Sitetu pEfuta lyEgeha

Apa tupu Farawo ga zuvhire asi Vaisraeli vana pwaga mo moEgipite, ta livere kweyi ga va sigire va ze. Age kwa tanterere vakwayita vendi asi: ‘Guseni turukara natunye toyita, tu va kwame! Ngano kapi ka tu va sigire va ze.’ Farawo novantu vendi tava tameke kusikura Vaisraeli.

Jehova kwa pitisilire vantu vendi pokuruganesa eremo mutenya, ano masiku mundiro. Age kwa va tanterere va vyuke kEfuta lyEgeha nokukadika kamba.

Makura Vaisraeli tava mono Farawo novakwayita vendi kuna kuvasikura. Vakwayita woVaegipite kwa konderekedere Vaisraeli pepi nefuta. Makura Vaisraeli tava lilire Mosesa asi: ‘Tatu fu! Ngano wa tu sigire tupu moEgipite.’ Nye Mosesa ta va tantere asi: ‘Mwa ha tjira! Ndindireni mu mone omu Jehova natu popera.’ Mosesa ga huguvarere mwaJehova, ndi ngapi?

Jehova kwa tanterere Vaisraeli va zungurure kamba. Masiku ogo, Jehova ta tura eremo pokatji koVaegipite noVaisraeli. Koruha roVaegipite kwa sovaganene, nye koVaisraeli kwa kere uzera.

Jehova ta tantere Mosesa a gonwene kuwoko kwendi pontunda zefuta. Makura Jehova ta pepesa mpepo zonene masiku nagenye. Mema gemefuta taga ligaunuka, mokatji tamu kara nzira. Mbunga zoVaisraeli tazi vindakana pevhu lyekukutu pokatji komakuma gomema, va ze mesinya mwina.

Vakwayita vaFarawo tava kwama Vaisraeli pevhu lyekukutu. Makura Jehova ta piyaganeke vakwayita woVaegipite. Makoso goturukara twawo taga zupauka ko. Makura Vakwayita ta va zigire asi: ‘Tu va dukeni! Jehova yige ana kuvarwira mo.’

Jehova ta tantere Mosesa asi: ‘Gonwena kuwoko koge pontunda zefuta.’ Makura mema taga kudumike vakwayita woVaegipite. Farawo novakwayita vendi navenye kwa fire. Kwato ogu ga parukire po.

Ano kesinya kwina lyefuta, mbunga zonene kwa hamberere Karunga norusumo oru asi: “Dimbireni HOMPA, yeeyi age munene unene, nonkambe novarondi vado ga yi zugumina mefuta.” Apa va dimbire, vakadi kwa dene oku tava siki yiumba. Nkenye gumwe kwa hefe morwa kwa va parwire.