NUMERI

1 Mezuva lyokuhova lyokwedi kwauvali momvhura zauvali kutunda apa va tundire Vaisraeli moEgipite, Jehova kwa uyungire naMosesa momburundu zaSinayi monkongoronzugo.* Age kwa tente asi: 2 “Varura Vaisraeli* navenye ntani tjanga madina govagara navenye kuliza nomapata gawo nomazimo gawo. 3 Nove naArona mwa hepa kutjanga nombunga dovagara wonomvhura 20 yikandwise, ava ngava vhura kuza koyita moIsraeli.

4 “Horowora mwankenye rudi mugara gumwe a ku vatere. Age ga hepa kukara esimbi lyomorudi rwawo. 5 Aga kuna kara madina govagara ava ngava kuvatera: morudi rwaRubena, Elisuli munaSedeuli gomugara; 6 morudi rwaSimiyoni, Serumiyeli munaSulisadayi; 7 morudi rwaJuda, Nasoni munaAminadabu; 8 morudi rwaIsasikali, Netaneli munaSuwara; 9 morudi rwaSeburoni, Eliyaba munaHeroni; 10 morudi rwaEfurayimi, Elisama munaAmihudi; morudi rwaManase, Gamaliyeli munaPedasuli. Efurayimi naManase kwa kere vana vaJosefa; 11 morudi rwaMbenyameni, Abidani munaNgidiyoni; 12 morudi rwaDana, Ahiyeseli munaAmisadayi; 13 morudi rwaAseli, Pagiyeli munaOhurani; 14 morudi rwaGada, Eliyasafa munaDeuli; 15 morudi rwaNafitali, Ahira munaEnani. 16 Ava yiwo va horowora moIsraeli. Awo masimbi gomomarudi gawo, ava va horowora va pitisire mayovi govantu moIsraeli.”

17 Makura Mosesa naArona tava zigida vagara ava ga horowere Karunga. 18 Awo kwa tanterere vantu navenye va ponge mezuva lyokuhova mokwedi kwauvali, yipo va va tjange kuliza nomadina gawo nomapata gawo nomazimo gawo. Vagara navenye wonomvhura 20 yikandwise kwa va tjenge, 19 ngwendi moomu Jehova ga pangerere Mosesa. Age kwa va tjangerere momburundu zaSinayi.

20 Vana wovagara vaRubena, ogu ga kere mbeli zaIsraeli kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise, ava ngava vhura kuza koyita kwa va varwire, 21 ano sivaro sovantu womorudi rwaRubena ava va tjenge kwa kere 46 500.

22 Womoruvharo rwaSimiyoni kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 23 ano sivaro sovantu womorudi rwaSimiyoni ava va tjenge kwa kere 59 300.

24 Womoruvharo rwaGada kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 25 ano sivaro sovantu womorudi rwaGada ava va tjenge kwa kere 45 650.

26 Womoruvharo rwaJuda kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 27 ano sivaro sovantu womorudi rwaJuda ava va tjenge kwa kere 74 600.

28 Womoruvharo rwaIsasikali kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 29 ano sivaro sovantu womorudi rwaIsasikali ava va tjenge kwa kere 54 400.

30 Womoruvharo rwaSeburoni kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 31 ano sivaro sovantu womorudi rwaSeburoni ava va tjenge kwa kere 57 400.

32 Womoruvharo rwaEfurayimi munaJosefa kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 33 ano sivaro sovantu womorudi rwaEfurayimi ava va tjenge kwa kere 40 500.

34 Womoruvharo rwaManase kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 35 ano sivaro sovantu womorudi rwaManase ava va tjenge kwa kere 32 200.

36 Womoruvharo rwaMbenyameni kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 37 ano sivaro sovantu womorudi rwaMbenyameni ava va tjenge kwa kere 35 400.

38 Womoruvharo rwaDana kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 39 ano sivaro sovantu womorudi rwaDana ava va tjenge kwa kere 62 700.

40 Womoruvharo rwaAseli kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 41 ano sivaro sovantu womorudi rwaAseli ava va tjenge kwa kere 41 500.

42 Womoruvharo rwaNafitali kwa va tjenge kuliza nomadina gawo, nomapata gawo ntani nomazimo gawo. Vagara navenye wonomvhura 20 yikandwise ava ngava vhura kuza koyita kwa va varwire, 43 ano sivaro sovantu womorudi rwaNafitali ava va tjenge kwa kere 53 400.

44 Mosesa naArona nomasimbi 12 gomomarudi goVaisraeli yiwo va tjenge vagara owo. 45 Vaisraeli navenye wonomvhura 20 yikandwise ava ngava vhura kuza koyita moIsraeli kwa va tjenge kuliza nomazimo gawo, 46 ano sivaro sawo kwa kere 603 550.

47 Nye rudi rwaRevhi kapi va ru tjenge kumwe nomarudi makwawo. 48 Jehova kwa tanterere Mosesa asi: 49 “Kapisi ngo tjange womorudi rwaRevhi ndi o gwederere sivaro sawo kumwe nesi soVaisraeli. 50 Wa hepa kuhorowora Varevhi va pakere mbili nkongoronzugo, omu mwa kara madiworokeso noyiruganeso yako nayinye ntani nanayinye eyi ya kara mo nokusimba nkongoronzugo noyiruganeso yamo nayinye. Awo ngava rugana konkongoronzugo nokudika notende dawo va kundurukide nkongoronzugo. 51 Nsene tomu diruka, Varevhi yiwo wokudirura nkongoronzugo ntani yiwo ngava zi dika. Ano nsene a hedera ko nkenye muntu ogu va dira kupulisira,* va hepa kumudipaga.

52 “Nkenye Muisraeli ga hepa kudikira tende zendi koruha oku va mu tura, oku za hamena mbunga zawo zomarudi gatatu. 53 Varevhi va hepa kudika notende dawo va kundurukide nkongoronzugo omu mwa kara madiworokeso, yipo Karunga a dire kuhandukira Vaisraeli ntani Varevhi va hepa kupakera mbili* nkongoronzugo omu mwa kara madiworokeso.”

54 Vaisraeli kwa rugene nayinye eyi ga va tanterere Jehova kupitira mwaMosesa. Awo kwa yi rugene moomu va va tanterere.

2 Jehova ta tantere Mosesa naArona asi: 2 “Vaisraeli va hepa kudika notende dawo koruha oku va tura rudi rwawo, oku za hamena mbunga zawo zomarudi gatatu. Nkenye ogu ga hepa kudikira tende zendi oku sa karera sidiviso sezimo lyawo ntani va hepa kupirukidisira notende dawo konkongoronzugo* yipo va zi kundurukide.

3 “Marudi gatatu aga ngaga dikira notende dawo koUpumezuva kuna kara rudi rwaJuda nombunga zawo,* ano esimbi lyomorudi rwaJuda kuna kara Nasoni munaAminadabu. 4 Sivaro sava va tjanga mombunga zawo ava ngava za koyita kuna kara 74 600. 5 Awo ngava dika notende dawo kumwe norudi rwaIsasikali, ano esimbi lyomorudi rwaIsasikali kuna kara Netaneli munaSuwara. 6 Sivaro sava va tjanga mombunga zawo ava ngava za koyita kuna kara 54 400. 7 Rudi rwaSeburoni naro ngaru dika notende dawo kumwe nawo, ano esimbi lyomorudi rwaSeburoni kuna kara Eliyaba munaHeroni. 8 Sivaro sava va tjanga mombunga zawo ava ngava za koyita kuna kara 57 400.

9 “Navenye ava va tjanga mombunga ezi ngava pitisira worudi rwaJuda kuna kara 186 400. Awo yiwo ngava hova kudirura notende dawo.

10 “Marudi gatatu aga ngaga dikira notende dawo koMbindakano kuna kara rudi rwaRubena nombunga zawo,* ano esimbi lyomorudi rwaRubena kuna kara Elisuli munaSedeuli. 11 Sivaro sava va tjanga mombunga zawo ava ngava za koyita kuna kara 46 500. 12 Awo ngava dika notende dawo kumwe norudi rwaSimiyoni, ano esimbi lyomorudi rwaSimiyoni kuna kara Serumiyeli munaSulisadayi. 13 Sivaro sava va tjanga mombunga zawo ava ngava za koyita kuna kara 59 300. 14 Rudi rwaGada naro ngaru dika notende dawo kumwe nawo, ano esimbi lyomorudi rwaGada kuna kara Eliyasafa munaReweli. 15 Sivaro sava va tjanga mombunga zawo ava ngava za koyita kuna kara 45 650.

16 “Navenye ava va tjanga mombunga ezi ngava pitisira worudi rwaRubena kuna kara 151 450 ntani awo yiwo ngava kwama ko kudirura notende dawo.

17 “Apa ngava dirura nkongoronzugo, Varevhi va hepa kukara pokatji komarudi gapeke.

“Nkenye rudi rwa hepa kugenda pevega lyawo, kuliza nombunga zawo zomarudi gatatu.

18 “Marudi gatatu aga ngaga dikira notende dawo koUtokero kuna kara rudi rwaEfurayimi nombunga zawo,* ano esimbi lyomorudi rwaEfurayimi kuna kara Elisama munaAmihudi. 19 Sivaro sava va tjanga mombunga zawo ava ngava za koyita kuna kara 40 500. 20 Rudi rwaManase naro ngaru dika notende dawo kumwe nawo, ano esimbi lyomorudi rwaManase kuna kara Gamaliyeli munaPedasuli. 21 Sivaro sava va tjanga mombunga zawo ava ngava za koyita kuna kara 32 200. 22 Rudi rwaMbenyameni naro ngaru dika notende dawo kumwe nawo. Ano esimbi lyomorudi rwaMbenyameni kuna kara Abidani munaNgidiyoni. 23 Sivaro sava va tjanga mombunga zawo ava ngava za koyita kuna kara 35 400.

24 “Navenye ava va tjanga mombunga ezi ngava pitisira worudi rwaEfurayimi kuna kara 108 100 ntani awo yiwo ngava kwama ko kudirura notende dawo.

25 “Marudi gatatu aga ngaga dikira notende dawo koMuzogo kuna kara rudi rwaDana nombunga zawo,* ano esimbi lyomorudi rwaDana kuna kara Ahiyeseli munaAmisadayi. 26 Sivaro sava va tjanga mombunga zawo ava ngava za koyita kuna kara 62 700. 27 Awo ngava dika notende dawo kumwe norudi rwaAseli, ano esimbi lyomorudi rwaAseli kuna kara Pagiyeli munaOhurani. 28 Sivaro sava va tjanga mombunga zawo ava ngava za koyita kuna kara 41 500. 29 Rudi rwaNafitali naro ngaru dika notende dawo kumwe nawo, ano esimbi lyomorudi rwaNafitali kuna kara Ahira munaEnani. 30 Sivaro sava va tjanga mombunga zawo ava ngava za koyita kuna kara 53 400.

31 “Navenye ava va tjanga mombunga ezi ngava pitisira worudi rwaDana kuna kara 157 600. Awo yiwo ngava hulilira kudirura notende dawo kuliza nombunga zawo zomarudi gatatu.”

32 Esi yiso sivaro soVaisraeli ava va tjenge kuliza nomazimo gawo. Navenye ava va tjenge ava ngava za koyita kwa kere 603 550. 33 Nye Varevhi kapi vava tjenge kumwe noVaisraeli vakwawo ngwendi moomu Jehova ga pangerere Mosesa. 34 Vaisraeli kwa rugene nayinye eyi ga tanterere Jehova Mosesa. Yimo nye ngesi va dikire notende dawo Vaisraeli kuliza nonombunga dawo domarudi gatatu ntani nomu va dirukire kuliza nomazimo gawo nomapata gawo.

3 Oru yiro ruvharo rwaArona naMosesa apa ga uyungire Jehova naMosesa koNdundu zaSinayi. 2 Aga kuna kara madina govana vaArona: mbeli Nadabu, kukwama ko Abihu ntani Eliyasara naItamara. 3 Aga kuna kara madina govana vaArona ava va gwavekere yipo va kare vapristeli. 4 Nye Nadabu naAbihu kwa fililire komeho zaJehova momburundu zaSinayi, apa va zembe yininke* eyi ga dira kupulisira Jehova ntani awo kapi va kere novana. Nye Eliyasara naItamara kwa twikilire kurugana ngovapristeli kumwe naguhyawo Arona.

5 Jehova makura ta tantere Mosesa asi: 6 “Reta rudi roVarevhi komeho, o va ninke va sikame komeho zomupristeli Arona ntani awo ngava rugana kumwe nendi. 7 Awo ngava sikise mo yirugana yawo yokonkongoronzugo ano monkedi ezi, awo ngava vatera Arona nombunga nazinye konkongoronzugo. 8 Awo va hepa kupakera mbili yiruganeso nayinye yokonkongoronzugo* ntani ngava vatere Vaisraeli pokusikisa mo yirugana yawo konkongoronzugo. 9 Wa hepa kugava Varevhi kwaArona ntani kovana vendi. Awo yiwo va horowora mokatji koVaisraeli yipo va vatere Arona. 10 Wa hepa kuhorowora Arona novana vendi va kare vapristeli. Nkenye muntu ogu va dira kupulisira* ogu nga rugana yirugana yawo, va hepa kumudipaga.”

11 Jehova ta tantere hena Mosesa asi: 12 “Ame nina horowora Varevhi va pinganene po nombeli nadinye doVaisraeli, ano Varevhi ngava kara vange. 13 Yeeyi nombeli nadinye dange. Apa na dipagere nombeli nadinye mosirongo saEgipite, ame kwa horowere* nombeli nadinye doVaisraeli nedi doyimuna di kare dange. Ame nyame Jehova.”

14 Jehova ta tantere hena Mosesa momburundu zaSinayi asi: 15 “Tjanga vana vaRevhi kuliza nomazimo gawo ntani nomapata gawo. Wa hepa kutjanga vagara navenye kutundilira komukeke gokwedi kumwe yikandwise.” 16 Mosesa makura ta va tjanga ngwendi moomu ga yi mu pangerere Jehova. 17 Madina govana vaRevhi kwa kere: Geresoni, Kohati ntani Merali.

18 Vana vaGeresoni wovagara omu ga tundilira mapata gawo kwa kere: Libuni ntani Simeyi.

19 Vana vaKohati wovagara omu ga tundilira mapata gawo kwa kere: Amuramu, Isihara, Heburoni ntani Usiyeli.

20 Vana vaMerali wovagara omu ga tundilira mapata gawo kwa kere: Mahili naMusi.

Aga yigo mapata goVarevhi kuliza nomazimo gawo.

21 MwaGeresoni yimo mwa tunda epata lyoValibuni ntani lyoVasimeyi. Aga kuna kara mapata aga ga tundilira moruvharo rwaGeresoni. 22 Sivaro sovagara navenye ava va tjenge kutundilira komukeke gokwedi kumwe yikandwise kwa kere 7 500. 23 Mapata gomoruvharo rwaGeresoni kwa dikilire notende dawo konyima zonkongoronzugo koyiha yoUtokero. 24 Esimbi lyemezimo lyaGeresoni kwa kere Eliyasafa munaRayeli. 25 Ruvharo rwaGeresoni kwa kere nositumbukira sokupakera mbili nkongoronzugo nosikudumikiso sako nekehe lyepevero lyonkongoronzugo, 26 makehe aga ga kundurukida eharango lyonkongoronzugo nosizambero, ekehe lyepevero lyeharango nomarugodi gako noyirugana nayinye eyi ya likwatakana noyininke eyi.

27 MwaKohati yimo mwa tunda epata lyaAmuramu nepata lyaIsihara ntani epata lyaHeburoni neli lyaUsiyeli. Aga kuna kara mapata aga ga tundilira moruvharo rwaKohati. 28 Sivaro sovagara navenye ava ga tjenge kutundilira komukeke gokwedi kumwe yikandwise kwa kere 8 600. Awo kwa va pere situmbukira sokupakera mbili evango lyokupongoka. 29 Mapata gomoruvharo rwaKohati kwa dikilire notende dawo koMbindakano zonkongoronzugo. 30 Esimbi lyemezimo lyaKohati kwa kere Elisafani munaUsiyeli. 31 Awo kwa va pere situmbukira sokupakera mbili sikesa, sitafura, uzweko woramba, yizambero, yiruganeso yomonkongoronzugo, ekehe eli lya kara pepi nosikesa noyirugana nayinye eyi ya likwatakana noyininke eyi.

32 Esimbi lyoVarevhi kwa kere Eliyasara muna mupristeli Arona. Age yige nga tarere ava ngava rugana mevango lyokupongoka.

33 MwaMerali yimo mwa tunda epata lyaMahili ntani lyaMusi. Aga kuna kara mapata aga ga tundilira moruvharo rwaMerali. 34 Sivaro sovagara ava ga tjenge kutundilira komukeke gokwedi kumwe yikandwise kwa kere 6 200. 35 Esimbi lyemezimo lyaMerali kwa kere Suliyeli munaAbihayili. Vemezimo lyaMerali kwa dikilire notende dawo koMuzogo gonkongoronzugo. 36 Ruvharo rwaMerali kwa va pere situmbukira sokupakera mbili yipirangi yokuvyukilira yokonkongoronzugo, nompigetji dako, nongundi dako, tuvera twako tomakero, yiruganeso yako noyirugana nayinye eyi ya likwatakana noyininke eyi, 37 ntani nonongundi dekeharango notuvera twako tomakero nonomboha dako demevhu ntani nonongodi dako.

38 Mosesa ntani Arona novana vendi kwa dikilire notende dawo komeho zonkongoronzugo koyiha yoUpumezuva. Awo kwa va pere situmbukira sokupakera mbili evango lyokupongoka mokuvatera Vaisraeli. Nkenye muntu ogu va dira kupulisira* ogu nga rugana yirugana yawo, va hepa kumudipaga.

39 Vagara navenye woVarevhi ava va tjenge oMosesa naArona kutundilira komukeke gokwedi kumwe yikandwise, kwa kere 22 000. Awo kwa va tjenge nomapata gawo ngwendi moomu ga va pangerere Jehova.

40 Makura Jehova ta tantere Mosesa asi: “Tjanga madina gonombeli nadinye donongara doVaisraeli kutundilira komukeke gokwedi kumwe yikandwise ntani va varura. 41 Wa hepa kuhorowera nge Varevhi yipo va pinganene po nombeli nadinye doVaisraeli ntani gusa nombeli doyimuna yoVarevhi di pinganene po nombeli doyimuna yoVaisraeli. Ame nyame Jehova.” 42 Mosesa makura ta tjanga nombeli nadinye doVaisraeli ngwendi moomu ga mu pangerere Jehova. 43 Sivaro sonombeli nadinye edi ga tjenge kutundilira komukeke gokwedi kumwe yikandwise kwa kere 22 273.

44 Jehova ta tantere hena Mosesa asi: 45 “Horowora Varevhi va pinganene po nombeli doVaisraeli ntani gusa yimuna yoVarevhi yi pinganene po yimuna yoVaisraeli. Varevhi ngava kara vange. Ame nyame Jehova. 46 Nombeli doVaisraeli donongara dina pitakana nombeli doVarevhi novantu 273. Mokuzowora nombeli edi, 47 wa hepa kugava yisiliveli yitano* mwankenye muntu, kuliza noyisiliveli yekevango lyokupongoka. Sisiliveli simwe mukumo gwaso nograma 12.* 48 Wa hepa kugava yimaliwa kwaArona ntani kovana vendi mokuzowora nombeli odo.” 49 Mosesa makura ta gusa yimaliwa eyi va futilire nombeli doVaisraeli edi da pitakanene Varevhi. 50 Age kwa gusire yimaliwa oyo konombeli doVaisraeli. Ayo kwa hulire poyisiliveli* 1 365, kuliza noyisiliveli yekevango lyokupongoka. 51 Makura Mosesa ta gava yimaliwa oyo kwaArona novana vendi, ngwendi moomu ga mu tanterere Jehova. Mosesa kwa rugene moomu ga mu tanterere Jehova.

4 Jehova kwa tanterere Mosesa naArona asi: 2 “Mwa hepa kuvarura womoruvharo rwaKohati womorudi rwaRevhi, kuliza nomazimo gawo ntani nomapata gawo. 3 Ngomu varure navenye wonomvhura 30 dogoro 50 ava va pa situmbukira sokurugana monkongoronzugo.*

4 “Eyi yiyo ngava rugana womoruvharo rwaKohati monkongoronzugo ntani ayo kuna kara yininke yokupongoka unene: 5 Apa ngava dirura Vaisraeli kamba zawo, Arona novana vendi yiwo ngava hwilira monkongoronzugo va ka guse ko ekehe eli lya kara pepi nosikesa, va li kudumike kosikesa somadiworokeso. 6 Makura ngava ture ko sikudumikiso soyipapa yoyikorama* nekehe lyosineguru ntani ngava zweke ko yitji yaso yokusidamwisa.

7 “Awo va hepa hena kuzara ekehe lyosineguru positafura sonomboroto delikido va ture po marupasa gomanene nononkinda nomarupasa gomanunu ntani nononkinda dononene yononzambo doyikunwa. Nzambo zomboroto ezi ava gava nkenye ezuva kapisi ngava zi damune po. 8 Awo ngava kudumike po nekehe lyegeha ntani nosikudumikiso soyipapa yoyikorama nokuzweka ko yitji yaso yokusidamwisa. 9 Makura ngava guse hena ekehe lyosineguru va kudumike uzweko woramba kumwe nonoramba dako noyininke yako yokudimisisa mundiro noyipana yako yomundiro ntani noyipako nayinye eyi ava simbire magadi gomonoramba. 10 Awo va hepa kudingira uzweko woramba kumwe noyiruganeso yako nayinye posikudumikiso soyipapa yoyikorama va yi simbe.* 11 Makura ngava kudumike sizambero songorodo nekehe lyosineguru nosikudumikiso soyipapa yoyikorama nokuzweka ko yitji yako yokusidamwisa. 12 Awo ngava guse yiruganeso nayinye eyi ava ruganesa monkongoronzugo nkenye ezuva va yi ture pekehe lyosineguru ntani va yi kudumike nosikudumikiso soyipapa yoyikorama, makura ngava yi simbe.*

13 “Awo va hepa kukomba enoto* posizambero ntani va kudumike ko ekehe lyonongodi dopurupuli. 14 Awo ngava ture po yiruganeso yako nayinye eyi ava ruganesa kosizambero: yipana yokusimbira mundiro, noforoko, yihupuro, marupasa noyiruganeso nayinye yokosizambero ntani va hepa kukudumika ko sikudumikiso soyipapa yoyikorama nokuzweka ko yitji yako yokusidamwisa.

15 “Apa ngava dirura kamba, Arona novana vendi ngava kudumika evango lyokupongoka noyiruganeso yamo nayinye. Apa ngava mana, womoruvharo rwaKohati ngava hwilira mo va ya yi damune, nye kapisi ngava kwate yininke yemevango lyokupongoka, ngano ngava fa. Eyi yiyo ngava rugana* womoruvharo rwaKohati konkongoronzugo.

16 “Eliyasara muna mupristeli Arona yige nga pakera mbili magadi gomonoramba, yitutumikidiso yedumba lyewa, nzambo zombuto ezi ava gava nkenye ezuva ntani magadi gokugwavekesa. Age nga pakera mbili nkongoronzugo nazinye ntani nanayinye eyi ya kara mo, kukwatera mo evango lyokupongoka noyiruganeso yamo.”

17 Jehova ta tantere hena Mosesa naArona asi: 18 “Kapisi ngomu pulisire womoruvharo rwaKohati ngava va zonagure po mokatji koVarevhi. 19 Nye ruganeni yininke eyi yipo ngava dire kufa morwa kuhedera koyininke yokupongoka unene. Arona novana vendi ngava hwilira monkongoronzugo va ka va likide eyi ngava rugana neyi ngava simba. 20 Apa ngava hwilira monkongoronzugo, kapisi ngava tare yininke yokupongoka nampili nakauke, ngano ngava fa.”

21 Makura Jehova ta tantere Mosesa asi: 22 “Wa hepa kutjanga womoruvharo rwaGeresoni kuliza nomazimo gawo ntani nomapata gawo. 23 Ngo tjange navenye wonomvhura 30 dogoro 50, ava va pa situmbukira sokurugana monkongoronzugo. 24 Eyi yiyo ngava rugana womoruvharo rwaGeresoni: 25 Awo ngava simba makehe gonkongoronzugo nosikudumikiso sako nosikudumikiso soyipapa yoyikorama esi sa kara peguru lyazo, ekehe lyekevero lyonkongoronzugo, 26 ekehe lyepevero lyeharango, makehe gekeharango aga ga kundurukida nkongoronzugo nosizambero, marugodi gako noyiruganeso yamo nayinye ntani nanayinye eyi ava ruganesa mosirugana esi. Eyi yiyo ngava rugana. 27 Arona novana vendi yiwo ngava tarera eyi ngava rugana neyi ngava simba womoruvharo rwaGeresoni ntani nyone ngomu va tantera va rugane yininke eyi. 28 Eyi yiyo ngava rugana womoruvharo rwaGeresoni monkongoronzugo mepitisiro lyaItamara muna mupristeli Arona.

29 “Wa hepa kutjanga womoruvharo rwaMerali kuliza nomazimo gawo ntani nomapata gawo. 30 Ngo tjange navenye wonomvhura 30 dogoro 50 ava va pa situmbukira sokurugana konkongoronzugo. 31 Eyi yiyo yininke yokonkongoronzugo eyi ngava simba: yipirangi yokuvyukilira yokonkongoronzugo, nompigetji dako, nongundi dako, tuvera twako tomakero, 32 nongundi dekeharango notuvera twako tomakero, nomboha dako demevhu ntani nomarugodi gako kumwe noyiruganeso yako nayinye ntani noyiruganeso nayinye eyi ya likwatakana noyininke eyi. Mwa hepa kutantera nkenye ogu yiruganeso yokonkongoronzugo eyi nga simba. 33 Ngesi yimo ngava rugana womoruvharo rwaMerali konkongoronzugo mepitisiro lyaItamara muna mupristeli Arona.”

34 Mosesa naArona ntani nomasimbi goVaisraeli makura tava tjanga womoruvharo rwaKohati kuliza nomazimo gawo ntani nomapata gawo. 35 Awo kwa tjenge navenye wonomvhura 30 dogoro 50 ava va pa situmbukira sokurugana konkongoronzugo. 36 Sivaro sava va tjenge kuliza nomapata gawo kwa kere 2 750. 37 Ava yiwo va tjenge moruvharo rwaKohati ava ngava rugana konkongoronzugo. Mosesa naArona kwa va tjenge ngwendi moomu Jehova ga pangerere Mosesa.

38 Womoruvharo rwaGeresoni kwa va tjenge kuliza nomazimo gawo ntani nomapata gawo. 39 Awo kwa tjenge navenye wonomvhura 30 dogoro 50 ava va pa situmbukira sokurugana monkongoronzugo. 40 Sivaro sava va tjenge kuliza nomazimo gawo ntani nomapata gawo kwa kere 2 630. 41 Ngesi yimo va tjenge navenye womoruvharo rwaGeresoni ava ngava rugana konkongoronzugo. Mosesa naArona kwa va tjenge kuliza nomu gava pangerere Jehova.

42 Womoruvharo rwaMerali kwa va tjenge kuliza nomazimo gawo ntani nomapata gawo. 43 Awo kwa tjenge navenye wonomvhura 30 dogoro 50 ava va pa situmbukira sokurugana konkongoronzugo. 44 Sivaro sava va tjenge kuliza nomapata gawo kwa kere 3 200. 45 Ngesi yimo va tjenge oMosesa naArona womoruvharo rwaMerali ngwendi moomu Jehova ga pangerere Mosesa.

46 Mosesa naArona ntani nomasimbi goVaisraeli kwa tjenge Varevhi navenye kuliza nomazimo gawo ntani nomapata gawo. 47 Awo kwa tjenge wonomvhura 30 dogoro 50 ntani navenye kwa va pere situmbukira sokurugana nokusimba yininke eyi ya likwatakana nonkongoronzugo. 48 Sivaro sava va tjenge kwa kere 8 580. 49 Awo kwa va tjenge ngwendi moomu Jehova ga pangerere Mosesa. Nkenye ogu kwa mu pere sirugana ntani neyi na simba. Awo kwa va tjenge ngwendi moomu Jehova ga yi pangerere Mosesa.

5 Jehova ta tantere hena Mosesa asi: 2 “Tantera Vaisraeli va pwagese mokamba nkenye ogu ana kara noyingondwe ntani nkenye ogu ana kupita yininke koyilyo yendi yonomuga ntani nkenye ogu ana nyata morwa kukwata simpu. 3 Yi kare asi muntu ogo mugara ndi mukadi, mwa hepa kumupwagesa mo mokamba, yipo a dire kunyateka kamba nazinye omu na tunga.” 4 Makura Vaisraeli tava pwagesa vantu mokamba ngwendi moomu ga va tanterere Jehova kupitira mwaMosesa.

5 Jehova ta tantere hena Mosesa asi: 6 “Tantera Vaisraeli asi: ‘Nsene mugara ndi mukadi a zona pokudira kulimburukwa Jehova, age* nga kara nounzoni. 7 Age* ga hepa kutongonona nzo zendi* ntani ga hepa kufuta ogu ga zonena nokugweda po noperesenta 20 pweyi nga futa. 8 Nsene muntu ogu va zonena kapi ga kara nagumwe gekoro ogu na gusa yininke oyo, va hepa kuyigava kwaJehova. Ayo ngayi kara yomupristeli, kumwe nonzwi zongara ezi nga gava yipo va mu gusire po nonzo dendi.

9 “‘Nkenye yigava yokupongoka eyi ngava gava Vaisraeli komupristeli nga yi kara yendi. 10 Nkenye yigava yokupongoka eyi nga gava muntu nga yi kara yendi, ano nkenye eyi nga gava muntu komupristeli nga yi kara yomupristeli.’”

11 Jehova ta tantere hena Mosesa asi: 12 “Tantera Vaisraeli asi: ‘Nsene mukadi a dira kulimburukwa mugara gwendi 13 pokuhondera nomugara gwapeke, nye mugara gwendi kapi ga yi diva ntani kwato ogu ga yi diva, eyi yiyo va hepa kurugana nsene ga linyateka nye kwato umbangi ntani kwato ga mu kwata: 14 Yi kare asi ga yi rugana ndi hawe, nsene mugara kuna kurwira mukadendi esupa ntani kuna kumugazarera asi ga hondera, 15 mugara ogo ga hepa kureta mukadendi komupristeli kumwe nonzambo zousura wokilograma zimwe.* Age kapisi a tjire po magadi ndi a ture po manganganga gokututumikidisa, yeeyi azo nzambo zombuto ezi vana kugava morwa esupa. Azo kuna kara nzambo zombuto ezi ngazi horora nsene mukadi ogo ga zona ndi hawe.

16 “‘Mupristeli nga mu reta, a mu ninke a sikame komeho zaJehova. 17 Mupristeli nga gusa mema gokupongoka mosipako serova nombundu zevhu lyomonkongoronzugo a zi ture momema. 18 Ntani mupristeli nga sikameka mukadi ogo komeho zaJehova nokuditura nohuki dendi ntani nga tura usura wonzambo zombuto momawoko gendi, zi mu diworokese nonzo dendi. Ano mupristeli nga kwaterera mema goururu gokureta efingo mokuwoko kwendi.

19 “‘Mupristeli nga ninka mukadi a gane pokumutantera asi: “Nsene kapi wa linyateka pokuligwanekera panyama nomugara gwapeke kutunda apa wa kwara,* ngano mema aga goururu gokureta efingo kapisi ga ku rugane yuma. 20 Nye nsene wa linyateka pokuligwanekera panyama nomugara gwapeke kutunda apa wa kwara, ngano ngali ku gwane efingo.” 21 Mupristeli nga tantera mukadi ogo a gane yipo va mu finge nsene ga yi rugana ntani nga tantera mukadi ogo asi: “Jehova ngano a ku ninke o kare sihonena kovantu, yipo ngava ku tumbure apa ngava finga nokugana. Nsene wa yi rugana eyi, Jehova nga ku ninke o dire kureta vana* ntani ezimo lyoge nga li fure. 22 Mema aga gokureta efingo nga ga za momaura goge, yipo ezimo lyoge nga li fure o dire kureta vana.”* Makura mukadi ga hepa kutanta asi: “Amen! Amen!”*

23 “‘Mupristeli ga hepa kutjanga mafingo ogo mobuke noku ga dongonona po nomema goururu. 24 Age nga ninka mukadi ogo a nwe mema goururu gokureta efingo. Ano apa nga ga nwa, ago nga ga ka mu koresa. 25 Mupristeli nga gusa momawoko gomukadi ogo usura wonzambo zombuto ezi vana gava morwa esupa, a u zeragure komeho zaJehova ntani age nga u reta pepi nosizambero. 26 Mupristeli nga gusa usura newoko ponzambo zombuto ngosidiworokeso sonzambo ntani nga u hwika posizambero, ano konyima nga ninka mukadi a nwe mema ogo. 27 Nsene mukadi ogo ga linyateka pokuhondera, apa nga nwa mema ogo, ago nga ga mu koresa nokuninkisa ezimo lyendi li fure ntani kapi nga reta vana.* Ano mukadi ogo, vantu ngava mu tumbura apa ngava finga. 28 Nye nsene mukadi ogo kapi ga linyateka, age kapi ngava mu tengeka ntani age nga kara nezimo nokureta vana.

29 “‘Ezi yizo veta zokuhamena mugara ogu ana kurwira mukadendi esupa nsene mukadendi ga linyateka kutunda apa ga kwara, 30 ndi nsene mugara kuna kugazarera mukadendi asi ga hondera; age ga hepa kuninka mukadendi a ka sikame komeho zaJehova, ano mupristeli ga hepa kumurugana kuliza noveta ezi. 31 Mugara kapi nga kara nounzoni nye mukadendi ngava mu tengeka nsene ngava mu gwana unzoni.’”

6 Jehova ta tantere hena Mosesa asi: 2 “Tantera Vaisraeli asi: ‘Nsene mugara ndi mukadi a gana kwaJehova asi nga kara Munasili,* 3 age kapisi a nwe vhinyu noyikorwesa yapeke. Age kapisi a nwe vhinyu zoururu ndi nkenye yikorwesa youruru. Age hena kapisi a nwe nkenye yikunwa eyi va ruganesa komandjembere ndi a lye mandjembere, yi kare asi gomatarara ndi gomakukutu. 4 Siruwo nasinye esi nga kara Munasili, age kapisi nga lye nkenye eyi ayi tundu kositji somandjembere, yi kare asi mandjembere gokudira kupya ndi yipapa yomandjembere.

5 “‘Siruwo nasinye esi nga kara momugano gokukara Munasili, kapisi nga kurure nohuki dendi. Age ga hepa kukara ana pongoka pokusiga nohuki dendi di kure dogoro ga pwe mazuva gendi gokuligava kwaJehova. 6 Age kapisi nga hedere simpu siruwo nasinye esi nga ligava kwaJehova. 7 Nampili oguhwe ndi ozina ndi mukurwendi ndi mumbyendi a fe, kapisi nga linyateke, morwa age ga kara nosidiviso komutwe gwendi asi ga ligava kwaKarunga.

8 “‘Age kwa pongoka kwaJehova siruwo nasinye esi nga kara Munasili. 9 Nye nsene gumwe ogu ana kara pepi nendi a fa hararasi makura a nyateke nohuki edi adi likida asi ga ligava kwaKarunga, age ga hepa kudikurura mezuva eli ngava mu kuhura. Age ga hepa kudikurura mezuva lyauntambali. 10 Ano mezuva lyauntantatu, age ga hepa kutwara nonkutji mbali ndi nomputukuwagona mbali komupristeli pevero lyonkongoronzugo.* 11 Mupristeli nga gava nkutji ndi mputukuwagona zimwe ngonzambo zononzo ano zimwe ngonzambo zeswakerero, yipo muntu ogo va mu gusire po nonzo dendi morwa yeeyi ga kere pepi nomuntu gokufa. Age nga kuhura mutwe gwendi mezuva olyo. 12 Age ga hepa hena kuligava kwaJehova yipo a kare Munasili kutunda ezuva olyo, ntani ga hepa kureta nzwigona zongara zomvhura zimwe zonzambo zokudongonona po nonzo. Mazuva aga ga kere nare Munasili kapi ngava ga varura ko, morwa age ga linyateka.

13 “‘Ezi kuna kara veta zokuhamena Munasili: Apa nga ga haga mazuva gendi gokukara Munasili, va hepa kumureta pevero lyonkongoronzugo, 14 yipo a ya gave nzambo zendi kwaJehova: nzwigona zongara zokukanguka zomvhura zimwe zonzambo zeswakerero, nzwigona zonkadi zokukanguka zomvhura zimwe zonzambo zononzo, nzwi zongara zokukanguka zonzambo zombili, 15 sikumba sonomboroto dokuliudinga* dokudira yihaheso edi va rugana nousura wouwa ou va vhonga nomagadi, yikuki yokudira yihaheso eyi va kwita nomagadi kumwe nonzambo zako zombuto ntani nononzambo dako doyikunwa. 16 Mupristeli makura nga yi twara komeho zaJehova. Pomuhowo, age nga gava nzambo zononzo zomuntu ogo ntani nonzambo zeswakerero. 17 Age nga gava nzwi zongara ngonzambo zombili kwaJehova kumwe nosikumba sonomuhwi domboroto dokudira yihaheso ntani mupristeli nga gava nzambo zako zombuto nezi zoyikunwa.

18 “‘Munasili ga hepa kukurura nohuki dendi pevero lyonkongoronzugo ntani ga hepa kugusa nohuki edi ga rera siruwo esi ga kere Munasili a di ture pomundiro apa zina kara nzambo zombili. 19 Mupristeli ga hepa kugusa sirama sokuwoko sonzwi zongara esi vana tereke ntani nomboroto zokuliudinga zokudira yihaheso posikumba nosikuki simwe sokudira yihaheso, a yi ture momawoko goMunasili konyima zokulikurura nohuki edi adi likida asi age Munasili. 20 Ano mupristeli nga yi zeragura komeho zaJehova ngonzambo zelikido. Ayo nga yi kara yomupristeli ngoruha rokupongoka kumwe nonturo* zonzambo zelikido ntani nosirama. Konyima, Munasili kuvhura nga nwe vhinyu.

21 “‘Ezi kuna kara veta zokuhamena Munasili ogu a tura po mugano: Nsene ana gana ntani age kuvhura a gave kwaJehova nzambo ezi za pitakana pweyi ava pura mokukara Munasili, age ga hepa kusikisa mo mugano gwendi mokulimburukwa koveta zokukara Munasili.’”

22 Makura Jehova ta tantere Mosesa asi: 23 “Tantera Arona novana vendi asi: ‘Ngesi yimo nomu tungika Vaisraeli. Va tantereni asi:

24 “Jehova ngano a mu tungike ntani a mu popere.

25 Jehova ngano a mu fire nkenda ntani a mu hafere.

26 Jehova ngano a mu tekure momuwa ntani a mu pe mbili.”’

27 Awo va hepa kuruganesa edina lyange pokutungika Vaisraeli, yipo ngani va tungike.”

7 Mezuva eli ga mene kudika Mosesa nkongoronzugo,* age kwa zi gwavekere ntani kwa zi pongwere kumwe noyininke yamo nayinye, sizambero ntani noyiruganeso yamo nayinye. Apa ga mene kugwaveka nokupongora yininke eyi, 2 masimbi goVaisraeli ndi masimbi gomomarudi kwa geve nonzambo. Masimbi aga ga tjenge vantu, 3 kwa retere komeho zaJehova matemba ntazimwe nonohove 12. Nkenye masimbi gavali kwa retere etemba limwe ntani nkenye ogu ntwedu* zimwe, makura tava yi reta komeho zonkongoronzugo. 4 Jehova ta tantere Mosesa asi: 5 “Gusa yininke eyi vana reta morwa ayo ngava yi ruganesa koyirugana yokonkongoronzugo ntani wa hepa kuyigava koVarevhi kuliza neyi va hepa mokusikisa mo yirugana yawo.”

6 Mosesa makura ta gusa matemba nonongombe, ta yi gava koVarevhi. 7 Age kwa geve matemba gavali nonohove ne koruvharo rwaGeresoni, kuliza neyi va hepere mokusikisa mo yirugana yawo; 8 ntani age kwa geve matemba gane nonohove ntantatu koruvharo rwaMerali, kuliza neyi va hepere yipo va sikise mo yirugana yawo. Awo kwa kere mepitisiro lyaItamara muna mupristeli Arona. 9 Nye womoruvharo rwaKohati kapi ga va pere yuma, yeeyi awo ngava rugana mevango lyokupongoka ntani ngava simbire yininke yokupongoka pomapepe.

10 Makura masimbi ta va gava nonzambo dawo apa va tungikire nokugwaveka sizambero. Apa ga retere masimbi nonzambo dawo komeho zosizambero, 11 Jehova kwa tanterere Mosesa asi: “Nkenye ezuva esimbi limwe lya hepa kugava nzambo zokutungikisa sizambero.”

12 Mezuva lyokuhova, Nasoni munaAminadabu gomorudi rwaJuda yige ga geve nzambo zendi. 13 Age kwa geve rupasa rorunene rosisiliveli ronokilograma 1,5* ntani rupasa rorununu rosisiliveli ronograma 800,* kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 14 nkinda* zimwe zongorodo zonograma 114* ezi va tulire yitutumikidiso; 15 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 16 sikombogona sonzambo zononzo; 17 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Nasoni munaAminadabu.

18 Mezuva lyauvali, Netaneli munaSuwara esimbi lyomorudi rwaIsasikali yige ga geve nzambo zendi. 19 Age kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 20 nkinda zimwe zongorodo zonograma 114 ezi va tulire yitutumikidiso; 21 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 22 sikombogona sonzambo zononzo; 23 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Netaneli munaSuwara.

24 Mezuva lyautatu, Eliyaba munaHeroni, esimbi lyomorudi rwaSeburoni 25 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 26 nkinda zimwe zongorodo zonograma 114 ezi va tulire yitutumikidiso; 27 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 28 sikombogona sonzambo zononzo; 29 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Eliyaba munaHeroni.

30 Mezuva lyaune, Elisuli munaSedeuli, esimbi lyomorudi rwaRubena 31 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 32 nkinda zimwe zongorodo zonograma 114 ezi va tulire yitutumikidiso; 33 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 34 sikombogona sonzambo zononzo; 35 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Elisuli munaSedeuli.

36 Mezuva lyautano, Serumiyeli munaSulisadayi, esimbi lyomorudi rwaSimiyoni 37 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 38 nkinda zimwe zongorodo zonograma 114 ezi va tulire yitutumikidiso; 39 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 40 sikombogona sonzambo zononzo; 41 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Serumiyeli munaSulisadayi.

42 Mezuva lyauntazimwe, Eliyasafa munaDeuli, esimbi lyomorudi rwaGada 43 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 44 nkinda zimwe zongorodo zonograma 114 ezi va tulire yitutumikidiso; 45 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 46 sikombogona sonzambo zononzo; 47 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Eliyasafa munaDeuli.

48 Mezuva lyauntambali, Elisama munaAmihudi, esimbi lyomorudi rwaEfurayimi 49 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 50 nkinda zimwe zongorodo zonograma 114 ezi va tulire yitutumikidiso; 51 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 52 sikombogona sonzambo zononzo; 53 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Elisama munaAmihudi.

54 Mezuva lyauntantatu, Gamaliyeli munaPedasuli, esimbi lyomorudi rwaManase 55 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 56 nkinda zimwe zongorodo zonograma 114 ezi va tulire yitutumikidiso; 57 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 58 sikombogona sonzambo zononzo; 59 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Gamaliyeli munaPedasuli.

60 Mezuva lyauntane, Abidani munaNgidiyoni, esimbi lyomorudi rwaMbenyameni 61 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 62 nkinda zimwe zongorodo zonograma 114 ezi va tulire yitutumikidiso; 63 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 64 sikombogona sonzambo zononzo; 65 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Abidani munaNgidiyoni.

66 Mezuva lyomurongo, Ahiyeseli munaAmisadayi, esimbi lyomorudi rwaDana 67 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 68 nkinda zimwe zongorodo zonograma 114 ezi va tulire yitutumikidiso; 69 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 70 sikombogona sonzambo zononzo; 71 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Ahiyeseli munaAmisadayi.

72 Mezuva 11, Pagiyeli munaOhurani, esimbi lyomorudi rwaAseli 73 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 74 nkinda zimwe zongorodo zonograma 114 ezi va tulire yitutumikidiso; 75 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 76 sikombogona sonzambo zononzo; 77 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Pagiyeli munaOhurani.

78 Mezuva 12, Ahira munaEnani, esimbi lyomorudi rwaNafitali 79 kwa geve rupasa rorunene rosisiliveli ronokilograma 1,5 ntani rupasa rorununu rosisiliveli ronograma 800, kuliza noyisiliveli yekevango lyokupongoka. Pomarupasa ogo kwa tulire po usura wouwa ou va vhonga nomagadi wonzambo zombuto; 80 nkinda zimwe zongorodo zonograma 114 ezi va tulire yitutumikidiso; 81 ntwedugona zimwe, nzwi zongara ntani nzwigona zongara zomvhura zimwe yonzambo zeswakerero; 82 sikombogona sonzambo zononzo; 83 nongombe mbali, nonzwi ntano donongara, yikombo yoyigara yitano ntani nonzwigona donongara ntano domvhura zimwe yonzambo zombili. Eyi yiyo ga geve Ahira munaEnani.

84 Edi yido nonzambo ga geve masimbi goVaisraeli apa va tungikire sizambero nokusigwaveka: Marupasa gomanene 12 gosisiliveli, marupasa gomanunu 12 gosisiliveli, nonkinda 12 dongorodo; 85 (nkenye rupasa rorunene rosisiliveli kwa kere nomukumo gokusika ponokilograma 1,5 ntani nkenye rupasa rorununu kwa kere nomukumo gokusika ponograma 800. Yipako nayinye yosisiliveli kwa hulire ponokilograma 27,36* kuliza noyisiliveli yekevango lyokupongoka; 86 nonkinda dongorodo 12 edi va tulire yitutumikidiso, nkenye ezi kwa kere nomukumo gokusika ponograma 114 kuliza noyisiliveli yekevango lyokupongoka. Nonkinda nadinye dongorodo kwa kere nomukumo gonokilograma 1,36.)* 87 Yimuna nayinye yonzambo zeswakerero kwa kere nontwedu 12, nonzwi donongara 12, nonzwigona donongara 12 domvhura zimwe nononzambo dako dombuto ntani yikombogona 12 yonzambo zononzo; 88 yimuna nayinye yonzambo zombili kwa kere nontwedu 24, nonzwi donongara 60, yikombo yoyigara 60 ntani nonzwigona donongara 60 domvhura zimwe. Ezi yizo nzambo va geve apa va tungikire sizambero nokusigwaveka.

89 Nkenye apa Mosesa ngazi monkongoronzugo a ka uyunge naKarunga,* age nga zuvhu ezwi lina kumuuyungisa peguru lyosikudumikiso sosikesa somadiworokeso pokatji kovakerubi vavali. Ngesi yimo nga uyunga Karunga naMosesa.

8 Jehova ta tantere Mosesa asi: 2 “Tantera Arona asi nkenye apa nga hwameka noramba ntambali dokouzweko woramba, ga hepa kuditura nawa yipo di temene mevango eli lya kara komeho zouzweko woramba.” 3 Makura Arona ta yi rugana, ta hwameke noramba dokouzweko woramba yipo di temene mevango eli lya kara komeho zouzweko woramba, kuliza nomu Jehova ga tanterere Mosesa. 4 Ngesi yimo va rugene uzweko woramba: Awo kwa u hambwire kongorodo kukwatera mo mutayi gwako ntani nonombya dako. Awo kwa u rugene kuliza nemoneko eli ga likidire Jehova Mosesa.

5 Jehova ta tantere hena Mosesa asi: 6 “Horowora Varevhi mokatji koVaisraeli o va kuhure. 7 Ngesi yimo no va kuhura: Wa hepa kuvanagera mema gokuvakuhura kononzo ntani awo va hepa kukurura nohuki dawo nadinye domorutu nokukuhwa yikoverero yawo ntani nokulikuhura vene. 8 Makura ngava guse ntwedugona nonzambo zako zombuto zousura wouwa ou va vhonga nomagadi ntani ove ngo gave ntwedugona zimwe zonzambo zononzo. 9 Wa hepa kureta Varevhi komeho zonkongoronzugo* ntani o ninke mbunga nazinye zoVaisraeli zi ponge. 10 Apa ngo reta Varevhi komeho zaJehova, Vaisraeli ngava kambeke mawoko gawo ponomutwe doVarevhi. 11 Ntani Arona nga gave Varevhi komeho zaJehova ngonzambo zelikido zoVaisraeli, makura awo ngava tameka kuruganena Jehova.

12 “Makura Varevhi ngava kambeke mawoko gawo ponomutwe donontwedu. Konyima, ngava gave zimwe ngonzambo zononzo, ano nkwawo ngonzambo zeswakerero kwaJehova yipo Varevhi ngava va dongwenene po nonzo dawo. 13 Ngo ninke Varevhi va sikame komeho zaArona novana vendi o va gave ngonzambo zelikido kwaJehova. 14 Wa hepa kuhorowora Varevhi mokatji koVaisraeli, awo ngava kara vange. 15 Konyima, Varevhi ngava hwilira va ka rugane monkongoronzugo. Ngesi yimo ngo va kuhura noku va gava ngonzambo zelikido. 16 Yeeyi awo kwa va horowora mokatji koVaisraeli. Ame kwa horowora Varevhi va kare vange yipo va pinganene po nombeli nadinye doVaisraeli. 17 Yeeyi nombeli doVaisraeli dange, kukwatera mo nedi doyimuna yawo. Ame kwa va horowere va kare vange apa na dipagere nombeli nadinye domosirongo saEgipite. 18 Ame ngani horowora Varevhi va pinganene po nombeli nadinye doVaisraeli. 19 Ame ngani horowora Varevhi mokatji koVaisraeli ni va gave kwaArona novana vendi yipo va rugane konkongoronzugo mokuvatera Vaisraeli ntani awo ngava vatera vapristeli yipo Vaisraeli va va dongwenene po nonzo dawo. Monkedi ezi, Vaisraeli kapi ngava ligwanekera noudigu morwa awo kapi ngava hedera pepi nevango lyokupongoka.”

20 Mosesa naArona ntani nombunga nazinye zoVaisraeli kwa rugene nayinye eyi Jehova ga pangerere Mosesa kuhamena Varevhi. 21 Makura Varevhi tava likuhura vene nokukuhwa yikoverero yawo. Ano konyima, Arona ta va gava ngonzambo zelikido komeho zaJehova ntani age kwa geve nzambo yipo va va dongwenene po nonzo dawo va kuhuke. 22 Kutunda opo, Varevhi tava hwilire monkongoronzugo va ka rugane komeho zaArona novana vendi. Nayinye kwa yi rugene ngwendi moomu Jehova ga pangerere Mosesa kuhamena Varevhi.

23 Jehova ta tantere Mosesa asi: 24 “Ezi kuna kara veta zokuhamena Varevhi: Mugara gonomvhura 25 yikandwise kuvhura nga rugane konkongoronzugo. 25 Nye apa nga gwanesa nomvhura 50, ga hepa kuhageka kurugana konkongoronzugo. 26 Age kuvhura a vatere vakwawo ava ava rugana konkongoronzugo nye age kapi ta vhuru kurugana ko. Eyi yiyo ngo rugana kuhamena Varevhi noyitumbukira yawo.”

9 Jehova kwa uyungisire Mosesa momburundu zaSinayi mokwedi kokuhova momvhura zauvali kutunda apa va tundire mosirongo saEgipite. Age kwa tente asi: 2 “Vaisraeli va hepa kuwapaika nzambo zoPaska apa ngasi sika mo siruwo. 3 Mwa hepa kuziwapaika apa ngasi sika mo siruwo mezuva 14 lyokwedi oku kongurova. Ngomu zi wapaike kuliza nomavyukiso aga va tura po.”

4 Makura Mosesa ta tantere Vaisraeli va wapaike nzambo zoPaska. 5 Awo makura tava wapaike nzambo zoPaska mokwedi kokuhova mezuva 14 momburundu zaSinayi kongurova. Vaisraeli kwa rugene nayinye kuliza nomu Jehova ga pangerere Mosesa.

6 Pwa kere vagara vamwe ava va nyete morwa kwa kwete simpu, yipo nye awo kapi va vhulire kuwapaika nzambo zoPaska. Makura vagara owo yipo va zire komeho zaMosesa naArona mezuva olyo, 7 ta va tantere Mosesa asi: “Ose tuna nyata morwa tuna kwata simpu. Morwasinke natu dilira kugava nzambo kwaJehova ngwendi Vaisraeli navenye posiruwo sazo?” 8 Makura Mosesa ta va tantere asi: “Ndindireni paapa ni ka purakene eyi na ka tantera nge Jehova kumuhamena.”

9 Makura Jehova ta tantere Mosesa asi: 10 “Tantera Vaisraeli asi: ‘Nkenye mugara ogu ana kara mokatji keni ndi gomoruvharo rweni rokomeho nga nyata pokukwata simpu, ndi ogu nga kara morugendo, ga hepa simpe kuwapaika nzambo zaJehova zoPaska. 11 Awo va hepa kuziwapaika mokwedi kwauvali momazuva 14 kongurova. Awo ngava zi lye kumwe nomboroto zokudira yihaheso noyikwahidi youruru. 12 Kapisi ngava sigise po nkenye eyi dogoro ngurangura ntani kapisi ngava teze yisupa yonzwi. Awo va hepa kuziwapaika kuliza nomavyukiso gokuhamena Paska. 13 Nye nsene mugara kapi ana nyata ntani kapi ana kara morugendo, nye a dire kuwapaika nzambo zoPaska, muntu ogo va hepa kumugusa mo* mokatji kovantu vendi, yeeyi age kapi ana gava nzambo zaJehova posiruwo sazo. Mugara ogo va hepa kumutengeka morwa nzo zendi.

14 “‘Ano nsene kweli munayirongo ogu ga tunga mokatji keni, nage ga hepa kuwapaika nzambo zaJehova zoPaska ntani nage ga hepa kukwama mavyukiso aga va tura po goPaska. Namuvenye mwa hepa kukwama mavyukiso gokulifana, a kare asi munayirongo ndi Muisraeli.’”

15 Mezuva eli va dikire nkongoronzugo, eremo kwa kudumikire nkongoronzugo ndi tende zomadiworokeso, nye kongurova keguru lyonkongoronzugo kwa kere ko mundiro dogoro ngurangura. 16 Eyi yiyo ngayi horoka nkenye apa: Eremo ngali kara ko mutenya, ano masiku ngaku kara mundiro. 17 Apa ngali tundu ko eremo kotende, Vaisraeli ngava katuka usimbu va ze, nye apa ngali sikama eremo, awo ngava dikire kamba zawo poopo. 18 Kuliza neyi ga va tanterere Jehova, Vaisraeli ngava katuka va ze ntani kuliza neyi ga va tanterere Jehova, Vaisraeli ngava dike notende dawo. Apa ngali kara eremo konkongoronzugo, awo kapi ngava diruka. 19 Apa ngali kara eremo mazuva gomanzi keguru lyonkongoronzugo, Vaisraeli ngava limburukwa Jehova pokudira kukatuka va ze. 20 Poyiruwo yimwe eremo ngali kara keguru lyonkongoronzugo mazuva gomasesu. Kuliza neyi ga va tanterere Jehova, Vaisraeli kapi ngava diruka ntani kuliza neyi ga va tanterere Jehova, Vaisraeli ngava katuka va ze. 21 Poyiruwo yimwe, eremo ngali kara ko tupu kutunda ngurova dogoro ngurangura. Ano apa ngali katuka eremo ngurangura, nawo ngava katuka va ze. Awo ngava katuka va ze yi kare asi eremo kwa katukire mutenya ndi masiku. 22 Yi kare asi eremo ngali kara keguru lyonkongoronzugo mazuva gavali ndi kwedi ndi siruwo sosire, Vaisraeli kapi ngava katuka nye apa ngali katuka, nawo ngava katuka. 23 Kuliza neyi ga va tanterere Jehova, Vaisraeli ngava dike notende dawo ntani kuliza neyi ga va tanterere Jehova, Vaisraeli ngava katuka va ze. Awo kwa limburukwire Jehova kuliza neyi ga tanterere Jehova Mosesa.

10 Jehova makura ta tantere Mosesa asi: 2 “Hambura nombendo mbali dosisiliveli ngo di ruganese mokuzigida mbunga ntani nokutantera mbunga zi diruke. 3 Apa ngava fuda nombendo nadinye, mbunga nazinye za hepa kuwiza koge pevero lyonkongoronzugo.* 4 Nsene rumbendo rumwe tupu vana fuda, masimbi aga aga pitisire mayovi govantu moIsraeli yigo gelike tupu ngaga wiza koge.

5 “Apa ngava fuda rumbendo nonomuhagaro dokulisiga-siga, mazimo aga ga karera koUpumezuva ga hepa kukatuka ga ze. 6 Apa ngava fuda rumbendo nonomuhagaro dokulisiga-siga sikando sauvali, mazimo aga ga karera koMbindakano ga hepa kukatuka ga ze. Rumbendo va hepa kurufuda monkedi ezi komeho zi katuke nkenye mbunga.

7 “Nsene kuna kuzigida mbunga zi ya ponge, mwa hepa kufuda nombendo, nye kapisi nonomuhagaro dokulisiga-siga. 8 Vana womupristeli Arona yiwo ngava fuda nombendo ntani va hepa kukwama veta ezi dogoro nokoruvharo rwawo rokomeho.

9 “Nsene tomu zi koyita mosirongo seni mu ka rwanese nonkore edi adi mu hepeke, mwa hepa kufuda nombendo mu zigide vantu koyita, makura Karunga gweni Jehova nga mu diworoka nokumupopera kononkore deni.

10 “Mwa hepa hena kufuda nombendo poyilika yoruhafo ngwendi poyipito yeni ntani ketameko lyankenye kwedi napa ngo mu zamba nonzambo deswakerero ntani nonzambo dombili. Ado ngadi ninkisa Karunga a mu diworoke. Ame nyame Karunga gweni Jehova.”

11 Mezuva 20 lyokwedi kwauvali momvhura zauvali, eremo kwa tundire ko keguru lyonkongoronzugo omu mwa kara madiworokeso. 12 Makura Vaisraeli yipo va tundire momburundu zaSinayi kuliza nomu va va tanterere omu nava likwama, ano eremo tali ka sikama momburundu zaParani. 13 Esi kwa kere sikando sawo sokuhova esi va dirukire mokulimburukwa eyi ga va tanterere Jehova kupitira mwaMosesa.

14 Makura mbunga zomarudi gatatu ezi va pitisilire worudi rwaJuda, tazi howo kukatuka nombunga zawo,* ano Nasoni munaAminadabu yige ga pitisilire mbunga zawo. 15 Netaneli munaSuwara yige ga pitisilire mbunga zorudi rwaIsasikali. 16 Eliyaba munaHeroni yige ga pitisilire mbunga zorudi rwaSeburoni.

17 Apa va mene kuzungurura nkongoronzugo, womoruvharo rwaGeresoni nava womoruvharo rwaMerali ava va simbire nkongoronzugo, kwa katukire va ze.

18 Makura mbunga zomarudi gatatu ezi va pitisilire worudi rwaRubena, tazi kwama ko nombunga zawo,* ano Elisuli munaSedeuli yige ga pitisilire mbunga zawo. 19 Serumiyeli munaSulisadayi yige ga pitisilire mbunga zorudi rwaSimiyoni. 20 Eliyasafa munaDeuli yige ga pitisilire mbunga zorudi rwaGada.

21 Makura womoruvharo rwaKohati ava va simbire yininke yomonkongoronzugo, tava katuka va ze, va ka sike azo nkongoronzugo zina pu kuzidika.

22 Mbunga zomarudi gatatu ezi va pitisilire worudi rwaEfurayimi nawo tava katuka nombunga zawo,* ano Elisama munaAmihudi yige ga pitisilire mbunga zawo. 23 Gamaliyeli munaPedasuli yige ga pitisilire mbunga zorudi rwaManase. 24 Abidani munaNgidiyoni yige ga pitisilire mbunga zorudi rwaMbenyameni.

25 Mbunga zomarudi gatatu ezi va pitisilire worudi rwaDana, tava katuka nombunga zawo.* Awo kwa gendere monyima yipo va popere nombunga nonkwawo, ano Ahiyeseli munaAmisadayi yige ga pitisilire mbunga zawo. 26 Pagiyeli munaOhurani yige ga pitisilire mbunga zorudi rwaAseli. 27 Ahira munaEnani yige ga pitisilire mbunga zorudi rwaNafitali. 28 Ngesi yimo va likweme Vaisraeli nonombunga dawo apa ngava katuka va ze.

29 Makura Mosesa ta tantere Hobabu muna tamweyi zendi Reweli* goMumidiyani asi: “Ose kuna ku za kevango eli ga tente Jehova asi nga li tu pa. Ninka tu ze kumwe, ose ngatu kutekura nawa morwa Jehova kwa tumbwidira Israeli yininke yoyiwa.” 30 Nye age ta limburura asi: “Ame kapi nina ku za none, tani tengura kosirongo setu ntani kekoro lyange.” 31 Mosesa makura ta tanta asi: “Na kanderere wa ha tu siga, yeeyi ove wa diva oku natu dikira kamba zetu momburundu ntani ove kuvhura o tu pitisire.* 32 Nsene no za nose, nkenye yininke yoyiwa eyi nga tu pa Jehova, nove ngo gwanena mo uwa.”

33 Makura tava tundu kondundu zaJehova va ze morugendo romazuva gatatu. Sikesa saJehova segwanekero kwa kere komeho zawo apa va kere morugendo romazuva gatatu, si papare oku nava ka tulira. 34 Apa va katukire va ze, eremo lyaJehova kwa kere keguru lyawo mutenya.

35 Nkenye apa ngava dirura sikesa, Mosesa nga tanta asi: “Jehova, katuka. Ninka o haraganese nonkore doge, ano ava va kunyenga va kuduke.” 36 Ano apa ngasi sikama sikesa, Mosesa nga tanta asi: “Jehova tengura kombunga zoge zonene zoVaisraeli.”

11 Vantu kwa tamekere kusivanena Jehova. Apa ga yi zuvhire Jehova, ta handuka unene, makura Jehova ta tumu mundiro gu hwike vantu vamwe ava va kere ponze zokamba. 2 Vantu tava tameke kulikwambera kwaMosesa, makura age ta kanderere kwaJehova, ano mundiro tagu dimi. 3 Makura tava ruku evango olyo asi Tabera,* morwa mundiro ogu gwa tundire kwaJehova gu va hwike.

4 Vantu vamwe* ava va kere mokatji koVaisraeli tava tameke kurongora nondya dapeke, ano Vaisraeli nawo tava tameke kulira, tava tanta asi: “Yilye ogu natu pa nyama tu lye? 5 Ose kuna kurongora nomfi domawoko-woko edi ngatu li moEgipite ntani vakatjama, nonyanga noyikwahidi yimwe. 6 Ngesi ose kuna kuzumbanesa nonkondo detu. Mana zelike tupu tuna kulya.”

7 Mana kwa fene ngwendi mbuto zonzera ntani kwa fene ngwendi manganganga gokunuka nawa. 8 Vantu ngava zi va ka zi tore makura tava zi gogo nemanya ndi tava zi tu mosini sosinunu, makura awo ngava zi tereke ndi ngava zi kanga nomboroto dokuliudinga. Utovara wazo ngwendi sikuki sokukwita magadi. 9 Mana ngazi gu apa ngali gwire eme mokamba masiku.

10 Mosesa kwa zuvhire vantu vana kulira momapata nagenye, navenye kwa sikeme pomavero gonotende dawo. Jehova kwa handukire unene ano Mosesa nage kwa guvire unene. 11 Makura Mosesa ta pura Jehova asi: “Morwasinke ono kuhepekera mukareli goge? Morwasinke ono kudilira kuhafera nge? Yisinke na rugana eyi wa pera nge sirugana soudigu sokupakera mbili vantu ava? 12 Nyame nye na reta vantu navenye ava ndi? Kapisi nyame na va reta o tantere nge ni va simbire ponturo zange ngwendi moomu mukareli a simbi mukeke ogu a zamwa, ni va tware kosirongo esi wa tumbwidilire ozinyakurwawo. 13 Kupi nye nani gwana nyama ezi nani pa vantu navenye ava? Awo kuna kusivanena nge asi: ‘Tu pa nyama tu lye!’ 14 Ame kapi nina kuvhura kupakera mbili vantu ava nyamelike. 15 Nsene asi yimo ngesi no tekura nge, na kanderere dipaga nge tupu. Nsene asi ame kukuhafesa, wa ha pulisira nge ni ligwanekere hena noudigu.”

16 Jehova ta limburura Mosesa asi: “Horowera nge vagara 70 momasimbi goVaisraeli, ava wa diva asi va wapera kukara masimbi ntani vapitisili, o va tware konkongoronzugo va ka kare kooko kumwe nove. 17 Ame ngani wiza ni ya uyunge nove kooko ntani ngani gusa mpepo zimwe ezi wa kara nazo ni zi gave kwawo. Ano awo ngava kuvatera mokupakera mbili vantu, yipo sirugana soge ngasi rerupe. 18 Wa hepa kutantera vantu asi: ‘Lizereseni neina, yeeyi mungura, one ngomu lya nyama morwa Jehova ga zuvha masivano geni ntani one kwa tente asi: “Yilye ngatu pa nyama tu lye? MoEgipite ose kwa parukire nawa.” Jehova nga mu pa nyama mu lye. 19 One kapi ngo mu zi lya ezuva limwe ndi gavali ndi gatano ndi 10 ndi 20. 20 Nye one ngo mu zi lya kwedi nakunye dogoro ngazi ya pwagere momazuru ntani ngazi mu seta, yeeyi one kwa nyoka Jehova ogu ga kara mokatji keni ntani one kwa sivanene kwendi apa mwa tente asi: “Morwasinke twa tundira moEgipite?”’”

21 Makura Mosesa ta tanta asi: “Ame kuna kara novakwayita 600 000 nye ove kuna kutanta asi: ‘Ame ngani va pa nyama zonzi va zi lye kwedi nakunye’! 22 Nsene va dipaga yimuna nayinye ndi va kwate nomfi nadinye demefuta, kuvhura va yi gwaneke ndi?”

23 Jehova makura ta tantere Mosesa asi: “Jehova kapi ta vhuru kuyirugana eyi ndi? Ngesi no yi mona nsene eyi nina uyunga nayi horoka ndi hawe.”

24 Mosesa ta zi a ka tantere vantu eyi ga mu tanterere Jehova ntani ta horowora vagara 70 mokatji komasimbi govantu. Age ta va tantere va sikame, va kundurukide nkongoronzugo. 25 Makura Jehova ta hegumuka meremo ta uyunga naMosesa nokugusa mpepo zimwe ezi ga kere nazo, ta zi gava komasimbi 70. Apa va zi gwene, awo kwa tamekere kuporofeta, nye kutunda opo awo kapi va yi rugene hena.

26 Pwa kere vagara vavali ava va kere mokamba, madina gawo Elidadi naMedadi. Mpepo kwa kere pwawo morwa nawo kwa kere mokatji komasimbi aga va tjenge, nye awo kapi va zire konkongoronzugo. Awo kwa tamekere kuporofeta mokamba. 27 Makura mumati gumwe ta duka a ka tantere Mosesa asi: “Elidadi naMedadi kuna kuporofeta mokamba!” 28 Josuwa munaNunu ogu nga rugana naMosesa kutunda udinkantu wendi, ta tanta asi: “Hompa gwange Mosesa, va kava!” 29 Nye Mosesa ta mu tantere asi: “Ove kuna kufililira nge po mfudu ndi? Ame kuna hara ngano vantu navenye vaJehova va kare vaporofete ntani ngano Jehova ava pe mpepo zendi!” 30 Konyima, Mosesa ta tengura kokamba kumwe nomasimbi goVaisraeli.

31 Makura Jehova ta ninki mpepo zi rete yidira yekefuta* yi ya gwire komaruha nagenye gokamba. Muntu ga hepere kugenda ezuva nalinye yipo a ka sike oku ya gwililire yidira. Ano ndambo zoyidira oyo kwa sikire ponosentimeta 89.* 32 Ezuva olyo, vantu kwa pongaikire yidira mutenya nomasiku ntani nezuva eli lya kweme ko. Nkenye ogu kwa zwidire yipako yoyinene murongo* ntani awo kwa yi zanekere ponze zokamba. 33 Awo va hana kumana kulya nyama ozo, Jehova ta va handukire unene makura Jehova ta tameke kudipaga vantu wovanzi.

34 Makura tava ruku evango olyo asi Kiboroto-hatava,* morwa pevango olyo yipo va vhumbikire vantu womakurulya. 35 Apa va tundire moKiboroto-hatava, tava vyuka koHaseroto ntani awo tava ka kara moomo.

12 Miliyama naArona tava tameke kuuyunga Mosesa momudona, morwa age kwa kwere mukadi goMukusi. 2 Awo kwa tente asi: “Ngoso Jehova kuuyunga tupu kupitira mwaMosesa ndi? Nani kapi a uyunga hena kupitira mwetu ndi?” Jehova kwa purakenene eyi va uyungire. 3 Mosesa kwa kere muntu gokulinunupika kupitakana vantu navenye vepevhu.

4 Hararasi, Jehova ta tantere Mosesa naArona ntani naMiliyama asi: “Zendeni konkongoronzugo,* moutatu weni.” Awo makura tava zi. 5 Jehova makura ta hegumuka mongundi zeremo, ta sikama pevero lyonkongoronzugo, makura ta zigida Arona naMiliyama. Awo tava heda komeho. 6 Karunga ta va tantere asi: “Na kanderere, purakeneni kwange. Ngano mokatji keni mwa kere muporofete gwaJehova, ngano na lidivisa kwendi kupitira memoneko ntani ngano na uyunga nage kupitira monzodi. 7 Nye mukareli gwange Mosesa kapisi yimo ga kara ngoso. Ame kwa mu pa embo lyange nalinye a li pakere mbili. 8 Ame kuuyunga nage kuvyukilira sipara nosipara monkedi zoureru ntani age kumona Jehova. Morwasinke nye muna dilire kutjira kuuyunga momudona mukareli gwange Mosesa?”

9 Jehova ta va handukire unene, makura ta tundu po pwawo. 10 Eremo tali tundu ko keguru lyonkongoronzugo. Miliyama kwa mu zugumine yingondwe, ta vauka ngwendi yiterengenze. Arona apa ga tere Miliyama, ta mono asi Miliyama vana mu zuguma yingondwe. 11 Arona ta tantere Mosesa asi: “Hompa gwange, na kanderere wa ha yi pulisira va tu tengeke morwa nzo ezi! Ose ugova tuna rugana. 12 Na kanderere, wa ha mu sigilira a kare ngorooro ngwendi muntu gokufa, ogu ana woro ruha rumwe!” 13 Ano Mosesa ta likwambere kwaJehova asi: “Karunga, na kanderere mu verura!”

14 Jehova ta limburura Mosesa asi: “Nsene Miliyama va mu fizira oguhwe mosipara, age kapi nga yi mu fisa nomuga mazuva ntambali ndi? Mu ninkeni a ka likarere gelike mazuva ntambali ponze zokamba, ano konyima ntani ngava mu tengwida mokamba.” 15 Miliyama kwa mu ninkire a likarere gelike ponze zokamba mazuva ntambali, ano vantu kapi va katukire va ze dogoro paapa va ka mu tengwidilire mokamba. 16 Makura vantu tava tundu mo moHaseroto, tava ka dika kamba zawo momburundu zaParani.

13 Jehova ta tantere Mosesa asi: 2 “Horowora esimbi limwe mwankenye rudi roVaisraeli o va tume va ka tare* sirongo saKanani esi nina ku pa Vaisraeli.”

3 Makura Mosesa ta va tumu va tunde momburundu zaParani ngwendi moomu ga mu pangerere Jehova. Vagara navenye owo kwa kere masimbi goVaisraeli. 4 Aga kuna kara madina gawo: morudi rwaRubena, Samuwa munaSakura; 5 morudi rwaSimiyoni, Safati munaHoli; 6 morudi rwaJuda, Karebu munaJefune; 7 morudi rwaIsasikali, Igali munaJosefa; 8 morudi rwaEfurayimi, Hoseya munaNunu; 9 morudi rwaMbenyameni, Paliti munaRafu; 10 morudi rwaSeburoni, Gadiyeli munaSodi; 11 morudi rwaManase munaJosefa, Gadi munaSusi; 12 morudi rwaDana, Amiyeli munaGemali; 13 morudi rwaAseli, Seturu munaMikayera; 14 morudi rwaNafitali, Nahubi munaFofusi; 15 morudi rwaGada, Geweli munaMaki. 16 Aga kuna kara madina govagara ava ga tumine Mosesa va ka tare sirongo. Mosesa kwa rukire Hoseya munaNunu edina Josuwa.*

17 Apa ga va tumine Mosesa va ze va ka tare sirongo saKanani, age kwa va tanterere asi: “Zendeni mu pite moNegebu mu ze momukunda gonondundu. 18 Mwa hepa kukatara omu sa fana oso sirongo ntani nsene vantu ava va tunga mo nonkondo ndi kapi va kara nononkondo ndi nsene vantu vamo vanzi ndi vasesu, 19 ntani nsene asi sirongo siwa ndi sidona ndi nsene yitata eyi va tunga va yi kundurukida makuma ndi hawe. 20 Ka tareni nsene evhu lyamo ewa ndi edona ndi nsene mwa kara yitji ndi hawe. Mwa hepa kukara nouradi, mu ka guse enyango limwe lyomosirongo.” Aso kwa kere siruwo esi aga pi mandjembere aga aga howo kupya.

21 Makura tava zi va ka tare sirongo kutundilira momburundu zaSini dogoro koRehobu, pepi naRebo-hamati.* 22 Apa va pitire moNegebu, tava ya siki moHeburoni omu va tungire oAhimani naSesayi ntani Talimayi, womoruvharo rwaAnaki. Sitata saHeburoni kwa si tungire nomvhura ntambali komeho va ya tunge sitata saSowani somoEgipite. 23 Apa va ya sikire moMuramba gwaEsikoli tava tete mutayi gosisokombwa somandjembere ogu va simbire* vagara vavali, awo kwa simbire hena pomegaranate nekuzu. 24 Awo tava ruku evango olyo asi Muramba gwaEsikoli,* morwa sisokombwa somandjembere esi va tetere mo Vaisraeli.

25 Konyima zomazuva 40 apa va mene kutara sirongo, tava tengura. 26 Ta va wiza kwaMosesa naArona ntani kombunga nazinye zaIsraeli momburundu zaParani poKadesi. Awo kwa va tanterere mbudi ntani kwa va likidire enyango lyomosirongo oso. 27 Ta va tantere Mosesa asi: “Ose kwa zire mosirongo esi wa tu tanterere tu ze, ano sirongo oso kwa zura masini nousi ntani eli yilyo enyango lyamo. 28 Nye vantu ava va tunga mo nonkondo ntani yitata yawo kwa yi kundurukida makuma, ayo hena yinene. Ose hena kwa ka mona womoruvharo rwaAnaki. 29 Vaamareki kwa tunga mosirongo saNegebu ntani Vaheti noVajebusi noVaamoli kwa tunga momukunda gonondundu, ano Vakanani kwa tunga pepi nefuta nokonontere domukuro gwaJorodana.”

30 Makura Karebu ta ninki vantu ava va sikeme komeho zaMosesa va liture pokutanta asi: “Tu zeni ngesi tu ka guse sirongo, yeeyi ose kuvhura tu ka funde vantu vamo.” 31 Nye vagara ava va zire kumwe nage tava tanta asi: “Ose kapi tatu vhuru ku za tu ka rwise vantu ava va kara mo, yeeyi awo nonkondo unene kutupitakana.” 32 Awo kwa twikilire kutantera Vaisraeli mbudi zondona kuhamena sirongo esi va ka tere. Awo kwa tente asi: “Sirongo esi tuna zi tu ka tare kwato ogu a vhuru kutunga mo, morwa aso siponga unene ntani vantu ava twa ka mwene matundusika. 33 Ose twa ka mwene hena womoruvharo rwaAnaki ava va tundilira moruvharo romamuturungu.* Nsene tu lihetakanesa nawo, ose ngwendi nompasimpasi ntani awo kutumona ngwendi nompasimpasi.”

14 Apa za zuvhire mbunga eyi ga uyungire masimbi, tava zigire nokulira masiku mudima. 2 Vaisraeli navenye tava tameke kusivanena Mosesa naArona, makura mbunga nazinye tazi va tangwisa pokutanta asi: “Hansa ngano twa fililire mosirongo saEgipite ndi momburundu ezi! 3 Morwasinke ana kututwarera Jehova mosirongo esi va ka tu dipage norufuro? Vakadi vetu novana vetu ngava va tu hakana. Hansa tu tengureni tupu koEgipite.” 4 Awo kwa litanterere hena asi: “Tu horoworeni ogu natu pitisira tu tengure koEgipite!”

5 Makura Mosesa naArona tava tu nongoro, tava linyongamene komeho zombunga nazinye zoVaisraeli. 6 Ano Josuwa munaNunu naKarebu munaJefune, ava va zire kumwe novakwawo va ka tare sirongo, tava taura yikoverero yawo, 7 awo tava tantere mbunga nazinye zoVaisraeli asi: “Sirongo esi twa zire tu ka tare, siwa sili unene. 8 Nsene Jehova ana tu hafere, age nga tu twara mosirongo oso ntani nga si tu pa. Aso sirongo esi sa zura masini nousi. 9 Nye mwa ha rwanesa Jehova ntani mwa ha tjira vantu womosirongo oso, yeeyi ose ngatu va funda.* Awo kapi va kara mepopero, nye Jehova nose ga kara. Mwa ha va tjira.”

10 Mbunga nazinye ta zi liyongo asi zi va dipage nomamanya, nye uyerere waJehova ta u moneka keguru lyonkongoronzugo* ntani Vaisraeli navenye tava u mono.

11 Makura Jehova ta tantere Mosesa asi: “Siruwo sokuhura kupi ngava dira kufumadeka nge vantu ava, va dire kupura mwange nampili ngomu na rugana yitetu nayinye eyi mokatji kawo? 12 Ninka ni va zugume ehamba ntani ni va tjide mo, makura ove ni ku ninke o kare muhoko gomunene ntani gononkondo kuvapitakana.”

13 Nye Mosesa ta tantere Jehova asi: “Ove kwa gusa vantu woge koVaegipite nononkondo doge, yipo nye, nsene no yi rugana oyo Vaegipite ngava yi zuvha, 14 ntani ngava yi tantera vantu ava va tunga mosirongo esi. Vantu ava nawo va zuvha asi ove Jehova kwa kara mokatji kovantu ava ntani ove kwa va monekera sipara nosipara. Ove nyove Jehova ntani eremo lyoge kuna sikama keguru lyovantu ava. Ove kuvapitisira mongundi zeremo mutenya, ano masiku mongundi zomundiro. 15 Nsene no dipaga vantu navenye ava posikando simwe tupu, nomuhoko edi da zuvha efumano lyoge ngadi tanta asi: 16 ‘Jehova kapi ga vhura kureta vantu vendi mosirongo esi ga va tumbwidira asi nga si va pa, eyi yiyo ga va dipagera momburundu.’ 17 Na kanderere Jehova, likida nonkondo doge dononene ngwendi moomu wa tumbwidilire asi: 18 ‘Jehova age kapi a handuka usimbu ntani eharo lyendi lyanarunye. Age kudongonona po mapuko nononzo nye age kapi a tarerere vananzo va dire kuvatengeka. Age nga tondora nonzo dovaguhya kovana vawo ntani koruvharo rwawo rwautatu noru rwaune.’ 19 Mokumona asi ove wa kara neharo lyanarunye, va gusira po mapuko gawo ngwendi moomu wa va gusilire po apa va kere moEgipite dogoro ngesi.”

20 Makura Jehova ta tanta asi: “Tani va gusire po morwa eyi ono uyunga. 21 Nye nampili ngoso, tani gana asi uyerere waJehova nga u zwida evhu nalinye. 22 Ano vantu ava va mona uyerere wange noyitetu eyi na rugene moEgipite nomomburundu nokuheteka nge yikando murongo ntani kapi va purakena kezwi lyange, 23 kapi ngava za mosirongo esi na tumbwidira ozinyakurwawo. Kwato nampili gumwe ogu a dili kufumadeka nge nga si mona. 24 Nye morwa mukareli gwange Karebu ga lisiga novakwawo ntani age kwa limburukwa nge nomutjima nagunye, ame ngani mu twara mosirongo esi ga ka tere, ano ruvharo rwendi ngaru pinga sirongo oso. 25 Mokumona asi Vaamareki noVakanani kwa tunga momuramba, mungura ngomu tengure mu pite nzira zEfuta lyEgeha mu ze momburundu.”

26 Jehova makura ta tantere Mosesa naArona asi: 27 “Siruwo sokuhura kupi ngava twikira kusivanena nge vantu ava wovadona? Ame na zuvha omu ava sivanene nge Vaisraeli. 28 Va tantera asi ‘Jehova kuna gana asi: “Ame ngani mu rugana kuliza neyi muna uyunga! 29 Namuvenye ava mwa sivanena nge wonomvhura 20 yikandwise ava va tjanga, ngomu fira moomu momburundu. 30 Kwato gumwe gweni ogu nga za mosirongo esi na mu tumbwidira asi ngomu si pinga, kugusa ko Karebu munaJefune naJosuwa munaNunu.

31 “‘“Ame ngani twara mosirongo oso vana veni ava mwa tente asi ngava va mu hakana, ntani awo ngava hafera sirongo esi mwa nyoka. 32 Nye one ngomu fira moomu momburundu. 33 Ano vana veni ngava kara vasita momburundu nomvhura 40 ntani awo ngani va tengeka morwa kudira kulimburukwa kweni dogoro namuvenye ngomu fire momburundu. 34 Ame ngani mu tengeka nomvhura 40 kuliza nomazuva 40 aga mwa ka tere sirongo, mvhura zimwe mwankenye ezuva, yipo ngomu dive asi ame kapi ava rwanesa nge.

35 “‘“Nyame Jehova nina yi tanta. Eyi yiyo ngani rugana vantu navenye ava wovadona ava vana pongo va rwanese nge: Awo ngava fira moomu momburundu. 36 Vagara ava ga tumine Mosesa va ka tare sirongo ava va ya tanta mbudi zondona zokuhamena sirongo ezi zina ninkisa mbunga nazinye zi mu sivanene, 37 vagara ava va geve mbudi zondona kuhamena sirongo esi va ka tere, ngava va tengeka ntani ngava fira komeho zaJehova. 38 Nye Josuwa munaNunu naKarebu munaJefune, ava va zire novakwawo va ka tare sirongo, ngava paruka.”’”

39 Apa ga tanterere Mosesa Vaisraeli navenye nonkango edi, tava guwu unene. 40 Awo kwa pindukire ngurangura zonene, tava hetekere ko kuronda keguru lyondundu nokutanta asi: “Tuna liwapaikire ku za kevango eli ga tu tumbwidira Jehova, morwa ose twa zona.” 41 Nye Mosesa ta tanta asi: “Morwasinke muna kudilira kulimburukwa veta zaJehova? Kapi nayi mu tompoka eyi muna hara kurugana. 42 Mwa ha ronda ko, morwa Jehova kapisi none ana kara ntani nonkore deni nadi ka mu funda. 43 Yeeyi Vaamareki noVakanani kuna kumundindira ntani one ngava ka mu dipaga norufuro. Mokumona asi one kapi mwa limburukwa Jehova, Jehova kapi nga kara none.”

44 Nye awo kwa twikilire kuronda keguru lyondundu, nye sikesa saJehova segwanekero naMosesa kwa kere mokamba. 45 Vaamareki noVakanani ava va tungire momukunda ogo gonondundu tava humburuka, makura tava ya va fundu nokuvatjida dogoro koHoroma.

15 Jehova kwa tanterere hena Mosesa asi: 2 “Tantera Vaisraeli asi: ‘Apa ngomu ka sika mosirongo esi nina kumupa, 3 makura mu ka gave kwaJehova nzambo zokuhwika zongombe ndi zonzwi ndi zosikombo, yi kare asi nzambo zeswakerero ndi zokusikisa mo mugano ndi nzambo zemeharo lyanyamweni ndi nzambo zopoyipito, yipo zi gave edumba lyewa lyokuhafesa Jehova, 4 ogu nga gava nzambo ozo ga hepa hena kugava kwaJehova nzambo zombuto zousura wouwa wokilograma zimwe,* ou va vhonga nomagadi gokusika koyiha yolita zimwe.* 5 Mwa hepa kugava hena vhinyu ngonzambo zoyikunwa zokusika koyiha yolita zimwe kumwe nonzambo zeswakerero ndi nzambo zonzwigona zongara. 6 Nsene tomu gava nzwi zongara, mwa hepa kuzigava nonzambo zousura wouwa wonokilograma mbali* ou va vhonga nomagadi gokupitakana polita zimwe.* 7 Ntani mwa hepa kugava vhinyu ngonzambo zoyikunwa zokupitakana polita zimwe zokugava edumba lyewa lyokuhafesa Jehova.

8 “‘Nye nsene tomu gava kwaJehova ntwedu ngonzambo zeswakerero ndi nzambo zokusikisa mo mugano ndi nzambo zombili, 9 mwa hepa kugava nzambo ozo kumwe nonzambo zombuto zousura wouwa wonokilograma ntatu* ou va vhonga nomagadi gokusika koyiha yonolita mbali.* 10 Mwa hepa kugava hena vhinyu ngonzambo zoyikunwa zokusika koyiha yonolita mbali ngonzambo zokuhwika, yipo zi gave edumba lyewa lyokuhafesa Jehova. 11 Eyi yiyo ngomu rugana nsene tomu gava nkenye ntwedu ndi nkenye nzwi zongara ndi nonzwigona donongara ndi yikombo. 12 Yi kare asi yingapi muna kugava, nkenye esi mwa hepa kusigava kumwe nousura wouwa ou va vhonga nomagadi ntani nonzambo zoyikunwa. 13 Ngesi yimo nga gava nkenye Muisraeli nzambo zendi zokuhwika zokugava edumba lyewa lyokuhafesa Jehova.

14 “‘Nsene munayirongo ogu ga tunga kumwe none ndi ogu ga kara mokatji keni nomvhura dononzi, ta gava nzambo zokuhwika zedumba lyewa lyokuhafesa Jehova, nage ga hepa kurugana eyi omu rugana. 15 None novanayirongo ava va tunga kumwe none, namuvenye mwa hepa kukwama veta zokulifana. Azo kuna kara veta zokukarerera kumwe noruvharo rweni narunye. None novanayirongo mwa hetakana komeho zaJehova. 16 None novanayirongo ava va tunga kumwe none, mwa hepa kukwama veta zokulifana.’”

17 Jehova ta tantere hena Mosesa asi: 18 “Tantera Vaisraeli asi: ‘Apa ngomu ka sika mosirongo esi nina kumutwara 19 makura mu lye nondya* domosirongo oso, mwa hepa kugava ko yimwe kwaJehova. 20 Mwa hepa kugava nomboroto dokuliudinga* edi va ruganesa kousura womuzangu gweni gokuhova. Mwa hepa kudigava ngwendi moomu ava gava nzambo zoporupare. 21 None noruvharo rweni narunye, mwa hepa kugava kwaJehova usura weni wokuhova wokomuzangu gweni gokuhova.

22 “‘Nye nsene ngomu lipuka mu dire kulimburukwa noveta nadinye edi Jehova ga tantera Mosesa 23 ntani nonompangera nadinye edi ga mu pangera Jehova kupitira mwaMosesa, edi da tamekere kurugana mezuva eli ga di mu tanterere Jehova ntani ado ngadi twikira nokoruvharo rweni rokomeho, 24 ntani nsene kwa lipuka ano mbunga kapi za yi diva, mbunga nazinye za hepa kugava ntwedugona zimwe zonzambo zeswakerero, yipo zi gave edumba lyewa lyokuhafesa Jehova kumwe nonzambo zako zombuto nonzambo zako zoyikunwa kuliza nomavyukiso gononzambo deswakerero ntani sikombogona sonzambo zononzo. 25 Mupristeli nga gava nzambo, yipo va va gusire po Vaisraeli navenye morwa awo kwa lipuka, yiyo va reta kwaJehova nzambo zawo zokuhwika kwaJehova nonzambo zawo zononzo morwa epuko eli va tura. 26 Vaisraeli novanayirongo ava va tunga mokatji kawo, ngava va gusira po morwa vantu kwa tulire epuko.

27 “‘Nsene muntu* a zona morwa kwa lipuka, age ga hepa kugava sikombo sosikadi somvhura zimwe sonzambo zononzo. 28 Ano mupristeli nga gava nzambo zomuntu* ogu ana lipuka komeho zaJehova ga hana kuyidivira, yipo va mu gusire po nzo zendi. 29 None novanayirongo ava va tunga mokatji keni, mwa hepa kukwama veta zimwe tupu nsene gumwe ana rugana yuma ga hana kuyidivira.

30 “‘Nye nsene muntu* a zono mowina a kare asi Muisraeli ndi munayirongo, age kuna kuswaura Jehova ntani va hepa kumugusa mo* mokatji kovantu vendi. 31 Morwa age ga nyoka nonkango daJehova ntani kapi ga limburukwa veta zendi, muntu* ogo va hepa kumudipaga. Age ngava mu tengeka morwa epuko lyendi.’”

32 Apa va kere Vaisraeli momburundu, awo kwa gwene mugara ana kutjava yitare mezuva lyEsabata. 33 Ava va mu gwene kuna kutjava yitare, tava mu twara kwaMosesa naArona ntani kombunga nazinye. 34 Awo kwa mu tulire monomango morwa veta kapi za yi zeresere eyi nava mu rugana.

35 Makura Jehova ta tantere Mosesa asi: “Mugara ogo va hepa kumudipaga, ano mbunga nazinye za hepa kumudipaga nomamanya ponze zokamba.” 36 Makura mbunga ta zi mu twara ponze zokamba, tava mu dipaga nomamanya ngwendi moomu Jehova ga pangerere Mosesa.

37 Jehova ta tantere hena Mosesa asi: 38 “Tantera Vaisraeli asi nawo noruvharo rwawo rokomeho ngava honzere koyikoverero yawo nonyerera, ano keguru lyononyerera va hepa kuhonzera ko nongodi dosineguru. 39 ‘Yikoverero yeni ya hepa kukara nononyerera, yipo asi apa ngomu di mona ngadi mu diworokese nompangera nadinye daJehova mu di sikise mo. Mwa ha kwama yomonomutjima deni ndi eyi muna kumona, morwa nga yi mu ninkisa mu hondere pampepo.* 40 Eyi nga yi mu vatera mu diworoke ntani mu sikise mo nompangera nadinye nokukara muna pongoka komeho zaKarunga gweni. 41 Ame nyame Karunga gweni Jehova ogu ga mu gusa mosirongo saEgipite yipo ni mu likide asi ame Karunga gweni. Ame nyame Karunga gweni Jehova.’”

16 Kora kwa zire kumwe naDatani naAbiramu vana vaEliyaba ntani naOno munaPereti gomoruvharo rwaRubena. Kora kwa kere munaIsihara, Isihara kwa kere munaKohati ano Kohati kwa kere munaRevhi. 2 Vagara owo ntani nomasimbi 250 kwa rwanesere Mosesa. Masimbi ogo kwa ga horowere ga pitisire ntani ago kwa divikwire. 3 Awo kwa pongere va rwanese Mosesa naArona ntani kwa tente asi: “Tuna mu roroka one! Vaisraeli navenye va pongoka ntani Jehova kwa kara mokatji kawo. Morwasinke nye muna kulinenepekera mu pitakane mbunga zaJehova?”

4 Apa ga yi zuvhire Mosesa eyi, ta tu nongoro a linyongamene. 5 Makura ta tantere Kora ntani nava va mu kwatesere ko asi: “Jehova nga divisa ngurangura ogu ga hama kwendi nogu ga pongoka ntani ogu na vhura kumuhedera, ano ogu nga horowora yige nga mu hedera. 6 Kora kumwe nava ava kukwatesa ko, ngomu rugane eyi: ngomu guse yipana yomundiro, 7 mu ture po mundiro ntani yitutumikidiso makura ngomu yi ture komeho zaJehova mungura, ano mugara ogu nga horowora Jehova yige ga pongoka. Hagekeni eyi muna kurugana one vana vaRevhi!”

8 Makura Mosesa ta tantere Kora asi: “Na kanderere purakeneni nge one vana vaRevhi. 9 One ngoso kapi ya mu gwanena po kweyi ga mu horowora Karunga mokatji koVaisraeli ntani kweyi ga mu pulisira mu mu hedere, yipo mu rugane konkongoronzugo zaJehova mu vatere Vaisraeli ndi? 10 Ntani kweyi ga mu hedesera kwendi, nove noVarevhi vakweni ndi? Ngoso one hena kuna hara kugusa noupristeli ndi? 11 Eyi yiyo ono kurwanesera Jehova kumwe nava vana kukukwatesa ko. Age Arona yisinke ga mu rugana eyi muna kumusivanena?”

12 Konyima, Mosesa ta tumu vantu va ka zigide Datani naAbiramu, vana vaEliyaba, nye awo tava ka tanta asi: “Kapi tuna kuwiza ko ose! 13 Nani kapi ya kugwanena po kweyi wa tu gusa mosirongo esi sa zura masini nousi, o ya tu dipagere momburundu ndi? Ngesi ono hara hena o tu pangere ndi? 14 Kupi sina kara sirongo esi sa zura masini nousi oku wa tente asi ngo tu twara, nomapya noyikunino yomandjembere eyi wa tente asi ngo tu pa? Ono hara vagara ava va ku kwame ngwendi vatwiku ndi? Ose kapi tuna kuwiza ko!”

15 Mosesa makura ta handuka unene, ta tantere Jehova asi: “Wa ha tambura nzambo zawo zombuto. Ame kapi na gusa nampili sindongi sawo simwe ndi ni va rugane yoyidona.”

16 Mosesa ta tantere Kora asi: “Mungura ngo ze komeho zaJehova novakweni ava ava kukwatesa ko ntani naArona. 17 Nkenye ogu nga guse sipana sendi somundiro a ture po yitutumikidiso makura nga yi tware komeho zaJehova. Vagara ava ava kukwatesa ko ngava simbe yipana yawo yomundiro 250, makura ngava wize kumwe nove naArona noyipana yeni yomundiro.” 18 Makura navenye tava gusa yipana yawo yomundiro, tava tura po mundiro noyitutumikidiso, tava ka sikama pevero lyonkongoronzugo* kumwe naMosesa ntani naArona. 19 Apa ga ka sikire Kora novantu ava va mu kwatesere ko pevero lyonkongoronzugo, uyerere waJehova makura ta u monekere mbunga nazinye.

20 Jehova makura ta tantere Mosesa naArona asi: 21 “Tundeni mo mokatji koVaisraeli, yipo ni va zonagure po usimbu-simbu.” 22 Makura tava tu nongoro nokulinyongamena, tava tanta asi: “Ove Karunga ogu ga pa vantu eparu, nzo zomuntu gumwe yizo nazi kuninkisa o handukire mbunga nazinye ndi?”

23 Jehova makura ta tantere Mosesa asi: 24 “Tantera Vaisraeli asi: ‘Tundeni ko kotende zaKora naDatani ntani naAbiramu!’”

25 Makura Mosesa ta zi kwaDatani naAbiramu, ntani age kwa zire nomasimbi goVaisraeli. 26 Age ta tantere Vaisraeli asi: “Na kanderere tundeni ko konotende dovagara ava wovadona ntani mwa ha kwata yininke yawo, yipo va dire kumuzonagura morwa nonzo dawo.” 27 Awo tava tundu ko usimbu kotende zaKora naDatani ntani naAbiramu, makura Datani naAbiramu tava pwaga, va sikame pevero lyonotende dawo kumwe novakadi vawo novana vawo wovakondi nava wovanona.

28 Mosesa ta tanta asi: “Apa yipo nomu yi divira asi Jehova yige ga tuma nge ni rugane yininke nayinye eyi, nye kapisi nyame na yi panga: 29 Vagara ava nsene nava fa ngwendi moomu ava fu vantu navenye ntani nsene nava va tengeka ngwendi moomu ava tengeke vantu navenye, ngoso Jehova kapi ga tuma nge. 30 Nye Jehova nsene na rugana sitetu pokuninka evhu* li va mine kumwe noyininke yawo va va vhumbike awo simpe vazuni, one ngomu diva asi vagara ava kapi va fumadeka Jehova.”

31 Tupu ga mene kuuyunga, evhu ta li gaguka. 32 Makura ta li va mini kumwe nomapata gawo ntani nanavenye ava va kwatesere ko Kora noyiweka yawo nayinye. 33 Makura Kora nanavenye ava va mu kwatesere ko, ta li va mini evhu,* ta li va vhumbike awo simpe vazuni. Awo kwa dongonokere mo mokatji koVaisraeli. 34 Vaisraeli navenye kwa kere nowoma makura tava ka duka oku tava zigire asi: “Evhu kuvhura li tumine nose!” 35 Makura mundiro ta gu tundu kwaJehova, ta gu hwike vagara 250 ava va zembe yitutumikidiso.

36 Jehova ta tantere Mosesa asi: 37 “Tantera Eliyasara muna mupristeli Arona a guse yipana yomundiro eyi yina kupya, yeeyi ayo kwa pongoka. Mu tantera hena a ka zugumine makara gomundiro koure. 38 Yipana yomundiro yovagara ava vana fu morwa nzo zawo, va hepa kuyihambura yikare tuvera totununu va tu ture kosizambero, yeeyi ayo kuna gavere po nzambo kwaJehova makura yina pongoka. Ayo nga yi kare sidiviso serondoro koVaisraeli.” 39 Makura mupristeli Eliyasara ta gusa yipana yomundiro yongoporo yovagara ava va hwikire, ta yi hambura a yi ture kosizambero 40 ngwendi moomu ga mu tanterere Jehova kupitira mwaMosesa. Ayo kwa diworokesere Vaisraeli asi kwato muntu ogu va dira kupulisira,* nga zamba yitutumikidiso komeho zaJehova, ntani yipo ngava dire kuhonena Kora novantu ava va mu kwatesere ko.

41 Nye ezuva eli lya kweme ko, Vaisraeli tava tameke kusivanena Mosesa naArona pokutanta asi: “Nyone mwa ninkisa vantu vaJehova va va dipage.” 42 Apa va pongere Vaisraeli va rwanese Mosesa naArona, awo kwa pirukilire konkongoronzugo, makura tava mono eremo lina kudumike ko, ano uyerere waJehova ta u moneka.

43 Mosesa naArona tava zi komeho zonkongoronzugo, 44 makura Jehova ta tantere Mosesa asi: 45 “One vagara, tundeni mo mokatji kombunga ezi, yipo ni va zonagure po usimbu-simbu.” Awo makura tava tu nongoro nokulinyongamena. 46 Makura Mosesa ta tantere Arona asi: “Gusa sipana somundiro o ture po mundiro goposizambero ntani noyitutumikidiso o ze usimbu kombunga o ka gave nzambo, yipo va va gusire po morwa Jehova ana handuka unene. Vantu vana tameke kufa morwa ehamba!” 47 Arona ta gusa usimbu sipana somundiro ngwendi moomu ga mu tanterere Mosesa, ta dukire mokatji kombunga, nye ehamba kwa tamekere kudipaga vantu. Makura ta tura yitutumikidiso posipana somundiro a gave nzambo, yipo vantu va va dongwenene po nonzo dawo. 48 Age kwa sikamene ngorooro pokatji kovantu wokufa ntani nava va dilire kufa, makura ehamba ta li haga. 49 Sivaro sava va fire kehamba kwa kere 14 700, kugusa ko ava va fire morwa kukwatesa ko Kora. 50 Apa ga ka tengwire Arona kwaMosesa pevero lyonkongoronzugo, ehamba nalyo lina haga.

17 Jehova ta tantere Mosesa asi: 2 “Tantera Vaisraeli va rete mpango zimwe mwankenye rudi, va di guse komasimbi gomomazimo gawo. Nompango odo da hepa kukara 12 ntani tjanga kwankenye mpango edina lyesimbi. 3 Wa hepa kutjanga edina lyaArona kompango zorudi rwaRevhi, morwa nkenye esimbi lyorudi kwa kara nompango zimwe. 4 Wa hepa kutura nompango odo monkongoronzugo komeho zosikesa somadiworokeso, oku ani ku monekere nkenye apa. 5 Ano mpango zomugara ogu ngani horowora ngazi hokera ntani ngani ninka Vaisraeli va hageke kusivanena nge ngwendi moomu vana kukusivanena.”

6 Makura Mosesa ta yi tantere Vaisraeli, ano masimbi gawo nagenye taga mu pe nompango dawo; nkenye esimbi kwa geve mpango zimwe. Nompango kwa kere 12 ntani mpango zaArona nazo kwa kere kumwe nonompango dawo. 7 Mosesa ta di twara komeho zaJehova monkongoronzugo omu mwa kara madiworokeso.

8 Ezuva eli lya kweme ko, apa ga zire Mosesa monkongoronzugo omu mwa kere madiworokeso, ta mono mpango zaArona gemezimo lyaRevhi zina hokere ntani zina temuna nombya nonondongo.* 9 Mosesa makura ta reta nompango nadinye edi da kere komeho zaJehova, ta di twara koVaisraeli. Awo tava di tara, ano nkenye esimbi kwa gusire po mpango zendi.

10 Jehova ta tantere Mosesa asi: “Tengwida mpango zaArona komeho zosikesa somadiworokeso, azo nga zi kara sidiworokeso kovantu ava ava rwanesa nge, yipo ngava hageke kusivanena nge va dire kufa.” 11 Poopo ngoso, Mosesa ta rugana eyi ga mu pangerere Jehova. Age kwa yi rugene moomu va yi mu pangerere.

12 Vaisraeli tava tantere Mosesa asi: “Ngesi tatu fu nokudongonoka po natuvenye! 13 Ngoso natuvenye ngatu fa morwa kuhedera konkongoronzugo zaJehova ndi?”

18 Jehova makura ta tantere Arona asi: “Nove novana woge ntani nava vemezimo lyeni, nyone ngomu kara nousima nsene gumwe a zona konkongoronzugo, ntani nove novana woge ngomu kara nousima nsene ngomu teza noveta doupristeli. 2 Ngo zigide vakweni womorudi rwaRevhi omu wa tunda, yipo ngava ya rugane kumwe nove novana woge monkongoronzugo omu mwa kara madiworokeso. 3 Awo va hepa kusikisa mo yirugana eyi ngo va pa ntani noyirugana yawo yokonkongoronzugo. Nye kapisi ngava hedere pepi noyiruganeso yemevango lyokupongoka ntani nokosizambero, yipo ngomu dire kufa. 4 Awo ngava rugana nove va sikise mo yirugana yawo yomonkongoronzugo* ntani noyirugana nayinye yokonkongoronzugo, ano muntu ogu va dira kupulisira* kapisi nga mu hedere. 5 Mwa hepa kusikisa mo yirugana yeni yemevango lyokupongoka ntani yokosizambero, yipo ngani dire kuhandukira Vaisraeli. 6 Ame nyame na horowora Varevhi vakweni mokatji koVaisraeli ni va gave koge ngouhwi. Awo kwa va gava kwaJehova yipo va rugane konkongoronzugo. 7 Nove novana woge nyone ngomu rugana yirugana youpristeli kosizambero neyi yemevango lyokupongokerera* ntani mwa hepa kusikisa mo yirugana eyi. Ame kwa mu pa sirugana soupristeli ngouhwi kweni, ano nkenye ogu va dira kupulisira,* ogu nga hedera konkongoronzugo, va hepa kumudipaga.”

8 Jehova ta tantere hena Arona asi: “Ame na ku pa situmbukira sokupakera mbili yigava eyi ava pe nge. Ame kwa ku pa nove novana woge ruha rumwe poyininke yokupongoka eyi ava pe nge Vaisraeli. Oro kuna kara ruha roge kumwe novana woge dogoro narunye. 9 Oru yiro ngaru kara ruha roge pononzambo dokupongoka dokuhwika: nkenye nzambo ezi ngava gava, kukwatera mo nonzambo dawo donombuto nononzambo dawo dononzo nedi dokugusisa po nonzo edi ngava reta kwange. Ado kuna kara yininke yokupongoka unene koge ntani kovana woge wovagara. 10 Wa hepa kuyilira mevango lyokupongokerera, ano vagara navenye kuvhura va lye ko. Wa hepa kuyitara asi ayo ya pongoka. 11 Yigava eyi ngava gava Vaisraeli nononzambo dawo nadinye delikido nayo ngayi kara yoge. Yininke eyi kwa yi ku pa kumwe novana woge wovagara nava wovakadi ngoruha rweni dogoro narunye. Nkenye ogu gemembo lyoge ogu nga dira kunyata kuvhura nga lye ko.

12 “Magadi nagenye gomawa novhinyu nazinye zongwa po nombuto ndi muzangu gwako gokuhova ogu ava gava kwaJehova, tani yi gava koge. 13 Muzangu ogu ngava hova kuzangura momapya gawo, ogu ngava reta kwaJehova nga gu kara goge. Nkenye ogu gemembo lyoge ogu nga dira kunyata kuvhura nga lye ko.

14 “Nkenye eyi* ngava gava moIsraeli, nga yi kara yoge.

15 “Nombeli nadinye edi ngava gava kwaJehova, yi kare asi mbeli zomuntu ndi zosimuna nga di kara doge. Nye wa hepa kuranda* nombeli dovantu ntani nedi doyimuna yokudira kukuhuka. 16 Wa hepa kudiranda nsene dina gwanesa kwedi kumwe ndi kupitakana opo noyisiliveli yitano* kuliza noyisiliveli yekevango lyokupongoka. Sisiliveli simwe* kwa sika ponograma 11. 17 Mbeli zontwedu ndi mbeli zonzwigona zongara ndi zosikombo yizo tupu ngo dira kuranda. Ayo kwa pongoka. Wa hepa kunagera honde zayo kosizambero, ano magadi gayo ngo ga hwike ngonzambo zokuhwika, yipo ngazi gave edumba lyewa lyokuhafesa Jehova. 18 Nyama zayo ngazi kara zoge ngwendi nturo* zonzambo zelikido nosirama sorulyo. 19 Yigava nayinye yokupongoka eyi ngava gava Vaisraeli kwaJehova, nayi ku pa nove novana woge wovagara nava wovakadi ngoruha rweni dogoro narunye. Eli kuna kara egwanekero* lyokukarerera lyomungwa eli ga tura po Jehova kumwe nove noruvharo roge.”

20 Jehova ta tantere Arona asi: “Ove kapi ngo pinga evega moIsraeli eli ngo sigira vana woge apa ngo fa. Ame ngani kupakera mbili* ntani ngani ku pa yihepwa yoge nayinye mokatji koVaisraeli.

21 “Ame kwa pa Varevhi yiumurongo eyi ava gava Vaisraeli, ngoupingwa wawo morwa yirugana eyi ava rugana konkongoronzugo.* 22 Vaisraeli kapisi ngava hedere hena konkongoronzugo ndi ngano ngava zona makura ngava fe. 23 Varevhi yiwo ngava rugana yirugana yokonkongoronzugo ntani yiwo ngava kara nousima komapuko goVaisraeli. Ruvharo roge kapisi ngaru pinge evega mokatji koVaisraeli, ano ezi kuna kara veta zokukarerera koruvharo roge narunye. 24 Yeeyi ame kwa pa Varevhi yiumurongo eyi ava gava Vaisraeli kwaJehova yikare upingwa wawo. Eyi yiyo nava tanterere asi: ‘Awo kapisi ngava pinge yuma mokatji koVaisraeli.’”

25 Makura Jehova ta tantere Mosesa asi: 26 “Tantera Varevhi asi: ‘One ngomu gwana koVaisraeli yiumurongo eyi na mu pa ngoupingwa weni. None mwa hepa kugusa po yiumurongo yipo mu yi gave kwaJehova. 27 Ano Karunga nga tara yigava eyi ngwendi mbuto zeni ntani vhinyu zeni ndi magadi geni. 28 Monkedi ezi, none ngomu gava yigava kwaJehova poyiumurongo eyi ngomu gwana koVaisraeli ntani one ngomu gava yigava yaJehova komupristeli Arona. 29 Poyigava yeni nayinye yoyiwa eyi va mu pa, ngomu gave kwaJehova yigava yokulisiga-siga, yeeyi ayo kwa pongoka.’

30 “Ntani ngo va tantere asi: ‘Apa ngomu gava one Varevhi yigava yeni yoyiwa po, Karunga nga yi tara ngwendi mbuto zeni ntani vhinyu zeni ndi magadi geni. 31 None nomapata geni kuvhura ngomu yi lire nkenye oku, morwa ayo kuna kara mfeto zoyirugana eyi omu rugana konkongoronzugo. 32 Nsene mu gava yoyiwa po, one kapi ngomu zona. Kapisi ngomu nyateke yininke yokupongoka yoVaisraeli, ngano ngomu fa.’”

19 Jehova ta tantere hena Mosesa naArona asi: 2 “Jehova kuna kumupangera asi: ‘Mwa hepa kutantera Vaisraeli va guse ngombe zongeha zokukanguka ezi za dira kukara nourema ntani kapi va zi kutira rumwe. 3 Makura ngomu zi gave komupristeli Eliyasara, ano age nga zi tware ponze zokamba ntani azo ngava zi dipagere komeho zendi. 4 Makura mupristeli Eliyasara nga gusa ko honde zimwe nonyara zendi a zi nagere komeho zonkongoronzugo* yikando ntambali. 5 Ngombe ozo ngava zi hwike komeho zendi. Sipapa sazo nonyama zazo ntani nohonde zazo kumwe nofwati zazo nayo ngava yi hwike. 6 Mupristeli nga gusa yitare yosedeli nohisopo ntani ekehe lyegeha, makura nga yi zugumine momundiro omu ngava hwikira ngombe. 7 Makura mupristeli nga kuhwa yikoverero yendi nokuzogana. Kutunda opo, age kuvhura nga wize mokamba, nye age nga nyata dogoro kongurova.

8 “‘Muntu ogu nga hwika ngombe ozo, nga kuhwe yikoverero yendi nokuzogana ntani age nga nyata dogoro kongurova.

9 “‘Ano muntu ogu ana dili kunyata, nga pongaika enoto lyongombe a ka li ture ponze zokamba pevega lyokuzera ntani Vaisraeli yiwo ngava pungura enoto olyo, yipo ngava li vhonge nomema aga ngava ruganesa mokukuhura. Azo nzambo zononzo. 10 Muntu ogu nga pongaika enoto lyongombe, age nga kuhwa yikoverero yendi ntani nga nyata dogoro kongurova.

“‘Ezi kuna kara veta zokukarerera koVaisraeli novanayirongo ava va tunga mokatji kawo. 11 Nkenye ogu nga kwata simpu, age nga nyata mazuva ntambali. 12 Muntu ogo ga hepa kulikuhura mwene nomema mezuva lyautatu, ano mezuva lyauntambali age nga kuhuka. Nye nsene kapi nga likuhura mezuva lyautatu, age kapi nga kuhuka mezuva lyauntambali. 13 Nkenye ogu nga kwata simpu makura a dire kulikuhura, age nga nyateka nkongoronzugo zaJehova ntani va hepa kumugusa mo* mokatji koVaisraeli. Mokumona asi age kapi va mu nagera mema va mu kuhure, age nga nyata ngorooro.

14 “‘Ezi yizo veta ngomu kwama nsene muntu ana fire motende: Nkenye ogu nga hwilira mo ndi nkenye ogu nga kara motende, nga nyata mazuva ntambali. 15 Nkenye sipako esi vana dili kupata noruswiko, sa nyata. 16 Nkenye ogu nga kara ponze makura a kwate muntu ogu vana dipaga norufuro ndi simpu ndi sisupa somuntu ndi ntoko, age nga nyata mazuva ntambali. 17 Muntu ogu ana nyata va hepa kumugusira po enoto limwe lyonzambo zononzo ezi vana hwike va li ture mosipako makura va tjire mo mema gomawa. 18 Makura muntu ogu ana dili kunyata, nga guse mutayi gohisopo a gu tupike momema a nagere kotende, koyipako nayinye, kovantu* navenye ava va kere po, komuntu ogu ana kwata sisupa ndi muntu ogu va dipaga ndi simpu ndi ntoko. 19 Muntu ogu ana dili kunyata nga nagera mema muntu ogu ana nyata mezuva lyautatu ntani mezuva lyauntambali. Makura mezuva lyauntambali, nga kuhura muntu ogu ana nyata konzo ntani age ga hepa kukuhwa yikoverero yendi nokuzogana, makura kongurova age nga kuhuka.

20 “‘Nye muntu ogu ana nyata ntani ogu nga dira kulikuhura, va hepa kumugusa mo* mokatji koVaisraeli, morwa age kwa nyateka nkongoronzugo zaJehova. Mokumona asi age kapi va mu nagera mema yipo a kuhuke, age ga nyata.

21 “‘Ezi kuna kara veta zawo zokukarerera: Ogu ana kunagera mukwawo mema gekuhuro, ga hepa kukuhwa yikoverero yendi, ano ogu ana kukwata mema gekuhuro nga nyata dogoro ngurova. 22 Nkenye eyi nga kwata muntu ogu ana nyata, nayo nga yi nyata. Ano muntu* ogu nga kwata yininke eyi ana kwata muntu gokunyata, nage nga nyata dogoro kongurova.’”

20 Mokwedi kokuhova, Vaisraeli tava ka sika momburundu zaSini, tava tungu moKadesi. Momukunda ogo yimo ga fililire Miliyama, makura tava mu horeke.

2 Vaisraeli kapi va kere nomema gokunwa, makura tava pongo va rwanese Mosesa naArona. 3 Vantu kwa tangwisire Mosesa, tava tanta asi: “Hansa ngano nose kwa fire kumwe novakwetu komeho zaJehova! 4 Ove kwa reta mbunga zaJehova momburundu ezi yipo tu ya fe kumwe noyimuna yetu ndi? 5 Morwasinke wa tu gusira moEgipite o tu rete kevango lyedona ngesi? Amo kapi ava kunu mo mbuto ntani mwato yitji yekuzu, mandjembere nonopomegaranate ntani mwato mema gokunwa.” 6 Makura Mosesa naArona tava tundu mo mombunga, va ze pevero lyonkongoronzugo,* tava tu nongoro va linyongamene, makura uyerere waJehova ta u va monekere.

7 Jehova ta tantere Mosesa asi: 8 “Gusa mpango makura nove namukuroge Arona mu zigide Vaisraeli va ya ponge mu uyungise emanya olyo komeho zawo yipo li mu pe mema. Makura ngo guse mema gememanya olyo, o pe Vaisraeli noyimuna yawo yi nwe.”

9 Makura Mosesa ta gusa mpango komeho zaJehova ngwendi moomu ga mu pangerere Karunga. 10 Mosesa naArona tava zigida mbunga zi ya ponge komeho zemanya, Mosesa ta va tantere asi: “Purakeneni one varwanesi! Muna hara tu mu gusire mema memanya eli ndi?” 11 Makura Mosesa ta zerura kuwoko kwendi, ta toona mpango zendi pemanya yikando yivali, makura ta ga pwaga mo mema gomanzi, ano Vaisraeli noyimuna yawo ta yi nu.

12 Konyima, Jehova ta tantere Mosesa naArona asi: “Mokumona asi one kapi muna likida epuro mwange nokufumadeka nge komeho zombunga zoVaisraeli, one kapi ngomu twara mbunga ezi mosirongo esi ngani va pa.” 13 Mema aga kwa kere moMeliba* omu va tangwisilire Vaisraeli Jehova, ano age kwa va likidire asi age kwa pongoka.

14 Mosesa ta tumu vantu va tunde moKadesi va ze kwa hompa gwaEdomu. Awo kwa ka mu tanterere asi: “Mumbyoge Israeli kuna tanta asi: ‘Ove wa diva maudigu aga twa ligwanekera nago. 15 Vaguhya vetu kwa zire moEgipite ntani ose kwa ka tungire moEgipite nomvhura* dononzi, nye Vaegipite kwa tu tekwire momudona kumwe novaguhya vetu. 16 Konyima tatu likwambere kwaJehova ntani age ta tu zuvhu, makura ta tumu muengeli a tu guse moEgipite, ano ose ngesi kuna kara moKadesi, sitata esi sa kara pomururani gosirongo seni. 17 Tuna kanderere tu pulisira tu pite mosirongo seni. Ose kapi ngatu pita momapya ndi moyikunino yomandjembere ntani kapi ngatu nwa mema gomomatope. Ose ngatu genda monzira ezi ava tumbura asi Nzira zaHompa, twa hana kuzapuka korulyo ndi korumoho dogoro ngatu tunde mo mosirongo seni.’”

18 Nye hompa gwaEdomu kwa ka va limbwilire asi: “Kapisi ngomu pite mosirongo setu, nsene ngomu yi rugana ngani wiza norufuro ni ya mu gwane.” 19 Vaisraeli tava ka limburura asi: “Ose ngatu pita tupu monzira, nye nsene nose noyimuna yetu ngatu nwa mema geni, ose ngatu mu futa. Ose kuna hara tupu kugenda tu pite mosirongo seni.” 20 Nye hompa gwaEdomu simpe ta tanta asi: “Kapisi ngomu zi pite.” Makura age ta wiza novantu wovanzi ntani novakwayita wononkondo a ya va gwane. 21 Hompa gwaEdomu kwa nyokere kupulisira Vaisraeli va pite mosirongo sendi, makura awo tava tengura va pite nzira zapeke.

22 Mbunga nazinye zoVaisraeli ta zi tundu moKadesi, makura ta zi ka sika koNdundu zaHoro. 23 Jehova ta tantere Mosesa naArona poNdundu zaHoro ezi za kara pomururani gosirongo saEdomu asi: 24 “Arona nga fa ntani ngava mu horeka moomu va horekere vantu vendi.* Age kapi nga za mosirongo esi ngani pa Vaisraeli, morwa one kapi mwa kweme eyi na mu tanterere kuhamena mema gomoMeliba. 25 Gusa Arona namunendi Eliyasara mu ronde koNdundu zaHoro. 26 Ka huture Arona yidwara yendi youpristeli, o ka yi dwareke munendi Eliyasara, ano Arona ta ka fira kooko kondundu.”

27 Mosesa ta rugana eyi ga mu tanterere Jehova, makura awo tava rondo koNdundu zaHoro awo vantu navenye kuna kutara. 28 Makura Mosesa ta hutura Arona yidwara yendi youpristeli ta yi dwareke munendi Eliyasara. Konyima, Arona ta fire keguru lyondundu. Makura Mosesa naEliyasara tava humburuka kondundu. 29 Apa va mwene Vaisraeli navenye asi Arona ana fu, awo kwa mu lilire mazuva 30.

21 Apa ga yi zuvhire hompa gwaAradi goMukanani, ogu ga tungire moNegebu asi Vaisraeli kuna kupita nzira zomoAtalimu, ta va homokere ntani ta gusa vamwe va kare nonkwate. 2 Makura Vaisraeli tava gana kwaJehova asi: “Nsene no gava vantu ava momawoko getu, ose ngatu zonagura po yitata yawo nayinye.” 3 Makura Jehova ta purakene koVaisraeli ntani ta gava Vakanani momawoko gawo, ano awo tava va zonagura po kumwe noyitata yawo. Evango olyo tava li ruku asi Horoma.*

4 Apa va tundire koNdundu zaHoro, tava piti nzira zekEfuta lyEgeha va kunduruke sirongo saEdomu, ano vantu* kwa rorokere morwa rugendo oro. 5 Makura vantu tava twikire kusivanena Karunga naMosesa asi: “Morwasinke wa tu gusira mosirongo saEgipite tu ya fire momburundu? Ose kwato nondya nomema ntani ose* yina tu setauka yimboroto eyi.” 6 Makura Jehova tava tumine mazoka gouhungu ntani ago taga humu vantu, ano Vaisraeli wovanzi kwa fire.

7 Makura vantu tava wiza kwaMosesa, tava tanta asi: “Ose tuna zono, morwa tuna sivanene Jehova ntani nove. Tu likwamberera po kwaJehova yipo a guse mazoka aga mokatji ketu.” Makura Mosesa ta likwamberere po vantu kwaKarunga. 8 Makura Jehova ta tantere Mosesa asi: “Rugana yuma yokufana ngwendi ezoka lyouhungu o liture kongundi. Ano nkenye ogu na li huma ezoka, ga hepa kutara ko yipo a paruke.” 9 Makura Mosesa ta rugana usimbu ezoka lyongoporo, ta li tura kongundi. Ano nsene ezoka lina humu muntu makura a tare kezoka lyongoporo, ta paruka.

10 Kutunda opo, Vaisraeli tava katuka va ze, makura tava ka dika kamba zawo moOboto. 11 Apa va tundire moOboto, tava ka dika kamba zawo moIye-abalimu, momburundu zokoUpumezuva, ezi za karera komeho zaMowaba. 12 Kutunda opo, tava katuka tava ka dika kamba zawo moMuramba gwaSeredi. 13 Apa va tundire moMuramba gwaSeredi, tava ka dika kamba zawo pepi nomukunda omu gwa kara Muramba gwaArunoni, ogu gwa kara momburundu ezi za tundilira komururani goVaamoli. Mukunda gwaArunoni kuna kara mururani gwaMowaba ntani ago kwa kara pokatji koVamowaba noVaamoli. 14 Eyi yiyo za uyungira buke zaJehova zoyita asi: “Vahebu moSufa ntani nonomuramba daArunoni, 15 nomuramba edi da gurumuka di ze kositata saAra, di ka ligwanekere nomururani gwaMowaba.”

16 Kutunda opo tava zi koBere. Petope eli yipo ga tanterere Jehova Mosesa asi: “Tantera vantu va ponge yipo ni va pe mema.”

17 Posiruwo oso yipo va dimbire Vaisraeli rusumo oru asi:

“Ove etope, reta mema! Dimbireni etope!

Makura tava tundu momburundu va ze koMatana, 19 apa va tundire moMatana tava zi koNahaliyeli, kutunda opo, tava zi koBamoti. 20 Apa va tundire moBamoti, tava zi momuramba gomomukunda gwaMowaba ogu gwa kara kondundu zaPisiga. Ano nsene yipo ono kara, kuvhura o mone Jesimoni.*

21 Vaisraeli tava tumu vantu kwaSihoni, hompa goVaamoli, va ka mu tantere asi: 22 “Tu pulisira tu pite mosirongo seni. Ose kapi ngatu zapuka tu ze mepya ndi mosikunino somandjembere ntani kapi ngatu nwa mema gomomatope. Ose ngatu pita monzira ezi ava tumbura asi Nzira zaHompa, dogoro ngatu tunde mo mosirongo seni.” 23 Nye Sihoni kapi ga pulisilire Vaisraeli va pite mosirongo sendi. Age kwa pongaikire vantu vendi navenye va ka rwise Vaisraeli momburundu. Apa va ya sikire moJahasi, tava rwisa Vaisraeli. 24 Nye Vaisraeli tava fundu Sihoni ntani tava gusa sirongo sendi, kutundilira moMuramba gwaArunoni dogoro moMuramba gwaJaboko, ogu gwa kere pepi noVaamoni, nye kapi va pitakanene sitata saJasere morwa aso kwa kere pomururani goVaamoni.

25 Makura Vaisraeli tava gusa yitata nayinye eyi, ntani tava tameke kutunga moyitata yoVaamoli, kukwatera mo Hesiboni noyitata nayinye eyi ya si kundurukida. 26 Hesiboni kwa kere sitata saSihoni hompa goVaamoli, ogu ga rwisire hompa goVamowaba, ta gusa sirongo sendi nasinye kutundilira koMuramba gwaArunoni. 27 Oku yiko da tundilira nonkango edi ngava lisindisa vantu asi:

“Wiza koHesiboni.

Ngano sitata saSihoni va si tunge ntani va si ninke si kore.

28 Yeeyi mundiro kwa tundire moHesiboni sitata saSihoni.

Ago kwa hwikire Ara sitata saMowaba novapangeli womavango gonondundu gomoArunoni.

29 Ani nane one Vamowaba! One ngava mu zonagura po, one vantu vaKemosi!

Age* kuninkisa vana vendi wovagara va tjwayuke ntani vana vendi wovakadi va kare nonkwate daSihoni hompa goVaamoli.

31 Makura Vaisraeli tava tameke kutunga mosirongo soVaamoli. 32 Mosesa kwa tumine vagara vamwe va ka tare* sitata saJasere. Awo kwa ka kwete yitata eyi ya si kundurukida, tava tjida mo Vaamoli ava va tungire mo. 33 Kutunda opo, tava piruka va gende nzira zaBasani, ano Ogo hompa gwaBasani ta wiza kumwe novantu vendi navenye a ya va rwise moEdereyi. 34 Jehova ta tantere Mosesa asi: “Wa ha mu tjira, yeeyi ame ngani mu gava momawoko goge novantu vendi navenye ntani nosirongo sendi. Ove ngo mu rugana ngwendi moomu wa rugene Sihoni hompa goVaamoli, ogu ga tungire moHesiboni.” 35 Makura Vaisraeli tava dipaga hompa Ogo novana vendi wovagara ntani novantu vendi navenye, dogoro navenye tava fu. Makura tava gusa sirongo sendi.

22 Vaisraeli tava katuka makura tava ka dika kamba zawo momazana gaMowaba aga ga livyuka naJeliko koUpumezuva womukuro gwaJorodana. 2 Baraka munaSiporo kwa mwene nayinye eyi va rugene Vaisraeli koVaamoli. 3 Vamowaba kwa tjilire unene Vaisraeli ntani kwa va nyengere morwa vanzi va kere. 4 Makura Vamowaba tava tantere masimbi goVamidiyani asi: “Mbunga ezi ngazi zonagura po sirongo setu ngwendi moomu azi li ntwedu wayi naunye.”

Posiruwo oso, Baraka munaSiporo yige ga kere hompa goVamowaba. 5 Age kwa tumine vantu kwaBaramu munaBeyoro, ogu ga tungire nekoro lyendi moPetoro pepi noMukuro gwaEufurata. Baraka kwa tanterere Baramu asi: “Koveli vantu ava va tunda moEgipite, awo kwa lihanena uzuni* mudima ntani awo vana tungu pepi nosirongo setu. 6 Na kanderere wiza o ya fingire nge vantu ava, yeeyi awo nonkondo kupitakana nge. Nampo nani va funda ni va tjide mo mosirongo, yeeyi ame nayi diva asi nkenye ogu o tungike kumuhorokera yininke yoyiwa, ano nkenye ogu o fingi kumuhorokera yininke yoyidona.”

7 Makura masimbi goVamowaba nomasimbi goVamidiyani tava zi noyimaliwa eyi nava ka futa Baramu, yipo a ka rugane umpure ntani awo kwa ka mu tanterere mbudi zaBaraka. 8 Makura Baramu ta va tantere asi: “Rareni kooku masiku ganaina, ame ngani mu tantera eyi nga tantera nge Jehova.” Makura masimbi goVamowaba taga kara naBaramu.

9 Makura Karunga ta wiza kwaBaramu, ta mu pura asi: “Wolye ava vagara vana kara nove?” 10 Baramu ta limburura Karunga gousili asi: “Baraka munaSiporo, hompa gwaMowaba kuna tumine nge mbudi ezi asi: 11 ‘Vantu ava va tunda moEgipite vana lihanene uzuni* mudima. Wiza o ya va fingire nge. Nampo ngani va rwisa makura ngani va tjide mo.’” 12 Nye Karunga ta tantere Baramu asi: “Wa ha za nawo ntani wa ha finga vantu owo, yeeyi awo kwa va tungika.”

13 Ngurangura, Baramu ta pinduka ta tantere masimbi aga ga tumine Baraka asi: “Tengureni kosirongo seni, morwa Jehova ana silike nge kuza kumwe none.” 14 Makura masimbi goVamowaba taga katuka ga tengure kwaBaraka, taga ka mu tantera asi: “Baramu ana nyoka kuwiza kumwe nose.”

15 Nye Baraka ta ka tuma hena masimbi gamwe gomulyo unene ntani gomanzi kupitakana aga ga hovere kutuma. 16 Awo kwa wizire kwaBaramu, tava ya mu tantere asi: “Baraka munaSiporo kuna tanta asi: ‘Na kanderere wa ha pulisira nkenye eyi yi ku kondere mokuwiza kwange, 17 yeeyi ame ngani ya kufuta ntani ngani rugana nkenye eyi ngo tantera nge. Yipo nye, na kanderere wiza o ya fingire nge vantu ava.’” 18 Nye Baramu ta limburura vakareli vaBaraka asi: “Nampili ngano Baraka a pe nge embo lyendi eli lina zura sisiliveli nongorodo, ame kapi tani vhuru kurugana yininke eyi ga nyokesa nge Karunga gwange Jehova, yi kare asi yoyinunu ndi yoyinene. 19 Nye none rareni kooku masiku ganaina, yipo ni ndindire eyi na tantera nge Jehova.”

20 Makura Karunga ta wizire Baramu masiku ta mu tantere asi: “Nsene vagara ava kuna wiza va ya ku simbe, zende kumwe nawo, nye wa hepa ku ka uyunga tupu eyi nani ka ku tantera.” 21 Makura Baramu ta pinduka ngurangura ta tura nomurongero dendi posindongi,* ta zi kumwe nomasimbi goVamowaba.

22 Nye Karunga ta mu handukire kweyi ga katukire a ze, makura muengeli gwaJehova ta sikama monzira yipo a mu kondere. Baramu kwa zire nosindongi sendi ntani novakareli vendi vavali. 23 Apa sa mwene sindongi muengeli gwaJehova ana sikama monzira norufuro mokuwoko kwendi, ta si hetekere ko kuzapuka monzira si ze mepya. Nye Baramu ta si toona si tengwire monzira. 24 Makura muengeli gwaJehova ta sikama monzira zonunu ezi za kere pokatji koyikunino yivali yomandjembere eyi ya kere nekuma. 25 Apa sa mwene sindongi muengeli gwaJehova, ta si likura kekuma, makura ta si senenekeda mpadi zaBaramu kekuma. Ano Baramu ta tameke hena kusitoona.

26 Muengeli gwaJehova ta piti hena komeho, ta ka sikama pevango apa sa dilire kuvhura kupirukira sindongi korulyo ndi korumoho. 27 Sindongi apa sa mwene muengeli gwaJehova, ta si bwakama, makura Baramu ta handuka unene, ta twikire kutoona sindongi nompango zendi. 28 Makura Jehova ta ninki sindongi si uyunge,* ta si pura Baramu asi: “Yisinke nina kurugana eyi ono toonene nge yikando yitatu?” 29 Baramu ta limburura sindongi asi: “Yeeyi ove kuna ninkisa nge ni moneke ngwendi egova. Ngano kani kara norufuro mokuwoko kwange, ngano nina kudipaga!” 30 Makura sindongi ta si pura Baramu asi: “Nani ame kapisi sindongi soge esi wa ronda eparu lyoge nalinye dogoro ngesi ndi? Na kutekura rumwe monkedi ezi ndi?” Age ta limburura asi: “Hawe!” 31 Makura Jehova ta mahura meho gaBaramu, ta mono muengeli gwaJehova ana sikama monzira norufuro mokuwoko kwendi, makura age tatu nongoro a linyongamene.

32 Muengeli gwaJehova ta mu pura asi: “Morwasinke ono toonene sindongi soge yikando yitatu? Nyame nina kukondere morwa eyi ono kurugana kuna kulilimba nompango zange. 33 Nye sindongi sina mono nge yiyo sina hetekere ko kupiruka yikando yitatu. Ngano kapi sina piruka, ngano nare nina kudipaga ni sige sindongi si paruke.” 34 Makura Baramu ta tantere muengeli gwaJehova asi: “Ame nina zono morwa kapi nina yi diva asi nyove ono sikama monzira, o kondere nge. Nsene kapi ono harere nge ni ze, ame tani tengura.” 35 Nye muengeli gwaJehova ta tantere Baramu asi: “Zende kumwe nomasimbi, nye wa hepa ku ka uyunga tupu yeeyi nani ka ku tantera.” Makura Baramu ta zi kumwe nomasimbi aga ga tumine Baraka.

36 Baraka apa ga zuvhire asi Baramu ana wiza, ta zi usimbu a ka mu gwane mositata soVamowaba, esi sa karera konontere domuramba gwaArunoni komururani gosirongo soVamowaba. 37 Baraka ta pura Baramu asi: “Nani kapi na kuzigida? Morwasinke wa dililire kuwiza? Ngoso ove kwa kugazara asi kapi tani vhuru kukufuta ndi?” 38 Baramu ta limburura Baraka asi: “Nyame ogu nina wiza koge. Nye no pulisira nge kuuyunga yuma ndi? Ame nani uyunga tupu eyi na tantera nge Karunga.”

39 Makura Baramu ta zi kumwe naBaraka tava ka sika poKiliyata-husoti. 40 Baraka ta zamba nongombe nononzwi, makura ta tumu dimwe kwaBaramu ntani komasimbi aga ga kere kumwe nendi. 41 Ngurangura, Baraka ta gusa Baramu, ta mu twara koBamoti-bara; kevango eli ga vhulire kumona vantu navenye.

23 Makura Baramu ta tantere Baraka asi: “Tunga yizambero ntambali pevega eli, ntani wapaikira nge nontwedu ntambali nononzwi donongara ntambali.” 2 Baraka ta rugana poopo eyi ga mu tanterere Baramu. Ano Baraka naBaramu tava zamba ntwedu nonzwi zongara pwankenye sizambero. 3 Makura Baramu ta tantere Baraka asi: “Kara paapa ponzambo zoge zeswakerero, ame tani zi. Nampo Jehova na ka monekera nge. Ano nkenye eyi na ka tantera nge, nove nani ya yi ku tantera.” Makura age ta zi kondundu.

4 Makura Karunga ta monekere Baramu, ano Baramu ta mu tantere asi: “Ame kuna dike yizambero ntambali momukweyo ntani pwankenye sizambero ame kuna zambere po ntwedu nonzwi zongara.” 5 Jehova kwa tanterere Baramu eyi na ka uyunga. Age kwa mu tanterere asi: “Tengura kwaBaraka o ka uyunge eyi nina ku tantere.” 6 Makura ta tengura ta ka gwana Baraka nomasimbi nagenye gomoMowaba gana sikama pepi nonzambo zendi zeswakerero. 7 Makura ta uyunga mutango ogu asi:

‘Wiza o ya fingire nge ruvharo rwaJakopo.

O ya futise Vaisraeli.’

 8 Ngapi omu nani finga vantu ava ga dira kufinga Karunga?

Ntani ngapi omu nani futisa vantu ava ga dira kufutisa Jehova?

10 Yilye gokuvhura kuvarura ruvharo rwaJakopo oru rwa fana ngwendi mbundu?

Ndi yilye gokuvhura kuvarura ruha rumwe* rombunga zoVaisraeli?

11 Baraka ta tantere Baramu asi: “Yisinke ono ruganene nge yininke yokufana ngesi? Ame kwa ka kusimba o ya fingire nge nonkore dange, nye ove yiyo ono va tungike.” 12 Nye Baramu ta tanta asi: “Ame kuuyunga tupu eyi ana tantere nge Jehova.”

13 Baraka ta mu tantere asi: “Tu ze kumwe kevango lyapeke oku no ka vhura kukavamona, nye vamwe kapi no ka va mona. Oko yiko no ka va fingilira nge.” 14 Makura ta mu twara mepya lyaSofimu eli lya kara kondundu zaPisiga, makura ta ka tunga yizambero ntambali ntani pwankenye sizambero ta zambere po ntwedu nonzwi zongara. 15 Baramu ta tantere Baraka asi: “Kara paapa ponzambo zoge zeswakerero siruwo esi nina kuza ni ka uyunge naKarunga.” 16 Makura Jehova ta monekere Baramu, ta mu tantere eyi na ka uyunga. Age kwa mu tanterere asi: “Tengura kwaBaraka o ka uyunge eyi nina ku tantere.” 17 Baramu ta tengura kwaBaraka, ta ka mu gwana age kuna kundindira ponzambo zendi zeswakerero kumwe nomasimbi goVamowaba. Baraka ta mu pura asi: “Yisinke ana kutantere Jehova?” 18 Makura Baramu ta uyunga mutango ogu asi:

“Baraka, katuka o purakene.

Purakena nge, ove munaSiporo.

22 Karunga kuna kuvagusa moEgipite.

Age kwa fana ngwendi nombinga dontwedu zonene edi adi va vatere.

Ngesi vantu kuvhura va uyunge kuhamena ruvharo rwaJakopo ndi Vaisraeli asi:

‘Tareni eyi ga rugana Karunga!’

Ngwendi moomu tupu nyime a dili kurara dogoro a lipapagwire sikorama esi ana kwata

ntani dogoro a rase honde zosikorama esi ana dipaga.”

25 Baraka ta tantere Baramu asi: “Nsene kapi ono kuvafinga, kapisi o va tungike hena.” 26 Baramu ta limburura Baraka asi: “Nani kapi nina ku tantere asi ‘tani rugana nayinye eyi ana tantere nge Jehova’?”

27 Baraka ta tantere Baramu asi: “Wiza ni ya kutware kevango lyapeke. Nampo Karunga gousili na ka kupulisira o ka finge vantu ava kevango olyo.” 28 Makura Baraka ta twara Baramu kondundu zaPeoro. Peoro kwa livyuka naJesimoni.* 29 Makura Baramu ta tantere Baraka asi: “Tunga yizambero ntambali pevega eli, ntani wapaikira nge nontwedu ntambali nononzwi donongara ntambali.” 30 Makura Baraka ta rugana ngwendi moomu ga mu tanterere Baramu, ano pwankenye sizambero ta zambere po ntwedu nonzwi zongara.

24 Baramu apa ga mwene asi yina hafesa Jehova yokutungika Vaisraeli, age kapi ga zire hena a ka divilise nsene Vaisraeli nayi va horokera yininke yoyidona,* nye age kwa tere komburundu. 2 Apa ga kankukire Baramu a mone Vaisraeli vana dike notende dawo kuliza nomarudi gawo, makura mpepo zaKarunga ta zi mu wizire. 3 Age ta uyunga mutango ogu asi:

10 Baraka ta handukire Baramu. Makura Baraka ta sakerere nehandu nokutantera Baramu asi: “Ame kuna kuzigida o ya finge nonkore dange, nye ove yiyo ono va tungike yikando yitatu. 11 Zende kembo, ame kwa here ni ku fute, nye Jehova ana ku ninkisa o dire kugwana mfuto zoge.”

12 Baramu ta limburura Baraka asi: “Nani kapi na tanterere vantu ava wa tumine asi: 13 ‘Nampili nga pe nge Baraka embo lyendi eli lina zura sisiliveli nongorodo, ame kapi ngani rugana yininke eyi ga nyokesa nge Jehova, yi kare asi yoyiwa ndi yoyidona. Ame ngani uyunga tupu eyi nga tantera nge Jehova.’ 14 Ngesi ame tani tengura kekoro lyange. Wiza ni ya ku tantere eyi ngava rugana vantu ava, vantu woge komeho.”* 15 Age ta uyunga mutango ogu asi:

ogu va mahwire meho age ana linyongamene:

Age nga taura nomutwe doVamowaba

nokubamuna yikora yovakwayita navenye wonyanya.

20 Apa ga mwene Amareki, ta twikire nomutango gwendi asi:

21 Apa ga mwene Vakeni, ta twikire nomutango gwendi asi:

“Mavango goge aga wa tunga kapi aga zonauka usimbu ngwendi sikorogo esi va tungira pemanya.

22 Nye kweli ogu nga hwika Vakeni.*

Siruwo sokuhura kupi sina hupu ko komeho Asiliya a mu tware mounkwate?”

23 Age ta twikire kuuyunga mutango gwendi asi:

“Nanewo! Yilye nga paruka apa nga rugana Karunga yininke eyi?

Nye nage ngava mu zonagura po.”

25 Makura Baramu ta katuka, ta zi nonzira zendi, ano Baraka nage ta zi nonzira zendi.

25 Apa va tungire Vaisraeli moSitimu, vantu kwa tamekere kuhondera novakadi woVamowaba. 2 Vakadi owo kwa zigidire Vaisraeli va ze kumwe nawo va ka zambere yikarunga yawo, makura Vaisraeli tava tameke kulya kononzambo odo nokutongamena yikarunga yawo. 3 Vaisraeli tava tameke kukarera* Bara gomoPeoro, makura Jehova ta handukire unene Vaisraeli. 4 Jehova ta tantere Mosesa asi: “Gusa vantu ava vana ninkisa vakwawo va karere Bara gomoPeoro, o ka va zenzerese komeho zaJehova moyitarameho yovantu, yipo ame Karunga gweni Jehova ni dire kuhandukira hena Vaisraeli.” 5 Makura Mosesa ta tantere vapanguli womoIsraeli asi: “Nkenye ogu a dipage mukwawo ogu ana karere* Bara gomoPeoro.”

6 Nye posiruwo oso, Muisraeli gumwe ta twara mukadi goMumidiyani mokamba komeho zaMosesa nombunga nazinye zoVaisraeli ezi za lililire pevero lyonkongoronzugo.* 7 Apa ga yi mwene Pinehasa munaEliyasara mutekurwa gomupristeli Arona, ta katuka mo usimbu mokatji kovantu, ta gusa egonga 8 makura ta sikura mugara goMuisraeli motende, ta va tu navenye egonga. Egonga olyo kwa twire mukadi koyilyo yendi yonomuga. Makura ehamba eli lya gwene Vaisraeli ta li haga. 9 Vantu ava va fire kehamba kwa kere 24 000.

10 Jehova ta tantere Mosesa asi: 11 “Pinehasa munaEliyasara mutekurwa gomupristeli Arona ana ninkisa nge ni dire kuhandukira Vaisraeli, morwa age kapi ana tarere vantu va dire kulimburukwa nge. Eyi yiyo nina dilire kuzonagura po Vaisraeli, yeeyi ame kwa hara va karere nge nyamelike. 12 Yipo nye, mu tantera asi: ‘Ame tani tulisa po egwanekero* lyombili kumwe nage. 13 Morwa egwanekero olyo, nage noruvharo rwendi ngava kara vapristeli siruwo sosire, yeeyi age kapi ana tarere Vaisraeli va dire kulimburukwa nge ntani ana ninkisa Vaisraeli va va gusire po.’”

14 Edina lyoMuisraeli ogu va dipagere kumwe nomukadi goMumidiyani kwa kere Simuli munaSaru esimbi lyemezimo lyaSimiyoni. 15 Ano edina lyomukadi goMumidiyani ogu va dipagere kwa kere Kosibi munaSuru. Suru kwa kere esimbi lyomorudi rumwe roVamidiyani.

16 Konyima, Jehova ta tantere Mosesa asi: 17 “Homokera Vamidiyani o va dipage, 18 morwa awo kwa mu gendere konhi ntani kwa mu ninkisire mu zone pokukarera Peoro. Awo kwa yi rugene kupitira mwaKosibi munaSuru esimbi lyomoMidiyani. Kosibi kwa mu dipagere mezuva eli va mu reterere ehamba morwa kukarera Peoro.”

26 Apa lya hege ehamba, Jehova ta tantere Mosesa naEliyasara muna mupristeli Arona asi: 2 “Varureni Vaisraeli navenye wonomvhura 20 yikandwise kuliza nomazimo gawo. Varureni navenye ava vana wapere kukara vakwayita moIsraeli.” 3 Makura Mosesa nomupristeli Eliyasara tava uyungisa Vaisraeli momazana gaMowaba konontere domukuro gwaJorodana pepi naJeliko. Awo kwa tente asi: 4 “Varureni navenye wonomvhura 20 yikandwise ngwendi moomu Jehova ga pangerere Mosesa.”

Ano ava yiwo vana Vaisraeli ava va tundire mosirongo saEgipite: 5 Mbeli, Rubena; ano vana vaRubena kwa kere: Hanoka, omu rwa tundilira ruvharo roVahanoka; Paru, omu rwa tundilira ruvharo roVaparu; 6 Hesironi, omu rwa tundilira ruvharo roVahesironi; Karumi, omu rwa tundilira ruvharo roVakarumi. 7 Ava kwa kere womoruvharo rwaRubena, ano ava va tjenge kwa kere 43 730.

8 MunaParu gomugara kwa kere Eliyaba. 9 Ano vana vaEliyaba kwa kere: Nemweli, Datani naAbiramu. Datani naAbiramu kwa va horowere mokatji kombunga ntani yiwo va rwanesere Mosesa naArona kumwe nombunga zaKora ezi za rwanesere Jehova.

10 Evhu kwa ligaunukire makura ta li va mini. Ano Kora kwa fire novantu ava va mu kwatesere ko, apa gwa hwikire mundiro vantu 250. Eyi ya va horokerere kwa kere erondoro koVaisraeli. 11 Nye vana vaKora kapi va fire.

12 Vana vaSimiyoni kuliza nomazimo gawo kwa kere: Nemweli, omu rwa tundilira ruvharo roVanemweli; Jamini, omu rwa tundilira ruvharo roVajamini; Jakini, omu rwa tundilira ruvharo roVajakini; 13 Zera, omu rwa tundilira ruvharo roVazera; Sauru, omu rwa tundilira ruvharo roVasauru. 14 Ava kwa kere womoruvharo rwaSimiyoni, ano ava va tjenge kwa kere 22 200.

15 Vana vaGada kuliza nomazimo gawo kwa kere: Sefoni, omu rwa tundilira ruvharo roVasefoni; Hagi, omu rwa tundilira ruvharo roVahagi; Suni, omu rwa tundilira ruvharo roVasuni; 16 Osini, omu rwa tundilira ruvharo roVaosini; Eri, omu rwa tundilira ruvharo roVaeri; 17 Arodi, omu rwa tundilira ruvharo roVaarodi; Areli, omu rwa tundilira ruvharo roVaareli. 18 Ava kwa kere womoruvharo rwaGada, ano ava va tjenge kwa kere 40 500.

19 Vana vaJuda kwa kere Era naOnani. Nye Era naOnani kwa fililire mosirongo saKanani. 20 Vana vaJuda kuliza nomazimo gawo kwa kere: Sera, omu rwa tundilira ruvharo roVasera; Peresi, omu rwa tundilira ruvharo roVaperesi; Zera, omu rwa tundilira ruvharo roVazera. 21 Ano vana vaPeresi kwa kere: Hesironi, omu rwa tundilira ruvharo roVahesironi; Hamuli, omu rwa tundilira ruvharo roVahamuli. 22 Ava kwa kere womoruvharo rwaJuda, ano ava va tjenge kwa kere 76 500.

23 Vana vaIsasikali kuliza nomazimo gawo kwa kere: Tora, omu rwa tundilira ruvharo roVatora; Puva, omu rwa tundilira ruvharo roVapuva; 24 Jasubu, omu rwa tundilira ruvharo roVajasubu; Simuroni, omu rwa tundilira ruvharo roVasimuroni. 25 Ava kwa kere womoruvharo rwaIsasikali, ano ava va tjenge kwa kere 64 300.

26 Vana vaSeburoni kuliza nomazimo gawo kwa kere: Seredi, omu rwa tundilira ruvharo roVaseredi; Eroni, omu rwa tundilira ruvharo roVaeroni; Jahireli, omu rwa tundilira ruvharo roVajahireli. 27 Ava kwa kere womoruvharo roVaseburoni, ano ava va tjenge kwa kere 60 500.

28 Vana vaJosefa kuliza nomazimo gawo kwa kere: Manase naEfurayimi. 29 Vana vaManase kwa kere: Makire, omu rwa tundilira ruvharo roVamakire; ano Makire kwa kere guhya Giliyata, omu rwa tundilira ruvharo roVagiliyata. 30 Vana vaGiliyata kwa kere: Reza, omu rwa tundilira ruvharo roVareza; Hereki, omu rwa tundilira ruvharo roVahereki; 31 Asiliyeli, omu rwa tundilira ruvharo roVaasiliyeli; Sikemu, omu rwa tundilira ruvharo roVasikemu; 32 Semida, omu rwa tundilira ruvharo roVasemida; Hefere, omu rwa tundilira ruvharo roVahefere. 33 Serofehadi munaHefere kwa kere tupu novana wovakadi, ano madina gawo kwa kere: Mahira, Nowa, Hogira, Milika naTiresa. 34 Ava kwa kere womoruvharo rwaManase, ano ava va tjenge kwa kere 52 700.

35 Vana vaEfurayimi kuliza nomazimo gawo kwa kere: Sutera, omu rwa tundilira ruvharo roVasutera; Bekeli, omu rwa tundilira ruvharo roVabekeli; Tahani, omu rwa tundilira ruvharo roVatahani. 36 Ano munaSutera kwa kere: Erani, omu rwa tundilira ruvharo roVaerani. 37 Ava kwa kere womoruvharo rwaEfurayimi, ano ava va tjenge kwa kere 32 500. Ava kwa kere vana vaJosefa kuliza nomazimo gawo.

38 Vana vaMbenyameni kuliza nomazimo gawo kwa kere: Bera, omu rwa tundilira ruvharo roVabera; Asibeli, omu rwa tundilira ruvharo roVaasibeli; Ahiramu, omu rwa tundilira ruvharo roVaahiramu; 39 Sefufamu, omu rwa tundilira ruvharo roVasefufamu; Hufamu, omu rwa tundilira ruvharo roVahufamu. 40 Vana vaBera kwa kere: Arada naNamani; mwaArada yimo rwa tundilira ruvharo roVaarada; ano mwaNamani yimo rwa tundilira ruvharo roVanamani. 41 Ava kwa kere womoruvharo rwaMbenyameni kuliza nomazimo gawo, ano ava va tjenge kwa kere 45 600.

42 Vana vaDana kuliza nomazimo gawo kwa kere: Suhamu, omu rwa tundilira ruvharo roVasuhamu. Ava kwa kere womoruvharo rwaDana kuliza nomazimo gawo. 43 Navenye ava va tjenge womoruvharo roVasuhamu kwa kere 64 400.

44 Vana vaAseli kuliza nomazimo gawo kwa kere: Imuna, omu rwa tundilira ruvharo roVaimuna; Isivhi, omu rwa tundilira ruvharo roVaisivhi; Beliya, omu rwa tundilira ruvharo roVabeliya; 45 ano vana vaBeliya kwa kere: Hebere, omu rwa tundilira ruvharo roVahebere; Malikiyeli, omu rwa tundilira ruvharo roVamalikiyeli. 46 MunaAseli gomukadi kwa kere Sera. 47 Ava kwa kere womoruvharo rwaAseli, ano ava va tjenge kwa kere 53 400.

48 Vana vaNafitali kuliza nomazimo gawo kwa kere: Jahuseli, omu rwa tundilira ruvharo roVajahuseli; Guni, omu rwa tundilira ruvharo roVaguni; 49 Jesere, omu rwa tundilira ruvharo roVajesere; Siremu, omu rwa tundilira ruvharo roVasiremu. 50 Ava kwa kere womoruvharo rwaNafitali kuliza nomazimo gawo, ano ava va tjenge kwa kere 45 400.

51 Vaisraeli navenye ava va tjenge kwa kere 601 730.

52 Konyima, Jehova ta tantere Mosesa asi: 53 “Sirongo va hepa kusigaununa ntani va si gavere kuliza nomadina aga va tjanga. 54 Mazimo gomanene ga hepa kugwana sirongo sosinene, ano mazimo gomanunu ga hepa kugwana sirongo sosinunu. Nkenye ezimo va hepa kulipa kuliza nosivaro sovantu ava va tjanga. 55 Nye sirongo va hepa kusigavera pafungu-fungu. Awo va hepa ku va pa sirongo kuliza nomadina gorudi rovaguhya vawo. 56 Sirongo ngava si gaununa pafungu-fungu va si gave komazimo gomanene naga gomanunu.”

57 Ava kuna kara Varevhi ava va tjenge kuliza nomazimo gawo: Geresoni, omu rwa tundilira ruvharo roVageresoni; Kohati, omu rwa tundilira ruvharo roVakohati; Merali, omu rwa tundilira ruvharo roVamerali. 58 Ava kwa kere vamwe womoruvharo roVarevhi: ruvharo roValibuni, ruvharo roVaheburoni, ruvharo roVamahili, ruvharo roVamusi, ruvharo roVakohati.

Kohati kwa kere guhya Amuramu. 59 Amuramu kwa kwere Jokebedi munaRevhi. Jokebedi kwa mu hampurukilire moEgipite. Age kwa reterere Amuramu, Arona naMosesa ntani nampanzawo Miliyama. 60 Ano vana vaArona kwa kere Nadabu, Abihu, Eliyasara naItamara. 61 Nye Nadabu naAbihu kwa fire, morwa awo kwa zembe yininke* eyi ga dilire kupulisira Jehova.

62 Sivaro sovagara navenye ava va tjenge kwa kere 23 000, kutundilira gokwedi kumwe yikandwise. Awo kapi va va tjenge kumwe noVaisraeli, morwa awo kapi va va pere upingwa ngwendi Vaisraeli vakwawo.

63 Ava yiwo ga tjenge Mosesa nomupristeli Eliyasara, apa va tjenge Vaisraeli momazana gaMowaba konontere domukuro gwaJorodana pepi naJeliko. 64 Nye mokatji kawo kapi mwa kere muntu ogu va tjenge oMosesa nomupristeli Arona apa va varwire Vaisraeli momburundu zaSinayi. 65 Yeeyi Jehova kwa uyungire kuhamena vantu owo asi: “Awo ngava fira momburundu.” Yipo nye, Karebu munaJefune naJosuwa munaNunu, yiwo velike va hupire po povagara vena.

27 Makura vana vaSerofehadi wovakadi womoruvharo rwaManase, munaJosefa, tava hedere Mosesa. Serofehadi kwa kere munaHefere, Hefere kwa kere munaGiliyata, ano Giliyata kwa kere munaMakire ntani Makire kwa kere munaManase. Madina govana vaSerofehadi wovakadi kwa kere: Mahira, Nowa, Hogira, Milika naTiresa. 2 Awo kwa zire komeho zaMosesa nomupristeli Eliyasara nomasimbi ntani nombunga nazinye pevero lyonkongoronzugo,* tava tanta asi: 3 “Guhyetu kwa fira momburundu, nye awo kapi va hamenene kombunga ezi za rwanesere Jehova kumwe naKora, nye awo kwa fire morwa nzo zavene ntani awo kapi va retere vana wovagara. 4 Kapi tuna hara edina lyaguhyetu ngava li divare, morwa kapi va reta muna gomugara. Tu gusira po poupingwa wekoro lyotate.” 5 Makura Mosesa ta twara udigu wawo komeho zaJehova.

6 Jehova makura ta tantere Mosesa asi: 7 “Vana vaSerofehadi mouhunga vana kara. Wa hepa kuvagusira po poupingwa wekoro lyaguhyawo ou va pe. 8 Ntani ka tantere Vaisraeli asi: ‘Nsene mugara a fa ga hana kureta muna gomugara, upingwa wendi mwa hepa kuugava kwamunendi gomukadi. 9 Ano nsene kapi ga reta muna gomukadi, upingwa wendi mwa hepa kuugava kovakuru vendi ndi kovamumbya vendi wovagara. 10 Nsene kapi ga kara novakuru ndi novamumbya vendi wovagara, upingwa wendi mwa hepa kuugava kovamumbya ndi kovakuru woguhwe wovagara. 11 Ano nsene oguhwe kapi va kara novamumbya ndi novakuru vawo wovagara, mwa hepa kugava upingwa wendi kekoro lyoguhwe lyopopepi. Ezi kuna kara veta ngava kwama Vaisraeli ngwendi moomu Jehova ana pangere Mosesa.’”

12 Makura Jehova ta tantere Mosesa asi: “Ronda kondundu ezi zaAbalimu, o ka tare sirongo esi ngani pa Vaisraeli. 13 Konyima zapa ngo si mona, ove ngo fa ngwendi mukuroge Arona nokukuhoreka moomu va horeka vantu woge,* 14 morwa apa za sivanenene mbunga momburundu zaSini, ove kapi wa fumadekere nge komeho zoVaisraeli, pomema gomoMeliba poKadesi, momburundu zaSini.”

15 Makura Mosesa ta tantere Jehova asi: 16 “Jehova, Karunga ove wa gava mwenyo kovantu navenye,* horowora mugara mombunga 17 ogu nga va pitisira mwanayinye ntani nogu ngava kwama mwanayinye, yipo mbunga zaJehova nga zi dire kukara ngwendi nonzwi da hana musita.” 18 Makura Jehova ta tantere Mosesa asi: “Gusa Josuwa munaNunu, mugara ogu ga kara nonondunge,* makura ngo mu kambeke ewoko lyoge. 19 Ngo mu sikameke komeho zomupristeli Eliyasara ntani komeho zombunga ngo mu ture a kare mupitisili komeho zawo. 20 Ngo gave unankondo* woge umwe kwendi, yipo mbunga nazinye zoVaisraeli nga zi mu limburukwe. 21 Age nga sikama komeho zomupristeli Eliyasara, ano mupristeli nga mu uyungira po komeho zaJehova kupitira moUlimu, yipo nga dive eyi nga rugana. Mpangera zendi ngava zi kwama vantu navenye kukwatera mo mwene ntani nombunga nazinye zoVaisraeli.”

22 Makura Mosesa ta rugana nayinye ngwendi moomu ga mu pangerere Jehova. Age kwa gusire Josuwa a mu tware komeho zomupristeli Eliyasara ntani kombunga nazinye, 23 age ta mu kambeke mawoko gendi, ta mu tura a kare mupitisili ngwendi moomu Jehova ga tanterere Mosesa.

28 Jehova ta tantere hena Mosesa asi: 2 “Tantera Vaisraeli asi: ‘Mwa hepa ku pa nge nonzambo dange ndi nondya dange. Mwa hepa ku pa nge nonzambo dokuhwika posiruwo sado yipo ngadi gave edumba lyewa lyokuhafesa nge.’

3 “Va tantera hena asi: ‘Ezi yizo nzambo zokuhwika ngomu gava kwaJehova: mwa hepa kugava nkenye ezuva nonzwigona mbali donongara dokukanguka domvhura zimwe ngonzambo zeswakerero. 4 Nzwigona zimwe zongara ngomu zi zambe kongurangura, ano nkwawo komeho li ka toke ezuva. 5 Ngomu di zambe kumwe nousura wouwa wokilograma zimwe* ou va vhonga nomagadi gokusika koyiha yolita zimwe* wonzambo zombuto. 6 Azo kuna kara nzambo zeswakerero zankenye ezuva, ezi va tulisire po poNdundu zaSinayi zi gave edumba lyewa. Azo kuna kara nzambo zaJehova zokuhwika 7 ezi ngomu gava kumwe nonzambo zako zoyikunwa zankenye nzwi zokusika koyiha yolita zimwe. Mwa hepa kutjisira yikunwa oyo mevango lyokupongoka ngonzambo zaJehova zoyikunwa. 8 Ntani ngomu zambe nzwigona nkwawo zongara komeho li ka toke ezuva kumwe nonzambo zombuto nonzambo zoyikunwa ngwendi yeeyi ngomu gava ngurangura. Ngomu zi hwike, yipo zi gave edumba lyewa lyokuhafesa Jehova.

9 “‘Nye mezuva lyEsabata, ngomu gave nonzwigona mbali donongara dokukanguka domvhura zimwe kumwe nousura wouwa wonokilograma mbali,* ou va vhonga nomagadi wonzambo zombuto ntani nonzambo zako zoyikunwa. 10 Ezi kuna kara nzambo zeswakerero ezi ngomu gava mEsabata kumwe nonzambo zeswakerero zankenye ezuva ntani nonzambo zako zoyikunwa.

11 “‘Ketamekero lyankenye kwedi,* ngomu gave kwaJehova nzambo zeswakerero zonontwedugona mbali nonzwi zongara nononzwigona donongara ntambali dokukanguka domvhura zimwe. 12 Nkenye ntwedu va hepa kuzigava nousura wouwa wonokilograma ntatu noharufa* ou va vhonga nomagadi wonzambo zombuto, ano nzwi zongara va hepa kuzigava nousura wouwa ou va vhonga nomagadi wonokilograma mbali wonzambo zombuto, 13 ntani nkenye nzwigona zongara va hepa kuzigava kumwe nousura wouwa wokilograma zimwe ou va vhonga nomagadi wonzambo zombuto ngonzambo zeswakerero, yipo zi gave edumba lyewa. Azo kuna kara nzambo zaJehova zokuhwika. 14 Nkenye ntwedu mwa hepa kuzigava nonzambo zoyikunwa zovhinyu zokusika koyiha yonolita mbali* ntani nzwi zongara mwa hepa kuzigava kumwe novhinyu zokupitakana polita zimwe. Ano nzwigona zongara kumwe novhinyu zokusika koyiha yolita zimwe. Ezi kuna kara nzambo zeswakerero zankenye kwedi momvhura nazinye. 15 Kugusa ko nzambo zeswakerero zankenye ezuva nonzambo zako zoyikunwa, ngomu gave hena kwaJehova sikombogona ngonzambo zononzo.

16 “‘Mezuva 14 lyokwedi kokuhova, yipo ngazi kara Paska zaJehova. 17 Ano mezuva 15 lyokwedi oko, one ngomu dana sipito ntani ngomu lya mboroto zokudira yihaheso mazuva ntambali. 18 Mezuva lyokuhova ngomu ponge mu karere Karunga ntani kapisi ngomu rugane nkenye sirugana soudigu. 19 Ngomu gave hena kwaJehova nzambo zeswakerero zonontwedugona mbali nonzwi zongara ntani nonzwigona donongara ntambali domvhura zimwe. Yimuna nayinye ya hepa kukara yokukanguka. 20 Mwa hepa kugava yimuna eyi kumwe nononzambo dayo dombuto zousura wouwa ou va vhonga nomagadi. Ntwedu va hepa kuzigava kumwe nousura wonokilograma ntatu noharufa, ano nzwi zongara va hepa kuzigava kumwe nousura wonokilograma mbali. 21 Nonzwigona ntambali donongara nadinye, nkenye ezi mwa hepa kuzigava kumwe nousura wokilograma zimwe, 22 ntani nosikombogona simwe sonzambo zononzo, yipo ngava mu gusire po nonzo deni. 23 Mwa hepa kugava yininke eyi kumwe nonzambo zeswakerero ezi ngomu gava nkenye ngurangura. 24 Ngomu yi gave monkedi zokulifana ngonondya* mazuva ntambali. Azo kuna kara nzambo zokuhwika ezi ngazi gava edumba lyewa lyokuhafesa Jehova. Ayo mwa hepa kuyigava kumwe nonzambo zeswakerero zankenye ezuva nonzambo zayo zoyikunwa. 25 Mezuva lyauntambali, ngomu ponge mu karere Karunga ntani kapisi ngomu rugane nkenye sirugana soudigu.

26 “‘Mezuva lyomuzangu gokuhova apa ngomu gava kwaJehova nzambo zeni zombuto zompe, mwa hepa kuponga mu karere Karunga nokudana sipito soyivike ntani kapisi ngomu rugane nkenye sirugana soudigu. 27 Ngomu gave nontwedugona mbali nonzwi zongara nononzwigona donongara ntambali domvhura zimwe ngonzambo zeswakerero zokugava edumba lyewa lyokuhafesa Jehova, 28 nonzambo zako zombuto zousura wouwa ou va vhonga nomagadi. Nkenye ntwedu va hepa kuzigava nousura wouwa wokusika konokilograma ntatu noharufa, ano nzwi zongara nousura wonokilograma mbali, 29 ntani nonzwigona ntambali donongara nadinye, mwa hepa kudigava nkenye ezi nousura wokilograma zimwe, 30 kumwe nosikombogona simwe, yipo va mu dongwenene po nonzo deni. 31 Yimuna eyi mwa hepa kuyigava kumwe nonzambo zeswakerero zankenye ezuva nonzambo zako zombuto. Mwa hepa kugava yimuna yokukanguka kumwe nononzambo dako doyikunwa.

29 “‘Mokwedi kwauntambali mezuva lyokuhova, ngomu ponge mu karere Karunga. Kapisi ngomu rugane nkenye sirugana soudigu, yeeyi alyo ezuva eli ngomu fuda rumbendo. 2 Mwa hepa kugava ntwedugona zimwe nonzwi zongara ntani nononzwigona donongara ntambali domvhura zimwe ngonzambo zeswakerero, yipo zi gave edumba lyewa lyokuhafesa Jehova. Yimuna nayinye ya hepa kukara yokukanguka. 3 Ntwedu mwa hepa kuzigava kumwe nousura wouwa ou va vhonga nomagadi wonokilograma ntatu noharufa, ano nzwi zongara mwa hepa kuzigava kumwe nousura wonokilograma mbali. 4 Nonzwigona donongara nadinye ntambali, nkenye ezi mwa hepa kuzigava nousura wouwa wokilograma zimwe. 5 Ntani ngomu gave sikombogona sosigara sonzambo zononzo, yipo ngava mu dongwenene po nonzo deni. 6 Mwa hepa hena kugava nonzambo deswakerero dankenye kwedi nononzambo dako dombuto nononzambo deswakerero dankenye ezuva nononzambo dako dombuto, kumwe nononzambo dako doyikunwa kuliza nomavyukiso aga ga kara po, yipo di gave edumba lyewa. Ado kuna kara nonzambo daJehova dokuhwika.

7 “‘Mezuva lyomurongo lyokwedi kwauntambali, mwa hepa kuponga kumwe mu karere Karunga ntani mwa hepa kudilira.* Kapisi ngomu rugane nkenye sirugana. 8 Mwa hepa kugava kwaJehova ntwedugona zimwe nonzwi zongara ntani nononzwigona donongara ntambali domvhura zimwe. Yimuna nayinye ya hepa kukara yokukanguka. 9 Ntwedu mwa hepa kuzigava kumwe nousura wouwa ou va vhonga nomagadi wokusika konokilograma ntatu noharufa, ano nzwi zongara kumwe nousura wonokilograma mbali. 10 Nonzwigona donongara nadinye ntambali, nkenye ezi mwa hepa kuzigava nousura wouwa wokilograma zimwe. 11 Kugusa ko nzambo zokugusisa po nonzo nonzambo zeswakerero zankenye ezuva nonzambo zako zombuto kumwe nonzambo zako zoyikunwa, mwa hepa hena kugava sikombogona simwe sonzambo zononzo.

12 “‘Mezuva 15 lyokwedi kwauntambali, mwa hepa kuponga kumwe mu karere Karunga. Kapisi ngomu rugane nkenye sirugana soudigu ntani mwa hepa kudanena Jehova sipito mazuva ntambali. 13 Ngomu gave nontwedugona 13, nonzwi donongara mbali ntani nonzwigona donongara 14 domvhura zimwe ngonzambo zeswakerero, yipo zi gave edumba lyewa lyokuhafesa Jehova. Yimuna nayinye ya hepa kukara yokukanguka. 14 Nontwedu nadinye 13, nkenye ezi mwa hepa kuzigava kumwe nousura wouwa wonokilograma ntatu noharufa ou va vhonga nomagadi, ano nonzwi mbali donongara, nkenye ezi mwa hepa kuzigava nousura wouwa wonokilograma mbali. 15 Nonzwigona donongara 14, nkenye ezi mwa hepa kuzigava nousura wokilograma zimwe. 16 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

17 “‘Ano mezuva lyauvali lyosipito, mwa hepa kugava nontwedugona 12, nonzwi donongara mbali ntani nonzwigona donongara 14 domvhura zimwe. Yimuna nayinye ya hepa kukara yokukanguka. 18 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 19 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

20 “‘Ano mezuva lyautatu lyosipito, mwa hepa kugava nontwedugona 11, nonzwi donongara mbali ntani nonzwigona donongara 14 domvhura zimwe. Yimuna nayinye ya hepa kukara yokukanguka. 21 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 22 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

23 “‘Ano mezuva lyaune lyosipito, mwa hepa kugava nontwedu 10, nonzwi donongara mbali ntani nonzwigona donongara 14 domvhura zimwe. Yimuna nayinye ya hepa kukara yokukanguka. 24 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 25 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

26 “‘Ano mezuva lyautano lyosipito, mwa hepa kugava nontwedu ntane, nonzwi donongara mbali ntani nonzwigona donongara 14 domvhura zimwe. Yimuna nayinye ya hepa kukara yokukanguka. 27 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 28 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

29 “‘Ano mezuva lyauntazimwe lyosipito, mwa hepa kugava nontwedu ntantatu, nonzwi donongara mbali ntani nonzwigona donongara 14 domvhura zimwe. Yimuna nayinye ya hepa kukara yokukanguka. 30 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 31 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

32 “‘Ano mezuva lyauntambali lyosipito, mwa hepa kugava nontwedu ntambali, nonzwi donongara mbali ntani nonzwigona donongara 14 domvhura zimwe. Yimuna nayinye ya hepa kukara yokukanguka. 33 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 34 Kugusa ko nzambo zeswakerero zankenye ezuva nonzambo zako zombuto ntani nonzambo zako zoyikunwa, mwa hepa hena kugava sikombogona sonzambo zononzo.

35 “‘Ano mezuva lyauntantatu lyosipito, mwa hepa kuponga kumwe mu karere Karunga ntani kapisi ngomu rugane nkenye sirugana soudigu. 36 Ngomu gave ntwedu zimwe, nzwi zimwe zongara ntani nonzwigona donongara ntambali domvhura zimwe, ngonzambo zeswakerero, yipo nga zi gave edumba lyewa lyokuhafesa Jehova. Yimuna nayinye ya hepa kukara yokukanguka. 37 Mwa hepa kugava yimuna oyo kumwe nononzambo dako dombuto nedi doyikunwa kuliza nomavyukiso aga ga kara po. 38 Kugusa ko nzambo zeswakerero zankenye ezuva nonzambo zombuto ntani nonzambo zako zoyikunwa, mwa hepa hena kugava sikombogona sonzambo zononzo.

39 “‘Eyi yiyo ngomu gava kwaJehova poyipito yeni, kugusa ko nonzambo deni domugano nedi demeharo lyanyamweni edi ngomu gava ngonzambo zeswakerero ntani nononzambo deni dombuto nononzambo deni doyikunwa ntani nononzambo deni dombili.’” 40 Mosesa kwa tanterere Vaisraeli nayinye eyi ga mu tanterere Jehova.

30 Makura Mosesa ta tantere masimbi gomomarudi goVaisraeli asi: “Jehova kuna tanta asi: 2 Mugara nsene a gana kwaJehova ndi nsene a tumbwidira asi kapi nga rugana yuma, age ga hepa kuyisikisa mo. Age ga hepa kusikisa mo nayinye eyi ga tumbwidira asi nga yi rugana.

3 “Mukadi nsene a gana kwaJehova ndi a tumbwidire asi kapi nga rugana yuma nye age simpe munona ntani kwa kara membo lyoguhwe, 4 ano oguhwe va zuvhe mugano gwendi ndi eyi ga tumbwidira asi kapi nga yi rugana, makura oguhwe va yi kwatese ko, age ga hepa kusikisa mo mugano gwendi ndi eyi ga tumbwidira asi kapi nga yi rugana. 5 Nye nsene va mu silika oguhwe apa nava zuvha mugano ogu ga tura po ndi eyi ga tumbwidira asi kapi nga yi rugana, age kapisi hepero nga yi sikise mo. Ano Jehova nga mu gusira po morwa oguhwe va mu silika.

6 “Nye nsene a kwara konyima zokutura po mugano ndi konyima zokutumbwidira asi kapi nga rugana yuma, 7 makura mugara gwendi a yi zuvhe ntani a yi kwatese ko, mukadi ogo ga hepa kusikisa mo mugano gwendi ndi eyi ga tumbwidira asi kapi nga yi rugana. 8 Nye nsene mugara gwendi a mu silika mezuva eli nga yi zuvha, mugara kuvhura nga teze po mugano ndi eyi ga tumbwidira mukadendi asi nga yi sikisa mo, ano Jehova nga gusira po mukadi ogo.

9 “Nye nsene mufisayendi ndi mukadi ogu va zumba a tura po mugano, age ga hepa kusikisa mo nayinye eyi ga tumbwidira.

10 “Nye nsene mukadi kwa tura po mugano ndi kwa tumbwidira asi kapi nga rugana yuma posiruwo oso age kwa tunga membo lyamugara gwendi, 11 makura mugara gwendi ga yi zuvha ntani kapi ga mu nyokesa ndi a mu silike, age ga hepa kusikisa mo mugano gwendi ndi nayinye eyi ga tumbwidira asi kapi ngayi rugana. 12 Nye nsene mugara gwendi a zuvha mugano gwendi ndi eyi ga tumbwidira asi kapi nga yi rugana, makura a mu silike, age kapi nga yi sikisa mo morwa mugara gwendi yige ga mu silika, ano Jehova nga gusira po mukadi ogo. 13 Nkenye mugano ogu nga tura po mukadi ndi nkenye eyi nga tumbwidira asi kapi nga yi rugana, mugara gwendi yige nga tokora nsene mukadendi nga yi sikisa mo ndi hawe. 14 Nye nsene mugara gwendi a dira kuuyunga ko yuma mazuva aga ngaga kwama ko, age ngoso ana mu pulisire morwa age kapi ga mu silikire apa ga tulire po mugano gwendi ndi apa ga tumbwidilire asi kapi nga rugana yuma. 15 Nsene a mu silika kusikisa mo mugano konyima zokupita po mazuva kutunda apa ga zuvhire mugano, mugara gwendi yige nga kara nounzoni.

16 “Edi yido noveta ga tanterere Jehova Mosesa kuhamena mugara namukadendi ntani guhya namunendi gomukadi ogu ga tunga membo lyoguhwe.”

31 Jehova makura ta tantere Mosesa asi: 2 “Tengeka Vamidiyani kweyi va rugene Vaisraeli. Konyima ove ngo fa makura ngava ku horeke ngwendi moomu va horeka vantu woge.”*

3 Makura Mosesa ta tantere vantu asi: “Wapaikeni vagara mokatji keni va ka rwise Vamidiyani mokusikisa mo mpangera zaJehova tu tengwide kuwoko Vamidiyani. 4 Mwankenye rudi roVaisraeli, mwa hepa kutuma mo vagara 1 000 va ze koyita.” 5 Yipo nye, momazimo goVaisraeli* kwa horowere mo vagara 1 000 mwankenye rudi va ze koyita. Navenye ava va liwapaikilire kuza koyita kwa kere 12 000.

6 Makura Mosesa ta tumu vagara 1 000 mwankenye rudi va ze koyita kumwe naPinehasa muna mupristeli Eliyasara, ogu ga kere noyiruganeso yokupongoka nonombendo dokuzisa koyita. 7 Awo kwa homokerere Vamidiyani ngwendi moomu Jehova ga pangerere Mosesa ntani awo kwa dipagere vagara navenye. 8 Awo kwa dipagere hena vahompa ava vatano woVamidiyani: Evi, Rekemu, Suru, Huru naReba ntani kwa dipagere hena Baramu munaBeyoro norufuro. 9 Nye Vaisraeli kwa kwete vakadi novana woVamidiyani. Awo kwa simbire hena yimuna yawo nayinye noyiweka yawo nayinye. 10 Yitata yawo nayinye omu va tungire nonokamba* dawo nadinye kwa di hwikire. 11 Awo kwa gusire emona lyawo nalinye, kukwatera mo vantu ntani noyimuna. 12 Makura tava reta vantu nemona eli va ka simbire, kwaMosesa nomupristeli Eliyasara ntani koVaisraeli ava va kere mokamba, momazana gaMowaba konontere domukuro gwaJorodana pepi naJeliko.

13 Mosesa nomupristeli Eliyasara nomasimbi nagenye kwa zire va ka gwanekere nawo ponze zokamba. 14 Nye Mosesa kwa handukilire vagara ava va pitisilire vantu mayovi nava va pitisilire vantu mafere ava va ka tundire koyita. 15 Mosesa ta va pura asi: “Morwasinke muna dilire kudipaga vakadi navenye ava? 16 Awo yiwo va rugene eyi ga va tanterere Baramu nokuninkisa Vaisraeli va dire kulimburukwa Jehova va karere karunga goyimpempa Peoro dogoro ehamba li gwane mbunga zaJehova. 17 Mwa hepa kudipaga vanona navenye wovagara ntani vakadi navenye ava va ligwanekera panyama nomugara. 18 Nye mwa ha dipaga vakadona navenye ava va dira kuligwanekera rumwe panyama nomugara. 19 Mwa hepa kukara ponze zokamba mazuva ntambali. Nkenye ogu ga ka dipaga muntu ntani nkenye ogu ga ka kwata simpu, ga hepa kulikuhura mwene mezuva lyautatu ntani mezuva lyauntambali, kukwatera mo vantu ava mwa ka kwata. 20 Ntani mwa hepa kukuhura kononzo nkenye sikoverero ndi nkenye sipako sosipapa ndi nkenye esi va rugana konohuki dosikombo ndi nkenye sipako esi va honga.”

21 Mupristeli Eliyasara ta tantere vagara ava va zire koyita asi: “Jehova kuna tantere Mosesa asi: 22 ‘Ngorodo zelike nosisiliveli nongoporo noyivera yimwe,* 23 ntani nayinye eyi ayi dili kupya komundiro yiyo ngo mu pitisa momundiro yipo ngayi kuhuke, nye mwa hepa hena kuyikuhura nomema. Ano nkenye eyi ayi pi komundiro mwa hepa kuyikuhura nomema. 24 Ntani mwa hepa kukuhwa yikoverero yeni mezuva lyauntambali, yipo ngomu kuhuke, ano konyima kuvhura ngomu ze mokamba.’”

25 Makura Jehova ta tantere Mosesa asi: 26 “Varura yininke eyi va ka kwata kukwatera mo vantu noyimuna; yi rugana kumwe nomupristeli Eliyasara nomasimbi gomomazimo goVaisraeli. 27 Gaununa pavali yininke eyi va ka kwata o yi gave kovagara ava va za koyita ntani kombunga nazinye. 28 Wa hepa kugusa sininke simwe poyininke 500 eyi mwa gava kovagara ava va zire koyita, yi kare asi vantu ndi nongombe ndi yindongi ndi nonzwi ndi yikombo, yipo mu yi gave kwaJehova ngomutero. 29 Wa hepa kuyigusa poyininke eyi ngomu va pa o yi gave komupristeli Eliyasara, yipo ngayi gave kwaJehova. 30 Ano poyininke eyi ngo gava koVaisraeli, wa hepa kugusa sininke simwe poyininke 50, yi kare asi vantu ndi nongombe ndi yindongi ndi nonzwi ndi yikombo ndi nkenye simuna, o yi gave koVarevhi ava ava rugana yirugana eyi ya likwatakana nonkongoronzugo zaJehova.”

31 Makura Mosesa naEliyasara tava rugana ngwendi moomu Jehova ga tanterere Mosesa. 32 Yininke eyi va ka hokwene vantu ava va zire koyita kwa kere nonzwi noyikombo 675 000, 33 nongombe 72 000, 34 ntani yindongi 61 000. 35 Vakadi ava va dira kuligwanekera rumwe panyama nomugara kwa kere 32 000. 36 Nonzwi noyikombo eyi va geve kovagara ava va zire koyita kwa kere 337 500. 37 Nonzwi noyikombo eyi va geve kwaJehova ngomutero kwa kere 675. 38 Ntani awo kwa va pere nongombe 36 000, ano edi va geve kwaJehova ngomutero kwa kere 72. 39 Ntani awo kwa va pere yindongi 30 500, ano eyi va geve kwaJehova ngomutero kwa kere 61. 40 Vantu* ava va va pere kwa kere 16 000, ano vantu ava va geve kwaJehova ngomutero kwa kere 32. 41 Makura Mosesa ta gava mutero gwaJehova komupristeli Eliyasara ngwendi moomu ga mu pangerere Jehova.

42 Ano yininke eyi va geve koVaisraeli eyi ga va gusilire Mosesa poyininke eyi ga geve kovagara ava va zire koyita, 43 kwa kere nonzwi noyikombo 337 500, 44 nongombe 36 000, 45 yindongi 30 500, 46 ntani vantu* 16 000. 47 Poyininke eyi va geve koVaisraeli, Mosesa ta gusa muntu gumwe povantu 50 ntani sikorama simwe poyikorama 50, makura ta yi gava koVarevhi ava ava rugana konkongoronzugo zaJehova, ngwendi moomu ga mu pangerere Jehova.

48 Makura vagara ava ava pitisire nombunga dovakwayita mayovi ntani novakwayita mafere, tava zi kwaMosesa, 49 tava mu tantere asi: “Vakareli woge vana varura vagara ava atu pitisire, ava va zire koyita ano kwato ogu ana dili po. 50 Yipo nye, natuvenye tuna hara kukulikida eyi tuna hara kugava kwaJehova: yipako yongorodo, yiranda yomomaguru, yininke yokudwara momawoko,* nolinga,* yimbilingwa nomaurenga gamwe, yipo va tu gusire po nonzo detu komeho zaJehova.”

51 Makura Mosesa nomupristeli Eliyasara tava tambura ngorodo zawo ndi maurenga gawo nagenye. 52 Ngorodo nazinye ezi va geve kwaJehova vagara ava va pitisilire vakwayita mayovi novakwayita mafere, kwa sikire ponokilograma 190.* 53 Nkenye mugara ogu ga zire koyita kwa ka hokwene emona. 54 Mosesa nomupristeli Eliyasara tava gusa ngorodo kovagara ava ava pitisire vakwayita mayovi novakwayita mafere makura tava zi twara monkongoronzugo, yipo ngazi diworokese Vaisraeli eyi ga va ruganena Jehova.

32 Ruvharo rwaRubena noruvharo rwaGada kwa kere noyimuna yoyinzi ntani awo kwa dimbwilire asi sitata saJasere nesi saGiliyata kwa kere nomukunda donongwa kulisira yimuna. 2 Makura womoruvharo rwaGada noru rwaRubena tava hedere Mosesa nomupristeli Eliyasara ntani nomasimbi gombunga, tava tanta asi: 3 “Sitata saAtaroto, Diboni, Jasere, Nimura, Hesiboni, Eliyare, Sebamu, Nebo ntani Beyoni, 4 yitata eyi ga fundire Jehova komeho zoVaisraeli, yiwa kulisira mo yimuna ntani vakareli veni va kara noyimuna yoyinzi.” 5 Awo kwa tente hena asi: “Nsene muna tu hafere, gaveni yitata eyi kovakareli veni va yi pinge. Mwa ha tu ninka tu rute mukuro gwaJorodana.”

6 Makura Mosesa ta tantere womoruvharo rwaGada noru rwaRubena asi: “One ngoso muna hara kukara moomu, awo vakweni va ze velike koyita ndi? 7 Morwasinke muna kudompesera Vaisraeli vakweni? Nsene mu yi rugana eyi, one ngomu va ninkisa va dire kuhara kuza mosirongo esi ngava pa Jehova. 8 Ozinyakurweni nawo yiyo va rugene apa nava tanterere va tunde moKadesi-baraneya va ze va ka tare sirongo. 9 Apa va zire moMuramba gwaEsikoli noku mona sirongo, awo kwa dompesere Vaisraeli vakwawo va dire kuza mosirongo esi ga here kuvapa Jehova. 10 Ezuva olyo, Jehova kwa handukire unene makura ta gana asi: 11 ‘Vagara ava va tunda moEgipite wonomvhura 20 yikandwise, kapi ngava mona sirongo esi na tumbwidilire Abirahamu, Isaka ntani naJakopo, morwa awo kapi va limburukwa nge nomutjima nagunye. 12 Kugusa ko Karebu munaJefune goMukeni naJosuwa munaNunu, morwa awo kwa limburukwa Jehova nomutjima nagunye.’ 13 Makura Jehova ta handukire Vaisraeli, ta va ninki va renda-rende momburundu nomvhura 40 dogoro vantu navenye ava va rugene yininke yoyidona komeho zaJehova tava fu. 14 Ngesi one vananzo kuna kurugana ngwendi moomu va rugene ozinyakurweni pokuninkisa Jehova a handukire unene Vaisraeli. 15 Nsene kapi muna kumulimburukwa, age nga siga Vaisraeli hena momburundu ntani one ngomu ninkisa vantu navenye ava va va zonagure po.”

16 Konyima tava wiza hena kwaMosesa, tava mu tantere asi: “Tuna hara kudikira yimuna yetu yinyongo yomamanya ntani noyitata yipo ngava tunge mo vana vetu. 17 Nye ose ngatu liwapaikira kuza koyita, tu pite komeho zoVaisraeli vakwetu dogoro ngava ka sike komavango gawo. Posiruwo oso, awo vana vetu ngava tunga moyitata eyi va kundurukida makuma, yipo ngayi va popere kovantu ava va tunga mosirongo. 18 Ose kapi ngatu tengura komambo getu dogoro Vaisraeli navenye ngava gwane sirongo esi ngava pinga. 19 Yeeyi ose kapi ngatu gwana upingwa kumwe nawo mesinya mwina lyomukuro gwaJorodana, morwa ose twa gwana upingwa wetu koUpumezuva womukuro gwaJorodana.”

20 Mosesa ta va limburura asi: “Nsene yiyo muna hara kurugana eyi, zendeni koyita mu ka rwire po Jehova, 21 ntani ruteni mukuro gwaJorodana komeho zaJehova. Makura apa nga tjida nonkore dendi komeho zendi 22 ntani apa nga gusa sirongo Jehova, one kuvhura ngomu tengure ntani kapi ngomu kara nounzoni komeho zaJehova nokoVaisraeli. Makura sirongo esi nga si kara upingwa weni komeho zaJehova. 23 Nye nsene kapi ngomu yi rugana, one ngomu zona kwaJehova ntani ngava mu tengeka morwa nzo ozo. 24 Yipo nye, one kuvhura mu dikire vana veni yitata ntani noyinyongo yoyimuna yeni, nye mwa hepa kusikisa mo eyi muna tumbwidire.”

25 Womoruvharo rwaGada noru rwaRubena tava tantere Mosesa asi: “Vakareli woge ngava rugana moomu ono tanta. 26 Vana vetu novakadi vetu ntani noyimuna yetu nayinye, ta yi kara moomu moyitata yaGiliyata, 27 nye vakareli woge navenye tava rutu ntani natuvenye tuna liwapaikire kuza koyita tu ka rwire po Jehova ngwendi moomu ono tanta.”

28 Mosesa kwa geve mpangera komupristeli Eliyasara, naJosuwa munaNunu ntani nomasimbi gomomarudi goVaisraeli. 29 Age kwa va tanterere asi: “Nsene womoruvharo rwaGada noru rwaRubena ngava ruta mukuro gwaJorodana kumwe none va ka rwire po Jehova, makura ngomu guse sirongo, ngomu va pe sirongo saGiliyata yipo ngava si pinge. 30 Nye nsene kapi ngava ruta kumwe none va ze va ka rwe yita, awo ngava tunge kumwe none mosirongo saKanani.”

31 Makura womoruvharo rwaGada noru rwaRubena tava limburura asi: “Ose ngatu rugana eyi ana tantere Jehova vakareli vendi. 32 Ose tuna liwapaikire kuza koyita nokuruta mukuro tu ka rwire po Jehova, nye ose ngatu pinga sirongo esi sa karera mesinya eli lyomukuro gwaJorodana.” 33 Makura Mosesa ta gava sirongo saSihoni hompa goVaamoli nosirongo saOgo hompa gwaBasani koruvharo rwaGada noru rwaRubena ntani novantu vamwe womorudi rwaManase munaJosefa, kukwatera mo sirongo nasinye noyitata ntani nonomukunda damo.

34 Womoruvharo rwaGada kwa tungire* sitata saDiboni, Ataroto, Aroere, 35 Atiroto-sofani, Jasere, Jogebeha, 36 Bete-nimura naBete-harani. Awo kwa kundurukidire yitata nomakuma ntani kwa tungire yinyongo yoyimuna. 37 Ano womoruvharo rwaRubena kwa tungire sitata saHesiboni, Eliyare, Kiliyatayimu, 38 Nebo naBara-meyoni (madina gayo kwa ga tjindjire) ntani Sibuma. Awo kwa tjindjire madina goyitata oyo va tungwilire.

39 Womoruvharo rwaMakire munaManase kwa homokerere sirongo saGiliyata makura tava si kwata ntani kwa tjidire mo Vaamoli ava va kere mo. 40 Makura Mosesa ta gava sirongo saGiliyata koruvharo rwaMakire munaManase, makura awo tava tungu mo. 41 Ntani womoruvharo rwaJaire munaManase kwa homokerere Vaamoli nokukwata nomukunda dawo donotende, makura tava di ruku asi Havoti-jaire.* 42 Noba kwa homokerere sitata saKenati, ta si kwata ntani noyitata ya si kundurukida, makura ta si ruku edina lyendi Noba.

33 Ngesi yimo va gendere Vaisraeli apa va tundire mosirongo saEgipite kuliza nombunga zawo* mepitisiro lyaMosesa naArona. 2 Mosesa kwa tjenge mavango aga ngava dikire notende dawo morugendo rwawo kuliza nompangera zaJehova, ano ngesi yimo va gendere tunda evango zende evango: 3 Awo kwa tundire moRamusesi mezuva 15 mokwedi kokuhova. Ezuva eli lya kweme ko konyima zoPaska, Vaisraeli tava katuka va ze va hana woma, awo Vaegipite navenye kuna kutara. 4 Posiruwo oso, Vaegipite kwa vhumbikire nombeli nadinye edi ga dipagere Jehova mokatji kawo, morwa Jehova kwa tengekere nokupangura yikarunga yawo.

5 Vaisraeli tava katuka va tunde moRamusesi, tava ka dika notende dawo moSukoto. 6 Apa va tundire moSukoto, tava ka dika notende dawo moEtamu pepi nomburundu. 7 Makura tava tundu moEtamu va tengure va ze koPihahiroti, ezi za karera komeho zaBara-sefoni makura tava ka dika notende dawo pepi naMigidoli. 8 Apa va tundire moPihahiroti, tava piti pokatji kefuta va ze momburundu ntani awo kwa gendere mazuva gatatu momburundu zaEtamu, makura tava ka dika notende dawo poMara.

9 Ano apa va tundire poMara, tava zi moElimi. MoElimi kwa kere mo marunone 12 gomema ntani noyitji yonongone 70, makura tava dike notende dawo moomo. 10 Apa va tundire moElimi, tava ka dika notende dawo pepi nEfuta lyEgeha. 11 Apa va tundire pepi nEfuta lyEgeha, tava ka dika notende dawo momburundu zaSini. 12 Ano apa va tundire momburundu zaSini, tava ka dika notende dawo moDofuka. 13 Konyima zapa va tundire moDofuka, tava ka dika notende dawo moArusi. 14 Apa va tundire moArusi, tava ka dika notende dawo moRefidimu ntani amo kapi mwa kere mema gokunwa vantu. 15 Apa va tundire moRefidimu, tava ka dika notende dawo momburundu zaSinayi.

16 Apa va tundire momburundu zaSinayi, tava ka dika notende dawo moKiboroto-hatava. 17 Apa va tundire moKiboroto-hatava, tava ka dika notende dawo moHaseroto. 18 Konyima zapa va tundire moHaseroto, tava ka dika notende dawo moLitima. 19 Apa va tundire moLitima, tava ka dika notende dawo moLimoni-peresi. 20 Apa va tundire moLimoni-peresi, tava ka dika notende dawo moLibuna. 21 Apa va tundire moLibuna, tava ka dika notende dawo moLisa. 22 Apa va tundire moLisa, tava ka dika notende dawo moKeherata. 23 Apa va tundire moKeherata, tava ka dika notende dawo poNdundu zaSefere.

24 Konyima zapa va tundire poNdundu zaSefere, tava ka dika notende dawo moHarada. 25 Apa va tundire moHarada, tava ka dika notende dawo moMakeroti. 26 Apa va tundire moMakeroti, tava ka dika notende dawo moTahati. 27 Apa va tundire moTahati, tava ka dika notende dawo moTera. 28 Apa va tundire moTera, tava ka dika notende dawo moMitika. 29 Konyima zapa va tundire moMitika, tava ka dika notende dawo moHasimona. 30 Apa va tundire moHasimona, tava ka dika notende dawo moMosera. 31 Apa va tundire moMosera, tava ka dika notende dawo moBene-jakani. 32 Apa va tundire moBene-jakani, tava ka dika notende dawo moHoro-hagidigadi. 33 Apa va tundire moHoro-hagidigadi, tava ka dika notende dawo moJotibata. 34 Apa va tundire moJotibata, tava ka dika notende dawo moAburona. 35 Apa va tundire moAburona, tava ka dika notende dawo moEsiyoni-gebere. 36 Apa va tundire moEsiyoni-gebere, tava ka dika notende dawo momburundu zaSini ndi Kadesi.

37 Konyima zapa va tundire moKadesi, tava ka dika notende dawo poNdundu zaHoro ezi za karera komururani gosirongo saEdomu. 38 Ano mupristeli Arona kwa rondere koNdundu zaHoro kuliza nomu ga mu tanterere Jehova ntani yiko ga ka fililire kooko momvhura 40 konyima apa va tundire Vaisraeli mosirongo saEgipite, mezuva lyokuhova mokwedi kwautano. 39 Apa ga fire Arona koNdundu zaHoro, age ana kara nonomvhura 123.

40 Hompa gwaAradi goMukanani ogu ga tungire moNegebu mosirongo saKanani, age kwa zuvhire asi Vaisraeli kuna kuwiza.

41 Apa va tundire poNdundu zaHoro, tava ka dika notende dawo moSalimona. 42 Konyima zapa va tundire moSalimona, tava ka dika notende dawo moPunoni. 43 Ano apa va tundire moPunoni, tava ka dika notende dawo moOboto. 44 Apa va tundire moOboto, tava ka dika notende dawo moIye-abalimu pomururani gwaMowaba. 45 Konyima zapa va tundire moIyimu,* tava ka dika notende dawo moDiboni-gada. 46 Ano apa va tundire moDiboni-gada, tava ka dika notende dawo moArumoni-diburataimu. 47 Apa va tundire moArumoni-diburataimu, tava ka dika notende dawo ponondundu daAbalimu edi da karera komeho zaNebo. 48 Ano apa va tundire ponondundu daAbalimu, tava ka dika notende dawo momazana gaMowaba aga ga karera konontere domukuro gwaJorodana pepi naJeliko. 49 Awo kwa twikilire kutunga pepi nomukuro gwaJorodana, kutundilira koBete-jesimoti dogoro koAbeli-sitimu momazana gaMowaba.

50 Jehova kwa tanterere Mosesa momazana gaMowaba aga ga karera konontere domukuro gwaJorodana pepi naJeliko asi: 51 “Tantera Vaisraeli asi: ‘One kuna kuruta mukuro gwaJorodana mu ze mosirongo saKanani. 52 Mwa hepa kukatjida mo vantu ava va tunga mosirongo ntani ngomu ka zonagure po mamanya gawo nagenye noyikarunga yawo nayinye yoyivera ntani nomamanya gawo nagenye gokupongoka. 53 Ngomu guse sirongo mu tunge mo, morwa ame ngani mu pa sirongo si kare upingwa weni. 54 Mwa hepa kugawinina mapata sirongo pafungu-fungu yipo si kare upingwa wawo. Mapata gomanene mwa hepa ku ga pa mavango gomanene, ano mapata gomanunu mwa hepa ku ga pa mavango gomanunu. Nkenye ogu nga gwana sirongo esi ngava mu pa pafungu-fungu. One ngava mu gavera sirongo kuliza norudi oru va tundilira vaguhya veni.

55 “‘Nsene kapi ngomu tjida vantu ava va tunga mosirongo oso, awo ngava kara ngwendi kavambi momeho geni ntani ngwendi mega morutu rweni.* Awo hena ngava mu hepeka mosirongo esi ngomu tunga. 56 Ntani ame ngani mu rugana eyi na here kuvarugana.’”

34 Jehova ta tantere hena Mosesa asi: 2 “Tantera Vaisraeli asi: ‘Apa ngomu za mosirongo saKanani, esi yiso sirongo nga si kara upingwa weni ntani edi kuna kara nomururani dosirongo esi ngomu pinga.

3 “‘Mururani gweni gokoMbindakano ngagu tamekera momburundu zaSini ezi za karera koyiha yaEdomu ntani ngagu ka hagera koUpumezuva konontere dEfuta lyoMungwa.* 4 Ago ngagu pitira koMbindakano zaAkarabimu ntani ngagu twikira gu ze dogoro koSini, gu ka hagere koMbindakano zaKadesi-baraneya. Ago ngagu za dogoro koHasara-adara ntani koAsimoni. 5 Kutunda koAsimoni ngagu piruka gu vyuke koMuramba gwaEgipite gu ka hagere kEfuta.*

6 “‘Mururani gweni gokoUtokero ngagu kara Efuta lyEnene. Ogu yigo ngagu kara mururani gweni gokoUtokero.

7 “‘Ano mururani gweni gokoMuzogo ngagu tundilira kEfuta lyEnene dogoro koNdundu zaHoro. 8 Ano kutunda koNdundu zaHoro, mururani gweni ngagu vyuka dogoro koRebo-Hamati* ntani ngagu ka hagera koSedada. 9 Ago ngagu twikira gu ze koSifuroni gu vyuke dogoro koHasara-enani. Ogu yigo ngagu kara mururani gweni gokoMuzogo.

10 “‘Ano mururani gweni gokoUpumezuva ngagu tundilira koHasara-enani dogoro koSefamu. 11 Kutunda koSefamu ngagu za dogoro koLibura ezi za karera koUpumezuva waAini ntani ngagu gurumuka gu ka pite konondundu edi da karera koUpumezuva wEfuta lyaKinereti.* 12 Ago ngagu za dogoro komukuro gwaJorodana gu ka hagere kEfuta lyoMungwa. Esi yiso ngasi kara sirongo seni ntani nonomururani daso.’”

13 Makura Mosesa ta tantere Vaisraeli asi: “Esi yiso sirongo esi ngomu ligawinina pafungu-fungu ngasi kare upingwa weni, kuliza nomu ga yi tanta Jehova mu si gavere komarudi ntane ntani kovantu vamwe womorudi rwaManase. 14 Yeeyi worudi rwaRubena norudi rwaGada ntani novantu vamwe womorudi rwaManase, va gwana nare upingwa wawo. 15 Marudi ogo gavali ntani novantu vamwe womorudi rwaManase nare va gwana upingwa wawo koUpumezuva womukuro gwaJorodana pepi naJeliko.”

16 Jehova ta tantere hena Mosesa asi: 17 “Aga yigo madina govagara ava ngava gaununa sirongo esi ngomu pinga: mupristeli Eliyasara ntani Josuwa munaNunu. 18 Ntani mwankenye rudi ngomu guse mo esimbi limwe yipo ngava mu gawinine sirongo esi ngomu gwana ngoupingwa. 19 Aga kuna kara madina gomasimbi: gomorudi rwaJuda kuna kara Karebu munaJefune; 20 gomorudi rwaSimiyoni kuna kara Semweli munaAmihudi; 21 gomorudi rwaMbenyameni kuna kara Elidadi munaKisironi; 22 gomorudi rwaDana kuna kara Buki munaJogoli; 23 gomorudi rwaManase munaJosefa kuna kara Haniyeli munaEfodi; 24 gomorudi rwaEfurayimi kuna kara Kemweli munaSifutani; 25 gomorudi rwaSeburoni kuna kara Elisafani munaParanaki; 26 gomorudi rwaIsasikali kuna kara Palitiyeli munaAsani; 27 gomorudi rwaAseli kuna kara Ahihudi munaSeromi; 28 gomorudi rwaNafitali kuna kara Pedaheli munaAmihudi.” 29 Ava yiwo ga pangerere Jehova va gaunune sirongo saKanani koVaisraeli.

35 Jehova ta tantere hena Mosesa momazana gaMowaba aga ga karera konontere domukuro gwaJorodana pepi naJeliko asi: 2 “Tantera Vaisraeli asi poupingwa wawo, ngava gave yitata yimwe koVarevhi, yipo ngava tunge mo ntani va hepa kugava koVarevhi mavango gokulisira aga ga kundurukida yitata oyo. 3 Awo ngava tunga moyitata oyo ntani mavango gokulisira ngaga kara goyimuna yawo nayinye. 4 Mavango gokulisira gankenye sitata esi ngomu gava koVarevhi ngaga hagera ponometa 445* kutundilira kekuma lyositata. 5 Kwankenye ruha rositata kwa hepa kukara nometa 890,* aso sitata si kare pokatji. Aga yigo ngaga kara mavango gokulisira yimuna yawo.

6 “One ngomu gave koVarevhi yitata ntazimwe yorugami eyi nga dukira muntu ogu ana dipaga mukwawo ntani noyitata yimwe 42. 7 Ayo ya hepa kukara yitata 48 kumwe nomavango gayo gokulisira yimuna yawo. 8 Mwa hepa kugusa yitata oyo poupingwa woVaisraeli. Mazimo gomanene ga hepa kugava yitata yoyinzi, ano mazimo gomanunu ga hepa kugava yitata yoyisesu. Nkenye ezimo ngali gava yitata yawo yimwe koVarevhi kuliza noupingwa ou va gwana.”

9 Jehova ta tantere Mosesa asi: 10 “Tantera Vaisraeli asi: ‘One kuna kuruta mukuro gwaJorodana mu ze mosirongo saKanani. 11 Mwa hepa kuhorowora yitata eyi nayi mu rerupira kugwana, yipo ngayi kare yitata yorugami omu nga dukira muntu ogu nga dipaga mukwawo* momponyo. 12 Yitata eyi ngayi mu popera kovantu ava vana hara kumutengwida kuwoko, yipo muntu ogu ana dipaga mukwawo va dire kumudipaga dogoro ngava mu pangure komeho zombunga. 13 Oso yiso sitambo soyitata ntazimwe yorugami eyi ngomu horowora. 14 Mwa hepa kuhorowora yitata yitatu mesinya omu lyomukuro gwaJorodana ntani noyitata yitatu mosirongo saKanani, yipo ngayi kare yitata yorugami. 15 Yitata eyi ntazimwe ngayi popera Vaisraeli novanayirongo ntani nava va tunga kumwe nawo, yipo nga dukire mo nkenye ogu nga dipaga mukwawo* momponyo.

16 “‘Nsene muntu a toona mukwawo nosivera makura a fe, age mudipagi ntani muntu ogo va hepa kumudipaga. 17 Nye nsene muntu a toona mukwawo nemanya eli nali vhura kumudipaga makura a fe, age mudipagi ntani muntu ogo va hepa kumudipaga. 18 Ano nsene a toona mukwawo nositji esi nasi vhura kumudipaga makura a fe, age mudipagi ntani muntu ogo va hepa kumudipaga.

19 “‘Ano muntu ogu nga hara kumutengwida kuwoko yige nga dipaga muntu ogo nsene nga mu gwana. 20 Nsene muntu kwa nyenga mukwawo makura a mu zundure ndi a mu zugume sininke yipo a mu dipage, konyima muntu ogo a fe 21 ndi a mu toone newoko makura a fe, ogu ga mu toona va hepa kumudipaga. Age mudipagi, ano nsene nga mu gwana muntu ogu ana hara kumutengwida kuwoko, age nga mu dipaga.

22 “‘Nsene age kwa mu sindikire momponyo ndi a mu zugume sininke nye age kapi ga mu nyenga ndi a kare nositambo sokumudipaga, 23 ndi nsene a mu zuguma emanya ga hana kumumona ntani age kapisi nkore zendi ntani kapi sa kere sitambo sendi sokumuremeka, makura muntu ogo a fe, 24 mbunga za hepa kupangura muntu ogo ana toona mukwawo ntani nogu ana hara kutengwida kuwoko kuliza nonoveta odo. 25 Mbunga za hepa kupopera mudipagi ogo kogu ana hara kumutengwida kuwoko ntani va mu tengwide kositata sorugami oku ga tjwayukilire. Age ga hepa kukara kooko dogoro apa nga fa mupristeli gomunene ogu va gwaveka nomagadi gokupongoka.

26 “‘Nye nsene mudipagi a pwaga mositata sorugami esi ga tjwayukira, 27 makura a mu gwane ogu ana hara kumutengwida kuwoko ponze zositata sorugami a mu dipage, age kapi nga kara nounzoni. 28 Age ga hepa kukara mositata sorugami dogoro paapa nga fa mupristeli gomunene. Konyima apa nga fa mupristeli gomunene, mudipagi kuvhura a tengure kembo lyendi. 29 Ngomu kwame noveta edi noruvharo rweni narunye nkenye oku ngomu tunga.

30 “‘Nkenye ogu nga dipaga mukwawo* va hepa kumudipaga nsene pa kara nombangi, nye age kapi ngava mu dipaga nsene pa kara mbangi zimwe. 31 Mwa ha tambura mfeto zokuzowora mudipagi ogu ana wapere kufa, age va hepa kumudipaga. 32 Ntani mwa ha zowora ogu ga tjwayukira mositata sorugami mu mu pulisire a kare mosirongo sawo komeho a fe mupristeli gomunene.

33 “‘Mwa ha nyateka sirongo esi mwa tunga, yeeyi honde kunyateka sirongo ntani kapi ngava si kuhura* kohonde ezi va tjisangera mo, ntudi dogoro ngazi tjikire mo honde zomuntu ogu ga zi tjisangera mo. 34 Mwa ha nyateka sirongo esi mwa tunga, yeeyi ame Jehova kwa tunga mokatji koVaisraeli.’”

36 Masimbi gomorudi rwaGiliyata munaMakire kwa zire va ka uyunge naMosesa nomasimbi goVaisraeli. Makire kwa kere munaManase, ano Manase kwa kere munaJosefa. 2 Awo kwa tente asi: “Jehova kwa tantera hompa gwetu a gaunune sirongo pafungu-fungu a si gave ngoupingwa koVaisraeli ntani Jehova kwa pangerere hompa gwetu a gave upingwa waSerofehadi kovana vendi wovakadi. 3 Nsene ngava kwara vagara womorudi rwapeke roVaisraeli, upingwa wawo ngava u va gusa va u gave korudi oru ngava kwarera, makura ose ngatu zumbanesa ruha roupingwa wetu. 4 Apa ngazi sika Mvhura zoVaisraeli zEmanguruko, upingwa wovakadi owo ngava u gava korudi oru ngava kwarera, ano ose ngatu zumbanesa ruha roupingwa wovaguhya vetu.”

5 Makura Mosesa ta tantere Vaisraeli eyi ga mu tanterere Jehova asi: “Mouhunga vana kara womorudi rwaJosefa. 6 Eyi yiyo ana tanta Jehova kuhamena vana vaSerofehadi: ‘Awo kuvhura va kware nkenye ogu vana hara, nye ga hepa kukara gomorudi rwaguhyawo. 7 Kwato Muisraeli ogu nga gava upingwa wendi korudi rwapeke. Nkenye rudi rwa hepa kukwaterera koupingwa wovazinyakurwawo. 8 Nkenye mukadi ogu ga kara noupingwa mokatji koVaisraeli ga hepa kukwara mugara gomorudi roguhwe, yipo Vaisraeli ngava dire kuzumbanesa upingwa wovazinyakurwawo. 9 Kwato upingwa ou ngava gava korudi rwapeke. Nkenye rudi roVaisraeli rwa hepa kukwaterera koupingwa wawo.’”

10 Makura vana vaSerofehadi wovakadi tava rugana eyi Jehova ga tanterere Mosesa. 11 Yipo nye, vana vaSerofehadi wovakadi Mahira, Tiresa, Hogira, Milika ntani naNowa, tava kwara vagara vemekoro lyaguhyawo. 12 Awo kwa kwere vagara womorudi rwaManase munaJosefa, yipo upingwa wawo u twikire kukara morudi rwaguhyawo.

13 Edi kuna kara noveta edi ga pere Jehova Vaisraeli kupitira mwaMosesa momazana gaMowaba aga ga karera konontere domukuro gwaJorodana pepi naJeliko