Esimwititi 33

Etaguruko lyefuta lyegeha

TARA eyi yina kuhoroka! Ogo kuna kara Mosesa ana zerura mpango zendi pEfuta lyEgeha. Owo vana kara nage koruha rwina mondjewa-ndjewa kuna kara Vaisraeli. Nye Farawo novakwayita vendi navenye kuna kuminangana mefuta. Tu tareni asi ngapi omu ya horokere eyi.

Ngomu tuna lirongo, Farawo kwa tanterere Vaisraeli va tunde moEgipite konyima zapa Karunga ga retere ehepeko lyomurongo koVaegipite. Vagara woVaisraeli wokusika ponyara 600 000, novakadi wovanzi ntani novanona kwa tundire mo. Vantu vamwe hena wovanzi vapeke ava va pulire mwaJehova nawo kwa zire kumwe noVaisraeli. Navenye kwa simbire nonzwi noyikombo nonongombe dawo.

Komeho va ze, Vaisraeli kwa hundilire koVaegipite yidwara ntani noyininke eyi va ruganesa kongorodo nosisiliveli. Vaegipite kwa kere nowoma wounene morwa ehepeko lina lyokuhulilira eli lya va gwene. Yiyo nye va pere Vaisraeli nayinye eyi va hundilire.

Konyima zomazuva gongandi Vaisraeli tava ya siki pEfuta lyEgeha. Opo makura tava pwizumuka. Posiruwo oso, Farawo novantu vendi tava tameke kulivera eyi va sigilire Vaisraeli va ze. Awo tava tanta asi: ‘Ose kwa sigilira vapika vetu va ze!’

Farawo makura ta pirura hena nondunge dendi. Age makura ta pongaike usimbu matemba gendi goyita novakwayita vendi. Makura ta konko Vaisraeli nomatemba gokulikarera 600, ntani nomatemba hena nagenye gomoEgipite.

Vaisraeli, apa va mwene Farawo novakwayita vendi tava wiza, tagu va pwaga unene. Kwato kokudukira. Koruha rwawo rumwe kwa kere ko Efuta lyEgeha, ano Vaegipite tava tundilire koruha rukwawo. Nye Jehova kwa tulire eremo pokatji kovantu vendi ntani noVaegipite. Vaegipite yipo nye va pilire kumona Vaisraeli asi va va homokere.

Jehova yipo nye ga tanterere Mosesa a gonwene mpango zendi pEfuta lyEgeha. Apa ga rugene ngoso, Jehova makura ta ninkisa mpepo zoUpumezuva zononkondo zi pepe. Mema gefuta makura taga ligaunuka, ano ago makura taga kindama komaruha nagenye.

Vaisraeli makura tava tameke kutaguruka efuta pevhu lyekukutu. Ayo kwa gusire novili mokuninka asi vantu mamiliyona noyikorama yawo nayinye yi ka sike mesinya mwina mondjewa-ndjewa. Mouhura Vaegipite makura tava tameke kumona hena Vaisraeli. Vapika vawo kuna kuduka! Makura tava dukire mefuta va va sikure.

Apa va rugene ngoso, Karunga ta ninki makoso gomatemba gawo ga pwekauke ko. Vaegipite makura tava tukuka unene nokutakuma asi: ‘Jehova yige ana kurwira mo Vaisraeli koVaegipite. Tu dukeni!’ Nye awo va lirenge unene.

Apa yipo nye Jehova ga tanterere Mosesa a gonwene mpango zendi pEfuta lyEgeha, ngomu ono yi mono pefano. Ano Mosesa apa ga rugene ngoso, makuma gomema taga tameke kutengura nokukudumika Vaegipite nomatemba gawo. Vakwayita navenye kwa kweme Vaisraeli va ze mefuta. Nampili gumwe si goVaegipite ga parukire po!

Ee, ngapi tupu omu va hefe vantu vaKarunga navenye kweyi va va zowere! Vagara tava dimbi rusumo rokupandura Jehova, tava tanta asi: ‘Jehova ana fundu efundo lyenene. Nonkambe novarondi vado ana va zugumine mefuta.’ MukurwaMosesa Miliyama makura ta gusa ngomagona zendi, ano vakadi navenye tava mu kwama nonongomagona dawo. Ngomu va dene noruhafo, tava dimbi rusumo rooro va dimbire vagara asi: ‘Jehova ana fundu efundo lyenene. Nonkambe novarondi vado ana va zugumine mefuta.’

Exodus magaununo 12 dogoro 15.