NEHEMIYA

1 Edi kuna kara nonkango daNehemiya* munaHakaliya: Mokwedi kwaKisirevhu,* momvhura 20 zepangero lyahompa Aretaserekesesi,* ame kwa kere mositata saSusa* omu za kere mbara. 2 Posiruwo oso, ekoro lyange Hanani kwa wizire kwange kumwe novagara vamwe womoJuda, makura tani va pura kuhamena Vajuda ava va ka tunda kounkwate ntani kuhamena sitata saJerusarema. 3 Awo kwa tanterere nge asi: “Vantu ava va ka tunda kounkwate, ava va kara momukunda gwaJuda, kuna kara moukaro woudona wokufisa nomuga. Ano makuma gaJerusarema ga bomauka ntani marungavero gako va ga hwika.”

4 Apa na yi zuvhire, tani hingire makura tani tameke kulira. Ame kwa guvire mazuva gomanzi ntani kwa dililire nokukanderera kwaKarunga ogu a pangere meguru. 5 Ame kwa tente asi: “Jehova, ove Karunga o pangere meguru, ove munene ntani kutetukisa. Ove kusikisa mo egwanekero* lyoge ntani kulikida eharo lyanarunye kovantu ava va ku hara nokulimburukwa nompangera doge. 6 Na kanderere, tara mukareli goge eho ntani purakena kekanderero lyange eli nina kukanderera koge naina. Ame kukanderera koge masiku nomutenya kuhamena vakareli woge Vaisraeli ntani ame kutongonona koge nonzo dawo. Name nepata lyotate kwa zona koge. 7 Ose kwa rugana yininke yoyidona unene koge pokudira kulimburukwa yipango, noveta nonompangera edi wa geve komukareli goge Mosesa.

8 “Na kanderere, diworoka nonkango edi wa tanterere* mukareli goge Mosesa asi: ‘Nsene ngomu hageka kulimburukwa nge, ame ngani mu ninka mu lihanene mokatji konomuhoko. 9 Nye nsene ngomu tengura kwange nokulimburukwa nompangera dange, nampili vantu veni va lihanene dogoro kooku wa ka twa uzuni, ame ngani va pongaika ni va tengwide kevango eli na horowera edina lyange.’ 10 Hompa, awo vakareli woge, ava wa zowora nononkondo doge dononene ntani nokuwoko koge kononkondo. 11 Jehova, purakena kekanderero lyomukareli goge ntani komakanderero govakareli woge ava va tjira edina lyoge. Na kanderere, vatera nge yi tompoke nge naina pokuninka hompa a fire nge nkenda, a pulisire nge ni rugane eyi nani ka mu hundira.”

Posiruwo oso, ame kwa kere mupindi gwahompa.

2 Ezuva limwe, mokwedi kwaNisani,* momvhura 20 zepangero lyahompa Aretaserekesesi, hompa kwa here kunwa vhinyu makura tani zi mu twarere ngwendi moomu ngani yi rugana nkenye apa. Nye ezuva olyo, ame kwa guvire unene ntani hompa kapi ga mona nge rumwe ngoso. 2 Makura hompa ta pura nge asi: “Morwasinke ono guvire mokumona asi kapi ono kuvera? Kuna kumoneka asi ono kara noudigu.” Makura woma tau kwata nge unene.

3 Konyima, tani tantere hompa asi: “Hompa a kare nomwenyo gomure! Ame kuna guwu morwa sitata esi va vhumbika ozinyakurwetu kuna kara erunda ntani marungavero gaso va ga hwika.” 4 Makura hompa ta pura nge asi: “Yisinke nye eyi ono hara kurugana?” Poopo ngoso, tani kanderere kwaKarunga ogu a pangere meguru. 5 Konyima tani tantere hompa asi: “Nsene asi ove hompa no yi hafera ntani nsene asi ame mukareli goge kukuhafesa, pulisira nge ni ze koJuda, kositata esi va horeka ozinyakurwetu, yipo ngani ka si tungurure.” 6 Makura hompa namukadendi ogu ga hingilire konyonga zendi, tava pura nge asi: “Siruwo sokuhura kupi ngaru gusa rugendo roge ntani ezuvake ngo ka tengura?” Ano hompa kwa yi haferere makura ta pulisire nge ni ze. Ame tani mu tantere siruwo esi ngani ka kara ko.

7 Makura tani tantere hompa asi: “Nsene asi ove hompa no yi hafera, nina hara o pe nge nombilive ni ka di gave kovanguuru womomukunda gemesinya mwina lyomukuro* dokupulisira nge ni pite mosirongo sawo dogoro ngani ka sike kosirongo saJuda. 8 Ngo pe nge hena mbilive zimwe ngani ka zi gave kwaAsafa ogu a kungu Musitu gwaHompa yipo a ka pe nge yitji, ngani ka dikise ko marungavero gokoNzugo zoVakwayita, ezi za kara pepi nontembeli* nomakuma gositata ntani nonzugo ezi ngani ka kara.” Makura hompa ta pe nge nombilive odo, yeeyi Karunga kwa kere kumwe name.

9 Apa na ka sikire kovanguuru womomukunda gemesinya mwina lyomukuro, tani va pe nombilive dahompa. Hompa kwa ninkire nge ni ze kumwe novakurona wovakwayita ntani novarondi wononkambe. 10 Sanibarati gomoBete-horoni naTobiya goMuamoni ogu ga kere mupitisili,* kapi va yi haferere apa va zuvhire asi kweli ogu ana wiza a ya ruganene Vaisraeli yininke yoyiwa.

11 Konyima tani ya siki moJerusarema ntani tani kara mo mazuva gatatu. 12 Ame kwa katukire masiku kumwe novagara vamwe ntani kapi na tanterere nkenye muntu eyi ga tumangedere nge Karunga ni rugane kuhamena Jerusarema. Ose kwa zire tupu nosikorama simwe esi na rondere. 13 Masiku ogo, ame kwa pitilire kErungavero lyokoMuramba ntani kwa pitilire hena pepi noRunone rwEzoka lyEnene, ni ze kErungavero lyoYihando.* Ame kwa konakonene makuma gaJerusarema aga ga bomaukire ntani nomarungavero aga va hwikire. 14 Ame kwa zire hena kErungavero lyoRunone ntani kediva eli nga zoganene hompa, nye sikorama esi na rondere kapi sa vhulire kupita, morwa mpito nunu za kere. 15 Nye ame kwa twikilire kugenda ni kanduke momuramba masiku ntani kwa twikilire kukonakona ekuma. Ano konyima tani tengura, tani ya pitire kErungavero lyokoMuramba, ni tengure kembo.

16 Vapangeli kapi va divire oku na zire neyi na rugene, yeeyi ame kapi na tanterere yuma Vajuda, vapristeli, vapitisili, vapangeli ntani novarugani wokuhupa ko. 17 Konyima yipo na va tanterere asi: “None kuna kumona ukaro woudona ou tuna kara nawo. Sitata saJerusarema kuna kara erunda ntani marungavero gaso va ga hwika. Yipo nye, tu tungurureni makuma gositata saJerusarema yipo li tu tunde eswau.” 18 Makura tani va tantere omu ga vaterere nge Karunga ntani neyi ga tanterere nge hompa. Ano awo tava tanta asi: “Ninkeni tu tameke kutunga.” Makura tava likorangeda va rugane sirugana sosiwa.

19 Apa ga yi zuvhire Sanibarati gomoBete-horoni naTobiya goMuamoni ogu ga kere mupitisili* ntani naGesemu goMuarabiya, tava wiza va ya tu swaure noku tu handukira. Awo kwa tente asi: “Yisinke muna kurugana? One kuna hara kurwanesa hompa ndi?” 20 Nye ame tani va limburura asi: “Karunga ogu a pangere meguru, nga tu vatera yi tu tompoke ntani ose vakareli vendi ngatu tameka kutunga. Nye one kapi mwa hamena kositata esi ntani ozinyakurweni kapi va tunga mo.”

3 Mupristeli gomunene Eliyasibu novapristeli vakwawo, tava tameke kutungurura Erungavero lyoNonzwi. Makura tava pongora Erungavero olyo kwaKarunga, ano konyima tava tura ko mavero. Awo kwa pongwere ekuma kwaKarunga, kutundilira pErungavero dogoro koRuhungu rwaMeya ntani dogoro koRuhungu rwaHananeli. 2 Ruha rokukwama ko kwa ru tungwilire vagara womoJeliko ntani ruha rokukwama ko kwa ru tungwilire Sakura munaImuli.

3 Vana vaHasena kwa tungwilire Erungavero lyoNomfi, tava tura ko yikuravero nomavero gako nomakumba ntani noyininke yokupatesa ko.* 4 Ruha rokukwama ko kwa ru wapukwilire Meremoto munaUliya, mutekurwaHakosi ntani ruha rokukwama ko kwa ru wapukwilire Mesuramu munaBerekiya, mutekurwaMesesabeli. Ano ruha rokukwama ko kwa ru wapukwilire Sadoko munaBana. 5 Ruha rokukwama ko kwa ru wapukwilire vantu womoTekoa, nye vagara wokufumana womoTekoa kapi va here kulinunupika va lihameke mo, morwa kapi va here vakwawo va va pitisire.

6 Joyada munaPaseya naMesuramu munaBesodeya, kwa wapukwilire Erungavero lyokoSitata Sanare. Tava tura ko yikuravero nomavero gako nomakumba ntani noyininke yokupatesa ko. 7 Ano ruha rokukwama ko kwa ru wapukwilire Meratiya gomoNgibiyoni naJadoni gomoMeronoto. Awo kwa kere vagara womoNgibiyoni naMisipa ava va kere mepangero lyanguuru gomomukunda gemesinya mwina lyomukuro.* 8 Ruha rokukwama ko kwa ru wapukwilire Usiyeli munaHarahaya, ogu nga hambura ngorodo, ano ruha rokukwama ko kwa ru wapukwilire Hananiya, ogu nga rugana yikwedumba. Awo kwa tulire mamanya pevhu moJerusarema dogoro kEkuma lyEnene. 9 Ruha rokukwama ko kwa ru wapukwilire Refaya munaHuru, ogu nga pangere ruha rumwe romoJerusarema. 10 Ruha rokukwama ko kwa ru wapukwilire Jedaya munaHarumafi ntani aro kwa kere pepi nembo lyendi. Ano ruha rokukwama ko kwa ru wapukwilire Hatusi munaHasabineya.

11 Ruha rokukwama ko kwa ru wapukwilire Malikiya munaHalimu ntani Hasubu munaPahati-mowaba. Awo kwa wapukwilire hena Ruhungu roMasuga gokukangera. 12 Ano ruha rokukwama ko kwa ru wapukwilire Sarumu munaHarohesi kumwe novana vendi wovakadi ntani age nga pangere ruha rumwe romoJerusarema.

13 Hanuni novantu ava va tungire moSanowa kwa wapukwilire Erungavero lyokoMuramba. Awo kwa li tungwilire ntani tava tura ko mavero nomakumba noyininke yokupatesa ko. Awo kwa wapukwilire hena ekuma kutunda kErungavero lyokoMuramba dogoro kErungavero lyoYihando.* Kutunda kErungavero lyokoMuramba dogoro kErungavero lyoYihando kwa kere nometa 450.* 14 Malikiya munaRekabu kwa wapukwilire Erungavero lyoYihando. Age kwa tungwilire erungavero olyo ntani ta tura ko mavero gako nomakumba noyininke yokupatesa ko. Age nga pangere mukunda gwaBete-hakeremu.

15 Ano Sarunu munaKolihose ogu nga pangere moMisipa, kwa wapukwilire Erungavero lyoRunone. Age kwa tungwilire erungavero olyo netara-tara lyako ntani ta tura ko mavero gako nomakumba noyininke yokupatesa ko. Age kwa wapukwilire hena ekuma lyekEdiva lyaSera,* eli lya vyuka kosikunino sahompa ntani dogoro koyilyatero eyi ya gurumuka yi tunde moSitata saNdafita.

16 Ruha rokukwama ko kwa ru wapukwilire Nehemiya munaAsibuku. Age nga pangere ruha rumwe romukunda gwaBete-suru ntani age kwa wapukwilire ekuma eli lya kara pepi nevango eli va horeka vekoro lyaNdafita dogoro kediva eli va dikire ntani dogoro koNzugo zoVakwayita.

17 Ano ruha rokukwama ko kwa ru wapukwilire Varevhi ava: Rehumu munaBani; ntani ruha rokukwama ko kwa ru wapukwilire Hasabiya, ogu nga pangere ruha rumwe romukunda gwaKeira. 18 Ruha rokukwama ko kwa ru wapukwilire Varevhi vakwawo. Awo kwa va pitisilire Bavhai munaHenadadi, ogu nga pangere ruha rumwe romukunda gwaKeira.

19 Ano ruha rokukwama ko kwa ru wapukwilire Esere munaJesuwa, ogu nga pangere moMisipa. Age kwa wapukwilire ruha oru rwa kanduka ru ze konzugopungwiro zoyirwiso. Azo kwa kere pepi nongundi oku lya korera ekuma.

20 Ruha rokukwama ko kwa ru wapukwilire Baruku munaSabayi, ogu ga rugene noupampi. Age kwa wapukwilire kutundilira kongundi oku lya korera ekuma dogoro pevero lyokonzugo zomupristeli gomunene Eliyasibu.

21 Ano ruha rokukwama ko kwa ru wapukwilire Meremoto munaUliya, mutekurwa Hakosi. Age kwa wapukwilire ekuma kutundilira pevero lyokonzugo zaEliyasibu dogoro oku za hulira nzugo zaEliyasibu.

22 Ruha rokukwama ko kwa ru wapukwilire vapristeli ava va kara momukunda gwaJorodana.* 23 Ruha rokukwama ko kwa ru wapukwilire Mbenyameni naHasubu. Awo kwa wapukwilire ekuma eli lya kara pepi nomambo gawo. Ano ruha rokukwama ko kwa ru wapukwilire Asaliya munaMaseya, mutekurwaAnaniya. Nage kwa wapukwilire ekuma eli lya kara pepi nembo lyendi. 24 Ruha rokukwama ko kwa ru wapukwilire Binuyi munaHenadadi. Age kwa wapukwilire ekuma kutundilira konzugo zaAsaliya dogoro kongundi oku lya korera ekuma ntani dogoro kekovhu lyekuma.

25 Ruha rokukwama ko kwa ru wapukwilire Parali munaUsayi. Age kwa wapukwilire ekuma eli lya kara pepi nongundi oku lya korera ekuma ntani noruhungu rwekeguru rokombara zahompa, oru rwa kara mEharango lyoVanomeni. Ano ruha rokukwama ko kwa ru wapukwilire Pedaya munaParosi.

26 Varugani wokontembeli* ava va tunga moOfeli, kwa wapukwilire ekuma eli lya kara pepi nErungavero lyoMema koupumezuva ntani noruhungu oru rwa kara kekuma.

27 Ruha rokukwama ko kwa ru wapukwilire vantu womoTekoa. Awo kwa wapukwilire kutundilira koruhungu rorunene rwekekuma dogoro kekuma lyaOfeli.

28 Vapristeli kwa wapukwilire ekuma eli lya kere konyima zErungavero lyoNonkambe. Nkenye ogu kwa wapukwilire ekuma eli lya kere pepi nembo lyendi.

29 Ruha rokukwama ko kwa ru wapukwilire Sadoko munaImere, age kwa wapukwilire ekuma eli lya kere pepi nembo lyendi.

Ano ruha rokukwama ko kwa ru wapukwilire Semaya munaSekaniya, ogu nga rugana pErungavero lyokoUpumezuva.

30 Ruha rokukwama ko kwa ru wapukwilire Hananiya munaSeremiya ntani Hanuni munaSarafu gwauntazimwe.

Ano ruha rokukwama ko kwa ru wapukwilire Mesuramu munaBerekiya. Age kwa wapukwilire ekuma eli lya kara pepi nonzugo zendi zonene.

31 Ruha rokukwama ko kwa ru wapukwilire Malikiya, ogu ga kere mombunga zovahambuli wongorodo. Age kwa wapukwilire ekuma dogoro konzugo zovarugani wokontembeli* nezi zovarandesi, ezi za kara pepi nErungavero lyokuKonakonena ntani dogoro konzugo zemekovhu lyekuma ezi za kara keguru.

32 Vahambuli wongorodo novarandesi kwa wapukwilire ekuma eli lya kere pokatji konzugo zemekovhu lyekuma ezi za kere keguru nErungavero lyoNonzwi.

4 Apa ga yi zuvhire Sanibarati asi ose kuna kutungurura makuma gaJerusarema, ta handuka unene ntani ta guwu makura ta swaura Vajuda. 2 Makura ta pura vakwawo novakwayita womoSamaliya asi: “Yisinke vana kurugana ava Vajuda wokudira nonkondo? Awo kuna kugazara asi tava mana kuyirugana velike ndi? Awo kuvhura va gave nonzambo nokudika mezuva limwe tupu ndi? Awo kuvhura va ruganese mamanya aga va hwika aga gana rundama monondambo ndi?”

3 Makura Tobiya goMuamoni ogu ga sikeme pepi nendi, ta tanta asi: “Ekuma eli va dika kapi lya kora, alyo kuvhura li gwe nsene a ronda ko mbanze.”

4 Makura tani kanderere asi: “Purakena nge ove Karunga gwetu, yeeyi ose kuna kutuswaura. Ninka vantu ava vana kutuswaura va ligwanekere noudigu ntani va gava momawoko gononkore dawo. 5 Wa ha tarerera yirugana yawo yoyidona ndi o va gusire po nonzo dawo, yeeyi awo kwa swaura vantu ava vana kutungurura ekuma.”

6 Ose kwa twikilire kutungurura ekuma, dogoro ekuma nalinye tali ligwanekere ntani dogoro musika gwalyo tagu siki poharufa zomusika gwalyo gwanare. Ano vantu kwa litulire mo unene mosirugana.

7 Apa ga yi zuvhire Sanibarati naTobiya noVaarabiya noVaamoni ntani noVaasidodo asi sirugana sokutungurura makuma gaJerusarema kuna kugenda po nawa ntani makuma kuna kugwanekera, tava handuka unene. 8 Awo kwa lizuvhire va wize koJerusarema va ya tu rwanese ntani va ya hagekese sirugana setu. 9 Nye ose kwa kanderere kwaKarunga gwetu, makura tatu ninki muntu a va nomene mutenya nomasiku.

10 Nye vantu womoJuda tava tanta asi: “Varugani ava ava simbi yininke youdigu kapi vana kara hena nononkondo ntani nondambo doyihando nonzi. Ose kapi ngatu vhura kumana kutunga ekuma.”

11 Nonkore detu kwa tente asi: “Ose ngatu za mokatji kawo va hana kuyidivira, tu ka va dipage nokuhagekesa po sirugana sawo.”

12 Apa ngava wiza mositata Vajuda ava va tungire pepi nononkore detu, ngava tu tantere nkenye apa* asi: “Nonkore detu ngadi tu homokera kutundilira komaruha nagenye.”

13 Ame kwa tulire vagara va kare kekuma komavango goureru kuhomokera oku kwa dilire kukara nondundu. Ame kwa va gawinine kuliza nomazimo gawo ntani awo kwa kere nonomfuro nomagonga ntani nomauta gonkanza. 14 Apa na va mwene asi vana kara nowoma, tani katuka usimbu makura tani tantere vapitisili novapangeli novantu navenye asi: “Mwa ha va tjira. Diworokeni asi Jehova nonkondo ntani kutetukisa. Rweni, mu popere vakweneni novana veni novakadi veni ntani nomambo geni.”

15 Nonkore detu da dimbwilire asi tuna diva eyi va here kurugana ntani asi Karunga gousili ana va kondere yipo yi dire kuvatompoka. Kutunda opo, natuvenye tatu twikire kudika ekuma. 16 Kutunda ezuva olyo, harufa zovagara ngava dike ekuma, ano harufa zovagara wokuhupa ko ngava kwaterere magonga, yilikandwiso, mauta gonkanza ntani kwa dwere yikoverero youkwayita. Ano marenga kwa kwatesere ko Vajuda 17 ava va tungwilire ekuma. Vantu ava va simbire yininke youdigu, kwa damwine yininke newoko limwe nokukwaterera yirwiso mokuwoko kukwawo. 18 Vagara ava va tungwilire ekuma, navenye kwa dwere marufuro mombunda ngomu va tungire. Ano mugara gokufuda ruvinga yipo a rondore vantu, kwa sikeme pepi name.

19 Makura tani tantere vapitisili novapangeli novantu navenye asi: “Yirugana yinzi simpe yina hupu ko ntani ose tuna kutungurura ekuma, tuna likara ure unene. 20 Apa ngomu zuvha muhagaro goruvinga, ngomu wize mu ya ponge oku tuna kara. Karunga gwetu nga tu rwira po.”

21 Ose kwa twikilire kurugana kutunda ngurangura dogoro masiku, ano harufa zovagara kwa kwatererere magonga. 22 Posiruwo oso, ame kwa tanterere vantu asi: “Vagara navenye novakareli vawo, ngava kare masiku moJerusarema yipo ngava tu takamese, ano mutenya awo ngava rugane.” 23 Yipo nye, name noVajuda vakwetu novakareli vange ntani novanomeni ava ngava kwama nge, kapi ngatu hutura yidwara yetu ntani natuvenye kwa kwatererere yirwiso mokuwoko kokorulyo.

5 Nampili ngoso, vagara novakadi vawo kwa sivanene kuhamena Vajuda vakwawo. 2 Vamwe kwa tente asi: “Vana vetu vanzi unene. Twa hepa kugwana nondya tu lye yipo tu paruke.” 3 Vamwe kwa tente hena asi: “Ose kuna kugava mapya getu noyikunino yetu yomandjembere ntani nomambo getu va ga kwate, yipo va tu pe nondya posiruwo esi serumbu.” 4 Ano wopeke kwa tente asi: “Ose kwa gava yikunino yetu yomandjembere nomampya getu va ga kwate, yipo va tu pe yimaliwa tu ka fute mutero gwahompa. 5 Ose ekoro limwe tupu ntani vana vetu nawo mulyo ngwendi vana vawo, nye twa hepa kugava vana vetu wovagara nava wovakadi va ka kare vapika, ano vana vetu vamwe wovakadi nare twa va gava koupika. Ose kapi tuna kara nononkondo dokuhagekesa po udigu ou, yeeyi mapya getu noyikunino yetu yomandjembere va yi gusa wopeke.”

6 Apa na zuvhire masivano gawo, ame kwa handukire unene. 7 Makura tani gazadara ko kuhamena udigu ou ntani tani handukire vapitisili novapangeli. Ame kwa va tanterere asi: “Morwasinke muna kupulira vakweni va mu fute nsonso?”*

Ame kwa ninkire hena vantu va ya ponge, yipo tu ya kohonone po udigu owo. 8 Makura tani va tantere asi: “Ose kwa kondja paapa twa hulira mokukazowora Vajuda vakwetu ava va randesere konomuhoko; nye ngesi one kuna hara kurandesa vakweni ndi? Muna hara tu va rande kweni yipo mu va mangurure ndi?” Makura vantu tava mwena ntani kapi va divire omu nava lipopera. 9 Makura tani va tantere asi: “Eyi muna kurugana yidona. Nani kapisi ngano kuna kutjira Karunga gwetu, yipo vantu wokonomuhoko dapeke ndi nonkore detu va dire kutuswaura ndi? 10 Name nekoro lyange ntani novakareli vange kuna kukorotesa Vajuda vakwetu yimaliwa nombuto twa hana kuvapura nsonso. Yipo nye, hagekeni kupura nsonso kovakwetu. 11 Va tengwidireni naina mapya gawo, yikunino yawo yomandjembere, yikunino yawo yomauzwe ntani nomambo gawo. Va tengwidireni hena yimaliwa yawo nombuto novhinyu zompe ntani nomagadi aga va mu futa ngonsonso.”

12 Makura awo tava tanta asi: “Ose tatu va tengwidire yininke yawo ntani kapi ngatu va pura yuma. Ose natu yi rugana moomu ono tanta.” Makura tani zigida vapristeli ntani tani ninki vagara owo va gane komeho zawo asi ngava sikisa mo eyi vana tumbwidire. 13 Ame kwa tjukumwine yininke eyi ya kere melimba lyoponturo lyosikoverero sange, tani tanta asi: “Ngesi yimo Karunga nga tjukumuna nkenye ogu nga dira kusikisa mo etumbwidiro eli. Karunga nga mu gusa mo membo lyendi ntani nga mu gusa nayinye eyi ga weka, nga dire kukara noyuma.” Makura vantu navenye tava tanta asi: “Amen!”* Awo kwa hamberere hena Jehova noku sikisa mo eyi va tumbwidilire.

14 Kutunda apa va tulire nge ni kare nguuru mosirongo sorudi rwaJuda, name nekoro lyange kapi twa lya nondya edi da tumbukira nguuru nomvhura 12. Ame kwa kara nguuru kutundilira momvhura 20 dogoro momvhura 32, zepangero lyahompa Aretaserekesesi. 15 Nye vanguuru ava va kere ko kwa digopekere eparu lyovantu ntani kwa pulire vantu va fute yisiliveli* 40 nkenye ezuva, yipo va rande mboroto novhinyu. Vakareli vawo nawo ngava hepeke vantu. Nye ame kapi na yi rugene morwa kwa tjira Karunga.

16 Ame kwa lihamekere hena mokutungurura ekuma ntani vakareli vange nawo kwa lihamekere mo. Ose kapi twa gusire epya lyomuntu. 17 Ame ngani li kositafura sange kumwe noVajuda ntani novapangeli 150, kukwatera mo vantu wokonomuhoko dapeke ava va ya lipakerere nose. 18 Nkenye ezuva ngava terekere nge* ngombe zimwe, nonzwi donongwa ntazimwe noyidira ntani nkenye apa konyima zomazuva murongo ngatu nu vhinyu zonzi zokulisiga-siga. Nye nampili ngoso, ame kapi na pulire va pe nge nondya edi ava pe nguuru, yeeyi vantu kwa kere moukaro woudigu. 19 Makura tani kanderere asi: “Karunga gwange, ngano ngo diworoke nge narunye, morwa yininke yoyiwa eyi na ruganena vantu ava.”

6 Sanibarati naTobiya naGesemu gomoArabiya nononkore detu dimwe, kwa zuvhire asi nina tungurura ekuma ntani makuma gana gwanekere (posiruwo oso ame kapi na tulire mavero komarungavero). 2 Makura Sanibarati naGesemu tava tumine nge mbudi asi: “Wiza tu ya gwanekere monomukunda edi da kara moMuramba gwaOno.” Awo kwa here va dipage nge. 3 Makura yipo na tumine vantu kwawo va ka va tantere asi: “Ame kapi tani wiza ko morwa sirugana esi nina kurugana sinene unene. Kapi tani vhuru kuhageka sirugana esi ni wize kweni.” 4 Awo kwa tumininine nge mbudi zokulifana yikando yine, nye ame kwa va pere elimbururo lyokulifana yikando nayinye.

5 Konyima, Sanibarati ta tumu mukareli gwendi nombudi zokulifana sikando sautano ntani age kwa wizire nombilive ezi va dilire kupata. 6 Mombilive ozo kwa tjenge mo asi: “Nomuhoko kwa zuvha asi nove noVajuda kuna hara kurwanesa hompa ntani Gesemu nage yimo ana kuuyunga. Eyi yiyo ono kutungwilira ekuma ntani kuliza nonombudi edi twa zuvha, ove kuna hara kukara hompa gwawo. 7 Ove kwa horowora hena vagara va porofete moJerusarema asi: ‘Ngesi tuna kara nahompa mosirongo saJuda!’ Hompa nga zuvha yininke eyi. Yipo nye, wiza tu ya yi zogere kumwe.”

8 Nye ame tani mu limburura asi: “Yininke eyi ono kuuyunga kapi ya horoka; nyaamoge ono kuyitota po.” 9 Awo kwa here va tu tjilise ntani kwa litanterere vene asi apa natu dompa mutjima, tatu hageke sirugana setu. Makura tani kanderere kwaKarunga asi: “Nkondopeka nge.”

10 Konyima tani zi kembo lyaSemaya munaDeraya mutekurwaMehetabeli, posiruwo oso age kapi ana kuvhura kutunda membo. Age kwa tanterere nge asi: “Ninka tu ka ligwane konzugo zaKarunga gousili, tu ka hwilire montembeli ntani tu ka lizedilire, yeeyi vantu kuna kuwiza va ya ku dipage. Awo kuna kuwiza va ya ku dipage masiku.” 11 Nye ame tani mu tantere asi: “Ame kapi tani vhuru kuduka ntani kapi tani vhuru kuza montembeli. Nsene nani yi rugana, tava dipaga nge.” 12 Makura tani dimburura asi Karunga kapisi yige ga tumine muporofete ogo, nye Tobiya naSanibarati yiwo va mu futire a ya tantere nge yininke oyo. 13 Awo kwa mu futire yipo a ya tjilise nge ntani a ya ninkise nge ni zone. Awo kwa here kunyatekesa edina lyange ntani va ninkise nge ni kare nousima.

14 Makura tani kanderere asi: “Karunga gwange, diworoka eyi ga rugana Tobiya naSanibarati ntani muporofete gomukadi Nowadiya novaporofete vamwe ava ngava hetekere ko kutjilisa nge.”

15 Makura ekuma tali pu kulitungurura momazuva 25 mokwedi kwaEruli.* Alyo kwa gusire mazuva 52 va mane kulitungurura.

16 Apa da yi zuvhire nonkore detu ntani apa da yi mwene nomuhoko edi da tu kundurukida, awo kwa lifire nomuga ntani tava dimburura asi Karunga gwetu kwa tu vatera tu mane sirugana setu. 17 Momazuva ogo, vapitisili womoJuda ngava tumu nombilive dononzi kwaTobiya, ano Tobiya nga limburura nombilive dawo. 18 Sinzi sovantu womoJuda kwa tumbwidilire Tobiya asi ngava mu kwatesa ko, yeeyi age kwa kwere munaSekaniya zaAra ntani Jehohanani munaTobiya, kwa kwere munaMesuramu zaBerekiya. 19 Vajuda ngava tantere nge hena yininke yoyiwa kumuhamena, makura awo tava ka mu tantera eyi ngani uyunga. Ano konyima, Tobiya nga tjangere nge nombilive yipo a tjilise nge.

7 Apa va mene kutungurura ekuma, ame kwa tulire ko mavero, makura tani gava yirugana kovanomeni wopomavero, kovadimbi ntani koVarevhi. 2 Makura tani ninki mumbyange* Hanani a pakere mbili Jerusarema kumwe naHananiya ogu nga gendesa nzugo zovakwayita, yeeyi age kwa mu huguvarere unene ntani kwa tjilire Karunga gousili kupitakana vagara vakwawo. 3 Makura tani va tantere asi: “Marungavero gaJerusarema kapisi va ga paturure dogoro pometaha. Komeho vanomeni va mane rufo rwawo, awo va hepa kupata marungavero nokutura ko yininke yokupatesa ko. Mwa hepa hena kuhorowora vantu womoJerusarema va nomene nkenye oku ngava va tura ntani vamwe va nomene pepi nomambo gawo.” 4 Posiruwo oso, sitata kwa kere sinene, ano vantu vasesu va kere mo ntani mambo kapi va ga tungwilire simpe.

5 Nye Karunga kwa tumangedere nge ni tantere vapitisili novapangeli ntani novantu va ponge, yipo va ya va tjange kuliza nomazimo gawo. Makura tani gwana buke omu va tjanga madina govantu ava va hovere kutunda kounkwate kuliza nomazimo gawo. Amo kwa tjenge mo asi:

6 Ava kuna kara vantu womomukunda ava va tundire kounkwate. Awo kwa va twere mounkwate Nebukadenesara hompa gwaBabironi, ano konyima tava ka tengura mositata saJerusarema nomoyitata yapeke yomoJuda omu va tungire. 7 Vantu ava kwa ka tengwire kumwe naSerubabeli, Jesuwa, Nehemiya, Asaliya, Ramiya, Nahamani, Moredekayi, Bilisani, Misipereti, Bigivayi, Nehumu ntani Bana.

Esi kuna kara sivaro sovagara woVaisraeli ava va ka tengwire: 8 womoruvharo rwaParosi 2 172; 9 womoruvharo rwaSefatiya 372; 10 womoruvharo rwaAra 652; 11 womoruvharo rwaPahati-mowaba kupitira mwaJesuwa naJowabu 2 818; 12 womoruvharo rwaEramu 1 254; 13 womoruvharo rwaSatu 845; 14 womoruvharo rwaSakayi 760; 15 womoruvharo rwaBinuyi 648; 16 womoruvharo rwaBebayi 628; 17 womoruvharo rwaAsigadi 2 322; 18 womoruvharo rwaAdonikamu 667; 19 womoruvharo rwaBigivayi 2 067; 20 womoruvharo rwaAdini 655; 21 womoruvharo rwaAtere ava va tundilira mwaHisikiya 98; 22 womoruvharo rwaHasumu 328; 23 womoruvharo rwaBesayi 324; 24 womoruvharo rwaHalifu 112; 25 womoruvharo rwaNgibiyoni 95; 26 vagara womoBeterehema ntani womoNetofa 188; 27 vagara womoAnatoti 128; 28 vagara womoBete-asimavete 42; 29 vagara womoKiliyata-jeyalimu, Kefira ntani womoBeroti 743; 30 vagara womoRama ntani womoGeba 621; 31 vagara womoMikimasi 122; 32 vagara womoBeteli ntani womoAi 123; 33 vagara womositata saNebo sapeke 52; 34 womoruvharo rwaEramu gwapeke 1 254; 35 womoruvharo rwaHalimu 320; 36 vagara womoJeliko 345; 37 vagara womoRodi, Hadidi ntani womoOno 721; 38 vagara womoSena 3 930.

39 Vapristeli ava va ka tengwire kwa kere: womoruvharo rwaJedaya ava va tundilira mezimo lyaJesuwa. Sivaro sawo kwa kere 973; 40 womoruvharo rwaImere 1 052; 41 womoruvharo rwaPasihuru 1 247; 42 womoruvharo rwaHalimu 1 017.

43 Varevhi ava va ka tengwire kwa kere: womoruvharo rwaJesuwa ava va tundilira mezimo lyaKadimiyeli ntani lyaHodeva. Sivaro sawo kwa kere 74. 44 Vadimbi ava va ka tengwire kwa kere: womoruvharo rwaAsafa 148. 45 Vanomeni wopomavero ava va ka tengwire kwa kere: womoruvharo rwaSarumu, Atere, Talimoni, Akubu, Hatita ntani rwaSobayi. Sivaro sawo kwa kere 138.

46 Varugani wokontembeli* ava va ka tengwire kwa kere: womoruvharo rwaSiha, Hasufa, Tabaoto, 47 Kerosi, Siya, Padoni, 48 Rebana, Hagaba, Salimayi, 49 Hanani, Gideli, Gahare, 50 Reyaiya, Resini, Nekoda, 51 Gasamu, Usa, Paseya, 52 Besayi, Meunimu,* Nefusesimu,* 53 Bakubuke, Hakufa, Harehure, 54 Basilite, Mehida, Harasa, 55 Barukosi, Sisera, Tema, 56 Nesiya ntani rwaHatifa.

57 Womoruvharo rovakareli vaSaromo ava va ka tengwire kwa kere: womoruvharo rwaSotayi, Sofereti, Pelida, 58 Jara, Darekoni, Gideli, 59 Sefatiya, Hatili, Pokerete-hasebayimu ntani rwaAmoni. 60 Varugani navenye wokontembeli* ntani womoruvharo rovakareli vaSaromo kwa kere 392.

61 Ano vantu vamwe ava va tundilire moTeli-mera, Teli-haresa, Kerubi, Adona ntani moImere, kapi va vhulire kulikida asi mezimo musinke va hamena ntani nsene asi nawo kwa kere Vaisraeli. Awo kuna kara: 62 womoruvharo rwaDeraya, rwaTobiya ntani rwaNekoda. Sivaro sawo kwa kere 642. 63 Ano womoruvharo rovapristeli kwa kere: womoruvharo rwaHabaya, rwaHakosi ntani rwaBarasirayi, ogu ga kwere gumwe govana vaBarasirayi gomoGiliyata ntani ngava mu zigidisa kedina lyotamweyi zendi. 64 Awo kwa paparere mauzera gokuhamena ehistoli lyezimo lyawo, nye kapi va ga gwene. Yipo nye, awo kapi va va pulisilire va rugane ngovapristeli.* 65 Nguuru* kwa va nyokesere kulya yininke yokupongokerera, dogoro mupristeli nga pure mavyukiso kwaKarunga kupitira moUlimu naTumimu.

66 Sivaro sovantu ava va ka tengwire kwa kere 42 360, 67 kugusa ko vapika vawo wovagara nava wovakadi 7 337. Awo kwa kere hena kumwe novadimbi wovagara nava wovakadi 245 68 nononkambe 736 nononsino 245 69 nonongameru 435 ntani noyindongi 6 720.

70 Masimbi gamwe gomomazimo kwa geve yigava yipo va kwatese ko sirugana esi va rugene. Nguuru* kwa geve yimaliwa* 1 000 yongorodo kosikesa, marupasa gomanunu 50 ntani marwakani govapristeli 530. 71 Ano masimbi gamwe gomomazimo kwa geve yimaliwa 20 000 yongorodo ntani yimaliwa* yosiliveli 2 200 kosikesa soyirugana. 72 Ano vantu wokuhupa ko kwa geve yimaliwa yongorodo 20 000, yimaliwa yosiliveli 2 000 ntani marwakani govapristeli 67.

73 Ano vapristeli, Varevhi, vanomeni wopomavero, vadimbi, vantu vamwe, varugani wokontembeli* ntani Vaisraeli wokuhupa ko* nawo kwa tungire moyitata yawo. Apa kwa sikire kwedi kwauntambali, Vaisraeli kwa tungire moyitata yawo.

8 Makura vantu navenye tava pongo nositambo simwe pevango eli ava pongere vantu, pepi nEruvangavero lyoMema. Awo kwa tanterere Esira mutjanguruli gomatjangwa,* a ka rete buke zoVeta zaMosesa ezi ga pangerere Jehova Vaisraeli va zi kwame. 2 Makura mupristeli Esira ta ka reta buke zoVeta, yipo a ya zi rese komeho zombunga zovagara novakadi ntani nanavenye ava va vhulire kupurakena nokukwata egano yininke. Ayo kwa horokere mezuva lyokuhova mokwedi kwauntambali. 3 Age kwa zi resere kuziguruka pevango eli ava pongere vantu pepi nErungavero lyoMema, kutundilira ngurangura dogoro metaha. Age kwa zi reserere vagara novakadi ntani nanavenye ava va vhulire kukwata egano eyi ya kere mo, ano vantu kwa purakenene nelituromo. 4 Esira mutjanguruli gomatjangwa kwa sikeme positantara soyipirangi esi va wapaikilire epongo olyo. Korulyo rwendi kwa sikeme ko Matitiya, Sema, Anaya, Uliya, Hilikiya naMaseya ano korumoho rwendi kwa sikeme ko Pedaya, Misayeli, Malikiya, Hasumu, Hasibadana, Sakaliya naMesuramu.

5 Apa ga gangwinine Esira bukegango zoVeta, vantu navenye kwa mu mwene, yeeyi age kwa kere keguru. Ano apa ga zi gangwinine, vantu tava sikama. 6 Makura Esira ta hamberere Jehova Karunga gousili ntani goMunene, ano vantu tava zerura mawoko gawo, tava tanta asi: “Amen!* Amen!” Konyima tava tu nongoro nokulinyongamena komeho zaJehova. 7 Makura Jesuwa, Bani, Serebiya, Jamini, Akubu, Sabetayi, Hodiya, Maseya, Kelita, Asaliya, Josabadi, Hanani ntani Peliya ava va kere Varevhi, tava faturura Veta awo vantu kuna sikama. 8 Awo kwa twikilire kuresa kuziguruka Veta zaKarunga gousili ntani nokuzifatwilira vantu monkedi zoureru, eyi kwa vaterere vantu va kwate egano eyi va va reserere.

9 Ano Nehemiya ogu ga kere nguuru* nomupristeli Esira ogu nga tjangurura matjangwa ntani noVarevhi ava ngava rongo vantu, tava tantere vantu asi: “Eli kuna kara ezuva lyokupongoka kwaKarunga gweni Jehova. Kapisi mu guve ndi mu lire.” Yeeyi vantu navenye kwa lilire apa va va reserere nonkango domobuke zoVeta. 10 Nehemiya ta va tantere asi: “Zendeni mu ka lye yininke yoyiwa* nokunwa yininke yoyitovara ntani ka gaveni nondya kovakweni ava vana dili kuwapaika yuma, yeeyi ezuva eli kwa pongoka kwaHompa gwetu. Kapisi mu guve, morwa ruhafo oru a mu pe Jehova kumunkondopeka.” 11 Varevhi kwa tanterere vantu navenye asi: “Mweneni ntani mwa ha guva, yeeyi ezuva eli kwa pongoka.” 12 Makura vantu navenye tava li nokunwa ntani tava ka pa ko vakwawo nondya. Awo kwa hefe unene, yeeyi awo kwa kwete egano nonkango domobuke zoVeta.

13 Ano mezuva eli lya kweme ko, masimbi gomomazimo novapristeli ntani noVarevhi kwa zire kwaEsira ogu nga tjangurura matjangwa, morwa awo kwa here kudiva ko yoyinzi eyi va tjanga mobuke zoVeta. 14 MoVeta ezi ga va pere Jehova kupitira mwaMosesa, awo kwa ka gwene mo asi Vaisraeli va hepa kutunga momataratara posipito somokwedi kwauntambali 15 ntani va hepa kudivisa moyitata yawo nayinye nomoJerusarema asi: “Zendeni momukunda gonondundu mu ka simbe nomutayi doyitji youzwe, doyitji yoyire,* doyitji yonombya,* nomutayi donongone* ntani nedi doyitji yapeke yomahako gomanzi, yipo ngomu dikise ko mataratara ngwendi moomu va yi tjanga.”

16 Makura vantu tava zi va ka simbe nomutayi va ya dikise ko mataratara. Awo kwa ga dikilire peguru lyononzugo dawo, momaharango gawo, momaharango aga ga kara konzugo zaKarunga gousili, kevango oku ava pongere vantu pepi nErungavero lyoMema ntani neli lya kara pepi nErungavero lyaEfurayimi. 17 Yipo nye, vantu navenye ava va ka tundire kounkwate kwa dikire mataratara nokutunga mo. Vaisraeli kwa hefe unene, morwa kutundilira momazuva gaJosuwa munaNunu, esi kwa kere sikando sawo sokuhova va dene sipito esi monkedi ezi. 18 Kutundilira ezuva lyokuhova dogoro lyokuhulilira, awo ngava resa nkenye ezuva mobuke zoVeta zaKarunga gousili. Awo kwa dene sipito oso mazuva ntambali, ano mezuva lyauntantatu tava pongo kumwe va karere Karunga ngwendi moomu va yi va pangerere moVeta.

9 Mezuva 24 lyokwedi oko, Vaisraeli kwa pongere. Awo kwa dililire, kwa dwere nonsako ntani kwa litulire enoto ponomutwe dawo. 2 Vaisraeli kwa ligaunukire novanayirongo makura tava sikama va tongonone nonzo dawo nedi dovaguhya vawo. 3 Konyima tava sikama pevango lyokulifana, tava resa kuziguruka buke zoVeta zaKarunga gwawo Jehova novili ntatu, ano novili ntatu edi da kweme ko awo kwa tongwenene nonzo dawo nokunyongamena Karunga gwawo Jehova.

4 Makura Jesuwa, Bani, Kadimiyeli, Sebaniya, Buni, Serebiya, Bani naKenani tava sikama positantara soVarevhi ntani tava kanderere kuziguruka kwaKarunga gwawo Jehova. 5 Ano Jesuwa, Kadimiyeli, Bani, Hasabineya, Serebiya, Hodiya, Sebaniya naPetahiya ava va kere Varevhi, tava tanta asi: “Sikameni mu hamberere Karunga gweni Jehova dogoro narunye. Ove Karunga, ngano edina lyoge eli lya fumana va li hamberere nampili ngomu twa dira kuwapera kulitangauka.

6 “Kwato Karunga ogu ga kufana Jehova. Ove kwa sita eguru lyekeguru-guru nanayinye eyi ya kara mo,* evhu nanayinye eyi ya kara po ntani nefuta nanayinye eyi ya kara mo. Ove kuyininka nayinye yi twikire kuparuka. Ano yininke nayinye yemeguru* kuna kukukarera. 7 Jehova ove Karunga gousili, ogu wa horowere Abiramu nokumugusa moUru sitata soVakalidi, makura to mu ruku Abirahamu. 8 Ove kwa dimbwilire asi age kulimburukwa kutundilira komutjima, yipo wa mu tumbwidilire asi ngo mu pa kumwe noruvharo* rwendi sirongo soVakanani noVaheti noVaamoli noVaperesi noVajebusi ntani noVagiregasi. Ano ove kwa sikisa mo etumbwidiro olyo morwa ove muhungami.

9 “Ove kwa mwene omu va hepere ozinyakurwetu moEgipite ntani ove wa zuvhire omu va likwamberere koge apa va kere kEfuta lyEgeha. 10 Makura yipo wa rugene yitetu, o tengeke Farawo novakareli vendi ntani novantu navenye womosirongo sendi, yeeyi ove kwa mwene omu va hepekere vantu woge. Ove kwa divisire edina lyoge ntani alyo kwa divikwa dogoro naina. 11 Ove kwa gawinine efuta yipo vantu woge va gende pevhu lyekukutu, va rute ano nonkore dawo edi da va sikwire, ove kwa di zuguminine mefuta ngwendi emanya eli vana zugumine momankupi. 12 Ove kwa pitisilire vantu woge mutenya nongundi zeremo, ano masiku nongundi zomundiro yipo o va likide nzira ezi nava genda. 13 Ove kwa wizire koNdundu zaSinayi, o va uyungise kutundilira meguru. Ove kwa va pere nompangera donongwa, noveta dokuvhura kuhuguvara, mavyukiso ntani yipango yoyiwa. 14 Ove kwa va rongere va diworoke ezuva lyoge lyokupongoka lyEsabata ntani ove kwa va pere yipango nonoveta kupitira momukareli goge Mosesa. 15 Apa va zuvhire nzara, ove kwa va pere mboroto zokutunda meguru. Ano apa va zuvhire enota, ove kwa va pere mema aga ga tundire memanya ntani yiyo wa va tanterere va ka guse sirongo esi wa va tumbwidilire.

16 “Nye ozinyakurwetu kwa linenepekere ntani kwa kere ndino.* Awo kapi va purakenene konompangera doge. 17 Awo kapi va here kupurakena ntani kapi va diworokere yitetu yoyinene eyi wa va ruganenene. Awo kwa kere ndino* ntani kwa horowere muntu ava pitisire va tengure koEgipite oku va kere vapika. Nye nampili ngoso, ove wa liwapaikira kugusira po* vantu nonzo dawo, mutjima goge muwa, wa kara nonkenda zonene, kapi o handuka usimbu ntani eharo lyoge lyanarunye. Yipo nye, ove kapi wa va sigililire. 18 Nampili apa va rugene ntana zosivera nokutanta asi yige Karunga gwawo ogu ga va gusa mosirongo saEgipite napa va dilire kulikida efumadeko koge, 19 ove kapi wa va sigililire momburundu morwa kwa kara nonkenda zonene. Ove kapi wa gusire ko ngundi zeremo ezi za va pitisilire mutenya ndi ngundi zomundiro ezi za va pitisilire masiku, yipo va mone nzira ezi nava genda. 20 Ove kwa va pere mpepo zoge zongwa yipo va kare nonondunge ntani ove kwa twikilire kuvapa mana nomema apa va fire enota. 21 Ove kwa va pere nondya momburundu nomvhura 40. Ove kwa va pere nayinye eyi va hepere. Yikoverero yawo kapi ya kurupire ntani nompadi dawo kapi da dundire.

22 “Ove kwa va vaterere va funde vahompa nonomuhoko ntani kwa va ninkire va ligawinine sirongo. Awo kwa gusire sirongo saSihoni, hompa gwaHesiboni ntani nosirongo saOgo, hompa gwaBasani. 23 Ntani ove kwa ninkire vana vawo va ligwederere ngwendi nombungururu dekeguru, makura yiyo wa va twere mosirongo esi wa tumbwidilire ozinyakurwawo asi ngava si pinga. 24 Makura yipo va zire va ka pinge sirongo ntani ove kwa fundire komeho zawo Vakanani ava va tungire mosirongo oso. Ove kwa va geve momawoko gawo kumwe novahompa vawo, va va rugane moomu vana hara. 25 Awo kwa kwete yitata eyi va kundurukida nomakuma nosirongo sevhu lyewa. Awo kwa pingire mambo omu mwa kere yininke yoyiwa yokulisiga-siga, matope* aga va sima nare, yikunino yomandjembere, yikunino yoyitji yomauzwe ntani noyitji yenyango yoyinzi. Awo kwa lire dogoro tava kuta nokuneta ntani awo kwa haferere yininke nayinye yoyiwa eyi wa va pere.

26 “Nye awo kwa ku rwanesere nokudira kukulimburukwa ntani awo kwa hagekere kukwama Veta zoge. Awo kwa dipagere vaporofete woge ava wa tumine va ka va rondore yipo va tengure koge ntani awo kapi va ku fumadekere. 27 Eyi yiyo wa va gaverere momawoko gononkore dawo edi da va hepekere. Nye awo kwa likwamberere koge apa va kere moudigu makura to va zuvhu kutundilira meguru ntani mokumona asi ove kwa kara nonkenda zonene, ove kwa va tuminine vantu va ka va popere momawoko gononkore dawo.

28 “Nye apa wa hege udigu wawo, tava tameke hena kurugana yininke yoyidona kosipara soge, ano ove kwa va geve momawoko gononkore dawo edi da va hepekere. Konyima, awo kwa tengwire koge nokulikwambera o va vatere, ano ove kwa va zuvhire kutundilira meguru nokuvapopera yikando yoyinzi morwa nkenda zoge zonene. 29 Nampili ngomu wa va rondwere yipo va limburukwe Veta zoge, awo kwa linenepekere ntani kwa nyokere kukwama nompangera doge. Awo kwa zonene pokudira kukwama mavyukiso goge aga aga ninkisa muntu ogu ana kugakwama a paruke. Nye awo kwa rundire mutwe ntani kwa kukutikire nomutjima dawo nokunyoka kukupurakena. 30 Ove kwa va lididimikilire nomvhura dononzi nokuvarondora kupitira movaporofete ava wa pere mpepo zoge, nye awo kapi va va purakenene. Konyima, ove kwa va geve momawoko govantu ava va tunga mosirongo. 31 Nye mokumona asi ove kwa kara nonkenda zonene, ove kapi wa va zonagwire po ndi o va zumbe, yeeyi ove muwa ntani Karunga gonkenda.

32 “Ove Karunga gomunene gononkondo ntani gokutetukisa. Ove kwa sikisa mo egwanekero* lyoge ntani kwa tu likida eharo lyanarunye. Yipo nye, wa ha divara maudigu govahompa vetu, marenga getu, vapristeli vetu, vaporofete vetu nozinyakurwetu ntani novantu woge navenye ava va parukire kutunda momazuva govahompa vaAsiliya dogoro naina. 33 Ove kwa sikisa mo nayinye eyi wa tente asi ngayi tu horokera ntani mouhunga wa kere, nye ose kwa rugana yininke yoyidona. 34 Vahompa vetu, marenga getu novapristeli vetu ntani nozinyakurwetu kapi va sikisa mo Veta zoge ndi va limburukwe nompangera doge nomavyukiso* aga wa va pere. 35 Nampili posiruwo esi ngava pangere vahompa vetu ntani apa ngava hafere vantu yininke yoyiwa nokutunga mosirongo sosinene sevhu lyewa esi wa va pere, awo kapi ngava ku karere ntani kapi va hagekere kurugana yininke yoyidona. 36 Ngesi ose vapika tuna kara mosirongo esi wa pere ozinyakurwetu yipo va lye enyango lyamo noyininke yamo yoyiwa. 37 Muzangu gomosirongo esi, kuna kara govahompa ava wa ninka va tu pangere morwa ose twa zona. Awo kutupangera noyimuna yetu moomu vana hara ntani ose kuna kara moudigu wounene.

38 “Yipo nye, ose kuna kutura po elizuvhasano lyopatjangwa ntani kuna kutura ko sinongweneso somarenga getu noVarevhi novapristeli, si kare umbangi asi vana yi kwatesa ko.”

10 Ava va yi kwatesere ko pokutura po sinongweneso sawo kuna kara:

9 Varevhi ava va yi kwatesere ko kuna kara: Jesuwa munaAsaniya, Binuyi gumwe govana vaHenadadi, Kadimiyeli, 10 Sebaniya, Hodiya, Kelita, Peliya, Hanani, 11 Mika, Rehobu, Hasabiya, 12 Sakura, Serebiya, Sebaniya, 13 Hodiya, Bani naBeninu.

14 Masimbi aga ga yi kwatesere ko kuna kara: Parosi, Pahati-mowaba, Eramu, Satu, Bani, 15 Buni, Asigadi, Bebayi, 16 Adoniya, Bigivayi, Adini, 17 Atere, Hisikiya, Asuru, 18 Hodiya, Hasumu, Besayi, 19 Halifu, Anatoti, Nebayi, 20 Migipiyasi, Mesuramu, Hesire, 21 Mesesabeli, Sadoko, Jaduya, 22 Peratiya, Hanani, Anaya, 23 Hoseya, Hananiya, Hasubu, 24 Harohesi, Piliha, Sobeki, 25 Rehumu, Hasabina, Maseya, 26 Ahiya, Hanani, Anani, 27 Maruki, Halimu naBana.

28 Vantu wokuhupa ko ava va yi kwatesere ko kwa hamenene mo vapristeli, Varevhi, vanomeni wopomavero, vadimbi, varugani wokontembeli* ntani nanavenye ava va ligusire ko konomuhoko yipo va kwame Veta zaKarunga gousili kumwe novakadi vawo novana vawo nanavenye ava va kere nonondunge ntani ava va kwete egano mugano ogu va tulire po. 29 Awo kwa lipakerere kumwe novakwawo ava va divikwire makura tava tumbwidire asi ngava kwama Veta zaKarunga gousili, ezi va va pa kupitira mwaMosesa ntani ngava limburukwa mavyukiso nonompangera daKarunga gwetu Jehova. Awo kwa hundililire hena Karunga a va tengeke nsene va dira kulimburukwa. 30 Awo kwa tulire po mugano asi: “Ose kapi ngatu gava vana vetu wovakadi va va kware vana vawo wovagara wokonomuhoko dapeke ntani kapi ngatu gusa vana vawo wovakadi va va kware vana vetu wovagara.

31 Nsene vantu wokonomuhoko dapeke ngava reta yipako nonombuto dokulisiga-siga va ya tu randese mezuva lyEsabata, ose kapi ngatu yi randa mezuva lyEsabata ndi mezuva lyapeke lyokupongoka. Ose kapi hena ngatu lima mapya getu momvhura zauntambali ntani ngatu gusira po vakwetu makongo gawo.

32 Tatu gana hena asi nkenye ogu nga gava sisiliveli sonograma ne* nkenye mvhura ngava zi ruganese konzugo* zaKarunga gwetu, 33 ntani mokugwana yininke eyi: nomboroto delikido, nonzambo dombuto dankenye ezuva, nonzambo deswakerero demezuva lyEsabata nemezuva lyosipito sokwedi kokupe noyipito yapeke, nonzambo dokupongoka, nonzambo dokugusisa po nonzo doVaisraeli ntani noyirugana nayinye yokonzugo zaKarunga gwetu.

34 Ose ngatu rugana hena fungu-fungu, yipo tu dive siruwo esi ngava reta yitare nkenye mvhura Varevhi, vapristeli ntani novantu kuliza nomazimo gawo. Yitare oyo ngava yi ruganesa kosizambero saKarunga gwetu Jehova ngwendi moomu va yi tjanga moVeta. 35 Ose ngatu reta hena nkenye mvhura konzugo zaJehova, muzangu gwetu gokuhova gomomapya getu, enyango lyokulisiga-siga eli ngatu hova kuzangura, 36 kukwatera mo vana vetu wovagara wonombeli ntani nombeli doyimuna yetu, ngwendi moomu va yi tjanga moVeta. Ose ngatu yi reta kovapristeli ava ava rugana konzugo zaKarunga gwetu. 37 Ose ngatu gava hena usura womuzangu gwetu gokuhova, yigava yetu, enyango lyokoyitji yokulisiga-siga, vhinyu zompe ntani nomagadi kovapristeli ava ava rugana kononzugopungwiro* dokonzugo zaKarunga gwetu, kukwatera mo yiumurongo yoyininke nayinye eyi ngatu zangura mosirongo setu eyi ngatu gava koVarevhi, yeeyi Varevhi yiwo ava pongaike yiumurongo moyitata yetu nayinye eyi ya kara nomapya.

38 Ano mupristeli gomoruvharo rwaArona, nga kara kumwe noVarevhi apa ngava pongaika yiumurongo ntani poyininke eyi ngava pongaika Varevhi, awo ngava gusa po yiumurongo va yi tware monzugopungwiro* zokonzugo zaKarunga gwetu. 39 Yeeyi Vaisraeli noVarevhi yiwo ngava twara mbuto, vhinyu zompe ntani nomagadi mononzugopungwiro* omu mwa kara yiruganeso yokontembeli ntani omu ava kara vapristeli novanomeni wopomavero ntani novadimbi. Ose kapi ngatu sigilira nzugo zaKarunga gwetu.”

11 Marenga goVaisraeli kwa tungire moJerusarema, nye vantu wokuhupa ko kwa rugene fungu-fungu va horowore mapata* aga naga tunga moJerusarema, sitata sokupongoka ano mapata gokuhupa ko kwa twikilire kutunga moyitata yapeke. 2 Vantu kwa pandadekere navenye ava va lizamberere va ka tunge moJerusarema.

3 Aga kuna kara masimbi gomoJuda aga ga tungire moJerusarema: (Vaisraeli wokuhupa ko novapristeli noVarevhi novarugani wokontembeli* ntani womoruvharo rovakareli vaSaromo kwa tungire moyitata yapeke yomoJuda, nkenye ogu kwa tungire pevega lyendi.

4 Vantu womorudi rwaJuda noru rwaMbenyameni nawo kwa tungire moJerusarema.) Womorudi rwaJuda kwa kere: Ataya munaUsiya mutekurwaSakaliya zaAmaliya zaSefatiya munaMaharareli gemezimo lyaPeresi 5 ntani naMaseya munaBaruku mutekurwaKolihose zaHasaya zaAdaya zaJoyalibu munaSakaliya gomoruvharo rwaSera. 6 Vagara navenye womoruvharo rwaPeresi ava va tungire moJerusarema kwa kere 468 ava va divire kurwa yita.

7 Womoruvharo rwaMbenyameni kwa kere: Saru munaMesuramu mutekurwaJowedi zaPedaya zaKoraya zaMaseya zaItiyeli munaJesaya 8 ntani Gabayi naSarayi. Sivaro sawo kwa kere 928; 9 kukwatera mo Jowera munaSikili ogu ga kere mupitisili gwawo ntani naJuda munaHasenuwa ogu nga mu vatere kupitisira mositata.

10 Vapristeli kwa kere: Jedaya munaJoyalibu, Jakini, 11 Seraya munaHilikiya mutekurwaMesuramu zaSadoko, zaMerayoto, zaAhitubu ogu nga pitisire konzugo* zaKarunga gousili 12 novakwawo ava ngava rugana kontembeli. Sivaro sawo kwa kere 822; ntani Adaya munaJerohamu mutekurwaPeraliya zaAmusi zaSakaliya zaPasihuru munaMalikiya 13 novakwawo ava va kere masimbi. Sivaro sawo kwa kere 242; ntani Amasisayi munaAsareli mutekurwaAhasayi zaMesiremoto munaImere 14 novakwawo ava va kere vakwayita wononkondo ntani wouradi. Sivaro sawo kwa kere 128; Sabudiyeli yige nga va pitisire ntani age kwa tundilire mepata eli lya divikwire.

15 Varevhi kwa kere: Semaya munaHasubu mutekurwaAsilikamu zaHasabiya munaBuni 16 ntani Sabetayi naJosabadi ava va kere masimbi goVarevhi. Awo ngava pitisire yirugana eyi ya dilire kulikwatakana nonzugo zaKarunga gousili; 17 kukwatera mo Mataniya munaMika mutekurwaSabudi zaAsafa, ogu nga pitisire vantu ava ngava dimbi ntani nga tongwenene apa ngava kanderere ntani Bakubukiya ogu nga mu vatere naAbuda munaSamuwa zaGarali munaJedutuni. 18 Varevhi navenye ava va kere mositata sokupongoka kwa kere 284.

19 Vanomeni wopomavero kwa kere: Akubu, Talimoni ntani novakwawo. Sivaro sawo kwa kere 172.

20 Vaisraeli wokuhupa ko novapristeli ntani noVarevhi kwa kere moyitata yapeke yomoJuda pomavango gawo. 21 Varugani wokontembeli* kwa tungire moOfeli, ano Siha naGisipa yiwo ngava pitisire varugani wokontembeli.*

22 Usi nga pitisire Varevhi moJerusarema. Age kwa kere munaBani mutekurwaHasabiya zaMataniya zaMika gomoruvharo rwaAsafa ogu nga dimbi ntani age nga pitisire vantu ava ngava rugana konzugo zaKarunga gousili. 23 Hompa kwa geve mpangera kovantu va gave kovadimbi yininke eyi va hepere nkenye ezuva. 24 Petahiya munaMesesabeli mutekurwaZera zaJuda nga pe hompa magano omu na kohonona po maudigu govantu.

25 Vajuda vamwe kwa tungire monomukunda edi da kere nomapya. Ado kuna kara: sitata saKiliyata-aruba nonodoropa edi da si kundurukida, Diboni nonodoropa edi da si kundurukida, Jekabuseli nonodoropa edi da si kundurukida, 26 moJesuwa, moMorada, moBete-pereti, 27 moHasara-suwali, moBere-seba nonodoropa edi da si kundurukida, 28 moSikiragi, moMekona nonodoropa edi da si kundurukida, 29 moEni-limoni, moSora, moJarumuti, 30 moSanowa, moAduramu nomonomukunda dayo, moRakisi nomapya gaso, moAseka nonodoropa edi da si kundurukida. Awo kwa tungire kutundilira koBere-seba dogoro moMuramba gwaHinomu.

31 Vantu womorudi rwaMbenyameni kwa tungire moGeba, moMikimasi, moAi, moBeteli nonodoropa edi da si kundurukida, 32 moAnatoti, moNobo, moAnaniya, 33 moHasoro, moRama, moGitayimu, 34 moHadidi, moSeboyimu, moNebarati, 35 moRodi, moOno ntani momuramba govahongi. 36 Ano Varevhi vamwe ava va tungire momukunda gorudi rwaJuda, kwa va ninkire va ka tunge momukunda gorudi rwaMbenyameni.

12 Vapristeli noVarevhi ava va ka tengwire kounkwate kumwe naSerubabeli munaSeyalitiyeli ntani naJesuwa kuna kara: Seraya, Jeremiya, Esira, 2 Amaliya, Maruki, Hatusi, 3 Sekaniya, Rehumu, Meremoto, 4 Ido, Ginetoyi, Abiya, 5 Miyamini, Madiya, Biliga, 6 Semaya, Joyalibu, Jedaya, 7 Saru, Amoko, Hilikiya naJedaya. Vagara ava yiwo ngava pitisire vapristeli ntani novakwawo posiruwo saJesuwa.

8 Varevhi kwa kere: Jesuwa, Binuyi, Kadimiyeli, Serebiya, Juda ntani Mataniya ogu nga tongwenene kumwe novakwawo nonsumo dokupandura Karunga. 9 Ano Varevhi vakwawo Bakubukiya naUni kwa sikeme komeho zawo va nomene.* 10 Jesuwa kwa retere Joyakimu, Joyakimu kwa retere Eliyasibu, Eliyasibu kwa retere Joyada. 11 Joyada kwa retere Jonatana, Jonatana kwa retere Jaduya.

12 Vagara ava yiwo va kere vapristeli ntani masimbi gomomazimo gawo posiruwo saJoyakimu: Meraya gemezimo lyaSeraya; Hananiya gemezimo lyaJeremiya; 13 Mesuramu gemezimo lyaEsira; Jehohanani gemezimo lyaAmaliya; 14 Jonatana gemezimo lyaMaruki; Josefa gemezimo lyaSebaniya; 15 Adina gemezimo lyaHalimu; Helikayi gemezimo lyaMerayoto; 16 Sakaliya gemezimo lyaIdo; Mesuramu gemezimo lyaGinetoni; 17 Sikili gemezimo lyaAbiya; . . .* gemezimo lyaMiniyamini; Pilitayi gemezimo lyaMowadiya; 18 Samuwa gemezimo lyaBiliga; Jehonatani gemezimo lyaSemaya; 19 Matenayi gemezimo lyaJoyalibu; Usi gemezimo lyaJedaya; 20 Karayi gemezimo lyaSarayi; Ebere gemezimo lyaAmoko; 21 Hasabiya gemezimo lyaHilikiya; Netaneli gemezimo lyaJedaya.

22 Madina gomasimbi goVarevhi posiruwo saEliyasibu naJoyada naJohanani naJaduya kwa ga tjenge, kukwatera mo madina govapristeli ava va kere ko dogoro posiruwo sepangero lyaDaliusi hompa gwaPeresiya.

23 Madina gomasimbi gomazimo goVarevhi ava va kere ko dogoro posiruwo saJohanani munaEliyasibu kwa ga tjenge mobuke zehistoli. 24 Masimbi goVarevhi kwa kere Hasabiya, Serebiya ntani Jesuwa munaKadimiyeli. Ano Varevhi vakwawo ava va kere vanomeni kwa sikeme monombunga ntani kwa livyukire kumwe nawo, yipo va hamberere nokupandura Karunga kuliza nomavyukiso aga ga geve Ndafita mukareli gwaKarunga gousili. 25 Ano Mataniya, Bakubukiya, Obadja, Mesuramu, Talimoni ntani naAkubu kwa sikeme pomavero va nomene nonzugopungwiro edi da kere pepi nomavero gokontembeli. 26 Awo ngava rugana posiruwo saJoyakimu munaJesuwa mutekurwaJehosadaka ntani posiruwo sanguuru Nehemiya nomupristeli Esira, ogu ga kere mutjanguruli gomatjangwa.*

27 Apa va tungikire makuma gaJerusarema, awo kwa ka paparere Varevhi komavango nagenye oku va kere, yipo va wize koJerusarema va ya dane sipito ntani va dimbe va pandure Karunga. Awo kwa sikire nonkonkweso, yiumba ntani noyisikiso yimwe. 28 Ano vadimbi kwa pongere kumwe. Awo kwa tundililire momukunda gwaJorodana, nomukunda edi da kundurukida Jerusarema, nomukunda doVanetofa, 29 koBete-giligali, nomukunda daGeba ntani naAsimavete, yeeyi vadimbi kwa tungire monomukunda edi da kundurukidire Jerusarema. 30 Vapristeli noVarevhi kwa likuhwire vene ntani awo kwa kuhwire vantu, marungavero ntani nekuma.

31 Makura yipo na twere marenga goVajuda keguru lyekuma ntani ame kwa horowere nombunga mbali dovantu yipo va dimbe nonsumo dorupandu, ano awo kwa va kweme monyima vantu. Mbunga zimwe kwa gendere korulyo rwekuma zi vyuke kErungavero lyoYihando.* 32 Ano Hosaya noharufa zomarenga goVajuda kwa va kweme monyima 33 kumwe naAsaliya, Esira, Mesuramu, 34 Juda, Mbenyameni, Semaya ntani Jeremiya. 35 Awo kwa zire kumwe novapristeli ava va simbire nombendo. Gumwe gwawo kwa kere Sakaliya munaJonatana mutekurwaSemaya zaMataniya zaMikaya zaSakura munaAsafa 36 ntani vakwawo kwa kere: Semaya, Asareli, Mirarayi, Girarayi, Mayi, Netaneli, Juda naHanani. Awo kwa simbire yisikiso yaNdafita mukareli gwaKarunga gousili, ano Esira mutjanguruli gomatjangwa kwa pitire komeho zawo. 37 Apa va ka sikire kErungavero lyoRunone tava twikire kugenda ntani tava rondo ekuma va pitakane yilyatero eyi ya vyuka koSitata saNdafita. Awo kwa pitakanene nzugo zaNdafita makura tava vyuka kErungavero lyoMema koUpumezuva.

38 Mbunga zauvali zovantu ava va dimbire kwa vyukire koruha rwapeke ntani ame kwa va kweme kumwe noharufa zovantu. Ose kwa gendere kekuma, tatu pitakana Ruhungu roMasuga gokukangera, tatu zi kEkuma lyEnene 39 dogoro kErungavero lyaEfurayimi, kErungavero lyoSitata sanare, kErungavero lyoNomfi, koRuhungu rwaHananeli, koRuhungu rwaMeya ntani dogoro kErungavero lyoNonzwi. Ano apa twa ka sikire kErungavero lyoVanomeni, tatu sikama.

40 Konyima, nombunga mbali dovantu ava va dimbire tadi ka sika konzugo zaKarunga gousili, ano name novapitisili kwa kere nawo 41 kumwe nomupristeli Eliyakimu, Maseya, Miniyamini, Mikaya, Eliyoyenayi, Sakaliya, Hananiya nonombendo detu, 42 Maseya, Semaya, Eliyasara, Usi, Jehohanani, Malikiya, Eramu ntani Esere. Ano vadimbi kwa dimbire kuziguruka mepitisiro lyaIsirahiya.

43 Ezuva olyo, vantu kwa geve nonzambo dononzi ntani kwa hefe, yeeyi Karunga gousili yige ga va ninkisire va hafe unene. Vakadi novanona nawo kwa hefe dogoro ruhafo romoJerusarema tava ru zuvhire vantu wokoure.

44 Vagara vamwe kwa va horowere ezuva olyo, va pakere mbili nonzugopungwiro omu mwa kere yigava, muzangu gokuhova ntani noyiumurongo eyi ngava gava vantu. Awo ngava pongaikire mo yininke eyi va va pere, eyi ya tundire momapya aga ga kundurukidire yitata. Yininke oyo kwa yi geve kovapristeli noVarevhi ngwendi moomu va yi va pangerere moVeta. Vajuda kwa rugene yininke oyo morwa awo kwa hefe pokumona vapristeli noVarevhi kuna kurugana kontembeli. 45 Ano vapristeli noVarevhi tava tameke kuruganena Karunga gwawo ntani nokusikisa mo situmbukira sawo sokukuhura yininke. Vadimbi ntani novanomeni kwa rugene yokulifana kuliza nomavyukiso gaNdafita namunendi Saromo. 46 Posiruwo saNdafita naAsafa pwa kere vantu ava ngava pitisire vadimbi ntani ava ngava tota po nonsumo dokupandura Karunga. 47 Ano posiruwo saSerubabeli ntani saNehemiya, Vaisraeli navenye kwa geve yigava kovadimbi ntani novanomeni kuliza noyininke eyi va hepere nkenye ezuva. Awo kwa geve hena yigava yimwe koVarevhi, ano Varevhi kwa gusire po yimwe va yi gave kovantu womoruvharo rwaArona.

13 Ezuva olyo, buke zaMosesa kwa zi reserere vantu ntani amo kwa tjenge mo asi kwato Muamoni ndi Mumowaba ogu nga kara gumwe govantu vaKarunga gousili, 2 yeeyi awo kapi va pere Vaisraeli mboroto nomema. Awo kwa futire Baramu a finge Vaisraeli, nye nampili ngoso, Karunga gwetu kwa ninkire Baramu a va tungike mevango lyokuvafinga. 3 Apa va zuvhire Veta ozo, tava ligaunuka noVaisraeli navenye ava va vhonga nonomuhoko dapeke.

4 Komeho yi horoke yininke eyi, mupristeli Eliyasibu ekoro lyaTobiya yige nga pakere mbili nonzugopungwiro* dokonzugo* zaKarunga gwetu. 5 Eliyasibu kwa pere Tobiya nzugopungwiro* zonene omu ngava pungwire nare nonzambo donombuto, manganganga gokututumikidisa, yiruganeso yomontembeli ntani yiumurongo yombuto, yovhinyu zompe ntani nomagadi. Yininke oyo ngava yi gava koVarevhi, kovadimbi, kovanomeni wopomavero ntani ngava pungwire mo hena yigava eyi ngava gava vantu kovapristeli.

6 Apa ya horokere yininke eyi, ame kapi na kere moJerusarema. Ame kwa zire kwaAretaserekesesi hompa gwaBabironi momvhura 32 zepangero lyendi, ano konyima yipo na pulire hompa a pulisire nge ni tengure koJerusarema. 7 Apa na ka sikire koJerusarema, tani ka gwana sininke sosidona esi ga rugene Eliyasibu. Age kwa geve kwaTobiya nzugopungwiro ezi za kere meharango lyokonzugo zaKarunga gousili. 8 Eyi kwa handukisire nge unene, makura tani zuguma yininke yaTobiya eyi ya kere monzugopungwiro.* 9 Konyima tani tantere vantu va kuhure nonzugopungwiro,* makura tani tengwidire mo yiruganeso yomonzugo zaKarunga gousili kumwe nononzambo donombuto ntani nomanganganga gokututumikidisa.

10 Ame kwa dimbwilire hena asi Varevhi kapi ngava va pe yininke eyi ya va tumbukira, ano eyi kwa ninkisire Varevhi novadimbi ava ngava rugana kontembeli, va ze va ka lime momapya gawo. 11 Makura tani handukire vapangeli, tani va pura asi: “Morwasinke mwa sigilira nzugo zaKarunga gousili?” Makura tani va tantere va* ponge ntani tani va pe yirugana yawo yanare. 12 Ano Vajuda navenye tava reta yiumurongo. Awo kwa retere nombuto, vhinyu zompe ntani nomagadi kononzugopungwiro. 13 Makura tani horowora mupristeli Seremiya naSadoko mutjanguruli gomatjangwa* naPedaya goMurevhi, yipo va pakere mbili nonzugopungwiro ntani tani horowora hena Hanani munaSakura mutekurwaMataniya a va vatere, yeeyi vagara navenye ava kwa va huguvarere. Awo kwa va pere situmbukira sokugavera kovakwawo yininke eyi ya va tumbukira.

14 Makura tani kanderere asi: “Karunga gwange, diworoka nge kweyi na rugana ntani kapisi ngo divare eharo lyanarunye eli na likida konzugo zoge ntani nava ava zi pakere mbili.”

15 Posiruwo oso, ame kwa mwene Vajuda kuna kurugana vhinyu mezuva lyEsabata moyikameno yawo yovhinyu ntani awo kwa pongaikire nombuto nokudirondeka poyindongi. Awo kwa retere hena moJerusarema vhinyu, mandjembere noyininke yapeke mezuva lyEsabata. Makura tani va rondora va hageke kurandesa yininke mezuva lyEsabata.* 16 Ano vantu wokoTirusi ava va tungire moJerusarema, ngava randesa mezuva lyEsataba nomfi noyininke yimwe koVajuda ava va tungire moJerusarema. 17 Makura tani handukire vapitisili woVajuda ntani tani va tantere asi: “Morwasinke muna kuruganena yininke yoyidona ngesi nokudira kufumadeka ezuva lyEsabata? 18 Ozinyakurweni kwa rugene yokulifana ano Karunga gwetu yiyo ga tu retera udigu ou tuna kuligwanekera nawo ngesi, nye one ngesi kuna kuninkisa Karunga a handukire unene Vaisraeli pokudira kufumadeka ezuva lyEsabata.”

19 Makura tani pangere vantu va pate marungavero gaJerusarema komeho li toke ezuva ntani komeho li tameke ezuva lyEsabata. Kwa va pangerere hena va dire kugapaturura dogoro ngali pite ezuva lyEsabata. Ame kwa tulire hena vakareli vange vamwe pomarungavero, yipo va dire kupulisira vantu va rete yininke mositata mezuva lyEsabata. 20 Yipo nye, vantu ava ngava randesa yininke yokulisiga-siga kwa rere ponze zositata saJerusarema sikando simwe ndi yivali. 21 Makura yipo na va pulire eyi va rarerere kekuma ntani tani va rondora va dire kuyirugana hena ndi ngano ngani va tjida. Kutunda opo, awo kapi ngava wiza hena mezuva lyEsabata.

22 Ame kwa tanterere hena Varevhi va likuhure nkenye ezuva ntani va nomene marungavero, yipo vantu va twikire kupongora ezuva lyEsabata. Makura tani kanderere asi: “Karunga gwange, diworoka eyi na rugana ntani fira nge nkenda, yeeyi ove kwa kara neharo lyanarunye.”

23 Posiruwo oso, ame kwa mwene hena asi Vajuda kwa kwere* vakadi woVaasidodo, woVaamoni ntani woVamowaba. 24 Harufa zovana vawo ngava uyunga eraka lyoVaasidodo, ano vana vawo wokuhupa ko ngava uyunga maraka govantu wokonomuhoko dapeke. Nye awo kapi va divire kuuyunga eraka lyoVajuda. 25 Makura tani va handukire ntani tani va fingi. Ame kwa toonene hena vagara owo vamwe nokuzupura nohuki dawo ntani kwa va tanterere va gane kwaKarunga. Ame kwa va tanterere asi: “Kapisi ngomu gave vana veni wovakadi va va kware vana vawo wovagara ntani none novana veni wovagara kapisi ngomu kware vana vawo wovakadi. 26 Saromo hompa gwaIsraeli kwa zonene, morwa age kwa kwere vakadi wovanayirongo. Nampili ngomu ga dilire kulifana novahompa wokonomuhoko dapeke ntani Karunga kwa mu here nokumuninka a kare hompa goVaisraeli navenye, nye vakadi wovanayirongo kwa mu ninkisire a zone. 27 Morwasinke nye mwa ruganena udona wokuhura apa nokuzona kwaKarunga gwetu pokukwara vakadi wovanayirongo?”

28 Gumwe govana wovagara vaJoyada munaEliyasibu, ogu ga kere mupristeli gomunene kwa kwere munaSanibarati gomoBete-horoni. Makura ame tani mu tjida nokumutantera asi kapisi ngani mu mone hena.

29 Makura tani kanderere hena asi: “Karunga gwange, kapisi ngo divare eyi va rugana, yeeyi awo kwa swaukisa vapristeli ntani kapi va sikisa mo egwanekero* lyovapristeli noVarevhi.”

30 Ame kwa va kuhura pokuvaninka va ligaunuke novanayirongo ava va va pukisire ntani ame kwa tanterere vapristeli noVarevhi va sikise mo yirugana eyi va va pere. 31 Ame kwa tanterere hena vantu va tjave yitare nkenye apa ntani va gave muzangu gwawo gokuhova.

Makura tani kanderere asi: “Karunga gwange ngano ngo diworoke nge narunye.”