SIRONGWA 15
Morwasinke no twikilira kulironga kuhamena Jehova?
1. Ngapi ngo gwanena mo uwa mokutwikira kulironga Bibeli?
Marongo goBibeli wa lironga mosifo esi ga nkondopeka eharo lyoge lyokuhara Jehova. Wa hepa kutwikira kunkondopeka eharo olyo. (1 Peturusa 2:2) Mokukagwana mwenyo gwanarunye wa hepa kutwikira kuhedera pepi naKarunga pokulironga Nonkango dendi.—Resa Johanesa 17:3; Juda 21.
Ngomu ono kulironga kuhamena Karunga yimo ngali nkondopara epuro lyoge. Epuro ngali ku vatera o hafese Karunga. (Vahebeli 11:1, 6) Alyo ngali ku tumangeda o litezurure nokurundurura mparukiso zoge monaruwa.—Resa Yirugana 3:19.
2. Ngapi vapeke nava gwanena mo uwa mediwo lyoge lyokudiva Karunga?
Kuvhura o kare nelikwatakano lyewa unene naJehova
Natuvenye kwa hara kutantera ko vakwetu yininke eyi twa lironga. Ngomu ono kutwikira kulironga, ngo diva kuruganesa Bibeli mokufaturura epuro lyoge mwaJehova nombudi zongwa.—Resa Varoma 10:13-15.
Sinzi sovantu kuhova kutantera ko mbudi zongwa vakwaawo ndi vanekoro. Nye yi rugana nawa. Mevango lyokuvatantera asi eyi va pura epuko, va tantera kuhamena matumbwidiro gaKarunga. Diworoka asi eyi nayi koka vantu kuna kara nkareso zoge zongwa kupitakana eyi no uyunga.—Resa 2 Timoteusa 2:24, 25.
3. Elikwatakano musinke ngo hafera naKarunga?
Kulironga Nonkango daKarunga ngayi ku vatera o pameke elikwatakano lyoge nendi. Moruhura ngo ya kara melikwatakano lyewa unene naJehova. Ntani ngo ya hama kepata lyendi.—Resa 2 Vakolinte 6:18.
4. Ngapi no twikira kupameka elikwatakano lyoge naKarunga?
Pokutwikira kulironga Nonkango daKarunga ngo pameka elikwatakano lyoge nendi. (Vahebeli 5:13, 14) Pura gumwe goNombangi daJehova a ku ronge Bibeli pokuruganesa buke Yinke azi rongo Bibeli sili? Ngomu ngo twikira kulironga Nonkango daKarunga, yimo ngo gwana ruhafo meparu.—Resa Episarome 1:1-3; 73:27, 28.
Mbudi zongwa kwa tunda kwaJehova, Karunga goruhafo. Nsene o hedera pepi novantu vendi, ngo hedera pepi nendi. (Vahebeli 10:24, 25) Pokutwikira kuhafesa Jehova, ove kuna kukwaterera komwenyo gwanarunye gosili. Kuhedera pepi naKarunga kuna kara sininke somulyo po.—Resa 1 Timoteusa 1:11; 6:19.