Yisinke no gwana ko koaderesi zetu zoIntaneta?

Jesus Kristusa kwa tanterere vasikuli vendi asi: “Nosite seni naso yimo nasi temena vantu, asi ava mone yirugana yeni yoyiwa, ava fumadekere po Guhyeni gemeguru.” (Mateusa 5:16) Ose kuruganesa monaruwa ukonentu womouzuni kukwatera mo Intaneta. Aderesi www.pr2711.com, yiko no gwana mauzera kuhamena epuliro noyirugana yoNombangi daJehova. Yisinke ya kara ko?

Malimbururo gomoBibeli komapuro aga ava pura vantu. Ngo gwana malimbururo komapuro gamwe gomulyo aga ava lipura vantu. Pasihonena yimbapira Ruhepo ngaru haga po ndi? ntani Vafe ngava ka paruka hena ndi? kuyigwana koIntaneta momaraka gokupitakana po-600. Kuvhura o gwane ko hena Bibeli New World Translation momaraka gokupitakana po-130 ntani yimbapiratjangwa yoBibeli yelirongo kukwatera mo buke Yinke azi rongo Bibeli sili? ntani yifo yoyipe yoRuhungu ntani Awake! Sinzi soyimbapiratjangwa eyi kuvhura o yi resere ndi o yi purakene koIntaneta ndi kuvhura o yi kwateke morupe ro-MP3, PDF ndi EPUB. Kuvhura o nduruke ko mapepa gongandi o ka pe ko owo vana yi hara meraka lyawo. Pwa kara novidiyo momaraka goyipurupuru. Kuvhura hena o gwane ko mazwi gereso ndi goyidanauka yomoBibeli nononsumo edi no vhura kupurakena.

Mauzera gokuhamena Nombangi daJehova. KoIntaneta zetu kutura ko hena yihorokwa yoyipe ntani novidiyo dokutarera kuhamena yirugana yetu yomouzuni mudima ntani neyi yina kuhorokera Nombangi daJehova nevatero eli atu gava kovantu. Kuvhura o gwane ko madiviso kuhamena yigongi yetu ntani mauzera gokuhamena noaderesi doNobeteli detu.

Kupitira moIntaneta, ose kuna kuhanesa usili womoBibeli mouzuni mudima. Vantu nakunye kuna kugwanena mo uwa. Ose kuna kukanderera asi ‘mbudi zaKarunga zi genderere kulihana’ mouzuni mudima mokufumadekera po Jehova.—2 Vatesaronika 3:1.

• Ngapi aderesi www.pr2711.com zina kuvatera vantu wovanzi va lironge usili womoBibeli?

• Yisinke ono hara kutara koIntaneta zetu?