Josiya kwa here Veta zaKarunga

Apa Josiya ga kere hompa gwaJuda age nomvhura dendi ntano-nantatu. Posiruwo sina, vantu ngava rugana umpure nokukarera yikarunga yomafano. Apa ga kere nonomvhura 16, ta tameke kulironga omu na karera Jehova monkedi zouhunga. Apa ga kere nonomvhura 20, yipo ga tamekere kuzonagura po yikarunga yomafano noyizambero yayo mosirongo nasinye. Ano apa Josiya ga ya kere nonomvhura 26, ta tura po mawapaiko gokuwapukurura ntembeli.

Mupristeli gomunene Hilikiya, kwa gwene buke zoveta zaJehova montembeli, nampo zeezi ga tjenge Mosesa. Hamutjanga Safani ta reta buke ozo kwahompa Josiya nokuzimuresera. Apa Josiya ga zuvhire nonkango odo, ta yi dimburura asi vantu kapi va limburukwire Jehova nomvhura dononzi. Makura ta tantere Hilikiya asi: ‘Jehova ana tu handukire. Zende o ka uyunge nendi. Jehova natu tantera eyi natu rugana.’ Jehova ta limburura kupitira momuporofete Hulida asi: ‘Vantu vaJuda va zumba nge. Ngani va tengeka nye kapisi mosiruwo sahompa Josiya morwa ga linunupika.’

Apa hompa Josiya ga zuvhire mbudi ozo, ta zi kontembeli kumwe novantu navenye vaJuda. Makura ta va resere Veta zaJehova. Josiya novantu tava tumbwidire asi ngava limburukwa Jehova.

Vantu vaJuda kapi va dene Paska monomvhura dononzi. Nye apa Josiya ga resere moVeta asi Paska kuzidana rumwe nkenye mvhura, ta tantere vantu asi: ‘Ngatu dana Paska.’ Makura ta gava nonzambo dononzi nokuwapaika vadimbi va ya dimbe pontembeli. Mbunga nazinye kwa dene sipito soPaska, makura taku kwama sonomboroto da hana muhahu mazuva gatano-nagavali. Kutunda pomazuva gaSamwere, sipito saPaska kapi va si dana rumwe ngoso. Josiya kwa here unene Veta zaKarunga. Nove kuhafera kulironga kuhamena Jehova ndi?