Eheteko kondundu zaKarumeli

Uhompa woVaisraeli womazimo murongo kwa kere novahompa wovanzi wovadona, nye Ahaba yige ga donapere po unene. Age kwa kwere mukadi gomudona ogu nga karere Bara. Edina lyendi Jesebeli. Ahaba naJesebeli kwa ninkisire sirongo si zure ukareli waBara nokudipaga vaporofete vaJehova. Yisinke ga rugene ko Jehova? Age kwa tumine muporofete Eliya kwaAhaba.

Eliya kwa tanterere hompa Ahaba asi morwa udona ou ga rugana, kapi ngamu kara mvhura moIsraeli. Vantu kwa fire nzara morwa mvhura kapi za rokere ure wokupitakana ponomvhura ntatu. Jehova ta tumu hena Eliya kwaAhaba. Hompa Ahaba ta tanta asi: ‘Ove mupiyaganeki. Nyove wa ninkisa mvhura zi dire kuroka.’ Eliya ta limburura asi: ‘Kapisi nyame. Nye nyove morwa yeeyi o karere Bara. Tu hetekeni tu tare. Pongeka Vaisraeli novaporofete vaBara va ponge kondundu zaKarumeli.’

Makura navenye tava ya pongo kondundu. Eliya ta tanta asi: ‘Tokoreni. Nsene asi Jehova yige Karunga, mu kwameni. Ano nsene asi Bara yige karunga mu kwameni. Tatu rugana ngesi. Vaporofete vaBara 450 va wapaike nzambo va kanderere kwakarunga gwawo, name ni wapaike nzambo ni kanderere kwaJehova. Karunga ogu na limbwilisa mundiro yige Karunga gosili.’ Vantu kwa yi kwatesere ko.

Vaporofete vaBara tava wapaike nzambo. Ezuva nalinye tava kanderere kwakarunga gwawo nokutanta asi: ‘Ani Bara, tu limburura!’ Apa ga dilire kulimburura, Eliya tava zoro asi: ‘Kanderereni unene! Nampo kuna rara, zendeni mu ka mu pindure.’ Vaporofete vaBara kwa twikilire kukanderera dogoro ngurova. Nye Bara kapi ga limbwilire.

Eliya ta wapaike nzambo, ta zi tura posizambero ta tjire po mema. Makura ta kanderere asi: ‘Jehova, lidivisa kovantu ava asi nyove Karunga gosili.’ Poopo ngoso, Jehova ta tumu mundiro gu tunde meguru nokuhwika nzambo. Vantu tava zigire asi: ‘Jehova yige Karunga gosili!’ Eliya ta tanta asi: ‘Kwateni vaporofete navenye vaBara!’ Mezuva lyoolyo, vaporofete vaBara 450 kwa va dipagere.

Apa karemo ka monekere, Eliya ta tantere Ahaba asi: ‘Mvhura kuna kuwiza. Ronda mokarukara koge o ze kembo.’ Eguru tali zura maremo, mpepo tazi pepe, mvhura zonene ta zi tameke kuroka. Makura rukukutu ta ru haga. Ahaba kwa genderesere karukara kendi. Nevatero lyaJehova, Eliya ta duka a pite komeho zokarukara! Maudigu gaEliya yipo ga hagerere poopo ndi? Tatu ka yi zogera mosirongwa sokukwama ko.