Egaununo 4

Nezimo nye age mudike

MARIYA kwa kere nomakwedi gatatu nezimo. Kuvhura o diworoke asi ga ka dingwire Elisabeta makwedi gokuhova, nye ga ka tengwire kembo koNasareta. Ezimo lyendi kwa kere pepi tupu mokumoneka kwanavenye modoropa zawo. Yosili, age kwa kere nosinka sosinene!

Eyi ya digopesere ukaro waMariya kuna kara asi age kwa mu vandekerere a kare mukadaJosefa, muhongi goyikungu. Ntani age ga divire asi moVeta ezi ga geve Karunga koVaisraeli, mukadi ogu va vandekera, nsene ana ka hondera, va hepa kumudipaga nomamanya. Ngapi omu ga vhulire kufatwilira Josefa kuhamena ezimo lyendi?

Mokumona asi Mariya kwa zire makwedi gatatu, Josefa kwa mu ndindilire nononkondo mokumumona. Apa va ligwene, Mariya ta mu tantere mbudi. Nampo ga hetekerere ko paapa ga hulira mokufaturura asi age kwa gwene ezimo kupitira mompepo zokupongoka zaKarunga. Nye gazadara ko tupu, esi kwa kere sininke sosidigu unene kwaJosefa mokuyipura.

Josefa ga divire nkareso zaMariya zongwa. Ntani hena age ga mu here unene. Nye nampili omu ga uyungire Mariya oyo, ayo kwa monekere ngwendi kwa mu sumbapekere mugara gwapeke. Simpe, Josefa kapi ga here va mu dipage Mariya nomamanya ndi asi a mu swaukise kombunga. Yipo nye ga tokwere mokumuzumba mokahore-hore. Momazuva gena, vantu wokulivandekera ngava va tara ngwendi valikwali, ano apo pwa hepere elizumbo mokuhagekesa po elivandekero.

Josefa ta gazadara koyuma oyo, makura ta zi a ka rare. Muengeli gwaJehova ta mu monekere konzodi nokutanta asi: “Wa ha tjira kugusa Mariya, a kare mukadoge, yeeyi eyi yina kara mwendi, koMpepo zoKupongoka ya tunda. Ano age nga hampuruka muna gomugara, ogu ngo ruka edina Jesus, yeeyi yige nga zowora muhoko gwendi kononzo dago.”

Eh, ruhafo musi ga kere naro Josefa apa ga pindukire! Ga hana kuliranga-ranga, age ga rugene moomu ga mu tanterere muengeli. Age kwa twere Mariya kembo lyendi. Yimo ngava rugana posiruwo oso mokulikida kwanavenye asi vana likwara paveta. Nye, apa ga kere Mariya simpe nezimo, Josefa kapi ga ligwanekerere nendi panyama.

Mariya kwa kere pepi nokuhampuruka, nye Josefa ta mu rondeke posindongili. Kupi ko oku va zire, ntani morwasinke va karerere norugendo nsene asi Mariya ntaantani a hampuruke? Rukasa 1:39-41, 56; Mateusa 1:18-25; Deuteronomium 22:23, 24.

▪ Sinka musinke ga kere naso Josefa apa ga divire asi Mariya ana kara nomarutu gavali, ntani morwasinke?

▪ Ngapi omu na vhura Josefa kuzumba Mariya nsene asi awo simpe kapi va likwara?

▪ Yisinke ngava rugana posiruwo oso mokulikida kwanavenye asi vana likwara?