Egaununo 26

Eyi ya karera udigu kurugana yoyiwa

APA nga rugana Sauru yininke yoyidona, yilye ogu ga hefe?— Satana Muzonaguli. Vampitisili womaukerelikarunga goVajuda nawo kwa hefe. Makura apa Sauru ga ya kere murongwa goMurongi goMunene nokumutumbura asi Paurusa, vampitisili owo womaukerelikarunga kwa tamekere kumunyenga. Ono mono nye eyi ya karera udigu komurongwa gwaJesus mokurugana yoyiwa ndi?—

Mupristeli gomunene gedina Ananiyasa sikando simwe kwa pangerere vagara va toone Paurusa kosipara. Ananiyasa ga hetekere ko hena mokutulisa Paurusa modorongo. Paurusa kwa hepere unene apa ga ya kere murongwa gwaJesus. Pasihonena, vantu wovadona kwa toonene Paurusa nokuheteka kumudipaga nomamanya gomanene.—Yirugana 23:1, 2; 2 Vakolinte 11:24, 25.

Vantu wovanzi kuhetekera ko va tu ninkise tu rugane yininke eyi ayi dili kuhafesa Karunga. Nye gazadara ko kuhamena eyi: Kupi lya hura eharo lyoge lyokurugana yininke yoyiwa? Ove kuyihara sili yipo o rugane yoyiwa namplili vakweni va yi ku nyengere ndi? Pwa hepa uradi mokurugana yoyiwa, ndi kapisi yimo?—

Kuvhura o lipure asi: ‘Morwasinke vantu ava tu nyengere nye ose kurugana yininke yoyiwa? Awo ngano kapi tava hafa ndi?’ Kuvhura o gazare ngoso. Vantu pamwe kwa mu harerere Jesus morwa yininke yoyiwa eyi nga rugana. Posikando simwe, vantu navenye womositata kwa ya pongere pevero lyembo eli ga kere. Awo kwa wizilire morwa Jesus ga verwire vantu wokuvera.—Marukusa 1:33.

Nye, poyiruwo yimwe vantu kapi va here eyi nga rongo Jesus. Nampili ngomu nga rongo nkenye apa youhunga, vantu vamwe kwa mu nyengere unene morwa age nga uyunga usili. Eyi ya horokere ezuva limwe moNasareta, mositata esi ga kulilire Jesus. Age kwa zire mosinagoge, evango eli Vajuda ngava pongere mokukarera Karunga.

Mosinagoge Jesus kwa geve siuyungwa sosiwa sokutunda moMatjangwa. Pomuhowo vantu va si haferere. Awo kwa tetukire nonkango donongwa edi da tundire mokana kendi. Awo kapi va vhulire kuyipura asi ogu yige mumati ga kulira mositata sawo.

Makura Jesus ta uyunga yininke yimwe yapeke. Age kwa uyungire kuhamena yiruwo yimwe apa Karunga ga likidire uwa wokulikarera kovantu va hana asi Vajuda. Apa ga yi uyungire eyi Jesus, ava va kere mosinagoge tava handuka. Ono yi diva asi morwasinke?— Morwa awo kwa gazarere asi yiwo velike a likida Karunga uwa wokulikarera. Awo kwa gazarere asi awo mulyo unene kupitakana vantu vapeke. Makura tava nyenge Jesus morwa yininke eyi ga uyungire. Ano ono diva asi yinke va hetekerere ko kumurugana ndi?—

Bibeli kutanta asi: ‘Awo tava kwata Jesus nokumupwagesa mo mositata, tava mu twara kononkenkera dondundu asi va mu zundwire pevhu. Nye ta piti pokatji kawo, ta ka za.’—Rukasa 4:16-30.

Nsene yi ku horokera, ngo tengwira ko hena kovantu owo o ka uyunge nawo kuhamena Karunga ndi?— Pwa hepa uradi, ndi kapisi yimo?— Nampili ngoso, konyima zomvhura zimwe, Jesus ga tengwilire ko hena koNasareta. Bibeli kutanta asi: “Ta ka ronga mosinagoge zawo.” Jesus kapi ga hagekere kuuyunga usili morwa kutjira vantu ava va dilire kukara neharo lyokuhara Karunga.—Mateusa 13:54.

Ezuva limwe mEsabata, Jesus kwa kere moSinagoge omu mwa kere mugara ogu ga fa kuwoko. Jesus ga kere nononkondo dokutunda kwaKarunga mokuverura mugara gwina. Nye vagara vamwe kwa here kuretera maudigu Jesus. Yinke ngano ga rugene Murongi goMunene?— Pomuhowo ta va pura asi: ‘Ngano asi mwa kara nonzwi makura zi gwire mekero lyenene mezuva lyEsabata, nomu ka zi gusa mo ndi?’

Nampili mEsabata, mezuva eli ngano va hepere kupwizumuka, awo ngano va ka gusire mo nzwi mekero. Makura Jesus ta tanta asi: ‘Ayo ya wapa mokuvatera muntu mEsabata, morwa muntu mulyo unene kupitakana nzwi!’ Ayo ya zerere nawa-nawa asi Jesus ga hepere kuvatera mugara gwina pokumuverura!

Jesus kwa tanterere mugara gwina a gonyonone kuwoko kwendi. Makura poopo tupu kuwoko taku veruka. Ee, omu tupu ga hefe mugara gwina! Nye ngapi kuhamena vagara vena? Nawo va hefe ndi?— Hawe. Awo kwa nyengere nye unene Jesus. Makura tava pwaga mo mosinagoge va ka liyonge mokudipaga Jesus.—Mateusa 12:9-14.

Ayo yina lifana nanaina. Yi kare asi yinke natu rugana, kapi ta tu vhuru kuhafesa vantu navenye. Yipo nye, twa hepa kutokora asi yilye ogu tuna hara sili kuhafesa. Nsene tuna hara kuhafesa Jehova Karunga naMunwendi, Jesus Kristusa, twa hepa nye kurugana nkenye apa eyi vana kuronga. Nye nsene tu va hafesa, yilye nga tu nyenga? Yilye ngatu digopekesera mokurugana yininke yoyiwa?—

Satana Muzonaguli. Ntani wolye hena?— Kuna kara owo ga pukisa Muzonaguli va pure yininke yepuko. Jesus kwa tanterere vampitisili womaukerelikarunga womomazuva gendi asi: “One mwaguhyeni Muzonaguli mwa tunda, ano madowo gaguhyeni yigo mwa hara kukwama.”—Johanesa 8:44.

Pwa kara vantu wovanzi ava ga hara Muzonaguli. Jesus kuvatumbura asi “uzuni.” Omu ono kugazara, “uzuni” musinke ga tembe Jesus?— Tu ze tu tare mwaJohanesa egaununo 15, velise 19. Amo tatu resa nonkango edi daJesus asi: “Nganosi one kwa hamena kouzuni, ngano uzuni wa mu hara, morwa one vawo. Ame kwa mu horowora mo mouzuni, yiyo mwa dira kuhamena kouzuni, yipo nye wa mu nyengera uzuni opo.”

Uzuni ou wa nyenga varongwa vaJesus kuna kara vantu navenye ava va dira kukara asi vasikuli vendi. Morwasinke uzuni wa nyengera varongwa vaJesus?— Gazadara ko tupu. Yilye mupangeli gouzuni?— Bibeli kutanta asi: “Uzuni mudima kwa kara mepangero lyoMuzonaguli.” Muzonaguli gwina kuna kara Satana.—1 Johanesa 5:19.

Ono mono nye eyi ya karera udigu mokurugana yininke yoyiwa ndi?— Satana nouzuni wendi yiwo ava yi tu digopekesere. Nye pwa kara konda zimwe hena. To zi diworoka ndi?— MEgaununo 23 mobuke ezi, twa lirongere asi natuvenye twa pinga nzo. Ayo ngayi ka wapa apa Muzonaguli nouzuni wendi ngava ka dongonoka po.

Bibeli kwa tumbwidira asi: “Uzuni ngau zonauka po.” Eyi kuna kutanta asi navenye ava va dira kukara asi vasikuli woMurongi goMunene kapi ngava kara po hena. Awo kapi ngava va pulisira mokuparuka narunye. Ono diva asi wolye ngava ka paruka narunye?— Bibeli kutanta asi: “Ogu a sikisa mo mpango zaKarunga, nga kara dogoro narunye.” (1 Johanesa 2:17) Yimo, vaava tupu ava rugana yoyiwa, ava “sikisa mo mpango zaKarunga,” yiwo velike ngava ka paruka narunye mouzuni woupe waKarunga. Yipo nye, nampili yi kare udigu, twa hara kurugana yininke yoyiwa, ndi kapisi yimo?—

Tu rese kumwe matjangwa aga aga likida eyi ya karera udigu mokurugana yininke yoyiwa: Mateusa 7:13, 14; Rukasa 13:23, 24; ntani Yirugana 14:21, 22.

[Efano pepenuno 137]

Yisinke ya mu horokerere Paurusa apa nga rugana yininke yoyiwa?

[Efano pepenuno 138]

Morwasinke va harerere vantu ava kudipaga Jesus?

[Efano pepenuno 141]

Apa ngau ka zonauka po uzuni ou, yisinke ngayi ka horokera owo ava rugana yininke yoyiwa?