Esimwititi 113

Paurusa moRoma

TARA malyenge aga vana manga Paurusa, ntani tara hena mukwayita goMuroma ogu ana kumukunga. Paurusa munadorongo moRoma. Age kuna kundindira dogoro hompa gwaRoma nga tokore asi yinke nava mu rugana. Posiruwo oso ana kara munadorongo, vantu vana va pulisire mokuyamudingura.

Konyima zomazuva gatatu kutunda apa Paurusa ga ya sikire moRoma, ta tumine vampitisili vamwe woVajuda va ya mu mone. Ngoyitundwamo, Vajuda wovanzi moRoma tava wiza. Paurusa ta va zuvhisire kuhamena Jesus nouhompa waKarunga. Vamwe tava pura nokukara Vakriste, nye vamwe kapi vana kupura.

Paurusa ta zuvhisire hena vakwayita wokulisiga-siga owo vana kara nosirugana sokumukunga. Monomvhura mbali edi ana kara Paurusa omu ngomunadorongo, ta zuvhisire navenye ava vana mu vhulika. Ngoyitundwamo, nava vemembo lyahompa gwaRoma tava zuvhu mbudi zongwa zoUhompa, ano vamwe vawo tava kara Vakriste.

Nye yilye mudinguli ogu ana kutjanga kositafura? Kuvhura o mu ngungunyikire? Yimo, yige Timoteusa. Timoteusa nage kwa kere modorongo morwa kuzuvhisa kuhamena Uhompa, nye ngesi ana manguruka hena. Ano ngesi ana wiza a ya vatere Paurusa. Ono diva asi yinke ana kutjanga Timoteusa? Tu tareni.

To diworoka yitata Filipi naEfeso mEsimwititi 110? Paurusa kwa vaterere mokutota po nombungakriste moyitata yina. Ngesi apa ana kara modorongo, Paurusa ta tjangere Vakriste ava nombilive. Nombilive edi modili moBibeli, ano kuditumbura asi Vaefeso ntani Vafilipi. Ngesi Paurusa kuna kutantera Timoteusa asi yinke na tjangera vakwawo woVakriste moFilipi.

Vafilipi kwa tekwire Paurusa nombili. Awo kwa mu tuminine uhwi omu modorongo, yiyo nye Paurusa ana kuvapandwira. Epafuraditusa yige mugara ogu ga retere uhwi owo. Nye ka verere dogoro kuhara kufa. Ngesi ana veruka hena ntani ana liwapaikire a tengure kembo. Age ta pitura mbilive ezi zokutunda kwaPaurusa naTimoteusa apa na tengura koFilipi.

Age simpe modorongo, Paurusa ta tjanga hena nombilive mbali edi twa kara nado moBibeli. Zimwe zokoVakriste womositata saKorosi. Ono diva asi ngapi omu ava zi tumbura? Vakorosi. Mbilive nkwawo zokomuntu gumwe, kaume kendi gedina Firemoni ogu nage ga tunga moKorosi. Mbilive kuna kara zokuhamena mukareli gwaFiremoni gedina Onesimusa.

Onesimusa kwa tjwayukire Firemoni nokuwiza koRoma. Monkedi zongandi Onesimusa ta zuvhu kuhamena ekaro lyaPaurusa modorongo omu. Ta wiza a ya mu tarere po, ano Paurusa ta zuvhisire Onesimusa. Siruwogona tupu, Onesimusa nage ta kara Mukriste. Onesimusa makura ta livere kweyi ga tjwayukire. Ono diva nye asi yinke ana tjanga Paurusa mombilive ezi zokwaFiremoni?

Paurusa ta pura Firemoni a gusire po Onesimusa. Paurusa ta tjanga asi: ‘Ame kuna kumutengwida koge. Nye ngesi age kapisi mukareli goge tupu. Age mukweni goMukriste gomuwa.’ Onesimusa apa ana tengura koKorosi ta pitura nombilive edi mbali, zimwe zokoVakorosi ntani nkwawo zokwaFiremoni. Kuvhura tupu tu gazadare ko asi ngapi omu ga hefe Firemoni apa ga divire asi mukareli gwendi nage ana kara Mukriste.

Paurusa apa ana tjangere Vafilipi naFiremoni, age ana kara nombudi zongwa sili. Paurusa ta tantere Vafilipi asi: ‘Ame kuna kumutumina Timoteusa. Nye name ntaantani ni ya mu tarere po.’ Ano kwaFiremoni ta tjanga asi: ‘Wapaikira nge ko evango ngani ya kare mo.’

Paurusa apa va mu mangwilire ta ka dingura vakwawo woVakriste momavango gomanzi. Nye konyima Paurusa tava ya mu tura modorongo hena moRoma. Sikando esi ana diva asi tava ka mu dipaga. Makura ta tjangere Timoteusa nokumupura a genderere kuwiza. Paurusa ta tjanga asi: ‘Ame kwa limburukwa kwaKarunga, ano Karunga nga ka pa nge mfeto.’ Nomvhura dongandi konyima zapa va dipagere Paurusa, Jerusarema tava zi zonagura po hena, ano sikando esi kwa kere Varoma.

Nye moBibeli mwa kara hena yininke yoyinzi. Jehova Karunga ta ninki mupositoli Johanesa a tjange nobuke dazo dokuhulilira, kutura ko buke zEhororo. Buke zoBibeli ezi kwa sanseka kuhamena meho. Tu lirongeni nye asi yinke yina kara komeho.

Yirugana 28:16-31; Vafilipi 1:13; 2:19-30; 4:18-23; Vahebeli 13:23; Firemoni 1-25; Vakorosi 4:7-9; 2 Timoteusa 4:7-9.