Eudiso lyopoNdundu

Apa ga mene kuhorowora vapositoli 12, Jesus ta humburuka ko kondundu nokuza oku za pongere mbunga zonene. Awo kwa tundire moGalireya nomoJudeya nomoTirusi nomoSidoni nomoSiliya ntani mesinya mwina lyaJorodana. Awo kwa retere vaveli ntani nava ngadi hepeke nompepo donondona. Jesus ta verura navenye. Makura ta hingire konontere dondundu nokutameka kuudisa. Age kwa rongere eyi natu rugana nsene tuna hara kukara vakaume vaKarunga. Twa hepa kulironga kuhamena Jehova nokumuhara. Nye nokuvhura si kuhara Karunga nsene kapi twa hara vakwetetu. Twa hepa kukara nonkenda nombili nanavenye, kukwatera mo nonkore detu.

Jesus kwa tente asi: ‘Kapisi o hare tupu vakaume woge velike. Nye wa hepa kuhara nonkore doge nokugusira po vakweni kutundilira komutjima. Nsene gumwe ana ku handukisa, zende o ka hundire egusiropo. Tekura wopeke monkedi ezi ono hara va ku tekure.’

Jesus ga geve mapukururo gomawa kuhamena emona. Age kwa tente asi: ‘Mulyo unene kukara kaume kaJehova kupitakana kukara noyimaliwa yoyinzi. Yimaliwa kuvhura va yi vake, nye ukaume woge naJehova kwato gokuvhura kuuvaka. Hagekeni kukara nosinka kuhamena eyi nomu lya neyi nomu nwa ndi eyi nomu dwara. Tareni koyidira. Karunga nkenye apa kuyipa nondya yi lye. Sinka nokuvhura si kugwederera koukaro woge nampili ezuva limwe. Diworoka asi Jehova ga diva eyi wa hepa.’

Vantu kwa tetukire erongo lyaJesus, morwa vampitisili vawo womaukarelikarunga kapi ngava va rongo yininke yangoso. Morwasinke Jesus ga karere murongi gomunene? Morwa nayinye eyi nga rongo kwa tundilire kwaJehova.