ESITERA

1 Ahasurusi* ogu nga pangere nomukunda 127 kutundilira koIndia dogoro koEtiyopiya,* 2 nga pangere kutundilira moSusa* omu za kere mbara zendi. 3 Momvhura zautatu zepangero lyendi, age kwa wapaikilire sipito marenga gendi ntani novakareli vendi. Vakwayita vaPeresiya naMediya novanamakuto ntani novapangeli womonomukunda nawo kwa wizire kosipito, 4 ano age kwa va likidire ungawo womosirongo sendi nononkondo dendi dononene ntani nomu ga fumanene. Age kwa yi rugene eyi mazuva 180. 5 Apa ga pwire mazuva ogo, hompa kwa rugene hena sipito somazuva ntambali moSusa* omu za kere mbara zendi. Age kwa zigidire vantu navenye, yi kare asi va divikwa ndi hawe. Sipito oso kwa karerere meharango eli lya kere mosikunino somombara zahompa. 6 Meharango olyo kwa tulire mo makehe gomazera ntani gosineguru aga va menge nonongodi domakehe gomazera nowanda wopurupuli. Ano nongodi odo kwa di menge konolinga dosisiliveli edi va tulire konongundi domamanya gomawa. Meharango olyo kwa tulire mo yipundi yoyiwa yongorodo nosiliveli eyi va tulire porugorongwa oru va rugana nomamanya gomageha nomamanya gomawa nonombamba ntani nomamanya gomawa gomasovagani.

7 Vantu kwa va pere vhinyu mononkinda dongorodo ntani nonkinda nadinye kwa lisigire omu da fene. Ano vhinyu zomombara zahompa kwa kere nzi unene, yeeyi hompa kwa kere nemona lyenzi. 8 Hompa kwa geve mpangera yipo va dire kusininika* vantu va nwe. Age kwa tanterere marenga gendi ga rugane nkenye eyi vana hara.

9 Vasiti, mukadahompa Ahasurusi nage kwa ruganenene sipito vakadi womombara zahompa.

10 Mezuva lyauntambali, hompa kwa hefe unene morwa vhinyu ezi ga nwine, makura ta zigida marenga gendi ntambali aga nga ga mu ruganene. Ago kuna kara: Mehumani, Bisita, Harubona, Bigita, Abagata, Setare naKarakasi. 11 Ahasurusi kwa va tanterere va ka zigide mukadendi Vasiti age kuna dwara nkata zosiuhompa,* yipo a ya likide vantu nomarenga uwa wendi, yeeyi age muwa unene ga kere. 12 Nye Vasiti kwa nyokere yikando nayinye eyi ga mu zigidire hompa kupitira momarenga gendi. Makura hompa ta handuka unene ntani ta guwu unene.

13 Makura hompa ta uyungisa vagavinduge vendi ava va divire nawa nongendeseso (yeeyi nkenye apa nga ligwanekere hompa noudigu age nga pura magano kovantu ava va divire veta nomaudigu gopaveta. 14 Marenga aga nga ga mu pe nkenye apa magano kuna kara: Karesana, Setare, Adimata, Taresisi, Meresi, Maresana naMemukani. Vapangeli ava vaMediya naPeresiya kwa kere ntambali. Awo kwa kere noyipundi yoyinene mosirongo ntani ngava zi kwahompa nkenye apa). 15 Hompa ta va pura asi: “Mokumona asi mukadange Vasiti kapi ana limburukwa eyi nina mu tantere ame hompa Ahasurusi kupitira momarenga, yisinke natu mu rugana kuliza noveta?”

16 Makura Memukani ta tantere hompa Ahasurusi nomarenga asi: “Vasiti kapisi hompa gelike ana zonene, nye age kuna zonene marenga nagenye novantu ava va tunga monomukunda edi a pangere hompa Ahasurusi. 17 Yeeyi eyi ana rugana ngava yi zuvha vakadi navenye. Awo kapi ngava fumadeka vagara vawo ntani ngava tanta asi: ‘Hompa Ahasurusi apa ga zigidire mukadendi Vasiti a ze kwendi, amesi ga nyokere.’ 18 Vakadi womarenga gaPeresiya naMediya ava vana diva eyi ana rugana Vasiti, tava ka yi tantera vagara vawo naina, ano eyi ngayi reta ehandu lyenene. 19 Yipo nye, nsene asi ove hompa ono yi kwatesa ko, ninka o gave mpangera ezi ngava dira kurundurura ntani ninka ngava zi tjange moveta zoVaperesiya noVamediya. Ngo divise moveta ozo asi Vasiti kapisi nga wize hena kosipara sahompa Ahasurusi ntani hompa nga gava sipundi sendi komukadi ogu ga mu pitakana. 20 Ano apa vantu woge navenye ngava zuvha mpangera ozo, vakadi navenye ngava fumadeka vagara vawo, yi kare asi va divikwa ndi hawe.”

21 Hompa nomarenga kwa haferere egano olyo, makura hompa ta rugana eyi ga tente Memukani. 22 Makura ta tumu nombilive monomukunda nadinye edi nga pangere. Nkenye momukunda kwa tuminine mo mbilive zemeraka lyawo nontjangeso zawo. Age kwa pangerere vagara va pangere mapata gawo ntani va uyunge eraka lyovantu vendi.

2 Konyima zoyininke eyi, ehandu lyahompa Ahasurusi tali litura, makura ta diworoka eyi ga rugene Vasiti ntani neyi va tokwere kumurugana. 2 Makura vakareli vahompa tava tanta asi: “Ninkeni tu paparere hompa vakadona wovawa, ava va dira kuligwanekera rumwe panyama novagara. 3 Ano hompa a horowore vagara monomukunda nadinye edi a pangere, va ka rete vakadona navenye wovawa koSusa* omu za kara mbara, va ya kare konzugo zovakadi. Awo ngava va gave kwaHegayi, erenga lyahompa ogu a pakere mbili vakadi, ano age ngava pe yininke yokuliwapekesa.* 4 Ano mukadona ogu nga za hompa komutjima yige nga kwara hompa, a pinganene pevega lyaVasiti.” Egano eli kwa li haferere hompa, makura hompa ta yi rugana.

5 Mositata saSusa* omu za kere mbara, mwa kere mugara goMujuda gedina Moredekayi munaJaire mutekurwaSimeyi zaKisi gemezimo lyaMbenyameni. 6 Moredekayi naJekoniya* hompa gorudi rwaJuda ntani novantu vamwe kwa va gusire moJerusarema Nebukadenesara hompa gwaBabironi, a va tware kounkwate. 7 Moredekayi nga pakere mbili Hadasa* ndi Esitera, yeeyi vakondi vendi kwa dogorokere. Esitera kwa kere mumbyendigona, yeeyi vaguhya vawo kwa kere vantu namumbyendi. Age kwa kere mukadona gomuwa mosipa ntani kwa kere norutu roruwa. Apa va dogorokere vakondi vendi, Moredekayi ta mu gusa a mu rere ngwendi munendi. 8 Apa va divisire vantu eyi ga penge hompa ntani apa va twere vakadona wovanzi koSusa oku za kere mbara, a ka va pakere mbili Hegayi, Esitera nage kwa mu twere kombara zahompa a ka mu pakere mbili Hegayi.

9 Hegayi kwa haferere* Esitera makura ta mu pe yininke yokuliwapekesa ntani nonondya donongwa. Age kwa pere hena Esitera vakadona ntambali womombara zahompa va kare vakareli vendi. Makura ta mu twara kumwe novakareli vendi konkondwa zongwa po zomonzugo zovakadi. 10 Esitera kapi ga tanterere vantu kuhamena rudi rwawo ndi ekoro lyendi, yeeyi Moredekayi kwa mu tanterere asi kapisi a yi rugane. 11 Moredekayi nga zi nkenye ezuva a ka gendagure keharango lyokonzugo zovakadi, yipo a ka dive omu ana karere Esitera neyi yina kumuhorokera.

12 Konyima zokuvapakera mbili makwedi 12, nkenye mukadona kwa zire kwahompa Ahasurusi. Ngesi yimo va va wapaikire vakadona komeho va ka moneke kwahompa: awo kwa va kwitire magadi gomira makwedi ntazimwe ano makwedi ntazimwe gokuhupa ko, kwa va kwitire magadi gobalisemu nomagadi gamwe gokuliwapekesa. 13 Ano konyima zoyininke oyo, awo kwa liwapaikilire kuza kwahompa ntani nkenye eyi va hundilire komeho va tunde monzugo zovakadi va ze konzugo zahompa, kwa yi va pere. 14 Nkenye mukadona nga zi kwahompa ngurova, ano ngurangura ta tengura konzugo zauvali zovakadi. Age kapi nga tengura kwahompa ntudi hompa kuna mu hafere ntani kuna mu zigida kedina. Nzugo zauvali zovakadi nga zi pakere mbili Sasigasi, ogu ga kere erenga lyahompa ntani nga pakere mbili yihora yahompa.

15 Konyima, siruwo saEsitera sokuza kwahompa tasi siki mo. Esitera kwa kere munaAbihayili, oguhwegona vaMoredekayi. Moredekayi kwa rerere Esitera ngwendi munendi. Komeho a ze Esitera kwahompa, age kwa hundilire tupu yininke eyi ga mu tanterere Hegayi. (Vantu navenye ava va mwene Esitera, kwa mu haferere.) 16 Esitera kwa mu twere kwahompa mokwedi komurongo kwaTebete* momvhura zauntambali zepangero lyahompa Ahasurusi. 17 Hompa kwa here unene Esitera kupitakana vakadona vakwawo. Ano age kwa hafesere hompa kupitakana vakwawo, makura hompa ta mu dwareke nkata zosiuhompa* komutwe ntani ta mu kwara yipo a pinganene po Vasiti. 18 Hompa kwa ruganenene marenga novakareli vendi sipito sosinene. Sipito esi kwa kere saEsitera. Makura ta divisa asi nga mangurura* vantu monomukunda nadinye ntani kwa twikilire kugava mauhwi kovantu, morwa age kwa kere nemona lyenzi.

19 Apa va pongaikire vakadona sikando sauvali, Moredekayi kwa hingilire perungavero lyombara zahompa. 20 Esitera kapi ga tanterere vantu kuhamena ekoro lyendi ntani rudi rwawo ngwendi moomu ga mu tanterere Moredekayi. Esitera nga twikire kulimburukwa eyi nga mu tantere Moredekayi ngwendi moomu nga limburukwa apa ga kere membo lyendi.

21 Posiruwo esi nga hingire Moredekayi perungavero lyombara zahompa, Bigitana naTeresi ava va kere marenga gahompa ntani ava ngava rugana pomarungavero, kwa handukire unene ntani kwa here kudipaga hompa Ahasurusi. 22 Nye Moredekayi ta yi zuvhu makura ta ka yi tantera usimbu Esitera, ano Esitera ta ka tantera hompa mbudi zaMoredekayi. 23 Makura tava yi konakona ntani tava gwana asi ayo kwa kere usili, ano vagara owo tava va mangerere kositji. Yininke nayinye eyi kwa yi tjenge komeho zahompa mobuke zehistoli.

3 Konyima zoyininke eyi, hompa Ahasurusi ta pe Hamani munaHamedata gemezimo lyaAgaga sipundi sosinene kupitakana marenga makwawo. 2 Ano vakareli navenye vahompa ava va kere perungavero lyombara zahompa ngava tu nongoro nokunyongamena Hamani, yeeyi eyi yiyo ga va pangerere hompa va rugane. Nye Moredekayi kapi ga twililire nongoro Hamani ndi asi a mu nyongamene. 3 Makura vakareli vahompa ava va kere perungavero lyombara zahompa, tava pura Moredekayi asi: “Morwasinke ono kudilira kulimburukwa kompangera zahompa?” 4 Awo ngava mu sininike nkenye ezuva, nye age kapi ga va purakenene ntani age kwa va tanterere asi age Mujuda. Makura tava yi tantere Hamani yipo va tare nsene asi eyi ga rugene Moredekayi kapi ya kere epuko.

5 Apa ga mwene Hamani asi Moredekayi kapi ana kumutwira nongoro a mu nyongamene, makura ta handuka unene. 6 Nye age kapi ga here kudipaga Moredekayi gelike, morwa ga zuvhire kuhamena rudi rwawo. Yipo nye, Hamani kwa tokwere kudipaga Vajuda navenye ava va kere mosirongo esi nga pangere hompa Ahasurusi.

7 Mokwedi kokuhova kwaNisani,* momvhura 12 zepangero lyaAhasurusi, tava rugana fungu-fungu* komeho zaHamani va dive ezuva nokwedi apa ngava yi rugana eyi. Makura tava horowora pafungu-fungu kwedi kwau-12 kwaAdara.* 8 Konyima Hamani ta tantere hompa Ahasurusi asi: “Koveli vantu ava va lihanena monomukunda edi o pangere. Awo kukwama noveta edi da lisiga nedi ava kwama vantu wopeke ntani kapi ava limburukwa noveta doge. Nsene o dira kurugana ko yuma, ayo ngayi kukundama momudona. 9 Yipo nye, nsene ove hompa no yi kwatesa ko, ninka va tjange mpangera yipo ngava va dipage. Ame ngani gava komarenga yisiliveli yonokilograma 342 000,* yipo ngava yi ture mosikesa sahompa.”*

10 Makura hompa ta gusa linga* ezi za kere konyara zendi, ta zi gava kwaHamani munaHamedata, gemezimo lyaAgaga, ogu ga nyengere Vajuda. 11 Hompa ta tantere Hamani asi: “Tani gava siliveli novantu owo momawoko goge, o va rugane moomu ono hara.” 12 Makura tava zigida vahamutjanga vahompa momazuva 13 gokwedi kokuhova. Awo kwa tjenge mbudi ezi ga va pangerere Hamani zi ze komarenga novanguuru womonomukunda ntani novantu ava ngava pitisire. Nkenye momukunda kwa tumine mo mbilive zemeraka lyawo nontjangeso zawo. Nombilive odo kwa di tjenge medina lyahompa Ahasurusi nokutura ko sidiviso solinga zendi.

13 Nombilive odo kwa di pere vantu va di tware monomukunda nadinye edi nga pangere hompa ntani amo kwa tjenge mo mpangera va dipage Vajuda navenye mezuva limwe, kukwatera mo vanona, vakadi ntani vakondi. Awo va hepere kuyirugana momazuva 13 gokwedi kwau-12 kwaAdara ntani kwa va pangerere va va hakane emona lyawo. 14 Mbudi ezi va tjenge monombilive kwa zi ninkire zi kare veta monomukunda nadinye ntani kwa zi divisire kovantu navenye, yipo va liwapaikire ezuva olyo. 15 Vantu ava va twere nombilive kwa zire usimbu ngwendi moomu ga va pangerere hompa. Veta ozo kwa tundililire moSusa* omu za kere mbara zahompa. Hompa naHamani kwa hingilire va nwe vhinyu, nye vantu womositata saSusa* kwa kere mepiyagano.

4 Apa ga yi zuvhire Morodekayi eyi ya horokere, ta taura yikoverero yendi makura ta dwara nonsako nokulitura enoto momutwe. Konyima ta zi pokatji kositata age kuna kulira unene. 2 Age kwa ka hagerere perungavero lyombara zahompa, yeeyi kapi ngava pulisire muntu ogu ana dwara nonsako a pite perungavero lyombara zahompa. 3 Vajuda navenye ava va kere monomukunda omu va divisire mpangera zahompa kwa guvire unene ntani kwa lilire. Sinzi sawo kwa zere nonsako, tava tura po enoto makura tava rara po. 4 Vakareli vaEsitera wovakadi nomarenga gendi tava zi kwendi va ka yi mu tantere. Apa ga yi zuvhire Esitera, ta guwu unene, makura ta tumine Moredekayi yikoverero a ka dware mevango lyokudwara nonsako, nye Moredekayi ta ka nyoka. 5 Makura Esitera ta zigida Hataka ogu ga kere erenga lyahompa. Hompa kwa mu horowere a vatere Esitera. Ano Esitera ta tantere Hataka a ka pure Moredekayi eyi yina kuhoroka.

6 Makura Hataka ta zi kwaMoredekayi, ogu ga kere pevango eli ngava pongere vantu mositata, pepi nerungavero lyombara zahompa. 7 Moredekayi ta mu tantere yininke nayinye eyi ya horokere ntani sivaro soyimaliwa eyi ga tumbwidilire Hamani kugava kosikesa sahompa, yipo va dipage Vajuda. 8 Moredekayi kwa pere hena Hataka mbilive zimwe omu va tjenge mpangera zokudipapa Vajuda, ezi za tundilire moSusa.* Age kwa mu tanterere a zi tware kwaEsitera noku ka zi mu fatwilira ntani a ka tantere Esitera a ze kwahompa a ka mu likwambere, yipo a fire nkenda vantu worudi rwawo.

9 Hataka makura ta tengura kwaEsitera, ta ka tantera Esitera eyi ga mu tanterere Moredekayi. 10 Ano Esitera ta tumu Hataka a ka tantere Moredekayi asi: 11 “Vakareli navenye vahompa novantu ava va kara monomukunda edi a pangere, va yi diva asi nsene mugara ndi mukadi a za meharango lyomombara lyomonda va hana kumuzigida, age va hepa kumudipaga kuliza noveta. Nye age ngava mu siga tupu a paruke nsene hompa a mu zerwira mburo zendi zongorodo. Ano ame nare ga hura kuzigida nge hompa, ngesi pana piti mazuva 30.”

12 Apa va mu tanterere Moredekayi eyi ga uyungire Esitera, 13 ta tumu mbudi kwa Esitera asi: “Wa ha gazara asi ove ngo paruka apa ngava dipaga Vajuda navenye, morwa yeeyi wa kara mombara zahompa. 14 Nsene o mwena posiruwo esi, Vajuda ngava va popera monkedi zapeke, ano nove nepata lyoguho ngava mu dipaga. Nayene nampo ove kwa ku horowora o kware hompa, yipo o popere vantu woge posiruwo sokufana ngwendi sesi.”

15 Makura Esitera ta limburura Moredekayi asi: 16 “Zende o ka tantere Vajuda navenye womoSusa* va ponge ntani va dilire, yipo ngani dire kuligwanekera noudigu. Kapisi ngomu lye ndi mu nwe yuma ure womazuva gatatu, masiku nomutenya. Name ngani dilira kumwe novakareli vange wovakadi, ano konyima ngani za kwahompa nampili ngomu va dira kuyipulisira moveta. Nsene ngava ka dipaga nge nawa tupu.” 17 Makura Moredekayi ta zi, ta ka rugana eyi ga mu tanterere Esitera.

5 Mezuva lyautatu, Esitera ta dwara yikoverero yendi yosiuhompa, ta zi ta ka sikama meharango lyomombara lyomonda. Age kwa pirukilire kombara zahompa, ano hompa kwa hingilire posipundi sendi souhompa mombara zendi ntani kwa pirukilire kevero. 2 Hompa kwa hefe apa ga mwene mukadendi Esitera kuna sikama meharango, makura ta mu zerwire mburo zendi zongorodo ezi za kere mokuwoko kwendi. Esitera makura ta zi kwahompa, ta ka kwata komutwe gomburo.

3 Makura hompa ta pura Esitera asi: “Udigu musinke ono kara nawo mukadange? Yisinke ono hara ni ku ruganene? Ame kuvhura ni ku pe nampili harufa zosirongo sange!” 4 Esitera ta mu limburura asi: “Nsene asi ove hompa no yi kwatesa ko, nina hara kukuzigida kumwe naHamani o wize kosipito esi nina kuwapaikire naina.” 5 Makura hompa ta tantere vakareli vendi asi: “Ka tantereni Hamani a wize usimbu morwa Esitera ana tu zigida.” Konyima, hompa ta zi kumwe naHamani kosipito esi ga wapaikire Esitera.

6 Konyima zapa va nwine vhinyu, hompa ta pura Esitera asi: “Tantera nge eyi ono hara, ame nani yi kuruganena. Ame kuvhura ni ku pe nampili harufa zosirongo sange!” 7 Makura Esitera ta limburura asi: “Eyi yiyo nina hara o ruganene nge: 8 Nsene asi ove hompa no yi kwatesa ko ntani no yi hafera, nina hara kukuzigida hena kumwe naHamani ngomu wize kosipito esi ngani mu wapaikira mungura, makura ntani ngani ya ku tantera eyi nina hara o ruganene nge.”

9 Ezuva olyo, Hamani kwa zire kembo age ana hafa unene. Nye apa ga sikire perungavero lyombara zahompa, ta dimburura asi Moredekayi kapi ana kusikama ntani kapi ana kumutjira, makura Hamani ta handuka unene. 10 Nye Hamani kwa lipangerere, ta zi kembo lyendi. Makura ta ninki va ka zigide vakwawo ntani namukadendi Seresi. 11 Age kwa likangangere komeho zawo. Age kwa va tanterere kuhamena ungawo wendi novana vendi wovanzi wovagara ntani nomu ga mu pere hompa sipundi sosinene kupitakana marenga novakareli vahompa.

12 Hamani ta va tantere hena asi: “Esitera mukadahompa nyamelike tupu ana zigida ni ze kumwe nahompa kosipito esi ana wapaike. Age kuna zigida nge hena kumwe nahompa ngatu ze kwendi mungura. 13 Nye nampili ngoso, ame kapi nina hafa morwa Moredekayi goMujuda ogu a hingire perungavero lyombara zahompa.” 14 Makura mukadendi Seresi novakwawo navenye tava mu tantere asi: “Siminina sitji sonometa 22,3* makura ngurangura ngo ka tantere hompa nga mangerere ko Moredekayi, ano konyima ntani nye ngomu za nahompa kosipito mu ka lihafese.” Hamani kwa haferere egano eli ano age ta zi, ta ka siminina sitji oso.

6 Masiku ogo, hompa kapi ga rere. Makura ta ninki va ka mu retere buke zehistoli noku zi mu resera. 2 Mobuke ozo kwa gwene mo asi Moredekayi yige ga tente marenga gavali gahompa aga nga ga rugana perungavero, aga ga here kudipaga hompa Ahasurusi. Marenga ogo kwa kere Bigitana naTeresi. 3 Makura hompa ta pura asi: “Yisinke va ruganena Moredekayi mokulikida rupandu kweyi ga rugana?” Vakareli vendi ta va mu limburura asi: “Kwato eyi va mu ruganena.”

4 Hamani kwa zire meharango lyoponze zombara zahompa, yipo a ka uyunge nahompa kuhamena Moredekayi. Age kwa here a mangerere Moredekayi kositji esi ga mu simininine. Makura hompa ta pura vakareli vendi asi: “Yilye ogu ana kara meharango?” 5 Vakareli vendi ta va mu limburura asi: “Hamani ana sikama meharango.” Ano hompa ta va tantere asi: “Ka mu ninkeni a wize.”

6 Apa ga ya sikire Hamani, hompa ta mu pura asi: “Yisinke natu ruganena mugara ogu nina hara kupandura?” Hamani ta litantere mwene asi: “Yilye hena na pandura hompa nsene kapisi nyame?” 7 Makura Hamani ta tantere hompa asi: “Eyi yiyo no ruganena mugara ogu ono hara kupandura: 8 Ninka va mu retere yidwara yoge yosiuhompa nonkambe zoge ezi vana dwareke nkata zosiuhompa, 9 makura o yi gave kerenga lyoge limwe, ano vakareli woge va yi dwareke mugara ogu ono hara kupandura nokumuninka a ronde ponkambe zoge mevango eli ava pongere vantu mositata. Vakareli woge ngava gende komeho zendi va zigire asi: ‘Eyi yiyo a ruganene hompa mugara ogu ana hara kupandura!’” 10 Makura hompa ta tantere Hamani asi: “Gusa usimbu yikoverero nonkambe zange ntani ka ruganene Moredekayi goMujuda, ogu a hingire perungavero lyombara zahompa eyi ono tanta. Ka rugane nayinye eyi ono tanta, wa hana kusiga ko yuma.”

11 Makura Hamani ta gusa yikoverero oyo nonkambe a yi tware kwaMoredekayi. Age kwa yi dwarekere Moredekayi ntani ta mu ninki a ronde ponkambe mevango eli ava pongere vantu mositata, oku ta zigire komeho zendi asi: “Eyi yiyo a ruganene hompa mugara ogu ana hara kupandura!” 12 Konyima, Moredekayi ta tengura kerungavero lyombara zahompa, nye Hamani kwa zire usimbu kembo lyendi age ana guwu ntani ana likudumike sikehe komutwe. 13 Hamani kwa ka tanterere mukadendi Seresi ntani novakwawo yininke nayinye eyi ya mu horokerere. Vagavindunge vendi ntani namukadendi tava mu tantere asi: “Nsene asi Moredekayi Mujuda ntani age ana kara nosipundi sosinene kukupitakana, eyi ono hara kurugana kapi ngayi kutompoka, ove ngava ku zonagura po.”

14 Awo simpe kuna kuuyunga nage, marenga gahompa ta ga wiza, ta ga twara usimbu Hamani kosipito esi ga wapaikire Esitera.

7 Makura hompa ta zi naHamani kosipito esi ga wapaikire Esitera. 2 Apa va nwine vhinyu, hompa ta pura Esitera sikando sauvali asi: “Tantera nge eyi ono hara, ame nani yi kuruganena. Ame kuvhura ni ku pe nampili harufa zosirongo sange!” 3 Esitera ta limburura asi: “Hompa gwange, nsene asi ame kukuhafesa ntani nsene no yi kwatesa ko, tani kuhundire o dire kudipaga nge kumwe novantu vange. 4 Yeeyi name novantu vange kwa tu randesa yipo va tu dipage natuvenye. Ngano kwa tu randesa tu kare vapika, ngano kapi nina uyunga. Yipo nye, wa ha pulisira yininke eyi yi horoke, ngano ngayi kundama hompa momudona.”

5 Makura hompa Ahasurusi ta pura mukadendi Esitera asi: “Mugara musinke ogu ana hara kurugana yininke yokufana ngoso?” 6 Esitera ta tanta asi: “Googu nkore zetu Hamani, yige ana hara kuyirugana.”

Makura Hamani ta tameke kukankama morwa hompa namukadendi Esitera. 7 Hompa ta katuka age ana handuka, makura ta zi mosikunino somombara. Nye Hamani ta katuka ta likwambere kwaEsitera yipo va dire kumudipaga, yeeyi Hamani ga yi divire asi hompa ana hara kumutengeka. 8 Ano konyima, hompa ta tundu mosikunino somombara, a tengure monzugo omu va nwininine vhinyu, makura ta ya gwana Hamani ana ligandere posipundi esi ga hingilire Esitera. Hompa ta zigire asi: “Ogu ngesi kuna hara hena kukwatera kononkondo mukadange membo lyange ndi?” Tupu ga mene hompa kuuyunga nonkango odo, Hamani ta va mu kudumike kosipara. 9 Harubona ogu ga kere erenga lyahompa ta tanta asi: “Hamani ka siminine hena sitji yipo a mangerere ko Moredekayi ogu ga poperere hompa. Sitji oso sonometa 22,3* kuna kara membo lyendi.” Makura hompa ta tanta asi: “Ka mu mangerereni ko mwene.” 10 Makura Hamani ta va mu mangerere kositji esi ga simininine Moredekayi, ano ehandu lyahompa tali litura.

8 Ezuva olyo, hompa Ahasurusi kwa geve emona nalinye lyaHamani ogu ga nyengere Vajuda kwamukadendi Esitera ntani Moredekayi kwa zire kwahompa, yeeyi Esitera kwa tanterere hompa asi Moredekayi kwa kere ekoro lyendi. 2 Makura hompa ta gusa linga* zendi ezi ga pere Hamani, ta zi gava kwaMoredekayi, ano Esitera ta ninki Moredekayi a pakere mbili emona eli lya kere lyaHamani.

3 Esitera kwa zire hena a ka uyunge nahompa. Age kwa liganderere konompadi dahompa oku ta lili nokumulikwambera a guse po udigu ou ga reterere Vajuda, Hamani gemezimo lyaAgaga. 4 Hompa ta zerwire hena Esitera mburo zendi zongorodo, makura Esitera ta katuka, ta sikama komeho zahompa. 5 Age kwa tente asi: “Nsene asi ame kukuhafesa ntani nsene asi no yi kwatesa ko ove hompa, ninka o gave mpangera, va tjange nombilive yipo va hagekese po mpangera ezi ga geve Hamani munaHamedata gemezimo lyaAgaga zokudigapa Vajuda navenye ava va kara monomukunda edi o pangere. 6 Yeeyi ayo nga yi guvisa nge unene pokumona ekoro lyange kuna kuligwanekera noudigu ntani kuna kuvadipaga.”

7 Makura hompa Ahasurusi ta tantere mukadendi Esitera naMoredekayi goMujuda asi: “Ame kwa gava emona lyaHamani kwaEsitera ntani na mangerera Hamani kositji, morwa age kwa here a dipage Vajuda. 8 Yipo nye, tjangeni eyi muna hara va ruganene Vajuda, ano mbilive ozo zi tjangeni medina lyange nokutura ko sidiviso solinga zange, yeeyi nkenye mbilive ezi ava tjanga medina lyahompa nokutura ko sidiviso solinga zendi, kwato gokuvhura kuzirundurura.”

9 Makura tava zigida vahamutjanga vahompa momazuva 23 gokwedi kwautatu kwaSivani.* Awo kwa tjenge nayinye eyi ga here Moredekayi kutantera Vajuda, marenga, vanguuru ntani novantu ava ngava pitisire monomukunda 127, kutundilira koIndia dogoro koEtiyopiya. Nkenye momukunda kwa tuminine mo mbilive zemeraka lyawo nontjangeso zawo, kukwatera mo mbilive zemeraka lyoVajuda nontjangeso zawo.

10 Moredekayi kwa va tanterere va tjange nombilive odo medina lyahompa Ahasurusi ntani awo kwa tulire ko sidiviso solinga zahompa. Konyima tava di pe vantu ava va rondere pononkambe dokuduka unene, va di tware. Nonkambe odo ngava di ruganesa mokutuma yininke yahompa. 11 Monombilive odo, hompa kwa pulisilire Vajuda ava va tungire moyitata yokulisiga-siga ngava ponge kumwe, yipo va lipopere ntani va dipage vantu ava ngava va homokera, yi kare asi vakadi ndi vanona ntani ngava guse emona lyawo. 12 Awo va hepere kuponga monomukunda nadinye edi nga pangere hompa Ahasurusi mezuva 13 lyokwedi 12 kwaAdara.* 13 Mbudi ezi va tjenge monombilive kwa zi ninkire zi kare veta monomukunda nadinye. Azo kwa zi divisire kovantu navenye, yipo Vajuda va liwapaikire ezuva olyo ntani va rugwide kuwoko nonkore dawo. 14 Vantu ava va rondere pononkambe dokuduka unene edi ngava ruganesa mokutuma yininke yahompa, kwa zire usimbu ntani kwa genderere kuza ngwendi moomu ga va pangerere hompa. Veta ezi kwa zi geve hena moSusa* omu za kere mbara zahompa.

15 Moredekayi ta tundu pwahompa age ana dwara yikoverero yosiuhompa yosineguru ntani yoyizera. Age kwa dwere hena nkata zongorodo nerwakani eli va honza nowanda wopurupuli. Ano apa va mu mwene vantu womoSusa,* tava zigire noruhafo. 16 Vajuda kwa va poperere. Awo kwa hefe unene ntani vantu kwa va fumadekere. 17 Vajuda ava va tungire monomukunda nomoyitata nayinye omu va divisire mpangera zahompa, kwa hefe unene ntani kwa dene yipito. Sinzi sovantu wokonomuhoko kwa tambwire ukareli woVajuda, morwa awo kwa tjilire Vajuda.

9 Apa lya sikire ezuva lyokusikisa mo eyi ga penge hompa, Vajuda kwa fundire nonkore dawo edi da here kuvadipaga. Eyi kwa horokere mezuva 13, lyokwedi 12 kwaAdara.* 2 Vajuda navenye ava va kere moyitata yomonomukunda edi nga pangere Ahasurusi, kwa pongere kumwe va rwanese vantu ava va here kuvarwisa, nye kwato ogu ga vhulire kuvafunda, yeeyi vantu navenye kwa tjilire unene Vajuda. 3 Ano vantu navenye ava ngava pitisire monomukunda, marenga, vanguuru, kukwatera mo vantu navenye ava ngava ruganene hompa, kwa kwatesere ko Vajuda, yeeyi awo kwa tjilire Moredekayi. 4 Moredekayi kwa ya kere nononkondo dononene mombara zahompa ntani kwa divikwire monomukunda nadinye, morwa age kwa kere mugara gomulyo.

5 Vajuda kwa dipagere nonkore dawo nadinye norufuro ntani awo kwa va rugene moomu va here. 6 Awo kwa dipagere vagara 500 moSusa* omu za kere mbara zahompa. 7 Vajuda kwa dipagere hena Parasandata, Dalifoni, Asipata, 8 Porata, Adaliya, Alidata, 9 Paramasita, Alisayi, Alidayi naVayisata. 10 Vagara owo murongo kwa kere vana vaHamani munaHamedata. Hamani kwa kere nkore zoVajuda. Nye konyima zokudipaga nonkore dawo, awo kapi va gusire emona lyawo.

11 Sivaro sovantu ava va dipagere mezuva olyo moSusa* omu za kere mbara zahompa, kwa si twere kwahompa.

12 Hompa ta pura mukadendi Esitera asi: “Vajuda kuna dipaga vagara 500 novana vaHamani murongo moSusa* omu za kara mbara. Nsene asi awo kuna dipaga vantu wokusika opo moSusa,* ngapi kuhamena nomukunda dange dapeke? Tantera nge hena eyi ono hara, ame nani yi kuruganena.” 13 Esitera ta limburura asi: “Nsene asi ove hompa no yi kwatesa ko, pulisira Vajuda ava va kara moSusa* ngava lipopere hena mungura, ngwendi momu vana yi rugana neina ntani ninka yimpu yovana vaHamani murongo va yi zenzerese kositji.” 14 Makura hompa ta gava mpangera moSusa* yipo va yi rugane, ano vana vaHamani murongo tava va mangerere kositji.

15 Vajuda ava va kere moSusa,* tava pongo hena mezuva 14 lyokwedi kwaAdara makura tava dipaga vagara 300 moSusa,* nye awo kapi va gusire emona lyawo.

16 Vajuda ava va kere monomukunda dapeke edi nga pangere hompa Ahasurusi, nawo kwa pongere kumwe va lipopere. Awo kwa dipagere nonkore dawo 75 000, nye kapi va gusire emona lyawo. 17 Awo kwa yi rugene eyi mezuva 13 lyokwedi kwaAdara, ano mezuva 14 eli lya kweme ko awo kwa pwizumukire ntani kwa li tulire li kare ezuva lyokudana sipito ntani lyokuhafa.

18 Vajuda ava va kere moSusa* kwa pongere kumwe mezuva 13 ntani mezuva 14, ano mezuva 15 awo kwa pwizumukire ntani kwa li tulire li kare ezuva lyokudana sipito ntani lyokuhafa. 19 Eyi yiyo Vajuda ava va tungire moyitata yapeke va horowere ezuva 14 lyokwedi kwaAdara li kare ezuva lyoruhafo ntani lyokudana sipito nokulipaapa nondya.

20 Moredekayi kwa tjenge yininke eyi ya horokere, makura ta tumu nombilive koVajuda ava va tungire monomukunda dokoure nedi dopopepi, edi nga pangere hompa Ahasurusi. 21 Age kwa va pangerere va dane sipito mezuva 14 ntani mezuva 15 lyokwedi kwaAdara nkenye mvhura. 22 Yeeyi mazuva ogo gavali, Vajuda kwa mangurukire kononkore dawo ntani mokwedi oko awo kapi va guvire hena, nye kwa hefe. Momazuva ogo, awo va hepere kudana sipito nokuhafa ntani va hepere kulipaapa nondya nokugava mauhwi kovahepwe.

23 Makura Vajuda tava yi kwatesa ko mokudana sipito oso nkenye mvhura nokurugana eyi ga va tanterere Moredekayi. 24 Yeeyi Hamani munaHamedata gemezimo lyaAgaga, ogu ga kere nkore zoVajuda kwa here kudipaga Vajuda ntani age kwa rugene fungu-fungu,* yipo Vajuda va piyagane ntani va va dipage. 25 Nye apa Esitera ga yi tanterere hompa, hompa kwa geve mpangera ezi va tjenge mombilive asi: “Ogu ana hara kuhomokera Vajuda, va mu homokere.” Ano konyima Hamani novana vendi kwa va mangererere kositji. 26 Eyi yiyo ngava tumbwire mazuva ogo gavali asi Pulimu, kutanta asi fungu-fungu.* Yipo nye mbilive ezi ga va tuminine Morodekayi, eyi va limonenene neyi ya va horokerere, 27 kwa tumangedere Vajuda novana vawo ntani nava va lipakerere kumwe nawo va dane sipito momazuva ogo gavali nkenye mvhura ntani va rugane eyi va va tanterere mombilive. 28 Sipito oso soPulimu, ngaga hepa kusidana mapata nagenye goVajuda, mwankenye mukunda ntani noyitata, va hana kuhageka ntani womoruvharo rwawo rokomeho nawo ngava hepa kutwikira kudiworoka mazuva ogo.

29 Konyima, Esitera munaAbihayili ntani naMoredekayi goMujuda, kwa tjenge mbilive zomukumo zauvali va pameke sipito soPulimu. 30 Nombilive odo kwa di tumine koVajuda ava va kere monomukunda 127, edi nga pangere hompa Ahasurusi ntani amo kwa kere mo nonkango dombili nedi dousili. 31 Ado kwa va tanterere mazuva aga nava dana sipito soPulimu ngwendi moomu ga yi va tanterere Moredekayi naEsitera ntani ngwendi moomu va tokwere kuyirugana kumwe novana vawo. Awo va hepere hena kukanderera ntani nokudilira posiruwo oso. 32 Ano yininke eyi ga uyungire Esitera, kwa pamekere sipito soPulimu ntani ayo kwa yi tjenge mobuke.

10 Hompa Ahasurusi kwa ninkire vantu womosirongo nava va tungire poyirudi va rugane yirugana youdigu.

2 Ano nonkondo edi ga kere nado noyininke yoyinene eyi ga rugene ntani nomu ga pere Moredekayi sipundi sosinene, kwa yi tjanga mobuke zehistoli lyovahompa vaMediya naPeresiya. 3 Moredekayi kwa kere nosipundi sosinene, ano hompa Ahasurusi yige gelike ga mu pitakanene mononkondo. Age kwa fumanene mokatji koVajuda vakwawo ntani awo kwa mu fumadekere. Age kwa ruganenene vantu vendi yininke yoyiwa ntani kwa kondjerere mbili zoruvharo rokomeho roVajuda.