Eyi vamwe va uyunga ko kuhamena kukanderera
MARÍA kwa tanta asi: “Apa ani kanderere, ame kulizuvha asi Karunga name ana kara, ana kwata nge kewoko nokupitisira nge apa ani lizuvhu ngwendi na zumbana.”
RAÚL kwa tanta asi: “Mukadange kwa verere kankera nomvhura 13, makura ta fu. Ame kudiworoka omu ngani kanderere kwaKarunga nkenye ezuva ntani na lizuvhire asi age ga purakene nge. Eyi ya pere nge mbili.”
ARNE kwa tanta asi: “Ekanderero kuna kara uhwi wouwa ou Karunga ga pa vantu.”
Ekanderero kuna kara uhwi wokulikarera kwaMaría naRaúl naArne ntani navamwe. Awo kulizuvha asi kupitira mekanderero, kuvhura kuuyunga naKarunga nokumupandura ntani nokupapara evatero kwendi. Awo va yi pura nomutjima nagunye asi eyi za uyunga ko Bibeli kuhamena ekanderero, usili. Azo kutanta asi: “Yipo nye twa kerera nemanguruko kombinga zaKarunga, asi ta tu zuvhu ntene tu mu hundira eyi yokuliza nompango zendi.”—1 Johanesa 5:14.
Nye, wovanzi kuvadigopera kutambura eyi za uyunga ko Bibeli kuhamena ekanderero. Steve kwa faturura omu ga lizuvhire kuhamena kukanderera. Age kwa tanta asi: “Apa na kere nonomvhura 17, vakaume vange vatatu kwa fire koyimpagwa yivali yokulisiga, gumwe kwa fire ketuwa, ano vavali kwa fililire mefuta. Yisinke ga rugene Steve? Age kwa tanta hena asi: “Ame kwa kandererere kwaKarunga a tantere nge asi morwasinke yina horokere, nye kapi ga limbwilire nge. Makura yipo na lipulire asi: ‘Morwasinke nani kandererera?’” Wovanzi kulizuvha asi Karunga kapi a limburura makanderero gawo, makura awo va hageka kukanderera.
Pwa kara hena nokonda dimwe deyi vamwe ava lizuvhire asi kukanderera kapi aku va vatere. Vapeke kutanta asi mokumona asi Karunga ga diva eyi twa hepa ntani nomaudigu getu, kapisi hepero tu yi mu tantere.
Vamwe hena kutanta asi Karunga kunyoka kupurakena komakanderero gawo morwa mapuko aga va rugene nare. Jenny kwa tanta asi: “Ame kwa lizuvhire ngwendi sininke somawoko-woko tupu. Ame kwa rugene yininke eyi na ya liverere, yipo na litanterere nyamwange asi Karunga kapi ga wapera kupurakena nge.”
Ove ngapi o lizuvhu kuhamena kukanderera? Nsene nove wa kara noyinka ndi nomasinganyeko kuhamena kukanderera, kuvhura o gwane ehengagwido pokudiva asi Bibeli kugava malimbururo. Kara nehuguvaro asi eyi za uyunga ko Bibeli kuhamena ekanderero,a kuvhura yi ku vatere o gwanene malimbururo komapuro gwendi gaaga:
Karunga kuzuvha makanderero getu ndi?
Morwasinke a dilire kulimburura makanderero gamwe?
Monkedi musinke no kanderera yipo a ku zuvhe?
Ngapi makanderero naga ku vatera?
a MoBibeli kwa kara mo makanderero gomanzi govakareli vaKarunga, kukwatera mo gaJesus Kristusa. Matjangwa goRuhebeli, aga ga divikwa asi Etestamende Lyekurukuru kwa kara mo makanderero gokupitakana 150.