Esimwititi 6

Munwagara gomuwa nogu gomudona

TARA oKaini naAbeli ngesi. Navenye vana kuru. Kaini ana kara munandima. Age kulima nombuto nenyango ntani nehidi.

Abeli ana kara muweki gononzwi. Age kwa hara kukunga tunzwigona. Ato kukura tatu kara nonzwi dononkondi, konyima Abeli ta kara nosiunda sononzwi a kunge.

Ezuva limwe Kaini naAbeli tava reta mauhwi kwaKarunga. Kaini ta reta nondya dimwe edi ga lima. Ano Abeli ta reta nzwi zongwa po unene pwedi ga weka. Jehova ana hafere Abeli nouhwi wendi. Nye age kapi ana hafere Kaini nouhwi wendi. Ono diva asi morwasinke?

Kapisi asi morwa yeeyi tupu uhwi waAbeli wa wapere kupitakana waKaini. Nye morwa Abeli muntu gomuwa. Age kwa hara Jehova namukurwendi. Nye Kaini mudona; age kapi ga hara mumbyendi.

Karunga makura ta tantere Kaini asi a sinte nonkedi dendi. Nye Kaini kapi ana kupurakena. Age ta handuka unene morwa Karunga kwa here Abeli kumupitakana age. Kaini makura ta tantere Abeli asi: ‘Tu ze tu ka gendagure mosanzara.’ Omwina, apa va kere velike, Kaini ta toona mumbyendi Abeli. Age ta mu toona unene ta mu dipaga. Nani esi kapisi sininke sosidona unene ga rugene Kaini?

Nampili ngomu Abeli ga fire, Karunga simpe kumudiworoka. Abeli kwa kere muwa, ano Jehova narumwe si a divara muntu gwangoso. Yipo nye asi ezuva limwe Jehova Karunga nga ka tengwidira Abeli komwenyo. Posiruwo oso, Abeli kapi nga ka hepa hena kufa. Age nga ka vhura kukaparuka apa pevhu narunye. Nani kapi ngayi wapa mokukadiva vantu ngwendi Abeli?

Nye Karunga kapi a hafere vantu ngwendi Kaini. Yipo nye konyima zokudipaga mumbyendi, Karunga kwa mu tengekere mokumutuma koure nekoro lyendi nalinye. Kaini apa ga zire a ka tunge koruha rwapeke, age kwa simbire mumbyendi gumwe gomukadona, yipo ga ka kere mukadendi.

Konyima zosiruwo, Kaini namukadendi tava tameke kureta vana. Vanagara nava wovakadi vamwe vaAdamu naEva kwa kwere, makura nawo tava reta vana. Pevhu makura tapa kara vantu wovanzi. Tu lirongeni ko kuhamena vamwe vawo.

Genesis 4:2-26; 1 Johanesa 3:11, 12; Johanesa 11:25.