Buke Zange Zomasimwititi Gobibeli

EZI kuna kara buke zomasimwititi gosili. Ago kwa ga gusa mobuke zonene-nene po mouzuni, Bibeli. Masimwititi taga ku pe ehistoli lyouzuni kutunda apa Karunga ga tamekere kusita dogoro posiruwo setu esi sanaina. Ago kwa tanta hena kuhamena eyi ga tumbwidira ku ka rugana Karunga komeho.

Buke ezi tazi ku pe egano kuhamena nayinye eyi ya kara moBibeli. Azo kusimwitira kuhamena vantu womoBibeli noyininke eyi va rugene. Azo kulikida hena ehuguvaro lyenene lyomwenyo gwanarunye pevhu lyoparadisa eli ga gava Karunga kovantu.

Mobuke ezi kwa kara mo masimwititi 116. Ago kwa ga gaununa momaruha ntantatu. Epenuno ketameko lyankenye ruha kwa tanta ko pausupi asi yisinke ya kara moruha oro. Masimwititi kwa kara melikwamo kutwara omu ya horokere yininke mehistoli. Eyi tayi ku vatere o lironge asi siruwoke ya horokere yininke mohistoli melikwatakano noyihorokwa nayopeke.

Masimwititi kwa ga simwitira meraka lyoureru. Sinzi seni one vanonagona nomu ka vhura ku ka ga resa nyamweni. One vakurona nomu ka mona asi vana veni wovanonapo nava ka hafera mokukavaresera masimwititi aga merugururo. No ka yi mona asi buke ezi kwa kara nomulyo kovanona ntani nokovakurona nawo.

Etumburo lyomatjangwa goBibeli kwa li gava kwankenye uhura wesimwititi. Ove kuna kukukorangeda o rese ruha roBibeli oku gana tundilire masimwititi.