Esimwititi 46
Makuma gaJeliko
YISINKE yina kuganda makuma aga gaJeliko? Kuna kumoneka ngwendi boma zonene zina ga gwire. Nye momazuva gena kapi va kere nonoboma; nampili nomauta si gaaga. Aso kuna kara sitetu simwe hena saJehova! Tu lirongeni asi ngapi omu sa horokere.
Purakena kweyi Jehova ana kutantera Josuwa: ‘Ove novakwayita woge tomu kunduruka sitata. Tomu si kunduruka rumwe mezuva, momazuva gatano-nalimwe. Simbeni sikesa segwanekero. Vapristeli vatano-navavali va pite komeho zaso oku tava fuda nombinga dawo.
‘Mezuva lyautano-nauvali tomu kunduruka sitata rutano naruvali. Makura tomu twarerekeda kufuda nombinga, ano navenye va kona kuzigira ekugo lyoyita lyenene. Makura makuma gositata taga gu!’
Josuwa novantu navenye tava rugana eyi ga tente Jehova. Apa vana kukunduruka, navenye teete. Kwato ogu ana kuuyunga nampili nkango zimwe. Kuzuvha ko ntudi muhagaro gwefudo lyonombinga nonompadi. Nonkore dovantu vaKarunga moJeliko dina tukuka. To mono rugodi rorugeha runa kuzenzerera pekende ndi? Ekende lyonzugo zalye lina? Yimo, Rahabu kwa rugene eyi da mu tanterere nondadi mbali asi a yi rugane. Ekoro lyendi nalinye kuna kara nage monda oku tava tarere.
Mouhura, mezuva lyautano-nauvali, konyima zokukunduruka sitata rutano-naruvali, nombinga tadi hagara, vakwayita tava zigire, ano makuma taga gu. Josuwa makura ta tanta asi: ‘Dipageni navenye ava vana kara mositata makura mu si hwike. Hwikeni nayinye. Pungureni po tupu ntudi sisiliveli nongorodo nongoporo noyivera, makura mu yi ture memona lyaJehova.’
Josuwa ta tantere nondadi mbali asi: ‘Zendeni membo lyaRahabu, mu ka mu pwagese mo nekoro lyendi nalinye.’ Rahabu nekoro lyendi kwa zowokere ngomu tupu da mu tumbwidilire nondadi.