Uporofete ou wa kara nomulyo gomunene

‘Mbudi zoNgwa ezi zoUhompa waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.’—MATEUSA 24:14.

VALIRONGI woBibeli nawo va yi kwatesa ko asi velise ozo mulyo unene. Azo mulyo morwa kwa singonona sirugana esi ngava rugana uzuni mudima. Ntani hena azo mulyo morwa kwa tumbura eyi va hepa kurugana Vakriste, sirugana sokuzuvhisa esi ngava hova tanko kudivisa mouzuni mudima ntani ngaku kwama sihorokwa esi ga tumbwire Jesus asi “uhura.”

Velise ozo kuna kusika mo naina. Nove kwa hamena mo morwa mbudi zamo zongwa kwa kwatera mo ezigido nerondoro. Azo kukuninka o ture po etokoro: To tambura Uhompa waKarunga ndi to u rwanesa. Etokoro eli no tura po tali kundama eparu lyoge nalinye.

Koneka yikaramo. Mazuva gongandi komeho va ka mu pampare Jesus, varongwa kwa mu wizilire nokumupura kuhamena meho. Awo kwa here kudiva kuhamena eturopo lyoUhompa waKarunga, ou nga uyunga nkenye apa Jesus. Awo hena kwa here kudiva kuhamena sidiviso “souhura wouzuni,” ndi eyi aga tumbura matoroko gamwe asi ehagero lyoyininke eyi youzuni.—Mateusa 24:3.

Pokuvalimburura, Jesus kwa pumbire asi ngapa kara yita yoyinene nerumbu nomauvera gomukagu nomakankamo gomanene gevhu. Age hena kwa tente asi kuvhuka koudona nga kuligwederera, ano varongi woyimpempa ngava pukisa wovanzi, ntani Vakriste wousili ngava va nyenga nokuvahepeka. Nadinye odo kwa kere nombudi donondona.—Mateusa 24:4-13; Rukasa 21:11.

Nye pwa kere hena mbudi zongwa. Jesus kwa uyungire nonkango edi tuna tumbura petamekero, nonkango edi da kundama vantu nomvhura dononzi. Nampili ngomu vantu va kwatesa ko mulyo gononkango daJesus, awo kapi va kwatesa ko eyi adi tanta. Yisinke mbudi zongwa? Yisinke Uhompa? Siruwoke ngau sika mo uporofete ou, ntani wolye ngava u sikisa mo? Yisinke “uhura”? Tu zeni tu ka yi konakone.

[Efano lyepepenuno 2]

Etjangururo lyoWashington lyomavangeli gane. Etjangwa lyaMateusa 24:14 kwa lididilika

[Ntundiliro zefano]

From the book Facsimile of the Washington Manuscript of the Four Gospels in the Freer Collection 1912