Jehova kwa pere Simisoni nonkondo

Vaisraeli wovanzi tava tameke hena kukarera yikarunga yoyimpempa, Jehova yipo ga pulisilire Vafilisiti va pangere sirongo soVaisraeli. Nye pwa kere Vaisraeli vamwe ava va here Jehova. Gumwe gwawo, Manowa. Nage namukandedi kapi va kere nomuna. Ezuva limwe Jehova ta tumu muengeli kwamukadaManowa nokumutantera asi: ‘Ngo kara nomunona gomumati. Age nga popera Vaisraeli koVafilisiti. Age nga kara Munasili.’ Ono diva asi wolye va kere Vanasili ndi? Awo kwa lisigire novakareli vaJehova vakwawo. Vanasili kapi ngava va pulisire va kurure nohuki dawo.

Manowa namukandedi kwa ya retere munona, tava mu ruku Simisoni. Apa Simisoni ga kulire, Jehova kwa mu pere nonkondo. Ezuva limwe, Simisoni kwa dipagere nyime nomawoko. Simisoni kwa dipagere hena Vafilisiti 30. Makura Vafilisiti tava mu nyenge ntani kwa here va mu dipage. Ezuva limwe apa Simisoni ga rere mositata Gasa, Vafilisiti tava zi pomavero gositata va mu vandere asi va mu dipage. Nye pokatji komasiku, Simisoni ta pinduka, ta ka dura mavero gositata. Taga likambeke a ga tware keguru lyondundu zaHeburoni.

Vafilisiti yipo va zire komukadona Delira ogu ga vandekerere Simisoni nokukamutantera asi: ‘Ngatu kufuta yimaliwa yoyinzi nsene no tu tantera oku da kara nonkondo daSimisoni. Tuna hara kumukwata tu mu ture modorongo.’ Delira kwa here yimaliwa, makura ta pura. Pomuhowo, Simisoni ta nyoka kumutantera oku da kara nonkondo dendi. Nye Delira ta mu sininike dogoro ta mu tantere asi: ‘Nohuki dange kapi va di kurura rumwe morwa ame Munasili. Nsene va di kurura, kapi tani kara hena nononkondo.’ Ngoso Simisoni ga lipukire kutantera Delira oku da kara nonkondo dendi ndi?

Makura Delira ta tantere Vafilisiti asi: ‘Nina diva oku da kara nonkondo dendi!’ Delira ta ninki Simisoni a rare pomatungi gendi, nokupura gumwe a kurure nohuki dendi. Delira ta zigire asi: ‘Simisoni, Vafilisiti vana wiza!’ Apa ga pindukire Simisoni, kapi ga kere hena nononkondo. Vafilisiti tava mu kwata, tava mu twiza meho makura tava ka mu tura modorongo.

Ezuva limwe, Vafilisiti wovanzi kwa pongere montembeli zakarunga gwawo Dagoni, nokuzigira asi: ‘Karunga gwetu ga tu vatera tu funde Simisoni! Pwageseni Simisoni! A ya tu danene po.’ Tava mu sikameke pokatji konongundi dononene mbali, oku tava mu swaura. Simisoni ta kanderere asi: ‘Jehova, pe nge ko hena nonkondo.’ Posiruwo oso, nohuki daSimisoni nado dina kuru. Ta sindike nongundi dontembeli nononkondo. Etungo nalinye ta li gu, vantu navenye ava va kere montembeli tava fu, Simisoni nage ta fu.