Mosesa kwa horowere po kukarera Jehova

MoEgipite, epata lyaJakopo kwa ya li divire asi Vaisraeli. Apa ga fire Jakopo naJosefa, hompa gomupe Farawo ta tameke kupangera. Age kwa kere nowoma asi Vaisraeli ngava kara nononkondo kupitakana Vaegipite. Yipo ga tulire Vaisraeli va kare vapika. Age kwa va sininikire va rugane nodopi nokurugana unene momapya. Moomu va va hepekere va rugane unene, yimo hena va liretere unene. Farawo kapi ga yi here, yipo ga geve mpangera asi vakeke wovagara woVaisraeli va va dipage. Gazara tupu woma ou va kere nawo Vaisraeli!

Mukadi goMuisraeli gedina Jogebedi kwa hampurukire mukeke gomumati. Mokumupopera, makura ta mu tura mosimbamba nokukamuhoreka pokatji konombu momukuro gwaNili. Mukurwendi Miliyama, ta sikama pepi a tare eyi nayi horokera mukeke.

MunwaFarawo gomukadi kwa zire komukuro aka likuhwe makura ta mono simbamba. Apa ga si kudumwine ta gwana mo mukeke ana kulira ta mu fire nkenda. Miliyama ta mu pura asi: ‘Ni ka ku retere mukadi ogu nga ku zamwekera ogu mukeke ndi?’ Apa munwaFarawo ga limbwilire asi nawa tupu, Miliyama ta ka zigida ozina, Jogebedi. MunwaFarawo ta tantere mukadi ogo asi: ‘Gusa ogu mukeke, o ka mu zamwekere nge, ngani kufuta.’

Munona ogo apa ga kulire, Jogebedi ta mu twara kwamunwaFarawo, ogu ga ka mu rukire edina Mosesa nokumurera ngwendi munwendi. Mosesa kwa mu rerere ngwendi hompagona ntani ga gwene nayinye eyi ga here. Nye kapi ga divarere Jehova. Mosesa ga yi divire asi age Muisraeli kapisi Muegipite. Ntani ga horowere po kukarera Jehova.

Apa ga kere nonomvhura 40, Mosesa kwa tokwere kuvatera Vaisraeli vakwawo. Apa ga mwene Muegipite kuna kutoona Muisraeli, Mosesa ta toona Muegipite ta fu. Makura ta mu vhumbike. Apa ga yi zuvhire Farawo, ta hetekere ko kudipaga Mosesa. Mosesa ta tjwayukire kosirongo saMidiyani. Jehova ga ka mu pakerere mbili.