Egaununo 2
Kwa mu fumadekere komeho zokumuhampuruka
MUENGELI Ngabiliyera konyima zokutantera mukadona Mariya asi nga hampuruka munona gomugara ogu nga kara hompa gwanarunye, makura Mariya ta mu pura asi: “Eyi omu ngayi genda, ame na hana mugara, ngapi?”
Ngabiliyera ta tanta asi: “Mpepo zoKupongoka ngazi ku wizira, ano nonkondo dogu gekeguru-guru ngadi ku kudumika. Yiyo nye ngava tumbwira munona ogu ngo hampuruka asi Mupongoki, MunwaKarunga.”
Mokuvatera Mariya a pure mbudi ezi, Ngabiliyera ta twikire asi: “Tara si, munwanyoko Elisabeta nage nezimo ana kara lyomunona gomugara moukurupe wendi. Ngomu mu tumbura sa asi nganze. Ano oku ngesi kwedi kwendi kwautano-nakumwe. Yeeyi Karunga nayimwe si eyi ayi mu tjindire.”
Mariya ta pura nonkango daNgabiliyera. Yiyo ga limbwilire asi: “Ame ni mukereli gwaHompa. Yi horokere nge tupu moomu ono tanta.”
Makura Ngabiliyera ta tundu po, ano Mariya ta liwapaikire a ze ugenda kwaElisabeta ogu ga tungire nayendi Sakaliya, moJudeya mosirongo sonondundu. Kutundilira koNasareta kembo lyaMariya rugendo oru rure, nampo kuvhura ru guse mazuva gatatu ndi gane.
Apa Mariya ga ka sikire membo lyaSakaliya ta hwilire, ta morora. Makura Elisabeta ta zura mpepo zokupongoka, ta tantere Mariya asi: “Ove kwa fumana mokatji kovakadi, nogo munona ogo ngo ka hampuruka nage kwa fumana! Ee, erago musinke eli lina gwana nge lyokuwizira nge ugenda zinyaHompa gwange? Yeeyi tupu lina ya gu ezwi lyemororo lyoge momatwi gange, makura munona yiyo ana vatauka mezimo lyange morwa ehafo.”
Apa Mariya ga yi zuvhire eyi ta limburura norupandu asi: “Mutjima gwange tagu tangauka Hompa, ano mwenyo gwange nago kuna hafa unene morwaKarunga, Muzowoli gwange. Yeeyi age ana diworoka usigona womukereli gwendi, morwa kutunda pwanaina nomuhoko nadinye ngadi tumbura nge asi ni munerago. Yeeyi Munankondo ana ruganene nge yoyinene.” Nampili ngomu Mariya va mu likidire efumadeko, age kwa vyukisire efumano nalinye kwaKarunga. Ta tanta asi: “Edina lyendi kwa pongoka. Age kufira nkenda ava ava mu tjira, ava vana kara po nava ngava ka kara ko.”
Mariya ga twikilire kutanga Karunga kupitira morusumo rouporofete asi: “Age kwa rugana yirugana yononkondo nokuwoko kwendi. Ava va linenepeka monomutjima dawo yiyo ga va haraganesa po. Age kwa kandura ko vanankondo koyipundi yawo, yiyo ga zerura vasigona. Age kwa kutika wonzara neyi yoyiwa, vanangawo yiyo ga va tjida po mawoko-woko. Age ana diworoka etumbwidiro lyendi kozinyakurwetu, yiyo ana kwafa mukereli gwendi Israeli, moomu ga tanterere ozinyakurwetu Abirahamu, nava va kweme ko dogoro narunye!”
Mariya makura ta kara kwaElisabeta makwedi gatatu, ntani ga vaterere Elisabeta moyivike eyi yokuhulilira yomarutu gendi gavali. Ayo ya wepe kovakadi ava vavali wokulimburukwa mokukara kumwe posiruwo esi sosiwa apa va kere nomarutu gavali kupitira mevatero lyaKarunga.
Ono dimburura omu va mu fumadekere Jesus komeho zokumuhampuruka ndi? Elisabeta kwa mu tumbwire asi ‘Hompa gwange,’ ntani munwendi mezimo kwa vataukire morwa ehafo apa ga wizire Mariya. Mokulisiga, vantu vapeke konyima kapi va fumadekere Mariya namunwendi gemezimo, ngomu natu ka yi mona. Rukasa 1:26-56.
▪ Yinke ga uyungire Ngabiliyera mokuvatera Mariya a kwate egano omu nga kara nomarutu gavali?
▪ Ngapi omu va mu fumadekere Jesus komeho zokumuhampuruka?
▪ Yinke ga uyungire Mariya morusumo rouporofete mokutanga Karunga?
▪ Makwedi gangapi ga kere Mariya kwaElisabeta, ntani morwasinke ya waperere Mariya mokukara naElisabeta posiruwo sina?