Unongo wokutunda kwaKarunga kukupitisira meparu

Ruha 12

Unongo wokutunda kwaKarunga kukupitisira meparu

Yisewe kuna kara buke zomapukururo, aga unene po ga tjenge Saromo, gokuvhura kutupitisira meparu lyankenye ezuva

JEHOVA mupangeli gonondunge ndi? Nkedi zimwe zokulimburura epuro olyo kuna kara mokukonakona mapukururo aga a tu pe. Ago sili kurugana ndi? Nsene o ga ruganesa, kuvhura kuwapeka eparu lyoge ndi? Hompa gonondunge Saromo kwa tjenge yisewe yokusika komafere. Yisewe eyi kwa zogera nkenye ruha rweparu. Tarurura yihonena yimwe.

Twa hepa kuhuguvara mwaKarunga. Kuhuguvara mulyo unene mokukara nelikwatakano lyewa naJehova. Saromo kwa tjenge asi: “Huguvara HOMPA nomutjima goge nagunye. Wa ha hama konondunge danyamoge. O diworoke HOMPA mwanayinye eyi ono kurugana, makura age ta ku likida nzira zouhunga.” (Yisewe 3:5, 6) Kuhuguvara mwaKarunga pokukwama mapukururo gendi ntani nokumulimburukwa kureta eparu lyewa. Muntu gwangoso kuhafesa Karunga ntani kugava konda kwaJehova mokulimburura nompata edi za retesa po nkore zendi, Satana.—Yisewe 27:11.

Ruganesa unongo pokuruganena kumwe nava wopeke. Mapukururo gaKarunga kovagara novakadi ntani nokovanona kuna kurugana naina kupitakana pwanare. Karunga kutantera vagara asi: “Gwana ruhafo momukadona ogu wa kwara,” eyi kutanta asi mugara ga hepa kuuyunga usili namukadendi. (Yisewe 5:18-20) Mukadi gokukwara kuvhura kugwana etangauko lyewa mobuke zoYisewe, omu va faturura mukadi gomuwa ogu a hafesa yendi novana vendi. (Yisewe egaununo 31) Ano vanona kugwana mavyukiso asi va limburukwe kovakurona vawo. (Yisewe 6:20) Buke ezi kulikida hena asi ukaume kwa kara nomulyo, morwa kukara nyovelike kukuninkisa o ligazare tupu pwanyamoge. (Yisewe 18:1) Vakaume kuvhura kutuninkisa tu kare vantu wovawa ndi wovadona, yipo nye twa hepa ku va horowora nonondunge.—Yisewe 13:20; 17:17.

Litakamesa nyamoge nonondunge. Buke zoYisewe kwa kara nomapukururo gomawa kuhamena eruganeso yikorwesa momudona nokutunga po malizuvho gokuturetera ukanguki wouwa, nomokunyokera po vantu wovadona ntani nomu natu vhura kukara varugani wovawa. (Yisewe 6:6; 14:30; 20:1) Azo kurondora asi kuhuguvara momapukururo govantu aga ga lisiga naga gaKarunga kutwaredesa kokudona. (Yisewe 14:12) Azo kutupukurura tu popere mutjima gwetu komapukiso gomadona, nokutudiworokesa asi ‘ukaro wetu yigazo yetu yiyo ayi u pangere.’—Yisewe 4:23.

Mamiliyona govantu mouzuni mudima va yi nongonona asi kuparuka kuliza nomapukururo gangoso kureta eparu lyewa. Ngoyitundwa mo, awo va kara nokonda zokutambura Jehova ngoMupangeli gwawo.

—Kuna tundu mobuke zoYisewe.

◼ Yisinke natu lirongera ko pokukonakona buke zoYisewe?

◼ Mapukururo musinke azi gava buke zoYisewe kuhamena kuhuguvara mwaKarunga nomokuruganesa unongo pokuruganena kumwe nava wopeke nonondunge ntani pwanyamoge?

[Kakende kepepenuno 15]

MUUDISI

Kupi oku natu vhura kugwana eparu lyewa ntani lyokuhafesa? Saromo kwa tokomenene mokugwana elimbururo kepuro olyo. Ungawo wounzi nounongo ntani noupangeli ya ninkisire Saromo a konakonene nsene asi kuvhura yi mu retere ruhafo rousili. Age kwa kondjerere yininke yopanyama nokukwara vakadi wovanzi wovawa ntani kwa lihafesere unene. Age kwa lihamekere hena momatungo gomanene. Ntani age ga lirongere unene. Yisinke ga gwene mo? “Nayinye kutupu sikwafa.” Nampili ngoso, age ga ya yi dimbwilire pokutanta asi: “Tjira Karunga, ove o limburukwe koyipango yendi, yeeyi yangesi, yiyo va mu ungira muntu.”—Muudisi 12:8, 13.

[Kakende kepepenuno 15]

Genesis

Exodus

Levitikus

Numeri

Deuteronomium

Josuwa

Vapanguli

Rutu

1 Samwere

2 Samwere

1 Vahompa

2 Vahompa

1 Histoli

2 Histoli

Esira

Nehemiya

Esitera

Joba

Mapisarome

Yisewe ●

Muudisi ●

Rusumo

Jesaya

Jeremiya

Malirankali

Hesekiyeli

Ndaniyera

Hoseya

Jowera

Amosa

Obadja

Jona

Mika

Nahumu

Habakuku

Sefaniya

Hagayi

Sakaliya

Marakiya

Mateusa

Marukusa