Mupitisili govakwayita nomukadonagona

Mukadonagona goMuisraeli kwa mu twere koSiliya, ure nembo lyawo. Age kwa ka mu kwete mukwayita goMusiliya, makura ta ya kara mukareli gwamukadaNamani, mupitisili govakwayita. Mukadonagona nga karere Jehova, nampili ngomu ga kere novantu ava ngava dili kukarera Jehova.

Namani kwa verere uvera woudona unene wosipapa. Mukadonagona kwa here kumuvatera. Ta tantere mukadaNamani asi: ‘Na diva ogu na verura mugara goge. MoIsraeli, mwa kara muporofete gwaJehova gedina Elisa. Age kuvhura kuverura mugara goge.’

MukadaNamani ta ka tantera mugara gwendi eyi ga mu tanterere mukadonagona. Namani makura ta zi kwaElisa. Namani kwa here Elisa a mu tambure nefumadeko. Nye Elisa kapi ga mu uyungisire, ta tumu mukareli gwendi a ka morore Namani nokumutantera asi: ‘Zende o ka likuhwe momukuro gwaJorodana rutano-naruvali. Makura to ka veruka.’

Oyo kwa handukisire Namani. Ta tanta asi: ‘Ame kuna gazara asi muporofete na verura nge pokukanderera kwaKarunga gwendi oku ta kwatagura poyironda yange. Nye age yiyo ana tantere nge asi ni ze komukuro gomoIsraeli. Ose kwa kara nonomukuro donongwa moSiliya. Ngano yimo nina ka likuhwa.’ Nehandu, Namani ta ka za.

Nye vakareli vendi tava mu vatere a gazadare ko nawa. Tava mu tantere asi: ‘Ove kuvhura kurugana nkenye eyi yipo o veruke. Eyi ana ku tantere muporofete o rugane ureru. Morwasinke ono kudilira kuyirugana?’ Namani ta limburukwa. Ta zi komukuro gwaJorodana ta ka divira mo rutano-naruvali. Apa ga divilire sikando sautano-naruvali ta fumbuka age ana veruka. Age kwa hefe, ta tengura kwaElisa a ka mu pandure. Namani ta tanta asi: ‘Jehova yige Karunga gosili.’ Omu ono kugazara, ngapi ga lizuvhire mukadonagona gwina apa Namani ga ka tengwire age ana veruka?