Uradi waJehoyada

Jesebeli kwa kere nomuna gomukadona Ataliya, ogu nga rugana yininke yoyidona ngwendi ozina. Ataliya kwa mu kwere hompa gwaJuda. Apa ga fire mugara gwendi, munwendi ta kara hompa. Ano apa ga fire munwendi, Ataliya ta litura mwene a kare mupangeli gwaJuda. Yipo ga hetekerere ko kudipaga navenye vemezimo lyahompa nava va here kupangera, kukwatera mo vatekuru vendi. Vantu kwa mu tjilire.

Mupristeli gomunene Jehoyada namukadendi Jehoseba, va yi divire asi eyi ga rugene Ataliya yidona unene. Awo kwa tulire eparu lyawo mosiponga pokuhoreka mutekurwa Ataliya gomugara, Jowasi. Tava ka mu rerera montembeli.

Apa Jowasi ga kere nonomvhura ntambali, Jehoyada ta tumine marenga noVarevhi nokuvatantera asi: ‘Nomeneni mavero gontembeli, ntani mwa ha pulisira nkenye ogu a hwilire mo.’ Makura Jehoyada ta dwareke Jowasi nkata zosiuhompa komutwe. Vantu tava zigire asi: ‘Hompa a kare nomwenyo gomure!’

Hompa gomukadi Ataliya apa ga zuvhire vantu kuna kuzigira makura ta zi kontembeli. Apa ga ka mwene hompa gomupe ta zigire asi: ‘Ekumbagero! Ekumbagero!’ Vapitisili tava kwata Ataliya va ka mu dipage. Nye ngapi udona ou ga retesere po mosirongo?

Jehoyada kwa vaterere vantu va ture po egwanekero naJehova, nokutumbwidira asi ngava mu karera gelike. Makura ta tantere vantu va zonagure po ntembeli zaBara nomafano govakarunga. Age kwa tulire vapristeli noVarevhi va rugane montembeli yipo vantu va karere Jehova. Age kwa tulire vanomeni pevero va takamese asi mu dire kuhwilira vantu wokudira kukuhuka. Makura Jehoyada novapitisili tava twara Jowasi mombara nokukamutura posipundi souhompa. Vantu womoJuda kwa hefe. Awo kwa karerere Jehova, kapi va kweme hena udona waAtaliya ntani noukareli waBara. Nove kuvhura o yi kwatese ko asi uradi waJehoyada wa vaterere vantu wovanzi ndi?