Jakopo ga gwene upingwa

Isaka kwa kere nonomvhura 40 apa va likwere naRepeka. Age kwa mu here unene. Konyima va ya kere novana wovamati vavali wovamapange.

Gomukondi Esau ano gomunona Jakopo. Esau kwa here kusana yikorama. Nye mumbyendi Jakopo kwa here kukara pembo.

Posiruwo sina nsene guhyawo ana fu, mbeli nga gwana evango lyenene noyimaliwa yoyinzi. Ngava yi tumbura asi upingwa. Mepata lyaIsaka, upingwa kwa kwaterere mo hena etumbwidiro eli Jehova ga tanterere Abirahamu. Esau kapi ga pakerere mbili matumbwidiro ogo, nye Jakopo ga divire asi matumbwidiro ogo mulyo.

Ezuva limwe Esau kwa zire a ka sane ezuva nalinye, ta ka tengura age ana roroka. Ta ya gwana Jakopo kuna kutereka, makura ta mu tantere asi: ‘Nzara nina kuzuvha! Pe nge ko oyo ono kutereka!’ Jakopo ta mu limburura asi: ‘Tani ku pe, nye pomuhowo ntudi to pe nge upingwa woge.’ Esau ta tanta asi: ‘Kapi nina kara nosinka soupingwa wange, gusa tupu, ame kuna hara tupu kulya.’ Eyi ga rugene Esau kwa kere sininke sosiwa ndi? Hawe. Esau kwa geve sininke sosiwa po unene morwa nondya.

Apa ga kurupire Isaka, age kwa here kutungika munwendi gombeli. Nye Repeka ga vaterere Jakopo, munwendi gomunona po a gwane etungiko. Apa ga yi zuvhire Esau, ta handuka unene nokutokora kudipaga mumbyendi. Isaka naRepeka kwa here kupopera Jakopo yipo va mu tanterere asi: ‘Dukira kwa hekuroge Rabani dogoro noku ngali litura ehandu lyamukuroge.’ Jakopo kwa purakenene epukururo lyovakurona vendi makura ta dukire koHarani.