo ngonzambo zombili kwaJehova, yi kare asi sosigara ndi sosikadi, ga hepa kugava sokukanguka. 7 Nsene kuna kugava nzwigona zongara ngonzambo zendi, ga hepa kuzigava komeho zaJehova. 8 Age ga hepa kukambeka kuwoko kwendi pomutwe gonzambo zendi, makura ngava zi dipagere komeho zonkongoronzugo, ano vana vaArona wovagara ngava nagere honde zazo komaruha nagenye gosizambero. 9 Age nga gava magadi gokonzambo zombili ngonzambo zokuhwika kwaJehova. Age nga tete ko musira nagunye gomagadi kutamekera posisupa somugongo, magadi aga ga kudumika yininke yomonda ntani nomagadi nagenye aga ga kundurukida maura, 10 ntani nonongera mbali nomagadi gado. Age nga gusa ko hena magadi gekehuli kumwe nonongera. 11 Mupristeli nga yi hwika yipo musi gu tutumukire posizambero ngonondya.* Azo nzambo zokuhwika kwaJehova.

12 “‘Nsene kuna kugava sikombo, ga hepa kusigava komeho zaJehova. 13 Age ga hepa kukambeka kuwoko kwendi pomutwe gwaso, makura ngava si dipagere komeho zonkongoronzugo. Ano vana vaArona wovagara ngava nagere honde zaso komaruha nagenye gosizambero. 14 Maruha aga ngava gava ngonzambo zokuhwika kwaJehova kuna kara: magadi aga ga kudumika yininke yomonda ntani nomagadi nagenye aga ga kundurukida maura, 15 ntani nonongera mbali nomagadi gado. Age nga gusa ko hena magadi gekehuli kumwe nonongera. 16 Mupristeli nga yi hwika yipo musi gu tutumukire posizambero ngonondya.* Azo nzambo zokuhwika ezi ngazi gava edumba lyewa. Magadi nagenye kwa hamena kwaJehova.

17 “‘Kapisi ngomu lye magadi nkenye aga ndi nkenye honde. Ezi veta zokukarerera koruvharo rweni narunye nkenye oku ngomu tunga.’”

4 Jehova ta tantere hena Mosesa asi: 2 “Tantera Vaisraeli asi: ‘Nsene gumwe a zona ga hana kuyidivira pokurugana eyi ga silika Jehova, eyi yiyo nava rugana:

3 “‘Nsene mupristeli gomunene* a zona nokuretera vantu unzoni, ga hepa kugava ntwedugona zokukanguka kwaJehova ngonzambo zononzo morwa ana zono. 4 Age ga hepa kureta ntwedu pevero lyonkongoronzugo* komeho zaJehova, a kambeke kuwoko kwendi pomutwe gwazo ntani ga hepa kudipagera ntwedu ozo komeho zaJehova. 5 Makura mupristeli gomunene* nga guse honde zimwe zontwedu a zi tware monkongoronzugo; 6 age nga dove nyara zendi mohonde nokunagera honde zimwe yikando ntambali komeho zaJehova, komeho zekehe lyemevango lyokupongoka. 7 Mupristeli nga kwite hena honde zimwe konombinga dosizambero soyitutumikidiso yedumba lyewa, esi sa kara komeho zaJehova monkongoronzugo. Ano honde nazinye zontwedu zokuhupa ko, nga zi tjisire kedi lyosizambero sononzambo deswakerero, esi sa kara pevero lyonkongoronzugo.

8 “‘Age makura nga guse ko magadi nagenye gontwedu zonzambo zononzo, kukwatera mo magadi aga ga kudumika yininke yomonda ntani nomagadi aga ga kundurukida maura, 9 ntani nonongera mbali nomagadi gado. Age nga guse hena magadi gekehuli kumwe nonongera. 10 Age nga gusa ko yininke ngwendi yeeyi ga gusire kontwedu zonzambo zombili. Ano mupristeli nga yi hwika, yipo musi gwayo ngagu tutumukire posizambero sononzambo deswakerero.

11 “‘Nye sipapa sontwedu nonyama nazinye nomutwe gwazo nomaguru gazo ntani neyi yomonda nofwati zazo, 12 ga hepa kuyitwara ponze zokamba kevango lyokuzera oku ava zugumine enoto,* makura a ka yi hwike nomundiro. Ayo va hepa kuyihwikira oku ava zugumine enoto.

13 “‘Nsene mbunga nazinye zoVaisraeli zina kara nounzoni pokutura nzo va hana kuyidivira, nye awo kapi vana yi diva asi vantu kuna rugana yininke eyi ga silika Jehova, 14 makura nzo zi ya divikwe, awo va hepa kugava ntwedugona ngonzambo zononzo ntani va zi tware komeho zonkongoronzugo. 15 Masimbi gombunga ga hepa kukambeka mawoko gawo pomutwe gontwedu komeho zaJehova ntani ngava dipagere ntwedu ozo komeho zaJehova.

16 “‘Makura mupristeli gomunene* nga reta honde zimwe zontwedu monkongoronzugo. 17 Age nga dove nyara zendi mohonde a nagere honde zimwe yikando ntambali komeho zaJehova, komeho zekehe. 18 Age nga kwita honde zimwe konombinga dosizambero esi sa kara monkongoronzugo komeho zaJehova, ano honde nazinye zokuhupa ko nga zi tjisira kedi lyosizambero sononzambo deswakerero esi sa kara pevero lyonkongoronzugo. 19 Age nga guse ko magadi nagenye noku ga hwika, yipo musi gwako gu tutumukire posizambero. 20 Age nga rugana ntwedu ozo ngwendi moomu nga rugana ntwedu zonzambo zononzo. Ngesi yimo nga yi rugana mupristeli, yipo Vaisraeli ngava va dongwenene po nonzo dawo, makura Karunga ngava gusira po. 21 Age nga pwagesa ntwedu ozo ponze zokamba a ka zi hwike ngwendi moomu nga hwika ntwedu zokuhova. Azo nzambo zononzo zoVaisraeli.

22 “‘Nsene gumwe gesimbi ana zono ga hana kuyidivira pokurugana sininke simwe esi ga silika Karunga gwendi Jehova, makura a kare nounzoni, 23 ndi nsene ana diva nzo ezi ana tura, ga hepa kureta sikombogona sosigara sokukanguka ngonzambo zendi. 24 Age nga kambeka kuwoko kwendi pomutwe gosikombogona nokusidipagera pevango eli ava dipagere nonzambo deswakerero komeho zaJehova. Azo nzambo zononzo. 25 Mupristeli nga gusa ko honde zimwe zonzambo zononzo nonyara zendi a zi kwite konombinga dosizambero sononzambo deswakerero ntani nga tjisira honde zokuhupa ko kedi lyosizambero sononzambo deswakerero. 26 Age nga hwika magadi gako nagenye, yipo musi gu tutumukire posizambero ngwendi moomu nga rugana magadi gonzambo zombili. Eyi yiyo nga rugana mupristeli, yipo muntu ogo va mu dongwenene po nonzo dendi, ano Karunga nga mu gusira po.

27 “‘Nsene muntu gomosirongo a zona ga hana kuyidivira pokurugana eyi ga silika Jehova makura a kare nounzoni, 28 ndi nsene ana diva nzo ezi ana tura, age ga hepa kureta sikombogona sosikadi sokukanguka ngonzambo zonzo ezi ana tura. 29 Age nga kambeka kuwoko kwendi pomutwe gonzambo zononzo nokuzidipagera pevango eli ava dipagere nonzambo deswakerero. 30 Mupristeli nga gusa ko honde zimwe nonyara zendi a zi kwite konombinga dosizambero sononzambo deswakerero, ano honde nazinye zokuhupa ko ngazi tjisira kedi lyosizambero. 31 Age nga gusa ko magadi nagenye ngwendi moomu nga yi rugana konzambo zombili, ano mupristeli nga ga hwika yipo musi gwago ngagu tutumukire posizambero. Azo ngazi gava edumba lyewa lyokuhafesa Jehova. Eyi yiyo nga rugana mupristeli yipo muntu ogo va mu dongwenene po nonzo dendi, ano Karunga nga mu gusira po.

32 “‘Nye nsene ta gava nzwigona ngonzambo zononzo, ga hepa kureta nzwigona zonkadi zokukanguka. 33 Age ga hepa kukambeka kuwoko kwendi pomutwe gwazo nokuzidipaga ngonzambo zononzo pevango eli ava dipagere nonzambo deswakerero. 34 Mupristeli nga gusa ko honde zimwe zonzambo zononzo nonyara zendi a zi kwite konombinga dosizambero sononzambo deswakerero. Ano honde nazinye zokuhupa ko ngazi tjisira kedi lyosizambero. 35 Age nga guse ko magadi nagenye ngwendi moomu nga yi rugana konzwigona zongara zonzambo zombili ntani mupristeli nga ga hwika, yipo musi gu tutumukire posizambero peguru lyononzambo daJehova dokuhwika. Eyi yiyo nga rugana mupristeli, yipo muntu ogo va mu dongwenene po nonzo dendi, ano Karunga nga mu gusira po.

5 “‘Nsene gumwe ana mono muntu ogu ana rugana yirugana yoyidona ndi ayi zuvhe, makura a zuvhe asi kuna kupapara* vantu va ka gave umbangi nye age a dire kuyitanta, age nga kara nounzoni ntani ngava mu tengeka.

2 “‘Ndi nsene gumwe a kwata nkenye eyi yokudira kukuhuka, yi kare asi sikorama somowiza sokufa ndi simuna sokufa ndi sinamwenyo sosinunu* sokufa sokudira kukuhuka, age nga nyata ntani nga kara nounzoni nampili kapi ana yi diva. 3 Ndi nsene gumwe a kwata nkenye eyi yokudira kukuhuka eyi nayi mu nyateka ga hana kuyidivira, makura konyima a ya yi dimburure, age nga kara nounzoni.

4 “‘Ndi nsene gumwe a genderera kugana asi ta rugana yuma, yi kare asi yoyiwa ndi yoyidona ga hana kuyidivira, nye a yi dimburure asi age kwa genderera kugana, age nga kara nounzoni.*

5 “‘Nsene gumwe a kara nounzoni morwa kurugana simwe soyininke eyi, age ga hepa kutongonona eyi ga zona. 6 Age ga hepa hena kureta yininke eyi kwaJehova ngonzambo zokugusisa po nonzo: nzwigona zonkadi ndi sikombogona sosikadi sonzambo zononzo. Makura mupristeli nga gava nzambo ozo yipo muntu ogo va mu gusire po nonzo dendi.

7 “‘Nsene kapi ana kuvhura kugava nzwi, ga hepa kureta kwaJehova nonkutji mbali ndi nomputukuwagona mbali ngonzambo zokugusisa po nonzo. Zimwe zonzambo zononzo, ano zimwe zonzambo zeswakerero. 8 Age ga hepa kudireta komupristeli, yipo nga gave zimwe ngonzambo zononzo ntani mupristeli ngazi keka ponsingo zazo ga hana kuteta ko mutwe gwazo. 9 Age nga nagera honde zimwe zonzambo zononzo koruha rumwe rosizambero, nye zokuhupa ko nga zi ninka zi zozere kedi lyosizambero. Azo nzambo zononzo. 10 Age nga gava zimwe ngonzambo zeswakerero kuliza nomavyukiso gononzambo deswakerero. Ano mupristeli nga yi zamba, yipo muntu ogo ngava mu dongwenene po nonzo dendi, makura Karunga nga mu gusira po.

11 “‘Nye nsene kapi ana kuvhura kugava nonkutji mbali ndi nomputukuwagona mbali, ga hepa kureta sipako sousura wouwa sokilograma zimwe* ngonzambo zononzo. Nye kapisi a ture po magadi ndi manganganga gokututumikidisa, yeeyi azo nzambo zononzo. 12 Age ga hepa kuureta komupristeli, ano mupristeli nga gusa po usura newoko lyendi ngosidiworokeso sonzambo nazinye nokuuhwika, yipo musi gu tutumukire posizambero peguru lyononzambo daJehova dokuhwika. Azo nzambo zononzo. 13 Ngesi yimo nga yi zamba mupristeli, yipo muntu ogo ngava mu dongwenene po nonzo dendi nsene ga tura nonzo edi vana tumbura, makura Karunga nga mu gusira po. Ano usura wokuhupa ko wonzambo nga u kara womupristeli ngwendi yeyi ayi hupu ko konzambo zombuto.’”

14 Jehova ta tantere hena Mosesa asi: 15 “Nsene muntu a teza veta zokuhamena yininke yaJehova yokupongoka ga hana kuyidivira, age ga hepa kureta kwaJehova nzwi zongara zokukanguka ngonzambo zokugusisa po nonzo. Mulyo gonzwi ozo moyisiliveli gwa hepa kuliza noyisiliveli* yekevango lyokupongoka. 16 Age ga hepa kufuta nzo ezi ga tura kuhamena yininke yokupongoka ntani nga gwede po noperesenda 20 pomulyo gwazo. Age nga zi gava komupristeli, ano mupristeli nga gava nzambo zonzwi zongara ngonzambo zokugusisa po nonzo, yipo muntu ogo va mu dongwenene po nonzo dendi makura Karunga nga mu gusira po.

17 “Nsene gumwe a zona pokurugana yininke eyi ga silika Jehova, nampili a dire kuyidiva, age nga kara nounzoni ntani ngava mu tengeka morwa nzo zendi. 18 Age ga hepa kureta komupristeli nzwi zongara zokukanguka. Nzwi ozo za hepa kuliza noyimaliwa eyi va tura po yonzambo zokugusisa po nonzo. Mupristeli nga gava nzambo, yipo muntu ogo va mu dongwenene po nonzo edi ga tura ga hana kuyidivira, ano Karunga nga mu gusira po. 19 Mokumona asi age ana kara nounzoni pokuzona kwaJehova, ga hepa kugava nzambo ezi zokugusisa po nonzo.”

6 Jehova ta tantere hena Mosesa asi: 2 “Nsene gumwe a zona ntani a dire kulimburukwa kwaJehova a kumbagere mukwawo kuhamena yininke eyi ga mu pa a mu pungwire, ndi nsene a vaka ndi a hakane yininke yamukwawo, 3 ndi nsene a gwana sininke esi sa zumbana makura a kumbagere ntani nsene a gana moyimpempa asi kapi ga tura nzo, eyi yiyo ga hepa kurugana: 4 Nsene ga zona makura a kare nounzoni, ga hepa kutengwida eyi ga vaka ndi eyi ga hakana ndi eyi va mu pa a pungure ndi sininke sokuzumbana esi ga gwana, 5 ndi nkenye eyi ga ganena moyimpempa. Age ga hepa kuyifutira ntani a gwederere po noperesenda 20 pomulyo gwayo. Age nga si tengwida kwamwenyaso mezuva eli ngava mu gwana unzoni. 6 Age hena ga hepa kureta komupristeli nzwi zongara zokukanguka zonzambo zendi zokugusisa po nonzo kwaJehova. Nzwi ozo za hepa kuliza noyimaliwa eyi ga tura po mupristeli. 7 Mupristeli nga gava nzambo ozo komeho zaJehova, yipo muntu ogo ngava mu dongwenene po nonzo dendi, ano age ngava mu gusira po kwanayinye eyi ya mu ninkisa a kare nounzoni.”

8 Jehova ta tantere hena Mosesa asi: 9 “Tantera Arona novana vendi wovagara asi: ‘Ezi yizo veta zokuhamena nzambo zeswakerero: Azo va hepa kuzisiga posizambero masiku nagenye dogoro ngurangura ntani mundiro gwa hepa kutwera ngorooro posizambero. 10 Mupristeli ga hepa kudwara yikoverero yendi youpristeli nokotje,* makura ga hepa kukomba enoto* lyonzambo zeswakerero ezi guna veveke mundiro posizambero nokutura enoto konontere dosizambero. 11 Makura nga huture ko yikoverero oyo a dware ko yikoverero yimwe, a tware enoto kevango lyokuzera ponze zokamba. 12 Mundiro gwa hepa kutwera ngorooro posizambero, kapisi ngagu dime. Mupristeli ga hepa kutura po yitare nkenye ngurangura nokutura nawa nzambo zeswakerero pomundiro ntani nga hwike magadi gononzambo dombili, yipo musi gwako gu tutumukire posizambero. 13 Mundiro gwa hepa kutwera nkenye apa posizambero. Ago kapisi ngagu dime.

14 “‘Ezi yizo veta zokuhamena nzambo zombuto: Vana vaArona wovagara nyone ngomu gava nzambo ozo kosizambero komeho zaJehova. 15 Gumwe nga guse newoko lyendi usura wouwa wonzambo zombuto nomagadi gamwe ntani nomanganganga gokututumikidisa aga nga ga kara ponzambo zombuto. Age nga ga hwike yipo musi gwako gu tutumukire posizambero, gu gave edumba lyewa lyokuhafesa Jehova ngosidiworokeso sonzambo nazinye. 16 Arona novana vendi wovagara ngava guse eyi ngayi hupa ko konzambo va yi kange mboroto zokudira yihaheso. Awo ngava zi lire mevango lyokupongoka eli lya kara meharango lyonkongoronzugo.* 17 Azo kapisi va zi rugane noyihaheso. Ame kwa zi va pa ngoruha rwawo pononzambo dange dokuhwika. Azo kwa pongoka unene ngwendi nzambo zononzo ntani ngwendi nzambo zokugusisa po nonzo. 18 Vagara navenye womoruvharo rwaArona, ngava lya ko. Aro ruha rwawo rokukarerera pononzambo daJehova dokuhwika dogoro koruvharo rwawo rokomeho. Nkenye eyi ngayi guma kononzambo odo, ayo ngayi pongoka.’”

19 Jehova ta tantere hena Mosesa asi: 20 “Ezi yizo nzambo nga gava Arona novana vendi kwaJehova mezuva eli ngava mu gwaveka Arona ngomupristeli gomunene: awo ngava gave nkenye ezuva sipako sokilograma zimwe* sousura wouwa ngonzambo zombuto. Awo ngava gave harufa zimwe ngurangura, ano harufa zimwe ngurova. 21 Azo ngava zi rugana nomagadi posipana ntani ngava zi rete azo vana zi vhongo nawa nomagadi, va zi gave azo vana zi bomagura ngonzambo zombuto zokukanga, yipo zi gave edumba lyewa lyokuhafesa Jehova. 22 Nkenye ogu gomoruvharo rwaArona ngava gwaveka ngomupristeli gomunene, yige nga gava nzambo ezi. Ezi kuna kara veta zokukarerera: Nzambo nazinye va hepa kuziswakerera kwaJehova. 23 Nkenye nzambo zombuto ezi nga gava mupristeli va hepa kuzihwika nazinye. Azo nokuzilya si.”

24 Jehova ta uyunga hena naMosesa asi: 25 “Tantera Arona novana vendi wovagara asi: ‘Ezi yizo veta zokuhamena nzambo zononzo: azo va hepa kuzidipagera komeho zaJehova mevango eli ava dipagere nzambo zeswakerero. Azo kwa pongoka unene. 26 Mupristeli ogu nga gava nzambo zononzo, yige nga zi lya. Age nga zi lira mevango lyokupongoka eli lya kara meharango lyonkongoronzugo.

27 “‘Nkenye eyi ngayi guma konzambo ozo, ayo ngayi pongoka, ano nkenye ogu nga nagera honde zonzambo koyikoverero yendi, ga hepa kuyikuhwira mevango lyokupongoka. 28 Sipako serova omu ngava zi terekera, va hepa kusibamagura. Nye nsene ngava zi terekera mosipako songoporo, va hepa kusiputja nokusikuhwa nomema.

29 “‘Vagara ava ava rugana ngovapristeli, yiwo ngava zi lya. Azo kwa pongoka unene. 30 Nye kwato kulya nzambo zononzo nsene honde zazo zimwe vana zi reta monkongoronzugo va ya zi zambe mevango lyokupongoka, yipo va va dongwenene po nonzo dawo. Azo va hepa kuzihwika nomundiro.

7 “‘Ezi yizo veta zokuhamena nzambo zokugusisa po nonzo: Azo kwa pongoka unene. 2 Nzambo ozo ngava zi dipagera mevango eli ava dipagere nonzambo deswakerero, ano honde zazo ngava zi nagere komaruha nagenye gosizambero. 3 Mupristeli nga gusa magadi gako nagenye kukwatera mo musira gomagadi ntani nomagadi aga ga kudumika yininke yomonda 4 ntani nonongera mbali nomagadi gado. Age nga gusa ko hena magadi gekehuli kumwe nonongera, 5 makura nga yi hwike yipo yi tutumukire posizambero ngonzambo zokuhwika kwaJehova. Azo nzambo zokugusisa po nonzo. 6 Vagara navenye wovapristeli, yiwo tupu wokulya ko ntani va hepa kuzilira mevango lyokupongoka. Azo kwa pongoka unene. 7 Veta zokuhamena nzambo zononzo za lifana noveta zonzambo zokugusisa po nonzo; nyama zononzambo odo ngazi kara zomupristeli ogu a gava nzambo ozo.

8 “‘Apa nga gava mupristeli nzambo zeswakerero zagumwe, sipapa sonzambo ozo ngasi kara sendi.

9 “‘Nkenye nzambo zombuto ezi ngava kanga mesuga ndi posipana, ngazi kara zomupristeli ogu ana kuzigava. 10 Nye nkenye nzambo zombuto ezi va vhonga nomagadi ndi ezi va dira kuvhonga nomagadi, ngazi kara zovana vaArona wovagara navenye. Nkenye ogu nga gwana yokuhetakana.

11 “‘Ezi yizo veta zokuhamena nzambo zombili ezi na gava muntu kwaJehova: 12 Nsene ta zi gava ngonzambo zompandu, a zi gave kumwe nonomboroto dokuliudinga* dokudira yihaheso edi va vhonga nomagadi noyikuki yokudira yihaheso eyi va kwita magadi ntani nonomboroto dokuliudinga edi va rugana nousura wouwa, ou va vhonga nawa nomagadi. 13 Age ga hepa kugava nzambo zendi kumwe nonomboroto dokuliudinga edi va tura yihaheso ntani nononzambo dendi dombili edi nga gava ngonzambo zompandu. 14 Age ga hepa kugava mboroto zimwe zankenye rudi ngoruha rokupongoka kwaJehova. Azo ngazi kara zomupristeli ogu nga naga honde zononzambo dombili. 15 Nyama zononzambo dombili ezi nga gava ngonzambo zompandu, ga hepa kuzilya mezuva eli ana kuzizamba. Azo nokuzitulika si dogoro ezuva lyokukwama ko.

16 “‘Nsene kuna kugava nzambo morwa kuna tura po mugano ndi kuna kugava nzambo zemeharo lyanyamoge, azo va hepa kuzilya mezuva eli vana kuzizamba, ano eyi ngayi hupa po kuvhura kuyilya ezuva lyokukwama ko. 17 Nye nyama zonzambo ezi ngazi hupa po mezuva lyautatu, va hepa kuzihwika nomundiro. 18 Nsene nyama zonzambo zombili va zi lya mezuva lyautatu, Karunga kapi nga tambura muntu ogu ana kuzigava. Nzambo ozo kapi ngava zi tambura, yeeyi aso sininke sosidona ntani muntu ogu nga zi lya ngava mu tengeka. 19 Nyama ezi ngazi guma koyininke yokudira kukuhuka, nokuzilya si. Azo va hepa kuzihwika nomundiro. Ano nyama zokukuhuka kuvhura kuzilya nkenye ogu ana kuhuka.

20 “‘Nye nsene muntu gokunyata a lya nyama zonzambo zombili ezi za hamena kwaJehova, age va hepa kumugusa mo* mokatji kovantu vendi. 21 Nsene muntu a guma mukwawo ogu ana nyata ndi sikorama sokudira kukuhuka ndi nkenye eyi yokudira kukuhuka makura a lye nyama zonzambo zombili ezi za hamena kwaJehova, age va hepa kumugusa mo* mokatji kovantu vendi.’”

22 Jehova ta tantere hena Mosesa asi: 23 “Tantera Vaisraeli asi: ‘Mwa ha lya magadi gontwedu ndi gonzwigona zongara ndi gosikombo. 24 Magadi gosikorama esi vana gwana aso sina fu nomagadi gosikorama esi sina dipaga sikorama sikwawo, nokugalya si, nye kuvhura kugaruganesa nkenye eyi. 25 Nkenye ogu nga lya magadi gosikorama esi nga gava ngonzambo zokuhwika kwaJehova, va hepa kumugusa mo* mokatji kovantu vendi.

26 “‘Kapisi ngomu lye nkenye honde, zi kare asi zoyidira ndi zoyikorama, nkenye oku ngomu tunga. 27 Ogu nga lya nkenye honde, va hepa kumugusa mo* mokatji kovantu vendi.’”

28 Jehova ta tantere hena Mosesa asi: 29 “Tantera Vaisraeli asi: ‘Nkenye ogu nga gava nzambo zendi zombili kwaJehova, ga hepa kureta ruha rumwe ronzambo zendi kwaJehova. 30 Age ga hepa kusimba magadi kumwe nonturo zosikorama* ngonzambo zokuhwika kwaJehova ntani age ga hepa kuzizeragura komeho zaJehova ngonzambo zelikido. 31 Mupristeli nga hwika magadi, yipo musi gwako ngagu tutumukire posizambero, nye nturo zosikorama oso ngazi kara zaArona novana vendi wovagara.

32 “‘Ngomu guse pononzambo deni dombili, sirama sorulyo sosikorama ngomu si gave komupristeli ngoruha rokupongoka. 33 MunaArona gomugara ogu nga gava honde zononzambo dombili ntani nomagadi, yige nga gusa sirama sorulyo sosikorama si kare sendi. 34 Yeeyi ame ngani gusa nturo zonzambo zelikido ntani nosirama soruha rokupongoka pononzambo dombili doVaisraeli, ni yi gave kwaArona novana vendi wovagara. Azo kuna kara veta zokukarerera koVaisraeli.

35 “‘Ruha oru rononzambo daJehova dokuhwika, kwa ru geve kwaArona novana vendi mezuva eli ga va horowere Mosesa va ruganene Jehova ngovapristeli. 36 Jehova kwa tanterere Vaisraeli va gave ruha oru kwaArona novana vendi mezuva eli ga va gwavekere. Azo kuna kara veta zokukarerera dogoro nokoruvharo rwawo rokomeho.’”

37 Ezi yizo veta zokuhamena nzambo zeswakerero, nzambo zombuto, nzambo zononzo, nzambo zokugusisa po nonzo, nzambo zepongoro ntani nonzambo zombili, 38 kuliza nomu Jehova ga pangerere Mosesa poNdundu zaSinayi, mezuva eli ga pangerere Vaisraeli va gave nonzambo dawo kwaJehova momburundu zaSinayi.

8 Jehova ta tantere hena Mosesa asi: 2 “Gusa Arona novana vendi wovagara noyikoverero yawo nomagadi gokugwavekesa nontwedu zonzambo zononzo nononzwi mbali donongara nosikumba sonomboroto dokudira yihaheso, 3 ntani tantera Vaisraeli navenye va ponge pevero lyonkongoronzugo.”*

4 Makura Mosesa ta rugana moomu ga mu tanterere Jehova, ano Vaisraeli tava pongo pevero lyonkongoronzugo. 5 Mosesa ta tantere Vaisraeli asi: “Eyi yiyo ana tu pangere Jehova tu rugane.” 6 Mosesa ta reta Arona novana vendi pepi, makura ta va kuhu nomema. 7 Konyima ta dwareke Arona erwakani, ta mu manga ekehe lyomombunda ntani ta mu dwareke hema zomawoko gomasupi nosikoverero sopomapepe, ta si mu manga nawa noliva oru va honzera ko. 8 Makura ta mu dwareke sininke soponturo ntani posininke soponturo ta tura po Ulimu naTumimu.* 9 Makura ta mu dwareke embare ntani ta tura komeho zembare sivera songorodo sokupongoka,* ngwendi moomu Jehova ga pangerere Mosesa.

10 Makura Mosesa ta gusa magadi gokugwavekesa, ta gwaveke nkongoronzugo ntani nanayinye eyi ya kere mo, yipo yi pongoke. 11 Konyima, ta nagere yikando ntambali magadi gamwe kosizambero makura ta si gwaveke kumwe noyiruganeso yako nayinye ntani nosiyaha nosininke sako sokusitentekera, yipo yi pongoke. 12 Makura ta tjire magadi gokugwavekesa pomutwe gwaArona, a mu gwaveke yipo a pongoke.

13 Mosesa makura ta reta vana vaArona pepi, ta va dwareke marwakani nokuvamanga makehe gomombunda ntani ta va dwareke yininke yokomutwe ngwendi moomu ga mu pangerere Jehova.

14 Ta reta ntwedu zonzambo zononzo, ano Arona novana vendi wovagara tava kambeke mawoko gawo pomutwe gontwedu zonzambo zononzo. 15 Mosesa ta zi dipaga, ta gusa ko honde zimwe nonyara zendi, makura ta zi kwita konombinga dosizambero komaruha gaso nagenye, a kuhure sizambero konzo, nye honde zokuhupa ko ta zi tjisire kedi lyosizambero. Monkedi ezi yimo ga si pongwere, yipo ngava zambere po nonzambo dokudongonona po nonzo. 16 Konyima, Mosesa ta gusa magadi nagenye aga ga kudumika yininke yomonda, magadi gekehuli ntani nonongera mbali nomagadi gado, makura tayi hwike yipo musi gwayo gu tutumukire posizambero. 17 Ano sipapa sontwedu nonyama zazo ntani nofwati zazo, ta yi hwikire ponze zokamba ngwendi moomu ga mu pangerere Jehova.

18 Mosesa ta reta pepi nzwi zongara zonzambo zeswakerero, makura Arona novana vendi wovagara tava kambeke mawoko gawo pomutwe gwazo. 19 Mosesa ta zi dipaga nokunagera honde zazo komaruha nagenye gosizambero, 20 ta zi tetagura, ano mutwe gwazo neyi ga tetagwire ntani nomagadi tayi hwike. 21 Age ta kuhu yininke yomonda nomaguru gazo nomema, makura ta hwike nzwi nazinye, yipo musi gwako gu tutumukire posizambero. Azo kwa kere nzambo zeswakerero ezi va hwikire pomundiro yipo zi gave edumba lyewa lyokuhafesa Jehova, ngwendi moomu Jehova ga pangerere Mosesa.

22 Age ta reta nzwi zongara zauvali ezi va zembe yipo va ture vapristeli mosirugana, makura Arona novana vendi wovagara tava kambeke mawoko gawo pomutwe gwazo. 23 Mosesa ta zi dipaga, ta gusa ko honde zimwe makura ta zi kwite ketwi lyaArona lyokorulyo ntani nekepumbwara lyendi lyekewoko lyokorulyo ntani nekepumbwara lyendi lyokompadi zendi zokorulyo. 24 Mosesa ta kwamesa ko vana vaArona, ta va kwite honde komatwi gawo gokorulyo ntani komapumbwara gokomawoko gawo gokorulyo ntani naga gokonompadi dawo dokorulyo, ano honde zokuhupa ko ta zi nagere komaruha nagenye gosizambero.

25 Makura ta gusa magadi nomusira gomagadi nomagadi nagenye aga ga kudumika yininke yomonda nomagadi gekehuli nonongera mbali nomagadi gado ntani nosirama sorulyo. 26 Ta gusa posikumba sonomboroto dokudira yihaheso esi sa kara komeho zaJehova, mboroto zimwe zokuliudinga* nomboroto zimwe zokuliudinga ezi va vhonga nomagadi ntani nosikuki simwe, makura ta yi tura pomagadi ntani posirama sorulyo. 27 Makura ta yi tura nayinye momawoko gaArona novana vendi wovagara, awo tava yi zeragura komeho zaJehova ngonzambo zelikido. 28 Mosesa ta yi gusa momawoko gawo, makura ta yi hwike yipo musi gu tutumukire posizambero peguru lyonzambo zeswakerero. Azo kwa kere nzambo ezi va geve apa va tulire vapristeli mosirugana, yipo zi gave edumba lyewa lyokuhafesa. Azo nzambo zaJehova zokuhwika.

29 Mosesa makura ta gusa nturo,* ta zi zeragura ngonzambo zelikido komeho zaJehova. Nzambo ozo zonturo kwa kere ruha rwaMosesa ngwendi moomu ga mu pangerere Jehova.

30 Mosesa ta gusa magadi gamwe gokugwavekesa nohonde zimwe ezi za kere posizambero, makura ta yi nagere Arona novana vendi ava va kere nendi nokoyikoverero yawo. Monkedi ezi yimo ga pongwere Arona novana vendi noyikoverero yawo.

31 Mosesa ta tantere Arona novana vendi wovagara asi: “Terekereni nyama pevero lyonkongoronzugo mu zi lire poopo kumwe nomboroto ezi zina kara posikumba. Karunga kwa pangerere nge asi: ‘Arona novana vendi yiwo ngava zi lya.’ 32 Nyama ezi ngazi hupa ko nomboroto, va hepa kuyihwika nomundiro. 33 Ngomu kare pepi nevero lyonkongoronzugo mazuva ntambali dogoro ngaga pite mazuva aga ngava mu tura mosirugana soupristeli, morwa ayo ngayi gusa mazuva ntambali mokumutura mosirugana soupristeli. 34 Neina ose kuna rugana eyi ga tu pangera Jehova, yipo va mu dongwenene po nonzo deni. 35 Ngomu kare mazuva ntambali pepi nevero lyonkongoronzugo masiku nomutenya nokusikisa mo situmbukira esi ga mu pa Jehova, yipo ngomu dire kufa morwa eyi yiyo ga pangera nge Karunga.”

36 Makura Arona novana vendi tava rugana nayinye eyi ga tente Jehova kupitira mwaMosesa.

9 Mezuva lyauntantatu, Mosesa kwa zigidire Arona novana vendi wovagara ntani nomasimbi goVaisraeli. 2 Age kwa tanterere Arona asi: “Gusa ntanagona zonzambo zoge zononzo ntani nonzwi zongara zonzambo zeswakerero, o yi gave komeho zaJehova. Ayo ya hepa kukara yokukanguka. 3 Nye tantera Vaisraeli va guse sikombo sosigara sonzambo zononzo ntani ntana nonzwigona zongara yomvhura zimwe yonzambo zeswakerero. Ayo ya hepa kukara yokukanguka. 4 Awo va guse hena ntwedu nonzwi zongara yononzambo dombili, va yi zambe komeho zaJehova ntani nonzambo zombuto ezi va vhonga nomagadi, yeeyi naina Jehova na va monekera.”

5 Awo makura tava twara eyi ga va pangerere Mosesa komeho zonkongoronzugo.* Vaisraeli navenye tava wiza, tava ya sikama komeho zaJehova. 6 Makura Mosesa ta va tantere asi: “Eyi yiyo ana tanta Jehova nomu rugana, yipo mu mone uyerere waJehova.” 7 Mosesa ta tantere Arona asi: “Zende kosizambero o ka gave nzambo zoge zononzo nezi zeswakerero, yipo nove nepata lyoge va mu dongwenene po nonzo deni. Ano konyima, gava nonzambo dovantu yipo va va dongwenene po nonzo dawo, ngwendi moomu ga ku pangera Jehova.”

8 Arona ta zi kosizambero makura ta dipaga ntana zonzambo zononzo dendi. 9 Vana vendi tava mu pe honde, age ta dowo mo nyara zendi makura ta zi kwite konombinga dosizambero, ano ezi za hupire ko, ta zi tjisire kedi lyosizambero. 10 Arona ta hwike magadi nonongera ntani nomagadi gekehuli yokonzambo zononzo, yipo musi gu tutumukire posizambero, ngwendi moomu Jehova ga pangerere Mosesa. 11 Ntani age kwa hwikire nyama nosipapa ponze zokamba.

12 Makura ta dipaga nzambo zeswakerero, ano vana vendi tava mu pe honde, age ta zi nagere komaruha nagenye gosizambero. 13 Tava mu pe hena eyi va tetagwire konzambo zeswakerero kumwe nomutwe, makura age ta yi hwike yipo musi gu tutumukire posizambero. 14 Ta kuhu yininke yomonda ntani noyirama, makura ta yi hwike kumwe nonzambo zeswakerero posizambero.

15 Konyima, ta gava nonzambo edi va retere vantu. Pomuhowo, age kwa gusire sikombo ta si dipaga, makura ta si gava ngonzambo zononzo dovantu. Age kwa zembe simuna esi ngwendi moomu ga zembe ntanagona. 16 Ntani ta gava nzambo zeswakerero. Age kwa zi geve kuliza nomavyukiso gononzambo deswakerero.

17 Age makura ta gava nzambo zombuto, ta tura zimwe mokuwoko kwendi, makura ta zi hwike yipo musi gu tutumukire posizambero apa ga zamberere nzambo zeswakerero ngurangura.

18 Konyima ta dipaga ntwedu nonzwi zongara, eyi va retere vantu yonzambo zombili. Makura vana vendi tava mu pe honde, ano age ta zi nagere komaruha nagenye gosizambero. 19 Nye magadi gontwedu nomusira gomagadi gonzwi zongara nomagadi aga ga kudumika yininke yomonda nonongera ntani nomagadi gekehuli, 20 tava ga tura nagenye pononturo.* Konyima, ta ga hwike posizambero. 21 Nye Arona kwa zeragwire nonturo ntani nosirama sorulyo ngonzambo zelikido komeho zaJehova, ngwendi moomu ga mu pangerere Mosesa.

22 Makura Arona ta zerwire mawoko gendi kovantu a va tungike, ta humburuka kosizambero konyima zokugava nzambo zononzo nonzambo zeswakerero ntani nononzambo dombili. 23 Mosesa naArona tava zi monkongoronzugo. Apa va pwege mo, tava tungike vantu.

Makura vantu navenye tava mono uyerere waJehova, 24 ntani mundiro tagu tundu kwaJehova, tagu hwike nzambo zeswakerero nomagadi aga ga kere posizambero. Apa va yi mwene vantu navenye, tava tameke kuzigira, tava ligandere pevhu nokulinyongamena.

10 Konyima, Nadabu naAbihu, vana vaArona wovagara, tava gusa yipana yawo yomundiro nokutura po mundiro, makura tava zamba komeho zaJehova yininke* eyi ga dira kupulisira, ntani age kapi ga va pangerere va yi rugane. 2 Makura mundiro tagu tundu meguru kwaJehova, tagu va hwike, tava fire komeho zaJehova. 3 Makura Mosesa ta tantere Arona asi: “Jehova kuna tanta asi: ‘Ava va kara pepi name va hepa kudiworoka asi na pongoka ntani vantu navenye va hepa kuyererepeka nge.’” Arona kwa mwenene teete.

4 Mosesa ta zigida Misayeli naElisafani, vana vaUsiyeli wovagara. Usiyeli kwa kere mumbya goguhwe vaArona. Mosesa kwa va tanterere asi: “Wizeni mu ya simbe yimpu yekoro lyeni eyi yina kara komeho zevango lyokupongoka, mu yi tware ponze zokamba.” 5 Awo makura tava wiza, tava ya damuna yimpu yovagara owo, awo ha va dwarera yikoverero yawo youpristeli. Awo kwa va twere ponze zokamba ngwendi moomu ga va tantere Mosesa.

6 Mosesa makura ta tantere Arona novana vendi wovagara ava va hupire po, Eliyasara naItamara asi: “Mwa ha taura yikoverero yeni ndi mu sigilire nohuki deni dokomutwe, yipo mu dire kufa ntani yipo Karunga a dire kuhandukira Vaisraeli navenye. Vaisraeli vakweni yiwo nava lira ava ana dipaga Jehova nomundiro. 7 Mwa ha tunda po pevero lyonkongoronzugo* ndi ngano ngomu fa, yeeyi one kwa mu gwaveka nomagadi gaJehova gokugwavekesa.” Makura awo tava rugana moomu ga va tanterere Mosesa.

8 Makura Jehova ta tantere Arona asi: 9 “Nove novana woge wovagara kapisi ngomu nwe vhinyu ndi nkenye marovhu nsene kuna kuza monkongoronzugo, yipo ngomu dire kufa. Ezi kuna kara veta zokukarerera dogoro nokoruvharo roge rokomeho. 10 Monkedi ezi, one ngomu diva elisigo pokatji koyininke yokupongoka neyi yokudira kupongoka ntani pokatji koyininke yokukuhuka neyi yokudira kukuhuka, 11 ntani one ngomu ronga Vaisraeli noveta daJehova nadinye edi ga mu tantera kupitira mwaMosesa.”

12 Mosesa ta tantere Arona novana vendi wovagara ava va hupire po, Eliyasara naItamara asi: “Pononzambo dokuhwika edi mwa geve kwaJehova, guseni po eyi ngayi hupa ko konzambo zombuto, mu yi rugane mboroto zokudira yihaheso. Nomboroto edi mwa hepa kudilira pepi nosizambero, morwa nzambo ozo kwa pongoka unene. 13 Mwa hepa kulira nomboroto odo mevango lyokupongoka, morwa azo mfuto zoge novana woge pononzambo daJehova dokuhwika, yeeyi yimo va yi pangera nge. 14 Nove novana woge wovagara nava wovakadi, ngomu lire hena nturo* zonzambo zelikido ntani nosirama soruha rokupongoka mevango lyokuzera. Yininke eyi kwa yi ku pa ngomfuto zoge novana woge wovagara pononzambo dombili doVaisraeli. 15 Awo ngava reta sirama soruha rokupongoka nonturo zonzambo zelikido kumwe nonzambo zokuhwika zomagadi, yipo ngava zeragure nzambo zelikido komeho zaJehova. Azo ngazi kara mfuto zoge zokukarerera kumwe novana woge wovagara ngwendi moomu ga yi tanta Jehova.”

16 Mosesa kwa paparere sikombo sonzambo zononzo, makura ta ka si gwana vana si hwike. Age ta handukire Eliyasara naItamara, vana vaArona wovagara ava va hupire po. Age kwa tente asi: 17 “Morwasinke muna dilire kulira nzambo zononzo mevango lyokupongoka? Azo kwa pongoka unene ntani azo kwa zi mu pa yipo mu guse po nonzo doVaisraeli nokuhundira Jehova a va dongwenene po nonzo dawo. 18 Honde zaso kapi vana zi reta mevango lyokupongoka ntani one ngano kuna zi lire mevango lyokupongoka ngwendi moomu va yi pangera nge.” 19 Arona ta limburura Mosesa asi: “Naina awo kuna gava nzambo zawo zononzo ntani nzambo zawo zeswakerero komeho zaJehova, nye yininke eyi yina horokere nge. Ngano asi ame kuna li nzambo zononzo, ngano yina hafesa Jehova ndi?” 20 Apa ga yi zuvhire Mosesa, ta kwata egano eyi ga yi ruganenene Arona.

11 Makura Jehova ta tantere Mosesa naArona asi: 2 “Tantereni Vaisraeli asi: ‘Eyi yiyo yinamwenyo yepevhu eyi nomu vhura kulya: 3 Nkenye sikorama esi sa kara nomakondo gokupanuka nokutjokoka momakondo gaso ntani aso kuliwoyonga,* kuvhura kusilya.

4 “‘Nye kapisi mu lye yikorama eyi ayi liwoyonga ndi eyi ya kara nomakondo gokupanuka ngwendi: ngameru, ezi azi liwoyonga nye kapi za kara nomakondo gokupanuka. Mwa hepa kuzitara asi azo kapi za kuhuka. 5 Ntani ndimba gomomamanya,* morwa age kuliwoyonga nye kapi ga kara nomakondo gokupanuka. Mwa hepa kumutara asi age kapi ga kuhuka. 6 Ntani ndimba, morwa age kuliwoyonga nye kapi ga kara nomakondo gokupanuka. Mwa hepa kumutara asi age kapi ga kuhuka. 7 Ntani singuru, morwa aso sa kara nomakondo gokupanuka nokutjokoka momakondo gaso, nye aso kapi a si liwoyonga. Mwa hepa kusitara asi aso kapi sa kuhuka. 8 Mwa ha lya nyama zayo ndi mu yi kwate nsene yina fu. Mwa hepa kuyitara asi kapi ya kuhuka.

9 “‘Eyi yiyo yinamwenyo eyi ya kara momema nomu lya: Yinamwenyo nayinye eyi ya kara mefuta ndi momukuro eyi ya kara nonongande, kuvhura mu yi lye. 10 Nye yinamwenyo nayinye yomomukuro neyi yemefuta, kukwatera mo yinamwenyo yoyinunu* eyi ya dira nongande, mwa hepa kuyitara asi kapi ya kuhuka. 11 Mokumona asi ayo kapi ya kuhuka, kapisi ngomu yi lye ntani mwa hepa kutara yokufa asi kapi ya kuhuka. 12 Yinamwenyo nayinye eyi ya kara momema eyi ya dira kukara nonongande, mwa hepa kuyitara asi kapi ya kuhuka.

13 “‘Eyi yiyo yinamwenyo yokutuka eyi mwa hepa kutara asi kapi ya kuhuka, ayo nokuyilya si morwa ayo kapi ya kuhuka: ekangakodi, ekuvi, ekuvi lyesovagani, 14 siyimbi gomugeha nogu gomusovagani, 15 makorova gokulisiga-siga, 16 mpo, kakuru, sidira sekefuta,* vakakodi wokulisiga-siga, 17 kakuru gomununu, nkororo, kakuru gomatwi gomare, 18 sidira esi asi zogo momema,* sidira somurungu gomure,* ekuvi, 19 kandjendje, vahakaruu wokulisiga-siga, nduranganga ntani kafukufuku. 20 Yinamwenyo nayinye yoyinunu yomavava eyi ayi gendi nomaguru gane, mwa hepa kuyitara asi kapi ya kuhuka.

21 “‘Poyinamwenyo nayinye yoyinunu eyi ya kara nomavava eyi ayi gendi nomaguru gane, mwa hepa tupu kulya eyi ya kara nomaguru gavali gomare gokuvatukisa. 22 Eyi yiyo nomu vhura kulya: simbonde gokulisiga-siga ogu a dirauka ntani nasimbonde ogu ava vhuru kulya, vasenza ntani nompasimpasi. 23 Yinamwenyo nayinye yoyinunu yokuhupa ko eyi ya kara nomavava ntani eyi ayi gendi nomaguru gane, mwa hepa kuyitara asi kapi ya kuhuka. 24 Nsene mu yi lya, one ngomu nyata. Nkenye ogu ana kuyikwata nsene yina fu, nga nyata dogoro kongurova. 25 Nkenye ogu nga yi damuna ayo yina fu, ga hepa kukuhwa yikoverero yendi. Age nga nyata dogoro kongurova.

26 “‘Nkenye sikorama esi sa kara nomakondo gokupanuka nye aso kapi sa tjokoka momakondo gaso ntani kapi asi liwoyonga, mwa hepa kusitara asi kapi sa kuhuka. Nkenye ogu ana kusikwata, nga nyata. 27 Nkenye sinamwenyo esi asi gendi nomaguru gane ntani sa kara nomakaha, mwa hepa kusitara asi kapi sa kuhuka. Nkenye ogu ana kukwata sinamwenyo oso sokufa, nga nyata dogoro kongurova. 28 Ogu nga damuna sinamwenyo oso sokufa, ga hepa kukuhwa yikoverero yendi ntani age nga nyata dogoro kongurova. Mwa hepa kusitara asi kapi sa kuhuka.

29 “‘Eyi yiyo yinamwenyo yepevhu eyi mwa hepa kutara asi kapi ya kuhuka: ngumbe, mpuku, vakamusugururu wokulisiga-siga, 30 siku, mpuma, mbambasiku, ekangara ntani rugongoro. 31 Yinamwenyo eyi mwa hepa kuyitara asi kapi ya kuhuka. Nkenye ogu ana kukwata yinamwenyo oyo yokufa, age nga nyata dogoro kongurova.

32 “‘Nkenye apa ngayi gwira nsene yina fu, ngapa nyata, yi kare asi siruganeso esi va honga ndi sikoverero ndi sipapa ndi nsako. Nkenye siruganeso esi ngayi gwira va hepa kusitura momema, aso ngasi nyata dogoro kongurova ntani nye ngasi kuhuka. 33 Nsene si gwira mosipako serova, mwa hepa kusibamagura ntani nkenye eyi ngayi kara mo, ayo ngayi nyata. 34 Nkenye nondya edi ngadi guma komema gomosipako oso serova, ngadi nyata, ntani nkenye yikunwa eyi ngayi kara mosipako oso, nayo ngayi nyata. 35 Nkenye apa ngayi gwira nsene yina fu, ngapa nyata, yi kare asi mediko ndi pesuga lyenunu, va hepa kuyibamagura. Ayo kapi ya kuhuka ntani mwa hepa kutwikira kuyitara asi kapi ya kuhuka. 36 Nsene si gwira morunone romema ndi metope, amo kapi ngamu nyata. Nye ogu ana kuyikwata ayo yina fu, nga nyata. 37 Nsene yokufa yi gwira pombuto ezi nava ka kuna, azo kapi tazi nyata. 38 Nye nsene va tura mema pombuto, makura yinamwenyo yokufa yi gwire po, mbuto ozo va hepa kuzitara asi za nyata.

39 “‘Ogu ana kuguma sikorama sokufa esi va mu pulisira kulya, nga nyata dogoro kongurova. 40 Nkenye ogu nga lya sikorama oso sokufa, ga hepa kukuhwa yikoverero yendi ntani age nga nyata dogoro kongurova, ano nkenye ogu nga si damuna ga hepa kukuhwa yikoverero yendi ntani age nga nyata dogoro kongurova. 41 Yinamwenyo nayinye yoyinunu yepevhu, kapi ya kuhuka. Ayo nokuyilya si. 42 Kapisi ngomu lye yinamwenyo eyi ayi wovana ndi nkenye sinamwenyo esi a si gendi nomaguru gane ndi nkenye sinamwenyo sosinunu sepevhu esi sa kara nomaguru gomanzi, yeeyi ayo kapi ya kuhuka. 43 Mwa ha linyateka nyamweni noyinamwenyo eyi yoyinunu, mu dire kukuhuka. 44 Yeeyi ame nyame Jehova Karunga gweni ntani mwa hepa kupongoka, yeeyi ame kwa pongoka. Yipo nye, mwa ha linyateka nyamweni noyinamwenyo yoyinunu eyi ayi gendi pevhu. 45 Yeeyi ame nyame Jehova ogu ana kumugusa mosirongo saEgipite, yipo ni mu likide asi ame Karunga gweni. Yipo nye, mwa hepa kupongoka, yeeyi ame kwa pongoka.

46 “‘Ezi yizo veta zokuhamena yikorama, yinamwenyo eyi ayi tuka, yinamwenyo nayinye eyi ayi zogo momema ntani noyinamwenyo nayinye yoyinunu eyi ayi gendi pevhu, 47 yipo ngomu dive elisigo pokatji koyinamwenyo yokukuhuka neyi yokudira kukuhuka ntani pokatji koyinamwenyo eyi nomu lya neyi nomu dira kulya.’”

12 Jehova ta tantere Mosesa asi: 2 “Tantera Vaisraeli asi: ‘Nsene mukadi a kara nomarutu gavali makura a hampuruke munona gomumati, age nga nyata mazuva ntambali ngwendi moomu a nyata mazuva aga a kara kosidira. 3 Mezuva lyauntantatu, munona ogo va hepa kumurugana yovamba. 4 Mukadi ogo nga twikira kulikuhura honde mazuva 33. Age nokuvhura si kukwata nkenye eyi ya pongoka ndi a ze mevango lyokupongoka dogoro ngaga pite mazuva gendi gokulikuhura.

5 “‘Nye nsene ta hampuruka munona gomukadona, age nga nyata mazuva 14 ngwendi moomu a nyata apa a kara kosidira. Age nga twikira kulikuhura honde mazuva 66. 6 Apa ngaga pita mazuva gendi gokulikuhura konyima zokuhampuruka munona gomumati ndi gomukadona, age ga hepa kureta komupristeli nzwigona zongara zomvhura zimwe zonzambo zeswakerero ntani mputukuwagona ndi nkutji zonzambo zononzo pevero lyonkongoronzugo.* 7 Mupristeli ogo nga gava nzambo ozo kwaJehova, yipo mukadi ogo ngava mu gusire po nonzo dendi. Kutunda opo, age nga kuhuka kohonde zendi. Ezi yizo veta zokuhamena mukadi ogu ana kuhampuruka munona gomumati ndi gomukadona. 8 Nye nsene kapi ana kuvhura kugava nzwi, ga hepa kugava nonkutji mbali ndi nomputukuwagona mbali; zimwe zonzambo zeswakerero, ano zimwe zonzambo zononzo. Mupristeli ngadi zamba, yipo mukadi ogo ngava mu gusire po kononzo dendi, kutunda opo, age nga kuhuka.’”

13 Jehova ta tantere hena Mosesa naArona asi: 2 “Nsene muntu a dunda ndi a kara nosironda ndi nosiheru ntani ayo kuvhura yi twaredese kouvera woyingondwe,* va hepa kumutwara komupristeli Arona ndi kwagumwe govana vendi wovapristeli. 3 Mupristeli nga konakona uvera ou una kara kosipapa somuntu ogo. Nsene nohuki dokosipapa dina samuka ntani uvera una hwilire unene mosipapa, awo kuna kara uvera woyingondwe. Mupristeli nga si konakona noku mu divisa kovantu asi ana nyata. 4 Nye nsene siheru esi sina mu kara sina samuka ntani aso kapi sina hwilire unene mosipapa ano nohuki dapo kapi dina samuka, mupristeli nga ninka muntu ogo a likarere gelike mazuva ntambali. 5 Mupristeli nga mu konakona mezuva lyauntambali, ano nsene uvera owo kapi una litjindji ntani kapi una lihana, mupristeli nga ninka muntu ogo a likarere hena gelike mazuva ntambali.

6 “Mupristeli nga mu konakona hena mezuva lyauntambali. Ano nsene uvera owo una haga ntani kapi una lihana, mupristeli ngamu divisa kovantu asi ana kuhuka, yeeyi age sironda tupu sa mu kere. Makura muntu ogo nga kuhwa yikoverero yendi yipo a kuhuke. 7 Nye nsene asi sironda* sendi sina nenepa kutunda apa ga ka mu konakonene mupristeli noku mu divisa kovantu asi ana kuhuka, age ga hepa kutengwira ko hena* komupristeli. 8 Mupristeli nga si konakona, ano nsene asi sironda kuna kunenepa, mupristeli nga mu divisa kovantu asi ana nyata. Awo uvera woyingondwe.

9 “Nsene muntu ana kara nouvera woyingondwe va hepa kumutwara komupristeli, 10 makura mupristeli nga mu konakona. Apa pana dundu nsene pana samuka ano nohuki nado dina samuka ntani pana kara sironda, 11 age ana kara nouvera woyingondwe wokugusa siruwo. Mupristeli nga mu divisa kovantu asi ana nyata. Age kapisi hepero a mu ninke a likarere gelike, yeeyi age ana nyata. 12 Nsene mupristeli a dimburura asi yingondwe yina kara muntu ogo rutu narunye, kutundilira komutwe dogoro komaguru, 13 ntani ana mu konakona nokumona asi yingondwe yina mu kara rutu narunye, mupristeli nga mu divisa kovantu asi ana kuhuka.* Mokumona asi yingondwe nayinye yina samuka, eyi kulikida asi ana kuhuka. 14 Nye nsene a tameka kukara nosironda apa pana kara yingondwe, age nga nyata. 15 Apa nga mona mupristeli sironda oso, age nga mu divisa kovantu asi ana nyata. Sironda oso sa nyata. Awo uvera woyingondwe. 16 Nye nsene sironda si samuka hena, ga hepa kuza komupristeli. 17 Mupristeli nga mu konakona, ano nsene sironda oso sina samuka, age nga mu divisa kovantu asi ana kuhuka.

18 “Nsene muntu li mu kara esina makura a veruke, 19 nye pa kare simburwa sokusamuka ndi siheru esi sina gehere, age ga hepa kuza komupristeli. 20 Mupristeli nga si konakona, ano nsene sina hwilire unene mosipapa ntani nohuki doposipapa dina samuka, mupristeli nga mu divisa kovantu asi ana nyata. Awo uvera woyingondwe ou una tundu pesina. 21 Nye nsene mupristeli a si konakona nokumona asi patupu nohuki dokusamuka ntani kapi sina hwilire mosipapa aso hena kuna kudongonoka, mupristeli nga mu ninka a likarere gelike mazuva ntambali. 22 Ano nsene sina nenepa, mupristeli nga mu divisa kovantu asi ana nyata. Awo uvera woyingondwe. 23 Nye nsene kapi sina nenepa, aso kuna kara tupu siheru esi sa tunda pesina. Mupristeli nga mu divisa kovantu asi ana kuhuka.

24 “Ndi nsene muntu a pya komundiro, makura posironda sendi pa kare siheru sosigeha ndi sokusamuka, 25 mupristeli nga si konakona. Nsene nohuki doposiheru di tameka kusamuka ntani siheru sina hwilire mosipapa, awo uvera woyingondwe ou wa tunda posironda. Mupristeli nga mu divisa kovantu asi ana nyata. Awo uvera woyingondwe. 26 Nye nsene mupristeli a si konakona nokumona asi patupu nohuki dokusamuka posiheru ntani kapi sina hwilire mosipapa, aso hena kuna kudongonoka, mupristeli nga mu ninka a likarere gelike mazuva ntambali. 27 Mupristeli nga mu konakona mezuva lyauntambali, ano nsene siheru sina nenepa, age nga mu divisa kovantu asi ana nyata. Awo uvera woyingondwe. 28 Nye nsene siheru kuna kara tupu pevango limwe ntani kapi sina nenepa, aso hena kuna kudongonoka, ngoso sironda tupu sina dundu ntani mupristeli nga mu divisa kovantu asi ana kuhuka, morwa aso sironda tupu sina dundu.

29 “Nsene mugara ndi mukadi a kara nosironda momutwe ndi kosizumu, 30 mupristeli nga si konakona. Nsene sironda oso kuna kudodoma ntani nsene nohuki dina litjindji sinauhenga nokuporoka, mupristeli nga mu divisa kovantu asi ana nyata. Awo uvera womomutwe ndi wokononzwedu. Ayo yingondwe yomomutwe ndi yokosizumu. 31 Nye nsene mupristeli a mona asi sironda oso kapi sina dodoma ntani pwato nohuki dononsovagani, age nga mu ninka a likarere gelike mazuva ntambali. 32 Mupristeli nga mu konakona mezuva lyauntambali. Nsene sironda kapi sina nenepa ntani kapi pana kara nohuki dosinauhenga, aso hena kapi sina dodoma, 33 muntu ogo ga hepa kulikurura, nye age kapi nga kurura pevega apa sina karere sironda. Makura mupristeli nga mu ninka a likarere gelike mazuva ntambali.

34 “Mupristeli nga konakona hena sironda sendi mezuva lyauntambali. Ano nsene sironda sendi somomutwe ntani sokononzwedu kapi sina nenepa ndi si dodome, mupristeli nga mu divisa kovantu asi ana kuhuka ntani ga hepa kukuhwa yikoverero yendi yipo a kuhuke. 35 Nye nsene sironda sina nenepa konyima zokumudivisa asi ana kuhuka, 36 mupristeli nga mu konakona hena. Ano nsene sironda sina nenepa, mupristeli kapisi hepero a papare nohuki dosinauhenga; muntu ogo ana nyata. 37 Nye nsene mupristeli a dimburura asi sironda kapi sina nenepa ntani pana hokere nohuki dononsovagani, ngoso sironda sina veruka. Age ana kuhuka ntani mupristeli nga mu divisa kovantu asi ana kuhuka.

38 “Nsene mugara ndi mukadi ana kara noyiheru yokusamuka, 39 mupristeli nga yi konakona. Nsene yiheru kapi yina samuka nawa-nawa, ayo yimburwa tupu. Muntu ogo ana kuhuka.

40 “Nsene mugara a poroka nohuki momutwe, makura a kare norupara, age kapi ana nyata. 41 Nsene a poroka nohuki doposipara, a kare norupara, age kapi ana nyata. 42 Nye nsene pana kara sironda sosigeha porupara rwendi ndi posipara sendi, awo kuna kara uvera woyingondwe ou una kara momutwe gwendi ndi posipara sendi. 43 Mupristeli nga mu konakona, ano nsene sironda esi sina kara porupara rwendi ndi posipara sendi sina gehe, awo uvera woyingondwe. 44 Age munayingondwe ntani ana nyata. Mupristeli nga mu divisa kovantu asi age ana nyata, morwa uvera ou una mu kara momutwe. 45 Ano muntu ogu ana kara noyingondwe va hepa kutavagura yikoverero yendi ntani ga hepa kusigilira nohuki dendi, age hena a likudumike kokana* makura a zigire asi: ‘Na nyata, na nyata!’ 46 Age nga nyata siruwo nasinye esi nga kara nouvera. Mokumona asi age ana nyata, ga hepa kulikarera gelike. Age nga tunga ponze zokamba.

47 “Nsene uvera woyingondwe u kara kosikoverero, yi kare asi sikoverero sonongodi ndi sekehe 48 ndi konongodi dosikoverero esi va honza nekehe ndi nowanda ndi kosipapa ndi kwankenye esi va rugana nosipapa 49 ntani nsene yininke yosinamahako ndi yoyigeha yokoyingondwe yi kara kosikoverero ndi kosipapa ndi konongodi ndi kwankenye sipako esi va rugana nosipapa, awo uvera woyingondwe ntani va hepa kuyilikida mupristeli. 50 Mupristeli nga konakona uvera owo ntani nga tura yininke eyi ya kara nouvera woyingondwe yi likarere yelike mazuva ntambali. 51 Apa nga konakona uvera owo mezuva lyauntambali, nsene ana dimburura asi awo una lihanene kosikoverero ndi kongodi ndi kosipapa (yi kare asi yisinke ava si ruganesa sipapa oso), awo uvera woyingondwe ou au lihana usimbu ntani aso sina nyata. 52 Mupristeli ga hepa kuhwika sikoverero ndi ngodi ndi ekehe ndi nkenye sipako esi va rugana kosipapa esi sina kara nouvera woyingondwe, yeeyi awo uvera woyingondwe ou au lihana usimbu. Ayo va hepa kuyihwika.

53 “Nye nsene mupristeli a si konakona nokumona asi uvera kapi una lihanene posikoverero ndi pongodi ndi pwankenye sipako esi va rugana nosipapa, 54 age nga gava mpangera va kuhwe sininke esi sina kara nouvera woyingondwe ntani nga si tura hena si likarere selike mazuva ntambali. 55 Konyima, mupristeli nga konakona sininke souvera woyingondwe esi va kuhwire. Nsene kapi sina litjindji, nampili u dire kulihana uvera woyingondwe, aso sina nyata. Mwa hepa kusihwika morwa aso sina zonauka monda nokontunda.

56 “Nye nsene mupristeli a si konakona ntani yingondwe eyi ya kere ko kuna kudongonoka konyima zokusikuhwa, age ga hepa kuteta ko ruha oro rosikoverero ndi rosipapa ndi rongodi oru runa kara noyingondwe. 57 Nye nsene kuna kumoneka koruha rumwe rosikoverero ndi rongodi ndi rosininke nkenye esi va rugana kosipapa, ayo kuna kulihana ntani va hepa kusihwika. 58 Nye nsene yingondwe yina dongonoka po posikoverero ndi kongodi ndi kwankenye sipako esi va rugana kosipapa konyima zokusikuhwa, va hepa kusikuhwa sikando sauvali ntani ngasi kuhuka.

59 “Ezi kuna kara veta zokuhamena uvera woyingondwe ou una kara kosikoverero sonongodi ndi sekehe ndi kongodi ndi kwankenye sipako esi va rugana nosipapa, yipo mupristeli a dive nsene sina kuhuka ndi sina nyata.”

14 Jehova ta tantere hena Mosesa asi: 2 “Ezi yizo veta zokuhamena munayingondwe ezi ngomu kwama mezuva eli ngava mu divisa kovantu asi ana kuhuka, apa ngava mu twara komupristeli. 3 Mupristeli nga za ponze zokamba a ka mu konakone. Nsene munayingondwe ana veruka, 4 mupristeli nga mu tantera a ka rete yidira yivali yokukuhuka, yitare yosedeli ntani nekehe lyegeha nomutayi gohisopo, yipo va mu kuhure. 5 Mupristeli makura nga gava mpangera va dipagere sidira simwe mosipako serova omu muna kara mema gomawa. 6 Nye sidira esi vana dili kudipaga kumwe noyitare yosedeli nekehe lyegeha ntani mutayi gohisopo, nga yi ture mohonde zosidira esi vana dipagere momema gomawa. 7 Makura mupristeli ga hepa kunagera honde yikando ntambali ogu vana kukuhura koyingondwe nokumudivisa kovantu asi ana kuhuka, makura mupristeli nga mangurura sidira oso sina hupu ko si tuke, si ze ponze zokamba.

8 “Ogu vana kukuhura koyingondwe, ga hepa kukuhwa yikoverero yendi nokukurura nohuki dendi nadinye ntani ga hepa kulikuhwa nomema, yipo a kuhuke. Kutunda opo kuvhura nga ze mokamba, nye age nga kara ponze zotende zendi mazuva ntambali. 9 Mezuva lyauntambali, ga hepa kukurura nohuki dendi nadinye domomutwe nedi dokosizumu nononkope. Konyima zokulikurura nohuki dendi nadinye, ga hepa kukuhwa yidwara yendi nokulikuhwa nomema, makura age nga kuhuka.

10 “Mezuva lyauntantatu, age ga hepa kutwara nonzwigona mbali donongara dokukanguka ntani nzwigona zimwe zonkadi zokukanguka zomvhura zimwe nousura wouwa wonokilograma ntatu noharufa* ou va vhonga nomagadi, wonzambo zombuto nonkinda* zimwe zomagadi. 11 Mupristeli ogu nga divisa mugara ogu vana kukuhura koyingondwe, age nga mu twara komeho zaJehova kumwe nononzambo pevero lyonkongoronzugo.* 12 Makura mupristeli nga gusa nzwigona zimwe zongara, a zi gave ngonzambo zokugusisa po nonzo kumwe nonkinda* zimwe zomagadi ntani age nga yi zeragura ngonzambo zelikido komeho zaJehova. 13 Kutunda opo, age nga dipagera nzwigona zongara mevango lyokupongoka eli ava dipagere nzambo zononzo nezi zeswakerero, morwa nzambo zokugusisa po nonzo ngazi kara zomupristeli ngwendi nzambo zononzo. Azo kwa pongoka unene.

14 “Mupristeli makura nga gusa ko honde zimwe zonzambo zokugusisa po nonzo a zi kwite ketwi lyokorulyo lyogu vana kukuhura koyingondwe ntani kepumbwara lyendi lyokuwoko kokorulyo nekepumbwara lyokompadi zendi zokorulyo. 15 Ntani age nga gusa magadi gamwe gomonkinda* aga tjire mokuwoko kwendi kokorumoho. 16 Age nga dova nyara zendi zokorulyo momagadi aga gana kara mokuwoko kwendi kokorumoho a nagere magadi ogo yikando ntambali komeho zaJehova nonyara zendi. 17 Ano mupristeli nga gusa magadi gamwe, aga ngaga hupa ko mokuwoko kwendi aga kwite kokutwi korulyo kogu vana kukuhura koyingondwe nekepumbwara lyendi lyokuwoko korulyo ntani nekepumbwara lyendi lyokompadi zendi zorulyo, oku vana kwite nare honde zonzambo zokugusisa po nonzo. 18 Mupristeli nga kwita magadi aga ngaga hupa ko momutwe gogu vana kukuhura koyingondwe. Eyi yiyo nga rugana mupristeli, yipo Jehova a dongwenene po muntu ogo nonzo dendi.

19 “Mupristeli nga gava nzambo zononzo yipo va gusire po nonzo domuntu ogu vana kukuhura koyingondwe, konyima ntani nga dipaga nzambo zeswakerero. 20 Age nga gava nzambo zeswakerero ntani nonzambo zombuto posizambero, yipo muntu ogo va mu dongwenene po nonzo dendi, makura age nga kuhuka.

21 “Nye nsene kapi ana kuvhura kugava nonzambo odo morwa age ruhepo, ga hepa kureta nzwigona zongara ngonzambo zokugusisa po nonzo. Mupristeli nga zi zeragura ngonzambo zelikido, yipo ngava mu dongwenene po nonzo dendi. Age ga hepa hena kureta sipako sousura wouwa wokilograma* zimwe, ou va vhonga nomagadi ngonzambo zombuto ntani nonkinda* zimwe zomagadi 22 nononkutji mbali ndi nomputukuwagona mbali kuliza neyi na vhura kugava; zimwe zonzambo zononzo ano ezi nkwawo zonzambo zeswakerero. 23 Mezuva lyauntantatu, age ga hepa kureta yininke oyo komupristeli komeho zaJehova pevero lyonkongoronzugo yipo va ya mu kuhure.

24 “Mupristeli nga gusa nzwigona zongara zonzambo zokugusisa po nonzo nonkinda* zimwe zomagadi, makura nga yi zeragure ngonzambo zelikido komeho zaJehova. 25 Age nga dipaga nzwigona zongara zonzambo zokugusisa po nonzo, makura nga gusa honde zimwe konzambo zokugusisa po nonzo nokuzikwita kokutwi korulyo kogu vana kukuhura koyingondwe ntani kepumbwara lyendi lyokuwoko kokorulyo nekepumbwara lyokompadi zendi zokorulyo. 26 Mupristeli nga tjira magadi gamwe mokuwoko kwendi kokorumoho, 27 nokunaga magadi gamwe nonyara zendi zokorulyo yikando ntambali komeho zaJehova. 28 Age nga gusa magadi gamwe aga gana kara mokuwoko kwendi, aga kwite kokutwi korulyo kogu vana kukuhura koyingondwe nekepumbwara lyendi lyokuwoko korulyo ntani nekepumbwara lyokompadi zendi zorulyo, oku vana kwite nare honde zonzambo zokugusisa po nonzo. 29 Makura mupristeli nga kwita magadi aga ngaga hupa ko momutwe gogu vana kukuhura koyingondwe, yipo Jehova a dongwenene po muntu ogo nonzo dendi.

30 “Age nga zamba nkutji zimwe ndi mputukuwagona zimwe kuliza neyi na vhura kugava. 31 Zimwe zonzambo zononzo, ano ezi nkwawo zonzambo zeswakerero. Age ngayi gava kumwe nonzambo zombuto. Ano mupristeli ngayi gava komeho zaJehova, yipo muntu ogo va mu dongwenene po nonzo dendi.

32 “Ezi yizo veta zokuhamena muntu ogu ga kere nouvera woyingondwe, ogu ana kudira kuvhura kugava nonzambo nadinye, yipo va mu kuhure.”

33 Jehova ta tantere Mosesa naArona asi: 34 “Apa ngomu za mosirongo saKanani esi nina kumupa ngoupingwa weni, makura ame ni pulisire uvera woyingondwe u kare membo limwe, 35 mwenya embo ga hepa kuza komupristeli a ka mu tantere asi: ‘Membo lyange uvera una kara mo.’ 36 Mupristeli nga gava mpangera yipo va pwagese mo yininke nayinye yemembo komeho a konakone nzugo ozo, yipo nga dire kudivisa kovantu asi yininke nayinye yemembo yina nyata. Konyima, mupristeli ntani nga za monzugo a ka zi konakone. 37 Age nga konakona oku kuna kara uvera, ano nsene komakuma gonzugo ozo kuna kara yininke yosinamahako ndi yoyigeha ntani yina hwilire mekuma, 38 mupristeli ga hepa kupwaga mo monzugo ozo makura a pate ko mazuva ntambali.

39 “Mupristeli nga tengwira ko hena mezuva lyauntambali a ka zi konakone. Nsene uvera una lihanene mekuma lyonzugo, 40 mupristeli nga gava mpangera va guse mo mamanya aga gana kara nouvera, va ga zugumine ponze zositata kevango lyokunyata. 41 Makura ga hepa kugava mpangera yipo va pare monda zonzugo, ano yininke eyi nava para mo, va hepa kuyizugumina ponze zositata kevango lyokunyata. 42 Ano pevango apa vana gusa mamanya, va hepa kutura po mamanya gapeke nokutura munoko monompatji donzugo.

43 “Nsene uvera una ka tengura hena monzugo konyima zokugusa mo mamanya nokupara mo ntani nokutura hena munoko monompatji donzugo, 44 mupristeli ga hepa kuza hena a ka zi konakone. Nsene uvera una lihanene monzugo, awo uvera woyingondwe ou au lihana usimbu. Nzugo ozo zina nyata. 45 Age ga hepa kuzungurura nzugo ozo, kukwatera mo mamanya gako, yitji yako nomunoko gwako ntani va hepa kukayizugumina ponze zositata kevango lyokunyata. 46 Nkenye ogu nga hwilira monzugo ozo posiruwo esi ngava zi pata, age nga nyata dogoro kongurova; 47 nkenye ogu nga rara monzugo ozo ga hepa kukuhwa yikoverero yendi ntani nkenye ogu nga lira monzugo ozo, ga hepa kukuhwa yikoverero yendi.

48 “Nye nsene mupristeli a hwilira monzugo makura a dimburure asi uvera kapi una lihana konyima zokutura mo munoko gwapeke, age nga divisa asi nzugo ozo zina kuhuka morwa uvera una tundu mo. 49 Mokukuhura nzugo ezi zina nyata, age nga gusa yidira yivali noyitare yosedeli nekehe lyegeha nomutayi gohisopo. 50 Sidira simwe ga hepa kusidipagera mosipako serova omu muna kara mema gomawa. 51 Makura age nga gusa yitare yosedeli, mutayi gohisopo nekehe lyegeha ntani nosidira esi vana dili kudipaga nokuyitura mohonde zosidira esi vana dipaga ntani momema gomawa makura a nagere honde konzugo yikando ntambali. 52 Mupristeli nga kuhura nzugo ozo nohonde zosidira nomema gomawa nosidira esi vana dili kudipaga noyitare yosedeli nomutayi gohisopo ntani nekehe lyegeha. 53 Mupristeli nga mangurura sidira esi vana dili kudipaga, yipo si tuke ponze zositata. Monkedi ezi yimo nga kuhura nzugo, makura azo ngazi kuhuka.

54 “Ezi yizo veta zokuhamena uvera woyingondwe ou una kara momutwe ndi kononzwedu, 55 yingondwe yokoyikoverero ndi yomonzugo, 56 ntani kuhamena kudunda, yironda ntani noyiheru, 57 yipo mupristeli a dive nsene sininke sina nyata ndi sina kuhuka. Ezi kuna kara veta zokuhamena uvera woyingondwe.”

15 Jehova ta tantere hena Mosesa naArona asi: 2 “Tantereni Vaisraeli asi: ‘Nsene mugara koyili yina kumupita koyilyo yendi yonomuga,* age nga nyata. 3 Yininke oyo nga yi mu ninkisa a nyate, nampili yi twikire kumupita koyilyo yendi yonomuga ndi yi hageke.

4 “‘Nkenye mbete ezi nga rara mugara ogu ana kupita yininke koyilyo yendi yonomuga, ngazi nyata ano nkenye apa nga hingira ngapa nyata. 5 Nkenye ogu nga guma kombete zomugara ogo, ga hepa kukuhwa yikoverero yendi ntani a zogane. Age nga nyata dogoro kongurova. 6 Nkenye ogu nga hingira posininke esi ana hingire mugara ogu ana kupita yininke koyilyo yendi yonomuga, ga hepa kukuhwa yikoverero yendi nokuzogana. Age nga nyata dogoro kongurova. 7 Nkenye ogu nga kwata mugara ogu ana kupita yininke koyilyo yendi yonomuga, ga hepa kukuhwa yikoverero yendi nokuzogana. Age nga nyata dogoro kongurova. 8 Nsene mugara ogu ana kupita yininke koyilyo yonomuga a fizira muntu gokukuhuka, muntu ogo ga hepa kukuhwa yikoverero yendi nokuzogana. Age nga nyata dogoro kongurova. 9 Nkenye sifara* esi nga hingira mugara ogu ana kupita yininke koyilyo yendi yonomuga, ngasi nyata. 10 Nkenye ogu nga kwata nkenye esi nga hingira mugara ogo, nga nyata dogoro kongurova ntani nkenye ogu nga damuna yininke oyo, ga hepa kukuhwa yikoverero yendi nokuzogana. Age nga nyata dogoro kongurova. 11 Nsene mugara ogu ana kupita yininke koyilyo yendi yonomuga kapi ana likuhu komawoko gendi nomema, makura a kwate muntu, muntu ogo ga hepa kukuhwa yikoverero yendi nokuzogana. Age nga nyata dogoro kongurova. 12 Nkenye sipako serova esi nga kwata ogu ana kupita yininke koyilyo yendi yonomuga, va hepa kusibamagura, ano nkenye sipako sokuhonga esi nga kwata, va hepa kusikuhwa nomema.

13 “‘Apa ngayi hageka yininke oyo kumupita, age nga kuhuka. Age ga hepa kundindira mazuva ntambali, yipo ngava mu kuhure ntani ga hepa kukuhwa yikoverero yendi nokulikuhwa nomema gomawa, makura age nga kuhuka. 14 Mezuva lyauntantatu, age nga gusa nonkutji mbali ndi nomputukuwagona mbali nga ze komeho zaJehova pevero lyonkongoronzugo,* a ka di gave komupristeli. 15 Makura mupristeli nga di zamba, zimwe ngonzambo zononzo ano nkwawo ngonzambo zeswakerero, yipo nga mu dongwenene po Jehova nonzo dendi morwa ana nyata.

16 “‘Nsene mugara ta piti yitjandera, age ga hepa kulikuhwa rutu rwendi mudima nomema ntani age nga nyata dogoro kongurova. 17 Age ga hepa kukuhwa nkenye sikoverero ndi nkenye sipako sosipapa esi sina kara noyitjandera. Aso ngasi nyata dogoro kongurova.

18 “‘Mugara nsene ta ligwanekere panyama nomukadi, makura a pitise yitjandera, awo va hepa kulikuhwa ntani ngava nyata dogoro kongurova.

19 “‘Nsene mukadi a kara kosidira, age nga nyata mazuva ntambali. Ano nkenye ogu nga mu kwata, nga nyata dogoro kongurova. 20 Nkenye apa nga rara mukadi ogo posiruwo esi ana kara kosidira, ngapa nyata ntani nkenye apa nga hingira ngapa nyata. 21 Nkenye ogu nga kwata kombete zendi, ga hepa kukuhwa yikoverero yendi ntani a zogane. Age nga nyata dogoro kongurova. 22 Nkenye ogu nga kwata sininke esi ana hingire, ga hepa kukuhwa yikoverero yendi ntani a zogane. Age nga nyata dogoro kongurova. 23 Mukadi ogo nsene a hingira pombete ndi posininke sapeke, ogu ana kusikwata nga nyata dogoro kongurova. 24 Nsene mugara a ligwanekera panyama nage, makura honde zendi zi mu gume, mugara ogo nga nyata mazuva ntambali ntani nkenye ezi mbete nga rara, ngazi nyata.

25 “‘Nsene mukadi a pita honde mazuva gomanzi, nye ago kapisi mazuva gendi aga a kara kosidira ndi nsene a kara kosidira mazuva gomanzi, age nga nyata siruwo nasinye esi nga pita honde ngwendi moomu a nyata apa a kara kosidira. 26 Nkenye mbete ezi nga rara siruwo esi ana kupita honde, ngazi nyata ngwendi mbete ezi a rara apa a kara kosidira ntani nkenye sininke esi nga hingira ngasi nyata ngwendi moomu ayi horoka apa a kara kosidira. 27 Nkenye ogu ngayi kwata, ga hepa kukuhwa yikoverero yendi ntani a zogane. Age nga nyata dogoro kongurova.

28 “‘Nye nsene ana tundu ko kosidira, age nga ndindira mazuva ntambali, ano konyima zomazuva ogo, age nga kuhuka. 29 Mezuva lyauntantatu, age nga gusa nonkutji mbali ndi nomputukuwagona mbali a di rete komupristeli pevero lyonkongoronzugo. 30 Makura mupristeli ngadi zamba, zimwe ngonzambo zononzo ano nkwawo ngonzambo zeswakerero, yipo Jehova nga mu dongwenene po nonzo dendi, morwa muntu ogo ana nyata.

31 “‘Mwa hepa kuvatera Vaisraeli va kare vana kuhuka yipo ngava dire kufa, morwa kunyateka nkongoronzugo zange ezi za kara mokatji kawo.

32 “‘Ezi yizo veta zokuhamena mugara ogu ana kupita yininke koyilyo yendi yonomuga, mugara ogu ana nyata morwa kuna piti yitjandera, 33 mukadi ogu ana kara kosidira ndi nkenye mugara ndi mukadi ogu ana kupita yininke koyilyo yendi yonomuga ntani nkenye mugara ana kuligwanekera panyama nomukadi ogu ana nyata.’”

16 Jehova kwa uyungire naMosesa konyima zapa vana vaArona vavali wovagara va fire, morwa awo kwa zire komeho zaJehova. 2 Jehova ta tantere Mosesa asi: “Tantera mukuroge Arona asi kapisi a wize nkenye apa ana harere mevango lyokupongokerera* komeho zosikudumikiso sosikesa yipo nga dire kufa. Ame ngani moneka meremo keguru lyosikudumikiso.

3 “Komeho Arona a ze mevango lyokupongokerera, ga hepa kuzamba ntwedugona zonzambo zononzo ntani nzwigona zongara zonzambo zeswakerero. 4 Age ga hepa kudwara erwakani lyendi lyokupongoka ntani nokotje* yipo a kudumike rutu rwendi.* Age ga hepa kulimanga ekehe lyomombunda ntani a dware komutwe gwendi embare; yininke oyo ya pongoka. Age ga hepa kuzogana makura ayi dware.

5 “Vaisraeli va hepa kumupa yikombogona yivali yoyigara yonzambo zononzo ntani nzwi zimwe zongara zonzambo zeswakerero.

6 “Arona ga hepa kureta pepi ntwedu zonzambo zononzo dendi, yipo va mu dongwenene po nonzo dendi ntani dovantu vemepata lyendi.

7 “Makura ga hepa kutwara yikombo yivali a ka yi sikameke komeho zaJehova pevero lyonkongoronzugo.* 8 Arona nga rugane fungu-fungu yikombo yivali, sikombo simwe si kare saJehova ano simwe sokutwara nonzo dovantu.* 9 Arona nga gusa sikombo saJehova esi va horowora pafungu-fungu, a si gave ngonzambo zononzo. 10 Nye sikombo sokutwara nonzo dovantu, va hepa kusitwara va ka si sikameke komeho zaJehova, yipo va hundire egusiropo va si ninke si ze momburundu.

11 “Arona nga reta ntwedu zonzambo zononzo dendi, yipo va mu dongwenene po nonzo dendi ntani dovantu vemepata lyendi. Konyima nga dipaga ntwedu ozo ngonzambo zendi zononzo.

12 “Age nga gusa sipana a ture po makara aga gana kutwera posizambero komeho zaJehova ntani ga hepa kusimba momawoko gendi yitutumikidiso yedumba lyewa, makura a hwilire nayo mevango lyokupongokerera.* 13 Age hena nga tura yitutumikidiso oyo pomundiro ogu guna kara komeho zaJehova. Ano musi goyitutumikidiso ngagu kudumika sikudumikiso esi sa kara kosikesa somadiworokeso, yipo nga dire kufa.

14 “Age nga gusa honde zimwe zontwedu a zi nagere nonyara zendi komeho zosikudumikiso koyiha yoUpumezuva, age nga zi nagera komeho zosikudumikiso yikando ntambali.

15 “Age nga dipaga sikombo sonzambo zononzo dovantu ntani nga rete honde zaso mevango lyokupongokerera* makura a zi nagere komeho zosikudumikiso, ngwendi moomu nga rugana honde zontwedu.

16 “Arona ga hepa kukuhura evango lyokupongokerera eli lya nyata morwa yirugana yoVaisraeli yokunyata ntani nononzo nomapuko gawo. Age ga hepa hena kukuhura nkongoronzugo ezi za kara mokatji kovantu ava ava rugana yininke yokunyata.

17 “Kwato ogu nga kara monkongoronzugo posiruwo esi nga ka hundira egusiropo mevango lyokupongokerera dogoro nga pwage mo. Age nga hundira egusiropo, yipo va mu gusire po nonzo dendi nedi dovantu vemepata lyendi ntani doVaisraeli.

18 “Konyima, age nga pwaga mo a ze kosizambero esi sa kara komeho zaJehova, yipo a si kuhure. Age nga gusa honde zimwe zontwedu ntani nohonde zimwe zosikombo a zi kwite konombinga edi da kara komaruha nagenye gosizambero. 19 Age hena nga nagera honde zimwe nonyara zendi kosizambero yikando ntambali, yipo a si kuhure koyirugana yoVaisraeli yokunyata nokusipongora.

20 “Apa nga mana kukuhura evango lyokupongokerera nonkongoronzugo ntani sizambero, ga hepa hena kureta pepi sikombo sosizuni. 21 Arona nga kambeka mawoko gendi pomutwe gosikombo sosizuni nokutongonona mapuko nononzo doVaisraeli nadinye, makura ta di rundwilire pomutwe gosikombo, konyima nga si gave komuntu ogu vana horowora* a si singe si ze momburundu. 22 Sikombo oso nga si simba mapuko gawo momburundu ntani nga si singa si ze momburundu.

23 “Arona makura nga hwilira monkongoronzugo a ka huture yikoverero yendi eyi ana dwara komeho a hwilire mevango lyokupongokerera, makura a yi zare pevhu. 24 Age ga hepa kuzoganena mevango lyokupongoka nokudwara hena yikoverero yendi. Konyima, age nga pwaga mo a ya gave nzambo zendi zeswakerero ntani nzambo zovantu zeswakerero nokuhundira egusiropo kononzo dendi nedi doVaisraeli. 25 Age nga hwika magadi gonzambo zononzo, yipo musi gu tutumukire posizambero.

26 “Mugara ogu nga ninka sikombo si tware nonzo dovantu, ga hepa kukuhwa yikoverero yendi ntani a zogane, ntani nye nga wiza mokamba.

27 “Ano honde zontwedu zonzambo zononzo ntani nezi zosikombo sonzambo zononzo, ezi ngava reta mevango lyokupongokerera yipo va hundire egusiropo, va hepa kuzitwara ponze zokamba ano yipapa nonyama zoyikorama oyo nofwati zayo va ka yi hwike. 28 Ogu ngayi hwika ga hepa kukuhwa yikoverero yendi ntani a zogane, ntani nye nga wiza mokamba.

29 “Ezi kuna kara veta zeni zokukarerera: Mezuva lyomurongo, mokwedi kwauntambali, mwa hepa kudilira* ntani kapisi mu rugane nkenye eyi, a kare asi Muisraeli ndi munayirongo ogu ga tunga mokatji keni. 30 Mezuva eli, one ngava mu dongwenena po nonzo deni, yipo ngomu kuhuke. One ngomu kuhuka kononzo deni nadinye komeho zaJehova. 31 Alyo kuna kara ezuva lyesabata eli ngomu pwizumuka ntani mwa hepa kudilira. Azo veta zokukarerera.

32 “Mupristeli ogu va gwaveka ntani ogu va horowora a kare mupristeli gomunene yipo a pinganene po oguhwe, yige nga gava nzambo zokudongwenena po nonzo nokudwara yikoverero yokupongoka. 33 Age nga kuhura evango lyokupongokerera, nkongoronzugo ntani sizambero. Age nga gava nzambo yipo vapristeli noVaisraeli navenye vava dongwenene po nonzo dawo. 34 Ezi kuna kara veta zokukarerera pokugava nzambo zokudongwenena po nonzo, yipo Vaisraeli vava gusire po nonzo dawo nkenye mvhura.”

Makura Arona ta rugana moomu Jehova ga pangerere Mosesa.

17 Jehova ta tantere hena Mosesa asi: 2 “Tantera Arona novana vendi wovagara ntani noVaisraeli navenye asi: ‘Eyi yiyo ana tu pangere Jehova:

3 “‘“Nsene Muisraeli a dipagera ntwedu ndi nzwigona zongara ndi sikombo mokamba ndi ponze zokamba, 4 mevango lyokusireta pevero lyonkongoronzugo* a ya si gave kwaJehova ngonzambo zokuhwika komeho zonkongoronzugo zaJehova, age nga kara nousima wedipago. Age ana dipaga sikorama monkedi zepuko ntani va hepa kumugusa mo* mokatji kovantu vendi. 5 Vaisraeli va hepa kuyirugana eyi yipo va rete kwaJehova nonzambo edi ava zambere mezana. Awo va hepa kudireta komupristeli pevero lyonkongoronzugo ntani va hepa kudigava kwaJehova ngononzambo dombili. 6 Makura mupristeli nga nagera honde kosizambero saJehova esi sa kara pevero lyonkongoronzugo ntani nga hwika magadi, yipo ga gave edumba lyewa lyokuhafesa Jehova. 7 Awo va hepa kuhageka kugava nonzambo konompepo donondona* edi ava karere* dokufana ngwendi yikombo. Ezi kuna kara veta zeni zokukarerera dogoro nokoruvharo rweni rokomeho.”’

8 “Wa hepa kuvatantera asi: ‘Nkenye Muisraeli ndi munayirongo ogu ga tunga mokatji keni ogu nga gava nzambo zeswakerero ndi nkenye ezi nzambo, 9 makura a dire kuzireta pevero lyonkongoronzugo a ya zi gave kwaJehova, va hepa kumugusa mo* mokatji kovantu vendi.

10 “‘Nkenye Muisraeli ndi munayirongo ogu ga tunga mokatji keni nga lya nkenye honde, ame kapi ngani mu tambura ntani ame ngani mu gusa mo* mokatji kovantu vendi. 11 Yeeyi eparu* lyankenye sinamwenyo kwa kara mohonde ntani ame kwa zi mu pa mu zi zambe posizambero, yipo va mu gusire po nonzo deni. Mokumona asi eparu* kwa kara mohonde, nonzo deni kuvhura va di mu gusire po kupitira mwazo. 12 Eyi yiyo na tanterere Vaisraeli asi nawo novanayirongo ava va tunga mokatji kawo, kapisi ngava lye honde.

13 “‘Nsene Muisraeli ndi munayirongo ogu ga tunga mokatji keni a sana makura a kwate sikorama ndi sidira esi va mu pulisira kulya, ga hepa kutjisira honde zaso pevhu a zi fofere. 14 Yeeyi eparu* lyankenye sinamwenyo kwa kara mohonde. Eyi yiyo na tanterere Vaisraeli asi: “Mwa ha lya honde zankenye sinamwenyo, yeeyi eparu* lyankenye sinamwenyo kwa kara mohonde. Nkenye ogu ngazi lya, ngava mu dipaga.” 15 Nkenye Muisraeli ndi munayirongo ogu nga lya sikorama esi vana gwana aso sina fu ndi esi sina dipaga sikasama, ga hepa kukuhwa yikoverero yendi ntani a zogane. Age nga nyata dogoro kongurova, ano konyima ntani nye nga kuhuka. 16 Nye nsene kapi ngayi kuhwa nokuzogana, age ngava mu tengeka.’”

18 Jehova ta tantere hena Mosesa asi: 2 “Tantera Vaisraeli asi: ‘Ame nyame Karunga gweni Jehova. 3 Mwa ha honena nkareso zovantu womosirongo saEgipite omu mwa kere ntani mwa ha ka rugana eyi ava rugana vantu womosirongo saKanani omu nina kumutwara. Mwa ha kwama nompo dawo. 4 Mwa hepa kulimburukwa noveta nonompangera dange. Ame nyame Karunga gweni Jehova. 5 Mwa hepa kusikisa mo noveta nonompangera dange; nkenye ogu ngadi sikisa mo nga parukira mwado. Ame nyame Jehova.

6 “‘Kwato ogu nga ligwanekera panyama* nekoro lyendi lyene-lyene. Ame nyame Jehova. 7 Wa ha ligwanekera panyama noguho ndi nonyoko. Awo onyoko, nokuvhura si kuligwanekera nawo panyama.

8 “‘Wa ha ligwanekera panyama nomukadi ogu va kwara oguho, morwa ayo ngayi va swaukisa.*

9 “‘Wa ha ligwanekera panyama nampanzoge gomukadi, yi kare asi guhyeni gumwe tupu ndi zinyeni gumwe tupu, yi kare asi kwa mu retera membo limwe ndi hawe.

10 “‘Wa ha ligwanekera panyama namutekuroge gomukadi, yi kare asi kwa mu reta munoge gomugara ndi gomukadi, yeeyi ayo ngayi ku retera eswau.

11 “‘Wa ha ligwanekera panyama nampanzoge ogu va reta oguho kumwe nonyoko wositumbwena, yeeyi age mpanzoge.

12 “‘Wa ha ligwanekera panyama nampanza goguho, yeeyi age ekoro lyoguho lyene-lyene.

13 “‘Wa ha ligwanekera panyama namukurwa gonyoko ndi namumbya gonyoko gomukadi, yeeyi age ekoro lyonyoko lyene-lyene.

14 “‘Wa ha swaukisa* oguhogona pokuligwanekera panyama namukadawo, yeeyi awo onyokogona.

15 “‘Wa ha ligwanekera panyama nangumweyi zoge, yeeyi age kwa kwara munoge gomugara, nokuvhura si kuligwanekera nage panyama.

16 “‘Wa ha ligwanekera panyama namukadamukuroge ndi namukadamumbyoge, yeeyi ayo ngayi mu swaukisa.*

17 “‘Wa ha ligwanekera panyama nomukadi namunendi ntani novatekuru vendi, yeeyi awo ekoro lyendi lyene-lyene. Aso sininke sosidona unene.

18 “‘Wa ha gusa mumbyamukadoge a kare gumwe govakadi woge nokuligwanekera nage panyama, age mukurwendi simpe muzuni.

19 “‘Wa ha ligwanekera panyama nomukadi ogu ana kara kosidira.

20 “‘Wa ha ligwanekera panyama namukadamukweni,* yeeyi ayo ngayi kuninkisa o nyate.

21 “‘Wa ha pulisira munoge va mu zambe* kwaMoreki. Wa ha nyateka edina lyaKarunga goge monkedi ezi. Ame nyame Jehova.

22 “‘Wa ha ligwanekera panyama nomugara mukweni ngwendi moomu o ligwanekere panyama nomukadi. Esi kuna kara sininke sosidona unene.

23 “‘Mugara kapisi a ligwanekere panyama nosikorama, yeeyi ayo ngayi mu nyateka ntani mukadi nage ga ha ligwanekera panyama nosikorama, yeeyi ayo ya lilimba nounsitwe.

24 “‘Mwa ha linyateka nyamweni noyininke eyi, yeeyi nomuhoko edi nina kutjida mosirongo esi muna kuza, kwa linyateka noyininke eyi. 25 Eyi yiyo sa nyatera sirongo sawo. Ame ngani tengeka vantu womosirongo oso, morwa nonzo dawo ntani ngava va tjida mo mosirongo. 26 Nye one mwa hepa kulimburukwa noveta nonompangera dange ntani kapisi mu rugane yininke eyi yokunyata, yi kare asi nyamweni ndi vanayirongo ava va tunga mokatji keni. 27 Yeeyi vantu ava va tunga mosirongo esi muna kuza yiwo ava rugana yininke nayinye eyi yokunyata, eyi yiyo sa nyatera sirongo sawo. 28 Mokumona asi kapi ngomu nyateka sirongo, one kapi ngava mu tjida mo ngwendi moomu ngava tjida mo vantu womosirongo esi muna kuza. 29 Nkenye ogu nga rugana yininke eyi yokunyata, va hepa kumugusa mo* mokatji kovantu vendi. 30 Mwa hepa kulimburukwa noveta dange pokudira kurugana yininke yokunyata eyi ava rugana vantu ava va tunga mosirongo esi muna kuza, yipo ngomu dire kulinyateka nyamweni noyininke oyo. Ame nyame Karunga gweni Jehova.’”

19 Jehova ta tantere Mosesa asi: 2 “Tantera Vaisraeli navenye asi: ‘Mwa hepa kupongoka, yeeyi ame Karunga gweni Jehova, na pongoka.

3 “‘Mwa hepa kufumadeka* vaguhya veni novazinya veni ntani mwa hepa kusikisa mo esabata lyange. Ame nyame Karunga gweni Jehova. 4 Mwa ha karera yikarunga yokudira mulyo ndi mu liruganene yikarunga yoyivera. Ame nyame Karunga gweni Jehova.

5 “‘Nsene tomu gava nonzambo dombili kwaJehova, mwa hepa kudigava monkedi zouhunga yipo a mu hafere. 6 Mwa hepa kudilya mezuva eli ngomu di zamba ntani mezuva lyokukwama ko, nye eyi ngayi hupa po dogoro ezuva lyautatu, mwa hepa kuyihwika. 7 Nsene mu di lya mezuva lyautatu, nonzambo odo kapi ngava di tambura morwa aso sininke sosidona. 8 Ogu nga lya ko ngava mu tengeka, morwa age kapi ana fumadeke sininke saJehova sokupongoka ntani muntu ogo va hepa kumugusa mo* mokatji kovantu vendi.

9 “‘Nsene tomu pongaike muzangu gweni, kapisi mu guse nayinye eyi ya kara konontere domapya geni ndi mu toragure* eyi muna hupisa po. 10 Ntani mwa ha pongaika mandjembere aga gana hupu mo moyikunino yeni yomandjembere ndi mu toragure aga gana gwire pevhu. Mwa hepa kuyisigira vantu woruhepo novanayirongo. Ame nyame Karunga gweni Jehova.

11 “‘Mwa ha vaka, mwa ha tanta yimpempa ntani mwa ha genda vakweni konhi. 12 Mwa ha kwatesa ko yimpempa nokugana medina lyange, morwa ayo ngayi nyatekesa edina lyaKarunga gweni. Ame nyame Jehova. 13 Mwa ha kumbagera vakweni ntani mwa ha vaka. Mwa ha lipungwira mfeto zovarugani dogoro kongurangura.

14 “‘Mwa ha finga sipurupuru ndi mu ture sipundukiso komeho zomutwiku ntani mwa hepa kutjira Karunga gweni. Ame nyame Jehova.

15 “‘Mwa ha fukira nsene tomu pangura. Mwa ha likida nkenda komuntu goruhepo morwa ruhepo rwendi ndi mu hame konongawo. Mwa hepa kupangura vakweni pauhunga.

16 “‘Mwa ha hanesa yimpempa mokatji kovakweni yipo mu nyatekese madina govakweni. Mwa ha rugana yuma eyi nayi tura eparu* lyovakweni mosiponga.* Ame nyame Jehova.

17 “‘Mwa ha nyenga vakweni momutjima. Mwa hepa kupukurura vakweni yipo ngomu dire kukara nonzo nsene vana zono.

18 “‘Mwa ha tengwida kuwoko ndi mu kare nonkoko novakweni ntani mwa hepa kuhara vakweni ngwendi moomu mwa lihara nyamweni. Ame nyame Jehova.

19 “‘Mwa hepa kulimburukwa noveta dange: Mwa ha pulisira simuna sorudi rwapeke si retese simuna sorudi rwapeke. Mwa ha kuna momapya geni nombuto mbali dokulisiga ntani mwa ha dwara sikoverero esi va honza nonongodi mbali dokulisiga.

20 “‘Nsene mugara a ligwanekera panyama nomukadi gomupika, ogu ga vandekera mugara gwapeke, nye mukadi ogo kapi va mu zowora ndi va mu mangurura, va hepa kuvatengeka nye kapisi va va dipage, morwa mukadi ogo simpe kapi va mu mangurura. 21 Mugara ogo ga hepa kureta nzwi zongara zonzambo zokugusisa po nonzo kwaJehova pevero lyonkongoronzugo.* 22 Makura mupristeli a gave nzwi zokugusisa po nonzo komeho zaJehova, ano mugara ogo ngava mu gusira po nzo ezi ga tura.

23 “‘Apa ngomu za mosirongo esi nina kumupa, makura mu tapeke yitji yenyango, kapisi ngomu lye enyango olyo ure wonomvhura ntatu. Mwa hepa kutara enyango olyo asi lya nyata ntani nokulilya si. 24 Nye momvhura zaune, enyango lyako nalinye ngali pongoka ntani ngomu li gave kwaJehova noruhafo. 25 Momvhura zautano kuvhura tupu ngomu lye enyango olyo, yipo ngomu gwederere komuzangu gweni. Ame nyame Karunga gweni Jehova.

26 “‘Mwa ha lya yuma eyi yina kara nohonde.

“‘Mwa ha papara yidiviso ndi mu lihameke moumpure.

27 “‘Mwa ha kurura* nohuki edi da kara konontere dokomutwe gweni ndi mu tete nonzwedu deni mu di zonagure.

28 “‘Mwa ha likekagura morwa muntu* ana dogoroka ntani mwa ha litjangagura komarutu geni.* Ame nyame Jehova.

29 “‘Mwa ha swaukisa vana veni wovakadona pokuvaninka va kare nohondedi, ndi ngano sirongo nga si nyata koruhonda nokuvhuka mo vantu wonkareso zokunyata.

30 “‘Mwa hepa kusikisa mo esabata lyange ntani mwa hepa kufumadeka* evango lyange lyokupongoka. Ame nyame Jehova.

31 “‘Mwa ha za kovantu ava ava uyunga novafe ntani kovapumbi. Ayo ngayi mu ninkisa mu nyate. Ame nyame Karunga gweni Jehova.

32 “‘Mwa hepa kukatuka mu likide efumadeko kovakurupe ntani mwa hepa kutjira Karunga gweni. Ame nyame Jehova.

33 “‘Nsene munayirongo a tunga mosirongo seni, mwa ha mu tekura momudona. 34 Munayirongo ogu ga tunga none, mwa hepa kumutara ngwendi Muisraeli mukweni ntani mwa hepa kumuhara ngwendi moomu mwa lihara nyamweni, yeeyi none kwa kere vanayirongo mosirongo saEgipite. Ame nyame Karunga gweni Jehova.

35 “‘Mwa ha ruganesa yimeteso youfuki nsene kuna kumeta ure, siviha ndi unzi wosininke. 36 Mwa hepa kuruganesa yimeteso youhunga, yiviha youhunga ntani nosimeteso souhunga.* Ame nyame Karunga gweni Jehova ogu ga mu gusa mosirongo saEgipite. 37 Yipo nye, mwa hepa kusikisa mo nompangera dange nadinye nonoveta dange nadinye nokudikwama. Ame nyame Jehova.’”

20 Jehova ta tantere Mosesa asi: 2 “Tantera Vaisraeli asi: ‘Nkenye Muisraeli ndi nkenye munayirongo ogu ga tunga moIsraeli ogu nga gava munendi kwaMoreki, va hepa kumudipaga. Vantu womosirongo esi ga tunga, va hepa kumudipaga nomamanya. 3 Ame kapi ngani tambura muntu ogo ntani ngani mu gusa mo* mokatji kovantu vendi, yeeyi age kwa gava vana vendi vamwe kwaMoreki ntani ga nyateka evango lyange lyokupongoka nedina lyange lyokupongoka. 4 Nsene vantu womosirongo va tarerera mugara ogu ana kugava munendi kwaMoreki ntani va dire kumudipaga, 5 ame kapi ngani tambura mugara ogo nepata lyendi. Ame ngani mu gusa mo* mokatji kovantu vendi kumwe nava vana kulipakerera nage mokudira kulimburukwa nge va karere Moreki.*

6 “‘Ano muntu ogu nga dira kulimburukwa nge* pokuza kovantu ava ava uyunga novafe ntani kovapumbi, ame kapi ngani mu tambura ntani ngani mu gusa mo* mokatji kovantu vendi.

7 “‘Mwa hepa kukuhuka nokupongoka, morwa ame nyame Karunga gweni Jehova. 8 Ntani mwa hepa kulimburukwa nompangera dange nokudisikisa mo. Ame nyame Jehova ogu ana kumukuhura.

9 “‘Nkenye mugara ogu nga finga oguhwe ndi ozina, va hepa kumudipaga. Mokumona asi age kuna fingi oguhwe ndi ozina, nomfa dendi mwene ana di lipaparere.*

10 “‘Eyi yiyo ngayi horokera mugara ogu nga hondera namukadamukwawo: Va hepa kumudipaga. Mugara nomukadi ogo va hepa kuvadipaga. 11 Mugara ogu nga ligwanekera panyama nomukadi ogu va kwara oguhwe, nga swaukisa oguhwe.* Mugara nomukadi ogo va hepa kuvadipaga. Awo vene ngava lipaparera nomfa dawo. 12 Nsene mugara a ligwanekera panyama namukadamunendi, navenye va hepa kuvadipaga yeeyi ayo kwa lilimba nounsitwe. Awo vene ngava lipaparera nomfa dawo.

13 “‘Nsene mugara a ligwanekera panyama nomugara mukwawo ngwendi moomu a ligwanekere panyama nomukadi, navenye kuna rugana sininke sosidona unene. Va hepa kuvadipaga. Awo vene ngava lipaparera nomfa dawo.

14 “‘Nsene mugara a ligwanekera panyama nomukadi ntani nozina womukadi ogo, aso sininke sosidona unene, navenye va hepa kuvahwika nomundiro, yipo nkareso zondona zi dire kutwikira mokatji keni.

15 “‘Nsene mugara a ligwanekera panyama nosikorama, age va hepa kumudipaga kumwe nosikorama oso. 16 Nsene mukadi a ligwanekera panyama nosikorama, va hepa kumudipaga kumwe nosikorama oso. Vantu owo vene vana lipaparere nomfa dawo.

17 “‘Nsene mugara a ligwanekera panyama nampanzendi, yi kare asi guhyawo gumwe tupu ndi zinyawo gumwe tupu, makura va limone muherehere, alyo eswau. Awo va hepa kuvadipaga komeho zovantu. Mugara ogo ana swaukisa mpanzendi* ntani va hepa kumutengeka.

18 “‘Nsene mugara a ligwanekera panyama nomukadi ogu ana kara kosidira, awo kapi vana fumadeke honde zendi. Navenye va hepa kuvagusa mo* mokatji kovantu vawo.

19 “‘Wa ha ligwanekera panyama nampanza goguho ndi nonyokogona,* morwa ngoso kuna kuswaukisa ekoro lyoge. Vantu owo va hepa kuvatengeka. 20 Mugara ogu a ligwanekere panyama namukadahekurwendi ndi mukadagoguhwegona, age ana swaukisa* hekurwendi ndi oguhwegona. Navenye va hepa kuvatengeka morwa nzo zawo. Awo ngava fa va hana kureta vana. 21 Nsene mugara a ligwanekera panyama namukadamukurwendi ndi namukadamumbyendi, aso sininke sosidona unene. Age ana swaukisa* mukurwendi ndi mumbyendi. Awo kapi ngava reta vana.

22 “‘Mwa hepa kusikisa mo noveta dange nokulimburukwa nompangera dange, yipo ngava dire kumutjida mo mosirongo esi nina kumutwara. 23 Mwa ha kwama nompo dovantu ava nina kutjida mo mosirongo esi muna kuza, yeeyi awo kurugana yininke nayinye eyi ntani nava nyenga. 24 Eyi yiyo na mu tanterere asi: “Ngomu gusa sirongo sawo esi sa zura masini nousi ntani ame ngani si mu pa ngoupingwa weni. Ame nyame Karunga gweni Jehova ogu ga mu horowora mu likarere.” 25 Mwa hepa kudiva malisigo aga ga kara pokatji koyikorama yokukuhuka neyi yokudira kukuhuka ntani pokatji koyidira yokukuhuka neyi yokudira kukuhuka. Mwa ha linyateka nyamweni noyikorama ndi noyidira ndi nkenye eyi ayi wovana pevhu, eyi na mu tanterere mu yi tare asi kapi ya kuhuka. 26 Mwa hepa kupongoka, morwa ame Jehova kwa pongoka ntani ame kuna kumuhorowora mu likarere, yipo mu kare vantu vange.

27 “‘Nkenye mugara ndi mukadi ogu a uyunga novafe ndi a kare mpumbi, va hepa kumudipaga nomamanya. Nomfa dendi mwene ana di lipaparere.’”

21 Jehova ta tantere Mosesa asi: “Tantera vapristeli, vana vaArona wovagara asi: ‘Kwato ogu nga linyateka pokukwata muntu gokufa mokatji kovantu vendi. 2 Nye age kuvhura a kwate gekoro lyendi lyene-lyene ogu ana fu, yi kare asi ozina, oguhwe, munendi gomugara ndi gomukadi, mumbyendi gomugara ndi mukurwendi gomugara 3 ntani age kuvhura a linyateke pokukwata simpu sampanzendi gomudike ogu ga dira kuligwanekera rumwe panyama nomugara ntani ogu ga tunga nage.* 4 Mupristeli kapisi a linyateke pokukwata mukadi ogu ga kwara gumwe govantu vendi. 5 Vapristeli kapisi va kurure nohuki dawo nadinye domomutwe ndi va tete nonzwedu dawo dokonontere ndi va tjaragure marutu gawo. 6 Awo va hepa kupongoka komeho zaKarunga gwawo ntani kapisi va swaukise edina lyendi, yeeyi awo kugava nonzambo dokuhwika kwaJehova ndi nondya kwaKarunga gwawo, yipo nye awo va hepa kupongoka. 7 Mupristeli kapisi a kware hondedi, mukadi ogu ga ligwanekera panyama nomugara ndi mukadi ogu ga zumba mugara gwendi, morwa mupristeli ga pongoka komeho zaKarunga. 8 Mwa hepa kutara mupristeli asi ga pongoka, yeeyi yige a gava nonzambo kwaKarunga gweni. Mwa hepa kumutara asi ga pongoka, yeeyi ame Jehova ogu ana kumukuhura na pongoka.

9 “‘Nsene muna gomukadi gomupristeli a linyateka pokukara hondedi, age kuna kuswaukisa oguhwe. Age va hepa kumuhwika momundiro.

10 “‘Mugara ogu va horowora mokatji kovakwawo* a kare mupristeli gomunene, ogu va tjira magadi gokugwavekesa pomutwe gwendi nokudwara yikoverero youpristeli, kapisi a sigilire nohuki dendi ndi a taure yikoverero yendi. 11 Mupristeli gomunene kapisi nga hedere nkenye simpu. Age kapisi nga linyateke pokukwata simpu soguhwe ndi sozina. 12 Age kapisi nga tunde mo mevango lyokupongoka ntani kapisi nga nyateke evango lyaKarunga lyokupongoka, yeeyi age kwa kara nosidiviso sokupongoka ntani age kwa mu gwaveka nomagadi gaKarunga gokugwavekesa. Ame nyame Jehova.

13 “‘Mupristeli ga hepa kukwara mukadi ogu ga dira kuligwanekera panyama nomugara. 14 Age kapisi nga kware mufisayendi ndi mukadi ogu va zumba ndi mukadi ogu ga ligwanekera panyama nomugara ndi hondedi, nye age ga hepa kukwara mukadi goMuisraeli ogu ga dira kuligwanekera panyama nomugara. 15 Age kapisi nga swaukise ruvharo* rwendi komeho zoVaisraeli, yeeyi ame nyame Jehova ogu ana kumukuhura.’”

16 Jehova ta tantere hena Mosesa asi: 17 “Tantera Arona asi: ‘Kwato mugara gomoruvharo* roge ogu ga kara nourema nga gava nzambo kwaKarunga gwendi. 18 Mugara ogu ga kara nourema ou kapisi nga hedere kosizambero: nsene asi mugara ogo mutwiku ndi sirema somondambo ndi ga remana kosipara* ndi eguru lyendi limwe ere unene, 19 ndi ga teka mpadi ndi ewoko, 20 ndi ga dunda posipepe* ndi kamonenakupi* ndi ga kara noudigu womeho ndi ga kara noyimburwa ndi ga kara nouvera wosipapa ndi ugara wendi wa zonauka. 21 Kwato mugara gomoruvharo* rwaArona gomupristeli ogu ga remana nga hedera kosizambero saJehova a ka gave nonzambo dokuhwika. Age kapi ta vhuru kuhedera kosizambero a gave nzambo zaKarunga gwendi, morwa age ga kara nourema. 22 Age kuvhura a lye nzambo zaKarunga gwendi, zi kare asi nzambo zoyininke yokupongoka unene ndi zoyininke yokupongoka. 23 Nye kapisi a hedere pepi nekehe lyekevango lyokupongoka ntani kosizambero, morwa ga kara nourema ntani kapisi a nyateke evango lyange lyokupongoka, yeeyi ame nyame Jehova ogu ana kuvakuhura.’”

24 Makura Mosesa ta yi tantere Arona novana vendi wovagara ntani noVaisraeli navenye.

22 Jehova ta tantere hena Mosesa asi: 2 “Tantera Arona novana vendi wovagara asi kapisi va nyateke yininke yokupongoka eyi vana kuretera nge Vaisraeli ntani kapisi va swaukise edina lyange lyokupongoka. Ame nyame Jehova. 3 Va tantera asi: ‘Nsene gumwe gomoruvharo rweni ana nyata makura a hedere pepi noyininke yokupongoka eyi ngava gava Vaisraeli kwaJehova, muntu ogo va hepa kumugusa ko* komeho zange. Ame nyame Jehova. 4 Kwato mugara gomoruvharo rwaArona ogu ana kara noyingondwe ndi ana kupitisa yininke koyilyo* yendi yonomuga ndi ogu ana kwata muntu ogu ana nyata pokukwata simpu ndi ana pitisa yitjandera, nga lya yininke yokupongoka ntudi dogoro a kuhuke. 5 ndi nsene a kwata yinamwenyo yoyinunu* eyi ya nyata ndi nsene a kwata muntu ogu ana nyata, ogu na mu ninkisa nage a nyate. 6 Muntu ogu nga kwata yininke eyi, nga nyata dogoro kongurova ntani kapisi nga lye yininke yokupongoka, nye ga hepa kuzogana. 7 Age nga kuhuka apa ngali toka ezuva. Kutunda opo, age kuvhura nga lye yininke yokupongoka, morwa ayo nondya dendi. 8 Ntani kapisi nga lye sikorama esi vana gwana aso sina fu ndi sikorama esi yina dipaga yikasama, morwa ayo ngayi mu nyateka. Ame nyame Jehova.

9 “‘Awo va hepa kulimburukwa mpangera zange ntani kapisi va nyateke yininke yokupongoka, yipo ngava dire kuzona nokufa. Ame nyame Jehova ogu ana kuvakuhura.

10 “‘Kwato muntu ogu va dira kupulisira* nga lya nkenye yininke yokupongoka. Kwato mugenda gomunayirongo ogu ga wiza komupristeli ndi murugani gwendi nga lya ko koyininke yokupongoka. 11 Nye nsene mupristeli a randa muntu noyimaliwa yendi, muntu ogo kuvhura a lye yininke yokupongoka. Vapika ava va retera membo lyendi, nawo kuvhura va lye nondya dendi. 12 Nsene muna gomukadi gomupristeli a kwara mugara ogu ga dira kukara mupristeli,* mukadi ogo kapisi nga lye yininke yokupongoka. 13 Nye nsene a fisa mugara gwendi ndi a lizumba namugara gwendi ntani nsene kwato vana, makura a tengure kembo lyoguhwe omu ga kulira, age kuvhura a lye nondya doguhwe. Nye muntu ogu va dira kupulisira* kapisi nga lye ko.

14 “‘Nsene muntu a lya yininke yokupongoka ga hana kuyidivira, ga hepa kufuta komupristeli nokugwederera po noperesenda 20. 15 Awo kapisi ngava nyateke yininke yokupongoka eyi ngava gava Vaisraeli kwaJehova 16 nokuninkisa Vaisraeli va va tengeke morwa kulya yininke yokupongoka, yeeyi ame nyame Jehova ogu nina kuvakuhura.’”

17 Jehova ta tantere Mosesa asi: 18 “Tantera Arona novana vendi wovagara ntani noVaisraeli navenye asi: ‘Nsene Muisraeli ndi munayirongo ogu ga tunga moIsraeli a gava nzambo zeswakerero kwaJehova, yipo a sikise mo mugano gwendi ndi a gave nzambo morwa eharo lyamwene, 19 age ga hepa kugava ntwedu zokukanguka ndi nonzwigona donongara ndi yikombo, yipo a mu hafere Karunga. 20 Mwa ha gava yimuna oyo nsene ya kara nourema, yeeyi Karunga kapi nga mu hafera.

21 “‘Nsene muntu a gava nzambo zombili kwaJehova, yipo a sikise mo mugano gwendi ndi nzambo zemeharo lyamwene, ga hepa kugava ngombe ndi sikombo ndi nzwi, yipo Karunga a mu hafere. Nonzambo odo da hepa kukara dokukanguka. 22 Kwato kugava nzambo zokutwika ndi zokuteka ndi zokuremana ndi za kara noyisindondo ndi zokuputuka ndi za kara nouvera wosipapa. Mwa ha gava nonzambo dokufana ngoso kwaJehova ndi mu di hwike posizambero saJehova. 23 Kuvhura mu gave ntwedu ndi nzwi ezi za kara neguru limwe lyere ndi lyesupi ngonzambo zemeharo lyeni, nye Karunga kapi nga zi tambura nsene mu zi gava ngonzambo zokusikisa mo mugano. 24 Kapisi ngomu gave kwaJehova nzambo ezi za zonauka kougara ndi ezi va tuka ntani kwato ogu nga gava yimuna oyo ngonzambo mosirongo seni. 25 Kapisi ngomu pulisire vanayirongo va gave nonzambo dokufana ngoso kwaKarunga gweni, yeeyi ado kwa kara nourema ntani da zonauka. Karunga kapi ngadi tambura ntani kapi nga hafera vantu ava vana kudigava.’”

26 Jehova ta tantere Mosesa asi: 27 “Nsene ntana ndi nzwigona zongara ndi sikombo vana si vhara, sa hepa kukara nozina mazuva ntambali, nye kutunda mezuva lyauntantatu, kuvhura va si gave ngonzambo zokuhwika kwaJehova ntani age nga zi tambura. 28 Nye mwa ha dipaga ngombe namunazo ndi nzwi namunazo mezuva limwe tupu.

29 “Nsene tomu gava nzambo zompandu kwaJehova, mwa hepa kuzigava monkedi zouhunga yipo a mu hafere. 30 Azo va hepa kuzilya lyoolyo ezuva. Mwa ha zi hupisa ko dogoro ezuva lyokukwama ko kongurangura. Ame nyame Jehova.

31 “Mwa hepa kusikisa mo nompangera dange. Ame nyame Jehova. 32 Mwa ha swaukisa edina lyange lyokupongoka ntani mwa hepa kupongora nge mokatji koVaisraeli. Ame nyame Jehova ogu ana kumukuhura 33 ntani nyame nina kumugusa mosirongo saEgipite, yipo ni mu likide asi ame Karunga gweni. Ame nyame Jehova.”

23 Jehova ta tantere Mosesa asi: 2 “Tantera Vaisraeli asi: ‘Yipito eyi ga mu tantera Jehova mu dane, kuna kara mazuva aga mwa hepa kuponga kumwe mu karere Karunga. Mwa hepa kutantera vantu va ponge kumwe. Eyi kuna kara yipito yange eyi na tura po kuliza noyinema:

3 “‘Kuvhura mu rugane mazuva ntazimwe, nye ezuva lyauntambali alyo ezuva lyesabata, eli mwa hepa kupwizumuka nokuponga mu karere Karunga. Kapisi ngomu rugane nkenye yirugana. Nkenye oku ngomu tunga, mwa hepa kulitara asi alyo esabata lyaJehova.

4 “‘Eyi kuna kara yipito yaJehova yokupongoka eyi mwa hepa kutantera vantu va ponge kumwe, yipo mu karere Karunga nsene sina siki mo siruwo sayo: 5 Mokwedi kokuhova, mezuva 14 kongurova, ngasi kara sipito saJehova soPaska.

6 “‘Mezuva 15 lyokwedi oko, yipo ngasi tameka sipito saJehova sonomboroto dokudira yihaheso. Mwa hepa kulya mboroto zokudira yihaheso mazuva ntambali. 7 Mezuva lyokuhova lyosipito oso, ngomu ponge mu karere Karunga ntani kapisi ngomu rugane nkenye yirugana youdigu. 8 Nye mwa hepa kugava nonzambo dokuhwika kwaJehova mazuva nagenye ntambali. Ano mezuva lyauntambali, ngomu ponge mu karere Karunga ntani kapisi ngomu rugane nkenye sirugana soudigu.’”

9 Jehova ta tantere hena Mosesa asi: 10 “Tantera Vaisraeli asi: ‘Apa ngomu ka sika mosirongo esi nina kumupa nokuzangura nombuto deni, mwa hepa kutwara situngu simwe somuzangu gweni gokuhova komupristeli. 11 Mupristeli nga zeragura situngu oso komeho zaJehova, yipo Karunga a mu hafere. Age ga hepa kuyirugana konyima zezuva lyEsabata. 12 Mezuva eli nga zeragura situngu oso, mwa hepa kugava kwaJehova nzwigona zongara zomvhura zimwe zonzambo zeswakerero. 13 Nzambo zako zombuto zousura wouwa wokuhura ponokilograma mbali* ou va vhonga nomagadi, va hepa kuuhwika posizambero, yipo u gave edumba lyewa lyokuhafesa Jehova. Nzambo zako zoyikunwa zovhinyu za hepa kusika polita zimwe.* 14 Kapisi ngomu lye nkenye mboroto, mbuto zokukanga ndi mbuto zompe dogoro ngali sike mo ezuva apa ngomu reta nzambo ozo kwaKarunga gweni. Ezi kuna kara veta zokukarerera noruvharo rweni nkenye oku ngomu tunga.

15 “‘Kutunda mezuva lyEsabata apa ngomu gava situngu sombuto ngonzambo zelikido, mwa hepa kuvarura yivike ntambali* yokuzura. 16 Mwa hepa kuvarura mazuva 50 dogoro mezuva eli ngali kwama ko, konyima zoyivike ntambali. Mezuva olyo, ngomu gave nzambo zombuto zompe kwaJehova. 17 Mwa hepa kugusa momambo geni nomuhwi mbali domboroto nokudireta ngonzambo zelikido. Nomboroto odo, ngomu di rugane nousura wouwa wokusika ponokilograma mbali. Usura wonomboroto odo mwa hepa kuuvhonga noyihaheso, yipo ngomu di gave kwaJehova ngomuzangu gokuhova. 18 Ntani ngomu gave nomuhwi odo domboroto kumwe nononzwigona donongara ntambali dokukanguka domvhura zimwe nontwedugona ntani nononzwi mbali donongara. Ado ngomu di gave ngonzambo zeswakerero kwaJehova kumwe nononzambo dako dombuto nedi doyikunwa. Ado ngomu di hwike, yipo ngadi gave edumba lyewa lyokuhafesa Jehova. 19 Ngomu gave hena sikombogona ngonzambo zononzo ntani nononzwigona mbali donongara domvhura zimwe ngonzambo zombili. 20 Mupristeli nga zeragura nonzwigona odo mbali donongara kumwe nonomuhwi domboroto domuzangu gokuhova ngonzambo zelikido komeho zaJehova. Nonzambo odo kwa pongoka kwaJehova ntani ado kwa hamena komupristeli. 21 Ngomu divise vantu mezuva eli, yipo va ponge va karere Karunga. Kapisi ngomu rugane nkenye yirugana youdigu. Ezi kuna kara veta zokukarerera noruvharo rweni nkenye oku ngomu tunga.

22 “‘Apa ngomu pongaika muzangu gweni, kapisi ngomu guse nayinye eyi ya kara konontere domapya geni ndi mu toragure* eyi muna hupisa po. Mwa hepa kuyisigira vantu woruhepo novanayirongo. Ame nyame Karunga gweni Jehova.’”

23 Jehova ta tantere Mosesa asi: 24 “Tantera Vaisraeli asi: ‘Mwa hepa kupwizumuka mezuva lyokuhova lyokwedi kwauntambali. Rumbendo ngomu ru fude yipo ngomu diworoke ezuva olyo. Apa ngomu ru fuda, ngomu ponge kumwe mu karere Karunga. 25 Kapisi ngomu rugane nkenye yirugana youdigu ntani mwa hepa kugava nzambo zokuhwika kwaJehova.’”

26 Jehova hena ta tantere Mosesa asi: 27 “Nye ezuva lyomurongo lyokwedi kwauntambali, ngali kara Ezuva lyoKudongonona po nonzo.* Mwa hepa kuponga kumwe, yipo mu karere Karunga ntani mwa hepa kudilira* nokugava nzambo zokuhwika kwaJehova. 28 Kapisi ngomu rugane nkenye yirugana mezuva eli, morwa alyo ezuva lyokudongonona po nonzo deni komeho zaKarunga gweni Jehova. 29 Nkenye ogu nga dira kudilira* mezuva eli, ngava mu gusa mo* mokatji kovantu vendi. 30 Ntani ame ngani zonagura po muntu ogu nga rugana nkenye yirugana mezuva olyo. 31 Kapisi ngomu rugane nkenye yirugana. Azo kuna kara veta zokukarerera noruvharo rweni nkenye oku ngomu tunga. 32 Alyo ezuva lyesabata eli mwa hepa kupwizumuka ntani mwa hepa kutameka kudilira* mezuva lyauntane lyokwedi oko kongurova. Mwa hepa kulimburukwa esabata kutunda ngurova ozo dogoro ngurova zezuva lyokukwama ko.”

33 Jehova ta tantere hena Mosesa asi: 34 “Tantera Vaisraeli asi: ‘Mezuva 15 lyokwedi kwauntambali, ngomu tameke kudanena Jehova Sipito soYikorogo* mazuva ntambali. 35 Mwa hepa kuponga mezuva lyokuhova mu karere Karunga ntani mwa ha rugana nkenye yirugana youdigu. 36 Mwa hepa kugava nzambo zokuhwika kwaJehova mazuva ntambali. Ano mezuva lyauntantatu, ngomu ponge mu karere Karunga ntani ngomu gave kwaJehova nzambo zokuhwika. Alyo ezuva lyokupongoka ntani kapisi ngomu rugane nkenye yirugana youdigu.

37 “‘Eyi kuna kara yipito yaJehova eyi mwa hepa kutantera vantu va ponge, va karere Karunga nokugava nonzambo edi dokuhwika kwaJehova: nzambo zeswakerero nonzambo zako zombuto ntani nononzambo doyikunwa, kuliza nononzambo edi va hepa kugava nkenye ezuva, 38 kugusa ko nonzambo edi omu gava kwaJehova mezuva lyesabata, nomauhwi geni, nonzambo dokusikisa mo mugano ntani nonzambo demeharo lyeni edi omu gava kwaJehova. 39 Mezuva 15 lyokwedi kwauntambali apa ngomu pongaika muzangu gweni, ngomu dane sipito saJehova mazuva ntambali. Ngomu pwizumuke mezuva lyokuhova ntani mezuva lyauntantatu. 40 Mezuva lyokuhova, ngomu guse enyango lyokoyitji yoyiwa, nomutayi doyitji yonongone, nomutayi doyitji yomahako gomanzi ntani noyitji eyi ya kara momuramba. One ngomu hafa komeho zaKarunga gweni Jehova mazuva ntambali. 41 Ngomu danene Jehova sipito mazuva ntambali momvhura. Ezi kuna kara veta zokukarerera noruvharo rweni. Sipito oso ngomu si dane mokwedi kwauntambali. 42 Mwa hepa kutunga moyikorogo* mazuva ntambali. Vaisraeli navenye va hepa kutunga moyikorogo, 43 yipo ruvharo rweni rokomeho ngaru dive asi ame kwa ninkire Vaisraeli va tunge moyikorogo apa nava gusire mosirongo saEgipite. Ame nyame Karunga gweni Jehova.’”

44 Mosesa makura ta tantere Vaisraeli kuhamena yipito yaJehova eyi ga tura po kuliza noyinema.

24 Jehova ta tantere hena Mosesa asi: 2 “Tantera Vaisraeli ngava ku retere magadi gene-gene gononzwe gokutura monoramba, yipo ngadi teme nkenye apa. 3 Arona a temese nkenye apa noramba monkongoronzugo,* komeho zekehe eli lya kara pepi nosikesa somadiworokeso. Age ga hepa kudivilisa asi ado kuna kutema komeho zaJehova kutunda ngurova dogoro ngurangura. Ezi kuna kara veta zokukarerera noruvharo rweni narunye. 4 Age ga hepa kuwapaika noramba edi da kara kouzweko woramba wongorodo zene-zene, yipo noramba ngadi twikire kutema komeho zaJehova.

5 “Ngo guse usura wouwa, ngo u kange nomboroto dokuliudinga 12.* Nkenye mboroto va hepa kuziruganesa usura wokusika ponokilograma mbali.* 6 Ngo ture nomboroto odo monondambo mbali positafura songorodo zene-zene esi sa kara komeho zaJehova. Nkenye ndambo za hepa kukara nonomboroto ntazimwe. 7 Pwankenye ndambo ngo ture po manganganga gene-gene gokututumikidisa. Ago ngava ga zamba ngonzambo zokuhwika kwaJehova mevango lyonomboroto. 8 Nkenye Esabata, nomboroto odo va hepa kudiwapaika komeho zaJehova. Eli kuna kara egwanekero* lyokukarerera kumwe noVaisraeli. 9 Nomboroto odo nga di kara daArona novana vendi wovagara ntani ado ngava di lira mevango lyokupongoka, morwa ado kwa pongoka unene mokatji kononzambo daJehova dokuhwika. Ezi kuna kara veta zokukarerera.”

10 Pwa kere mumati, ozina kwa kere Vaisraeli ano oguhwe kwa kere Vaegipite. Age kwa zire mokatji koVaisraeli, makura ta ka rwana nomugara goMuisraeli. 11 Mumati ogo kwa ruganesere edina lyaKarunga* momudona nokuliswaura, makura yipo va mu twere kwaMosesa. Ozina kwa kere Seromiti, munaDibili gomorudi rwaDana. 12 Age kwa mu tulire monomango, yipo va ndindire eyi na va tantera Jehova.

13 Jehova ta tantere Mosesa asi: 14 “Pwagesa mokamba muntu ogu ana swaura edina lyaKarunga. Vantu navenye ava vana mu zuvhu, va hepa kukambeka mawoko gawo pomutwe gwendi ano Vaisraeli navenye va hepa kumutoona nomamanya. 15 Ntani tantera Vaisraeli asi: ‘Nkenye ogu nga swaura Karunga gwendi, ngava mu tengeka morwa nzo zendi. 16 Yipo nye, ogu ana ruganesa edina lyaJehova momudona, va hepa kumudipaga. Vaisraeli navenye va hepa kumutoona nomamanya. A kare asi munayirongo ndi Muisraeli, nsene a ruganesa edina lyaKarunga momudona, va hepa kumudipaga.

17 “‘Nsene muntu a dipaga mukwawo, nage va hepa kumudipaga. 18 Nkenye ogu nga dipaga simuna, ga hepa kufuta. Momwenyo mu pite mwenyo mukwawo. 19 Nsene muntu a remeka mukwawo, eyi ana rugana nage va hepa kuyimurugana. 20 Nsene kuna teza mukwawo ndi a twize eho lyendi ndi a kure ezego lyendi, nage va hepa kumurugana yokulifana. 21 Nkenye ogu a dipaga sikorama, ga hepa kusifuta, nye ogu a dipaga mukwawo nage va hepa kumudipaga.

22 “‘Namuvenye mwa hepa kukwama veta zokulifana, a kare asi munayirongo ndi Muisraeli, morwa ame nyame Karunga gweni Jehova.’”

23 Mosesa makura ta yi tantere Vaisraeli, awo makura tava pwagesa mugara ogu ga swawire edina lyaKarunga ponze zokamba. Makura tava mu toona nomamanya. Monkedi ezi, Vaisraeli kwa rugene moomu Jehova ga pangerere Mosesa.

25 Jehova ta tantere hena Mosesa koNdundu zaSinayi asi: 2 “Tantera Vaisraeli asi: ‘Apa ngomu ka sika mosirongo esi nina kumupa, ngomu sige sirongo si pwizumuke ntani ngomu sikise mo esabata lyaJehova. 3 Ngomu kune nombuto momapya geni nomvhura ntazimwe ntani ngomu wapaike yikunino yeni yomandjembere nomvhura ntazimwe, one hena ngomu pongaike muzangu gomosirongo. 4 Nye momvhura zauntambali, sirongo ngasi pwizumuka morwa alyo esabata lyaJehova. Kapisi ngomu kune nombuto momapya geni ndi mu wapaike yikunino yeni yomandjembere. 5 Kapisi ngomu zangure mbuto ezi nga zi mena pwazene konyima zomuzangu gweni ntani kapisi ngomu pongaike mandjembere gokoyitji yeni yomandjembere eyi mwa dira kuwapaika. Yeeyi sirongo ngasi pwizumuka momvhura ozo. 6 Nye mbuto ezi ngazi mena momvhura zesabata, none novapika veni wovagara nava wovakadi novarugani veni ntani vanayirongo ava va tunga none, kuvhura ngomu zi lye. 7 Yimuna noyikorama eyi ya kara mosirongo, nayo kuvhura ngayi lye ko. Nkenye eyi ngayi mena mosirongo kuvhura kuyilya.

8 “‘Ngomu varure nomvhura desabata ntambali yikando ntambali, ano nomvhura odo ngadi sika ponomvhura 49. 9 Mezuva lyomurongo lyokwedi kwauntambali, mEzuva lyoKudongonona po nonzo,* mwa hepa kufuda unene ruvinga yipo vantu navenye womosirongo ngava zuvhe muhagaro gwaro. 10 Mwa hepa kupongora mvhura zau-50, nokudivisa emanguruko kovantu womosirongo seni. Azo ngazi kara Mvhura zEmanguruko* ano nkenye ogu ga hepa kutengura kepya lyendi ntani kekoro lyendi. 11 Mvhura zau-50 ngazi kara Mvhura zEmanguruko. Kapisi ngomu kune mbuto ndi mu zangure mbuto ezi nga zi mena pwazene ndi mu pongaike mandjembere gokoyitji eyi mwa dira kuwapaika. 12 Yeeyi azo Mvhura zEmanguruko ntani mwa hepa kuzitara asi za pongoka. Mwa hepa tupu kulya eyi ya mena pwayene.

13 “‘MoMvhura ezi zEmanguruko, nkenye ogu nga tengure kepya lyendi. 14 Nsene to randesa yuma kwamukweni ndi o rande yuma kwendi, mwa ha lifukira. 15 Nsene to randa epya lyamukweni, wa hepa kugazadara ko nomvhura edi dina piti po kutunda apa za kere Mvhura zEmanguruko ntani ogu ana kukurandesa, ga hepa kukurandesa kuliza nonomvhura edi dina hupu ko dokupongaika muzangu. 16 Nsene nomvhura nonzi dina hupu ko, kuvhura a zerure mukoso gwendi, ano nsene nomvhura nonsesu dina hupu ko, ga hepa kugurumwisa ko, yeeyi age kuna kukurandesa kuliza neyi ngo vhura kuzangura. 17 Kwato ogu nga fukira mukwawo ntani mwa hepa kutjira Karunga gweni, yeeyi ame nyame Karunga gweni Jehova. 18 One ngomu tunga mosirongo nombili, nsene ngomu kwama noveta dange nokulimburukwa nompangera dange. 19 One ngomu zangura muzangu gomunzi ntani ngomu lya mu kute nokutunga mosirongo nombili.

20 “‘Nye nampo kuvhura ngomu lipure asi: “Yisinke nye ngatu lya momvhura zauntambali nsene kapi tuna kukuna mbuto ndi tu pongaike muzangu gwetu?” 21 Ame ngani mu tungika momvhura zauntazimwe, ano one ngomu zangura muzangu gomunzi gokuvhura kulya nomvhura ntatu. 22 Nampili apa ngomu kuna mbuto momvhura zauntantatu, one simpe ngomu lya eyi mwa zangwire momvhura zauntazimwe dogoro momvhura zauntane. One ngomu lya muzangu ogo dogoro ngomu zangure eyi mwa kuna.

23 “‘Mapya geni kapisi ngomu ga randeserere, yeeyi ago gange. Ame kumutara asi one vanayirongo. 24 Mosirongo nasinye esi nina kumupa mu pinge, mwenyepya ga kara nononkondo dokuranda epya eli ga randesa.

25 “‘Nsene mukweni ruhepo, makura a randese epya lyendi, gekoro lyendi lyene-lyene gokuvhura kumugusa moudigu, kuvhura a wize a ya rande epya eli ga randesa. 26 Nsene muntu kapi ga kara nekoro lyendi gokuvhura kumugusa moudigu, nye konyima aya ngawope nokugwana yimaliwa yokuranda epya lyendi eli ga randesa, 27 ga hepa kuvarura nomvhura edi da pita po kutunda apa ga li randesa, makura a fute ogu ga li randa yimaliwa yonomvhura edi dina hupu ko komeho zi sike Mvhura zEmanguruko, makura age kuvhura a guse epya lyendi.

28 “‘Nye nsene kapi ana kuvhura kugwana yimaliwa yokuranda epya lyendi eli ga randesa, alyo lya hepa kukara kogu ga li randa dogoro moMvhura zEmanguruko. Age ngava li mu tengwidira momvhura ozo ntani ngali kara lyendi.

29 “‘Nsene muntu a randesa embo lyendi eli lya kara mositata esi va kundurukida nekuma, age nga kara nononkondo dokuliranda mvhura nazinye kutunda apa ga li randesere. 30 Nye nsene zi pita mvhura ozo ga hana kuliranda, ogu ga li randa ngali kara lyendi noruvharo rwendi. Embo olyo kapi ngava li tengwida moMvhura zEmanguruko. 31 Nye nsene embo kwa kara oku va dira kukundurukida nekuma, alyo va hepa kulitara ngwendi moomu ava tara epya. Ogu ga li randesa kuvhura a li rande nkenye apa ntani moMvhura zEmanguruko va hepa kulitengwida.

32 “‘Varevhi ava va kara nomambo moyitata yawo, awo va kara nononkondo dokuzowora mambo gawo dogoro narunye. 33 Nsene Varevhi kapi vana kuzowora mambo gawo aga ga kara mositata, ago ngava ga va tengwidira moMvhura zEmanguruko, morwa mambo ogo kuna kara upingwa wawo mokatji koVaisraeli. 34 Nye mavango gokulisira yimuna yawo aga ga kundurukida yitata yawo kapisi ngava ga randese, yeeyi ago kuna kara upingwa wawo wokukarerera.

35 “‘Nsene mukweni ogu ga tunga pepi nove ruhepo ntani kapi ana kuvhura kulirera mwene, wa hepa kumuvatera ngwendi moomu no vatera munayirongo, yipo a twikire kuparuka. 36 Wa ha mu pura nsonso.* Wa hepa kutjira Karunga goge, yipo mukweni nga twikire kuparuka. 37 Wa ha mu korotesa yimaliwa yoge ndi o mu pe nondya doge yipo o gwanene po nsonso. 38 Ame nyame Karunga gweni Jehova ogu ga mu gusa mosirongo saEgipite ni mu pe sirongo saKanani, yipo ni mu likide asi ame Karunga gweni.

39 “‘Nsene mukweni ogu ga tunga pepi nove ruhepo, makura a ku pure o mu rande yipo a kare mupika goge, wa ha mu sininika a rugane yirugana youpika. 40 Wa hepa kumutekura ngwendi murugani ndi munayirongo. Age ga hepa kukuruganena dogoro moMvhura zEmanguruko. 41 Makura nage novana vendi* ava va tunga nage ngava tengure kekoro lyendi. Age ga hepa kutengura kepya eli va pingire ozinakuru. 42 Yeeyi Vaisraeli vapika vange ava na gusa mosirongo saEgipite. Awo kapisi va lirandese vene ngwendi moomu ava randesa vapika. 43 Mwa ha tekura vakweni nonyanya ntani mwa hepa kutjira Karunga gweni. 44 Vapika veni wovagara nava wovakadi va hepa kutundilira konomuhoko edi da mu kundurukida, konomuhoko odo yiko nomu randa mupika gomugara ndi gomukadi. 45 Ntani one kuvhura mu rande vapika kovanayirongo ava va tunga none ntani kovana vawo ava va retera mosirongo seni. Awo ngava kara upingwa weni. 46 Konyima zapa ngomu fa, vana veni kuvhura ngava va pinge ntani awo ngava twikira kuruganena vana veni ngovapika. One kuvhura mu ruganese Vaisraeli vakweni ngovarugani, nye kapisi ngomu va tekure monkedi zonyanya.

47 “‘Nye nsene munayirongo ogu ga tunga none a ngawopa, nye Muisraeli mukweni ogu ga tunga pepi nomunayirongo ogo, ta kara munaruhepo makura a pure munayirongo ndi ekoro lyomunayirongo ogo a mu rande, 48 age nga twikira kukara nononkondo dokumuzowora konyima zapa ngava mu randa. Mukurwendi ndi mumbyendi gomugara kuvhura nga mu zowore, 49 ndi hekurwendi ndi muna hekurwendi gomugara, kuvhura nga mu zowore ndi gekoro lyendi lyene-lyene, kuvhura nga mu zowore.

“‘Ndi nsene mwene a ngawopa, kuvhura a lizowore mwene. 50 Age ga hepa kuvarura kumwe nogu ga mu randa nomvhura edi da pita po kutunda apa va mu randa dogoro moMvhura zEmanguruko. Ano yimaliwa eyi va mu rende ya hepa kuliza nosivaro sonomvhura odo. Mazuva aga ga rugene posiruwo oso va hepa kugakonakona noku mu futa kuliza neyi ava futu murugani. 51 Nsene nomvhura nonzi dina hupu ko, age ga hepa kufuta yimaliwa kuliza nonomvhura edi dina hupu ko. 52 Nye nsene nomvhura dononsensu tupu dina hupu ko komeho zi sike Mvhura zEmanguruko, age ga hepa kuvarura yimaliwa eyi na futa kuliza nonomvhura edi dina hupu ko. 53 Age ga hepa kumutekura ngomurugani siruwo nasinye ntani kapisi va mu tekure nonyanya. 54 Nye nsene kapi ana kuvhura kulizowora mwene kuliza nononkedi edi, age nga manguruka tupu moMvhura zEmanguruko kumwe novana vendi.*

55 “‘Yeeyi Vaisraeli awo vapika vange ava na gusa mosirongo saEgipite. Ame nyame Karunga gweni Jehova.

26 “‘Mwa ha liruganena yikarunga yokudira mulyo ntani mwa ha lihongera efano ndi mu liruganene mamanya gokupongoka ndi mu ture emanya mosirongo seni yipo mu li nyongamene, yeeyi ame nyame Karunga gweni Jehova. 2 Mwa hepa kusikisa mo esabata lyange ntani mwa hepa kufumadeka* evango lyange lyokupongoka. Ame nyame Jehova.

3 “‘Nsene mu twikira kulimburukwa noveta nonompangera dange, 4 ame ngani mu rokesera mvhura posiruwo sokuwapera ntani mapya ngaga mu pa muzangu, ano yitji yomosirongo ngayi mu pa enyango. 5 One ngomu hwaga dogoro posiruwo esi aga pi mandjembere ntani ngomu nyanga mandjembere dogoro posiruwo sokukuna. One ngomu lya mboroto zeni dogoro to mu kuta ntani ngomu tunga mosirongo seni nombili. 6 Ame ngani ninka mosirongo mu kare mbili, ano one ngomu rara mwa hana woma. Ame hena ngani tjida mosirongo yikasama yosiponga ntani kwato ogu nga mu rwisa norufuro. 7 One ngomu tjida nonkore deni ntani ngomu di dipaga norufuro. 8 Vantu veni vatano ngava tjida nonkore deni 100 ntani vantu veni 100 ngava tjida nonkore deni 10 000, ano one ngomu dipaga nonkore deni norufuro.

9 “‘Ame ngani mu tungika nokumuvhukisa ntani ngani sikisa mo egwanekero* eli na tura po kumwe none. 10 Apa ngomu lya eyi mwa zangwire mvhura ezi zina ka pita, ngomu zuguma muzangu gweni gomukurukuru, yipo mu gwane ko evega lyokutura muzangu gweni gomupe. 11 Ame ngani tura nkongoronzugo zange mokatji keni ntani ame* kapi ngani mu nyoka. 12 Ame ngani kara mokatji keni ntani ngani kara Karunga gweni, ano one ngomu kara vantu vange. 13 Ame nyame Karunga gweni Jehova, ogu ga mu gusa moupika mosirongo saEgipite. Ame kwa teza ndjoko zeni ntani kwa mu ninka mu gende ngovantu wokumanguruka.

14 “‘Nye nsene kapi ngomu purakena nge ndi mu dire kulimburukwa nompangera nadinye edi 15 ntani nsene ngomu nyoka noveta dange mu di nyenge nokuteza po egwanekero lyange, 16 ame ngani mu tengeka noyininke eyi: Ngomu kara noutjirwe nouvera wokapunga* ntani ngomu pyapyara morutu nokuninka meho geni ga dire kumona nawa ntani ngani ninka marutu geni ga dire kukara nononkondo. One ngomu kuna mbuto zeni, nye nonkore deni yido ngadi lya eyi ngomu zangura. 17 Ame kapi ngani mu tambura ano nonkore deni ngadi mu funda ntani vantu ava va mu nyenga ngava mu hepeka. One ngomu tjwayuka pwa hana ogu ana kumutjida.

18 “‘Nsene yininke oyo kapi yina kumuninkisa mu purakene nge, ame ngani mu tengeka yikando ntambali morwa nonzo deni. 19 Ame ngani mu ninkisa mu hageke kukara ndino nokulinenepeka ntani ngani ninka eguru lyeni li dire kumupa mvhura,* ano evhu lyeni li dire kumena yuma.* 20 One ngomu hepeka nonkondo deni, morwa mapya geni kapi ngaga mu pa muzangu ntani yitji yomosirongo kapi ngayi yima enyango.

21 “‘Nye nsene mu twikira kurwanesa nge ntani nokunyoka kupurakena nge, ame ngani mu tengeka yikando ntambali kuliza nononzo deni. 22 Ame ngani mu tumina yikasama ntani ayo ngayi dipaga vana veni noyimuna yeni nokusesupika sivaro sovantu veni ntani yitaura yeni ngayi kara siporongwa.

23 “‘Nsene simpe ngomu nyoka kutambura mapukururo gange nokutwikira kurwanesa nge, 24 ame ngani mu handukira unene ntani ngani mu toona yikando ntambali morwa nonzo deni. 25 Ame ngani ninka nonkore deni di mu homokere norufuro, morwa mwa teza po egwanekero lyange. Nsene ngomu tjwayukira moyitata yeni, ame ngani mu tumina ehamba mokatji keni ntani ngani mu gava momawoko gononkore deni. 26 Apa ngani mu hakana mboroto* zeni, vakadi murongo ngava kanga mboroto mesuga limwe tupu ntani awo ngava zi viha nokumupa mboroto zonsensu; ngomu lya nye kapi ngomu kuta.

27 “‘Nsene simpe kapi ngomu purakena nge nokutwikira kurwanesa nge, 28 ame ngani mu handukira unene ntani ngani mu tengeka yikando ntambali morwa nonzo deni. 29 Yipo nye, one ngomu lya vana veni wovagara nava wovakadi. 30 Ame ngani zonagura po mavango* geni aga omu karere yikarunga yeni yoyimpempa ntani ngani zonagura po yizambero yeni yoyitutumikidiso nokupongaika yimpu yeni ni yi ture pondambo zoyikarunga yeni yokunyata. Ame ngani mu nyoka morwa one kwa nyata. 31 Ame ngani gava yitata yeni kononkore deni ntani ngani ninka mavango geni aga omu karerere yikarunga yeni yoyimpempa ga kare muporongwa ntani kapi ngani hafera edumba lyewa lyononzambo deni. 32 Ame ngani ninka sirongo seni si kare muporongwa, ano nonkore deni edi da tunga mo apa ngadi yi mona ngadi tukuka. 33 Ame ngani mu ninka mu lihanene mokatji konomuhoko dapeke nokuninka nonkore deni di mu rwanese norufuro, ano sirongo seni ngasi kara muporongwa ntani yitata yeni ngayi zonauka po.

34 “‘Apa ngomu kara mosirongo sononkore deni, sirongo seni ngasi pwizumuka, morwa kapi sa pwizumukire. Posiruwo oso, sirongo ngasi pwizumuka morwa kapi sa pwizumukire. 35 Apa ngasi kara muporongwa sirongo seni aso ngasi pwizumuka, morwa kapi sa pwizumukire apa mwa tungire mo.

36 “‘Ano ava ngava paruka, ame ngani va ninka va kare nowoma moyirongo yononkore dawo. Awo ngava duka nampili kuna kuzuvha sihako sina kureruka kompepo ntani awo ngava duka ngwendi kweli ogu ana kuvatjida norufuro. Awo ngava liganda pwa hana ogu ana kuvatjida. 37 Awo ngava ligandanga pokuduka ngwendi va va dina kutjida nonkore nampili kwato ogu ana kuvatjida. One kapi ngomu vhura kurwanesa nonkore deni. 38 Sinzi seni ngomu fira mosirongo sonomuhoko dapeke; one ngomu fira mosirongo sononkore deni. 39 One ngomu hupa po, ngomu hepera moyirongo yononkore deni morwa mapuko geni. Awo ngava hepa morwa mapuko govaguhyavawo. 40 Makura awo ngava tongonona mapuko gawo ntani nomapuko nokudira kulimburukwa kovaguhyavawo ntani awo ngava yi tambura asi kapi va limburukwa nge pokurwanesa nge. 41 Ame yiyo nava handukira unene pokuvatwara mosirongo sononkore dawo.

“‘Nampo ntani ngava hageka kukukutika nomutjima dawo, va linunupike makura awo ngava futa mapuko gawo. 42 Ame ngani diworoka egwanekero eli na tulire po naJakopo naIsaka naAbirahamu ntani ame ngani diworoka sirongo. 43 Apa ngava siga sirongo, aso ngasi pwizumuka nokukara muporongwa. Awo ngava va tengeka morwa mapuko gawo ntani morwa awo kwa nyoka kulimburukwa nompangera dange nokudinyenga. 44 Nye nampili ngoso, apa ngava kara mosirongo sononkore dawo, ame kapi ngani va nyoka ndi ni va nyenge dogoro ni hare kuvazonagwilira po. Nsene ngani yi rugana oyo, ngani teza po egwanekero lyange kumwe nawo, yeeyi ame nyame Karunga gwawo Jehova. 45 Awo ngava ninkisa nge ni diworoke egwanekero eli na tulire po kumwe novazinyakurwawo, ava na gusire mosirongo saEgipite ado nomuhoko kuna kutara, yipo ni va likide asi ame Karunga gwawo. Ame nyame Jehova.’”

46 Edi kuna kara nompangera nonoveta edi ga tanterere Jehova Vaisraeli kupitira mwaMosesa koNdundu zaSinayi.

27 Jehova ta tantere hena Mosesa asi: 2 “Tantera Vaisraeli asi: ‘Nsene mugara ta tumbwidire kugava kwaJehova yimaliwa eyi va tura po yokufutira muntu,* eyi yiyo na vhura kugava: 3 nsene mugara gonomvhura 20 dogoro 60 ga hepa kufuta yisiliveli* 50, kuliza noyisiliveli yekevango lyokupongoka. 4 Nye nsene mukadi, ga hepa kufuta yisiliveli 30. 5 Nsene gonomvhura ntano dogoro 20, gomumati ga hepa kufuta yisiliveli 20, ano gomukadona yisiliveli 10. 6 Nsene gokwedi kumwe dogoro nomvhura ntano, gomumati ga hepa kufuta yisiliveli yitano, ano gomukadona yisiliveli yitatu.

7 “‘Nsene gonomvhura 60 yikandwise, mugara ga hepa kufuta yisiliveli 15, ano mukadi yisiliveli 10. 8 Nye nsene mugara ogo kapi ana kuvhura kufuta morwa ruhepo, ga hepa kuza komupristeli, makura age nga mu tomena asi yingapi na futa. Mupristeli nga toma kuliza neyi na vhura kufuta ogu ana kutura po mugano.

9 “‘Nsene muntu ta tumbwidire kugava simuna sokukuhuka kwaJehova, nkenye simuna esi nga gava kwaJehova ngasi pongoka. 10 Age kapi ta vhuru kusipinganesera po ndi kusisintisa nosimuna sosiwa ndi sosidona. Nye nsene ta hetekere ko kusintisa simuna, nayinye mouvali wayo tayi kara yokupongoka. 11 Nsene ta tumbwidire kugava simuna sokunyata esi ava dili kugava ngonzambo kwaJehova, age ga hepa kusitwara komupristeli. 12 Mupristeli nga toma asi yimaliwa yingapi ga hepa kugava, yi kare asi simuna oso siwa ndi sidona. Ano yimaliwa eyi nga toma mupristeli yiyo yooyo nga futa. 13 Nye nsene ogu ana si gava ana hara kuzowora simuna oso, age ga hepa kugweda po noperesenda 20 pomukoso gwaso.

14 “‘Nsene mugara ta pongora nzugo zendi yipo azi gave kwaJehova, mupristeli nga toma yimaliwa eyi na gava, yi kare asi nzugo ozo ngwa ndi ndona. Ano yimaliwa eyi nga toma mupristeli, yiyo ngazi kosa nzugo ozo. 15 Nye nsene ogu ga pongora nzugo zendi ana hara kuzizowora, ga hepa kugweda po noperesenda 20 pomukoso gwazo, makura azo ngazi kara zendi.

16 “‘Nsene mugara ta pongora ruha rumwe rwepya lyendi yipo a ru gave kwaJehova, mukoso goruha oro va hepa kuguvarura kuliza nombuto ezi va hepa kukuna mepya olyo: sipako sombuto sonokilograma 130,* ga hepa kusiranda noyisiliveli* 50. 17 Nsene ta pongora epya lyendi moMvhura zEmanguruko,* mukoso gwalyo kapi ngagu litjindja. 18 Nsene a pongora epya lyendi konyima zoMvhura zEmanguruko, mupristeli nga varura nomvhura edi dina hupu ko komeho zi sike Mvhura zEmanguruko zokukwama ko ntani va hepa kugurumuna ko komukoso gwalyo kuliza nonomvhura edi dina hupu ko. 19 Nsene ogu ga pongora epya lyendi ana hara kulizowora, ga hepa kugweda po noperesenda 20 pomukoso gwalyo, makura alyo ngali kara lyendi. 20 Nsene kapi nga zowora epya olyo makura va lirandese komugara gwapeke, age kapi nga vhura kulizowora hena. 21 Apa ngava litengwida epya olyo moMvhura zEmanguruko, alyo ngava li gava kwaJehova ntani alyo ngali kara sininke sokupongoka kwendi. Alyo ngali kara lyovapristeli.

22 “‘Nsene muntu a pongora epya eli ga randa nokuligava kwaJehova, nye epya olyo kapisi lyokupinga, 23 mupristeli nga varura mukoso gwalyo kuliza nonomvhura edi dina hupu ko komeho zi sike Mvhura zEmanguruko. Makura age ga hepa kugava yimaliwa oyo ezuva lyoolyo. Yimaliwa oyo kwa pongoka kwaJehova. 24 MoMvhura zEmanguruko, epya olyo ngava litengwida kwamwenyalyo ogu ga li randesere.

25 “‘Mukoso gwepya va hepa kuguvarura kuliza noyisiliveli yekevango lyokupongoka. Ano sisiliveli sa hepa kukara nomukumo gonograma 12.*

26 “‘Nye kwato gokuvhura kuzowora mbeli zosimuna, yeeyi nombeli kwa hamena kwaJehova. Yi kare asi zontwedu ndi zonzwi, ayo kwa hamena kwaJehova. 27 Nsene simuna oso kapi sa kuhuka, ga hepa kusizowora nomukoso ogu va tura po ntani ga hepa kugweda po noperesenda 20 pomukoso gwaso, nye nsene kapi ana kusizowora, aso ngava si randesa kuliza noyimaliwa eyi va tura po.

28 “‘Nye kwato ogu nga randesa ndi a rande sininke esi ga gava* kwaJehova, yi kare asi muntu ndi simuna ndi epya lyendi. Nkenye sininke esi ava gava kwaJehova sa pongoka unene. 29 Ntani hena, kwato kuzowora muntu ogu va gava va ka mu dipage. Age va hepa kumudipaga.

30 “‘Nkenye siumurongo seyi ngomu zangura ndi senyango lyokoyitji, kwa hamena kwaJehova. Ayo kuna kara yininke yokupongoka kwaJehova. 31 Nye nsene muntu ana hara kuzowora siumurongo soyininke eyi ga gava, ga hepa kugweda po noperesenda 20 pomukoso gwayo. 32 Nkenye siumurongo sonongombe ntani soyikombo nononzwi, va hepa kusigava kwaJehova. Musita nsene ta varura yimuna,* nkenye simuna* somurongo ga hepa kusigava kwaKarunga. Nkenye simuna somurongo kwa pongoka. 33 Age kapisi a si konakone yi kare asi siwa ndi sidona ntani kapi ta vhuru kusisintisa. Nye nsene a hetekera ko kusisintisa, nayinye mouvali wayo tayi kara yokupongoka. Aso kapi ta vhuru kusizowora.’”

34 Edi kuna kara noveta edi ga geve Jehova koVaisraeli kupitira mwaMosesa koNdundu zaSinayi.