Egaununo 34

Yisinke ngayi tu horokera nsene ngatu fa?

NGAMOOMU wa yi diva, vantu naina kukurupa nokuvera ntani nokufa. Nampili vanona nawo kufa. Kuvhura nye o tjire nomfa ndi muntu ogu ana fu ndi?— Wa diva eyi ayi horoka apa a fu muntu ndi?—

Mosiruwo setu kwato muntu ogu ga fa yiyo ga tengura hena keparu a ya tu tantere kuhamena eyi ayi horoka apa muntu a fu. Nye apa Jesus, Murongi goMunene, ga kere pevhu, pwa kere mugara gwangoso. Ose kuvhura kulironga kuhamena eyi ayi horokere owo ava fu pokuresa kumuhamena. Mugara ogo kwa kere kaume kaJesus ogu ga tungire moBetani, doropagona ezi za kere pepi naJerusarema. Edina lyendi kwa kere Rasarusa, ano vampanza vendi vavali kwa kere oMalita naMariya. Tu ze tu tare eyi za uyunga ko Bibeli kweyi ya horokere.

Ezuva limwe Rasarusa kwa verere unene. Posiruwo oso, Jesus kwa kere ure. Yipo nye oMalita naMariya va tumine ntumi mokukatantera Jesus asi mpanzawo Rasarusa ta vere. Awo kwa yi rugene eyi morwa va divire asi Jesus kuvhura a wize nokuyaverura mpanzawo. Jesus kapisi ndokotora, nye age ga kara nononkondo dokutunda kwaKarunga yipo a vhure kuverura nkenye uvera.—Mateusa 15:30, 31.

Nampili ngoso, komeho Jesus a ka sike kwendi, Rasarusa kwa verere unene makura ta fu. Nye Jesus kwa tanterere varongwa vendi asi Rasarusa kuna rara ntani ta zi a ka mu pindure. Varongwa kapi va kwete egano eyi ga tembe Jesus. Makura Jesus ta va tantere asi: “Rasarusa ana fu.” Yisinke ya likidire eyi kuhamena nomfa?— Yimo, nomfa kwa fana ngwendi nompofu dononene. Ado nompofu dononene edi a rara muntu ga hana kurota.

Jesus kwa zire a ka dingure oMalita naMariya. Vakaume vawo wovanzi nare va ya sikire. Awo kwa wizire va ya hengagwide vampanza vanakufa. Apa Malita ga zuvhire asi Jesus kuna kuwiza, makura ta mu simbagwire. Karuwogona tupu Mariya nage ta zi a ka mone Jesus. Age kwa guvire unene nokulira, makura ta gwire konompadi daJesus. Vakaume vamwe ava va kweme Mariya nawo kwa lilire.

Murongi goMunene ta va pura oku va horekere Rasarusa. Makura vantu tava twara Jesus kekombombo eli va horekere Rasarusa. Apa ga mwene Jesus vantu navenye kuna kulira, nage ta tameke kulira. Age ga divire kukora kokuzumbanesa ogu wa hara monomfa.

Kekombombo kwa zedilire ko emanya, makura Jesus ta tanta asi: “Tundiseni ko emanya!” Awo va hepere kuyirugana ndi?— Malita kapi ga gazarere asi egano lyewa. Makura ta tanta asi: “Hompa, apa ana kara, kuna kunuka, yeeyi eli ezuva lyaune ana kara montoko.”

Nye Jesus ta mu tantere asi: “Amesi na ku tantere asi, nsene o pura, no mona uyerere waKarunga.” Jesus kwa tembe asi Malita na mona sininke esi nasi ka retera efumano Karunga. Yisinke ga rugene Jesus? Apa va gusire ko emanya, Jesus kwa kanderere kuziguruka kwaJehova. Makura ta zigire nezwi lyenene asi: “Rasarusa, pwaga mo!” Rasarusa ga vhulire kupwaga mo ndi?—

Ove kuvhura kupindura muntu ogu ana rara ndi?— Yimo, nsene o zigira nezwi lyenene, age kuvhura a pinduke. Nye ove kuvhura o pindure muntu ogu ana rara monompofu donomfa ndi?— Hawe. Yi kare asi ngapi omu no zigira, ogu ana fu kapi ta ku zuvhu. Nove name ndi nkenye muntu gepevhu kwato eyi natu vhura kurugana ko mokupindura muntu konomfa.

Nye Jesus kwa lisiga. Age kwa kara nononkondo dokulikarera dokutunda kwaKarunga. Yipo nye apa Jesus ga zigidire Rasarusa, sininke sokutetukisa sa horokere. Mugara ogu ga fire mazuva gane kwa pwege mekombombo! Age kwa tengwire keparu! Age ga vhulire hena kuhesera nokugenda nokuuyunga! Yimo, Jesus kwa pindwire Rasarusa konomfa.—Johanesa 11:1-44.

Ngesi gazadara ko si: Yisinke ya horokere kwaRasarusa apa ga fire? Poruli ruha rwendi rumwe, mwenyo ndi mpepo, rwa sigire rutu rwendi nokuza kevango lyapeke ndi? Mwenyo gwaRasarusa gwa zire meguru ndi? Age kwa parukire mazuva gane meguru kumwe naKarunga novaengeli wokupongoka ndi?—

Hawe, kapi ga parukire meguru. Diworoka asi Jesus kwa uyungire asi Rasarusa kuna rara. Ngapi omu o lizuvhu apa o rara? Apa o rara monompofu dononene, ove kuzuvha eyi yina kuhoroka ndi?— Apa o pinduka ove kapi o diva asi siruwo sokuhura kupi ono rara dogoro o tare kovili ntani.

Ya lifana tupu novantu wokufa. Awo kwato eyi va diva. Awo kwato malizuvho. Ntani kapi ava vhuru kurugana yuma. Yimo ngoso ga kere Rasarusa apa ga fire. Nomfa kwa lifana nonompofu dononene omu muntu a dili kudiworoka yininke. Bibeli kutanta asi: “Vafe kutupu eyi va diva.”—Muudisi 9:5, 10.

Gazadara ko si hena: Nsene Rasarusa kwa kere meguru mazuva ogo gane, age ngano ga yi uyungire, ndi ngapi?— Nsene asi ga kere meguru, ngano Jesus ga mu ninkire a tunde mo mevango olyo lyewa a wize pevhu ndi?— Hawe!

Vantu wovanzi kutanta asi pwa kara sininke mwetu esi asi paruka apa aru fu rutu. Awo kutanta asi mwenyo ndi mpepo zaRasarusa kwa zire kevango lyapeke. Nye kapisi yiyo azi uyunga Bibeli. Bibeli kutanta hena asi apa ga zonene Adamu, ga fire, ano kwato hena eyi ga divire. Age ga tengwire kombundu zevhu oku va mu gusire. Bibeli kutanta hena asi vana vaAdamu navenye kwa pinga hena nzo ntani nonomfa.—Genesis 2:7; 3:17-19; Varoma 5:12.

Vantu vamwe kutjira vafe. Awo kapi ava hedere komayendo morwa awo kugazara asi vafe va kara nomwenyo ogu agu paruka pwagwelike nagu vhura kukoresa vanamwenyo. Nye kuvhura muntu gokufa a korese munamwenyo ndi?— Hawe, nokuvhura si.

Vantu vamwe kwa pura asi vafe kuvhura kutengura ngovadimu mokuyadingura vanamwenyo. Makura awo kuvatulikira ko nondya. Nye vantu ava ava rugana oyo kapi va pura nawa-nawa eyi a tanta Karunga kuhamena vafe. Nsene tu pura eyi a tanta Karunga, ose kapi ngatu tjira vafe. Ntani nsene tu pandura nawa-nawa Karunga keparu eli ga tu pa, ose ngatu yi likida pokurugana yininke eyi a hafere Karunga.

Nye kuvhura o lipure asi: ‘Karunga kuvhura nga ka tengwidire keparu vanona ava va fa ndi? Age ana hara sili kuyirugana ndi?’ Eyi ngatu ka yi zogera megaununo lyokukwama ko.

Tu ze tu rese moBibeli kuhamena mukaro govafe mEpisarome 115:17 ntani 146:3, 4.

[Efano pepenuno 179]

Yisinke Jesus ga ruganenene Rasarusa?

[Efano pepenuno 180]

Moukaro musinke ga kere Rasarusa apa ga fire?

[Efano pepenuno 181]

Morwasinke natu pilira kutjira vafe?